Summer

ᔭᓄᐊᕆ 2021 ᑕᕐᕿᖓ ᑕᕐᕿᐅᓚᐅᔪᕗᖅ ᐱᐅᓯᕆᖏᓐᓇᓱᕆᖕᖏᑕᒥᓂᒃ ᐱᐅᓯᖃᕐᓱᓂ ᐃᓄᑐᐃᓐᓇᒧᑦ ᖃᖓᑦᑕᔫᕐᑎᒧᑦ Dawn Macfarlane/ᑖᐊᓐ ᒪᒃᕚᓚᓐᒧᑦ. ᑕᒃᑲᓂ ᑕᕐᕿᒥ ᑕᐋᓐ ᐊᕐᓇᖅ ᐃᓄᑐᐃᓐᓇᐅᓱᓂ ᓯᕗᓪᓕᐹᖑᑦᓱᓂ ᖃᖓᑦᑕᔫᕐᑎᓄᑦ ᐊᖓᔪᕐᖄᖑᑦᓱᓂ ᖃᖓᑦᑕᔫᓚᐅᔪᕗᖅ ᑲᓀᑎᐋᓐ ᓄᐋᑦᑯᑦ ᐳᔪᓕᐊᓗᖓᓐᓂᒃ 737-ᓕᒻᒥᒃ. ᐃᓱᒪᓇᖕᖑᐊᕋᔭᕐᑐᖅ ᓲᕐᓗ ᐃᓚᒌᑦ ᖃᖓᑦᑕᔫᕐᑎᓴᔭᐅᒋᐊᖏᑦ, ᑮᑕ ᒪᒃᕚᓚᓐ ᐸᓂᒋᒻᒪᒍ ᖃᖓᑦᑕᔫᕐᑎᓄᑦ ᐊᖓᔪᕐᖄᑉ ᓯᓰᓪ ᖄᓐᓴᓐ, 1980-ᖑᑎᓪᓗᒍ ᐃᓄᑐᐃᓐᓇᐅᓱᓂ ᓯᕗᓪᓕᐹᖑᓯᒪᒻᒪᑦ ᐳᔪᓕᐊᓗᒻᒥᒃ ᖃᖓᑦᑕᔫᕐᑎᓄᑦ ᐊᖓᔪᕐᖄᕈᕐᓱᓂ.

ᐁᕆᓕ 2008-ᒥ ᑕᐋᓐ ᖃᖓᑦᑕᔫᕐᑎᐅᖃᑕᐅᒋᐅᓚᐅᕐᓯᒪᕗᖅ 737-200-ᓕᒻᒥᒃ ᖃᖓᑕᑎᑦᓯᖃᑎᐅᑦᓱᓂ. ᑕᕿᐅᑉ ᑭᖑᓪᓕᖓᓂ ᖃᖓᑦᑕᔫᖃᑕᐅᓕᓚᐅᔪᒻᒥᔪᖅ ᑲᓀᐋᓐ ᓄᐋᑦᑯᑦ ᖃᖓᑕᕕᑦᓴᓕᐅᕐᓯᒪᔪᒥᒃ ᐱᑦᔪᔨᒍᑎᖃᕐᑎᓗᒍ ᖃᖓᑦᑕᔫᒥᒃ 5T444-ᓕᒻᒥᒃ ᐃᐊᑦᒪᓐᑕᓐᒥᑦ ᐃᓅᕕᒻᒧᑦ ᐊᑕᑕᒥᓂᒃ ᖃᖓᑦᑕᔫᕐᑎᐅᖃᑎᖃᕐᓱᓂ.

“ᖃᖓᑦᑕᔫᒥᒃ ᖃᖓᑕᑎᑦᓯᖃᑎᒌᒋᐅᓚᐅᔪᔪᒍᒃ ᐊᖓᔪᕐᖄᓗ ᐃᑲᔪᕐᑎᓘᕐᓱᓄᒃ ᐊᑖᑕᒌᒃ, ᐸᓂᒌᒃ. ᑌᓐᓇ ᐅᓪᓗᖅ ᐅᕙᓐᓄᑦ ᖃᖓᑦᑕᔫᕐᑎᐅᓕᕐᓱᖓ ᐱᐅᓂᕐᐹᖑᓚᐅᔪᔪᖅ, ᐊᓂᕐᕋᒧᑦ ᖃᖓᑦᑕᔫᕐᓱᖓ, ᐃᓚᒃᑲᓂᒃ ᐃᑭᒪᔨᐊᖃᕐᓱᖓ, ᐊᑖᑕᒐᓂᒃ. ᐊᒥᓱᑦ ᐃᓄᐃᑦ ᑌᒫᒃ ᐅᖃᕈᓐᓇᖏᑦᑐᑦ,” ᑌᒣᓕᑦᓱᓂ ᐅᖃᕐᑐᖅ. ᑕᐋᓐ ᐱᕕᑦᓴᑕᓚᐅᔪᕗᖅ ᖃᖓᑦᑕᔫᕐᑎᓄᑦ ᐊᖓᔪᕐᖃᐅᓂᕐᒥᒃ 737-200-ᓕᒃᑯᑦ ᐳᔪᓕᐊᓗᒃᑯᑦ ᐊᒻᒪᓗ 737-300-ᓕᒃᑯᑦ ᐆᒃᑐᐱᕆ 2020-ᖑᑎᓪᓗᒍ, ᐱᒋᐅᕐᓴᔭᐅᒍᑎᒋᒋᕋᒥᒋᑦ, ᔭᓄᐊᕆᐅᑎᓪᓗᒍ ᓯᕗᓪᓕᐹᒥ ᖃᖓᑦᑕᔫᕐᑎᓄᑦ ᐊᖓᔪᕐᖄᖑᒋᐅᓕᕐᓱᓂ ᖃᖓᑦᑕᔫᕐᑎᐅᒋᐊᖕᖓᓚᐅᔪᕗᖅ.

“ᓱᓕᔪᒥᒃ ᐅᖃᕐᐳᖓ ᐱᔪᕆᒪᓂᕋᕐᓱᖓ,” ᐱᔪᕆᒪᐅᑎᖃᕐᓱᖓ ᓯᕗᓪᓕᐹᖑᑦᓱᖓ ᐃᓄᑐᐃᓐᓇᐅᓱᖓ ᐊᕐᓇᖅ ᑲᓀᑎᐋᓐ ᓄᐋᑦᑯᑦ ᐳᔪᓕᐊᓗᖓᓂᒃ ᖃᖓᑦᑕᔫᕐᓱᖓ. “ᐅᓪᓗᒥ ᐃᓅᓯᕆᓕᕐᑕᑎᓐᓂ ᑐᓴᐅᒪᔭᐅᖕᖏᑐᑦ ᖁᕕᐊᓇᖕᖏᑐᑦ ᐅᓂᒃᑲᐅᓰᑦ ᓴᕐᕿᖃᑦᑕᓕᕐᑎᓗᒋ, ᐱᓪᓚᕆᐅᔪᕆᕗᖓ ᓂᐱᖃᕐᑎᓯᒍᓐᓇᕆᐊᒥᒃ ᓂᐱᒥᒃ ᐱᐅᔪᒥᒃ ᐱᔭᖃᕐᓯᒪᓂᓕᒻᒥᓗ ᓄᓇᓕᑐᖃᐅᑦᓱᓂ.”

ᑕᐋᓐ ᑕᕐᕋᒥᐅᓂᒃ ᐅᕕᒃᑲᓂᒃ ᖃᐅᔨᒪᖁᔨᕗᖅ ᐱᔪᒪᓪᓚᕆᒃᑯᓂ ᐊᓂᕐᕋᒥᓂᒃ ᐊᓪᓛᑦ ᕿᒣᓗᓂ ᐃᓕᓐᓂᐊᕆᐊᕐᓂᑯᒥᓄᑦ, ᑭᖑᓂᐊᒍᓪᓗ ᐱᓇᓱᒻᒪᕆᓯᓗᓂ ᐱᓇᓱᒐᕆᒍᒪᔭᒥᓂᒃ, ᓄᓇᓕᒻᒥᓄᑦ ᐃᓄᒃ ᐅᑎᕈᓐᓇᒪᑦ ᐃᑲᔪᕐᓯᓚᖓᓕᕐᓗᓂ ᓄᓇᓕᒻᒥᓂᒃ ᓄᓇᕐᖃᑎᒥᓂᒃᓗ ᐃᓱᐊᕐᑐᒥᒃ ᐅᑎᕐᕕᐅᓇᕐᑐᒥᒃ.

“ᐅᐱᒍᓱᑦᑐᒪᕆᐅᕙᑉᐳᖓ ᐱᓇᓱᒋᐊᒥᒃ ᓄᓇᓕᑐᙯᑦ ᓇᒻᒥᓂᕆᑦᓱᒍ ᖃᖓᑦᑕᔫᓕᕆᕕᖁᑎᖓᓐᓄᑦ, ᐊᒻᒪᓗ ᐱᕙᓪᓕᖁᑎᑖᕐᑕᑐᖃᑕᐅᒋᐊᕋᓂᒃ ᐅᐱᒍᓱᓐᓂᕋᒍᑦ ᐃᓱᒪᓱᖑᕗᖓ ᐃᓚᐅᒋᐊᒥᒃ ᐱᐅᓂᕐᓴᒥᒃ ᐃᓅᓯᖃᕐᓂᓴᖏᓐᓄᑦ ᐃᓄᕕᐊᓗᐃᑦ,” ᐅᖃᕐᑐᖅ ᑕᐋᓐ.

ᖃᖓᑦᑕᔫᓕᕆᓂᑎᒍᑦᑕᐅᖅ ᐊᖏᔪᒻᒪᕆᒻᒥᒃ ᐱᔭᖃᓕᕆᕗᖅ ᐃᓄᐃᑦ ᖃᖓᑦᑕᔫᖏᑦᑕ ᖃᖓᑦᑕᔫᕐᑎᖓ ᒥᓕᐊᓴ ᙯᓂ. ᐃᓄᓕᒫᓄᓕᖓᔪᑦ ᑐᓴᖃᑦᑕᐅᑎᒍᑏᑦ ᑎᕐᑎᑐᐃᓐᓇᖃᒻᒥᕋᑖᓚᐅᔪᕗᑦ ᓯᑉᑎᒻᐱᕆ ᐱᒋᐊᕐᖃᒥᐅᑎᓪᓗᒍ ᑌᑦᓱᒪᓂ ᒥᓕᐊᓴ, ᐃᓄᑐᐃᓐᓇᐅᓱᓂ ᐊᕐᓇᖅ ᓯᕗᓪᓕᐸᐅᑦᓱᓂ ᐃᓄᐃᑦᑯᑦ ᖃᖓᑦᑕᔫᖏᓐᓂ ᑖᔅ-8-ᓂ ᖃᖓᑦᑕᔫᕐᑎᓄᑦ ᐊᖓᔪᕐᖃᑕᖑᓚᐅᔪᒻᒪᑦ ᖃᖓᑦᑕᓱᓂ ᐃᓄᐃᑦ ᖃᖓᑦᑕᔫᖏᑦᑕ ᐳᔪᓕᐊᓗᖓᓄᑦ 737-200-ᓕᒻᒧᑦ ᓯᕗᓪᓕᐹᒥ ᖃᖓᑦᑕᔫᕐᑎᓄᑦ ᐊᖓᔪᕐᖄᖑᓕᕐᓱᓂ ᖃᖓᑕᒋᐅᕈᑎᒥᓂ ᒪᓐᑐᔨᐊᒥᑦ ᑰᓐᓂᐊᑎᒃᑯᓄᑦ, ᑭᖑᓂᐊᒍᑦ ᑲᔪᓯᑦᓱᓂ ᐳᕕᕐᓂᑐᒧᑦ, ᐅᑎᕐᓱᓂᓗ ᒪᓐᑐᔨᐊᒧᑦ.

ᐊᑦᔨᓕᐅᕆᔨ ᓇᒻᒥᓂᕐᓗ ᐅᖃᕐᐸᑐᖅ “ᖃᖓᑦᑕᔫᓕᕆᓂᕐᓄᑦ ᐅᐃᒻᒪᑐᑦᓴᔭᐅᒋᐊᒥᓂᒃ” Jean-Pierre Bonin/ᔮᓐ ᐱᐋᕐ ᐸᓐᓀᓐ ᒪᓐᑐᔨᐊᑉ ᒥᕝᕕᐊᓗᖓᓃᓚᐅᔪᕗᖅ ᑌᑲᓂ ᐅᓪᓗᒥ ᐊᑦᔨᓕᐅᕆᑲᑕᓚᐅᔪᑦᓱᓂᓗ ᑭᖑᓂᖓᒍᑦ ᓄᐃᑎᓚᐅᔪᔭᒥᓂᒃ Facebook-ᑯᑦ. ᑖᑦᓱᒪ ᓄᐃᑎᑕᖏᑦ 700-ᓂᑦ ᐊᒥᖓᓲᓂᕐᓴᓄᑦ “likes/ᐱᐅᒋᔭᐅᓚᐅᔪᔪᑦ” ᐊᒥᓱᕕᓗᐊᖕᖑᐊᒥᑦᓱᑎᒃ “shares/ᑕᑯᑎᑦᓯᖃᑎᒌᒍᑎᐅᑦᓱᑎᒃ.”

ᒥᓕᐊᓴ ᙯᓂ ᐅᖃᓚᐅᔪᕗᖅ ᐃᓄᑐᐃᓐᓇᐅᓱᓂ ᐊᕐᓇᐅᓱᓂᓗ ᖃᖓᑦᑕᔫᕐᑎᓄᑦ ᐃᓄᐃᑦᑯᑦ ᐳᔪᓕᐊᓗᐊᓐᓂ 737-200-ᓕᒻᒥᒃ ᐊᖓᔪᕐᖃᖑᕕᖃᓛᕆᐊᒥᒃ ᓯᕗᓂᖃᕐᓯᒪᖕᖏᑲᓗᐊᕐᓱᓂ ᖃᖓᑦᑕᔫᕈᓐᓇᐅᑎᑖᕋᓱᒋᐊᖕᖓᓕᕋᒥ, ᑭᓯᐊᓂ ᓇᓗᓀᕐᑕᐅᓂᕐᒥᓂᒃ ᐊᑐᕈᒪᔪᖅ ᐅᕕᒃᑲᓄᑦ ᐊᕐᓇᓄᑦ ᓄᓇᓕᑐᖃᕐᓄᓗ ᐅᕕᒃᑲᐅᒥᔪᓄᑦ ᖃᐅᔨᑎᑦᓯᒍᑎᒋᓗᒍ ᐃᓘᓐᓇᑎᒃ ᐊᓕᐊᓇᑐᐊᓗᓐᓂᒃ ᐱᓇᓱᒐᖃᕈᓐᓇᐊᖏᑦ ᓇᒻᒥᓂᕐᒥᓅᓕᖓᔪᓂᒃ ᓯᕗᓂᑦᓴᓕᐅᖃᑦᑕᓗᑎᒃ ᐱᔪᒪᔭᒥᓐᓂᒃ ᐱᒍᓐᓇᓯᒍᑎᒋᓂᐊᕐᓗᒋᑦ.

Dawn Macfarlane/ᑕᐋᓐ ᒪᒃᕚᓚᓐ ᐅᖃᖃᑕᐅᒋᐊᓪᓚᒋᕗᖅ ᑲᔪᖏᕐᓭᓂᖃᖃᑕᐅᑦᓱᓂ ᒥᓕᐊᓴᐅᑉ ᐅᖃᕐᑕᖏᑎᒍᑦ ᐅᕕᒃᑲᓄᑦ.

“ᐃᓕᓐᓂᐊᑕᐅᒍᓐᓇᑐᑦ ᐊᒥᓱᑦ ᓄᓇᓕᑐᖃᕐᓄᑦ ᐅᕕᒃᑲᓄᑦ ᐊᖏᔪᐊᓗᒻᒥᒃ ᐊᓱᒎᓪᓗᑐᐊᓘᕗᑦ, ᐅᕕᒃᑫᑦ ᐱᔪᒪᓂᖃᓚᐅᕈᑏᕐᑐᑦ ᐱᒐᓱᕝᕕᓴᐅᔪᓂᓪᓗ ᐃᓕᓐᓂᐊᕋᑦᓴᓂᓪᓗ. ᓇᐅᑐᐃᓐᓇᖅ ᐊᕐᓇᖅ ᐅᓇᒻᒥᓱᐊᒍᓂ ᖃᖓᑦᑕᔫᕐᑎᕈᕋᔭᕐᓂᒥᒃ ᐱᒍᓐᓇᕕᖃᑦᓯᐊᒪᑦ,” ᐅᖃᕐᑐᖅ ᑕᐋᓐ.