ᔪᓓ 4, 2018 – ᒪᑭᕝᕕᐅᑉ ᐊᖓᔪᕐᖄᖓᑕ ᑐᖓᓕᖓ ᒪᑭᑕᒐᓱᒍᑎᑦᓴᓕᕆᓂᕐᓂᒃ ᐱᕙᓪᓕᐊᑎᑦᓯᒍᑎᖃᕐᓂᓄᑦ, ᐋᓐᑎ ᒨᖃᐅᔅ ᐃᑉᐸᓴᖅ ᖃᑎᖕᖓᓯᓚᐅᕐᐳᑦ Brian McNamara/ᐳᕃᔭᓐ ᒫᒃᓇᒫᕋᒥᒃ, ᐊᖓᔪᕐᖄᒪᕆᖓᓐᓂ Newfound Resources Ltd/ᓂᐅᕙᐅᓐ ᕆᓲᓴᔅᑯᑦ,. ᐃᖃᓗᓐᓂᐊᓂᕐᒥᒃ ᐱᓇᓱᐊᖃᑎᑦᑕ, ᑲᑎᖕᖓᓱᒍ ᓰᓐ ᔮᓐ ᓂᐅᕙᐅᓐᓛᓐᒥ ᕿᒥᕐᕈᖃᑎᒋᑦᓱᒍ ᖃᓄᐃᓕᒍᑎᐅᓯᒪᔪᓂᒃ 2017-2018 ᐊᕐᕌᒍᖓᓂ ᐃᖃᓗᓐᓂᐊᓇᕐᒥ ᐃᓱᓕᓐᓂᖃᓚᐅᕐᑐᒥᒃ ᒫᑦᔨ 31, 2018-ᒥ. ᓂᐅᕙᐅᓐ ᕆᓲᓴᔅᑯᓪᓗ ᒪᑭᕝᕕᓗ ᐱᓇᓱᖃᑎᒌᓲᑐᖃᐅᒻᒪᓃᒃ ᑲᑐᑦᔨᖃᑎᒌᑦᓱᑎᒃ ᐊᕐᕌᒍᑦ 15 ᐅᖓᑖᓄᑦ.
“ᐃᖃᓗᓐᓂᐊᓂᒃᑯᑦ ᓂᖏᕐᑕᐅᑎᕗᑦ ᐱᒻᒪᕆᐅᓂᖃᕐᐳᑦ ᖃᓄᐃᖕᖏᓯᐊᕐᑐᓴᐅᓂᖏᓐᓄᑦ ᐱᕙᓪᓕᖁᑎᑖᕐᑕᑐᖁᑎᑦᑕ ᑕᒪᓐᓇᓗ ᐊᖏᔪᒥᒃ ᐱᒻᒪᕆᐅᑎᑉᐸᕗᑦ ᐃᓅᖃᑎᖄᑦᓯᐊᓂᕗᑦ ᓂᐅᕙᐅᓐ ᕆᓲᓴᔅᑯᓐᓂᒃ” ᐅᖃᓚᐅᕐᑐᑦ ᐋᓐᑎ ᒨᖃᐅᔅ.
ᑕᕐᕋᒥᑦ ᑭᖑᕐᓚᑖᕆᕙᑦᑕᑕ ᐊᑭᖏᑦ ᓱᓕ ᐊᑭᓕᕐᑐᐊᖑᑦᓯᐊᖏᓐᓈᑐᑦ ᐊᒥᓱᖕᖑᐃᒋᐊᕐᓯᒪᓕᕐᒥᓱᑕᓗ ᑕᕆᐅᑉ ᐊᑭᐊᓂ ᓂᐅᕐᕈᓯᕐᕕᒋᓲᑦᑎᓂᒃ ᑕᒪᓐᓇᓗ ᐱᔪᓐᓇᓯᓯᒪᕙᕗᑦ ᓄᑖᓄᑦ ᐊᖁᕕᕋᐅᑎᓂᕐᓅᓕᖓᑦᓱᑎᒃ ᐊᖏᖃᑎᒌᒍᑎᑖᖑᕐᖃᒥᕐᑐᓄᑦ. ᑕᕐᕋᐅᑉ ᑭᖑᕐᓚᖁᑎᖏᑦ ᓂᐅᕕᐊᖑᓲᒻᒪᕆᐅᕗᑦ ᓭᓂᓰᑦ ᓄᓇᖏᓐᓂ ᑖᒃᑯᐊᓗ ᓭᓂᓰᑦ ᓄᓇᖏᑦ ᓂᐅᕐᕈᓯᕐᕕᒋᑦᓱᒋᑦ ᑲᔪᓯᔪᒥᒃ ᐱᕙᓪᓕᐊᑎᖏᓐᓇᐸᕗᑦ ᐱᓇᓱᒐᕐᑎᒍᑦ ᐊᖏᓕᕙᓪᓕᐊᖏᓐᓇᓱᑎᒃ ᐱᐅᓯᕆᕙᓕᕐᑕᑎᓐᓂ ᐊᕐᕌᒍᑦ ᐊᒥᓲᖕᖏᑐᑦ ᐊᓂᒍᕐᑎᓗᒋᑦ. ᐃᓚᖃᕆᐊᓪᓚᒥᑦᓱᑎᒃ, ᒪᑭᕝᕕᒃ ᐱᕙᓪᓕᐊᑎᑦᓯᒍᑎᖃᕐᓂᖓᓂᒃ ᐊᑦᑕᓇᖕᖏᑐᒥᒃ ᐃᓅᖃᑎᖃᑦᓯᐊᓂᕐᒥᒃ ᓄᓇᓕᕐᔪᐊᑕ ᓯᓚᑖᓂᒥᐅᓂᒃ. ᒪᑭᕝᕕᒃ ᓂᖏᕐᑎᑕᐅᓚᐅᔪᕗᖅ ᑮᓇᐅᔭᒻᒪᕆᓐᓂᒃ ᐅᓄᕐᓂᓕᓐᓂᒃ $7.2 ᒥᓕᐋᓐᓂᒃ ᐃᖃᓗᓐᓂᐊᓂᕐᒥᒃ ᐱᓇᓱᐊᖃᑎᒥᓄᑦ ᓂᐅᕙᐅᓐ ᕆᓲᓴᔅᑯᓐᓄᑦ ᐃᖃᓗᓐᓂᐊᓇᐅᑉ ᐊᕐᕌᒍᖓᓂ 2017-2018-ᒥᑦ.
ᑏᓯᒻᐱᕆ 2017-ᒥ, ᐱᐅᓯᖃᓲᑐᖃᐅᒐᒥ ᐊᕐᕌᒍᓂ ᐊᓂᒍᕐᑐᓂ, ᒪᑭᕝᕕᒃ ᐊᕕᖃᑎᒌᑎᑦᓯᒍᑎᖃᓚᐅᔪᕗᖅ ᑕᕐᕋᒥᐅᔭᓂᒃ ᑭᖑᕐᓚᓂᒃ ᐅᖁᒣᓐᓂᓕᓐᓂᒃ 8,790 kg-ᓂᒃ ᐊᑭᖃᕐᑎᓗᒋᑦ $170,000-ᓂᒃ ᐱᔭᐅᑎᓚᐅᔪᔭᒥᓂᒃ ᐃᓘᓐᓇᖏᓐᓄᑦ 14-ᓄᑦ ᓄᓇᓕᓐᓄᑦ ᐃᓚᐅᑎᓪᓗᒋᑦ ᐱᕙᓪᓕᖁᑎᑖᕐᑕᑐᑦ ᒪᓐᑐᔨᐊᒥ ᓄᓇᓯᒪᔪᑦ ᑕᒪᓐᓇ ᑌᒣᓘᕈᑎᒋᓚᐅᔪᔭᖓᑦ ᐃᓘᓐᓇᑎᒃ ᒪᒪᕐᑐᐊᐱᓐᓂᒃ ᓂᕆᖁᑦᓱᒋᑦ ᖁᕕᐊᓱᕝᕕᐅᑉ ᐅᓪᓗᖏᓐᓂ.
ᐁᕆᓕᐅᓚᐅᕐᑐᒥ, ᒪᑭᕝᕕᒃ ᑐᖕᖓᓱᑦᓯᔨᐅᓚᐅᔪᕗᖅ ᑐᖓᓕᕆᓕᕐᑕᖓᓄᑦ ᐃᒪᕐᐱᒥ ᑭᖑᕐᓚᓂᐊᕐᓂᒥᒃ ᐱᒋᐅᕐᓴᑎᑦᓯᒍᑎᓂᒃ ᐱᓇᓱᒍᑎᒋᓯᒪᓕᕐᑕᒥᓄᑦ ᐊᑑᑎᔭᐅᑎᓚᐅᔪᔭᒥᓂᒃ ᑕᕐᕋᒥ ᓄᓇᓕᖓᓂᒃ ᓴᓪᓗᐃᑦ ᓯᑕᒪᓂ ᐱᓇᓱᐊᕈᓯᕐᓂ. ᑖᓐᓇ ᐱᒋᐅᕐᓴᑎᑦᓯᓂᖅ ᐃᖏᕐᕋᑎᑕᐅᓲᖅ ᓄᓇᕗᑦ ᐃᒪᕐᐱᒥ ᐃᖃᓗᓐᓂᐊᓂᕐᓄᑦ ᐱᒋᐅᕐᓴᑎᑦᓯᕕᖁᑎᖓᓐᓄᑦ ᐊᐅᓚᑦᓯᖃᑕᐅᑎᓪᓗᒋᑦ Memorial University ᐃᓕᓐᓂᐊᕕᕐᔪᐊᖅ St. John’s-ᒥᑦᑐᖅ. ᑖᒃᑯᑎᒎᓇ ᐱᒋᐅᕐᓴᑎᑕᐅᓂᑎᒍᑦ ᐃᓕᓐᓂᐊᑕᒥᓂᒃ ᐱᔭᕆᐅᑦᓯᐊᑐᑦ ᐱᓇᓱᒍᓐᓇᓯᑎᑕᐅᓲᖑᑎᓪᓗᒋᑦ ᐃᖃᓗᓐᓂᐅᑎᓂ ᐅᒥᐊᓂ ᐃᖏᕐᕋᑎᑕᐅᔪᓂ ᐃᖃᓗᓐᓂᐊᓂᕐᒥᒃ ᐱᒐᓱᑦᑕᖃᖃᑎᑦᑎᓄᑦ, Newfound Resources Ltd./ᓂᐅᕙᐆᓐ ᕆᓲᓴᔅᑯᓐᓄᑦ.
ᖃᐅᔨᒋᐊᕐᕕᓴᖅ:
ᒍᐃᓕᐋᒻ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨ ᐊᒻᒪᓗ ᑐᓴᕋᑦᓴᓂᐊᕐᑎᓂᒃ ᐊᐅᓚᑦᓯᔨᐅᑦᓱᓂ
ᒪᑭᕝᕕᒃ
ᐅᖄᓚᐅᑎᖓ 819-964-2925
wtagoona@makivik.org
www.makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᒻᒪᕆᓐᓂᒃ ᕿᒻᒪᖁᑕᐅᒪᔪᓂᒃ ᑮᓇᐅᔭᕐᑕᖑᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑕᐅᒍᑎᕕᓂᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓇᑦᓯᓂᕐᒥᓗ ᑮᓇᐅᔭᓕᐅᕈᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᒻᒪᕆᓐᓂᒃ ᖁᕝᕙᑎᕆᒍᑎᑦᓴᕆᑦᓱᒋᓪᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ ᐱᑕᖃᕐᑎᓯᒍᑎᐅᓗᑎᒃ ᐃᑲᔪᕐᓯᒪᓂᕐᒥᒃ ᓴᕐᕿᑎᑕᐅᒋᐊᖃᓕᕐᐸᑕ ᐃᓄᐃᑦ-ᐃᖏᕐᕋᑎᓐᓂᐊᑕᖏᑦ ᐱᓇᓱᒉᑦ ᓄᓇᕕᒻᒦᑐᑦ, ᒪᑭᕝᕕᒃ ᖁᕝᕙᑎᕆᔨᐅᕗᖅ ᐃᓄᐃᑦ ᐃᓗᕐᖁᓯᖏᓐᓂᓗ ᐅᖃᐅᓯᖓᓐᓂᓗ ᐊᓯᐅᑎᑦᓯᑌᓕᓂᕐᓂᒃ ᐃᓚᖃᕐᒥᑎᓪᓗᒋᑦ ᐃᓗᓯᓕᕆᓃᑦ, ᖃᓄᐃᖕᖏᓯᐊᕐᓃᑦ, ᐊᔪᕐᓴᓂᕐᒥᓗ ᐱᑕᖃᓗᐊᕐᑎᓯᑦᑌᓕᓃᑦ, ᐃᓕᓐᓂᐊᕕᖃᕐᑎᓯᓃᓪᓗ ᐃᓄᑐᐃᓐᓇᓂᒃ ᓄᓇᓕᓐᓂ.