ᑐᓴᕐᑎᓯᒍᑎᒃ
ᑰᑦᔪᐊᖅ, ᓄᓇᕕᒃ – ᕕᕈᐊᕆ 7, 2025 – ᒪᑭᕝᕕᑯᑦ ᐊᓕᐊᓱᒃᑯᑦ ᑐᓴᕐᑎᓯᒋᐊᒥᒃ ᓂᕈᐊᕈᑎᕕᓂᕐᓂᑦ 2025ᒥ ᐃᓄᓕᒫᓂᑦ ᓂᕈᐊᕐᓂᖃᕐᑎᓯᑎᓪᓗᒋᑦ, ᓂᕈᐊᕐᑕᐅᒋᐊᓪᓚᓱᑎᒃ ᐊᖓᔪᕐᖄᑉ ᑐᖓᓕᖓ ᑮᓇᐅᔭᑎᒍᑦ ᒪᑭᑉᐊᓕᐊᒐᓱᓐᓂᒧᑦ ᐊᓪᓚᕕᖓᓂ ᐋᓐᑎ ᒧᐊᖃᐅᔅ ᐊᒻᒪᓗ ᐊᓪᓚᑎᒃ ᐊᓕᓯᐊ ᐊᔭᒍᑕᒃ.
ᐊᖓᔪᕐᖄᑉ ᑐᖓᓕᖓᓄᑦ, ᑮᓇᐅᔭᑎᒍᑦ ᒪᑭᑉᐸᓕᐊᒐᓱᓐᓂᓕᕆᕕᒻᒥ, ᐊᓐᑎ ᒧᐊᖃᐅᔅ ᓂᕈᐊᕐᑕᐅᒋᐊᓪᓚᓂᕐᖁᖅ 1,340-ᓄᑦ ᓂᕈᐊᕐᑕᐅᓱᓂ (68.05%), ᐊᒻᒪᓗ ᐃᔨᑦᓯᐊᒃ ᐸᐱᑲᑦᑐᒃ 593-ᓄᑦ ᓂᕈᐊᕐᑕᕕᓂᖅ (30.12%). ᑲᑎᑦᓱᑎᑦ 36 (1.83%) ᓂᕈᐊᕈᑏᑦ ᓱᒃᑯᑐᕕᓃᑦ.
ᐃᓂᖓᓄᑦ ᐊᓪᓚᑎᐅᑉ, ᐊᓕᓯᐊ ᐊᔭᒍᑕᒃ ᓂᕈᐊᕐᑕᐅᒋᐊᓪᓚᓂᕐᖁᖅ 1,212-ᓄᑦ ᓂᕈᐊᕐᑕᐅᓱᓂ (61.55%), ᐊᒻᒪᓗ ᔭᓇᑕᓐ ᐃᐳ 717ᓂᑦ ᓂᕈᐊᕐᑕᕕᓂᖅ (36.41%). ᑲᑎᑦᓱᑎᑦ 40 (2.03%) ᓂᕈᐊᕈᑏᑦ ᓱᒃᑯᓂᕐᖁᑦ.
ᑕᒡᒐᓂ ᐊᕐᕌᒍᕐᒥ, 1,969 ᐃᓄᐃᑦ ᐅᓄᕐᓂᖃᕐᑎᓗᒋᑦ 10,141 ᓂᕈᐊᕈᓐᓇᑐᓂᑦ ᓂᕈᐊᕐᓂᖁᑦ, ᐅᓄᕐᓂᖏᑦ 19.42% ᓂᕈᐊᕆᐊᕐᑐᓂᕐᖁᑦ. ᑖᒃᑯᓇᓂ ᓂᕈᐊᕐᑐᕕᓂᕐᓂᑦ, 31.08% ᖃᕆᑕᐅᔭᑎᒍᑦ ᓂᕈᐊᕐᓂᖁᑦ.
ᒪᑭᕝᕕᑯᑦ ᓇᑯᒦᖁᑦ ᐃᔨᑦᓯᐊᒃ ᐸᐱᑲᑦᑐᒥᒃ ᔮᓇᑕ ᐃᐳᒥᓗ ᐃᓚᐅᓂᕕᓂᒋᓐᓄᒃ ᑖᑦᓱᒧᖓ ᓂᕈᐊᕐᓂᒧᑦ. ᓯᕗᒧᐊᒍᒪᓂᒋᒃ ᓯᕗᓕᖃᑎᐅᒍᒪᓂᖏᓪᓗ ᐱᒻᒪᕆᐅᕗᑦ ᓲᖑᓯᐅᒥᑎᑦᓯᕘᒃ ᓄᓇᖁᑎᑦᑎᓂᑦ.
ᐃᓱᒪᒋᑦᓱᒍ ᓂᕈᐊᕐᑕᐅᒋᐊᓪᓚᓂᕋ, ᐋᓐᑎ ᒧᐊᖃᐅᔅ ᐅᖃᕐᓂᖁᖅ: “ᐅᐱᒍᓱᒃᑯᖓ ᑲᔪᓯᓂᐊᕆᐊᒥᒃ ᐱᓇᓱᐊᕐᓂᕋᓂᒃ ᐊᖓᔪᕐᖄᑉ ᑐᖓᓕᖓᑕ ᐱᓇᓱᐊᕋᑦᓴᖏᓐᓂᑦ ᑮᓇᐅᔭᑎᒍᑦ ᒪᑭᑉᐊᓕᐊᒐᓱᓐᓂᓕᕆᕕᒻᒥ. ᓂᕈᐊᕐᑕᐅᒍᒪᐅᑎᒃᑲᓂ ᐱᓇᓱᐊᓕᓂᒃᑲᓂᑦ ᐅᖄᖃᑦᑕᓚᐅᕐᖁᖓ, ᐅᒃᑯᐃᖓᑦᓯᐊᓂᕐᒥᒃ, ᓯᕗᓕᕐᓂᒥᒃ ᐊᑦᔨᒋᑦᑎᓯᑦᓯᐊᓱᓂ ᓲᖑᓂᕐᓴᒥᒃ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᓐᓂᒥᒃ ᑐᖕᖓᕕᖃᕐᓗᓂ ᓄᓇᕕᒻᒥᐅᑉ ᓯᕗᓂᖓᓂ. ᓯᕗᓪᓕᐅᔨᔭᕗᑦ ᐃᑲᔪᕐᓯᓂᖅ ᑖᕗᖓᐅᓕᒍᓐᓇᑐᓂᑦ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᒍᑎᓂᑦ ᐱᕕᑦᓴᖃᕐᓗᑎᑦ ᓄᓇᕕᒻᒥ ᐃᓄᖏᑦ, ᓄᓇᓕᒻᒥ ᐱᕙᓪᓕᐊᑎᑦᓯᓂᕐᑎᒍᑦ, ᓄᓇᓕᕗᑦ ᐱᕈᕐᐸᓕᐊᒍᓐᓇᑎᓗᒍ ᐊᒻᒪᓗ ᐱᒍᓐᓇᓯᐊᕐᓗᓂ. ᐃᑲᔪᕐᓯᖏᓐᓇᓚᖓᕗᒍᑦ ᐃᓅᓱᑦᑐᓂᑦ ᓯᕗᓕᕐᓂᒧᑦ ᐱᕙᓪᓕᐊᒍᑎᑦᓴᖏᓐᓂᑦ ᐃᑲᔪᕐᓯᒍᑎᑦᓴᓂᑦ ᐱᓇᓱᒐᕐᒥᓗ ᑖᕗᖓᐅᓕᒋᐊᓪᓚᓂᕐᓂᑦ ᐃᓕᓐᓂᐊᕆᐊᓪᓛᑎᑦᓯᓂᕐᓂᑦ ᓲᖑᓯᐅᒥᓂᐊᕐᒪᑕ ᐃᓚᒌᑦ ᐊᓂᒎᑎᒍᓐᓇᓯᐊᕐᓗᑎᑦ ᓯᕗᓂᑦᑎᓂ.”
ᐊᓕᓯᐊ ᐊᔭᒍᑕᒃ ᓇᑯᕐᒦᒥᔪᖅ: “ᐊᕐᕉᒍᐃᑦ ᐱᖓᓲᓚᐅᕐᑐᐃᑦ, ᐊᒥᓱᓂᑦ ᐱᓇᓱᐊᕐᓯᒪᓕᕐᖁᒍᑦ ᖃᓪᓗᓈᓄᑦ ᐊᐅᓚᑕᐅᒍᓐᓀᑎᑦᓯᒐᓱᓐᓂᒧᑦ ᒪᑭᕝᕕᑯᑦ ᐱᒍᑦᔨᒍᑎᖏᓐᓂᑦ ᓄᓇᓕᓐᓄᑦ, ᐱᕙᓪᓕᐊᑎᑦᓯᓂᕐᒧᑦ ᐃᓚᐅᔪᓕᕆᒍᓯᕐᒥᒃ, ᑲᓱᕐᑎᓱᒋᑦ ᑐᓵᔩᑦ ᐃᓄᒃᑎᑑᓕᕐᑎᕆᔩᑦ ᓯᕗᓪᓕᐹᖓᓂ ᐅᖃᐅᓰᑦ ᑲᑎᖕᖓᓂᕐᔪᐊᖃᕐᑎᓱᒋᑦ, ᐃᓂᓪᓚᑎᕆᒋᐊᓪᓚᓱᑕ ᑯᐊᐳᕆᓴᐅᑉ ᐊᓪᓚᑎᖓᑕ ᐊᓪᓚᕕᖓᓂᒃ. ᐱᓇᓱᐊᕐᐸᓕᐊᓯᒪᓕᕐᒥᔪᒍᑦ ᑐᖕᖓᕕᐅᓂᐊᕐᓂᑦ ᓄᑖᒥᒃ ᐊᓪᓚᕕᒻᒪᕆᑦᓴᒥᒃ ᑕᓯᐅᔭᕐᔪᐊᒥᓗ ᐊᓪᓚᕕᐅᓛᕐᑐᓂᑦ ᑐᑭᖃᑦᓯᐊᑐᓂᓗ ᐅᖄᖃᑎᒌᓐᓂᖃᕐᓱᑕ ᐱᒍᓐᓇᓯᑎᑦᓯᓂᕐᒧᑦ ᐃᓄᓐᓂᑦ ᐱᓇᓱᑦᑎᓂᑦ. ᐅᐱᒍᓱᑦᓱᖓ ᑲᔪᓯᓚᖓᕗᖓ ᑕᒪᑦᓱᒥᖓ ᐱᓇᓱᐊᕐᑕᕋᓂᒃ, ᓇᑯᕐᒦᒪᕆᕐᖁᖓ ᐱᕕᑦᓴᖃᕐᑎᑕᐅᒋᐊᓪᓚᓂᕋᓕᒃ ᑲᔪᓯᑎᑦᓯᓂᕐᒥᒃ ᐱᓇᓱᑦᑕᐅᔪᒥᒃ. ᐅᑉᐱᕆᔭᐅᓂᕋ ᐱᒻᒪᕆᖁᑎᒋᕙᕋ, ᑐᓂᒪᑦᓯᐊᖏᓐᓇᓱᖓ ᒪᑭᕝᕕᑯᑦ ᑲᔪᓯᔪᒥᒃ ᐱᒍᑦᔨᑎᓗᒋᑦ ᓄᓇᕕᒻᒥ ᐃᓄᖁᑎᖏᓐᓄᑦ ᐱᐅᓂᕐᓴᓂᑦ.”
ᓂᕈᐊᕐᕖᑦ ᐅᒃᑯᐊᓂᕐᖁᑦ 6:00 ᖑᒥ ᐅᓐᓄᓴᒃᑯᑦ ᓯᑕᒪᖓᓐᓂᒥ, ᕕᕈᐊᕆ 6, 2025. ᒪᑭᕝᕕᑯᑦ ᓇᑯᕐᒦᖁᑦ ᐃᓘᓐᓇᖏᓐᓂᑦ ᓂᕈᐊᕆᐊᕐᑐᑐᕕᓂᕐᓂᑦ ᐊᒻᒪᓗ ᐃᓚᐅᓂᕕᓂᖏᓐᓄᑦ ᐊᒻᒪᓗ ᓯᕗᓂᕐᒥ ᐊᒥᓱᐃᑦ ᐃᓄᐃᑦ ᑐᑭᑖᖁᔭᕗᑦ ᓂᕈᐊᕆᐊᕐᑐᓗᑎᑦ ᓯᕗᓂᑦᑎᓂᑦ ᓂᕈᐊᕐᓂᐅᒍᒫᕐᑐᓂᑦ.
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᑲᕐᓴᓐ ᑕᒍᓐᓇ
ᑐᑭᓯᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ
ᒪᑭᕝᕕᒃ
ctagoona@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᒧᓕᖓᔪᓂᑦ ᑎᒥᐅᔪᖅ ᑎᓕᔭᐅᒪᔪᖅ ᐊᐅᓚᑦᓯᓂᐊᕐᓱᓂ ᓄᓇᖁᑎᖓᓄᓕᖓᔪᓂᑦ ᑮᓇᐅᔭᕐᓂᑦ ᐃᓄᐃᑦ ᓄᓇᕕᒻᒥᐅ ᐱᒍᑦᔭᐅᔪᐃᑦ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᑯᑦ ᐱᓇᓱᐊᕋᑦᓴᖏᓐᓂᑦ ᐃᓚᖃᕐᖁᑦ ᐊᐅᓚᑦᓯᓂᕐᒥᒃ ᑮᓇᐅᔭᓕᐅᕆᐊᓪᓛᕋᓱᓐᓂᒥᓗ ᑖᒃᑯᓂᖓ ᑮᓇᐅᔭᕐᓂᑦ ᐊᒻᒪᓗ ᐱᕙᓪᓕᐊᑎᑦᓯᓂᖅ ᑮᓇᐅᔭᖁᑎᓂᑦ ᐅᓄᕐᓯᐅᒥᑎᑦᓯᓂᕐᒧᑦ ᐃᑲᔪᕐᓯᓂᒃᑯᑦ ᐃᓄᓐᓄᑦ ᐊᐅᓚᑕᐅᔪᓂᑦ ᑮᓇᐅᔭᑎᒍᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᑯᑦ ᐊᓯᐅᑐᐃᓐᓇᑎᑦᓯᑌᓕᖃᐅᑎᐅᕗᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐃᓗᓯᖏᓐᓄᓕᖓᔪᓂᓗ, ᖃᓄᐃᖕᖏᓯᐊᕐᓂᖏᓐᓂᑦ, ᐊᔪᕐᓴᓂᕐᓂᑦ ᓄᖑᑎᕆᒐᓱᓐᓂᓄᑦ, ᐃᓕᓐᓂᐊᓂᕐᒥᓗ ᐃᓄᐃᑦ ᓄᓇᓕᖏᓐᓂᑦ.