ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᔫᓂ 8, 2020 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᑐᓴᕐᑕᐅᑎᑦᓯᒍᑎᖃᐳᖅ ᖃᕆᑕᐅᔭᑎᒍᑦ ᑕᑯᓐᓇᐅᑎᒍᑎᒃᑯᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᕐᔪᐊᖃᕐᑎᓯᓛᕐᓂᒥᓂᒃ ᔪᓓ 14 – 16, 2020 ᐅᓪᓗᖏᓐᓂ. ᒪᑭᕝᕕᒃ ᓯᕗᓂᖃᓚᐅᕐᔪᔪᖅ ᑲᑎᒪᓂᕐᔪᐊᖃᕐᑎᓯᓂᖃᓛᕐᓱᓂ ᐅᑭᐅᖅ ᐊᑯᓕᕕᒻᒥ ᒫᑦᔨ 23 – 26, 2020 ᐅᓪᓗᖏᓐᓂ. ᑭᓯᐊᓂᓕ ᖃᓂᒪᓐᓇᖅ ᓄᕙᓐᓇᔪᐊᖅ ᐃᕐᐸᑐᐊᓘᒻᒪᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᑎᑦᓯᓂᑦᓴᖓᑦ ᑭᖑᕙᕆᐊᕐᑎᑕᐅᓚᐅᔪᕗᖅ.
“ᑐᑭᑖᓚᐅᔪᕗᒍᑦ ᑲᑎᖕᖓᓂᕐᒥᒃ ᐊᑑᑎᓛᓕᕐᓱᑕ ᖃᕆᑕᐅᔭᑎᒍᑦ,” ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ. “ᐱᓇᓱᒐᖃᕐᕕᐅᓱᑕ ᑌᒫᒃ ᑲᑎᖕᖓᓂᕐᒥᒃ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᒥᒃ ᑲᔪᓯᑎᑦᓯᔪᑐᖕᖏᑐᒍᑦ. ᖃᓂᒪᓐᓇᔪᐊᖅ ᐊᒥᓱᐊᓗᓐᓂᒃ ᐱᓇᓱᒐᖃᕐᕕᐅᓱᑎᒃ ᐊᖏᔪᖑᐊᓂᒃ ᑕᒫᓂ ᓄᓇᓕᕐᔪᐊᑎᓐᓂᒃ ᐊᓯᖏᓐᓂᓗ ᓄᓇᓕᕐᔪᐊᓂ ᑌᒫᒃ ᑲᑎᖕᖓᓂᖃᕈᑎᐅᖃᑦᑕᒪᑦ. ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᑦᑎᓂᒃ ᑌᒣᓘᕐᓗᑕ ᑲᔪᓯᑎᑦᓯᓂᖃᓛᕐᖁᒍᑦ, ᓱᕐᖁᐃᑐᒥᒃ ᓲᓱᒋᔭᖃᑦᓯᐊᓗᑕ ᑭᓇᓕᒫᒃᑯᑦ ᖃᓄᐃᖕᖏᓯᐊᕐᑐᓴᐅᓂᖏᓐᓄᑦ ᓄᓇᕕᒻᒥ ᒪᓕᑦᑕᐅᑎᑕᐅᔪᓂᒃ ᑌᒫᒃ ᐃᓄᐃᑦ ᐊᒥᓲᓗᑎᒃ ᑲᑎᖕᖓᑲᑕᓛᖕᖏᒪᑕ, ᐃᓄᑐᐃᓐᓀᓗ ᐊᓂᕐᕋᒥᓐᓂᑦ ᓅᒋᐊᑐᒍᓐᓀᓗᑎᒃ ᐊᒻᒪᓗ ᑲᔪᓯᑎᑦᓯᓂᖃᑦᓯᐊᓗᑕ ᐅᖓᓯᑦᑕᕆᒋᐊᖃᕐᓂᑎᓐᓂᒃ ᑕᒐᑕᒐ ᒪᓕᑦᑕᐅᔪᑦᓴᓕᐊᖑᒪᔪᓂᒃ ᒪᓕᑦᓯᐊᓗᑕ.”
ᒪᑭᕝᕕᐅᑉ ᐳᕐᑐᓂᕐᓴᖏᑦ ᑲᑎᖕᖓᓚᐅᔪᕗᑦ ᒣ 28-ᖑᑎᓪᓗᒍ ᐅᖃᖃᑎᒌᒍᑎᖃᕐᓱᑎᒃ ᖃᓄᐃᓘᕐᓗᑎᒃ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᕐᒥᒃ ᑲᔪᓯᑎᑦᓯᒐᔭᕐᒪᖔᕐᒥᒃ, ᑲᑎᖕᖓᓂᐅᓛᕐᑐᒥᓪᓗ ᑐᓴᕐᑕᐅᑎᑦᓯᒍᑏᑦ ᑭᒡᒐᑐᕐᑎᑐᓂᒃ ᐱᑎᑦᓯᒍᑎᐅᓚᐅᔪᑦᓱᑎᒃ. ᑐᑭᑖᓚᐅᔪᕗᓪᓗ ᑲᑎᖕᖓᓂᐅᑉ ᐅᓪᓗᖏᓐᓂ ᐃᑭᓕᒋᐊᕆᓂᕐᒥᒃ ᐅᓪᓘᓄᑦ ᒪᕐᕉᓄᑦ, ᑐᑭᒧᐊᒍᑎᒦᑦᑐᓂᓪᓗ ᓀᓪᓕᒋᐊᕆᑦᓱᑎᒃ. ᐊᓪᓚᖁᑎᑕᖑᒋᐊᓕᓕᒫᑦ ᖃᕆᑕᐅᔭᑎᒍᑦ ᐊᓪᓚᖃᑦᑕᐅᑎᒍᑎᑎᒍᑦ ᐊᐅᓪᓚᑎᑕᐅᓛᕐᑐᑦ. ᐊᒻᒪᑕᐅᖅ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᖃᕐᑎᓯᓂᖅ ᑐᓴᕐᓴᐅᓛᕆᕗᖅ ᓄᓇᕕᓕᒫᒥ ᐊᕐᖁᑎᒋᓗᒋᑦ ᑕᕐᕋᒥᐅᑦ ᓂᐱᖓᑕ ᓈᓚᐅᑎᒃᑰᕈᑎᖏᑦ, ᐱᐅᓯᕆᓱᖓᑦ ᒪᓕᑐᐃᓐᓇᓗᒍ.
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.