ᑐᓴᕋᑦᓴᓂᐅᑎᑎᒍᑦ ᑐᓴᕐᑎᓯᒍᑏᑦ
ᐊᐅᒡᒍᓯ 10, 2020 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᐱᓇᓱᒐᖃᕐᕕᒃ, ᑐᓴᐅᒪᔭᐅᖁᔨᕗᖅ ᐱᒻᒪᕆᐅᒋᐊᖏᑦ ᑲᕙᒪᑐᖃᒃᑯᑦ ᐅᖃᐅᓯᕆᓚᐅᔪᔭᖏᑦ ᐊᐅᒡᒍᓯ 6, 2020-ᖑᑎᓪᓗᒍ. ᑖᒃᑯᐊ ᑕᕝᕓᓇ ᐊᑐᓯᓚᖓᑦᓱᑎᒃ ᑮᓇᐅᔭᖃᕐᑎᓯᒍᑎᐅᓚᖓᒋᐊᖏᑦ ᑐᓴᕐᑎᓯᒍᑎᐅᔪᑦ ᐱᑕᖃᕆᐊᖃᓪᓚᕆᑉᐳᑦ ᑐᑭᓯᓇᕐᑎᓯᒋᐊᓪᓚᐳᓪᓗ ᑕᕐᕋᒥ ᐊᐅᓚᒍᑎᖃᕐᓂᓂᒃ ᓄᓇᓕᓐᓂ ᐅᖓᓯᑦᑕᕇᓂ ᐱᐅᓯᐅᑦᓱᑎᒃ “ᐱᑕᖃᕆᐊᖃᓪᓚᕆᑦᑐᓂᒃ ᐱᑦᔪᔨᒍᑎᐅᓂᒃᑯᑦ” ᐱᒻᒪᕆᓪᓚᕆᐅᑦᓱᓂ.
“ᖃᓂᒪᓐᓇᔪᐊᖅ ᐃᕐᐸᓯᒪᓕᕐᑎᓗᒍ ᑲᑎᖕᖓᓯᖃᑦᑕᓚᐅᕐᐳᒍᑦ ᐊᒥᓱᓂ ᑲᕙᒪᑦᑎᓂᒃ ᑲᕙᒪᑐᖃᒃᑯᓂ ᐊᒻᒪᓗ ᑯᐯᒃ ᑲᕙᒪᖓᓂ ᑐᓴᕐᑎᑕᐅᖁᑦᓱᒍ ᑲᕙᒪᑐᖃᒃᑯᑦ ᐊᖓᔪᕐᖄᖓᓪᓗ, ᐊᒻᒪᓗ ᒫᒃ ᑳᕐᓅ, ᐊᐅᓚᒍᑎᓕᕆᓂᕐᓄᑦ ᑐᕐᖃᑕᕐᕕᒃ ᐱᒻᒪᕆᓪᓚᕆᐅᒋᐊᖓ – ᑕᕐᕋᒥ ᖃᖓᑦᑕᔫᑎᒍᑦ ᐊᐅᓚᒍᑎᖃᕐᓂᖅ “ᐱᑕᖃᕆᐊᖃᓪᓚᕆᑦᓱᓂ ᐱᑦᔪᔨᒍᑎᐅᓂᒃᑯᑦ”, ᐅᖃᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ. ᐅᖄᓚᐅᑎᒃᑯᑦ ᐅᖄᖃᑎᖃᓚᐅᕐᖁᖓ ᑖᓐ ᕚᓐᑖᓪᒥᒃ, ᑐᕐᖃᑕᕐᕕᒥᒃ ᐃᓕᖓᑦᓱᓂ ᑕᕐᕋᒥᐅᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐅᖄᓚᐅᑎᒃᑯᑦ ᐅᖄᖃᑎᖃᕐᒥᓱᖓ ᒫᒃ ᒥᐊᓗᒥᒃ, ᑐᕐᖃᑕᕐᕕᒥᒃ ᐃᓕᖓᑦᓱᓂ ᓄᓇᓕᑐᙯᑦ ᐊᐅᓚᑕᐅᓂᖏᓐᓄᑦ ᐅᖄᖃᑎᒋᓚᐅᕐᑕᕋᓕ ᐊᑕᐅᑦᓯᑯᖃᑎᖃᑦᔭᓇᓄᒃ ᐁᑉᐹᓂᒃ ᑐᕐᖃᑕᕐᕕᒥᒃ ᐅᖃᐅᑎᓚᐅᕐᖄᑲᓗ ᐃᓄᑐᐃᓐᓀᑦ ᕿᒻᒪᖁᓯᐊᕆᓯᒪᔭᖏᓐᓂᒃ ᑮᓇᐅᔭᓂᒃ ᐊᑐᓚᖓᖕᖏᒋᐊᑦᑕ ᐱᑕᖃᓪᓚᕆᒋᐊᓕᓐᓂᒃ ᐱᑦᔪᔨᒍᑎᓂᒃ ᐊᑭᓕᕐᑐᐃᒍᑎᒋᓗᒋᑦ ᐅᖃᐅᑎᑦᓱᒋᓪᓗ ᑲᕙᒪᐅᔫᒃ ᑕᒪᑐᒥᖓ ᐱᔭᑦᓴᖁᑎᖃᓪᓚᕆᒋᐊᖏᒃ. ᖁᕕᐊᒋᕚᒃᑲ ᓈᓚᑦᓯᐊᓚᐅᕐᒪᓃᒃ ᓄᐃᑦᓯᒍᑎᑖᓚᕿᑦᓱᑎᒃ ᑐᓴᕐᑕᐅᑎᑦᓯᒍᑎᓂᒃ ᑭᓇᓕᒫᒃᑯᓂᒃ ᐃᑲᔪᕐᓯᓂᖃᓚᖓᔪᓂᒃ.
ᑲᕙᒪᑐᖃᒃᑯᑦ ᑐᓴᕐᑕᐅᑎᑕᖏᑦ ᐃᓚᖃᓚᐅᕐᑐᑦ $75-ᒥᓕᐋᓐᖑᑦᓴᐅᑎᒋᔪᓂᒃ ᑮᓇᐅᔭᕐᑐᕈᑎᐅᖃᑦᑕᓂᐊᓕᕐᑐᓂᒃ ᑕᕐᕋᒥ ᖃᖓᑦᑕᔫᖃᕐᑎᓯᒍᑎᓄᑦ ᑖᒃᑯᐊᓗ ᐱᒋᐊᕐᕕᓕᐅᑎᕕᖃᕐᓗᑎᒃ ᔪᓓ 1, 2020-ᒥᒃ ᐊᑕᓚᖓᑦᓱᑎᒃ ᑕᕐᕿᓄᑦ ᐱᖓᓲᔪᕐᑐᓄᑦ. ᐅᐃᒍᑖᕐᑎᑕᐅᓛᕐᒥᓱᑎᒃ $174-ᒥᓕᐋᓐᓂᒃ ᑐᓴᕐᑎᓯᒍᑎᐅᓚᐅᕐᒥᔪᓂᒃ ᐊᑑᑎᔭᐅᓛᕐᑎᓗᒋᑦ ᑕᕐᕿᓂ 18-ᓂ ᑭᖕᖒᒪᒋᔭᐅᑐᐊᕈᑎᒃ. ᑖᒃᑯᐊ ᑐᓴᕐᑎᓯᒍᑎᐅᔪᑦ ᖃᐅᔨᒪᔭᐅᒍᒪᕗᑦ ᑲᕙᒪᑐᖃᒃᑯᑦ ᐱᓇᓱᖃᑎᖃᓚᖓᒋᐊᖏᑦ ᓄᓇᓕᕐᓚᐅᔪᓂᒃ ᐊᒻᒪᓗ ᓄᓇᑖᖑᓯᒪᔪᓂᒃ. ᑐᕌᒐᖃᕋᒥᒃ ᓱᕐᖁᐃᑐᒥᒃ ᐊᓐᓂᑭᑦᑑᒍᓐᓇᕕᓕᒫᖏᒍᑦ ᐱᑕᖃᓪᓚᕆᒋᐊᓕᓐᓂᒃ ᐅᓯᑲᑦᑕᐅᑎᐅᓂᐊᕐᓱᑎᒃ ᐃᖏᕐᕋᑎᑦᓯᒍᑎᐅᓗᑎᒃᓗ ᓄᓇᓕᓐᓄᑦ ᐅᖓᓯᑦᑕᕇᓄᕐᑐᓂᒃ, ᐅᖃᐅᓯᖃᓪᓚᕆᑦᓱᑎᒃ “ᑲᔪᓯᔪᒥᒃ ᐱᑕᖃᕐᑎᓯᑦᓯᐊᕈᑎᐅᓚᖓᒋᐊᖏᑦ ᓂᕿᑦᓴᓂᒃ, ᐋᓐᓂᐊᓯᐅᕐᑕᐅᒍᑎᓂᒃ ᐊᒻᒪᓗ ᐊᓯᖏᓐᓂᒃ ᓂᐅᕕᐊᑦᓴᓂᓪᓗ ᐱᑦᔪᔨᒍᑎᐅᔪᓂᓪᓗ ᓄᓇᓕᓐᓄᑦ ᐅᖓᓯᑦᑕᕇᓄᑦ.” ᓄᓇᓖᑦ ᓄᓇᕕᒻᒥ 15 ᐊᓪᓚᓯᒪᔭᐅᖃᑕᐅᕗᑦ 136-ᓄᑦ ᓄᓇᓕᓐᓄᑦ ᐅᖓᓯᑦᑕᕇᓄᑦ ᓄᓇᓕᖃᕐᕕᐅᓱᑎᒃ ᐱᖓᓱᓂ ᓄᓇᑖᖑᒪᔪᓂᒃ ᐊᒻᒪᓗ ᓯᑕᒪᐅᔪᖕᖏᒐᕐᑐᓂ ᓄᓇᓕᕐᓚᐅᔪᓂ.
“ᖃᐅᔨᒪᔭᐅᑦᓯᐊᑐᖅ ᒪᑭᕝᕕᒃ ᐱᓇᓱᒐᖃᕐᕕᒃ ᒪᕐᕈᐃᓂᒃ ᖃᖓᑦᑕᔫᓕᕆᔨᖃᕆᐊᖓ – ᐃᓄᐃᑦᑯᓂᓪᓗ ᐊᒻᒪᓗ ᑲᓀᑎᐋᓐ ᓄᐋᑦᑯᓐᒻᓂᒃ ᐱᓇᓱᖃᑎᖃᕐᓱᓂ ᐃᓄᕕᐊᓗᐃᑦ ᓄᓇᖁᑎᒥᓂᒃ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᒐᖃᕐᕕᒥᒃ. ᑖᒃᑯᐊ ᖃᖓᑦᑕᔫᓕᕆᕖᒃ 100%-ᓂᒃ ᐃᓄᑐᐃᓐᓇᓄᑦ-ᓇᒻᒥᓂᕆᔭᐅᔫᒃ.” ᐅᖃᕐᑐᖅ ᓵᓕ ᒍᐊᑭ. “ᖃᖓᑦᑕᔫᓂᒃ ᐃᖏᕐᕋᑎᑦᓯᓂᑦᑎᓂᒃ ᓄᕐᖃᑎᑦᓯᓚᐅᕐᓯᒪᖕᖏᓚᒍᑦ ᖃᓂᒪᓐᓇᔪᐊᖅ ᐃᕐᐸᓯᒪᒐᓗᐊᕐᑎᓗᒍ ᖃᐅᔨᒪᒐᑦᑕ, ᐃᓄᑐᐃᓐᓇᐅᓱᑕ, ᐱᑕᖃᓪᓚᕆᑦᑐᒥᒃ ᐱᑦᔪᔨᒍᑎᐅᒋᐊᖏᑦ. ᖃᐅᔨᒪᑦᓱᑕᓗ ᐱᑕᖃᓪᓚᕆᒋᐊᖃᕐᓱᓂ ᐱᑦᔪᔨᒍᑎᐅᒋᐊᖓ. ᑌᒪᓕ ᖃᖓᑦᑕᔫᓕᕆᓂᕗᑦ ᖄᖏᕐᓂᑯᓕᐅᕈᓐᓀᕋᓗᐊᕐᑎᓗᒍ ᖃᓂᒪᓐᓇᔪᐊᒧᑦ ᐱᔭᐅᑦᓱᓂ ᐊᑯᓂᕆᔪᒥᒃ ᐱᔭᖃᒃᒐᕋᓱᒋᐊᖃᓚᐅᔪᕗᒍᑦ ᓱᕐᖁᐃᑐᒥᒃ ᑲᕙᒪᐅᔫᓐᓄᑦ ᐃᓱᒪᒋᔭᐅᑎᒐᓱᑦᓱᒍ ᑕᕐᕋᒥ ᐃᓱᐊᖁᑎᐅᓂᒃᑯᑦ ᐱᑕᖃᓪᓚᕆᒋᐊᖃᕆᐊᖓ, ᐊᒻᒪᓗ ᓱᕐᖁᐃᑐᒥᒃ ᑲᔪᓯᖁᑦᓱᒋᑦ ᐃᖏᕐᕋᑎᑕᐅᒍᑎᖏᑦ – ᑌᒫᑦᓭᓇᖅ ᓯᕿᓂᕐᒥᐅᑦ ᓄᓇᒃᑯᑦ ᐊᕐᖁᑎᖏᓪᓗ ᐅᓯᑲᑦᑕᐅᑎᑎᒍᓪᓗ ᐃᓱᐊᖁᑎᖏᑦ ᑲᔪᓯᔪᒥᒃ ᐃᖏᕐᕋᒋᐊᖃᕐᒪᑕ – ᐃᑲᔪᕐᑕᐅᓗᑎᒃ ᑭᓇᓕᒫᒃᑯᓅᓕᖓᑦᓱᑎᒃ ᑮᓇᐅᔭᖃᕐᑎᓯᒍᑎᐅᔪᓄᑦ.”
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.