ᓇᐅᓕᒫᓂᑦ ᑐᓴᕐᑎᓯᒍᑎᒃ
ᔭᓄᐊᕆ 6, 2021 – ᑰᑦᔪᐊᖅ, ᓄᓇᕕᒃ –ᒪᑭᕝᕕᒃ ᐅᖃᕐᑐᖅ ᖃᒻᒥᑯᑦ ᑐᓴᕐᑎᓯᒍᑎᐅᓚᐅᔪᖅ ᑏᓯᒻᐱᕆ 11, 2020-ᒥᑦ ᑯᐯᒃ ᑲᕙᒪᖓᓄᑦ ᓄᓇᕕᐅᑉ ᓄᓇᖓ ᐊᖏᓂᓕᒃ 30,000 ᓯᒃᑭᑌᑦ ᑭᒃᓛᒥᑕᓂᑦ ᓴᐳᒻᒥᔭᐅᓂᖃᕐᓂᐊᓕᕆᐊᖓ ᒫᓐᓇᐅᑎᓪᓗᒍ ᓈᒻᒪᓈᕐᑐᖁᑎᒋᔭᐅᖕᖏᑐᖅ. ᐱᑦᔪᑎᐅᑎᓪᓗᒍ ᓄᓇᕕᒻᒥᐅᑦ ᐃᓄᖏᑦ ᖃᐅᔨᒋᐊᕐᕕᐅᖃᑦᑕᒪᑕ ᐃᓄᐃᑦ ᑲᕙᒪᑦᓴᖓᓅᓕᖓᔪᒥᑦ ᓄᓇᕕᒻᒥ.
ᒪᑭᕝᕕᒃ ᐱᓇᓱᐊᖃᑦᑕᑐᖅ ᐱᕙᓪᓕᐊᑎᑦᓯᓂᕐᒥᒃ ᓇᒻᒥᓂᖅ ᑲᕙᒪᑦᓴᓕᕆᓂᕐᒥᒃ ᓄᓇᕕᒻᒥ. ᐅᖄᖃᑎᖃᖃᑦᑕᓱᓂ ᑲᓇᑕᐅᑉ ᑲᕙᒪᖓᓂᑦ, ᑐᖕᖓᕕᒋᑦᓱᒍ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒃ, ᐊᑎᓕᐊᖑᓚᐅᔪᖅ ᒣ, 2019-ᖑᑎᓪᓗᒍ. ᐊᖏᖃᑎᒌᒐᓱᐊᕐᑏᑦ ᓯᕗᓕᕐᑎᖓ, ᓖᓴ ᖁᐱᕐᕈᐊᓗᒃ, ᐃᓚᖃᕐᓱᓂ ᒪᑭᕝᕕᐅᑉ ᐊᖓᔪᕐᖄᖓᓂᑦ ᓵᓕ ᒍᐊᒥᑦ ᓄᓇᓕᓕᒫᓂᑦ ᖃᐅᔨᒋᐊᕐᕕᖃᖃᑦᑕᓚᐅᕐᑑᒃ ᑐᓴᐅᑎᒃᑯᑦ ᓅᕕᒻᒥᕆᐅᑉ ᑏᓯᒻᐱᕆᐅᓪᓗ ᑕᕐᕿᖏᓐᓂᑦ. ᑕᒪᓐᓇ ᖃᐅᔨᒋᐊᕐᕕᖃᕐᓂᐅᖃᑦᑕᓚᐅᕐᑐᖅ ᓲᖑᔪᒻᒪᕆᒻᒥᑦ ᓄᐃᑦᓯᓚᐅᕐᑐᖅ ᓴᐳᒻᒥᔭᐅᓂᖃᓪᓚᕆᒋᐊᖓ ᓄᓇᕕᐅᑉ ᐃᓄᖏᑦ ᓇᒻᒥᓂᖅ ᑲᕙᒪᑖᕈᒪᓂᖓ.
ᑌᒣᒻᒪᑦ, ᒪᑭᕝᕕᐅᑉ ᐊᖓᔪᕐᖄᖓ ᒍᐊᑦ ᐅᖃᕐᓯᒪᔪᖅ, “ᐃᓚᐅᕕᖃᕐᓂᐊᖏᓪᓚᒍᑦ ᓇᓪᓕᐊᒍᓪᓘᓃᑦ ᐊᖏᖃᑎᒌᒍᑎᐅᓚᖓᔪᓄᑦ ᓄᓇᐅᑉ ᐊᑐᕐᑕᐅᓂᖓ ᐱᓪᓗᒍ ᓱᒋᐊᓪᓚᕖᕈᑦᔩᓚᖓᔪᓂᑦ ᐊᖏᖃᑎᒌᒐᓱᐊᕐᑎᑎᓐᓂᑦ. ᒪᓕᒐᓕᕆᓂᐅᑉ ᐃᓗᐊᒍᑦ, ᑯᐯᒃ ᑐᓴᕐᑎᓯᓂᕆᓚᐅᕐᑕᖓ ᓄᓇᐅᑉ ᓴᐳᒻᒥᐅᓂᖓᓅᓕᖓᔪᓄᑦ ᐊᑐᕐᓂᖃᓚᖓᖕᖏᑐᖅ ᒫᓐᓇᐅᑎᓪᓗᒍ.”
ᑏᓯᒻᐱᕆ 11-ᒥᑦ ᑯᐯᒃ ᓯᐊᒻᒪᑎᑦᓯᓂᕆᓚᐅᕐᑕᖓ ᓇᐅᓕᒫᓂᑦ ᑐᓴᕐᑎᓯᒍᒥᒃ ᐅᖃᕐᓯᒪᔪᖅ ᐱᓇᓱᐊᖃᑎᖃᕐᓂᒥᓂᑦ ᒪᑭᕝᕕᒥᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ, ᓇᔅᑳᐱᒃᑯᓂᑦ ᑳᒍᐊᒍᐊᑦᓯᑲᒫᒥᑦ, ᐊᒻᒪᓗ ᑯᔩᒃᑯᓂᑦ ᐊᓪᓚᓯᒪᒋᐊᖕᖓᐅᑎᖓᓂᑦ. ᐅᖃᕐᓯᒪᔪᖅ ᑯᐯᒃ ᑲᕙᒪᖓ ᑕᕐᓯᑐᐃᓯᒪᓂᐊᕐᓂᖓᓂᑦ “ᓯᑕᒪᐅᔪᕐᑐᓂᑦ ᓄᑖᓂᑦ ᓴᐳᒻᒥᔭᐅᓂᖃᕐᓂᐊᓕᕐᑐᓂᑦ ᐊᒻᒪᓗ ᐊᖏᓕᒋᐊᕆᓂᐊᕐᓂᒥᓂᑦ ᒪᕐᕉᒌᕐᑑᓂᒃ ᓄᓇᕕᒻᒥ ᓴᐳᒻᒥᔭᐅᓂᓖᓐᓂᒃ.”
ᒪᑭᕝᕕᐅᑉ ᐊᖓᔪᕐᖄᖓᑕ ᑐᖓᓕᖓ, ᐱᒍᑦᔨᕕᖓᓂᑦ ᐊᕙᑎᓕᕆᓂᕐᒥᒃ, ᐆᒫᔪᓕᕆᓂᕐᒥᒃ ᖃᐅᔨᓴᕐᓂᒥᓪᓗ, ᐋᑕᒥ ᑎᓕᐅᓪ-ᐊᓚᑯ ᐅᖃᕐᓯᒪᒻᒥᔪᖅ, “ᐋ, ᐃᓚᐅᕕᖃᖃᑦᑕᓚᐅᕐᑐᒍᑦ ᐱᓇᓱᐊᕐᑕᐅᓂᖓᓂᑦ, ᑭᓯᐊᓂ ᑯᐯᒃ ᐅᖃᐅᑎᓕᕐᑕᕗᑦ ᒫᓐᓇᐅᑎᓪᓗᒍ, ᑐᑭᓯᓴᕋᑦᑕ ᖃᐅᔨᒋᐊᕐᕕᖃᖃᑦᑕᓱᑕᓗ ᓄᓇᕕᒻᒥ ᓇᒻᒥᓂᖅ ᑲᕙᒪᑦᓴᓕᕆᓂᕐᒥᒃ ᐱᓇᓱᐊᕋᑦᑕ. ᑌᒣᒻᒪᑦ, ᐊᑎᓕᐅᓚᖓᖕᖏᑐᒍᑦ ᐊᖏᖃᑎᒌᒍᑎᒥᒃ ᐃᓕᖓᔪᒥᑦ ᓄᓇᐅᑉ ᓴᐳᒻᒥᔭᐅᓂᖃᕐᓂᖓᑕ ᐊᖏᓕᒋᐊᕐᑕᐅᒍᑎᒋᒐᔭᕐᑕᖓᓂᑦ ᓄᓇᕕᒻᒥ.”
ᐱᓇᓱᐊᕐᑕᐅᓕᕐᓂᖓ ᐱᕙᓪᓕᐊᑎᑦᓯᒐᓱᐊᕐᓂᐅᔪᖅ ᓄᓇᕕᒻᒥ ᓇᒻᒥᓂᖅ ᑲᕙᒪᑖᕐᓂᒧᑦ ᐊᑑᑎᓕᕐᑐᖅ ᐊᕐᕌᒍᐃᑦ ᐊᒥᓱᑦ ᐃᓗᐊᓂ ᐅᖄᒍᑎᐅᕙᑦᓱᓂ, ᐊᑕᐅᓯᐅᖕᖏᑐᐃᓪᓗ ᑎᒥᐅᔪᓕᒫᑦ ᑲᑎᒪᓂᖏᑦ ᐊᑑᑎᖃᑦᑕᓚᐅᕐᑎᓗᒋᑦ ᐱᓇᓱᐊᕈᓯᓕᒫᑉ ᐃᓗᐊᓂ. ᑲᑎᒪᓃᑦ ᐃᓚᖃᖃᑦᑕᑐᑦ ᕿᒥᕐᕈᓂᕐᒥᒃ ᓄᓇᕕᐅᑉ ᐱᖁᔭᕐᔪᐊᓴᖓᓂᑦ ᐊᓂᒎᑎᑎᑕᐅᖃᑦᑕᓱᑎᓗ ᑐᑭᑖᕈᑏᑦ ᓴᐳᒻᒥᔪᑦ ᓄᐃᑕᐅᓂᑦᓴᖓᓂᑦ ᓄᓇᕕᐅᑉ ᑲᕙᒪᑦᓴᖓᑕ ᑐᖕᖓᕕᖃᕐᓂᐊᑐᖅ ᐃᓄᐃᑦ ᐃᓪᓕᕆᔭᖏᓐᓂᑦ, ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ.
-30-
ᖃᐅᔨᒋᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᐅᒪᔪᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
www.makivik.org
ᒪᑭᕝᕕᒃ ᑎᒥᐅᔪᖅ ᓄᐃᑕᐅᓯᒪᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᑮᓇᐅᔭᕐᑖᕆᔭᐅᓯᒪᔪᓂᑦ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓄᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᒃ ᐊᐅᓚᑦᓯᓂᖃᕐᒥᔪᖅ ᕿᑐᕐᖏᐅᑎᑦᓯᓂᕐᒥᒃ ᑖᒃᑯᓂᖓ ᑮᓇᐅᔭᓂᑦ ᑫᓪᓚᑐᐃᓂᕐᒥᓗ ᒪᑭᑉᐸᓕᐊᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᐃᓄᑐᐃᓐᓇᓄᑦ ᓇᒻᒥᓂᖁᑎᒋᔭᐅᔪᐃᑦ ᖄᖏᕐᓂᑯᓕᐅᕐᑏᑦ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᒍᑎᓕᒃ ᐊᓯᐅᔨᔭᐅᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᒥᒃ, ᓂᕿᖃᑦᓯᐊᕆᐊᖃᕐᓂᒥᒃ ᐊᒻᒪᓗ ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᑦ ᐃᓄᑐᐃᓐᓀᑦ ᓄᓇᓕᓐᓂ.