ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᑯᐯᒃᒥᐅᓗ ᐊᖓᔪᕐᖄᖓ François Legault ᑲᑎᓚᐅᔪᕘᒃ ᒪᓐᑐᕆᐊᓪᒥ ᑎᓯᒻᐸ 20-ᒥ ᐊᑎᓕᐅᕐᕕᖃᕆᐊᕐᑐᓱᑎᒃ ᓄᓇᕕᒻᒥᐅᑦ ᓇᒻᒥᓂᖅ-ᑲᕙᒪᒍᒪᕐᓂᒧᑦ ᐊᖏᖃᑎᒌᒐᓱᐊᕈᑎᑦᓴᖓᓂᒃ, ᐱᓪᓚᕆᐅᑦᓱᓂ ᐅᖄᒍᑕᐅᕙᓪᓕᐊᓚᖓᓕᕐᑎᓗᒍ ᓄᓇᕕᒻᒥᐅᑦ ᐃᒻᒥᓂᒃ-ᐊᐅᓚᑦᓯᒍᒪᓂᖓ.
ᒪᑭᕝᕕᐅᑉ ᐳᕐᑐᓂᕐᓴᖁᑎᓕᒫᖏᑦ ᐊᑎᓕᐅᕐᑐᓃᓚᐅᔪᕗᑦ, ᓄᓇᕕᒻᒥᐅᓗ ᐃᒻᒥᓂᒃ-ᐊᐅᓚᑦᓯᒍᒪᓂᕐᒧᑦ ᐊᖏᖃᑎᒌᒐᓱᐊᕐᑏᒃ, ᑐᓄ ᓇᐹᕐᑐᖅ ᐋᓐᑐᓂ ᐃᑦᑐᓵᖅᓗ, ᑯᐯᒃᒥᐅᓗ ᑐᕐᖃᑕᕐᕕᖓ ᐱᓇᓱᖃᑎᖃᕆᐊᖃᕐᓂᒧᑦ ᐊᓪᓚᓂᒃ ᐃᓄᑐᐃᓐᓇᓂᓪᓗ Ian Lafrenière. ᑲᑎᒪᑦᓱᑎᒃ ᐊᑎᓕᐅᕐᓂᖃᓚᐅᕐᑎᓇᒍ, ᐊᖓᔪᕐᖄᖅ ᐱᑕ ᐋᑕᒥ ᐅᐱᒍᓲᓰᓚᐅᔪᕗᖅ ᓴᓇᐅᒐᕐᒥᒃ ᑯᐯᒃᒥᐅᓗ ᐊᖓᔪᕐᖄᖓᓂᒃ ᐃᓄᒃᔪᐊᒥᐅᒧᑦ ᓴᓇᐅᒐᕐᑕᕕᓂᕐᒥᒃ, ᓄᓇᕕᐅᓪᓗ ᓄᓇᖕᖑᐊᖓᓂᒃ ᐃᓄᒃᑎᑑᕐᑐᑕᓕᒻᒥᒃ ᓄᓀᑦ ᑌᔭᐅᒍᓯᖏᓐᓂᒃ. ᒪᑭᕝᕕᐅᑉ ᐳᕐᑐᓂᕐᓴᖁᑎᖏᑦ ᑯᐯᒃᒥᐅᓗ ᐊᖓᔪᕐᖄᖓ ᐅᖃᐅᓯᖃᓚᐅᔪᕗᑦ ᒪᑭᕝᕕᐅᑉ ᑎᒥᐊᕈᖁᑎᖏᑦᑕ ᐱᔭᖃᑦᓯᐊᕈᓐᓇᓂᕆᓲᖏᓐᓂᒃ Legault-ᓗ ᐊᕐᕌᒍᓂ ᐱᖓᓱᓂ ᑎᓕᔭᐅᒍᑎᒋᓯᒪᔭᖏᑦ ᐃᓱᓕᓛᓕᕐᑎᓗᒋᑦ ᐱᕕᑦᓴᓯᐊᒍᓂᕋᓕᕐᓱᒋᑦ ᓯᕗᒧᐊᕈᑎᖃᕆᐊᖃᕐᓂᒥᒃ ᐃᓄᑐᐃᓐᓀᑦ ᐃᒻᒥᓂᒃ ᐊᐅᓚᑦᓯᒍᒪᓂᖓᓂᒃ. ᐱᑕ ᐋᑕᒥ ᑖᑦᓱᒥᖓ ᐊᖏᖃᑎᒌᒍᑎᒥᒃ, ᓯᕗᒻᒧᕆᐊᕈᑎᑦᓯᐊᒍᓂᕃᓐᓂᖁᖅ ᐅᖄᒍᑕᐅᖃᑦᑕᕆᐊᖃᓕᕐᓂᖓᓂᒃ ᐃᓄᑐᐃᓐᓀᑦ ᐊᐅᓚᑦᓯᒋᐊᖃᓕᕐᓂᖓᓂᒃ ᐃᓅᓯᕐᒥᓂᒃ, ᐊᕐᕌᒍᓂ ᐊᒥᓱᓂ ᓂᕆᐅᒋᔭᐅᓯᒪᓕᕐᒪᑦ. ᐱᖓᓱᓂᒃ ᐊᖏᖃᑎᒌᒍᑎᓂᒃ ᐊᑎᓕᐅᕐᕕᐅᖃᑦᑕᑐᖃᕐᓯᒪᔪᖅ 2003-ᒥ, 2007-ᒥ 2011-ᒥᓪᓗ ᓄᐃᑦᓯᒍᑕᐅᒍᒪᓯᒪᔪᓂᒃ ᓄᓇᕕᒻᒥ ᓄᓇᓕᓕᒫᓂ ᑲᕙᒪᑦᓴᒥᒃ ᖃᓄᕐᓗ ᓄᐃᑕᐅᔪᑦᓴᐅᒪᖔᑦ ᐊᐅᓚᑕᐅᔪᑦᓴᐅᒪᖔᓪᓗ ᐅᖃᐅᓯᕐᑕᖃᕐᑎᓗᒋᑦ.
“ᑐᖕᖓᓇᕐᑐᓯᐊᒍᕗᒍᑦ ᐃᓄᑦᑎᒍᑦ, ᑭᓯᐊᓂ ᑕᒪᑐᒥᖓ ᑲᑐᑦᔨᖃᑎᖃᕈᒪᔪᒍᑦ ᐃᓕᑦᓯᓂᒃ, ᑎᓕᐅᕐᑕᐅᖔᕈᓐᓀᓗᑕ,” ᐊᖓᔪᕐᖄᖅ ᐱᑕ ᐋᑕᒥ ᐅᖃᕐᑐᕕᓂᖅ ᐊᑎᓕᐅᕐᓂᖃᕐᑎᓗᒍ. “ᐅᕙᑦᑎᓄᑦ ᑕᒪᓐᓇ ᐱᒋᐊᕐᓂᐅᕗᖅ ᐃᓚᓐᓈᕇᓚ-ᖓᓕᕐᓂᑎᓐᓂᒃ ᑯᐯᒃᑯᓗ. ᑲᑐᑦᔨᖃᑎᒌᒍᒪᒐᑦᑕ.” ᐅᖃᕐᓱᓂᓗ 7-ᒥᓕᐊᓐᓃᒻᒪᑕ ᑯᐯᒃᒥᐅᑦ ᐅᓄᕐᓂᓭᑦ ᑕᑯᓚᐅᕐᓯᒪᓛᖕᖏᑐᑦ ᓄᓇᕕᒻᒥᒃ ᖃᐅᔨᒪᖁᑦᓱᒋᓪᓗ ᑐᖕᖓᓱᑦᑎᓯᐊᕋᑦᑎᒋᑦ, ᐃᓄᑐᐃᓐᓀᑦ ᐊᐅᓚᑕᖓᓂ. “ᑕᑯᓐᓇᑕᐅᒍᓯᖃᕈᒪᖕᖏᑐᖓ ᐅᔭᕋᕐᓂᐊᕋᑦᓴᓯᐅᕐᕕᓴᑐᐃᓐᓇᐅᓂᕐᒥᒃ; ᓄᓇᑦᑕ ᐱᐅᔪᐊᐱᐅᓂᖓᓂᒃ ᑕᑯᖁᔭᒃᑲ.”
ᑯᐯᒃᒥᐅᑦ ᐊᖓᔪᕐᖄᖓ Legault ᓭᒻᒪᐅᑎᖃᑎᖃᕆᐊᖃᕐᓂᒥᒃ ᓄᓇᓕᑐᖃᕐᓂᒃ ᑲᒪᒋᔭᑦᓴᓚᕆᐅᓂᕃᔪᕕᓂᖅ ᑯᐯᒃᒥᐅᑦ ᑲᕙᒪᖓᓄᑦ, ᐊᑎᓕᐅᕐᕕᐅᓂᖓᓗ ᓄᓇᕕᒻᒥᐅᑦ ᓇᒻᒥᓂᖅ-ᑲᕙᒪᒍᒪᕐᓂᒧᑦ ᐊᖏᖃᑎᒌᒐᓱᐊᕈᑎᑦᓴᖓ ᑐᖕᖓᕕ-ᐅᓚᖓᓕᕐᓱᓂ ᐊᖏᖃᑎᒌᒐᓱᐊᕐᓃᑦ ᑲᔪᓯᔭᐅᒋᐊᖃᕐᓂᖏᓐᓂᒃ ᐊᖏᖃᑎᒌᒍ-ᑎᓕᐅᕈᒪᓂᕐᒧᑦ ᓄᓇᕕᒻᒥᐅᑦ ᐊᐅᓚᑦᓯᒍᓯᑦᓴᖓᓂᒃ 2024-ᒥ.
“ᓯᕗᓂᖃᑦᓯᐊᑐᕆᔪᖓ ᐱᓇᓱᖃᑎᒌᓐᓂᕆᓛᕐᑕᑎᓐᓂᒃ ᑯᐯᒃᒥᐅᑎᒍᑦ ᓄᓇᕕᒻᒥᐅᑎᒍᓪᓗ,” ᐅᖃᕐᑐᕕᓂᖅ Legault.
