ᓄᓇᓖᑦ ᖁᓕᓪᓗ ᓯᑕᒪᓪᓗ ᓄᓇᕕᒻᒥ ᓯᕗᓪᓕᐸᐅᑦᓱᑎᒃ ᑕᕆᐅᑉ ᓯᓛᓂᒥᐅᓂ ᓄᓇᓕᓐᓂ ᒪᙯᕝᕕᖃᓲᖑᑦᓱᑎᒃ, ᐃᖃᓗᓐᓂᐊᓱᑎᒃ ᓄᐊᑦᓯᓱᑎᒃ, ᒪᑭᑉᐸᓕᐊᒐᓱᐊᕐᓂᒥᒃ ᐱᓇᓱᐊᕈᑎᒋᑦᓱᒋᑦ ᒪᙯᙳᐊᓂᕐᓄᓗ. ᓄᓇᕕᒻᒥ ᐄᒐᕐᕕᖃᕐᓂᖅ ᐱᒻᒪᕆᐅᕗᖅ ᖃᓪᓗᓈᓂ ᐊᕐᖁᑏᑦ ᐱᒻᒪᕆᐅᑎᑕᓂᕆᓲᖏᑎᑐᑦ.
1998-ᖑᑎᓪᓗᒍ ᒪᑭᕝᕕᒃ ᐊᖏᖃᑎᒌᖃᑎᖃᕐᓯᒪᔪᖅ ᑲᓇᑕᐅᑉ ᑲᕙᒪᖓᓂᒃ ᑮᓇᐅᔭᖃᕐᑎᓯᓂᐊᕐᑎᓗᒍ ᐱᒋᐊᕐᓂᓕᒍᑎᐅᓂᐊᕐᑐᓂᒃ ᐄᒐᕐᕕᓕᐅᕐᓂᒧᑦ ᓄᓇᓕᓐᓂ ᖁᓕᓪᓗ ᓯᑕᒪᓪᓗᓂ. ᑖᑦᓱᒪ ᐊᖏᖃᑎᒌᒍᑎᐅᑉ ᐊᑎᓕᐅᕐᑕᐅᓂᖓ ᓴᕐᕿᑎᑦᓯᒍᑎᐅᓯᒪᔪᖅ ᒪᑭᕝᕕᐅᑉ ᓴᓇᔨᖏᓐᓂᒃ ᐊᑐᓕᕐᑎᓯᓂᐊᕐᑎᓗᒋᑦ ᐊᖏᖃᑎᒌᒍᑎᐅᔪᓂᒃ ᐄᒐᕐᕕᓕᐅᕈᑎᑦᓴᓂᒃ ᓄᓇᕕᒻᒥ ᑭᖑᓂᖓᒍᓪᓗ ᐃᓪᓗᓕᐅᕐᓂᒥᒃ ᐱᓇᓱᐊᓯᒻᒥᓱᑎᒃ. ᐊᕐᕌᒍᓂ ᖁᓕᓂ ᓄᓇᓖᑦ ᐄᒐᕐᕕᑖᕐᓯᒪᔪᐃᓐᓇᐅᓕᕐᑐᑦ ᐊᑐᓂᑦ ᐊᑦᔨᒌᙱᑐᓂᒃ ᑭᙴᒪᒋᔭᖏᑦ ᒪᓕᑦᓱᒋᑦ ᐅᓕᑦᑕᓂᖏᑦ, ᑎᓂᑦᑕᓂᖏᑦ, ᐃᖏᕐᕋᓂᖏᑦ, ᒪᓕᖏᑦ, ᓯᑯᐃᓪᓗ ᐃᖏᕐᕋᓂᖏᑦ ᓯᓚᐅᓪᓗ ᐊᓯᑦᔨᑕᕐᓂᖏᑦ ᒪᓕᑦᓱᒋᑦ.
ᑯᐯᑉ ᑲᕙᒪᖓᑦ ᐊᖏᕐᓯᒪᒻᒥᔪᖅ ᑐᖓᓕᐊᓂ ᐱᓇᓱᐊᕐᓂᐅᔪᓂᒃ ᐃᓚᐅᕕᖃᕐᓂᐊᓱᓂ ᐄᒐᕐᕕᓕᐅᕐᓂᒥ. ᐱᔭᕇᕐᑕᐅᓯᒪᓕᑐᐊᕈᑎᒃ ᑌᒣᓐᓄᑦ ᑲᕙᒫᓐᓄᑦ ᑲᕙᒪᑐᖃᒃᑯᓄᑦ ᑯᐯᒃᑯᓄᓪᓗ ᑮᓇᐅᔭᕐᑕᓯᕐᑕᐅᓯᒪᓛᕐᑐᑦ R44 ᒥᓕᐊᓂᒃ ᐊᑐᓂᑦ ᑕᒪᓐᓇ ᑭᙴᒪᒋᔭᐅᓪᓚᕆᑦᑐᖅ ᓄᓇᕕᒻᒥ ᐱᒍᓐᓇᓯᔭᐅᑦᓯᐊᖁᓪᓗᒍ.
ᑕᒪᑐᒪ ᐱᓇᓱᐊᕐᑕᐅᓂᖓ ᑐᖓᓕᐊᓃᓕᕐᑐᖅ ᑐᑭᖃᕐᑐᖅ ᓄᓇᓖᑦ ᐱᐅᒃᑯᑎᖏᑦ ᓄᑕᐅᓯᓕᕐᑕᐅᓕᕐᑐᑦ ᐅᒥᐊᕐᔪᐊᑦ ᓂᐅᕂᓂᕆᓲᖓ ᐃᓱᐊᕐᓯᑎᕐᓱᒍ ᐄᒐᕐᓯᒪᕖᓪᓗ ᐃᓱᐊᕐᑐᕈᕐᑎᓱᒋᑦ ᓄᓇᓖᑦ ᐅᒥᐊᖁᑎᖏᓄᑦ ᐃᖃᓗᓐᓂᐊᑎᓄᑦ ᐅᕝᕙᓗᓘᓐᓃᑦ ᐊᓯᐅᒪᔪᖃᓕᑐᐊᕐᒪᑦ ᐅᐃᒪᓇᕐᑐᓯᐅᕐᑎᓄᑦ.
ᐊᕐᕌᒍᑕᒫᑦ ᓄᓇᒃᑰᔫᒻᒪᕇᑦ ᒪᕐᕈᐃᑦ, ᓯᐅᕋᕐᑕᐅᑏᑦ, ᑯᑭᓕᐊᓗᐃᑦ, ᐊᒡᒐᕈᑏᑦ, ᓯᖃᓪᓕᐅᑏᓪᓗ ᓅᑕᐅᖃᑦᑕᓲᑦ ᓄᓇᓕᓐᓄᑦ ᐱᔭᕇᑐᐊᕐᒪᑕ ᑐᖓᓕᐊᓂ ᐱᓇᓱᐊᕆᐊᓕᒻᒥᓂᒃ.
ᑕᒪᒃᑯᓂᖓ ᐃᓱᕐᕉᑎᓂ ᓴᓇᓂᕐᒥᓂ ᒪᑭᕝᕕᒃ ᒪᑭᑕᒍᓐᓇᓯᐊᕐᓂᐊᑐᓂᒃ ᓴᓇᒋᐊᖃᓲᖅ ᓄᓇᓕᓐᓄᑦ, ᐄᒐᕐᕕᓕᐅᕐᓂᓂ ᑮᓇᐅᔭᐅᓕᕈᑎᐅᒥᒪᑕ ᓄᓇᓕᓐᓂ ᐱᓇᓱᑦᑎᓯᒍᓐᓇᓱᑎᓪᓗ ᐃᓄᓐᓂᒃ 70&-ᒥᒃ.
ᓴᓇᖃᑦᑕᓂᖏᓄᑦ ᐃᓚᐅᑎᓪᓗᒍ ᐱᕙᓪᓕᑎᑦᓯᒋᐊᕈᑎᓂᓪᓗ ᐄᒐᕐᕕᖃᕐᓂᑯᑦ, ᒪᑭᕝᕕᐅ ᓴᓇᔨᖏᑦ ᓄᓇᓕᓐᓂ ᐱᕙᓪᓕᖁᑎᑖᕐᑎᓯᒋᐊᓪᓚᓲᖑᒻᒥᔪᑦ ᐃᓚᐅᑎᓪᓗᒋᑦ ᓯᖃᓪᓕᓯᒪᔪᓂᒃ ᑐᐊᐸᔮᓕᐅᕐᓂᖅ ᐃᓪᓗᐃᓗ ᐃᓂᑦᓴᖏᓐᓂᒃ ᐊᓯᖏᓐᓂᓗ ᓴᓇᓂᕐᒨᓕᖓᔪᓂᒃ.