Winter

ᑲᑎᕕᒃ ᐊᕙᑎᓕᕆᓂᕐᒧᑦ ᐊᔪᖀᒋᐊᕐᑏᑦ ᑲᑎᒪᔩᑦ
Comité consultatif de l’environnement Kativik
Kativik Environmental Advisory Committee

2015 ᐊᕐᕌᒍᖓᓂᓂᑦ, ᐊᒥᓱᐃᓂᒃ ᑕᕆᐅᕐᒥᓗ-ᑐᕙᕐᒥᓗ ᑲᒪᓇᓱᑦᑕᖃᕐᓂᓂᒃ ᐱᓇᓱᒍᑎᓂᒃ ᐱᐅᒃᑯᑎᖏᓐᓂᓗ ᐅᑦᑐᕋᕐᑕᐅᔪᖃᖃᑦᑕᓯᒪᓕᕐᖁᖅ ᓴᓪᓗᓂᓗ, ᑲᖏᕐᓱᔪᐊᒥᓗ ᐊᒻᒪᓗ ᓴᓪᓗᐃᑦ ᐁᑉᐸᖏᓐᓂ ᑕᒪᓐᓇ ᐃᓚᒋᔭᐅᑎᓪᓗᒍ ᑐᕙᕐᒥᒃ ᑲᒪᓇᓱᑦᑕᖃᕐᓂᒥᒃ ᖃᐅᔨᓴᕐᓂᓂᒃ ᐱᓇᓱᒍᑎᓕᐊᖑᒪᔪᓄᑦ. ᑖᒃᑯᐊ ᐱᓇᓱᑦᑕᐅᒍᑎᖏᑦ ᐃᓚᐅᑎᑦᓯᓂᖃᕐᑐᖅ ᓄᓇᕐᖃᑎᒌᓂᒃ ᓴᓪᓗᓂᓗ ᑲᖏᕐᓱᔪᐊᒥᓗ ᐱᓇᓱᖃᑎᐅᒻᒥᑎᓪᓗᒍᒋ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᓯᓚᑎᓂᑦ ᐱᓯᒪᔪᑦ ᐱᔪᓐᓇᐅᑎᓖᑦ ᐱᓯᒪᑦᓱᑎᒃ ᒍᐃᒍᐃᑎᑐᑦ ᐊᑦᓯᕋᐅᑎᓕᓐᓂᒃ Institut National de Recherche Scientifique (INRS)./ᑯᐯᒃᒥ ᖃᐅᔨᓴᕐᓂᒥᒃ ᓱᑯᐃᔭᕐᓯᒪᔪᓂᒃ ᐱᓇᓱᒐᖃᕐᕕᒃ.

ᓯᓚᐅᑉ ᐊᓯᑦᔨᓯᓂᖓ ᓱᕐᕃᓯᒪᓕᕐᒪᑦ ᐊᐳᑎᒥᓪᓗ ᐊᒻᒪᓗ ᑕᕆᐅᓪᓗᒃ-ᑐᕙᐅᓪᓗ ᖃᓄᐃᑦᑐᓂᕆᓲᖏᓐᓂᒃ, ᖃᐅᔨᒪᓇᕈᓐᓀᑎᓯᒪᓕᕐᒪᒋᑦ ᓯᓚᐅᑉ ᐊᓯᑦᔨᓂᖓᑕ ᓇᖏᐊᕐᓇᑐᒨᕈᑎᐅᑐᐃᓐᓇᕿᐊᖃᓕᕐᓱᑎᒃᓗ ᐊᕐᖁᑎᒃᑯᑦ ᐃᖏᕐᕋᔪᓄᑦ. ᓄᓇᓕᑐᖃᐅᔪᑦ ᓄᓇᓕᒻᒥᓂ ᑐᖕᖓᕕᓕᓐᓂᒃ ᓯᓚᒥᒃ ᑲᒪᓇᓱᑦᑕᖃᕐᓂᒥᒃ ᐱᓇᓱᒍᑎᒋᕙᑦᑕᖏᑦ ᐱᑕᖃᕐᑎᓯᒍᑎᒋᕙᑉᐸᖏᑦ ᓴᐳᑦᔨᓯᒪᓂᕐᒥᒃ ᓄᐃᑕᐅᒋᐊᓕᓐᓂᒃ ᐊᒻᒪᓗ ᑲᔪᓯᑎᑕᐅᓂᑦᓴᖏᓐᓂᒃ ᓄᓇᓕᓐ-ᑐᖕᖓᕕᖃᕐᓗᑎᒃ ᐊᕐᖁᑎᒥᒃ ᑲᒪᓇᓱᓐᓂᒥᒃ ᐱᓇᓱᒍᑎᐅᔪᑦ ᐃᓕᖓᑎᓪᓗᒋᑦ ᐱᐅᓯᑐᖃᒃᑯᑦ ᐊᕐᖁᓯᓂᑐᖃᕐᓄᑦ ᐊᑐᕐᑕᐅᓱᑐᖃᐅᑦᓱᑎᒃ ᓴᓪᓗᒥᐅᓄᓪᓗ ᑲᖏᕐᓱᔪᐊᕐᒥᐅᓄᓪᓗ. ᑖᒃᑯᐊ ᐊᕐᖁᑏᑦ ᐃᓚᖃᕐᑐᑦ ᑕᒪᖏᓐᓂᒃ ᓄᓇᒃᑰᓱᑎᒃᓗ ᐊᐳᑎᖃᑦᓯᐊᓗᓂ ᐊᑐᕐᑕᐅᒋᐊᓕᒃᑯᑦ ᐊᕐᖁᑎᒋᔭᐅᒋᐊᖃᓱᖑᒻᒥᔪᖅ ᑕᕆᐅᕐᓗ-ᑐᕙᕐᓗ ᑐᕙᖅ ᓇᖏᐊᕐᓇᖏᑦᑐᓯᐊᖑᓗᓂ ᐃᑦᔪᓂᖓᓗ ᒪᓃᓐᓂᖓᓗ ᐱᓪᓚᕆᐅᑦᓱᑎᒃ ᐃᓚᒋᔭᐅᑎᓪᓗᒋᒃ.

ᐊᕐᖁᑎᓂᒃ ᑲᒪᓇᓱᑦᑕᖃᕐᓂᓂᒃ ᐱᓇᓱᒍᑏᑦ ᒪᕐᕈᐃᖑᕗᑦ: 1) ᐃᓄᖃᖕᖏᑐᒥ ᓯᓚᓐᓂᐊᕈᑎᖃᕐᓂᖅ ᑐᑭᓯᔭᐅᑦᓴᐅᑎᒋᒍᓐᓇᑐᓂᒃ ᐊᑑᑎᓕᕐᑎᓗᒋᑦ ᓄᓇᓕᓐᓄᑦ ᑕᑯᔭᐅᓗᑎᒃ ᐊᑦᔨᓕᐅᕈᑎᑎᒍᓪᓗ ᓯᓚᓐᓂᐊᕕᒃᑯᓗ, ᐊᒻᒪᓗ 2) ᐅᑎᕐᑕᕕᒋᓗᒋᑦ ᐊᕐᖁᑏᑦ ᑲᒪᓇᓱᑦᑕᖃᕐᓗᓂᓗᓐᓃᑦ ᐱᐅᓯᑐᖃᒃᑯᑦ ᐊᕐᖁᓯᓂᑐᖃᕐᓂᒃ ᐊᑐᕐᑕᐅᕙᑦᑐᑐᖃᕐᓂᒃ ᑭᖑᕙᕇᓄᑦ ᖃᐅᔨᒪᑦᓯᐊᑐᓄᑦ ᐃᓄᑐᐃᓐᓇᐅᓱᑎᒃ ᓄᓇᒥᒃ ᐊᑐᕐᑕᖃᕐᓂᒥᒃ ᐊᒻᒪᓗ ᐅᕕᒃᑲᓄᑦ ᐱᒋᐅᕐᓴᑎᑕᖏᓐᓄᑦ ᖃᐅᔨᒪᔭᐅᓂᑦᓴᓕᐅᕐᓗᒋᑦ.

ᐃᓚᒋᔭᐅᑎᓪᓗᒋᑦ ᐱᓇᓱᒍᑎᓕᐊᖑᒪᔪᑦ ᓯᕗᓪᓕᖏᓐᓄᑦ, ᑲᒪᓇᓱᒍᑎᐅᑦᓱᑎᒃ ᐊᑦᔨᓕᐅᕈᑏᑦ ᓯᓚᓐᓂᐊᕖᓪᓗ ᓇᑉᐸᑕᐅᒪᕗᑦ ᓄᓇᓂ ᓇᓗᓀᕐᑕᐅᒪᔪᓂ ᓄᓇᕐᖃᑎᒌᓄᑦ ᓯᓚᐅᑉ ᐊᓯᑦᔨᓂᖓᓄᑦ ᓇᖏᐊᕐᓇᓯᓯᒪᓕᕆᐊᖏᑦ ᖃᐅᔨᒪᔭᐅᑦᓱᑎᒃ. ᑖᒃᑯᐊ ᑲᒪᓇᓱᑦᑕᖃᕐᓂᐅᑉ ᐱᐅᒃᑯᑎᖏᑦ ᑕᑯᑎᑦᓯᖑᓐᓇᖃᑦᑕᓕᕐᖁᑦ ᐊᑑᑎᓂᖃᓪᓗᑐᓕᕐᑐᓂᒃ ᓯᓚᐅᑉ ᖃᓄᐃᓕᖓᓂᖏᓐᓂᒃ ᐃᑲᐅᕐᓂᑕᒫᑦ/ᑫᕙᓪᓚᒍᓯᑕᒫᑦ ᑕᑯᒋᐊᕐᑕᐅᒍᓐᓇᓱᑎᒃ ᖃᕆᑕᐅᔭᑎᒍᑦ ᐅᕙᓂ ᑕᑯᓇᓱᑦᑕᐅᕕᒻᒥᓂ website http://caiman.ete.inrs.ca/dashboard. ᑐᑭᓯᒪᒍᑎᑦᓭᑦ ᐱᔭᐅᒍᓐᓇᑐᑦ ᐃᓚᖃᕐᐳᑦ ᓯᓚᐅᑉ ᓂᑦᑕᕿᓐᓂᖓᓂᒃ, ᖃᐅᓯᕐᓇᓂᖓᓂᒃ, ᐊᓄᕆᒥᒃ, ᓄᓇᒦᑦᑐᒥᒃ ᐊᐳᑎᒥᒃ, ᐊᒻᒪᓗ ᑕᕆᐅᖅ-ᑐᕙᕐᒥᒃ, ᐊᒻᒪᓗ ᐃᑲᔪᕐᓯᒪᑦᓱᑎᒃ ᑐᑭᑖᕈᑎᐅᒋᐊᖃᓕᑐᐊᕐᒪᑕ ᓇᖏᐊᕐᓇᖏᑦᑐᑯᑦ ᐊᐅᓚᓂᐅᓚᖓᔪᑦ.

ᐃᓚᒋᔭᐅᑎᓪᓗᒋᑦ ᐱᓇᓱᒍᑎᐅᔪᑦ ᐁᑉᐯᖏᓐᓄᑦ, ᐱᐅᓯᑐᖃᕐᑎᒍᑦ ᐊᕐᖁᓯᓂᑐᙯᑦ ᐊᕐᕌᒍᑕᒫᑦ ᑲᒪᓇᓱᑦᑕᐅᓱᖑᕗᑦ ᑭᖑᕚᕆᓄᑦ ᐱᓇᓱᖃᑎᒌᑦᑐᓄᑦ ᐊᑑᑎᓕᓂᕐᓂᒃ ᐃᓄᑐᐃᓐᓀᑦ ᓄᓇᖓᓂ ᐊᑐᕐᑕᖃᕐᓂᒥᒃ ᐊᒻᒪᓗ ᐃᓚᒋᔭᐅᒻᒥᔪᑦ ᐅᕕᒃᑫᑦ ᐱᒋᐅᕐᓴᑎᑕᐅᔪᑦ. ᑕᒪᒃᑯᐊ ᐱᓇᓱᑦᑕᐅᔪᑦ ᐃᓚᖃᕐᐳᑦ ᓄᓇᒥᒃ ᖃᕆᑕᐅᔭᒧᑦ ᐱᑐᑦᑕᑐᒥᒃ ᐊᑦᔨᓕᐅᕈᑎᒧᑦ ᐊᑦᔨᓕᐊᖑᓯᒪᔪᓂᒃ ᐊᒻᒪᓗ ᓱᕐᖄᑎᕆᒍᓐᓇᓱᑎᒃ ᑐᕙᕐᒥᒃ ᐊᐳᑎᐅᓪᓗ ᐃᑦᔪᓂᖓᓂᒃ ᓄᓇᓂ ᓇᖏᐊᕐᓇᑐᕐᑕᖃᑐᐃᓐᓇᕆᐊᓕᓐᓂ. ᐃᑉᐱᒋᔭᖃᕋᓱᓐᓂᖅ ᐊᕐᖁᓯᓃᑦ ᖃᓄᐃᓕᖓᓂᖏᓐᓂ ᑐᓴᐅᒪᑎᑕᐅᓱᖑᕗᑦ ᓄᓇᕐᖃᑎᒌᑦ ᑐᓴᐅᑎᒃᑯᑦ ᑐᓴᕐᑎᑕᐅᑦᓱᑎᒃ ᐊᒻᒪᓗ ᐊᑦᔨᖑᐊᓂᒃ ᑕᑯᑎᑕᐅᑦᓱᑎᒃ ᖃᓄᐃᓐᓂᖏᓐᓂᓗ ᐊᕐᖁᑏᑦ ᑐᑭᓯᑎᑕᐅᑦᓱᑎᒃ ᑲᒪᓇᓱᒍᑎᑎᒍᑦ ᓴᓪᓗᓂᓗ ᓴᓪᓗᐃᓗ ᐁᑉᐸᖏᓐᓂ ᐊᒻᒪᓗ ᑲᖏᕐᓱᔪᐊᒥ ᑕᑯᓇᓱᑦᑕᐅᒍᓐᓇᑐᓂᒃ Facebook-ᑯᑦ ᑕᑯᔭᐅᒍᓐᓇᕕᖓᓐᓂ ᐅᕙᓂ (https://www.facebook.com/IceMonitoringNunavik) ᐊᒻᒪᓗ ᐅᑯᐊ CAIMAN ᑕᑯᓇᓱᑦᑕᐅᕕᖓᓐᓂ.

ᐅᓇᒻᒥᓱᐊᒍᕕᑦ ᐃᓚᐅᒐᔭᕐᓂᒥᒃ ᑖᒃᑯᓄᖓ ᐱᓇᓱᒍᑎᓄᑦ, ᖃᐅᔨᒋ-ᐊᕐᕕᖃᕈᓐᓇᖁᑎᑦ ᓄᓇᓖᑦ ᑲᕙᒫᐱᒃᑯᖏᓐᓂᒃ ᓴᓪᓗᓂᓗ, ᑲᖏᕐᓱᔪᐊᒥᓗ ᐅᕝᕙᓘᓐᓃᑦ ᑐᕃᓐᓇᕕᒋᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐱᓇᓱᖃᑎᒌᑦᑐᖁᑎᖏᑦ ᐅᕙᓂ ᑕᑯᒋᐊᕐᓗᒋᑦ enviro@krg.ca.