Fall

ᒪᑭᕝᕕᒧᑦ ᐳᕐᑐᓂᕐᓴᐅᖃᑎᐅᓯᒪᔪᖅ ᓄᓇᕕᒻᒥᓗ ᓯᕗᓕᕐᑎᐅᓱᓂ ᑖᓂᐊᓪᓕ ᐃᐳ ᐃᓅᒍᓐᓀᓚᐅᔪᖅ ᓯᑉᑎᒻᐱᕆᐅᑎᓪᓗᒍ. ᐅᑭᐅᖃᕐᓱᓂ 58-ᓂᑦ.

ᑖᓂᐊᓪᓕ ᐊᓪᓚᑎᒻᒪᕆᐅᓯᒪᔪᖅ ᒪᑭᕝᕕᒧᑦ 1980 ᐊᒻᒪᓗ 1990 ᐊᕐᕌᒍᖏᓐᓂᑦ, ᐱᖓᓱᕕᑦᓱᓂ ᓂᕈᐊᕐᑕᐅᖃᑦᓴᓱᓂ ᑲᔪᓯᔪᒥᒃ ᑲᑎᑦᓱᑎᒃ ᐊᕐᕌᒍᐃᑦ 9. ᓂᕈᐊᕐᑕᐅᒪᑦᓱᓂ ᐃᓂᒥᓄᑦ ᒪᑭᕝᕕᐅᑉ ᓂᕈᐊᕐᓂᒪᕆᒋᓲᖓᓂᑦ ᐊᓯᑦᔩᓯᒪᔪᖅ, ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐃᓚᐅᔫᒍᑎᓕᓕᒫᑦ ᓂᕈᐊᕈᓐᓇᓯᑎᑦᓱᒋᑦ ᒪᑭᕝᕕᐅᑉ ᐳᕐᑐᓂᕐᓴᖏᓐᓂᑦ. ᑲᒪᒋᔭᑦᓴᔭᖃᕐᓯᒪᒻᒥᔪᖅ ᑐᓴᐅᒪᖃᑎᒌᑦᑎᓯᓂᕐᒥᒃ, ᐃᓚᒋᔭᐅᑎᓪᓗᒍ ᒪᑭᕝᕕᐅᑉ ᕿᒥᕐᕈᐊᖓ, ᒪᑭᕝᕕᐅᑉ ᐊᓪᓚᕕᖏᓐᓂᑦ ᐊᐅᓚᑦᓯᓂᕐᒥᒃ ᐊᓯᖏᓐᓂᓗ ᐃᓪᓗᔪᐊᓂᑦ, ᐊᒻᒪᓗ ᐊᕐᕌᒍᑕᒫᕐᓯᐅᑎᐅᑉ ᑲᑎᒪᓂᒻᒪᕆᖏᑦᑕ ᐃᖏᕐᕋᑎᑕᐅᑦᓯᐊᓂᖏᓐᓂᑦ. ᑖᓂᐊᓪᓕ ᑲᑎᒪᒋᐊᖃᑎᐅᓯᒪᒻᒥᔪᖅ ᐱᖓᓲᔪᕐᑑᒍᑎᖓᓄᑦ ᓄᓇᕐᔪᐊᒥᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᔨᖏᑦᑕ ᑲᑎᒪᓂᒻᒪ ᕆᖓᓂᑦ 1992­ᖑᑎᓪᓗᒍ ᐃᓅᕕᒻᒥᑦ, ᓄᓇᑦᓯᐊᒥᑦ. ᒪᑭᕝᕕᐅᑉ ᕿᒥᕐᕈᐊᖓᓃᑦᑐᓴᒧᑦ ᐊᐱᕐᓱᑕᐅᑦᓱᓂ ᐅᑭᐊᑦᓴᖓᓂᑦ 1992­ᖑᑎᓪᓗᒍ, ᑖᓂᐊᓪᓕ ᐅᖃᐅᓯᖃᕐᒥᔪᖅ ᑲᑎᒪᓂᒻᒪᕆᒻᒥᑦ ᓱᓇᓗᐊᖕᖑᐊᑦ ᓄᐃᑕᓪᓗᕆᓚ ᐅᕐᓂᖏᓐᓄᑦ ᑌᒃᑯᐊᒎᖅ ᐅᔮᓯᐊᒥᐅᑦ ᐃᓄᑐᐃᓐᓇᖁᑎᖏᑦ ᓯᕗᓪᓕᐹᑦᓯᐊᒥᑦ ᑲᑎᒪᓂᒻᒪᕆᒻᒧᑦ ᐁᓯᒪᒋᐅᓚᐅᕐᓂᖏᓐᓂᑦ. “ᒫᓐᓇᑯᑦ ᓱᓇᒥᑦᑑᓕᕐᖁᑦ ᐃᓄᑐᐃᓐᓀᑦ ᐅᑭᐅᕐᑕᑐᒥ ᐅᖑᖃᑎᒌᓕᒫᑦ,” ᐅᖃᓚᐅᕐᑐᕕᓂᖅ. “ᐱᐅᔫᕗᖅ ᐃᓚᒋᓕᕋᑦᑎᒍ ᑖᒃᑯᓂᖓᑦᓭᓇᖅ ᐱᓀᓗᑕᓕᐅᓐᓇᐅᒐᑦᑕ ᑖᒃᑯᓂᖓᑦᓭᓇᕐᓗ ᑐᕌᕐᓂᖃᕈᓚᑦᓱᑕ.” ᓄᓇᕕᒻᒥᐅᑦ ᐃᓄᖁᑎᖏᓐᓂᑦ ᑭᒡᒐᑐᖏᓐᓇᖃᑦᑕᓚᐅᕐᑐᖅ ᒪᑭᕝᕕᒧᑦ ᓂᕈᐊᕐᑕᐅᒪᕈᓐᓀᕋᓗᐊᕐᓱᓂ ᐊᓪᓚᑎᒻᒪᕆᐅᓂᕐᒥᕐᒥᒃ. ᐃᓄᒻᒪᕇᑦ ᐃᓕᓐᓂᐊᓂᕐᒥᒃ ᑲᔪᓯᒋ ᐊᖃᕐᓂᖏᓐᓂᑦ ᐊᔪᐃᓐᓇᕈᑎᖃᕐᓱᓂ, ᑖᓂᐊᓪᓕ ᑐᑭᒧᐊᑦᑎᓯᔨᐅᓯᒪᔪᖅ ᐱᒋᐅᕐᓴᕕᒻᒥᑦ ᐃᓄᒃᔪᐊᓂᑦ 1998­ᒥᑦ 1999­ᒧᑦ.

ᑲᑎᕕᒃ ᐃᓕᓴᕐᓂᓕᕆᓂᖅ ᐃᓄᒻᒪᕇᓪᓗ ᐃᓕᓐᓂᐊᕕᖓᑕ ᐱᒍᑦᔨᕕᖓ ᐊᓪᓚᓚᐅᕐᑐᑦ ᐱᓇᓱᑦᑎᐅᓂᕐᒥᓂᑦ ᑲᑎᕕᒃ ᐃᓕᓴᕐᓂᓕᕆᕕᒻᒧᑦ, ᐱᒐᓱᐊᕐᓂᖃᒻᒪᕆᖃᑦᑕᓯᒪᓂᖓᓂᑦ ᐱᒋᐅᕐᓴᕕᒻᒥᑦ ᐊᒥᓱᓂᓪᓗ ᐃᓕᓐᓂᐊᑎᓂᑦ ᐱᔭᕇᒍᓯᕐᑐᓂᑦ ᑕᑯᓐᓇᖃᑎᐅᓯᒪᑦᓱᓂ. ᐱᓇᓱᒐᕐᒥᓃᒍᓐᓀᕋᓗᐊᕋᒥ ᑖᓂᐊᓪᓕ ᐅᑉᐱᕆᔭᖃᒻᒪᕆᓚᐅᕐᑐᖅ ᐃᓄᒻᒪᕇᑦ ᐃᓕᓐᓂᐊᓂᕐᒥᒃ ᑲᔪᓯᒋᐊᖃᕐᓂᖏᓐᓂᑦ.

1999­ᖑᑎᓪᓗᒍ, ᑖᓂᐊᓪᓕ ᓯᕗᓪᓕᐸᐅᑦᓱᓂ ᓂᕈᐊᕐᑕᐅᓯᒪᔪᖅ ᐊᖓᔪᕐᖄᖑᓂᕐᒧᑦ ᓄᓇᕕᒻᒥ ᐅᔭᕋᑦᓴᔭᕐᓂᒃ ᕿᓂᕐᓂᒧᑦ ᑎᒥᖁᑎᖓᓂᑦ, ᓂᕈᐊᕐᑕᐅᒪᑦᓱᓂ 2009 ᑎᑭᑦᓱᒍ.

ᒫᓐᓇᑯᑦ ᑐᑭᒧᐊᑦᑎᓯᔨᖓ ᓄᓇᕕᒻᒥ ᐅᔭᕋᑦᓴᔭᕐᓂᒃ ᕿᓂᕐᓂᒧᑦ ᑎᒥᖁᑎᖓᓂᑦ, ᔮᓐ­ᒫᒃ ᓯᑭᓐ, ᐅᖃᕐᓯᒪᔪᖅ ᑖᓂᐊᓪᓕ ᐱᒍᓐᓇᓯᔭᐅᑎᑦᓯᖃᑦᑕᓯᒪᓂᖓᓂᑦ ᑮᓇᐅᔭᖃᕐᑎᑕᐅᓂᕐᒧᑦ ᐊᖏᖃᑎᒌᒍᑎᓂᑦ ᑯᐯᒃ ᑲᕙᒪᖓᓂᑦ ᐱᔪᓂᑦ ᑎᓕᔭᐅᒪᓂᕐᒥᓃᑦᓱᓂ. ᑖᓂᐊᓪᓕ ᐃᓚᐅᕕᖃᖃᑦᑕᓯᒪᔪᖅ ᐅᔭᕋᓐᓂᐊᓂᕐᒧᑦ ᑲᑎᒪᓂᕐᓂᑦ ᑲᑎᒪᓂᒻᒪᕆᓐᓂᓗ (ᓄᓇᕕᒻᒥ, ᑯᐯᒻᒥ ᑲᓇᑕᒥᓪᓗ), ᐊᔪᐃᓐᓇᕈᑎᖃᕐᓱᓂ ᓄᓇᕕᒻᒥ ᐅᔭᕋᓐᓂᐊᓃᑦ ᐱᕙᓪᓕᐊᒍᓐᓇᓂᖏᓐᓄᑦ ᐃᓄᑐᐃᓐᓀᓗ ᐃᓚᐅᕕᖃᖃᑦᑕᕆᐊᖃᕐᓂᖏᓐᓄᑦ ᐅᔭᕋᓐᓂᐊᓃᑦ ᐱᕙᓪᓕᐊᑎᓪᓗᒋᑦ.

ᑖᓂᐊᓪᓕ ᑲᒪᔨᒻᒪᕆᐅᓚᐅᔪᒻᒥᔪᖅ ᓇᔪᒻᒥᕕᒃ ᓄᓇᒥ ᑎᒍᒥᐊᕐᑎᑯᑦ ᑎᒥᖁᑎᖓᓂᑦ ᑰᑦᔪᐊᒥᑦ ᐊᕐᕌᒍᓄᑦ ᑕᓪᓕᒣᑦ ᕿᑎᕐᖃᓗ, ᓯᑉᑎᒻᐱᕆ 2013­ᒥᑦ ᒫᑦᔨ 2019­ᒧᑦ.

ᓄᓇᕕᒻᒥ ᑕᕆᐅᕐᒥᐅᑕᓕᕆᔨᓄᑦ ᑎᒃᑯᐊᑕᐅᓚᐅᔪᖅ ᐊᖓᔪᕐᖄᑉ ᐃᓂᖓᓄᑦ ᑭᓯᐊᓂ ᓄᕐᖃᓴᐅᑎᒋᒋᐊᖃᓚᐅᔪᖅ.

ᑖᓂᐊᓪᓕ ᐋᓐᓂᐊᑖᕐᓯᒪᓚᐅᔪᖅ Amyothrophic Lateral Sclerosis (ALS)­ᒥᑦ (ᑎᒥᐅᑉ ᐊᐅᓚᒍᓐᓇᓂᖓᓂᑦ ᓴᖕᖐᓕᓭᓲᑦᓴᔭᒥᑦ) 2018­ᖑᑎᓪᓗᒍ ᐊᓂᕐᓂᖏᕐᓱᓂᓗ ᓯᑉᑎᒻᐱᕆ 7­ᖑᑎᓪᓗᒍ ᒪᓐᑐᔨᐊᒥ ᐋᓐᓂᐊᕕᒻᒥᑦ. ᑎᒥᖓ ᑕᑯᑦᓴᐅᑎᑕᐅᓚᐅᔪᖅ ᒪᓐᑐᔨᐊᒥᑦ ᓯᑉᑎᒻᐱᕆ 14­ᖑᑎᓪᓗᒍ, ᐃᓗᕕᕐᑕᐅᓱᓂᓗ ᐃᓄᒃᔪᐊᒥᑦ ᓯᑉᑎᒻᐱᕆ 16­ᖑᑎᓪᓗᒍ.