ᓇᐅᓕᒫᓂᑦ ᑐᓴᕐᑎᓯᒍᑎᒃ
ᐆᒃᑑᐱᕆ 29, 2020 – ᑰᑦᔪᐊᖅ, ᓄᓇᕕᒃ –ᐱᒻᒪᕇᑦ ᐊᓯᑦᔨᑐᐃᓃᑦ ᒪᑭᕝᕕᐅᑉ ᐳᕐᑐᓂᕐᓴᖏᑦᑕ ᑲᑎᖕᖓᔨᖏᓐᓂᑦ ᓂᕈᐊᕐᓂᐅᓲᓂᑦ ᐊᑑᑎᓯᒪᓕᕐᑐᑦ. ᖃᒻᒥᐅᓚᐅᕐᑐᒥᑦ ᒪᑭᕝᕕᐅᑉ ᑲᑎᖕᖓᔨᖏᑦ ᑲᑎᒪᓂᖃᕐᓱᑎᒃ ᐆᒃᑑᐱᕆ 20-23, 2020-ᒥᑦ ᐊᓯᑦᔨᑐᐃᓂᖃᓚᐅᕐᑐᑦ ᒪᑭᕝᕕᐅᑉ ᐱᖁᔮᐱᖏᓐᓂᑦ ᐊᖏᕈᑕᐅᑦᓱᑎᓗ ᐊᓯᑦᔨᒋᐊᕐᑕᐅᓂᖏᑦ.
ᐳᕐᑐᓂᕐᓴᓄᑦ ᓂᕈᐊᕋᑦᓴᐅᒍᒪᔪᓄᑦ ᑎᒃᑯᐊᓯᓃᑦ ᐅᓪᓗᖓ, ᓇᐅᓕᒫᓂᓪᓗ ᖃᐅᔨᑎᑦᓯᒍᑎᒃ ᓂᕈᐊᕐᓂᖃᓛᕐᓂᖓᓄᑦ ᐅᓪᓗᖓ, ᓂᕈᐊᕐᓂᐅᓗ ᐅᓪᓗᖓ ᐊᓯᑦᔨᑕᐅᓯᒪᓕᕐᑐᑦ. ᐊᓯᑦᔨᑐᐃᓃᑦ ᐊᑑᑎᑎᑕᐅᓚᐅᕐᑐᑦ ᑲᔪᓯᑦᓯᐊᑐᒥᒃ ᓂᕈᐊᕋᑦᓭᑦ ᓂᕈᐊᕋᑦᓴᐅᒍᒪᓂᕐᒥᓂᒃ ᐊᑑᑎᑦᓯᐊᖃᑦᑕᖁᑦᓱᒋᑦ, ᐃᓚᒋᔭᐅᑎᓪᓗᒋᑦ ᓂᕈᐊᕐᑕᐅᒪᒌᕐᑐᑦ ᓂᕈᐊᕋᑦᓴᐅᑎᒋᐊᓪᓚᕋᓱᑦᑐᑦ.
ᐃᓚᖃᕐᒥᔪᖅ ᐊᓯᑦᔨᑐᐃᓂᕐᒧᑦ ᐳᕐᑐᓂᕐᓴᓄᑦ ᑲᑎᖕᖓᔨ ᓂᕈᐊᕋᑦᓴᐅᑎᒋᐊᓪᓚᑐᖅ ᓴᒃᑯᐃᓚᐅᕐᑐᓯᒪᖃᑦᑕᓂᐊᕐᑐᖅ ᓱᓇᓱᐊᕐᑎᐅᓂᕐᒥᓂᒃ, ᐱᔪᓐᓇᐅᑎᒥᓂᑦ ᓄᑭᒥᓂᓪᓗ, ᓇᓪᓕᐊᓄᑦ ᐳᕐᑐᓂᕐᓴᐅᓂᕐᒥᓄᑦ ᑌᔭᐅᓂᖓ ᑮᓇᐅᑦᔭᓵᖏᓪᓗ ᐃᓚᐅᑎᓐᓇᒋᑦ, ᐳᕐᑐᓂᕐᓴᐅᖃᑎᒥᓄᑦ ᑎᒍᒥᐊᕐᑕᐅᑫᓐᓇᖃᑦᑕᓂᐊᕐᑎᓗᒋᑦ ᓂᕈᐊᕋᑦᓴᐅᓂᐅᑉ ᐊᑑᑎᓂᓕᒫᖓᓂᑦ.
ᐊᓯᑦᔨᑐᐃᓂᖅ ᐱᑦᔪᑎᓕᒃ ᓂᕈᐊᕐᓃᑦ ᐊᑦᔨᒌᑦᓯᐊᒥᒃ ᐱᐅᓯᖃᕐᕕᐅᖃᑦᑕᓂᐊᕐᒪᑦ ᐃᓘᓐᓀᓄᑦ ᓂᕈᐊᕋᑦᓴᕈᕐᓯᒪᔪᓄᑦ, ᐊᒻᒪᓗ ᒪᓕᒉᑦ ᓂᕈᐊᕐᓂᒨᓕᖓᔪᑦ ᑐᑭᖃᑦᓯᐊᓗᑎᒃ ᑐᑭᓯᓇᕐᑎᑕᐅᓯᒪᑦᓯᐊᖃᑦᑕᓂᐊᕐᒪᑕ.
ᐊᓯᑦᔨᓃᑦ ᐊᑐᓕᕐᑎᑕᐅᑦᓴᐅᑎᒋᓚᐅᕐᑐᖅ. ᑌᒣᒻᒪᑦ ᑎᒃᑯᐊᓯᓂᖅ ᒪᑭᕝᕕᐅᑉ ᐊᖓᔪᕐᖄᖓᑕ ᐃᓂᖓᓄᑦ ᐃᓱᓕᕝᕕᖃᓛᕐᑐᖅ ᔭᓄᐊᕆ 7, 2021-ᒥᑦ (ᑏᓯᒻᐱᕆ 1, 2020-ᖑᓚᖓᒐᔭᕐᑐᕕᓂᖅ). ᓂᕈᐊᕐᓂᐅᑉ ᐅᓪᓗᖓ ᓄᑖᖅ ᐊᖓᔪᕐᖄᑉ ᐃᓂᖓᓄᑦ ᐊᑑᑎᓛᕐᑐᖅ ᕕᕗᐊᕆ 4, 2021-ᒥᑦ (ᔭᓄᐊᕆ 21, 2021-ᖑᓚᖓᒐᔭᕐᑐᕕᓂᖅ).
-30-
ᖃᐅᔨᒋᐊᕐᕕᐅᒍᓐᓇᑐᖅ
ᑳᓴᓐ ᑕᒍᕐᓈᖅ
ᑐᓴᐅᒪᖃᑎᒌᑦᑎᓯᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
ᒪᑭᕝᕕᒃ ᑎᒥᐅᔪᖅ ᓄᐃᑕᐅᓯᒪᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᑮᓇᐅᔭᕐᑖᕆᔭᐅᓯᒪᔪᓂᑦ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓄᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᒃ ᐊᐅᓚᑦᓯᓂᖃᕐᒥᔪᖅ ᕿᑐᕐᖏᐅᑎᑦᓯᓂᕐᒥᒃ ᑖᒃᑯᓂᖓ ᑮᓇᐅᔭᓂᑦ ᑫᓪᓚᑐᐃᓂᕐᒥᓗ ᒪᑭᑉᐸᓕᐊᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᐃᓄᑐᐃᓐᓇᓄᑦ ᓇᒻᒥᓂᖁᑎᒋᔭᐅᔪᐃᑦ ᖄᖏᕐᓂᑯᓕᐅᕐᑏᑦ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᒍᑎᓕᒃ ᐊᓯᐅᔨᔭᐅᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᒥᒃ, ᓂᕿᖃᑦᓯᐊᕆᐊᖃᕐᓂᒥᒃ ᐊᒻᒪᓗ ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᑦ ᐃᓄᑐᐃᓐᓀᑦ ᓄᓇᓕᓐᓂ.