ᑐᓴᕋᑦᓴᖅ
ᑐᕓᔭᕉᑦ 6, 2021 – ᑰᒃᔪᐊᖅ, ᓄᓇᕕᒃ – 10:00-ᖑᑎᓪᓗᒍ ᐅᓛᖅ, ᐊᖓᔪᕐᖄᔪᐊᖅ ᔭᔅᑎᓐ ᑐᕉᑑ ᐅᖃᕐᕕᒧᑦ ᐁᕐᖃᐅᔪᖅ ᐅᖃᐅᓯᖃᕆᐊᕐᑐᓱᓂ ᑲᓇᑕᐅᑉ 30-ᒋᓕᕐᓱᒍ ᐊᑕᓂᐊᓗᒻᒧᑦ ᑭᒡᒐᑐᕐᑎᑖᖓᓂᒃ. ᑭᖑᓪᓕᖃᑦᓴᐅᑎᒋᕐᖃᐅᔪᖅ ᒥᐊᔨ ᓭᒪᓐᒥᒃ. ᑲᓇᑕᐅᑉ ᐊᖓᔪᕐᖄᖓ ᐅᖃᓕᒪᒋᐊᖕᖓᒌᑐᐊᕐᒪᑦ ᐊᖓᔪᕐᖃᐅᕕᒻᒥᓄᑦ ᐅᐱᒋᔭᐅᓂᓕᒃ ᒥᐊᔨ ᓭᒪᓐ ᑲᓇᑕᒥᐅᓂᒃ ᐅᖃᕐᕕᖃᕆᐊᖕᖓᖃᐅᔪᖅ ᐃᓄᒃᑎᑑᕐᓱᓂ, ᑕᒪᓐᓇ ᐊᑑᑎᓯᒪᔭᖏᓐᓂᑦ ᐊᖏᔪᒻᒪᕆᐅᑦᓱᓂ ᐃᓄᓕᒫᓄᑦ ᐃᓄᐃᑦ ᓄᓇᖓᓐᓂ, ᐊᒻᒪᓗ ᑲᓇᑕᓕᒫᒥ ᓄᓇᖃᕐᖄᓯᒪᔪᓕᒫᑦ ᐊᑑᑎᓯᒪᔭᖏᓐᓂᑦ ᐊᖏᔪᒻᒪᕆᐅᒻᒥᓱᓂ.
ᓄᓇᕕᒻᒥ, ᖃᐅᔨᒪᔦᓐᓇᕗᑦ ᐊᑕᓂᐊᓗᒻᒧᑦ ᑭᒡᒐᑐᕐᑎᑖᕗᑦ ᒥᐊᔨᒐᕐᓱᒍ. ᑎᓕᔭᐅᓂᖓᓂᒃ ᑲᓇᑕᒧᑦ 30-ᒋᔭᐅᑦᓱᓂ ᐊᑕᓂᐊᓗᒻᒧᑦ ᑭᒡᒐᑐᕐᑎᐅᓂᕐᒧᑦ ᐅᐱᒍᓱᑦᑐᒪᕆᐊᓘᕗᒍᑦ,” ᐱᑕ ᐋᑕᒥ ᐅᖃᕐᑐᕕᓂᖅ. “ᑕᒪᓐᓇ ᑲᓇᑕᐅᑉ ᐃᓄᑐᐃᓐᓇᓂᒃ, ᓄᓇᖃᕐᖄᓯᒪᔪᓂᒃ, ᐊᒻᒪᓗ ᒣᑏᒃᑯᓂᒃ ᖃᓄᐃᓕᖓᖃᑎᒌᒍᓯᖃᕐᓂᖓᓂᒃ ᓄᑖᒥᒃ ᐱᒋᐊᕐᑎᓯᔪᖅ. ᓄᓇᖃᕐᖄᓯᒪᔪᖅ ᐃᓄᒃ ᐊᑕᓂᐊᓗᒻᒧᑦ ᑭᒡᒐᑐᕐᑎᐅᑎᓪᓗᒍ ᑲᓇᑕᒥ ᓲᖑᔪᒥᒃ ᐅᖃᐅᓯᓕᒃ ᑲᓇᑕᒧᑦ, ᐊᒻᒪᓗ ᑲᓇᑕᐅᑉ ᓯᓚᑖᓂ ᓄᓇᓕᕐᔪᐊᖑᖃᑎᒌᓄᑦ. ᑕᒪᓐᓇ ᐊᑑᑎᔪᖅ ᓈᒻᒪᓈᑦᓯᐊᓂᖓ ᐊᑑᑎᓯᒪᔭᑦᑎᓂᑦ ᐃᒫᒃ ᒪᒥᐊᖃᑎᒌᓐᓂᑯᑦ ᐋᕐᕿᖃᑎᒌᓐᓂᒧᑦ ᐱᓇᓱᐊᖃᑎᒌᑦᑎᓗᑕ ᐱᒻᒪᕆᐅᑦᓱᓂ.
ᑕᒡᒍᖓ ᐊᑕᓂᐊᓗᒻᒧᑦ ᑭᒡᒐᑐᕐᑎᐅᓂᕐᒧᑦ ᑎᓕᔭᐅᖕᖏᓂᕐᒥᓂ ᒥᐊᔨ ᓭᒪᓐ ᐊᖏᖃᑎᒌᒐᓱᐊᕐᑎᒪᕆᒋᔭᐅᓚᐅᔪᔪᖅ ᓄᓇᕕᒻᒥ ᐱᓂᐊᕐᓂᓕᕆᓂᑎᒍᑦ ᓇᖕᒥᓂᖅ-ᑐᑭᑖᕐᑐᐃᒍᓐᓇᓂᕐᒧᑦ ᑎᑭᐅᑎᒍᑎᐅᒐᓱᑦᑐᓂᒃ ᐱᓇᓱᐊᕐᑕᐅᔪᓂ ᑲᓇᑕᐅᑉ ᑲᕙᒪᖓᓂᒃ ᐱᓇᓱᐊᖃᑎᖃᕐᓱᑎᒃ. ᒪᑭᕝᕕᒃ ᑯᐊᐳᕇᓴᒧᑦ ᐊᖓᔪᕐᖄᕆᔭᐅᓯᒪᒻᒥᔪᖅ, ᐃᓄᐃᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᖕᖓᔨᖏᓐᓂ ᐊᖓᔪᕐᖄᖑᓯᒪᑦᓱᓂ, ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᕐᖄᖑᓯᒪᒻᒥᓱᓂ. ᐱᓇᓱᐊᖃᑎᐅᓪᓚᕆᑦᓯᒪᔪᖅ ᐅᑭᐅᕐᑕᑐᒥ ᑲᑎᖕᖓᔩᑦ ᓄᐃᑕᐅᑎᓪᓗᒋᑦ ᐊᕐᕌᒍᑦ 25 ᐊᓂᒍᕐᑐᓂ. ᐊᑕᓂᐊᓗᒻᒧᑦ ᑭᒡᒐᑐᕐᑎᑖᕐᖃᒥᕗᑦ ᓯᕗᓪᓕᐸᐅᓯᒪᒻᒥᔪᖅ ᑲᓇᑕᒧᑦ ᑭᒡᒐᑐᕐᑎᒋᔭᐅᑦᓱᓂ ᐅᑭᐅᕐᑕᑐᒥ, ᐊᒻᒪᓗ ᑲᓇᑕᒧᑦ ᑭᒡᒐᑐᕐᑎᒋᔭᐅᓯᒪᒻᒥᓱᓂ ᑎᐊᓐᒫᒃᒥ. ᑕᓪᓕᒪᓂᒃ ᐃᓕᓐᓂᐊᕕᕐᔪᐊᓂᑦ ᑐᓂᔭᐅᓯᒪᔪᖅ ᐅᐱᒍᓲᑎᐅᑦᓱᑎᒃ ᐱᔭᕇᕐᓯᒪᐅᑎᑖᕈᑎᓂᒃ, ᐊᒻᒪᓗ ᐅᔭᒥᖃᕐᑎᑕᐅᑦᓱᓂ ᑲᓇᑕᐅᑉ ᐃᓕᑕᕆᔭᐅᒍᑎᑖᕐᑎᓯᕕᒻᒪᕆᖓᓂᑦ, ᐊᒻᒪᓗ ᑯᐯᑉ ᐃᓕᑕᕆᔭᐅᒍᑎᑖᕐᑎᓯᕕᒻᒪᕆᖓᓂᑦ ᐅᔭᒥᖃᕐᑎᑕᐅᒻᒥᓱᓂ.
“ᒥᐊᔨ ᓭᒪᓐ ᑕᒡᒍᖓ ᐃᓂᒧᑦ ᓇᑦᓴᓯᔪᖅ ᐱᓇᓱᐊᓕᓂᐅᒍᑎᒥᓂᒃ ᐊᒥᓱᓂᒃ,” ᐱᑕ ᐋᑕᒥ ᐅᖃᕐᑐᕕᓂᖅ. “ᓇᓗᖕᖏᓚᖓ ᓇᓂᓕᒫᖅ ᐅᓪᓗᒥ ᐃᓄᐃᑦ ᖁᕕᐊᓱᒍᑎᖃᓚᖓᒋᐊᖏᑦ ᓄᓇᕕᒻᒥ, ᓄᓇᑦᓯᐊᕗᒻᒥ, ᓄᓇᕗᒻᒥ, ᐃᓄᕕᐊᓗᐃᑦ ᓄᓇᑖᕆᓯᒪᔭᖏᓐᓂ, ᐊᓛᔅᑲᒥ, ᑲᓛᓪᓖᑦ ᓄᓇᖓᓂ ᐊᒻᒪᓗ ᑦᓱᑯᑦᑲᒥ. ᓄᓇᖃᕐᖄᓯᒪᔪᑦ ᐊᒻᒪᓗ ᒣᑦᑏ ᓄᓇᓕᖏᓐᓂᑦ ᖁᕕᐊᓱᒍᑎᑦᓴᑖᕐᓯᒪᒻᒥᔪᑦ ᐆᒥᖓᖓ ᓯᕗᓪᓕᐹᑦᓯᐊᒥᒃ ᑲᓇᑕᐅᑉ ᐃᕐᖃᓇᕐᑐᓂᑦ ᐊᑑᑎᓯᒪᔭᓕᒫᖏᓐᓂᑦ, ᓄᓇᖃᕐᖄᓯᒪᔪᒥᒃ ᐊᑕᓂᐊᓗᒻᒧᑦ ᑭᒡᒐᑐᕐᑎᖃᓯᒻᒪᑦ ᑲᓇᑕᒥ, ᐊᑕᓂᐊᓘᑉ ᑭᒡᒐᑐᕐᑎᖓ. ᐅᐱᓐᓇᑑᕗᑎᑦ ᐊᖓᔪᕐᖃᐅᕕᓐᓄᑦ ᐅᐱᒋᔭᐅᕕᓖᒃ, ᒥᐊᔨ ᓭᒪᓐ, ᐊᒻᒪᓗ ᑐᖕᖓᓱᒋᑦ ᐅᐱᒋᔭᐅᕕᓖᒃ ᒍᐃᑦ ᕗᕃᓱ, Rideau Hall-ᒧᑦ.”
-30-
ᖃᐅᔨᒋᐊᕐᕕᓴᖅ:
ᑳᓴᓐ ᑕᒍᕐᓈᖅ
ᐱᓂᐊᕐᓂᓕᕆᓂᕐᒥ ᐊᔪᖀᒋᐊᕐᑎ
ᑐᓴᐅᒪᖃᑎᒌᒍᑎᓂᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
wtagoona@makivik.org
www.makivik.org
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔪᖁᑎᒋᔭᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᒋᔭᖃᕐᓂᐊᑎᓪᓗᒍ ᑭᖑᕝᕕᑕᐅᒍᑎᓄᑦ ᓄᓇᕕᒻᒥ ᐃᓄᑐᐃᓐᓀᑦ ᑮᓇᐅᔭᖁᑎᖏᓐᓂᒃ ᐱᑕᖃᕐᑎᑕᐅᔪᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ. ᒪᑭᕝᕕᐅᑉ ᖃᓄᐃᓘᕐᑎᐅᒋᐊᖃᕐᓂᖓᑕ ᐃᓚᖓ ᐱᕈᕐᑎᓯᓂᖅ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒍᑎᑦᓴᓕᐅᕐᓂᒥᒃ ᐱᑕᖃᕐᑎᓯᓂᕐᒥᒍ ᐃᑲᔪᕐᓯᒍᑎᓂᒃ ᐃᓄᑐᐃᓐᓇᓄᑦ-ᐊᐅᓚᑕᐅᓂᐊᕐᓗᑎᒃ ᖄᖏᕐᓂᑯᓕᐅᕐᕖᑦ ᓄᐃᑎᕐᑕᐅᓂᖏᓐᓄᑦ ᓄᓇᕕᒻᒥ. ᒪᑭᕝᕕᒃ ᐃᑲᔪᕐᓯᒪᔪᖅ ᐃᓄᒃᑎᑐᑦ ᐃᓗᕐᕈᓯᐅᑉ ᐅᖃᐅᓯᐅᓪᓗ ᐱᐅᓕᐊᕐᑕᐅᓂᒋᓐᓂᒃ, ᐃᓚᒋᔭᐅᒻᒥᑎᓪᓗᒋᑦ ᐃᓗᓯᓕᕆᓂᖅ, ᐃᑲᔪᕐᓯᐅᑎᓕᕆᓂᖅ, ᐊᔪᕐᓴᓗᐊᕐᓂᒥᒃ ᐃᑯᓪᓚᑎᑦᓯᓂᕐᒥᒃ, ᐊᒻᒪᓗ ᐃᓄᑐᐃᓐᓀᑦ ᓄᓇᓕᓐᓂᑦ ᐃᓕᓐᓂᐊᓂᖏᓐᓂᒃ.