Winter

ᓂᕈᐊᕐᑐᐃᑦ ᓱᕐᖁᐃᓇᑦᓯᐊᑐᒥᒃ ᑐᑭᑖᓪᓚᕆᓚᐅᔪᕗᑦ ᓂᕈᐊᕐᓂᖃᕐᑎᓗᒍ ᕕᐳᐊᕆ 4, 2021-ᒥ, ᐱᑕ ᐋᑕᒥ ᓂᕈᐊᕐᑕᐅᓚᐅᔪᖅ ᒪᑭᕝᕕᐅᑉ ᑯᐊᐳᕇᓴᖓᓄᑦ ᐊᖓᔪᕐᖄᕆᔭᐅᓚᖓᓕᕐᑎᓗᒍ ᐊᕐᕌᒍᓂ ᐱᖓᓱᓂ ᐃᓕᒪᓚᖓᑦᓱᓂ. 66.7% ᐳᓴᓄᑦ ᐅᓄᕐᓂᓴᓄᑦ ᓂᕈᐊᕐᑕᐅᓂᕐᓴᐅᓚᐅᔪᖅ ᓵᓕ ᒍᐊᑦ ᐊᖓᔪᕐᓯᒥᑦ, ᐊᒻᒪᓗ ᓂᕈᐊᕐᑕᐅᑎᒐᓱᐊᕆᐅᕐᑐᒥᑦ ᓄᐊ ᑮᓐᒥᑦ. ᐱᑕ ᐋᑕᒥ ᒪᑭᕝᕕᒃᑯᓐᓄᑦ ᐊᖓᔪᕐᖄᕆᔭᐅᓯᒪᒻᒥᔪᖅ 1998-ᒥ ᐊᒻᒪᓗ 2012-ᒥ ᐊᒻᒪᓗ ᑮᓇᐅᔭᓕᕆᔨᒻᒪᕆᒋᐅᔭᓯᒪᒻᒥᓱᓂ ᐊᒻᒪᓗ ᑲᑎᒪᔨᓄᑦ ᐃᓚᒋᔭᐅᓯᒪᑦᓱᓂ ᑰᑦᔪᐊᒥᐅᓂᒃ ᑭᒡᒐᑐᕐᑎᐅᓱᓂ ᒪᑭᕝᕕᑯᓐᓂ.

“ᐅᐱᒍᓱᒻᒪᕆᑉᐳᖓ ᐊᒻᒪᓗ ᐱᕕᖃᕐᑎᑕᐅᓂᕋᓂᒃ ᑐᖕᖓᓱᑦᑎᑕᐅᑦᓱᖓᓗ ᒪᑭᕝᕕᒥ ᐊᖓᔪᕐᖄᑉ ᐃᓂᖓᓃᓚᖓᓯᒻᒥᑎᓪᓗᖓ. ᓄᓇᕕᒻᒥᐅᖑᖃᑎᒃᑲᓂᒃ ᐱᒍᑦᔨᒍᓐᓀᓚᕐᓯᒪᖕᖏᑲᓗᐊᕐᓱᖓ ᒪᑭᕝᕕᑯᓐᓃᒍᓐᓀᕋᓗᐊᕋᒪ ᐊᕐᕌᒍᖃᑦᑕᓚᐅᕐᑐᓂ, ᕿᓚᓈᕐᐳᖓ ᓄᓇᖁᑎᑦᑎᓂ ᑭᒡᒐᑐᕐᓂᖃᓚᖓᓕᕐᒥᒐᒪ ᐊᖓᔪᕐᖄᖑᓂᕋᓂ ᒪᑭᕝᕕᑯᓐᓂ.” ᐱᑕ ᐋᑕᒥ ᑌᒣᓕᑦᓱᓂ ᐅᖃᓚᐅᔪᖅ ᓵᓚᖃᒌᕐᓱᓂ ᓂᕈᐊᕐᑕᐅᓂᕐᐸᐅᓂᕐᒥᓄᑦ. “ᐊᑕᐅᓯᖕᖑᓯᒪᑦᓯᐊᓗᑕ, ᐱᓇᓱᐊᖃᑎᒌᒋᐊᖃᓕᕐᒪᑕ ᑎᒥᐅᔪᓕᒫᑦ ᓄᓇᕕᒻᒥᐅᑦ ᐃᓅᓯᕐᒥᒍᑦ ᐱᐅᓯᐅᒥᒋᐊᕐᑎᒐᓱᐊᕐᓗᒋᑦ. ᓂᕈᐊᕐᑕ ᐅᓂᖓ ᐊᖓᔪᕐᖄᑉ ᐃᓄᖓᓄᑦ ᑕᑯᒍᑎᒋᔭᕋ ᓄᓇᕕᒻᒥᐅᖑᖃᑎᒃᑲ ᑌᒫᑦᓭᓇᖅ ᐃᑉᐱᒍᓱᒋᐊᖏᓐᓂᒃ ᐅᕙᖓᑦᑎᑐᑦ. ᐊᕐᓱᕈᓐᓇᑐᒻᒪᕆᐅᓚᐅᕐᑐᖅ ᑕᒪᓐᓇ ᓂᕈᐊᕐᑕᐅᑎᒐᓱᐊᕐᓂᕗᓐᓂ ᓂᕈᐊᕐᑕᐅᑎᒐᓱᐊᓚᐅᕐᑐᑎᒍᑦ. ᓂᕈᐊᕐᑕ-ᐅᑎᒐᓱᐊᖃᑎᒋᓚᐅᕐᑕᑲ ᓯᕗᓕᕐᑎᒋᖃᑦᑕᓯᒪᒻᒥᔭᕗᑦ ᐊᒻᒪᓗ ᐃᓄᑐᖃᐅᓕᕐᑐᖅ ᓵᓕ ᒍᐊᑦ ᐊᖓᔪᑦᓯᖅ, ᓂᕈᐊᕐᑕᐅᑎᒐᓱᐊᖃᑎᐅᒋᐅᕐᑐᓗ ᓄᐊ ᑮᓐ. ᓲᖑᔪᑲᓪᓚᓂᒃ ᓇᐅᑐᐃᓐᓀᑦ ᐃᓄᐃᑦ ᐅᖃᖃᑎᒌᒍᑎᖃᕐᑎᓯᖃᑦᑕᓚᐅᕐᑐᑦ ᐃᓄᖁᑎᕗᑦ ᖃᓄᖕᖏᓯᐊᕋᓱᐊᒋᐊᖃᕐᓂᖏᓐᓄᑦ ᐃᓕᖓᔪᓂᒃ ᓂᕈᐊᕐᑕᐅᓯᒪᑦᓱᑎᒃ ᑲᕙᒪᓄᑦ ᐃᒻᒥᓂᕐᓱᕈᓐᓇᓯᒍᒪᑦᓱᑕ ᓇᒻᒥᓂᖅ ᓄᑖᒥᒃ ᑲᕙᒪᑦᓴᑖᕋᓱᐊᕈᑦᑕ.”

ᐱᑕ ᐋᑕᒥ, ᐅᑭᐅᓕᒃ ᐊᕙᑎ ᐱᖓᓱᓂᒃ (60-ᓂᒃ), ᒪᑭᕝᕕᑯᓐᓂ ᐊᖓᔪᕐᖄᒍᓂᕐᒥᓂ ᐊᒻᒪᓗ ᐳᕐᑐᓂᕐᓴᓄᑦ ᓯᕗᓕᕐᑎᒋᔭᐅᖃᑦᑕᓯᒪᑦᓱᓂ ᒪᑭᕝᕕᐅᑉ ᑎᒥᐊᕈᖁᑎᒻᒪᕆᖏᓐᓂ, ᐃᓄᐃᑦ ᖃᖓᑦᑕᔫᖁᑎᖏᓐᓂ/ᑎᒻᒥᔫᖁᑎᖏᓐᓂ, ᐊᕐᕌᒍᓂ ᓯᑕᒪᐅᔪᕐᑑᓚᐅᕐᑐᓂ. ᐊᖓᔪᕐᖃᖑᓂᕐᒥᓂᒃ ᓄᕐᖃᑎᓚᐅᔪᖅ ᒪᑭᕝᕕᐅᑉ ᐊᖓᔪᕐᖄᖓᑕ ᐃᓂᖓᓄᑦ ᓂᕈᐊᕐᑕᐅᑎᒐᓱᐊᓯᒐᒥ. ᐱᑕ ᐋᑕᒥ ᐅᐱᒍᓲᓯ-ᐊᕐᑖᕆᔭᐅᔪᒥᒃ Order of Canada-ᒍᓂᕋᕐᑕᐅᔪᒥᒃ ᐁᑦᑐᑕᐅᓚᐅᔪᖅ 2020 ᐊᕐᕌᒍᖓ ᐱᒋᐅᕐᖃᒥᐅᑎᓪᓗᒍ ᐃᑲᔪᕐᓯᓯᒪᓂᕐᒥᓄᑦ ᒪᑭᑕᒐᓱᕐᑎᓯᓂᕐᒧᑦ, ᐃᓅᖃᑎᒌᓐᓂᑯᓪᓗ ᐱᓂᐊᕐᓂᓕᕆᓂᒃᑯᓗ ᐱᕙᓪᓕᐊᑎᑦᓯᒐᓱᐊᕐᖃᑦᑕᓯᒪᓂᕐᒥᓄᑦ ᓄᓇᕕᒻᒥ. ᑌᒫᑦᓭᓇᖅ ᑯᐯᒻᒥ ᐳᕐᑐᓂᕐᐹᒍᑦᓱᓂ ᐁᑦᑑᑎᐅᓲᒥᒃ Ordre national du Québec-ᖑᓂᕋᕐᑕᐅᔪᒥᒃ 2009 ᐊᕐᕌᒍᖓᓂ ᐁᑦᑐᑕᐅᓚᐅᕐᓯᒪᒻᒥᔪᖅ.

ᑕᕝᕙᓂ ᐊᕐᕌᒍᒥ ᓂᕈᐊᕐᓂᖃᕐᑎᓗᒋᑦ 3,532 ᓂᕈᐊᓚᐅᔪᑦ, 40.95% ᐳᓴᖏᑦ ᓂᕈᐊᕈᓐᓇᑐᐃᑦ ᓄᓇᕕᒻᒥ ᓂᕈᐊᓚᐅᔪᑦ. ᓄᓇᓖᑦ ᐊᑐᓂ ᐊᕕᑦᑐᓯ-ᒪᓂᕐᒥᒍᑦ ᓂᕈᐊᕈᑎᕕᓂᖏᑦ ᑕᕝᕙᓂ ᐊᕐᕌᒍᒥ ᑕᑯᒐᓱᐊᕐᑕᐅᒍᓐᓇᑐᑦ ᖃᕆᑕᐅᔭᒥᑦᑎᐊᖁᑎᑦᑎᓃᑦᑐᐃᑦ ᐅᕙᓂ: www.makivik.org/results.