Winter

ᐊᓪᓚᑕᖏᑦ Géraldine Gouin/ᔨᐅᕈᓪᑏᑦ ᑯᐁᓐ, ᓂᕐᔪᑏᑦ ᖃᓂᒻᒪᓯᖏᓐᓂᒃ ᐱᓪᓗᑯᒋᐊᓕᓕᕆᔨᐅᑉ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒻᒥ ᐊᒻᒪᓗ Benjamin Jakobek/ᐱᐊᓐᔭᒪᓐ ᔮᑯᐱᐊᒃ, ᐋᓐᓂᐊᓯᐅᕐᑎᐅᑉ ᓂᕐᔪᑎᓂᒃ ᒪᓐᑐᔨᐊᑉ ᐃᓕᓐᓂᐊᕕᕐᔪᐊᖓᓂ

ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐊᕐᕌᒍᑕᒫᑦ ᑎᑭᑎᑦᓯᕕᐅᕙᑉᐳᖅ 20 ᒥᑦᓯᑎᓐᓃᑐᓂᒃ ᓂᕐᔪᑎᕕᓂᕐᓂᒃ ᑕᑯᑦᓴᐅᔪᒥᒃ ᖃᓂᒻᒪᓯᖃᕈᓇᐅᔪᓂᒃ. ᖃᐅᔨᓴᕋᑦᓴᒥᓄᑦ ᑎᑭᑕᐅᒐᒥᒃ ᑕᒫᑦ, ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒃ ᐱᓇᓱᓱᖑᕗᖅ ᓇᒻᒥᓂᖅ ᑐᑭᓯᓂᐊᕈᑎᑎᒍᑦ ᖃᐅᔨᓴᕐᓱᓂ ᑌᒪᖕᖓᒐᓚᓪᓗ ᖃᐅᔨᓴᕋᑦᓴᑖᕕᓂᕐᒥᓂᒃ ᐊᐅᓪᓚᑎᑦᓯᓱᖑᑦᓱᓂ Centre québécois sur la santé des animaux sauvage/ᑯᐯᒃᒥ ᐱᑦᔪᔨᕕᒻᒧᑦ ᐃᓕᖓᔪᓂᒃ ᓂᕐᔪᑏᑦ ᓄᔪᐊᕐᑌ ᐃᓗᓯᓕᕆᔭᐅᓂᖏᓐᓄᑦ, ᑖᒃᑯᐊ ᖃᐅᔨᓴᕐᑎᐅᒪᑕ ᐱᓪᓗᑯᒍᑎᖃᕐᓱᑎᒃ ᓂᕐᔪᑏᑦ ᖃᓂᒻᒪᓯᖏᓐᓂᒃ, ᐊᐅᓪᓚᑎᑦᓯᕕᒋᓲᖏᑦ ᑐᑭᓯᒋᐊᓪᓚᒍᒪᑦᓱᑎᒃ ᐊᕗᖓᒋᐊᓪᓚᒃ ᖃᐅᔨᓴᕐᑕᐅᔪᓂᒃ. ᑐᓴᕐᑎᓯᒍᑏᑦ ᐱᔭᐅᔪᑦ ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒧᑦ ᑖᒃᑯᓄᖓ ᑎᑭᑎᑕᐅᑦᓱᑎᒃ ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒧᑦ ᐊᐅᓪᓚᑎᑦᓯᒍᑎᐅᑦᓴᐅᑎᒋᕙᒻᒥᔪᑦ ᐃᓄᒻᒧᑦ ᖃᐅᔨᓴᕋᑦᓴᓂᒃ ᑐᓂᔨᔪᕕᓂᕐᒨᑕᐅᑦᓱᑎᒃ.

ᑌᒪᖕᖓᑦ 2013-ᖑᓕᓚᐅᕐᓯᒪᒻᒪᓂ, ᑰᒃᓱᐊᒃ ᓄᓇᖓᓂ ᐃᖃᓗᑦᑕᐅᔪᑦ ᑐᓂᔭᐅᕙᑉᐳᑦ ᓄᓇᕕᒻᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒧᑦ. ᑖᒃᑯᓇᖕᖓᑦ ᑐᓂᔨᒍᑎᐅᓯᒪᔪᓂᑦ, ᐃᖃᓗᐃᑦ 18 (15 ᐊᑦᓛᓐᑎᒃ ᑕᕆᐅᖓᑕ ᓵᒪᖁᑎᖏᑦ, 2 ᑲᕕᓯᓖᒃ ᐊᒻᒪᓗ 1 ᐃᖃᓗᑉᐱᒃ) ᐃᓘᓐᓇᑎᒃ ᐸᕐᑎᖃᓚᐅᔪᕗᑦ; ᕿᕐᓂᐊᖓᔪᓂᒃ ᑐᖑᔪᐊᖓᑦᓱᑎᓪᓗ ᐸᕐᑎᖃᕐᓱᑎᒃ ᐊᒥᕋᕐᒥᒍᑦ, ᐃᓗᒻᒧᑦ ᐊᓪᓛᑦ ᐃᒻᒪᓯᒪᑎᑕᐅᑦᓱᑎᒃ. ᐃᖃᓘᒃ ᒪᕐᕉᒃ ᐃᓗᒃᑯᑦ ᑭᓯᐊᓂ ᐸᕐᑎᖃᓚᐅᔪᔫᒃ ᓯᓚᑖᒍᑦ (ᑕᑯᑦᓴᒥᒃ ᓱᔫᔭᕋᑎᒃ).

ᑕᒪᓐᓇ ᖃᓂᒻᒪᓯᖅ ᖃᓪᓗᓈᕐᑎᑐᑦ ᑌᔭᐅᔪᖅ phaeohyphomycosis/ᐳᐱᐊᕋᕐᑕᐅᓂᖅ ᑌᒣᑎᑕᐅᑦᓱᑎᒃ ᐳᐱᐊᕋᕐᓄᑦ ᓄᓇᐅᑉ ᐊᕙᑎᖓᓂᑦ ᐊᒥᒐᕋᑎᒃ ᐱᑕᖃᓲᓄᑦ. ᑕᒪᒃᑯᐊ ᐳᐱᐊᕃᑦ ᐃᖃᓗᓐᓄᑦ ᖃᓄᐃᒍᑎᐅᓱᖑᖕᖏᑐᑦ, ᖃᓄᐃᒍᑎᐅᓯᓱᖑᕗᓪᓗ ᐃᖃᓗᓐᓄᑦ ᑭᓕᕐᓯᒪᔪᓄᑦ ᓂᐱᑐᐊᕋᒥᒃ.

ᐃᓱᒪᔪᒍᓪᓕ ᐊᒥᓱᓄᑦ ᑌᒣᓚᕿᑎᑕᐅᒐᔭᕆᐊᖏᑦ ᐃᓚᖏᓪᓗ ᑐᑭᓯᓇᕐᑎᓯᕗᑦ ᑕᒪᒃᑯᓂᖓ phaeohyphomycosis/ᐳᐱᐊᕋᕐᑕᐅᒍᑎᐅᔪᓂᒃ ᐃᓚᐅᑎᓪᓗᒋᑦ ᐃᖃᓗᐃᑦ ᐋᓐᓂᑲᑕᓐᓂᓴᐅᓕᕐᓂᖏᑦ ᐅᕝᕙᓘᓐᓃᑦ ᐃᒪᐅᑉ ᓂᕈᒥᓐᓂᖓᓄᑦ. ᑕᒪᒃᑯᐊᖑᒐᓗᐊᕐᑎᓗᒋᑦ, ᐃᖃᓗᐃᑦ ᖃᓂᒻᒪᓯᓖᑦ ᓱᓕ ᐊᑯᓓᑦᑐᖏᓪᓚᑦ.

ᐃᖃᓗᐃᑦ ᑰᒃᓱᐊᒃ ᓄᓇᖓᓂ ᐃᖃᓗᑦᑕᐅᖃᑦᑕᑐᑦ ᖃᓂᒻᒪᓯᖃᕐᓂᕋᕐᑕᐅᒪᓕᕐᖁᑦ phaeohyphomycosis/ᐳᐱᐊᕋᕐᑕᐅᓂᕐᒥᒃ ᑕᒪᒃᑯᐊ ᐊᔪᒉᑦᑐᑦ ᐊᕗᖓᒋᐊᓪᓚᓗ ᖃᐅᔨᓴᕐᑕᐅᓂᖃᕆᐊᖃᓕᕐᖁᑦ. ᖃᓂᒻᒪᓯᖅ ᖃᓄᐃᑦᑐᓗᑐᑦᓯᐊᖑᒻᒪᖔᑦ ᑐᑭᓯᔭᐅᒋᐊᓪᓚᖁᓪᓗᒍ, ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐁᑉᐸᖃᕐᓗᓂ Centre québécois sur la santé des animaux sauvage/ᑯᐯᒃᒥ ᐱᑦᔪᔨᕕᒻᒧᑦ ᐃᓕᖓᔪᓂᒃ ᓂᕐᔪᑏᑦ ᓄᔪᐊᕐᑌ ᐃᓗᓯᓕᕆᔭᐅᓂᖏᓐᓄᑦ ᖃᐅᔨᓴᕐᓂᒥᒃ ᐊᑑᑎᔭᖃᓛᕈᒪᓕᕐᖂᒃ ᑲᒃᑯᓂᖓ ᓯᕗᓂᖃᕐᓗᑎᒃ:

1) ᑐᑭᓯᓂᐊᕐᓗᑎᒃ ᖃᓄᑎᒋᒃ ᖃᓂᒻᒪᓯᖅ ᐊᑯᓓᓐᓂᖃᕐᒪᖔᑦ (ᐃᖃᓗᐃᑦ ᖃᑦᓯᐅᒪᖔᑕ ᐸᕐᑎᑖᕐᓯᒪᔪᑦ) ᐱᓇᓱᖃᑎᒋᓗᒋᑦ ᑰᒃᔪᐊᒥᐅᑦ ᐃᖃᓗᓐᓂᐊᑎᖏᑦ ᐃᖃᓗᓐᓂᐊᑎᓂᓪᓗ ᒪᙯᑦᑎᓯᔩᑦ. ᑕᒪᓐᓇ ᑐᑭᖃᕋᔭᕐᑐᖅ ᐃᓚᐅᒋᐊᖃᕐᑎᓗᒋᑦ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᐅᑉ ᐱᓇᓱᑦᑎᖏᑦ, ᐃᓚᖓᓂᓪᓗ ᐃᑲᔪᕐᑕᐅᓗᑎᒃ Centre québécois sur la santé des animaux sauvage/ᑯᐯᒃᒥ ᐱᑦᔪᔨᕕᒻᒧᑦ ᐃᓕᖓᔪᓂᒃ ᓂᕐᔪᑏᑦ ᓄᔪᐊᕐᑌ ᐃᓗᓯᓕᕆᔭᐅᓂᖏᓐᓄᑦ, ᓄᓗᐊᕐᓯᒪᔪᓂᒃ ᐃᖃᓗᓕᕆᓕᕈᑎᒃ ᑲᒪᓇᓱᖃᑦᑕᓗᑎᒃ ᐃᖃᓗᑦᓯᒪᔭᖏᑦ ᐸᕐᑎᓇᕐᑐᖃᖕᖏᑲᓗᐊᕐᒪᖔᑕ.
2) ᐱᒋᐅᕐᓴᑎᑦᓯᒍᑎᖃᕐᓗᑎᒃ ᐃᖃᓗᓐᓂᐊᑎᓄᑦ ᐃᓚᐅᒍᒪᔪᓄᑦ ᑕᑯᑐᐃᓐᓇᓗᑎᒃ ᖃᐅᔨᒪᒍᓐᓇᖁᓪᓗᒋᑦ ᖃᓂᒻᒪᓯᓕᓐᓂᒃ ᐊᓱᐃᓛᓗ ᖃᐅᔨᓴᕐᑕᐅᔪᑦᓴᓕᐅᖃᑦᑕᓗᑎᒃ, ᓴᐳᑦᔨᓯᒪᒍᑎᒋᓂᐊᕐᑕᒥᓂᒃ ᐱᓇᓱᑦᑕᖏᓐᓂᒃ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᐅᓪᓗ Centre québécois sur la santé des animaux sauvage/ᑯᐯᒃᒥ ᐱᑦᔪᔨᕕᒻᒧᑦ ᐃᓕᖓᔪᓂᒃ ᓂᕐᔪᑏᑦ ᓄᔪᐊᕐᑌ ᐃᓗᓯᓕᕆᔨᖏᑕᓗ.
3) ᑲᑎᖕᖓᓯᖃᑦᑕᓗᑎᒃ ᐃᖃᓗᓐᓂᐊᑎᓂᒃ ᐅᖃᖃᑎᒌᓐᓂᖃᕐᓗᑎᒃ ᐃᖃᓗᓐᓂᐊᑏᑦ ᑕᑯᖃᑦᑕᑕᖏᓐᓂᒃ ᑕᑯᓯᒪᔭᖏᓐᓂᓗ ᖃᒻᒥᑯᑦ ᐊᕐᕌᒍᖃᑦᑕᓚᐅᕐᑐᓂ.
4) ᑌᒪᓕ ᖃᓄᑎᒋᒃ ᐃᓄᓐᓄᑦ ᑲᑉᐱᐊᓇᕐᓂᖃᕐᒪᖔᑕ ᑐᑭᓯᒪᔭᐅᖕᖏᒪᑕ ᓱᓕ, ᐃᓄᐃᑦ ᐃᖃᓗᑦᑐᖃᑦᑕᖁᔭᐅᖕᖏᓚᑦ ᐃᖃᓗᓐᓂᒃ phaeohyphomycosis/ᐸᕐᑎᓕᓐᓂᒃ. Centre québécois sur la santé des animaux sauvage/ᑯᐯᒃᒥ ᐱᑦᔪᔨᕕᒻᒧᑦ ᐃᓕᖓᔪᓂᒃ ᓂᕐᔪᑏᑦ ᓄᔪᐊᕐᑌ ᐃᓗᓯᓕᕆᔨᖏᑦ ᖃᐅᔨᓴᓛᕐᐳᑦ ᐃᓄᓐᓄᑦ ᑕᒪᓐᓇ ᑲᑉᐱᐊᓇᕐᓯᑐᐃᓐᓇᕆᐊᖃᕐᒪᖔᑦ ᖃᐅᔨᓴᕐᓗᑎᒃ ᐃᒪᖅ ᖃᓄᑎᒋᒃ ᓂᕈᒥᓐᓂᖃᓕᕋᒥ ᐊᖏᓕᕙᓪᓕᐊᑎᑦᓯᓱᖑᒻᒪᖔ ᑕᒪᒃᑯᓂᖓ ᐳᐱᐊᕋᕐᓂᒃ ᐸᕐᑎᕈᑎᐅᔪᓂᒃ ᑐᑭᓯᓂᐊᕐᓗᑎᓪᓗ ᖃᓄᑎᒋᒃ ᖃᓂᒻᒪᓯᖅ ᐃᓄᐃᑦ ᐃᓗᓯᖃᑦᓯᐊᑐᑦᓴᐅᓂᖏᓐᓄᑦ ᑲᑉᐱᐊᓇᕐᓂᖃᕐᒪᖔᑦ.

ᐃᓱᒫᓗᒋᔭᖃᕈᑦᓯ ᐅᖃᐅᓯᑦᓴᖃᕈᑦᓯᓗᓐᓃᑦ ᐅᕝᕙᓘᓐᓃᑦ ᐃᓚᐅᒍᒪᒍᑦᓯ ᖃᐅᔨᓴᕐᑐᓄᑦ, ᑐᓴᕐᓴᕉᑎᕕᖃᕐᑐᓴᐅᕗᓯ Géraldine-G. Gouin/ᔨᐅᕈᓪᑏ-ᔨ. ᑯᐁᓐᒥᑦ ᐅᕙᓂ (ggouin@makivik.org).

ᓄᓇᕕᒻᒥᐅᓂᒃ ᓇᑯᕐᒦᕈᒪᕗᒍᑦ ᖃᓂᒻᒪᓯᓕᓐᓂᒃ ᐃᖃᓗᑦᑖᕕᒋᖃᑦᑕᓚᐅᕐᑕᑎᓐᓂᒃ, ᑖᒃᑯᓄᖓ ᖃᐅᔨᒪᒐᓱᒍᓐᓇᑎᑕᐅᖃᑦᑕᕋᑦᑕ ᐃᓘᓐᓈᒍᑦ ᑕᒪᑐᒪ ᐱᒻᒪᕆᐅᑦᓱᓂ ᐃᓅᖃᑎᒌᓄᑦ ᐃᓗᓯᖃᑦᓯᐊᓂᑦᓴᒨᓕᖓᑦᓱᓂ ᐱᔭᑦᓴᕈᕐᓯᒪᓕᕐᑐᒥᒃ!