Spring

ᑲᓇᑕᒥᐅᓄᑦ ᐃᓄᑐᐃᓐᓇᓄᑦ ᓄᓇᖃᕐᖃᓯᒪᔪᓕᒫᓄᓪᓗ ᐊᖏᔪᒥᒃ ᐱᕙᓪᓕᐊᓂᕐᒥᒃ ᐱᔪᖃᓕᕐᐳᖅ

ᔪᓓ 6, 2021-ᖑᑎᓪᓗᒍ ᐅᓪᓛᑯᑦ 10-ᖑᒥ, ᒥᐊᔨ ᓭᒪᓐ ᑲᑎᔭᐅᓚᐅᔪᕗᖅ ᑲᓇᑕᐅᑉ ᑲᕙᒪᖓᑕ ᐊᖓᔪᕐᖄᖓᓄᑦ ᔭᔅᑕᓐ ᑐᕈᑑᒧᑦ ᑐᓴᕐᑎᓯᒍᑎᑎᒍᑦ ᑐᓴᕐᑎᓯᓂᕐᒥ ᐊᑑᑎᔭᐅᓂᖃᓚᐅᔪᔪᒥ ᑲᓇᑕᐅᑉ ᐱᕙᓪᓕᐊᓯᒪᔪᓂᒃ ᑕᑯᕚᒃᑯᕕᖃᐅᑎᖓᓂ ᑲᑦᓯᓅ, ᑯᐯᒃᒦᑦᑐᒥ. ᑐᓴᕐᑎᓯᒍᑎᐅᒌᕋᒥ ᐊᑕᓂᐊᓗᒃ ᐊᖏᕈᑎᖃᕐᓂᕆᐊᖓ ᑐᕈᑑᑉ ᐃᒣᖁᔨᒍᑎᖓᓂᒃ ᐃᓕᖓᔪᒥᒃ ᑲᓇᑕᐅᑉ 30-ᖑᒍᑎᒋᓚᖓᓕᕐᑕᖓᓄᑦ ᐊᑕᓂᐊᓗᒻᒧᑦ ᑭᒡᒐᑖᖑᓗᓂ, ᑲᓇᑕᐅᑉ ᑲᕙᒪᖓᑕ ᐊᖓᔪᕐᖄᖓ ᑐᕈᑑ ᑐᓴᕐᑕᐅᑎᑦᓯᒍᑎᖃᓕᓚᐅᔪᕗᖅ ᐊᑕᓂᐊᓘᑉ ᑭᒡᒐᑕᕆᓂᐊᓕᕐᑕᖓᓂᒃ ᑎᒃᑯᐊᓯᒋᐊᒥᒃ ᒥᐊᔨ ᓭᒪᓐᒥᒃ.

ᓭᒪᓐ ᓂᑦᔮᕕᖃᕆᐊᖕᖓᓯᒐᒥ ᑲᓇᑕᒥᐅᓂᒃ ᐃᓄᒃᑎᑐᑦ ᐅᖄᓯᕐᖄᓚᐅᔪᕗᖅ, ᐊᖏᔪᒻᒪᕆᒻᒥᒃ ᐱᕙᓪᓕᐊᓂᑎᒍᑦ ᓄᐃᑦᓯᓱᓂ ᐃᓄᑐᐃᓐᓇᓄᑦ ᓄᓇᓕᓐᓄᑦ ᐃᓄᑐᐃᓐᓀᑦ ᓄᓇᖏᓐᓂ, ᐊᒻᒪᓗ ᓄᓇᓕᑐᖃᓕᒫᓄᑦ ᑲᓇᑕᒥ ᓄᓇᓯᒪᔪᓄᑦ. ᐅᖃᐅᓯᖃᓚᐅᔪᔪᖅ ᑐᓴᕐᑎᓯᒍᑎᒥᒃ ᐱᒻᒪᕆᐊᓘᓂᕃᑦᓱᓂ. “ᐅᖃᕈᓐᓇᓯᐊᕐᑐᖓ ᖃᓄᕐᓗᓃᑦ ᖁᓚᕐᓇᖓ ᑖᓐᓇ ᑎᒃᑯᐊᑕᐅᓂᖓ ᐱᕙᓪᓕᐊᓂᒃᑯᑦ ᐊᖏᔪᒻᒪᕆᐅᒋᐊᖓ ᐊᒻᒪᓗ ᐱᔪᒪᓕᕐᓇᓱᓂ ᑲᓇᑕᒥᐅᓄᑦ ᓯᕗᒧᐊᒍᑎᑎᒍᓪᓗ ᐱᒻᒪᕆᐅᑦᓱᓂ ᐱᓗᐊᕐᑐᒥ ᓯᕗᒧᐊᒋᐊᕈᑎᑎᒍᑦ ᐊᕐᖁᓯᓂᒃᑯᑦ ᑕᑭᔪᒃᑯᑦ ᑎᑭᐅᑎᒐᓱᓐᓂᐅᓱᓂ ᓭᒻᒪᖃᑎᒌᓐᓂᓄᑦ. ᐋᙯᓪᓛ, ᑎᒃᑯᐊᑕᐅᓂᕋ ᓇᓪᓕᐅᑎᕗᖅ ᐱᓗᐊᕐᑐᒥᒃ ᓱᔪᖃᕐᓂᐅᓯᒪᔪᓂᒃ ᑭᖑᒧᑦ ᑕᑯᓐᓇᕈᓱᓐᓂᖃᓪᓗᐊᓂᕐᒦᑎᓪᓗᑕ ᐊᒻᒪᓗ ᓱᒐᓱᒍᒥᓇᕐᑐᒪᕆᐅᓕᕐᑎᓗᒍ ᐃᓅᓯᑦᑎᒍᑦ ᐱᕙᓪᓕᐊᓂᕗᑦ ᐃᓘᓐᓇᑎᒍᑦ ᐊᑑᑎᕙᑦᑕᑎᒍᑦ.”

ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᐅᖃᐅᓯᖃᑦᓴᐅᑎᒋᓚᐅᕆᕗᖅ ᐊᒥᕐᖃᖃᑎᐅᒍᑎᖃᕐᓱᓂ ᐅᐱᒍᓱᑦᔨᖃᑎᐅᓂᕐᒥᓂᒃ.

“ᓄᓇᕕᒻᒥᐅᑎᒍᑦ, ᖃᐅᔨᒻᒪᕇᕙᕗᑦ ᐊᑕᓂᐊᓘᑉ ᑭᒡᒐᕆᓚᖓᓕᕐᑕᖓ ᒥᐊᔨᐅᑎᓪᓗᒍ. ᐱᔪᕆᒪᐅᑎᒋᒻᒪᕆᑉᐸᕗᓪᓗ ᑎᒃᑯᐊᑕᐅᓂᖓ ᑲᓇᑕᒥ 30-ᐅᒍᑎᐅᓚᖓᓕᕐᑎᓗᒍ ᐊᑕᓂᐊᓗᒻᒧᑦ ᑭᒡᒐᐅᓗᓂ,” ᐅᖃᕐᑐᖅ ᐱᑕ. “ᑖᓐᓇ ᐱᕙᓪᓕᐊᓂᖅ ᑲᓇᑕᐅᑉ ᐃᓅᖃᑎᖃᕐᓂᖓᑕ ᐃᓄᑐᐃᓐᓇᓂᒃ, ᓄᓇᓕᑐᖃᕐᓂᒃ ᐊᒻᒪᓗ ᐊᓪᓚᖓᔪᓂᒃ ᐊᑦᔨᖃᕋᓂ ᐱᕙᓪᓕᐊᓂᐅᓯᕗᖅ. ᓄᓇᓕᑐᖃᕐᒥᒃ ᐊᑕᓂᐊᓗᒻᒧᑦ ᑭᒡᒐᑐᕐᑎᖃᓯᓂᖅ ᑐᓴᕐᓇᒪᑦ ᐊᖏᔪᒻᒪᕆᐅᑦᓱᓂ ᑐᓴᕐᑎᑕᐅᒍᑎᒥᒃ ᑲᓇᑕᓕᒫᒧᑦ, ᓯᓚᕐᔪᐊᓕᒫᒧᓪᓗ. ᑕᒪᓐᓇᓗ ᐱᓂᐊᕐᓂᖅ ᓇᓪᓕᐅᑎᓂᖃᕐᐳᖅ ᐱᒻᒪᕆᐅᑦᓱᓂ ᐱᕙᓪᓕᐊᓂᑦᑎᒍᑦ ᑲᑐᑦᔮᖃᖃᑎᒌᓐᓂᖃᓕᕐᑎᓗᑕ ᐱᓇᓱᒍᑎᖃᕐᓂᒥᒃ ᑐᕌᖓᔪᓂᒃ ᓭᒻᒪᖃᑎᒌᓐᓂᓴᓄᑦ.”

ᐊᑕᓂᐊᓗᒻᒧᑦ ᑭᒡᒐᕆᔭᐅᓚᖓᓕᕐᓗᓂ ᑎᒃᑯᐊᑕᐅᓂᕐᒥ ᓯᕗᓂᖓᓂ, ᒥᐊᔨ ᓭᒪᓐ ᐳᕐᑐᓂᕐᓴᐅᓱᓂ ᐊᖏᖃᑎᒌᒐᓱᑦᑎᐅᓚᐅᕐᖁᖅ ᓄᓇᕕᐅᑉ ᐱᓂᐊᕐᓂᓕᕆᒍᑎᑎᒍᑦ ᐱᓇᓱᒍᑎᖏᓐᓄᑦ ᐱᔭᖃᕋᓱᑦᓱᑎᒃ ᐃᒻᒥᒍᑦ-ᑐᑭᑖᕆᖃᑦᑕᕈᓐᓇᓂᑦᓴᒥᓐᓂᒃ ᐊᖏᖃᑎᒌᖃᑎᖃᕋᓱᑦᓱᑎᒃ ᑲᓇᑕᐅᑉ ᑲᕙᒪᖓᓂᒃ. ᒥᐊᔨ ᒪᑭᕝᕕᐅᑉ ᐊᖓᔪᕐᖄᕆᓚᐅᕐᓯᒪᒋᕚ, ᐊᖓᔪᕐᖄᖑᓯᒪᒻᒥᓱᓂᓗ ᐃᓄᑐᐃᓐᓀᑦ ᓄᓇᓕᕐᔪᐊᖃᑎᒌᑦᑐᑦ ᑲᑎᒪᕕᕐᔪᐊᖓᓐᓂ, ᐊᖓᔪᕐᖄᖑᓯᒪᒻᒥᓱᓂᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓂ. ᐱᓇᓱᑦᓯᒪᒻᒪᕆᒻᒥᔪᖅ ᓴᕐᕿᑎᑕᐅᓇᓱᑦᑎᓗᒍ ᐅᑭᐅᕐᑕᑐᒥᐅᑦ ᑲᑎᖕᖓᕕᕐᔪᐊᖓ ᐊᑑᑎᔭᐅᓂᖃᓚᐅᕐᓯᒪᑎᓪᓗᒍᓂᑦ ᐊᕐᕌᒍᑦ 25 ᐊᓂᒍᕐᓯᒪᓕᕐᑐᑦ. ᐊᑕᓂᐊᓗᒻᒧᑦ ᑭᒡᒐᐅᓛᓕᕐᓗᓂ ᑎᒃᑯᐊᑕᐅᔨᐊᕗᑦ ᑲᓇᑕᒥᐅᓄᑦ ᓯᕗᓪᓕᐹᖑᑦᓱᓂ ᑐᕐᖃᑕᕐᕕᒪᕆᐅᓯᒪᒋᕗᖅ ᐅᑭᐅᕐᑕᑐᒨᓕᖓᑦᓱᓂ, ᐊᒻᒪᓗ ᑲᓇᑕᒧᑦ ᑐᕐᖃᑕᕐᕕᒪᕆᖁᑎᒋᔭᐅᓯᒪᑦᓱᓂ ᑎᐊᓐᒫᒃ ᓄᓇᓕᕐᔪᐊᖓᓄᑦ. ᑕᓪᓕᒪᓂᒃ ᐱᔪᓐᓇᐅᑎᒻᒪᕆᓐᓂᒃ ᑐᓂᔭᐅᒍᑎᑖᕐᓯᒪᔪᖅ ᐃᓕᓐᓂᐊᕕᕐᔪᐊᓂᑦ, ᑲᓇᑕᐅᓪᓗ ᑲᕙᒪᖓᓄᑦ ᐃᓕᑕᕆᔭᐅᒍᑎᑖᕐᓯᒪᒻᒥᓱᓂ, ᑯᐯᒃᓗ ᓄᓇᓕᕐᓚᖓᓂ ᓇᓗᓀᕐᑕᐅᒍᑎᑖᕐᓯᒪᒻᒥᓱᓂ.

ᐊᑕᓂᐊᓗᒻᒧᑦ ᑭᒡᒐᐅᓗᓂ ᐱᓂᐊᕐᓂᖃᕐᕕᒦᓕᕈᓂ, ᓭᒪᓐ ᐊᒥᓱᑲᓪᓚᓂᒃ ᐱᔭᑦᓴᖁᑎᑖᓚᖓᕗᖅ. ᐊᑕᓂᐊᓘᒻᒥᒃ ᑭᒡᖓᑐᕐᓗᓂ ᑲᓇᑕᐅᑉ ᑲᕙᒪᖓᓂᒃ ᒪᑭᑕᑎᑦᓯᓂᖃᑦᓯᐊᓗᓂ, ᑲᓇᑕᐅᑉ ᐅᓇᑕᕐᑐᓴᖏᓐᓄᑦ ᐊᖓᔪᕐᖄᖑᓗᓂ, ᑲᓇᑕᒥᒃ ᑭᒡᒐᑐᕐᓗᓂ ᑲᓇᑕᒦᓪᓗᓂ ᓄᓇᓕᕐᔪᐊᓂᓗ ᐊᓯᖏᓐᓂ ᑭᒡᒐᑐᕐᓗᒍ ᐊᑕᓂᐊᓗᒃ, ᑲᔪᖏᕐᓭᒍᑎᖃᖃᑦᑕᓗᓂᓗ ᐱᑦᓯᐊᓂᑦᓴᒥᒃ ᐊᕐᖁᑎᒋᓗᒋᑦ ᑐᓂᕐᕈᓯᕐᑎᓯᒍᑎᐅᓲᑦ ᐱᔪᓐᓇᓂᖃᑦᓯᐊᑐᓄᑦ ᐊᒻᒪᓗ ᓇᓗᓀᕐᑕᐅᔪᑦᓴᖁᑕᐅᓕᕐᑐᓄᑦ, ᑕᒪᒃᑯᓄᖓ ᐃᓚᒋᔭᐅᒻᒥᑎᓪᓗᒍ ᐱᓇᓱᒍᑎᖃᕐᓂᖅ ᐊᑕᐅᓯᐅᖃᑎᒌᑦᓯᐊᑐᑦᓴᐅᓂᖏᓐᓂᒃ ᑲᓇᑕᒥᐅᑦ.

ᐊᑕᓂᐊᓘᑉ ᑭᒡᒐᕆᓚᖓᓕᕐᑕᖓᓂ ᐅᖃᒻᒪᕆᐅᑕᐅᒌᕈᓂ, ᑌᔭᐅᑦᔪᑎᖃᓯᓛᕐᑐᖅ ᐊᑕᓂᐊᓗᒻᒧᑦ ᑭᒡᒐᑐᕐᑎᒪᕆᐅᓂᕐᒥᒃ, ᑲᕙᒪᒃᑯᓂ ᐳᕐᑐᓂᕐᐸᐅᖃᑕᐅᔪᑎᑦ ᒥᐊᔨ ᓭᒪᓐᒥᒃ ᑌᔭᐅᒍᑎᖃᖃᑦᑕᓯᓗᓂ.