ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐃᓂᓪᓚᑕᐅᓚᐅᕐᓯᒪᒐᒥᓂᑦ ᑰᒃᔪᐊᒥ 1978 ᐊᕐᕌᒍᖓᓂ, ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑏᑦ ᐊᑎᓕᐅᖃᑎᒌᒍᑕᐅᓚᐅᔪᑎᓪᓗᒋᓂᑦ, ᐱᕙᓪᓕᐊᑎᑦᓯᒍᑎᖃᕆᐊᖕᖓᓱᑎᒃ ᑕᐅᑐᑦᑕᖃᓪᓚᕆᓐᓂᑯᓪᓗ ᐊᒻᒪᓗ ᓄᐊᑦᓯᓗᑎᒃ ᓄᓇᐅᑉ ᐊᑐᕐᑕᐅᓂᖓᓅᓕᖓᔪᓂᒃ ᐊᒻᒪᓗ ᐊᕙᑎᒥᓪᓗ ᐊᓪᓚᓯᒪᔪᖕᖑᐃᒍᑎᖃᕐᓗᑎᒃ ᓄᓇᕕᐅᑉ ᓄᓇᖁᑎᖓᓂᓂᑕᓂᒃ.
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐃᖏᕐᕋᑎᑕᐅᕗᖅ ᐱᑦᓴᖑᕈᓐᓇᑐᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᑦᔪᔨᕕᖓᓄᑦ ᒪᑭᕝᕕᐅᑉ. ᑖᓐᓇ ᖃᐅᔨᓴᕐᕕᒃ ᐱᓇᓱᑦᑎᑕᓕᒃ ᑐᑭᒧᐊᑦᑎᓯᔨᒥᒃ, ᓂᕐᔪᑎᓂᒃ ᐃᓕᓯᒪᔪᒥᒃ, ᓱᒃᑯᓇᕐᓯᓲᓂᒃ ᖃᐅᔨᓴᕐᑎᒥᒃ, ᓂᕐᔪᑎᓂᒃ ᖃᓂᒻᒪᓯᓕᓐᓂᒃ ᐱᓪᓗᑯᒋᐊᓕᑎᒍᑦ ᐱᔪᓐᓇᑐᒥᒃ, ᐃᖃᓗᓕᕆᓂᕐᒥᒃ ᐱᔪᓐᓇᐅᑎᓕᒻᒥᒃ, ᐱᖓᓱᓂᓪᓗ ᓂᕐᔪᑎᓕᕆᔨᓂᒃ ᐊᒻᒪᓗ ᐊᑕᐅᓯᕐᒥᒃ ᐳᕐᑐᓂᕐᓴᒥᒃ ᐊᓪᓚᑎᒥᒃ.
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐱᓇᓱᑦᑕᖃᓗᐊᖕᖑᐊᓲᖑᕗᖅ ᓱᑯᐃᔭᕐᓯᒪᔪᑎᒍᑦ ᖃᐅᔨᓴᕐᑕᖃᕐᓂᒥᒃ ᓄᓇᐅᑉ ᐱᐅᓯᕐᓲᑎᖏᓐᓂᒃ ᓂᕐᔪᑎᓂᓪᓗ (ᓂᕿᑐᐃᓐᓇᓂᒃ). ᑖᒃᑯᐊ ᖃᐅᔨᓴᕐᑕᐅᔪᑦ ᓴᐳᑦᔨᓯᒪᒍᑎᐅᕙᑦᑎᓗᒋᑦ ᒪᓕᒐᖃᕐᑎᓯᒍᑎᑦᓴᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᓂᐊᕐᓂᓕᕆᓂᑎᒍᓪᓗ ᒪᑭᕝᕕᐅᑉ ᐱᓇᓱᑦᑕᖏᓐᓂᒃ. ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐊᐅᓚᑦᓯᔨᒋᔭᐅᒥᔪᖅ ᑲᒪᓇᓱᑦᑕᖃᕐᓂᓂᒃ ᐱᓇᓱᒍᑎᓄᑦ ᑐᕃᓐᓇᑐᒥᒃ ᑭᐅᑦᔪᑎᐅᓲᓄᑦ ᐃᓄᐃᑦ ᑭᖕᖒᒪᑦᓯᒍᑎᖏᓐᓂᒃ ᓄᓇᕕᐅᑉ ᓄᓇᓕᖁᑎᖏᓐᓂ 15-ᓂ ᐊᓯᓂᓗ ᐃᓄᑐᐃᓐᓇᐅᒥᔪᑦ ᓄᓇᖁᑎᖏᓐᓂᒃ.
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐃᓚᐅᕕᖃᓲᖑᕗᖅ ᐊᒥᓱᐃᓂᒃ ᑲᑐᑦᔨᖃᑎᒌᒍᑎᒋᑦᓱᒋᑦ ᖃᐅᔨᓴᕐᓂᓂᒃ ᐱᓇᓱᒍᑎᓂᒃ ᐱᓇᓱᖃᑎᖃᕐᐸᒥᑦᓱᓂᓗ ᑲᔪᓯᖏᓐᓇᓕᒫᕐᑐᒥᒃ ᐊᓯᒥᓂᒃ ᑕᕐᕋᒥᐅᑦ ᐱᓇᓱᒐᖃᕐᕕᖁᑎᖏᓐᓂᒃ (ᓲᕐᓗ ᓂᕐᔪᑎᓕᕆᓂᕐᒥᒃ ᑲᒪᒋᔭᖃᖃᑎᒌᓐᓂᓄᑦ ᑲᑎᖕᖓᔨᓂᒃ, ᐊᖑᕕᒐᒻᒪᕆᒃᑯᓂᒃ, ᑕᕐᕋᒥ ᓄᓇᓕᓐᓂᒃ ᐊᒻᒪᓗ ᓄᓇᒥᒃ ᑎᒍᒥᐊᕐᑎᓂᒃ) ᐊᒻᒪᓗ ᐃᓚᐅᒻᒥᑎᓪᓗᒋᑦ ᓯᕿᓂᕐᒥᐅᑦ ᖃᓪᓗᓈᑦ ᖃᐅᔨᓴᕐᕕᖁᑎᖏᑦ, ᐃᓕᓐᓂᐊᕕᕐᔪᐊᓗ ᐊᓯᓕᒫᖏᓪᓗ ᑲᕙᒪᐅᔪᑦ ᐱᑦᔪᔨᕕᖏᑦ ᐊᐅᓚᑦᓯᖃᑎᒋᑦᓱᒋᑦ ᐱᔭᑦᓴᕈᖃᑦᑕᑐᓂᒃ ᑐᕃᓐᓇᑐᒥᒃ ᓱᕐᕃᓂᖃᕈᓐᓇᓱᑎᒃ ᑕᕐᕋᒥᐅᓂᒃ
ᐊᕙᑎᒥᒃ ᖃᐅᔨᓴᕐᓃᑦ
ᖃᐅᔨᓴᕐᓂᓄᑦ ᐱᑦᔪᔨᕕᒃ ᐱᓇᓱᑉᐸᒥᔪᖅ ᐃᓕᒃᑯᕈᑎᒋᑦᓱᒋᑦ ᐊᕙᑎᒥᒃ ᖃᐅᔨᓴᕐᓂᓂᒃ ᐊᒻᒪᓗ ᐱᑕᖃᕐᑎᓯᒍᑎᖃᓲᖑᑦᓱᓂ ᐱᔪᓐᓇᓯᐊᕐᑐᓂᒃ ᐱᓇᓱᑦᑎᓯᒍᑎᓂᒃ ᐊᖏᖃᑎᒌᓯᒪᒍᑎᒋᑦᓱᒋᑦ ᐊᓯᓄᑦ ᐱᓇᓱᒐᖃᕐᕕᐅᔪᓄᑦ. ᖃᐅᔨᓴᕐᓃᑦ ᐱᓇᓱᑦᑕᐅᕙᑦᑐᑦ ᐱᓇᓱᖃᑎᐅᑎᓪᓗᒋᑦ ᐃᓕᓐᓂᐊᕕᕐᔪᐊᓗ ᐊᒻᒪᓗ ᑲᕙᒪᐅᔪᑦ, ᐱᓗᐊᕐᑐᒥ; ArctocNet, ᑕᕐᕋᒥ ᓱᒃᑯᓇᕐᑐᓕᕆᓂᕐᓄᑦ ᐱᓇᓱᒍᑏᑦ, ᑲᓇᑕᒥ ᐃᓗᓯᓕᕆᔩᑦ ᐃᒪᕐᐱᓕᕆᔨᕐᔪᐊᑯᑦ ᐊᒻᒪᓗ ᑐᕐᖃᑕᕐᕕᒃ ᐃᓕᖓᔪᖅ ᐱᕈᕐᑐᓕᕆᓂᕐᓄᓗ ᓇᐹᕐᑐᓕᕆᓂᕐᓄᓗ ᒥᕐᖑᐃᓯᕐᕕᓄᓪᓗ.
ᐃᖃᓗᐃᓪᓗ ᓂᕐᔪᑏᓪᓗ ᖃᐅᔨᓴᕐᑕᐅᒍᑎᖏᑦ
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐃᖏᕐᕋᑎᑦᓯᒍᑎᖃᓲᖑᒋᕗᖅ ᑲᔪᓯᔪᒥᒃ ᓂᕐᔪᑎᓂᒃ ᑲᒪᓇᓱᑦᑕᖃᕐᓂᒥᒃ ᐱᓇᓱᒍᑎᓂᒃ ᐱᓇᓱᖃᑎᖃᓱᖑᑦᓱᓂᓗ ᐃᓕᓐᓂᐊᕕᕐᔪᐊᓂᓪᓗ ᑲᕙᒪᖏᓐᓂᓗ ᑲᕙᒪᑐᖃᒃᑯᓗ ᓄᓇᓕᕐᓚᖁᑕᐅᔪᓪᓗ ᑲᕙᒪᖏᑕ ᐱᑦᔪᔨᕕᖏᓐᓂᒃ ᐱᓇᓱᖃᑎᒋᑦᓱᒋᑦ ᓄᓇᒨᓕᖓᔪᓂᒃ ᖃᐅᔨᓴᕐᓂᒥᒃ ᐊᒥᓱᐃᓂ ᖃᓄᐃᑦᑐᑐᐃᓐᓇᓂ ᓂᕐᔪᑎᓂ. ᑕᒪᒃᑯᐊ ᐃᓚᖃᕐᑐᑦ ᒪᑯᓂᖓ: ᐃᖃᓗᑉᐱᓂᒃ, ᓵᒪᓂᒃ, ᐃᓯᐅᕋᓕᕐᑖᓂᒃ, ᕿᓚᓗᒐᕐᓂᒃ, ᐁᕕᕐᓂᒃ, ᓇᑦᓯᓂᒃ, ᓇᓄᕐᓂᒃ, ᑐᑦᑐᓂᒃ, ᐅᒥᖕᒪᓂᒃ, ᑎᕆᒐᓐᓂᐊᓂᒃ, ᑎᖕᒥᐊᓂᒃ ᓂᕿᑐᐃᓐᓇᑑᒪᓲᓂᒃ, ᑎᖕᒥᐊᓂᒃ ᐃᒪᕐᒥᐅᑕᓂᒃ ᐊᓯᖏᓐᓂᓗ ᐃᒪᕐᐱᐅᑉ ᓂᕿᑦᓴᖁᑎᑕᖏᓐᓂᒃ.
ᐱᓇᓱᑦᑏᑦ ᓄᓇᑐᐃᓐᓇᒥ ᐱᓇᓱᑉᐸᑐᑦ ᖃᐅᔨᓴᕐᓱᑎᒃ ᐱᓪᓗᑯᒋᐊᓕᓐᓂᒃ ᖃᐅᔨᓴᕋᑦᓴᓂᒃ ᐊᒻᒪᓗ ᐱᓇᓱᖃᑎᖃᕐᐸᓱᑎᒃ ᓄᓇᓖᑦ ᐊᖑᓇᓱᑦᑎᖏᓐᓂᒃ ᓄᐊᑦᓯᖃᑎᒋᑦᓱᒋᑦ ᖃᐅᔨᓴᕋᑦᓴᓂᓪᓗ ᖃᐅᔨᒪᔭᐅᒋᐊᓕᓐᓂᓗ. ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᓇᒻᒥᓂᖃᕐᑐᖅ ᐃᖏᕐᕋᑎᕙᑦᑕᒥᓂᒃ ᒪᕐᕉᓂᒃ ᐅᒥᐊᕌᕈᓐᓂᒃ ᑕᒪᖏᓐᓂ ᑕᓯᕐᓂᓗ ᐃᒪᕐᐱᒥᓗ ᐱᓇᓱᒋᐊᖃᓕᑐᐊᕋᒥᒃ.
ᑭᑭᐊᑦᓴᔭᓂᒃ ᑐᑭᓯᓂᐊᕐᓂᒥᒃ ᖃᐅᔨᓴᕐᕕᒃ
ᓄᑖᔭᐅᓂᕐᐹᓂᒃ ᐱᓇᓱᒍᑎᑕᖃᕐᓱᓂ ᐱᓇᓱᕝᕕᒃ ᐊᓯᒥᓂᒃ ᐊᑦᔨᖃᖕᖏᓚᖅ ᐅᑭᐅᕐᑕᑑᑉ ᓯᕿᓂᐊᑕ ᓄᐃᕕᐊᓂ. ᐱᐅᒃᑯᑎᖃᕐᑐᑦ ᒪᕐᕉᓂᒃ ᖃᐅᔨᓴᕈᑎᑦᓴᔮᓐᓂᒃ ᑭᑭᐊᑦᓴᔭᕐᑕᖃᓕᕐᒪᖔᑕ (ᓲᕐᓗ ᐃᒪᕈᔪᒻᒥᒃ ᒨᖁᔨᒥᒃ, ᐅᖁᒣᓗᑕᑦᓴᔭᒥᒃ ᐊᒻᒪᓗ ᐃᑯᒪᐅᑏᑦ ᐃᓚᑦᓴᔭᖓᓐᓂᒃ) ᓂᕿᑐᐃᓐᓀᑦ ᓲᕐᓗ ᐃᖃᓗᐃᓪᓗ ᐃᒪᕐᐱᐅᓗ ᓂᕐᔪᑎᖏᑦ. ᐃᓕᒃᑯᓗ ᐊᓯᓄᓪᓗ ᓯᓚᑎᒥᓂᑦ ᐱᐅᔫᒻᒪᖔᑕ ᓱᕐᖁᐃᑎᑕᐅᒍᑎᖃᕐᐸᑐᑦ ᑕᒪᒃᑯᐊ ᐊᑑᑎᔭᐅᖏᓐᓇᓂᕐᓴᐅᓲᑦ ᓱᕐᖁᐃᑐᒥᒃ ᑐᑭᓯᓂᐊᕐᑕᐅᓂᒃᑯᑦ ᑐᑭᓯᔭᐅᖁᓪᓗᒋᑦ. ᑖᓐᓇ ᖃᐅᔨᓴᕐᕕᒃ ᐊᑕᓐᓂᐅᕕᐅᓕᐅᒥᔮᖏᓐᓇᓲᖅ ᐱᓇᓱᖃᑕᐅᖁᑦᓱᒍ ᑭᑭᐊᑦᓴᔭᓄᑦ ᓱᒃᑯᓇᕐᑐᖃᓕᕐᒪᖔᑦ ᖃᐅᔨᓴᕐᓂᖏᓐᓂᒃ ᑲᕙᒪᐅᔪᑦ ᐱᑦᔪᔨᕕᖏᑕ, ᐃᓕᓐᓂᐊᕕᕐᔪᐊᓗ ᐊᒻᒪᓗ ᓄᓇᕕᒻᒥ ᐃᓗᓯᓕᕆᔨᒃᑯᓗ ᐃᓄᓕᕆᔨᒃᑯᓗ ᐱᑦᔪᔨᕕᖏᓐᓂᑦ.
ᖃᓂᒻᒪᓯᕐᓂᒃ ᖃᐅᔨᓴᕐᓃᑦ
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᑲᒪᓇᓱᑦᑎᐅᕙᒃᑭᕗᖅ ᓂᕐᔪᑏᑦ ᖃᓂᒻᒪᓯᖏᓐᓂᒃ ᓱᕐᕃᒪᓲᓂᒃ ᐆᒪᔪᐃᑦ ᐃᓗᓯᖏᓐᓂᒃ ᐅᕝᕙᓗᓐᓃᑦ ᐃᓄᒻᒨᕈᓐᓇᓱᑎ ᐱᔪᓂᒃ. ᖁᒻᒥᓯᒪᓇᕐᑐᒥᒃ ᐱᔪᖃᕐᑎᓯᑌᓕᓂᕐᓄᑦ ᐱᓇᓱᒍᑏᑦ ᖃᐅᔨᓴᕈᑎᐅᓲᖑᕗᑦ ᐁᕕᕕᓂᕐᓂᒃ ᑐᖕᖓᕕᐅᑎᓪᓗᒋᑦ ᒪᓕᒐᖁᑎᓕᐊᕆᓯᒪᔭᖏᑦ ᑲᓇᑕᒥᐅᑦ ᓂᕿᑦᓴᓂᒃ ᖃᐅᔨᓴᕐᓂᒥᒃ ᐱᑦᔪᔨᕕᖓᑕ. ᑐᑭᓯᔭᐅᒍᑎᕕᓃᑦ ᐱᑕᖃᓲᑦ ᑐᓴᕐᑎᓯᒍᑎᐅᓲᖑᑦᓱᑎᒃᓗ ᓄᓇᕕᒻᒥ ᐃᓗᓯᓕᕆᓂᕐᓄᑦ ᐱᓇᓱᑦᑎᒥᒃ ᑐᑭᓯᔭᐅᓚᐅᕐᑎᓗᒋᑦ ᑫᕙᓪᓚᒍᓰᑦ 24 ᐊᓂᒍᖕᖏᓂᖏᓐᓂ ᑎᑭᑎᑦᓯᓚᐅᕐᑎᓗᒋᑦ ᐁᕝᕙᓂᐊᕐᑐᕕᓃᑦ. ᐊᓯᖏᑦ ᖃᓂᒻᒪᓰᑦ ᑲᒪᓇᓱᑦᑕᐅᕙᒃᑭᕗᑦ ᐱᓇᓱᖃᑕᐅᑎᓪᓗᒋᑦ ᐃᓕᓐᓂᐊᕕᕐᔪᐊᑦ ᖃᐅᔨᓴᕐᑎᖏᓪᓗ ᑲᕙᒪᐅᔪᓪᓗ ᐱᑦᔪᔨᕕᖏᑦ.
ᐊᑐᐊᒐᖃᐅᑎ
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐊᖏᔫᖕᖏᑐᒥᒃ ᐊᑕᖏᕐᓯᔪᒥᒃ ᐊᑐᐊᒐᖃᐅᑎᖃᕐᒥᔪᖅ ᐃᓗᓕᓕᒻᒥᒃ ᐊᑦᔨᖃᖕᖏᑐᓂᒃ ᑐᓴᕐᑎᓯᒍᑎᓕᐊᖑᖃᑦᑕᓯᒪᔪᓂᒃ ᐃᓕᖓᑦᓱᑎᒃ ᓂᕐᔪᑎᓄᓪᓗ ᐊᕙᑎᐅᓪᓗ ᖃᐅᔨᓴᕐᑕᐅᓂᖏᓐᓄᑦ ᑌᒪᖕᖓᓂᑦ ᖃᐅᔨᓴᕐᕕᒃ ᓇᑉᐸᑕᐅᒋᐊᖕᖓᓕᓚᐅᕐᓂᒪᓂᑦ ᓄᐊᑕᐅᒪᔪᓂᒃ. ᑖᒃᑯᐊ ᓄᐊᑕᐅᒪᔪᑦ ᐱᐅᓕᐊᕐᑕᐅᔪᑦ ᖃᕆᑕᐅᔭᑎᒍᓪᓗ ᑕᑯᓇᓱᒃᑕᐅᒍᓐᓇᐳᑦ ᐅᓇ ᐊᕐᖁᑎᒋᓗᒍ “ASTIS.”
ᐊᑐᐊᒐᖃᐅᑎ ᐃᓗᓕᖃᕐᒥᔪᑦ ᓇᒻᒥᓂᕆᔭᐅᔪᕕᓂᕐᓂᒃ ᐊᑦᔨᖃᖕᖏᒪᕆᑐᓂᒃ ᓄᑕᐅᖕᖏᑐᐊᓘᑦᓱᑎᒃᓗ ᐊᒻᒪᓗ ᐱᐅᒃᑯᑎᕕᓂᕐᓂᒃ ᐱᒋᔭᐅᔪᕕᓂᐅᑦᓱᑎᒃ ᖃᐅᔨᓴᕐᑎᐅᓯᒪᔪᒧᑦ Dr. D. W. Doidge/ᐱᐊᓪ ᑐᐁᑦᔭᒧᑦ, ᑖᓐᓇ ᐃᓕᓯᒪᔪᒻᒪᕆᐅᓚᐅᔪᖅ ᐊᑯᓂᐅᓂᕐᐹᖅ ᑐᑭᒧᐊᑦᓯᔨᐅᖃᑦᑕᓯᒪᕗᖅ ᖃᐅᔨᓴᕐᕕᒥ.
ᓄᓇᖕᖑᐊᓕᕆᓂᕐᒥᒃ ᐱᑦᔪᔨᒍᑏᑦ
ᐱᓇᓱᒍᑎᒥᓂᒃ ᐱᐅᒃᑯᑎᖃᕐᓱᓂ ᐱᔪᓐᓇᐅᑎᖃᑦᓯᐊᑐᑦ-ᐊᑐᕋᑦᓴᔭᖏᓐᓂᒃ ᐱᓪᓗᑯᒋᐊᓕᓕᕆᐅᑎᓂᒃ, ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᓄᐃᑦᓯᕙᑉᐳᖅ ᓄᓇᖕᖑᐊᓂᒃ ᑕᐅᑦᑐᓕᓐᓂᒃ ᐊᒻᒪᓗ ᐊᑭᓐᓇᒥᐅᑕᓕᐅᕐᐸᓱᓂ ᓄᓇᑐᐃᓐᓇᒥᒃ ᖃᐅᔨᓴᕐᑐᑦ ᐊᑐᕋᑦᓴᖏᓐᓂᒃ ᐊᒻᒪᓗ ᑲᑎᒪᔪᓂ ᑐᓴᕐᑎᓯᒍᑎᖃᕆᐊᓖᑦ ᐊᑐᕐᓂᐊᑕᖏᓐᓂᒃ. ᐱᑦᔪᔭᐅᔪᑦ ᐃᓚᖃᕐᑐᑦ ᐊᒥᓱᓂᒃ ᓄᓇᓕᓐᓂᓗ ᓄᓇᓕᓕᒫᓂᓪᓗ ᐱᓇᓱᒐᖃᕐᕕᖁᑕᐅᔪᓂᒃ, ᐃᓚᐅᑎᓪᓗᒋᑦ ᐳᓛᕆᐊᕐᓯᒪᔪᑦ ᖃᐅᔨᓴᕐᑏᓗ ᐃᓕᓐᓂᐊᑏᓪᓗ.
ᐃᓕᓐᓂᐊᑎᑦᓯᓃᓪᓗ ᐊᕗᖓᐅᓕᔪᓂᓪᓗ ᐱᑦᔪᔭᖃᕋᓱᓐᓃᑦ
ᐱᓪᓚᕆᐅᔪᑦ ᑎᓕᔭᐅᒪᒍᑎᖏᑕ ᐃᓚᖏᑦ ᑖᑦᓱᒪ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᐅᑉ ᐃᓚᖃᕐᐳᑦ ᑐᑭᓯᑎᑦᓯᒋᐊᖕᖓᐅᑎᓂᒃ ᐅᕕᒃᑯᓄᑦ ᓱᓇᐅᒻᒪᖔ ᓱᑯᐃᔦᓂᖅ. ᐱᒍᓐᓇᕕᓕᒫᒥᒍᑦ ᐱᓇᓱᑦᑏᑦ ᐃᓚᐅᕙᑦᑐᑦ ᐃᓕᓐᓂᐊᑎᑦᓯᓂᕐᓄᓗ ᐊᕗᖓᒋᐊᒃᑲᓂᕐᓗ ᐱᑦᔪᔭᖃᕋᓱᓂᒥᒃ ᐱᓇᓱᒍᑎᐅᓕᕐᑐᓄᑦ. ᓲᕐᓗ, ᐅᐱᕐᖔᒥ ᐃᓕᓐᓂᐊᑎᓂᒃ ᐱᓇᓱᑦᑎᖃᕐᐸᓱᓂ ᐱᓇᓱᑦᑎᓱᒋᑦ ᖃᐅᔨᓴᕐᕕᒥᓗ, ᓄᓇᑐᐃᓐᓇᒥᓗ, ᐳᕐᑐᓂᕐᓴᒥᓗ ᐃᓕᓐᓂᐊᑎᓂᒃ ᐱᒋᐅᕐᓴᑎᑦᓯᓂᖃᕐᓱᓂ ᑕᒪᖏᓐᓂᒃ ᐱᐅᓯᑐᖃᒃᑯᑦ ᓄᓇᒥᒃ ᐃᓕᓯᒪᒋᐊᓕᖏᓐᓂᒃ ᐊᒻᒪᓗ ᓱᑯᐃᔦᒍᑎᓂᒃ, ᑐᑭᓯᑎᑦᓯᒋᐊᖕᖓᕈᑎᓂᒃᓗ ᐃᓕᓐᓂᐊᕆᐊᕐᖓᑐᓂᒃ ᑕᓯᐊᕉᑉ ᐆᒪᔪᕐᑕᖏᓐᓂᒃ ᐱᕈᕐᑐᖏᓐᓂᓗ.