ᓄᓇᕕᒻᒥ ᖃᐅᔨᓴᕐᕕᒥ ᐊᐅᔭᐅᑎᓪᓗᒍ ᐃᓕᓵᒍᑦᓱᓂ ᐱᓇᓱᑦᑎᐅᖃᑕᐅᑦᓱᓂ ᑲᔅᑏᓇ ᐅᖂᑕᖅ ᓛᒃ ᐱᓕᐅᑎᖃᑎᖃᓚᐅᔪᕗᖅ ᐃᓕᓐᓂᐊᕕᕐᔪᐊᒥ ᐃᓕᓵᓂᒃ ᑎᓯᒻᐸᐅᑎᓪᓗᒍ ᓵᓚᖃᕐᓱᓂ, ᓯᕗᓪᓕᐹᑦᓯᐊᒥᒃ ᐃᓄᐃᑦ ᐊᑭᓐᓇᒥᐅᑕᓕᐅᓕᐅᑦᔨᓂᕐᒧᑦ ᐅᐱᒍᓲᓯᕐᑕᐅᒍᑎᒋᒋᐅᕐᑕᖓᓂᒃ ᓯᓚᕐᔪᐊᓕᒫᒥᑦ ᐱᓯᒪᔪᑦ ᐊᕐᕌᒍᑕᒫᕐᓯᐅᑎᒥᒃ ᖃᐅᔨᓴᕐᑏᑦ ᑲᑎᒪᓂᖃᕐᑎᓗᒋᑦ ᑐᕌᓐᑐᒥ. 450ᒍᓚᐅᔪᕗᑦ ᐱᓕᐅᑎᒍᑎᐅᔪᑦ ᐊᑭᓐᓇᒥᐅᑕᑦᓭᑦ ᖃᐅᔨᓴᕐᓂᒨᓕᖓᔪᑦ.
16ᓂᒃ ᐅᑭᐅᖃᓕᕐᓱᓂ ᐳᕐᑐᓂᓕᒻᒥᒃ 10ᒥᒃ ᐃᓕᓴᕐᑐᖅ ᑰᑦᔪᐊᒥ, ᑲᔅᑏᓇ ᓄᓇᕕᒻᒥ ᖃᐅᔨᓴᕐᕕᒥ ᐊᐅᔭᐅᓂᖓᓂ ᐱᓇᓱᐊᓲᒍᓕᕐᑐᖅ ᐊᕐᕌᒎᓐᓂ ᒪᕐᕉᓂ. 2022ᒥ ᒪᕐᕋᓕᒃᐅᖑᓐᓂᐊᕕᓕᐊᖃᑕᐅᓚᐅᔫᖅ, ᐱᒋᐊᕐᑎᑕᐅᓯᒪᔪᒧᑦ ᓄᓇᕕᒻᒥ ᒪᙯᑦᑏᑦ, ᐃᖃᓪᓕᐊᑏᑦ ᒥᑭᒋᐊᕐᓂᐊᑏᓪᓗ ᖃᑐᑦᔨᖃᑎᒌᓐᓂᖓᓄᑦ. ᐃᓕᑦᓯᓯᒪᔭᒥᓂᒃ ᐊᑭᓐᓇᒥᐅᑕᓕᐅᕈᑎᖃᓕᓚᐅᔪᕗᖅ ᓵᓚᖃᓚᕿᑦᓱᓂ ᐱᓇᓱᖃᑎᖃᕐᓱᓂ ᔩᒥᓯ ᒣᒥᒃ Mikhaela Neelinᒥᓪᓗ.
ᒪᙯᕝᕕᒃ, ᐊᑭᓐᓇᒥᐅᑕᐅᑉ ᐅᓂᒃᑳᑐᐊᕐᑕᖏᑦ ᑕᑯᑦᓱᒋᑦ, ᕿᓚᓗᒐᓂᐊᕕᑐᖃᐅᓯᒪᕗᖅ ᐊᕐᕌᒍᐃᑦ 40 ᐅᖓᑖᓅᕐᑐᓂ ᐊᕐᕌᒍᓂ ᐅᒃᑯᐊᑕᐅᓚᐅᕐᓯᒪᔪᖅ ᑲᓇᑕᒥᐅᑦ ᐃᒪᕐᐱᓕᕆᔨᖏᓐᓄᑦ. ᐊᐅᓚᑦᓯᔩᑦ ᐅᑉᐱᕆᔭᖃᕐᓯᒪᔪᑦ ᕿᓚᓗᒉᑦ ᑌᑲᓃᓲᒍᓯᒪᔪᑦ ᐊᑦᔨᒋᔭᐅᓲᒍᖕᖏᑐᕕᓂᐅᒋᐊᖏᓐᓂᒃ ᐊᑦᑕᓇᕐᑐ ᒦᓐᓂᕋᕐᓱᒋᓪᓗ, ᑭᓯᐊᓂ ᐊᒥᓱᑦ ᐃᓄᐃᑦ ᑖᒃᑯᓂᖓ ᑭᓚᓗᒐᕐᓂᒃ ᑕᒫᓂᒥ ᐅᑦᓴᔭᐅᖕᖏᓂᕃᓯᒪᒻᒥᔪᑦ ᐊᖑᓇᓱᑦᑕᐅᖃᑦᑕᖏᑦᑑᓂᖏᓐᓄᓗ ᓱᕐᕋᑕᐅᓯ ᒪᓂᕋᕐᓱᒋᑦ ᐃᓄᐃᑦ ᒪᑭᑕᑦᓯᐊᕆᐊᖃᕐᓂᒥᒍᑦ. ᖃᐅᔨᓴᕐᑐᖃᕐᓯᒪᔪᖅ, ᐱᓇᓱᐊᕐᑕᐅᓂᖓᓗ ᑐᑭᓯᑎᑦᓯᒋᐊᕈᑕᐅᓯᒪᔪᖅ ᐱᓪᓚᕆᐅᒋᐊᖓᓂᒃ ᐃᓄᐃᑦ ᐃᑉᐱᒍᓱᑦᑎᐅᒋᐊᖃᕐᓂᖏᓐᓂᒃ ᐆᒪᔪᕐᓂᐊᓲᒥᓂᒃ ᐊᕙᑎᒥᓂᓪᓗ ᑲᑎᕐᓱᐃᒍᓐᓇᓯᓗᑎᒃ ᑭᑎᑦᔪᑎᓂᒃ ᓂᐸᖃᕈᑎᑦᓴᕆᓗᒋᑦ ᐊᓯᑦᔨᑕᐅᖁᔨᓂᕐᒥᒃ.
ᑲᔅᑏᓇ ᐊᐅᔭᒃᑯᑦ ᐱᓇᓱᐊᕐᑕᐅᓲᒥᒃ ᐅᓇᒻᒥᓱᓯᔪᕕᓂᖅ ᐊᑖᑕᒥᓄᑦ ᑐᓴᕐᑎᑕᕕᓂᐅᑦᓱᓂ ᐊᓕᐊᒋᔭᖃᕐᓱᓂᓗ ᕿᓚᓗᒉᑦ ᖃᐅᔨᓴᕐᑕᐅᖃᑦᑕᓂᖏᓐᓂᒃ ᓄᓇᕕᒻᒥ ᖃᐅᔨᓴᕐᕕᒥ. ᐅᐱᒍᓱᓪᓚᕆᑦᑐᕕᓂᖅ ᙯᕐᖁᔭᐅᓐᓂᕋᒥ ᖃᐅᔨᓴᕐᓂᓕᕆᔨᓄᑦ ArcticNet ᐊᓕᐊᒋᐊᓪᓚᓱᓂᓗ ᐊᑭᓐᓇᒥᐅᑕᓕᐊᕕᓂᕐᒥᓂᒃ ᓵᓚᖃᐅᑎᑖᕈᑎᖃᕐᓂᕋᒥ.
“ᖃᐅᔨᓴᕐᓂᓕᕆᔨᓄᑦ ArcticNet ᐃᓚᐅᒋᐊᒥᒃ ᐊᓕᐊᓇᕐᑐᒪᕆᐅᓚᐅᔪᕗᖅ,” ᐅᖃᕐᑐᖅ ᑲᔅᑏᓇ, “ᐅᑉᐱᓚᐅᔪᖕᖕᒋᓚᖓᓘᓐᓃᑦ ᓵᓚᖃᕐᓂᕋᕐᑕᐅᒐᒪ ! ᐅᐱᓐᓇᑐᒻᒪᕆᐅᓚᐅᔪᕗᖅ ᓂᕈᒥᑦᑐᐊᐱᒻᒥᐊᓛᑦ ᐆᒻᒪᑎᒃᑯᑦ ᐃᑉᐱᒍᓱᓚᐅᔪᕗᖓ. ᐅᐱᒍᓱᓪᓚᕆᓚᐅᔪᕗᖓ.”
ᓄᓇᕕᒻᒥ ᖃᐅᔨᓴᕐᕕᒥ ᐱᓇᓱᑦᑎ Géraldine Gouin ᑲᔅᑏᓇᒥᒃ ᑐᓂᒪᑦᓯᐊᓲᒍᓂᕃᕗᖅ, ᐱᒐᓱᐊᒻᒪᕆᓲᒍᓂᕋᕐᓱᒍᓗ, ᐃᒻᒥᓂᕐᓱᓯᐊᕈᓐᓇᓲᒍᓂᕋᕐᓱᒍᓗ ᐃᓕᓵᒍᑦᓱᓂ. “ᓂᕆᐅᒋᔭᕐᒪ ᐅᖓᑖᓗᐊᓄᑦ ᐱᓇᓱᐊᖃᑦᑕᓚᐅᔫᖅ. ᐱᔭᑦᓴᑖᕐᑎᑐᐊᕋᒃᑯ ᐱᔭᕇᑦᓴᐅᑎᒋᖃᑦᑕᓚᐅᔫᖅ ᐱᑦᓯᐊᓲᒍᑦᓱᓂᓗ ᐱᓇᓱᐊᕐᑕᒥᓂᒃ, ᐃᓕᓵᑦᓯᐊᓚᕆᒃ. ᐅᐱᓐᓇᖁᑦᓯᒪᓚᐅᔪᕗᒍᑦ ᓄᓇᕕᒻᒥ ᖃᐅᔨᓴᕐᕕᒥ ᐱᓇᓱᖃᑎᒋᓚᐅᔪᒐᑦᑎᒍ ᐅᐱᒍᓲᓯᕐᑕᐅᒍᑎᖓ ᖃᐅᔨᓴᕐᓂᓕᕆᔨᓂᑦ Arcticnet 2022ᒥ ᑕᒐ ᓱᕐᖁᐃᓇᕈᑎᐅᓕᕐᖁᖅ ᑕᒪᑐᒥᖓ,” ᐅᖃᕐᑐᖅ Géraldine. “ᐳᕐᑐᓂᕐᓴᒥᒃ ᐃᓕᓵᒍᑦᓱᓂ, ᐱᓕᐅᑎᖃᑎᖃᕈᓐᓇᓯᒪᔪᖅ ᐃᓕᓐᓂᐊᕕᕐᔪᐊᒥ ᐃᓕᓵᓂᒃ. ᐱᓯᑎᓪᓚᕆᐊᓗᒃ !”
ᑲᔅᑏᓇ ᑖᓚᑐᐃᓐᓇᓂᒃ ᐅᐱᒍᓲᓯᕐᑕᐅᓂᕐᖁᖅ ᑲᑎᕐᓱᐊᒥᓅᕋᑦᓴᒥᓂᒃ ᐃᓕᓴᕆ ᐊᓪᓚᕆᐊᖃᓕᕈᓂ ᐅᓗᑦᓯᒍᑎᑦᓴᕆᓗᒋᓪᓗ. ᑲᔪᓯᓛᕐᓂᕋᕐᑐᖅ ᖃᐅᔨᓴᕐᑎᐅᒍᓐᓇᓂᒃᒥᒃ ᓇᓪᓕᐊᒍᑦ ᐃᓕᓐᓂᐊᕕᕐᔪᐊᒥ ᑭᓯᐊᓂ ᖃᐅᔨᒪᓪᓚᕆᕋᑕᖕᖏᑐᖅ ᓱᓛᕐᒪᖔᕐᒥ.
