ᑐᓴᕋᑦᓭᑦ
ᐅᑦᑑᐱᕆ 3, 2018 – ᑰᔾᔪᐊᖅ, ᑯᐯᒃ – ᑭᒡᒐᑐᕐᓱᒋᑦ ᓄᓇᕕᐅᑉ ᐃᓄᖏᑦ ᒪᑭᕝᕕᑯᑦ ᐊᖓᔪᕐᖄᒪᕆᖓᑦ ᓵᓕ ᒍᐊᑦ ᐅᐱᒋᔭᖃᓚᐳᕐᑐᖅ ᓂᕈᐊᕐᑕᐅᖃᒻᒥᐅᓚᐅᕐᑐᒥᒃ ᑯᐯᒃᑯᑦ ᐊᖓᔪᕐᖄᒪᕆᒋᓚᖓᓕᕐᑕᖓᓂᒃ François Legault-ᒥᒃ, ᑖᓐᓇ ᓯᕗᓕᕐᑎᒋᔭᐅᒻᒪᑦ Coalition Avenir Québec Party-ᑯᓄᑦ, ᑖᑦᓱᒥᖓᓗ ᑯᐯᒃ ᐅᖃᕐᕕᒪᕆᖓᓄᑦ ᐃᓚᐅᔫᖃᑕᐅᓂᐊᓕᕐᑐᒥᒃ ᐅᖓᕙᒥ, Denis Lamothe-ᒥᒃ CAQ-ᑯᓄᑦ ᐃᓚᐅᖃᑕᐅᔪᒥᒃ.
“ᑲᑎᓯᓚᐅᔪᕗᖓ ᑯᐯᒃᑯᑦ ᓂᕈᐊᕐᑕᐅᖃᒻᒥᖓᓂᒃ ᐊᖓᔪᕐᖄᒪᕆᐅᓂᕐᒧᑦ, François Legault-ᒥᒃ, ᓂᕈᐊᕐᓂᖃᓚᐅᕐᑎᓇᒍ ᐊᒻᒪᓗ ᑕᑯᑦᓴᐅᑎᑦᓯᓚᐅᔪᒻᒪᑦ ᑐᑭᓯᓂᕐᒥᓂᒃ ᓴᐳᒻᒥᓂᕐᒥᓂᓪᓗ ᐊᒥᓱᒻᒪᕆᓐᓄᑦ ᐱᑦᔪᑕᐅᔪᓄᑦ ᓄᐃᑎᓚᐅᕐᑕᑲᓄᑦ ᐊᒻᒪᓗ ᓴᐳᒻᒥᔭᐅᖁᔨᑦᓱᖓ ᓄᓇᕐᔪᐊᒥᐅᖑᖃᑎᒌᑦ ᑲᑐᑦᔨᖃᑎᒌᓐᓂᖓᑕ ᐅᖃᒻᒪᕆᑦᑕᖏᓐᓂᒃ ᓄᓇᖃᕐᖄᓯᒪᔪᐃᑦ ᐃᓄᖁᑎᖏᑦᑕ ᐱᔪᓐᓇᐅᑎᖏᓐᓄᑦ,” ᑌᒣᓕᓚᐅᕐᑐᖅ ᓵᓕ ᒍᐊᑦ. “ᑭᒡᒐᑐᕐᓗᖓ ᓄᓇᕕᐅᑉ ᐃᓄᖏᓐᓂᒃ ᓂᕆᐅᑉᐳᖓ ᑲᑎᓯᓂᐊᕆᐊᒥᒃ ᑖᑦᓱᒥᖓ Legault-ᒥᒃ ᓯᕗᒧᐊᑦᑎᓯᖃᑎᒋᓂᐊᕐᓗᒍ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓄᓇᕕᐅᑉ ᓄᓇᖓᓂ.”
ᐊᖓᔪᕐᖄᒪᕆᒃ ᒍᐊᑦ ᐅᐱᒋᔭᖃᕐᓂᕋᓚᐅᕐᒥᔪᖅ ᓂᕈᐊᕐᑕᐅᖃᒻᒥᐅᓚᐅᕐᒥᔪᒥᒃ ᐅᖓᕙᒥ ᑭᒡᒐᑐᕐᑎᐅᓂᐊᓕᕐᑐᒥᒃ Denis Lamothe-ᒥᒃ CAQ-ᑯᓄᑦ ᐃᓚᐅᔪᒥᒃ ᐊᒻᒪᓗ ᓂᕆᐅᑦᓱᑕ ᑖᑦᓱᒥᖓ ᑲᑎᓯᑦᓴᐅᑎᒋᓂᐊᕆᐊᒥᒃ.
“ᐅᖓᕙᐅᑉ ᓄᓇᖓ ᐊᖏᓂᕐᐸᐅᓱᓂ ᓂᕈᐊᕐᕕᐅᒍᓐᓇᑎᑕᐅᓲᖑᕗᖅ ᑯᐯᒃᒥ ᐊᒻᒪᓗ ᓯᕗᓪᓕᐹᑦᓯᐊᓗᑐᕐᒥ ᒪᕐᕉᓂᒃ ᐃᓄᓐᓂᒃ ᐊᕐᓈᓂᒃ ᓂᕈᐊᕐᑕᐅᑎᒐᓱᐊᕐᑐᖃᓚᐅᕐᒪᑦ, ᑌᒣᒻᒪᑦ ᑌᓯᒍᒪᕗᖓ ᐊᓖᓴ ᑕᕐᕿᐊᐱᒻᒥᒃ, ᑰᔾᔪᐊᕌᐱᒻᒥᐅᒥᒃ, ᓂᕈᐊᕐᑕᐅᑎᒐᓱᐊᓚᐅᕐᓂᖓᓄᑦ ᐱᒍᑦᔨᓱᓂ Quebec Solidaire Party-ᑯᓂᒃ ᐊᒻᒪᓗ ᑖᑦᓱᒥᖓ ᒨᓇ ᐱᓘᒥᒃ ᐃᖃᓗᒻᒥᐅᔭᕐᒥᒃ ᓄᓇᕘᕐᒥ ᑖᓐᓇ ᓂᕈᐊᕐᑕᐅᑎᒐᓱᐊᓚᐅᕐᒥᒪᑦ NDP-ᑯᓂᒃ ᐱᒍᑦᔨᓱᓂ ᑌᑲᓂ Chauveau ᓂᕈᐊᕐᑎᓯᕕᖓᓂ”, ᓚᓚᐅᕐᑐᖅ ᓵᓕ. “ᑕᒪᓐᓇ ᓯᕗᓪᓕᐸᓪᓗᑐᑦᓯᐊᒥ ᐱᒋᐊᕐᑎᑕᐅᑐᐃᓐᓇᓚᐅᖏᒪᑦ ᑭᓯᐊᓂᑦᑕᐅᖅ ᑲᔪᖏᕐᓴᕈᑎᐅᒻᒪᕆᓚᐅᕐᒪᑦ ᐊᓯᖏᓐᓂᒃ ᐃᓄᓐᓂᒃ ᓂᑯᕕᒍᑕᐅᓂᐊᓕᕐᒪᑦ ᑕᒪᒃᑯᐊ ᐱᒐᓱᐊᒻᒪᕆᒋᐊᓖᑦ ᐱᒐᓗᐊᕐᑎᓗᒋᑦ.”
-30-
ᐅᖄᓚᕕᑦᓴᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᓂᖃᕐᓱᓂ ᑲᒪᒋᔭᖃᕆᐊᖃᕐᓂᒥᒃ ᐊᑭᓕᕐᑕᐅᒍᑎᐅᓯᒪᔪᓂᒃ ᓄᓇᕕᐅᑉ ᐃᓄᖏᓐᓄᑦ ᓄᐃᑕᐅᒪᔪᓂᒃ ᐊᑖᒍᑦ ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᓂᖃᓲᖑᕗᑦ ᐊᐅᓚᑦᓯᓂᓕᕆᐅᑎᓂᒃ ᑮᓇᐅᔦᕈᑎᐅᔪᓂᓪᓗ ᑕᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᔨᐅᑦᓱᓂ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᑎᑦᓯᓂᕐᒥᒃ ᐃᑲᔪᕐᓯᓂᕐᒥᒍᑦ ᓄᐃᑕᐅᔪᖃᓕᑐᐊᕐᒪᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᒪᑯᓂᖓᓗ ᖃᓄᐃᖏᓯᐊᕐᓂᓕᕆᓂᕐᓂᒃ, ᐱᔪᓐᓇᕈᓐᓇᐅᑎᓂᒃ, ᐊᑦᓱᔫᓂᕐᒥᓗ ᐃᑯᓪᓚᐅᒥᑎᑦᓯᓂᕐᒥᒃ ᐃᓕᓐᓂᐊᓂᖏᓐᓂᓗ ᐃᓄᐃᑦ ᓄᓇᓕᓐᓃᑐᓂᒃ.