ᕕᕗᐊᕆ 13, 2020 – ᑰᔾᔪᐊᖅ, ᓄᓇᕕᒃ – ᒪᑭᕝᕕᑯᑦ ᐅᐱᒋᔭᖃᕐᐳᑦ ᐊᓖᓯᐊ ᐊᔭᒍᑕᕐᒥᒃ ᐱᑎᑕᐅᓚᖓᓕᕐᓂᖓᓄᑦ ᑖᑦᓱᒥᖓ 2020 Indspire Inuit Award-ᒥᒃ ᑖᓐᓇ ᐅᐱᒋᔭᐅᓂᖃᕐᓂᐊᑐᖅ ᑖᒃᑯᐊ 2020-ᒥ Indspire Awards-ᑯᑦ ᐅᐱᒍᓱᓐᓂᖃᓕᕐᐸᑕ ᒫᑦᔨ 6-ᒥ ᑖᕙᓂ National Arts Centre-ᒥ ᐊᑐᕚᒥ.
“ᐃᓗᓐᓇᑕ ᐅᐱᒍᓱᑦᑐᐃᓇᐅᕗᒍᑦ ᐊᓖᓯᐊᒥᒃ ᐃᓕᑕᕆᔭᐅᒍᑎᑖᓚᖓᓂᖓᓄᑦ,” ᑌᒣᓕᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᓵᓕ ᒍᐊᑦ. “ᑖᓐᓇ ᓯᕗᓕᕐᓯᓲᖑᕗᖅ ᐅᑦᑐᕋᐅᑎᓂᒃᑯᑦ. ᖃᐅᔨᒪᕗᒍᑦ ᖃᕐᔪᐃᑯᓄᑦ ᐊᖓᔪᕐᖄᖑᑦᓱᓂ ᐊᑑᑎᓯᒪᔭᖏᓐᓂᒃ, ᐊᒻᒪᓗ ᒫᓐᓇᑯᑦ ᐃᓱᐊᕐᓯᕕᒻᒥ, ᑖᓐᓇ ᑲᔪᖏᕐᓭᓕᕐᒪᑦ ᐅᕕᒃᑲᓂᒃ ᓄᓇᕕᓕᒫᒥ, ᐅᖓᑎᐅᒍᓪᓗ. ᑌᒣᒻᒪᑦ, ᐅᐱᒋᔭᖃᕐᐳᒍᑦ ᐊᓖᓯᐊᒥᒃ ᑕᒪᑦᓱᒧᖓ ᐃᓕᑕᕆᔭᐅᒍᑎᑖᓚᖓᓂᖓᓄᑦ.”
ᐊᔭᒍᑕᖅ ᐅᓪᓗᒥ ᐳᕐᑐᓂᕐᓴᓄᑦ ᑲᑎᒪᔨᐅᖃᑕᐅᓕᕐᑐᖅ ᑖᒃᑯᓄᖓ ᐃᓱᐊᕐᓯᕕᒃ ᒪᒥᓭᕕᖓᑕ ᑲᑎᒪᔨᖏᓐᓄᑦ, ᑰᔾᔪᐊᒥ, ᐱᕕᖃᕐᑎᓯᓂᕐᒥᒍᑦ ᐃᓗᕐᕈᓯᑎᒍᑦ ᐊᑦᑕᕆᔭᖃᕐᑐᒥᒃ ᒪᒥᓭᓂᕐᒥᒃ ᑲᒪᒋᔭᐅᑎᑦᓯᓱᓂ ᖁᐊᕐᓴᖓᑎᑕᐅᓯᒪᓂᐅᑉ ᓱᕐᕃᓯᒪᓂᕆᓲᖓᓂᒃ ᐅᐃᕆᒪᑎᑦᓯᓚᕿᒍᑕᐅᑦᓱᓂ. ᑖᓐᓇ 26-ᓂᒃ ᐅᑭᐅᓕᒃ ᐃᓕᑕᕆᔭᐅᓂᐊᕐᑐᖅ ᐅᒥᐅᔭᕐᒥᐅᔭᐅᕗᖅ, ᑭᓯᐊᓂ ᓯᓚᕐᔪᐊᑉ ᐊᓯᖏᓐᓄᑦ ᐊᐅᓚᖃᑦᑕᓯᒪᓕᕐᓱᓂ, ᐁᓯᒪᓕᕐᓱᓂ ᐅᑯᓄᖓ Peru, New Zealand, ᐊᒻᒪᓗ South Africa.
ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓂᒃ ᓄᐃᑦᓯᓯᒪᖃᑕᐅᑦᓱᓂ ᓯᕗᓪᓕᐸᐅᑦᓱᓂᓗ ᐊᖓᔪᕐᖄᕆᔭᐅᑦᓱᓂ, ᑖᓐᓇ ᐊᓖᓯᐊ ᐊᕐᕕᑕᕐᓯᒪᓕᕐᑐᖅ ᐃᓗᓐᓇᖏᓐᓄᑦ 14-ᓄᑦ ᓄᓇᕕᐅᑉ ᓄᓇᓕᖏᓐᓂᒃ ᐃᓄᐃᑦ ᐅᕕᒃᑲᖏᓐᓂᒃ ᑐᑭᓯᓂᐊᕐᕕᖃᕆᐊᕐᑐᓱᓂ, ᐃᑲᔪᕐᓯᒪᐅᑎᓕᐅᕐᓱᒋᑦ ᑕᒪᒃᑯᓂᖓ ᐅᕕᒃᑫᓗ ᐃᓄᒻᒪᕇᓪᓗ ᑲᑎᒪᐅᑎᖃᑎᑦᓴᖏᓐᓄᐊᖓᔪᓂᒃ. ᑖᓐᓇ ᐅᕕᒃᑲᓄᑦ ᐊᕐᖁᑎᒋᔭᐅᓯᒪᓕᕐᑐᖅ ᐊᑑᑎᔭᐅᔪᖃᕐᑎᓗᒍ ᐆᒥᖓ ᖃᓄᐃᑉᐱᑖᒥ?-ᒥᒃ, ᕿᒥᕐᕈᔭᐅᔪᖃᕐᑎᓗᒍ ᓄᓇᕕᐅᑉ ᐃᓄᖁᑎᖏᑦᑕ ᖃᓄᐃᖏᓯᐊᕐᓂᖏᓐᓂᒃ ᐊᒻᒪᓗ ᐃᓚᐅᖃᑕᐅᒻᒥᓱᓂ ᐅᑭᐅᕐᑕᑐᒥᐅᑦ ᑐᕌᒐᓕᕆᓂᕐᒧᑦ ᑐᖕᖓᕕᑦᓴᓕᐅᕐᓂᒧᑦ ᓵᖃᕐᑎᑕᐅᓂᖓᓄᑦ, ᐃᑲᔪᕐᓱᓂ ᐱᕙᓪᓕᐊᑎᑕᐅᔪᖃᕐᑎᓗᒍ ᐊᑯᓂᕐᑐᑎᒍ5 ᑕᑯᓐᓈᑕᐅᓂᖃᕐᑐᒥᒃ ᑲᓇᑕᐅᑉ ᐊᒻᒪᓗ ᓯᓚᕐᔪᐊᑉ ᑲᑦᔨᖓᓂᒥᐅᑦ ᐅᑭᐅᕐᑕᑐᖓᑕ ᐊᕐᕿᓱᕐᓯᒪᓂᑦᓴᖓᓄᑦ.
ᑖᒃᑯᐊ Indspire Awards ᐅᐱᒍᓲᑎᒋᔭᐅᓲᖑᕗᑦ ᐳᕐᑐᓂᕐᐸᐅᓂᖃᕐᑐᒥᒃ ᑕᒪᒃᑯᓂᖓ ᓄᓇᖃᕐᖄᓯᒪᔪᑦᓴᔦᑦ ᓄᓇᓕᖏᓐᓂᒃ. 26 ᐊᕐᕌᒍᐃᑦ ᑭᖑᓂᐊᒍᑦ, ᑖᒃᑯᐊ Indspire Awards-ᑯᑦ ᐅᐱᒋᔭᖃᕐᓯᒪᓕᕐᑐᖅ 362-ᓂᒃ ᐊᓪᓚᓂᒃ, ᐃᓄᓐᓂᓗ ᐊᒻᒪᓗ ᐊᓪᓚᖓᔪᓂᒃ ᑕᑯᑦᓴᐅᑎᑦᓯᓯᒪᔪᓂᒃ ᐱᔪᓐᓇᓂᓪᓚᕆᒻᒥᓂᒃ. ᑕᒪᓐᓇ ᐅᐱᒋᔭᖃᕐᓂᐅᓂᐊᕐᑐᖅ ᑲᓇᑕᓕᒫᒥ ᑕᑯᑦᓴᐅᑎᑕᐅᓂᐊᕐᑐᖅ ᐅᐱᒋᔭᖃᕐᓗᓂ ᐃᓗᕐᕈᓯᒋᔭᐅᔪᕐᒥᒃ ᑕᒪᑦᓱᒧᖓ ᐊᑦᔨᒋᖏᑑᑦᓱᑎᒃ ᓄᓇᖃᕐᖄᓯᒪᔪᑦᓴᔭᐅᑦᓱᑎᒃ ᐃᓄᖁᑕᐅᓂᖏᓐᓄᑦ ᑲᓇᑕᒥ ᐃᓚᖃᕐᓂᐊᑎᓪᓗᒍ ᓂᑦᔭᓗᑦᑖᑎᑦᓯᓂᐅᓂᐊᕐᑐᓂᒃ ᑕᒪᒃᑯᓄᖓ ᑲᓇᑕᓕᒫᒥ ᖃᐅᔨᒪᔭᐅᓂᖃᕐᑐᓄᑦ ᓂᑦᔭᓗᑦᑖᑎᓚᑳᓄᑦ ᓄᓇᖃᕐᖄᓯᒪᔪᑦᓴᔦᑦ ᐊᕙᑎᖓᑎᒍᑦ.
-30-
ᐅᖄᓚᕕᐅᒍᓐᓇᑐᖅ:
ᑳᓴᓐ ᑕᒍᕐᓈᖅ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ 514-745-8880
ᖃᕆᑕᐅᔭᒃᑯᑦ: ctagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᑦ ᑎᓕᔭᐅᒪᓂᖃᕐᓱᓂ ᑲᒪᒋᔭᖃᕆᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᕿᒻᒪᑯᔭᐅᒪᒍᑎᖏᓐᓂᒃ ᑮᓇᐅᔭᓂᒃ ᐱᕕᖃᕐᑎᑕᐅᓯᒪᔪᓄᑦ ᑖᒃᑯᓄᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓄᑦ. ᒪᑭᕝᕕᑯᑦ ᐱᓇᓱᐊᕆᐊᓕᖏᑦ ᐃᓚᖃᕐᑐᑦ ᑖᒃᑯᓂᖓ ᑮᓇᐅᔭᓂᒃ ᐊᐅᓚᑦᓯᔨᐅᒋᐊᖃᕐᓂᒥᒃ ᐅᑎᕐᑐᓴᓕᐅᕆᐊᖃᕐᓂᒥᓪᓗ ᐊᒻᒪᓗ ᑫᓪᓗᑐᕐᑕᐅᔪᖃᕐᑎᓗᒍ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᓄᐃᑕᐅᔪᖃᓕᕐᐸᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᔨᐅᓲᖑᑦᓱᑎᒃ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᓪᓗ ᐅᖃᐅᓯᖓᓂᓪᓗ ᐊᒻᒪᓗᑦᑕᐅᖅ ᐃᓄᐃᑦ ᓄᓇᓕᓐᓂ ᖃᓄᐃᖏᓯᐊᕐᓂᖏᓐᓄᑦ, ᑲᒪᒋᔭᐅᑦᓯᐊᕆᐊᖃᕐᓂᖏᓐᓄᓗ, ᐊᑦᓱᔫᓂᖏᑦᑕ ᐃᑯᓪᓚᐅᒥᑎᑕᐅᒋᐊᕐᓂᖏᓐᓄᓗ, ᐊᒻᒪᓗ ᐃᓕᓐᓂᐊᕆᐊᖃᕐᓂᖏᓐᓄᑦ.