ᑐᓴᕋᑦᓴᖅ
ᓯᕗᓕᕐᑏᑦ ᓄᓇᕕᒻᒥ ᓄᓇᓕᓕᒫᓂ ᑎᒥᐅᔪᓂᑦ ᑲᑎᖕᖓᓂᖃᕐᖁᑦ ᑕᒡᒐᓂ ᐱᓇᓱᐊᕈᓯᕐᒥ ᒪᓐᑐᕆᐊᓪᒥ ᓯᕗᒧᐊᑦᑎᓯᒋᐊᕐᓂᒧᑦ ᐊᑕᐅᑦᓯᑯᓕᕐᑎᓯᓂᕐᒥᒃ ᐱᓇᓱᑦᑕᒥᓂᑦ ᓯᕗᓪᓕᐅᔭᐅᖁᔭᒥᓂᑦ. ᑲᑎᖕᖓᓂᖅ ᐸᕐᓀᑕᐅᓐᓂᖁᖅ ᓄᓇᕕᒻᒦᓚᖓᑎᓪᓗᒍ, ᓯᓂᑦᑕᕖᓐᓂᐊᓂᑯᖓᓄᑦ ᓄᓇᕕᓕᒫᒥ ᐃᓂᖃᕈᓐᓇᓚᐅᖕᖏᒪᑕ ᑲᑎᖕᖓᒋᐊᑐᑐᓕᒫᓂᑦ ᓄᓇᕕᒻᒦᒍᓐᓇᓂᖕᖏᓚᖅ. ᑌᒣᒻᒪᑦ, ᑲᑎᖕᖓᓂᖅ ᒪᓐᑐᕆᐊᓪᒨᕐᑕᐅᓂᕐᖁᖅ – ᐊᑑᑎᓂᖃᓐᓂᐅᔪᖅ ᓯᕗᓪᓕᐸᐅᑦᓱᓂ ᐊᕐᕌᒍᑕᒫᑦ ᑲᑎᖕᖓᓂᖃᖃᑦᑕᓂᐊᕐᓕᕐᓱᑎᑦ ᓄᓇᕕᒻᒥ ᑎᒥᐅᔪᓕᒫᑦ.
ᑖᓐᓇ ᓄᑖᖅ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᖅ ᑐᓂᒪᓂᕐᒥᒃ ᓄᐃᑦᓯᓂᐅᔪᖅ ᓄᓇᕕᒻᒥ ᓯᕗᓕᕐᑎᖏᓐᓄᑦ ᑲᑎᓗᑎᑦ, ᖃᐅᑕᒫᑦ ᑎᓕᔭᐅᒪᒍᑎᒥᑦᑕ ᐅᖓᑖᓄᕐᑐᓂᑦ, ᑲᒪᒋᐊᕐᓗᑎᑦ ᐱᓇᓱᑦᑕᐅᔪᓂᑦ ᓄᓇᓕᓕᒫᑎᒍᑦ ᑲᒪᒋᔭᐅᒋᐊᓕᓐᓂᑦ, ᑲᑐᑦᔨᖃᑎᒌᓐᓂᖃᕆᐊᕐᓱᑎᑦ.
“ᐃᓘᓐᓇᑕ ᖃᓄᐃᓗᕈᑎᖃᕐᑐᓴᔭᐅᒐᑦᑕ ᐱᐅᓯᐅᒥᑎᑦᓯᓂᕐᒧᑦ ᓄᓇᕕᒻᒥᐅᑦ ᐃᓅᓯᖏᓐᓂᑦ,” ᐅᖃᕐᑐᖅ ᒪᑭᕝᕕᑯᑦ ᐊᖓᔪᕐᖄᖓ ᐱᑕ ᐋᑕᒥ. “ᑖᓐᓇ ᐊᕐᕌᒍᑕᒫᑦ ᑲᑎᖕᖓᓂᖅ ᐃᑦᓯᕙᖃᑎᒌᑦᑎᓯᒍᑎᐅᔪᖅ ᐅᕙᑦᑎᓂᑦ ᑲᒪᒋᐊᕐᓗᑕᓗ ᐱᓀᓗᑕᓂᑦ ᐊᑑᑎᓲᕗᓐᓂᑦ ᐊᑕᐅᑦᓯᑯᕐᓗᑕ, ᐃᓘᓐᓇᖏᓐᓂᑦ ᑎᓕᔭᐅᒪᒍᑎᓂᑦ ᐊᒻᒪᓗ ᐊᑦᔨᒌᖕᖏᑐᓂᑦ ᐱᒍᑦᔨᕕᓐᓂᑦ.”
ᑲᑎᖕᖓᓂᕐᒥ ᑐᑭᒧᐊᒍᑎᖓ ᑲᒪᒋᐊᕐᓂᐅᔪᖅ ᐊᑦᔨᒌᖕᖏᑐᓂᑦ ᐱᓇᓱᑦᑕᐅᔪᓂᑦ ᐃᓘᓐᓇᓕᒫᖏᓐᓄᑦ ᐊᑦᑐᐊᔪᓂᑦ ᑎᓕᔭᐅᒪᒍᑎᓂᑦ ᑲᒪᒋᔭᐅᒋᐊᖃᕐᓱᑎᓗ ᐊᑕᐅᑦᓯᑯᕐᓗᑕ ᖃᓄᐃᓗᕈᑎᒋᒋᐊᕐᓗᒋᑦ, ᐃᓚᐅᑎᓪᓗᒋᑦ:
· ᓇᒻᒥᓂᖅ ᑐᑭᑖᕈᓐᓇᓂᖅ: ᓯᕗᒧᐊᑦᑎᓯᓂᖅ ᐃᓄᐃᑦ ᐊᐅᓚᑦᓯᒍᓐᓇᓂᖏᓐᓂᑦ ᐊᑯᓃᕐᑐᒧᓕᖓᔪᒥᓗ ᐃᒻᒥᓂᕿᒍᓐᓇᓂᕐᒥᒃ.
· ᐳᓖᓯᓕᕆᓂᖅ: ᓇᐅᓕᒫᑦ ᐊᑦᑕᓀᑦᑎᒥᒋᐊᖃᕐᓂᖏᓐᓂᑦ ᖃᓄᐃᓘᕈᓯᖏᑦ ᑲᒪᒋᐊᕈᓐᓇᓯᐊᕐᓗᑎᑦ ᓄᓇᓕᐅᑉ ᐊᑑᑎᓪᓚᕆᑦᑕᖏᑎᒍᕐᑐᓂᑦ.
· ᐱᓇᓱᑦᑏᑦ ᐱᕙᓪᓕᖁᑎᖏᑦ: ᑲᒪᒋᐊᕐᓂᖅ ᐱᓇᓱᑦᑎᓴᕐᓯᐅᓂᕐᓂᑦ ᐱᓇᓱᑦᑎᖃᑯᑖᕐᓂᒥᓗ ᐱᓀᓗᑕᐅᓲᓂᑦ ᐱᒍᑦᔨᕕᓕᒫᓂᑦ ᐊᒻᒪᓗ ᐃᓄᐃᑦ ᐱᓇᓱᑦᑏᑦ ᐱᕙᓪᓕᖁᑎᖏᑦ ᐊᑦᔨᐅᖏᑦᑑᑎᑕᐅᓂᕆᓲᖏᑦ ᐲᕐᓗᒋᑦ.
· ᐱᐊᕃᑦ ᐊᑦᑕᓀᑦᑐᒦᒋᐊᖃᕐᓂᖏᑦ ᐃᓚᒌᓂᓗ ᐱᒍᑦᔨᒍᑏᑦ ᓄᓇᕕᒻᒥ ᐃᓄᐃᑦ ᐸᐸᑕᐅᕕᖓ: ᐱᐅᓯᐅᒥᑎᑦᓯᓂᖅ ᐃᑲᔪᕐᓯᒍᑎᓂᑦ ᐊᑦᑕᓀᑦᑐᒦᑎᑦᓯᓂᕐᓂᓗ ᐃᓄᓐᓂᑦ ᐃᓚᒌᓂᑦ.
· ᓴᓇᕐᕈᑎᒃ 2.0: ᓄᐃᑦᓯᓂᖅ ᑭᖑᓪᓕᖏᓐᓂᑦ ᖃᓄᐃᓘᕆᐊᕈᑎᐅᓂᐊᓕᕐᒥᔪᓂᑦ ᑮᓇᐅᔭᑎᒍᑦ ᓄᓇᓕᓐᓂᓗ ᐱᕙᓪᓕᐊᑎᑦᓯᓂᕐᓂᑦ.
· ᓂᐅᕕᕐᓂᖅ: ᓴᐳᑦᔨᓂᖅ ᓄᐃᑦᓯᓂᕐᓗ ᓯᕗᓪᓕᐅᔭᐅᖁᔭᐅᔪᓂᑦ ᐃᓄᓐᓂᑦ ᐱᓇᓱᑦᑎᑖᕐᓂᓂᑦ, ᐱᓇᓱᑦᑎᖃᓚᐅᕐᑐᓂᖅ ᐃᓄᓐᓄᑦ ᒪᑭᑕᒐᓱᐊᕈᑎᒋᔭᐅᔪᓂᑦ ᓄᓇᓕᓕᒫᓂ ᓂᐅᕕᕐᓂᓄᑦ ᐱᒍᓐᓇᐅᑎᖓᑎᒍᑦ.
· ᓄᓇᓕᐊᕈᕐᓂᑦ ᐱᒍᑦᔨᒍᑏᑦ: ᑐᖕᖓᕕᒋᔭᐅᔪᓂᑦ ᓲᖑᓯᐅᒥᑎᑦᓯᓂᖅ ᖃᐅᑕᒫᑦ ᐊᑑᑎᔭᖏᓐᓂᑦ ᐅᑭᐅᕐᑕᑐᒥᐅᑦ.
ᐱᑐᑦᓯᒪᔪᖅ ᑖᑦᓱᒧᖓ ᐊᓯᑦᔨᒋᐊᕐᓂᒧᑦ, ᒪᑭᕝᕕᑯᑦ ᐊᕐᕌᒍᑕᒪᑦ ᑲᑎᖕᖓᓂᕐᔪᐊᖓ ᒫᓐᓇᐅᑎᓪᓗᒍ ᐃᓚᐅᔪᐃᑦ ᑭᓯᐊᓂ ᑲᑎᖕᖓᖃᑦᑕᓂᐊᓕᕐᖁᑦ, ᐱᒋᐊᕐᓗᓂ ᑕᒡᒐᓂ ᐊᕐᕌᒍᕐᒥ. ᑖᓐᓇ ᐊᓯᑦᔩᓂᖅ ᑲᒪᒋᐊᕐᓂᐅᔪᖅ ᖃᓄᐃᓗᕈᓯᒋᒋᐊᓕᖏᓐᓂᑦ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᔪᐊᖅ ᑲᒪᒋᐊᕈᓐᓇᓯᓂᐊᕐᒪᑕ ᐃᓄᓐᓄᓕᖓᔪᓂᑦ ᐃᓚᐅᔪᓄᓕᖓᔪᓂᑦ, ᐃᒻᒥᒎᕐᑐᒥᒃ ᑲᑎᖕᖓᓂᖃᕐᑎᓯᑦᓱᑎᑦ ᐅᖄᖃᑎᒌᕝᕕᓴᓂᑦ ᐊᑦᔨᒌᖕᖏᑐᐃᓗᑦ ᑎᒥᐅᔪᐃᑦ.
ᒪᑭᕝᕕᒃ ᑐᕌᕐᓂᐊᑐᖅ ᓄᑖᒥᒃ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᔪᐊᖃᕐᑎᓯᓂᕐᒥᒃ ᑎᒥᐅᔪᓕᒫᓂᑦ ᑲᑎᖕᖓᑎᑦᓯᓂᕐᒥᒃ ᓯᕗᓂᐊᒍᑦ ᒪᑭᕝᕕᑯᑦ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᔪᐊᖃᓚᐅᕐᑎᓇᒋᑦ ᓇᓗᓀᕐᓯᓗᑎᑦ ᓯᕗᓪᓕᐅᔭᐅᖁᔭᐅᔪᓂᑦ ᐱᓀᓗᑕᓂᓗ ᐅᖄᒍᑎᐅᒋᐊᓕᓐᓂᑦ ᑐᑭᑖᕈᑎᐅᒋᐊᓕᓐᓂᓗ ᒪᑭᕝᕕᑯᑦ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᔪᐊᖓᓂ.
ᖃᐅᔨᒋᐊᕈᒪᒍᕕᑦ ᐃᓗᓕᖏᓐᓂᑦ ᓄᐃᓚᕿᔪᓂᑦ ᑲᑎᖕᖓᓂᕐᒥ ᑐᓴᕐᑕᐅᑎᓯᓂᐊᕐᖁᒍᑦ ᐅᓪᓗᓂᑦ ᓯᕗᓂᑦᑎᓂ.
– 30 –
ᖃᐅᔨᒋᐊᕐᕕᐅᒍᓐᓇᑐᖅ:
ᑳᕐᓴᓐ ᑕᒍᓐᓇ
ᑐᑭᒧᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ
ᒪᑭᕝᕕᒃ
ctagoona@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᖕᖑᑐᕕᓂᖅ ᑎᓕᔭᐅᒪᑦᓱᓂ ᐊᐅᓚᑦᓯᓂᐊᕐᓱᓂ ᓄᓇᑐᖃᕐᓄᓕᖓᔪᓂᑦ ᑮᓇᐅᔭᖏᓐᓂᑦ ᐃᓄᐃᑦ ᓄᓇᕕᒻᒥᐅᑦ ᐱᔭᐅᓚᐅᕐᑐᕕᓂᕐᓂᑦ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᐅᑉ ᖃᓄᐃᓗᕈᓯᒋᐊᓕᖏᓐᓂᑦ ᐃᓚᖃᕐᖁᑦ ᐊᐅᓚᑦᓯᓗᑎᑦ ᑮᓇᐅᔭᓕᐅᕆᐊᓪᓚᒍᑎᑦᓴᓕᐅᕐᓗᑎᓗ ᑖᒃᑯᓂᖓ ᑮᓇᐅᔭᓂᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᓂ ᐱᕙᓪᓕᐊᑎᑦᓯᓗᑎᑦ ᐃᑲᔪᕐᓯᓂᒃᑯᑦ ᓄᐃᑕᐅᔪᓂᑦ ᐃᓄᓐᓄᑦ ᓇᒻᒥᓂᕆᔭᐅᔪᓂᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᒃ ᓴᐳᒻᒥᔪᖅ ᐊᓯᐅᑐᐃᓐᓇᑎᑦᓯᑌᓕᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐊᒻᒪᓗ ᐃᓗᓯᖏᓐᓂᑦ, ᖃᓄᐃᖕᖏᓯᐊᕐᓂᖏᓐᓂᑦ, ᐊᔪᕐᓴᓂᒻᒦᑎᑦᓯᑌᓕᓂᕐᒥᒃ, ᐃᓕᓐᓂᐊᓂᖏᓐᓂᓗ ᐃᓄᓐᓂᑦ ᓄᓇᓕᓐᓃᑐᓂᑦ.
