ᑐᓴᕋᑦᓴᖅ
ᑰᑦᔪᐊᖅ, ᒫᑦᔨ 4, 2025 – ᑲᑎᖕᖓᓂᖃᕐᑎᓗᒋᑦ ᒪᑭᕝᕕᑯᑦ ᑲᑎᖕᖓᔨᖏᑦ ᐱᓇᓱᐊᕈᓯᐅᓚᐅᔪᒥ, ᑲᑎᓐᓂᖁ ᐊᑎᓕᐅᕈᑎᖃᕐᓱᑎᑦ ᓄᓇᕕᒻᒥ ᐱᓇᓱᖃᑎᒌᑦᑐᓕᒫᑦ ᑐᓂᒪᑦᓯᐊᓱᑎᑦ ᐊᓯᑦᔩᒋᐊᕐᓂᐊᓱᑎᑦ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓂᑦ ᐱᒍᑦᔨᒍᑎᖏᓐᓂᑦ. ᐊᑕᐅᑦᓯᑯᑦ, ᒪᑭᕝᕕᒃ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᖓ ᐊᒻᒪᓗ ᐃᓅᓕᑦᓯᕕᒃ ᐋᓐᓂᐊᕕᖓ ᐅᖃᕆᐊᑦᓯᐊᓂᕐᖁᑦ ᖃᓄᐃᖕᖏᓯᐊᖁᔨᑦᓱᑎᑦ ᓄᓇᕕᒻᒥ ᐱᐊᕋᖏᓐᓂᑦ ᐃᓚᒌᓂᓗ ᓄᐃᑦᓯᓂᒃᑯᑦ ᐃᓗᕐᕈᓯᒥᒃ ᒪᓕᒋᐊᕐᑐᒥᒃ ᐱᒍᑦᔨᒍᑎᐅᔪᓂᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓄᑦ.
ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᓄᐃᑕᐅᓯᒪᔪᖅ ᑎᓕᔭᐅᒪᒍᑎᖃᕐᓱᓂ ᓄᐃᑦᓯᓗᑎᑦ ᐱᒍᑦᔨᓗᑎᓗ ᑐᑭᓯᓇᑦᓯᐊᑐᓂᑦ, ᐃᓗᕐᕈᓯᑎᒍᑦ ᓈᒻᒪᓈᕐᑐᓂᑦ ᐱᒍᑦᔨᒍᑎᐅᔪᓂᑦ ᐃᓄᐃᑦ ᐱᐊᕋᖏᓐᓂᑦ, ᐃᓅᓱᑦᑐᓂᑦ ᐃᓚᒌᓂᓗ ᓄᓇᕕᒻᒥ ᐅᕝᕙᓗᓐᓃᑦ ᓄᓇᖁᑎᖓᑕ ᓯᓚᑖᓂᑦᑐᓂᑦ, ᑲᒪᒋᔭᖃᓪᓚᕆᓂᐊᕐᓱᑎᑦ ᐱᒍᑦᔨᓗᑎᑦ ᐃᓗᕐᕈᓯᒥᒃ ᐃᓚᐅᑎᑦᓯᓂᒃᑯᑦ ᐱᒍᑦᔨᒍᑎᒥᓂᑦ ᑭᖕᖒᒪᒋᔭᖏᑦ ᐱᒻᒪᕆᖁᑎᖏᓪᓗ ᐃᓄᐃᑦ ᓄᓇᕕᒻᒥ ᑐᖕᖓᕕᖃᕐᓗᑎᑦ.
ᑖᓐᓇ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒃ ᐊᓪᓗᕆᐊᕈᑎᓪᓚᕆᐅᔪᖅ ᑲᔪᓯᓕᕐᑎᓯᓂᕐᒥᒃ ᓄᓇᕕᒻᒥ ᐃᓄᖁᑎᖏᑦᑕ ᐱᔪᓐᓇᐅᑎᖏᓐᓂᑦ ᓇᒻᒥᓂᖅ-ᑐᑭᑖᕈᓐᓇᓂᕐᒧᑦ ᐱᐊᕋᕐᓂᑦ ᐃᓚᒌᓂᓗ ᐱᒍᑦᔨᒍᑎᓂᑦ, ᐃᓚᐅᑎᓪᓗᒋᑦ ᐃᓅᓱᑦᑐᓂᑦ ᓴᐳᑦᔨᓂᕐᒧᑦ ᐱᒍᑦᔨᒍᑎᖏᑦ. ᓄᐃᑦᓯᔪᖅ ᒪᑭᕝᕕᑯᑦ ᐱᕙᓪᓕᐊᑎᑦᓯᒍᒪᓂᖏᓐᓂᑦ ᐃᓚᒋᐊᕈᑎᖏᓐᓂᑦ ᐊᖏᖃᑎᒌᒍᑎᖓᓂ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒥᒃ ᐊᒻᒪᓗ ᐃᓄᐃᑦ ᐱᖁᔭᖏᓐᓂᑦ, ᐃᓚᐅᑦᓯᐊᑎᓪᓗᒋᑦ ᐱᓇᓱᖃᑎᖏᑦ. ᐱᕙᓪᓕᐊᑎᑦᓯᓯᐊᓕᐅᒥᓚᖓᔪᖅ ᑕᒪᑦᓱᒥᖓ ᓄᐃᑕᒌᑦᑐᓂᑦ ᐱᒍᑦᔨᒍᑎᓂᑦ ᐃᓄᓐᓂᑦ ᐱᒍᑦᔨᒍᑎᓂᑦ, ᓲᖑᓯᐅᒥᑎᑦᓯᓂᒃᑯᑦ ᐱᓇᓱᖃᑎᒌᓐᓂᖏᓐᓂᑦ ᒪᑭᕝᕕᑯᑦ ᐊᒻᒪᓗ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂᒃ.
ᑖᓐᓇ ᖃᓄᐃᓘᕈᑎᒃ ᓄᓇᕕᒻᒥ ᐃᓄᖁᑎᖏᓐᓂ ᐱᕙᓪᓕᐊᑎᑦᓯᒍᑎᐅᓚᖓᔪᖅ ᑲᒪᒋᔭᖃᓯᓗᑎᓗ ᐊᒥᓱᓂ ᐱᒍᑦᔨᒍᑎᓂᑦ ᐱᐊᕋᕐᓄᑦ ᐃᓚᒌᓄᓗ, ᐃᓅᓱᑦᑐᓂᑦ ᓴᐳᑦᔨᓂᕐᒥᒃ ᐱᒍᑦᔨᒍᑎᐅᓲᓂᑦ, ᙯᒣᓗᑎᑦ ᐃᓅᓱᑦᑐᓂᑦ ᓴᐳᒻᒥᓂᕐᒧᑦ ᐱᒍᑦᔨᒍᑎᓂᑦ ᐊᑑᑎᑎᑕᐅᓚᐅᕐᑐᕕᓂᕐᓂᑦ ᓄᓇᕕᒻᒥ ᐃᓄᖁᑎᖏᓐᓄᑦ ᐃᓱᒪᒋᔭᖃᖕᖏᓱᑎᑦ ᑲᒪᒍᓯᒋᓲᑦᑎᓂᑦ ᓴᐳᒻᒥᒍᓯᑦᑎᓂᓗ ᐱᐊᕋᑦᑎᓂᑦ.
ᐊᑎᓕᐅᖃᑎᕕᓃᑦ ᐱᑕ ᐋᑕᒥ, ᐊᖓᔪᕐᖄᖓ ᒪᑭᕝᕕᑯᓂ, ᒥᓂ ᑯᕃ, ᐊᖓᔪᕐᖄᖓ ᓄᓇᕕᒻᒥᐅᑦ ᐃᓚᒌᑦ ᐸᐸᑕᐅᕕᖓᓂ; ᕕᒃᑐᕆᐊ ᑕᕐᕿᐊᐱᒃ, ᐊᖓᔪᕐᖄᖅ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓐᓂ, ᑯᓗᑦ ᑲᑦᐳᐊ, ᐊᖓᔪᕐᖄᖅ ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᖓᓂ, ᐊᒻᒪᓗ ᔨᓂ ᐊᔭᒍᑕᒃ, ᐊᖓᔪᕐᖄᖅ ᐃᓅᓕᑦᓯᕕᒃ ᐋᓐᓂᐊᕕᖓᓂ.
-30-
ᐅᖃᐅᓯᕆᔭᕕᓃᑦ:
ᐱᑕ ᐋᑕᒥ, ᐊᖓᔪᕐᖄᖓ ᒪᑭᕝᕕᑯᑦ: “ᐅᐱᒍᓱᒃᑯᖓ ᑖᑦᓱᒥᖓᑦᓭᓇᖅ ᑕᑯᓐᓇᐅᔮᖃᑎᒌᓐᓂᖃᕋᑦᑕ ᐱᐊᕋᑦᑎᓄᓕᖓᔪᓂᑦ. ᐅᑎᕐᑎᓯᒋᐊᖃᕋᑦᑕ ᑎᒍᔭᐅᔨᐊᕕᓂᕗᓐᓂᑦ: ᑲᒪᒋᔭᖃᕈᓐᓇᓂᕐᒥᒃ ᐱᐊᕋᑦᑎᓂᑦ ᑲᑉᐱᐊᓱᖕᖏᓗᑕ ᓄᓇᓕᒻᒥᓂᒃ ᐊᐅᓪᓚᑎᑕᐅᓂᕆᒍᓐᓇᑕᖏᓐᓂᑦ ᐃᓗᕐᕈᓯᒥᓂᒃ ᐅᖃᐅᓯᕐᒥᓂᓗ ᐊᓯᐅᔨᓂᕐᒥᒃ. ᑖᒃᑯᑎᒎᓇ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᑎᒍᑦ, ᐱᓇᓱᖃᑎᒌᒃᑯᒍᑦ ᓴᐳᑦᔨᓂᕐᒥᒃ ᐱᕙᓪᓕᐊᑎᑕᐅᓂᑦᓴᖓᓂᒃ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᐃᑲᔪᕐᓯᒍᑎᑦᓴᓂᑦ ᑐᓂᔨᓗᒋᑦ ᐱᒍᑦᔨᒍᓐᓇᓂᐊᕐᒪᑕ ᐃᓅᓱᑦᑐᓂᑦ ᐃᓚᒌᓂᓗ ᑐᖕᖓᓇᕐᑑᓗᑎᑦ ᐱᒍᑦᔨᒍᑎᖏᑦ.”
ᕕᒃᑐᕆᐊ ᑕᕐᕿᐊᐱᒃ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐊᖓᔪᕐᖄᖓ: “ᑖᒃᑯᑎᒎᓇ ᐊᖏᖃᑎᒌᒍᑎᑎᒍᑦ, ᐅᑎᕐᑎᓯᕗᒍᑦ ᐱᐊᕋᕐᑎᓂᑦ ᑲᒪᒋᔭᖃᕐᓂᒥᒃ, ᐱᕈᕐᐸᓕᐊᑦᓯᐊᕈᓐᓇᓂᐊᕐᒪᑕ ᖃᓂᑕ ᕐᓗᑎᑦ ᐃᓚᒥᓂᒃ, ᓄᓇᓕᒻᒥᓂᒃ, ᐃᓄᐃᑦ ᑭᓇᐅᓂᖓᓂᒃ ᖃᐅᔨᒪᓗᑎᑦ. ᐊᑯᓂᐅᓗᐊᕐᑐᓂ, ᓯᓚᑕᓂᑦ ᐱᓯᒪᔪᓄᑦ ᖃᓄᐃᓗᕈᓯᕐᒥᒃ ᐊᑑᑎᓕᕋᑦᑕ ᐱᐅᓂᕐᓴᐅᓂᕃᔪᓄᑦ ᐃᓅᓱᑦᑐᖁᑎᑦᑎᓄᑦ. ᐅᓪᓗᒥ, ᐅᑎᕐᑎᓯᕙᓪᓕᐊᓯᕗᒍᑦ ᖃᓄᐃᓗᕐᓂᕆᒋᐊᓕᑦᑎᓂᑦ ᑐᑭᑖᕐᑎᐅᓂᕐᒥᒃ ᓯᕗᓂᑦᓴᖏᓐᓂᑦ ᐃᓚᒌᖑᔪᒍᑦ.”
ᔩᓂ ᐊᔭᒍᑕᒃ, ᐃᓅᓕᑦᓯᕕᒃ ᐋᓐᓂᐊᕕᒃ ᐊᖓᔪᕐᖄᖓ: “ᐅᐱᒍᓱᒃᑯᒍᑦ ᐃᓚᐅᓂᑦᑎᓄᑦ ᐱᓇᓱᖃᑎᑦᑎᓄᑦ ᑖᑦᓱᒥᖓ ᐊᓪᓗᕆᐊᕈᑎᒻᒪᕆᒥᒃ ᐃᓄᓐᓄᑦ ᓯᕗᓕᕐᑕᐅᔪᒥᒃ ᐃᓅᓱᑦᑐᓂᑦ ᐃᓚᒌᓂᓗ ᐱᒍᑦᔨᒍᑎᖏᓐᓂᑦ. ᑖᓐᓇ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒃ ᓄᐃᑦᓯᔪᖅ ᑖᒃᑯᐊᖑᑦᓱᑕ ᑐᓂᒪᑦᓯᐊᓂᑦᑎᓂᑦ ᐊᑦᑕᓀᑦᑐᒦᒍᓐᓇᓂᐊᕐᒪᑕ, ᖃᓄᐃᖕᖏᓯᐊᕐᓗᑎᑦ, ᓯᕗᓂᑦᓯᐊᖃᕐᓗᑎᓗ ᐱᐊᕋᕗᑦ ᐃᓚᒌᖑᔪᐃᓗ, ᑐᖕᖓᕕᖃᕐᓱᑎᑦ ᐃᓄᐃᑦ ᐱᒻᒪᕆᖁᑎᓐᓂᑦ ᐃᓗᕐᖁᓯᖓᓂᓗ.”
ᑯᓗᑦ ᑲᑦᐳᐊ, ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᖓ: “ᐅᐱᒍᓱᒃᑯᒍᑦ ᓄᓇᕕᒻᒥᐅᖑᔪᒍᑦ ᐊᑕᐅᑦᓯᑯᑦ ᓂᑯᕐᕋᖃᑎᒌᓐᓂᑎᓐᓂ ᑐᓂᒪᑦᓯᐊᓂᑦᑎᓄᑦ ᓯᕗᓂᑦᓯᐊᖃᖁᓗᒋᑦ ᐱᐊᕋᕗᑦ. ᑖᒃᑯᑎᒎᓇ ᐱᓇᓱᖃᑎᒌᓐᓂᕗᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂᒃ, ᑐᓂᒪᑦᓯᐊᖁᒍᑦ ᓲᖑᓯᐅᒥᑎᑦᓯᒍᒪᑦᓱᑕ ᐱᓇᓱᑦᑕᐅᔪᓂᑦ ᐱᒍᑦᔨᒍᑎᐅᑦᓱᑎᑦ ᐃᓅᓱᑦᑐᖁᑎᑦᑎᓂᑦ ᐃᓚᒌᓂᓗ, ᐃᑲᔪᕐᓯᒍᑎᑦᓴᖃᑦᓯᐊᓂᐊᕐᒪᑕ ᓴᐳᑦᔭᐅᓗᑎᓗ ᓴᐳᑦᔭᐅᒋᐊᖃᓕᕈᑎᑦ ᓯᕗᓂᑦᓯᐊᖃᖁᓗᒋᑦ, ᐊᑦᑕᓀᑦᑐᒦᑦᑎᓯᓂᕐᑎᒍᓗ ᐃᓗᕐᕈᓯᖏᓐᓂᑦ ᐅᖃᐅᓯᖏᓐᓂᓗ.”
ᒥᓂ ᑯᕃ, ᐊᖓᔪᕐᖄᖓ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂ: “ᑖᓐᓇ ᐊᑎᓕᐅᕈᑎᖃᕐᓂᖅ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᖓᓂᒃ ᓄᐃᓚᕿᔪᖅ ᐊᒥᓱᓂᑦ ᐊᕐᕌᒍᕐᓂᑦ ᐱᓇᓱᐊᕐᑕᕗᓐᓂᑦ ᑲᒪᒋᐊᕋᓱᑦᓱᑕ ᐱᓀᓗᑕᖏᓐᓂᑦ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᑦᑕ ᐱᒍᑦᔨᒍᑎᖏᓐᓂᑦ ᓄᓇᕕᒻᒥ. ᒫᓐᓇ ᓯᕗᒧᐊᒍᓐᓇᓕᕐᖁᒍᑦ ᓄᓇᕕᒻᒥᐅᖑᑦᓱᑕ ᐱᒍᑦᔨᓗᑕ ᑲᓱᕐᑎᓯᓗᑕ ᐱᐊᕋᕐᓂᑦ ᐃᓚᒌᓂᓗ ᐱᒍᑦᔨᒍᑎᓂᑦ, ᐃᓄᓐᓄᑦ ᐱᓇᓱᑦᑕᐅᔪᓂᑦ ᐃᓄᓐᓅᓕᖓᔪᓂᑦ. ᐱᒍᓐᓇᓯᐊᕐᓂᖏᑦ ᐊᑐᓂ ᓂᕈᐊᕐᑕᐅᒪᔪᖁᑎᕗᑦ, ᓯᓚᑐᓂᖏᑦ ᐃᓄᑐᖃᖁᑎᑦᑕ, ᐊᓂᒎᑎᒍᓐᓇᓂᖏᑦ ᓱᓇᑐᐃᓐᓇᓂᑦ ᓄᓇᓕᕗᑦ, ᐱᒍᑦᔭᐅᑎᑦᓯᓯᕗᒍᑦ ᓄᓇᕕᒻᒥᐅᓂᑦ ᐃᓚᒌᓂᑦ ᓴᐳᑦᔭᐅᓗᑎᑦ ᐃᑉᐱᒋᔭᖃᑦᓯᐊᓂᒃᑯᑦ ᐃᓗᕐᕈᓯᑦᑎᓂᑦ, ᐱᒻᒪᕆᖁᑎᑦᑎᓂᑦ, ᐱᐅᓯᑐᖃᑦᑎᓂᓗ. ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᐱᒍᑦᔨᒍᑎᓂᑐᐃᓐᓇᐅᖏᑦᑐᖅ – ᐱᒋᐊᕐᑎᓯᒍᑎᒃ ᓯᕗᓂᕐᒥᒃ ᐱᐊᕋᕗᑦ ᐱᕈᕐᐸᓕᐊᑦᓯᐊᓂᐊᕐᒪᑕ ᐅᖃᐅᓯᕐᒥᓂᒃ ᐅᖄᓗᑎᑦ, ᑭᓇᐅᓂᕐᒥᓂᒃ ᖃᐅᔨᒪᓗᑎᑦ ᓄᓇᓕᒻᒥᓂᓗ.”