ᐅᐱᒋᔭᐅᖃᑎᒌᑦ ᓄᓇᕕᒻᒥ ᐱᓂᐊᕈᑎᖓ

ᐅᐱᒋᔭᐅᔪᓂᒃ ᓄᓇᕕᒻᒥ ᐃᓕᑕᕐᓯᐅᑎ ᐋᑕᐅᓲᖑᕗᑦ ᐃᓄᓐᓄᑦ ᐊᖑᑎᓄᑦ ᐊᕐᓇᓄᓪᓗ “ᐱᑦᓯᐊᓚᕆᑦᑐᓂᒃ ᐱᔭᖃᕐᓯᒪᔪᓄᑦ ᐊᑦᔨᒌᖕᖏᑐᓂ ᐱᓇᓱᐊᒐᕐᓂ.”

ᐅᐱᒋᔭᐅᔪᓂᒃ ᓄᓇᕕᒻᒥ ᐃᓕᑕᕐᓯᐅᑏᑦ ᖁᕕᐅᒍᑕᐅᕗᑦ ᐱᔭᐅᓯᒪᔪᓂᒃ ᓄᓇᕕᒻᒥᐅᓄᑦ ᐃᓄᓐᓄᑦ ᖃᑦᓯᑐᐃᓐᓇᓂᒃ ᐅᑭᐅᓕᓐᓄᑦ ᐊᒻᒪᓗ ᑲᑦᓱᙰᓕᒍᑕᐅᕗᑦ ᓄᓇᕕᒻᒥ ᐃᓚᐅᔪᓄᑦ ᐊᔪᐃᓐᓇᓂᒃᑯᑦ ᑐᕌᕐᑕᒥᓂᒃ ᐱᒐᓱᐊᕐᓂᒥᒃ.

ᐊᕐᕌᒍᑕᒫᑦ, ᓄᓇᕕᒻᒥᐅᑦ ᐃᓄᐃᑦ ᓂᕈᐊᕋᑦᓴᓕᐊᖑᓲᖑᕗᑦ ᐃᓚᐅᔫᖃᑎᒥᓄᑦ JBNQA-ᒥ ᐱᑦᔪᑎᖃᕐᑎᓗᒍ ᐱᓯᒪᔭᖏᓐᓂᒃ, ᓯᕗᓕᕐᓂᖓᓂᒃ, ᐊᒻᒪᓗ ᓄᑖᓂᒃ ᐃᓱᒪᓕᐅᕐᓯᒪᓂᖓᓂᒃ.

ᒪᕐᕉᒃ ᑭᖑᓪᓕᐹᖓᓂ ᓂᕈᐊᕐᑕᐅᔫᒃ, ᐱᓯᑎᓪᓚᕇᒃ ᐊᒻᒪᓗ ᑲᑦᓱᙰᑦᑐᓚᕇᒃ ᐃᓅᒃ ᑌᔭᐅᓲᒃ ᓄᓇᕕᒻᒥ ᐃᑦᔭᕋᑦᓴᐅᓂᕋᕐᓱᒋᒃ ᐊᒻᒪᓗ ᐃᑎᕐᑕᐅᓱᑎᒃ ᓄᓇᕕᒻᒥ ᐅᐱᒋᔭᐅᖃᑎᒌᓄᑦ ᑕᒪᓐᓇ ᐅᐱᒍᓲᑎᖃᕐᓂᒥᒃ ᓇᓪᓕᐊᓂᖃᕈᑕᐅᑎᓪᓗᒍ ᒪᑭᕝᕕᒃ ᐊᕐᕌᒍᑕᒫᑦ ᑎᒥᖓ ᑲᑎᒪᓂᒻᒪᕆᖃᓕᕐᒪᑦ.

 ᓄᓇᕕᒻᒥ ᐃᑦᔭᕋᑦᓴᖃᕐᑎᓯᓂᐅᑉ ᐱᓂᐊᕈᑎᖓ ᑐᕌᕐᐳᖅ:

• ᑫᓪᓗᑐᕐᓂᖅ ᐃᓱᕐᕆᓯᐊᕐᓇᑐᓂᒃ ᐃᓅᓯᕐᓂᒃ ᐊᒻᒪᓗ ᐃᒻᒥᓂᒃ-ᓱᓇᖁᑎᒋᓂᕐᒥᒃ ᓄᓇᕕᒻᒥ ᐃᓄᑦᑎᒍᑦ.
• ᓂᑲᓀᓪᓕᑎᕆᓂᖅ ᓄᓇᕕᒻᒥ ᐃᓗᕐᖁᓯᕐᒥᒃ ᐊᒻᒪᓗ ᓇᐅᖑᓇᓱᒋᓂᕐᒥᒃ.
• ᑫᓪᓗᑐᕐᓂᖅ ᐱᐅᔪᓂᒃ ᐃᓄᓕᒫᑦ ᑕᐅᑐᒐᖃᕈᑎᖏᓐᓂᒃ ᐃᓄᓐᓂᒃ.
• ᐃᓱᐊᕐᑑᑎᑦᓯᓂᖅ ᐊᑐᐃᓐᓇᖃᕐᓂᒥᒃ ᓄᓇᕕᒻᒥ ᐃᑦᔭᕋᑦᓴᓂᒃ ᓄᓇᕕᒻᒥ ᐃᓄᓐᓄᑦ ᐊᒻᒪᓗ ᓄᓇᓕᓐᓄᑦ.
• ᓱᕙᓪᓕᑎᑦᓯᓂᖅ ᐱᐅᓯᕐᓂᒃ ᐊᒻᒪᓗ ᐃᓱᒪᒍᓯᕐᓂᒃ ᓄᓇᕕᒻᒥ ᐃᓄᓐᓄᑦ ᑐᕌᖁᓗᒋᑦ ᐃᓱᕐᕆᓇᕐᑐᓂᒃ ᐃᓅᓯᖃᕐᓂᒧᑦ
• ᐱᓕᕐᐸᓕᐊᑎᑦᓯᓂᖅ ᐃᓱᒪᑖᕐᓯᒪᔪᑦ ᓯᕗᓕᕐᓂᖓᓂᒃ.

ᑎᒡᒍᐊᓯᓂᖅ
ᓇᐅᑐᐃᓐᓇᖅ ᐃᓄᒃ ᐅᕝᕙᓗᓘᓐᓃᑦ ᐃᓚᐅᖃᑎᒌᑦ ᓄᓇᕕᒻᒥ ᑐᖕᖓᓱᑦᑐᓴᐅᕗᑦ ᓂᕈᐊᕋᑦᓴᕈᐃᒍᒪᒍᑎᒃ ᐱᔪᑦᓴᓚᕆᒻᒥᒃ ᐃᓄᒻᒥᒃ ᐃᓱᒪᔭᒋᔭᑦᓴᕈᕐᓂᐊᑎᓪᓗᒍ ᐅᐱᒋᔭᐅᔪᓂᒃ ᓄᓇᕕᒻᒥ ᐃᓕᑕᕐᓯᐅᑖᕐᑐᓴᐅᓂᖓ ᐅᓇ ᓂᕈᐊᕋᑦᓴᒥᒃ ᐊᓪᓚᕕᑦᓴᖅ ᑕᑕᓴᑐᐃᓐᓇᓗᒍ.

ᐅᖃᔭᒪᖕᖏᓂᖅ
ᓂᕈᐊᕋᑦᓴᓕᐊᓂᒫᑦ ᖃᐅᔨᑦᔭᕈᕐᑎᑕᐅᓂᐊᖕᖏᑐᑦ ᓲᓱᑦᓴᕈᑕᐅᑎᓪᓗᒍ ᐃᓄᐊᑕ ᐃᒻᒥᓄᐊᓕᖓᓂᖓᓂᒃ ᐊᒻᒪᓗ ᑲᕙᓕᕐᑐᖃᖁᓇᒍ ᓂᕈᐊᕋᑦᓴᓕᐊᖑᔪᖅ ᓂᕈᐊᕐᑕᐅᓂᖕᖏᐸᑦ. ᓂᕈᐊᕋᑦᓴᓂᒃ ᑎᒡᒍᐊᓯᔪᓂᒃ ᐊᒻᒪᓗ ᐊᓯᖏᓐᓂᒃ ᖃᐅᔨᒪᒻᒥᔪᓂᒃ ᑕᒪᑐᒥᖓ ᒪᓕᒐᕐᒥᒃ ᓲᓱᑦᓴᖁᔨᒻᒥᔪᒍᑦ.

ᓂᕈᐊᕐᓂᐅᑉ ᐱᕐᕈᓯᖓ
ᓂᕈᐊᕋᑦᓴᓂᒃ ᑎᒡᒍᐊᓯᒍᑏᑦ ᓄᐊᑕᐅᖃᑦᑕᓂᐊᕐᑐᑦ ᐊᕐᕌᒍᓕᒫᖅ ᓄᐃᑕᐅᕙᓪᓗᑎᓪᓗ ᐅᑭᐅᒃᑯᑦ ᒪᑭᕝᕕᐅᑉ ᑲᑎᒪᔨᖏᑦᑕ ᑲᑎᒪᓂᖓᓄᑦ.

ᑖᒃᑯᓇᖕᖓᑦ ᓈᓴᕐᓯᒪᔪᓂᒃ, ᒪᑭᕝᕕᐅᑉ ᑲᑎᒪᔨᖏᑦ ᓂᕈᐊᖃᑦᑕᓂᐊᕐᑐᑦ ᒪᕐᕉᓂᒃ ᐅᐱᒋᔭᐅᒍᑎᒥᒃ ᓄᓇᕕᒻᒥ ᐱᑎᑕᐅᔪᑦᓵᓂᒃ ᓄᐃᑕᐅᓂᐊᕐᑎᓗᒋᒃ ᑭᖑᓪᓕᒥ ᒪᑭᕝᕕᑯᑦ ᐊᕐᕌᒍᑕᒫᑦ ᑲᑎᒪᓂᒻᒪᕆᖓᓂ.