ᐅᕐᓱᐊᓗᑉ ᐊᑭᖓ ᖁᕝᕙᕆᐊᖕᖑᓱᑦᑐᖅ

ᑐᓴᕋᑦᓭᑦ
ᑰᔾᔪᐊᖅ, ᑯᐯᒃ, ᓯᑉᑎᒻᐱᕆ 6, 2018 – ᐅᕐᓱᐊᓘᑉ ᐊᑭᖓ ᐊᕐᕿᑕᐅᒪᓯᒪᕙᑦᑐᖅ ᓄᓇᕕᒻᒥ ᐅᕐᓱᐊᓗᓐᓂᐊᑎᖏᓐᓄᑦ ᐳᕐᑐᓯᒋᐊᓕᓚᐅᕆᕗᖅ ᓯᑉᑎᒻᐱᕆ 1-ᒥ $1.79-ᖑᓚᐅᕐᓱᓂ $2.03-ᖑᓚᖓᓕᕐᑎᓗᒍ ᖃᓪᓗᑎᒧᑦ ᐊᑕᐅᓯᕐᒧᑦ ᓄᓇᕕᐅᑉ ᓄᓇᓕᖏᓐᓂ ᐃᓗᓐᓇᖏᓐᓂ. ᑖᒃᑯᐊ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕᓗ ᒪᑭᕝᕕᑯᓗ ᐃᑲᔪᕐᓯᒍᑎᒋᓲᖏᑦ ᑖᒃᑯᑎᒎᓇ ᐅᕐᓱᐊᓗᒻᒧᑦ ᐃᑲᔪᕐᓯᒪᐅᑎᓕᐊᕆᓯᒪᔭᖏᑦᑎᒍᑦ ᐳᕐᑐᓂᖃᖏᓐᓇᑐᑦ $0.40-ᓂᒃ ᖃᓪᓗᑎᒧᑦ, ᑕᒐ ᐊᑭᖃᕐᑎᑕᐅᓂᐊᓕᕐᒪᑦ $1.63-ᓂᒃ ᖃᓪᓗᑎᒧᑦ ᑕᒪᒃᑯᓄᖓ ᐃᓚᐅᔪᕐᓄᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓄᑦ (ᐊᖏᖃᑎᒌᓐᓂᒧᑦ).

ᐅᕐᓱᐊᓗᒃ ᐊᑭᑐᔪᐊᓘᓂᖓ ᓄᓇᕕᒻᒥ ᑌᒣᓕᖓᑎᑕᐅᒻᒪᑦ, ᐃᓚᖓᑎᒍᑦ, ᑮᓇᐅᔭᕐᑐᕈᑎᐅᒋᐊᓪᓚᕆᐊᖃᓲᓄᑦ ᐅᕐᓱᐊᓗᒻᒥᒃ ᑕᒪᐅᖕᖓᑕᐅᑎᑦᓯᒍᑎᓄᑦ ᖃᓪᓗᓈᓂᑦ ᓄᓇᕕᐅᑉ ᓄᓇᓕᖏᓐᓄᑦ ᐊᒻᒪᓗ, ᐃᓛᑎᒍᑦ, ᑮᓇᐅᔭᕐᑐᕈᑎᐅᒋᐊᓪᓚᕈᓲᖑᒻᒥᒪᑕ ᐊᕐᕌᒍᓕᒫᒥ ᐅᕐᓱᐊᓗᖃᐅᑎᖃᕐᑎᓯᒋᐊᖃᓲᖑᓂᕐᒧᑦ. ᑲᕙᒪᑐᖃᒃᑯᓄᓪᓗ ᑯᐯᒃᑯᓄᓪᓗ ᑕᒃᓰᔦᒍᑎᐅᒋᐊᖃᓲᑦ ᐊᑐᕐᑎᑕᐅᓯᓲᖑᑦᓱᑎᓪᓗ ᑕᒪᐅᖕᖓᑕᐅᒌᕐᓯᒪᓕᑐᐊᕐᒪᑦ ᐅᕐᓱᐊᓗᒃ ᐊᒻᒪᓗ ᑮᓇᐅᔭᖃᕐᑎᓯᓂᕐᒧᑦ ᑮᓇᐅᔭᕐᑐᕈᑎᐅᒋᐊᖃᓲᖑᒻᒥᔪᑦ ᐃᓚᐅᑎᑕᐅᓂᐊᓕᕐᒪᑕ ᐅᕐᓱᐊᓘᑉ ᐊᑭᖓᓄᑦ ᓄᓇᓖᑦ ᐅᕐᓱᐊᓗᓐᓂᐊᑎᖏᓐᓄᑦ.

ᑖᒃᑯᐊ ᐅᕐᓱᐊᓗᒻᒧᑦ ᐃᑲᔪᕐᓯᒪᐅᑏᑦ ᐃᓚᒋᔭᐅᒻᒪᑕ ᑖᒃᑯᓄᖓ ᐱᖓᓲᔪᕐᑐᐃᓄᑦ ᓄᓇᓕᓕᒫᑎᒍᑦ ᐃᓄᒐᓱᐊᕐᓂᒧᑦ ᐃᑲᔪᕐᓯᒪᐅᑎᓕᐊᖑᓯᒪᔪᕐᓄᑦ ᑲᔪᑎᑕᐅᒪᓕᕐᑐᓂᒃ 2007-ᒥᓂᑦ. ᐃᑲᔪᕐᓯᒪᐅᑎᖃᓲᖑᒻᒥᒪᑦ ᐊᓯᖏᓐᓂᒃ ᒪᑯᓂᖓ ᓂᕿᓄᑦ ᐱᔭᐅᒋᐊᖃᓲᓄᓪᓗ ᐃᑲᔪᕐᓯᒪᐅᑎᖏᓐᓂᒃ, ᖃᖓᑦᑕᐅᑏᑦ ᐊᑭᑭᓪᓕᒋᐊᕐᑕᐅᒍᑎᖏᓐᓂᒃ, ᐃᓪᓗᒥᐅᑕᓂᒃ ᐱᒐᓱᐊᕐᑐᐃᑦ ᐊᒻᒪᓗ ᒪᙯᒍᑏᑦ ᐱᐅᒃᑯᑎᖏᓐᓄᑦ ᐃᑲᔪᕐᓯᒪᐅᑎᖏᓐᓂᒃ, ᓂᕿᑐᐃᓐᓇᖃᕐᑎᓯᒍᑏᑦ ᓄᓇᓕᓐᓂ ᒪᙯᑦᑎᓂᒃ ᓴᐳᒻᒥᔨᑎᒍᑦ ᐊᒻᒪᓗ ᐃᓄᒻᒪᕆᓐᓂᒃ ᐃᑲᔪᕐᓯᒪᐅᑎᓂᒃ. ᑕᒪᒃᑯᐊ ᐃᑲᔪᕐᓯᒪᐅᑏᑦ ᓇᓪᓕᐊᓅᓕᖓᓂᖏᑦ ᐊᓯᑦᔨᒋᐊᕐᑕᐅᑐᐃᓐᓇᕆᐊᖃᓲᖑᑦᓱᑎᒃ ᐊᑐᕐᑎᑕᐅᕐᖃᔦᕐᓱᑎᓪᓘᓃᑦ ᖃᖓᑐᐃᓐᓇᑯᑦ. ᑕᒪᒃᑯᓇᓂ ᐊᕐᕌᒍᓯᒪᓕᕐᑐᓂ, ᑕᒪᒃᑯᐊᓕᒫᑦ ᐃᑲᔪᕐᓯᒍᑎᐅᓲᑦ ᐊᑐᕐᑎᑕᐅᕙᓪᓕᐊᑐᐃᓐᓇᖃᑦᑕᓯᒪᓕᕐᑐᑦ ᓄᓇᕕᒻᒥᐅᓄᑦ.

ᑐᑭᓯᒋᐊᓪᓚᕈᒪᔪᖃᕐᐸᑦ ᐅᕐᓱᐊᓗᒻᒧᑦ ᐃᑲᔪᕐᓯᒪᐅᑎᓂᒃ ᐊᓯᖏᓐᓄᓘᓐᓃᑦ ᐃᓅᒐᓱᐊᕈᑎᓄᑦ ᐃᑲᔪᕐᓯᒪᐅᑎᓕᐊᖑᓯᒪᔪᓄᑦ, ᖃᕆᑕᐅᔭᒃᑯᑦ ᑕᑯᒋᐊᕈᓐᓇᐳᑎᑦ ᐅᕙᓂ:
http://www.krg.ca/quick-links/nunavik-cost-of-living-reduction-measures.

-30-

ᑐᑭᓯᓂᐊᕐᕕᓭᑦ