ᑐᓴᕋᑦᓴᖅ
ᓄᕕᒻᐱᕆ 5, 2024, ᑰᑦᔪᐊᖅ, ᓄᓇᕕᒃ –ᒪᑭᕝᕕᒃᑯᑦ ᐃᓚᑦᔪᒍᓱᒃᑯᑦ ᐸᐱᑲᑦᑐᒃᑯᓂᑦ ᐃᓚᒌᓂᑦ ᓴᓪᓗᒥᐅᓕᒫᓂᓗ ᐊᓕᐊᓇᖕᖏᑐᒻᒪᕆᒃᑰᑐᕕᓂᐅᑎᓪᓗᒋᑦ ᐃᓚᐅᔪᕕᓂᐅᑎᓪᓗᒋᑦ ᓄᓇᕕᒻᒥ ᐳᓖᓯᖏᑦᑕ ᐱᒍᑦᔨᒍᑎᖏᑦ, ᐃᓅᒍᓐᓀᓚᕿᑎᓪᓗᒍ ᔮᓱᐊ ᐸᐱᑲᑦᑐᒃ ᐊᕐᖁᓇᒻᒪᕆᑦᑕᐅᑎᓪᓗᒍᓗ ᖃᕆᒌᖃᑎᖓ ᑳᕐᓇᑦ ᐸᐱᑲᑦᑐᒃ. ᓂᑯᕐᕋᖃᑎᐅᕗᒍᑦ ᐸᐱᑲᑦᑐᑯᓄᑦ ᐃᓚᒌᓄᑦ, ᓇᓪᓕᒋᔭᖏᓐᓄᓗ, ᓄᓇᓕᒻᒥᐅᓕᒫᓄᓗ ᐋᓐᓂᐊᓇᕐᑐᒪᕆᒃᑰᑎᓪᓗᒋᑦ ᒫᓐᓇᐅᔪᖅ.
ᒪᑭᕝᕕᑯᑦ ᓈᒻᒪᓴᖕᖏᓗᑐᕐᖁᑦ ᖃᓄᐃᓗᕐᓂᐅᔪᕕᓂᕐᓂᑦ ᐳᓖᓯᒃᑯᑦ ᐊᓕᐊᓇᖕᖏᑐᒻᒪᕆᒥᒃ ᓄᐃᓚᕿᒍᑎᕕᓂᕐᒥᒃ. ᑕᒪᓐᓇ ᐊᑑᑎᔭᕕᓂᖅ ᐃᓱᒫᓗᑎᒻᒪᕆᓂᑦ ᓄᐃᑦᓯᒍᑎᐅᕗᖅ ᖃᓄᐃᓗᕐᓂᕆᓲᖏᓐᓂᑦ ᐱᖁᔦᑦ ᒪᓕᑦᑕᐅᓯᐊᕆᐊᖃᕐᓂᖏᓐᓂᑦ ᐱᓇᓱᑦᑎᓂᑦ ᓄᐃᑦᓯᐊᓱᓂᓗ ᐱᓪᓚᕆᑦᑐᒥᒃ, ᐅᐃᒪᓇᕐᑐᒥᒃ ᐱᐅᓯᐅᒥᒋᐊᕐᑕᐅᒋᐊᖃᕐᓂᖏᓐᓂᑦ ᐃᓕᓐᓂᐊᑎᑦᓯᓂᐅᓲᑦ ᐊᒻᒪᓗ ᓲᖑᓯᐅᒥᑎᑦᓯᓂᕐᒥᒃ ᐱᓇᓱᖃᑎᒌᓐᓂᖏᑦ ᐳᓖᓰᑦ ᓄᓇᓕᖁᑎᑦᑎᓂᓗ. ᐳᓖᓰᑦ ᐱᒍᑦᔨᓂᖏᑦ ᐱᑦᓯᐊᓂᐊᕈᑎᑦ ᓄᓇᕕᒻᒥ ᑐᖕᖓᕕᖃᑦᓯᐊᕆᐊᖃᕐᖁᑦ ᑐᑭᓯᒪᓗᑎᑦ ᐊᑦᔨᐅᖏᑦᑐᒥᓗ ᐃᓗᕐᕈᓯᖓᓂᒃ, ᐃᓅᖃᑎᒌᓂ, ᐊᑑᑎᓯᒪᔭᖏᓐᓂᓗ ᐃᓗᓕᖏᓐᓂᑦ ᓄᓇᓕᖁᑎᑦᑕ ᓲᓱᑦᓴᓂᐊᕐᓂᒥᒃ, ᐊᑦᑕᓀᑦᑐᒥᒃ ᓈᒻᒪᓈᕐᑐᓂᓗ ᐃᓅᖃᑎᒌᒍᓐᓇᓂᖃᕐᓗᑎᑦ ᓄᓇᓕᒻᒥᐅᓂᑦ.
ᑖᓐᓇ ᐅᖁᒣᑦᑐᑯᒻᒪᕆᓐᓂᖅ ᐋᓐᓂᓴᕐᑐᖅ ᐃᕐᙯᑎᑦᓯᒍᑎᐅᑦᓱᓂ ᐳᓖᓯᖏᑦ ᓄᓇᕕᒻᒥ ᐊᓯᑦᔨᒋᐊᓪᓚᕆᒋᐊᖃᕐᓂᖏᓐᓂᑦ ᐱᒍᑦᔨᓯᐊᕐᓗᑎᑦ ᓴᐳᒻᒥᓗᑎᓗ ᐃᓄᖁᑎᖏᓐᓂᑦ,” ᐅᖃᕐᑐᕕᓂᖅ ᒪᑭᕝᕕᑯᑦ ᐊᖓᔪᕐᖄᖓ ᐱᑕ ᐋᑕᒥ. ᑐᖁᑦᓯᒍᑎᐅᒍᓐᓇᖏᑦᑐᓂᑦ ᓄᕐᖃᑎᑦᓯᒐᓱᒍᑎᓂᑦ ᖃᓄᐃᓗᕈᓯᑖᕆᐊᖃᓕᕐᖁᑦ ᑕᒪᓐᓇᓗ ᖃᓄᐃᓗᕈᓯᐅᔪᖅ ᐊᑐᕐᑕᐅᖏᓐᓇᓕᒫᓂᐊᓕᕐᓗᓂ, ᓲᖑᓂᕐᓴᒥᓗ, ᓲᓱᑦᓴᓯᐊᕐᓂᒥᓗ ᐃᓅᖃᑎᒌᒋᐊᖃᓕᕐᓱᑎᑦ ᐳᓖᓰᑦ ᓄᓇᓕᕗᓪᓗ. ᐳᓖᓰᑦ ᓄᓇᓕᕗᓐᓅᕋᒥᒃ, ᑎᑭᒋᐊᖃᕐᖁᑦ ᓴᐳᒻᒥᒋᐊᕐᑐᓗᑎᑦ ᐅᕙᑦᑎᓂᑦ – ᓱᒃᑯᐃᖏᖔᕐᓗᑎᑦ. ᒪᑭᕝᕕᑯᑦ ᓂᑯᕐᕋᖃᑎᐅᑦᓯᐊᓚᖓᕗᑦ ᑲᒪᒋᔭᑦᓴᔭᖏᓐᓂᑦ ᑲᒪᒋᔭᐅᑎᑦᓯᓗᑎᑦ ᐊᒻᒪᓗ ᐅᖄᒍᑎᖃᕐᓗᑎᑦ ᐃᓱᐊᕈᑎᖏᓐᓄᑦ ᐃᓄᐃᑦ. ᐱᓇᓱᑦᑕᐅᔪᑦᓴᓕᒫᓂ, ᑐᑦᓯᕋᓱᖕᖑᕗᒍᑦ ᒫᓐᓇᓴᐅᑎᒋᒃ ᐅᓄᕐᓯᒋᐊᕐᑕᐅᖁᓗᒋᑦ ᐃᓱᒪᒃᑯᑦ ᖃᓄᐃᖕᖏᓯᐊᕆᐊᖃᕐᓂᒧᓕᖓᔪᓂᑦ ᐱᒍᑦᔨᒍᑎᓂᑦ ᓴᓪᓗᒥᐅᓄᑦ ᐃᑲᔪᕐᓯᔭᐅᖁᓗᒋᑦ ᑲᒪᒋᐊᕈᓐᓇᓯᓗᑎᑦ ᓵᖕᖓᓯᒍᓐᓇᓯᓗᑎᓗ ᑕᒪᑦᓱᒥᖓ ᐅᖁᒣᑦᑐᑯᕐᓂᒪᕆᒻᒥᒃ ᐊᑑᑎᔭᕕᓂᕐᒥᒃ. “ᐱᑕ ᐋᑕᒥ, ᒪᑭᕝᕕᑯᑦ ᐊᖓᔪᕐᖄᖓ
ᓴᐳᑦᔨᓯᐊᕐᖁᒍᑦ ᐃᒻᒥᒍᕐᑐᓂᑦ ᖃᐅᔨᓴᕐᑎᓂᑦ ᐱᒋᐊᕐᑎᑕᕕᓂᕐᓂᑦ ᑯᐯᒃᑯᑦ ᐊᓪᓚᕕᖓᓂ ᖃᐅᔨᓴᕐᑎᓂᑦ ᖃᓄᐃᓕᖓᓂᕕᓂᕐᓂᑦ ᓄᐃᑦᓯᓂᐊᕐᒪᑕ ᐱᖁᔦᓗ ᒪᓕᑦᑕᐅᑎᑦᓯᐊᓗᒋᑦ. ᒪᑭᕝᕕᑯᑦ ᐅᖃᕐᖁᑦ ᑲᑐᑦᔨᖃᑎᐅᑦᓯᐊᓂᐊᕐᓂᒥᓂᒃ ᖃᐅᔨᓴᕐᑎᓄᑦ ᓴᐳᒻᒥᓯᐊᓂᐊᕐᓱᑎᓗ ᐱᒍᓐᓇᐅᑎᖏᓐᓂᑦ ᐸᐱᑲᑦᑐᑯᑦ ᐃᓚᒌᓂᑦ ᑕᒪᑦᓱᒪᐅᑉ ᐱᓇᓱᐊᕐᑕᐅᓂᓕᒫᖓᓂ. ᐃᓄᐃᑦ ᓴᓪᓗᒥᐅᑦ ᐱᕕᑦᓴᖃᕐᑎᓯᐊᓂᐊᕐᖃᕗᑦ ᐃᓱᒫᓗᑎᒥᓂᒃ ᐅᖄᒍᓐᓇᕕᖃᕐᑎᓗᒋᑦ ᓄᓇᓕᒥᑦᑕ ᐳᓖᓯᓕᕆᓂᖏᓐᓂᑦ.
ᐅᓇᒋᐊᓪᓚᓗ, ᒪᑭᕝᕕᑯᑦ ᒫᓐᓇᓴᐅᑎᒋᒃ ᐃᓱᒪᒃᑯᑦ ᖃᓄᐃᖕᖏᓯᐊᕐᓂᒧᓕᖓᔪᓂᑦ ᐃᑲᔪᕐᓯᒍᑎᓂᑦ ᐅᓄᕐᓯᐅᒥᒋᐊᑦᓴᐅᑎᒋᖁᔨᕗᑦ ᓴᓪᓗᒥᐅᓄᑦ ᓄᓇᕕᓕᒫᒥᓗ ᓄᓇᓕᖏᓐᓄᑦ. ᐅᖁᒣᑦᑐᑯᕐᓂᖅ ᓱᕐᕃᒪᕆᒻᒪᑦ ᐃᓚᐅᔪᑐᐃᓐᓇᓂᐅᖕᖏᑐᖅ, ᓱᕐᕃᓱᓂ ᐃᓄᓐᓂᑦ ᓄᓇᕕᓕᒫᒥ ᓱᕐᕋᑕᐅᔪᓂᑦ ᑕᒪᑦᓱᒧᖓ ᐊᑑᑎᔭᕕᓂᕐᒧᑦ. ᑲᒪᒋᐊᕐᓗᑎᑦ ᓱᕐᕋᑕᐅᒍᑎᓂᑦ ᑲᔪᓯᔪᒥᓗ ᐃᓱᒪᒃᑯᑦ ᖃᓄᐃᖕᖏᓯᐊᕆᐊᖃᕐᓂᒧᑦ ᓴᐳᑦᔭᐅᓂᖏᓐᓂᑦ ᓄᓇᕕᒻᒥ ᓯᕗᓪᓕᐅᔭᐅᒋᐊᖃᕐᖁᖅ ᐃᑲᔪᕐᓯᓗᑕ ᓄᓇᓕᑦᑎᓂᑦ ᑲᒪᒋᐊᕐᑎᓗᒋ5 ᑕᒪᑦᓱᒥᖓ ᐅᖁᒣᑦᑐᑰᕈᑎᒥᒃ ᒪᒥᓴᕐᓂᒥᓗ ᑲᔪᓯᑎᑦᓯᓗᑕ.
ᐳᓖᓯᓕᕆᓂᕐᒥᓕ, ᒪᑭᕝᕕᑯᑦ ᑐᑭᑖᕐᖁᑦ ᖃᓄᐃᓗᕈᑎᖃᓂᐊᕐᓂᒥᓂᒃ ᐃᑉᐱᒋᔭᐅᓕᐅᒥᓗᑎᑦ ᓵᑕᐅᒍᓐᓇᓂᕐᓴᐅᓗᑎᑦ ᐳᓖᓯᓕᕆᓂᖅ ᓄᓇᕕᓕᒫᒥ. ᒪᑭᕝᕕᑯᑦ ᐃᓚᐅᓂᕐᓴᐅᓚᖓᕗᑦ ᑐᕃᓐᓇᑐᒥᒃ ᐊᒻᒪᓗ ᐃᓚᐅᓂᕐᓴᐅᒐᓱᓪᓗᑎᑦ ᐃᑉᐱᒋᔭᐅᓂᖏᓐᓂᑦ ᐳᓖᓰᑦ ᐃᓂᕐᕋᑎᑕᐅᓂᖏᑦ ᒪᓕᑦᓯᐊᓗᑎᑦ ᑭᖕᖑᒪᒋᔭᐅᔪᓂᑦ ᓄᓇᓕᑦᑎᓄᑦ. ᐅᑉᐱᕆᔭᖃᕐᒥᕗᒍᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᖃᓄᐃᓗᕈᑎᖃᕐᓂᓴᐅᒋᐊᖃᕐᓂᖏᓐᓂᑦ ᖃᓄᐃᓗᕐᓗᑎᑦ ᐳᓖᓯᑦ ᐃᓂᕐᕋᑎᑕᐅᒋᐊᖃᕐᓂᖏᓐᓂᑦ. ᒫᓐᓇᐅᑎᓪᓗᒍ, ᐃᓱᓕᑉᐸᑕ ᓄᓇᓕᐊᕈᕐᓂᑦ ᓄᓇᓕᓕᒫᓂᓗ ᑲᑎᖕᖓᔨᓂᑦ ᓂᕈᐊᕆᕐᐸᑕ, ᒪᑭᕝᕕᑯᑦ ᐊᐱᕆᓱᖕᖑᕗᑦ ᓄᓇᓕᓕᒫᓂᑦ ᑲᑎᖕᖓᔨᖏᓐᓂᑦ ᓯᕗᓪᓕᐅᔭᐅᖁᔨᓗᑎᑦ ᕿᒥᕐᕈᓗᑎᓗ ᐳᓖᓯᑦ ᖃᓄᐃᓗᕈᓯᒋᒋᐊᓕᖏᓐᓂᑦ.
ᒪᑭᕝᕕᑯᑦ ᐃᑉᐱᒋᔭᖃᑦᓯᐊᓚᖓᕗᑦ ᐱᕙᓪᓕᐊᓂᖏᓐᓂᑦ ᖃᐅᔨᓴᕐᓂᐅᑉ, ᓈᒻᒪᓈᑦᓯᐊᑐᒥᒃ ᓱᓕᑦᓯᐊᑐᒥᓗ ᑲᔪᓯᑎᑦᓯᓗᑎᑦ, ᖃᐅᔨᒍᑏᑦ ᓄᐃᑕᐅᑉᐸᑕ ᖃᓄᐃᓗᕈᑎᐅᒋᐊᓕᓐᓂᑦ ᖃᓄᐃᓗᕈᑎᖃᕐᓂᐊᓱᑎᑦ.
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᑳᕐᓴᓐ ᑕᒍᓐᓇ
ᑐᑭᒧᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ
ᒪᑭᕝᕕᒃ
ctagoona@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔪᖅ ᑎᓕᔭᐅᒪᔪᖅ ᐊᐅᓚᑦᓯᓂᐊᕐᓱᓂ ᑮᓇᐅᔭᕐᑖᕕᓂᖏᓐᓂᑦ ᐃᓄᐃᑦ ᓄᓇᕕᒻᒥ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᑯᑦ ᐱᓇᓱᐊᕆᐊᓕᖏᓐᓂᑦ ᐃᓚᖓ ᐃᑲᔪᕐᓯᓗᑎᑦ ᓄᐃᑦᓯᓗᑎᑦ ᐃᓄᓐᓄᑦ ᐊᐅᓚᑕᐅᔪᓂᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᒃ ᑐᑭᓯᒪᔭᐅᑎᑦᓯᔪᖅ ᓴᐳᒻᒥᓱᓂᓗ ᐃᓄᐃᑦ ᐃᓗᕐᖁᓯᖓᓂᒃ ᐅᖃᐅᓯᖓᓂᓗ ᐃᓗᓯᕐᓱᓯᐊᕆᐊᖃᕐᓂᖏᓐᓂᑦ, ᖃᓄᐃᖕᖏᓯᐊᕐᓂᖏᓐᓂᑦ, ᐊᔪᕐᓴᓂᒦᑦᑎᓯᑦᑌᓕᓂᕐᒥᒃ, ᐃᓕᓐᓂᐊᕆᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂᑦ.