2024

ᒪᑭᕝᕕᐅᑉ ᐱᐅᓕᐊᕐᓯᕕᖓ ᐃᓂᓪᓚᑕᐅᓇᓱᑉᐳᖅ ᐃᑦᓯᕖᑦ ᐊᑕᐅᓯᐅᓈᕐᑎᔪᑦ ᐋᕐᕿᓱᐃᒍᑎᐅᑎᓪᓗᒋᑦ

ᐃᑦᓯᕖᑦ ᐊᑭᓐᓇᐅᑉ ᑭᓪᓕᐊᓃᑉᐳᑦ ᓯᐊᔭ ᓈᓐᑎᐋᓪ ᓵᖓᑕ ᓴᓂᐊᓃᑦᓱᑎᒃ ᒪᑭᕝᕕᐅᑉ ᐊᒃᓚᕕᖓᓂ ᒪᓐᑐᔨᐊᒦᑦᑐᒥ. ᓱᓪᓕᑕᐅᒻᒪᓕᐊᓪᓛᑦ ᐃᑦᓯᕖᑦ ᓇᑎᕐᒦᑐᑦ, ᐱᐅᓕᐊᕐᑕᐅᔪᑦᓴᐅᒪᖔᑕ ᐅᑕᕐᕿᒍᑎᐅᑦᓱᑎᒃ ᓯᖃᓕᐊᓕᐅᕈᑎᒧᑦ ᐊᓯᕈᕐᑕᐅᖏᓐᓂᖏᓐᓂ, ᐊᑭᓐᓇᐅᑉ ᑭᓪᓕᐊᓃᒻᒥᔪᑦ ᓯᑯᑦᓴᔦᑦ ᐱᐅᓕᐊᕋᑦᓴ-ᐅᓂᕋᕐᑕᐅᒪᔪᑦ. ᓯᐊᔭ ᖃᐅᔨᒪᔨᒋᔭᐅᒻᒪᑦ ᓯᕗᓕᕐᓱᓂᓗ ᒪᑭᕝᕕᐅᑉ ᐱᐅᓕᐊᕐᓯᓂᕐᒥᒃ ᐱᓇᓱᑦᑕᖏᓐᓂᒃ.

“ᓱᓇᓕᒫᖃᕐᐳᒍᑦ,” ᐅᖃᕐᑐᖅ ᓯᐊᔭ ᓂᑦᔮᒍᑎᖃᕐᓱᓂ ᒪᑭᕝᕕᐅᑉ ᐊᕐᕌᒍᕐᓂ 40-ᓂ ᓄᐊᓯᒪᔭᖏᓐᓂᒃ ᐃᓕᖓᑦᓱᑎᒃ ᐱᕙᓪᓕᐊᓯᒪᓂᕐᒥᓄᑦ. ᐊᒃᓚᖁᑏᑦ ᓇᒃᓕᖏᓪᓗᓃᑦ ᐊᓯᕈᕐᑕᐅᓂᖃᓱᖑᖕᖏᓚᑦ ᐅᕝᕙᓗᓐᓃᑦ ᐃᒋᑕᐅᑦᓱᑎᒃ ᐃᓗᓕᖏ ᑐᑭᓯᓂᐊᕐᑕᐅᓯᐊᕇᓚᐅᖕᖏᓂᖏᓐᓂ, ᖃᕆᑕᐅᔭᒧᔮᕐᑕᐅᓚᐅᖕᖏᓂᖏᓐᓂᓗ ᐊᒻᒪᓗ ᐊᒃᓚᓯᒪᔪᖁᑎᑖᖑᓚᐅᖕᖏᓂᖏᓐᓂ. “ᐱᑕᖃᕐᑐᒍᑦ ᐊᒃᓚᐅᑎᒧᑦ ᓴᓇᖕᖑᐊᓯᒪᔪᓂᒃ, ᐊᑦᔨᖑᐊᖁᑎᖃᕐᓱᑕᓗ, ᐊᒃᓚᓯᒪᔪᓂᒃᓗ ᐊᒃᓚᖁᑎᖃᕐᓱᑕ, ᐱᑕᖃᕐᒥᓱᑕᓗ ᖃᕆᑕᐅᔭᑎᒍᑦ ᓂᐱᓕᐊᖑᓯᒪᔪᓂᒃ, ᐱᑕᖃᕐᐳᒍᑦ ᐃᓘᓐᓇᓕᒫᒐᓚᑦᓯᐊᖏᓐᓂᒃ ᖃᓪᓗᓈᕐᑕᔭᓅᔭᕐᓯᒪᔪᒐᓴᓐᓂᒃ.”

ᐊᖏᔪᑲᓪᓚᒪᕆᐊᓗᒻᒥᒃ ᐱᓇᓱᐊᕐᑐᒍᑦ ᓇᓗᓀᔦᑦᓱᑕ, ᐊᒃᓚᖁᑎᓕᐅᕈᑎᒋᑦᓱᒋᓪᓗ ᐊᒻᒪᓗ ᓱᒃᑯᓯᓐᓇᐅᖏᑦᑐᓕᐊᕆᑦᓱᒋᑦ ᒪᑭᕝᕕᐅᑉ ᐱᕙᓪᓕᐊᓯᒪᓂᕐᒥᓄᑦ ᐱᐅᓕᐊᕐᓯᒍᑎᖏᑦ, ᐃᓚᐅᑎᓪᓗᒋᑦ ᐱᓇᓱᒉᑦ ᓄᓇᓂ ᑖᒃᑯᓇᓂᑦᓭᓈᖕᖏᑐᑦ, ᒪᑭᕝᕕᒃ ᐊᒃᓚᕕᖃᕐᒪᑦ ᑰᒃᔪᐊᒥᑐᐃᓐᓇᐅᖏᑦᑐᖅ ᒪᓐᑐᔨᐊᒥᑐᐃᓐᓇᐅᖏᑦᑐᓗ, ᐊᒃᓚᕕᖃᕐᒥᒐᒥ ᑯᐯᒃ ᓯᑎᒥ, ᐊᒻᒪᓗ ᐊᒃᓚᕕᖃᖃᑦᑕᓯᒪᒻᒥᓱᓂ ᐋᑐᒑᒥ. ᓯᐊᔭ ᐃᓚᐅᓯᕋᑕᖑᑎᓪᓗᒍ ᐁᑉᐸᖃᕐᓱᓂ ᐃᑲᔪᕐᑎᒥᓂᒃ ᐊᕐᕌᒍᖅ 2019-ᒥ, ᓯᐊᔭ ᑕᒫᓂ ᐃᓚᐅᓯᑎᓪᓗᒍ ᐃᑦᓯᕖᑦ ᐃᑭᓐᓂᓴᐅᒫᐱᑐᐃᓐᓇᑐᑦ 2,000-ᓂᑦ ᐱᐅᓕᐊᕐᑕᐅᓯᒪᓚᐅᔪᕗᑦ ᒪᑭᕝᕕᐅᑉ ᐊᒃᓚᕕᖓᑕ ᐊᓯᐊᓂ. ᑌᑯᖓ ᐱᐅᓕᐊᕐᓯᕕᖃᐅᑎᒧᑦ ᓄᐊᑕᐅᑐᐃᓐᓇᑐᕕᓂᐅᑦᓱᑎᒃ ᐊᕐᕌᒍᑦ ᐅᓄᕐᑐᑦ ᐊᓂᒍᐊᑎᓪᓗᒋᑦ, ᐱᐅᓕᐊᕐᓯᒍᓯᕐᓂᒃ ᐊᑐᕈᑎᐅᓯᒪᒐᑎᒃ ᐅᕝᕙᓗᓪᓃᑦ ᐊᒃᓚᖁᑎᑎᒍᑦ ᑲᒪᒋᔭᐅᓂᕐᒥᒃ ᐱᓇᓱᒍᑕᐅᓂᖃᕋᑎᒃ ᓯᐊᔭᐅᑉ ᐱᓇᓱᑦᑕᖃᓚᖓᓯᓂᖓ ᑎᑭᑦᓱᒍ. ᑕᒐᑕᒐ ᒫᓐᓇᐅᑎᓪᓗᒍ ᒪᓐᑐᔨᐊᒦᑦᑐᑦ ᐊᒥᓲᓂᕐᓴᒪᕆᐅᔪᑦ ᑰᒃᔪᐊᒦᑦᑐᑦ ᓴᓂᐊᓐᓂ, ᑕᒪᓐᓇ ᓈᒻᒪᓯᐊᑐᐃᓐᓇᑐᖅ ᐱᐅᓕᐊᕐᓯᒍᓰᑦ ᒪᓐᑐᔨᐊᒦᑦᑐᑦ ᐱᐅᓂᕐᓴᒪᕆᐊᓘᒻᒪᑕ.

ᑌᒪᓕ ᑕᒪᒃᑯᐊ ᐱᐅᓕᐊᕐᑕᐅᔪᑦ ᓯᑯᑦᓴᔭᕙᓪᓗᑐᐃᓐᓇᐅᑎᓪᓗᒋᑦ ᓲᕐᓗ ᓴᓇᖕᖑᐊᓯᒪᔪᓂᒃ ᐱᑕᖃᕋᑎᒃ, ᐃᓘᓐᓇᒐᓚᑎᒃ ᒪᑭᕝᕕᐅᑉ ᐱᓪᓚᕆᒋᕙᖏᑦ: ᐊᑎᓕᐅᖃᑎᒌᒍᑎᐅᓯᒪᔪᑦ ᐊᖏᖃᑎᒌᒍᑏᑦ, ᐱᖁᔭᑎᒎᕐᓂᓖᑦ, ᐊᒻᒪᓗ ᖃᐅᔨᓴᕐᓂᓂᑦ ᐊᒃᓚᓯᒪᔪᖕᖑᐃᒍᑎᐅᓯᒪᔪᑦ, ᑕᒪᒃᑯᑑᒐᑎᒃᓗ.

“ᐱᕙᓪᓕᐊᓯᒪᓂᐅᔪᑦ ᐊᒃᓚᑕᐅᓯᒪᒍᑎᖏᑦ. ᓄᓇᓕᓐᓄᑦ ᐃᓪᓕᓇᕐᑐᑦ, ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᖑᓯᔪᑦ ᐱᕙᓪᓕᓯᒪᓂᖏᓐᓂᒃ ᐅᓂᒃᑲᐅᓯᐅᔪᑦ ᐅᑯᐊᓗ , ᓄᓇᕕᖕᒥᐅᑦ ᓄᓇᑖᕐᓂᓄᑦ ᐊᖏᖃᑎᒌᒎᑎᖏᑦ, ᐃᓄᐃᑦ ᑲᑐᑦᔨᖃᑎᒌᓐᓂᖓᑦ ᑯᐯᒃ ᑕᕐᕋᖓᓂ, ᑖᒃᑯᓄᖕᖓᓕᖓᔪᑦ ᐃᓘᓐᓇᑎᒃ, ᐱᕕᑦᓴᖃᕐᕕᐅᓯᒪᓂᖏᑦ, ᖃᐅᔨᓴᕐᓂᓅᓕᖓᔪᓂᒃ ᐱᕕᑦᓴᖃᕐᕕᒃ, ᑭᓯᐊᓂᓗᑦᑕᐅᖅ ᐃᓚᒌᓄᓕᖓᔪᑦ, ᓄᓇᕐᖃᑎᒌᓄᓪᓗ, ᐃᒻᒥᓄᓕᖓᔪᒐᓴᓐᓂᒃ ᐱᑦᔪᑎᓖᑦ,” ᐅᖃᕐᑐᖅ ᓯᐊᔭ. “ᖃᐅᔨᓴᕐᕕᐅᑉ ᑐᑭᓯᓂᐊᕈᑎᒋᓯᒪᔭᖏᑦ ᐊᑐᕐᑕᐅᕙᑦᑐᑦ ᐃᓕᓐᓂᐊᕕᕐᔪᐊᓂ ᐃᓕᓐᓂᐊᑎᓄᑦ, ᐊᕗᖓᐅᓖᒋᐊᕆᒍᑎᐅᑦᓱᑎᒃ ᖃᐅᔨᓴᕐᓂᓂᒃ, ᐊᕗᖓᐅᓖᒋᐊᕆᒍᑎᐅᑦᓱᑎᒃ ᖃᐅᔨᒪᔭᐅᔪᓂᒃ, ᐊᕗᖓᐅᓖᒋᐊᕆᒍᑎᐅᑦᓱᑎᒃ ᐅᖄᔭᐅᕙᑦᑐᓂᒃ ᓲᕐᓗ ᓯᓚᐅᑉ ᐊᓯᑦᔨᕙᓪᓕᐊᓂᖓᓂᒃ ᐊᐅᓚᑦᓯᓇᓱᒍᑏᑦ. ᑖᒃᑯᐊ ᐃᓘᓐᓇᑎᒃ ᐱᒻᒪᕆᐅᔪᑦ. ᐱᒻᒪᕆᐅᓂᖏᑦ ᑕᕐᕋᒧᑐᐃᓐᓇᖅ ᐃᓕᖓᖕᖏᑐᑦ; ᑐᓂᔨᓂᐅᒻᒥᒐᒥᒃ ᑐᑭᓯᐅᑎᑦᓴᓂᒃ ᓯᓚᕐᔪᐊᒥᐅᓄᑦ, ᐅᖃᕐᑐᖅ ᐃᒫᒃ, ‘ ᐁᙯ, ᑕᒪᓐᓇ ᑕᑯᕐᖄᓚᐅᔪᔭᕗᑦ. ᐅᖃᐅᑎᓚᐅᔪᕙᑦᓯ ᑕᒪᑐᒧᖓ ᑎᑭᐅᑎᓛᕐᓂᑎᓐᓂᒃ, ᑕᑯᑦᓴᐅᓕᕐᖁᑦ ᑕᒃᒐ ᐅᖃᐅᓯᕆᒐᓱᖃᑦᑕᓚᐅᔪᔭᕗᑦ.’ ᑭᓯᐊᓂᓗᑦᑕᐅᖅ, ᓈᒻᒪᖏᑦᑑᕕᐅᓯᒪᓃᑦ. ᑕᒪᒃᑯᐊ ᐊᖏᓂᕐᐸᖑᕙᓗᑦᑐᑦ, ᓈᒻᒪᖏᑦᑐᓕᕕᐅᓯᒪᓂᕐᒥᒃ ᐋᕐᕿᓱᐃᓃᑦ, ᑎᒍᒥᐊᕐᓃᑦ ᓈᒻᒪᖏᑦᑐᓕᕕᐅᓯᒪᓂᐅᑉ ᐱᕙᓪᓕᐊᓯᒪᓂᖏᑕ ᐊᒃᓚᑕᐅᒪᒍᑎᖏᓐᓂᒃ, ᑕᒪᑐᒥᖓ ᑐᑭᓯᒪᒍᑎᑕᖑᒪᔪᑦ ᐊᑐᕐᓱᒋᑦ ᓯᕗᒧᐊᓐᓃᑦ, ᐱᔪᓐᓇᐅᑎᑖᕋᓱᓐᓂᒥᒃ ᐁᕙᐅᑎᒍᑎᖃᕐᓃᑦ, ᐁᕙᐅᑎᓃᑦ, ᐃᒣᑕᐅᓯᒪᕗᒍᑦ ᑕᒃᒐ. ᑕᒪᒃᑯᓂᖓ ᐱᑦᓯᐊᑕᐅᓯᒪᖕᖏᓂᒃᑯᑦ ᐱᕙᓪᓕᐊᓯᒪᓂᕐᓂᒃ ᑎᒍᒥᐊᕐᐳᒍᑦ, ᑕᒪᓐᓇᓕ ᐊᖏᔪᒥᒃ ᐱᒻᒪᕆᐅᔪᕆᕙᕋ.”

ᓯᐊᔭ ᐃᓄᑐᑦᔨᔭᖏᑦᑐᖅ ᐱᓇᓱᑦᑕᒥᓂᒃ, ᐱᐅᓕᐊᕋᑦᓴᓕᕆᔨᐅᒻᒥᔪᒥᒃ ᐃᑲᔪᕐᑎᖃᕋᒥ ᐹᑦᕆᒃ ᐅᕃᓕᒥᒃ, ᐊᒻᒪᓗ ᒪᑭᕝᕕᒃ ᐃᓄᑐᐃᓐᓇᐅᓱᓂ ᐊᒃᓚᖁᑎᑐᖃᕐᓂᖅ ᐱᐅᓕᐊᕋᑦᓴᓕᐅᕐᑎᒥᒃ ᐱᓇᓱᑦᑎᖃᕐᒥᒪᑦ ᔨᐊᓯ-ᐋᓐ ᓈᒃᓯ-ᓖᑦᒥᒃ. ᑖᒃᑯᐊ ᐱᓇᓱᖃᑎᒌᖑᑦᓱᑎᒃ ᐱᓇᓱᑦᓴᖑᐊᕐᐸᑐᑦ ᐊᑕᓐᓂᐅᕕᐅᒍᑎᒥᓐᓂᒃ ᐅᒃᓗᒥᐅᓕᕐᑐᖅ ᐱᓇᓱᑦᑕᐅᔪᓅᓕᖓᑦᓱᑎᒃ ᑕᑯᔭᐅᔪᒪᔪᓂᒃ, ᐱᓇᓱᒻᒥᓱᑎᒃᓗ ᐊᒃᓚᓯᒪᔪᖕᖑᐃᓂᕐᒥᒃ ᐊᒻᒪᓗ ᐱᐅᓕᐊᓂᒃ ᐁᑦᑐᑕᐅᒍᑎᒥᓐᓂᒃ ᐱᓇᓱᑉᐸᓱᑎᒃ. ᐱᓇᓱᑉᐸᒥᔪᑦ ᑐᑭᓯᒪᒍᑎᑦᓴᓂᒃ ᑲᕙᒪᓕ ᕆᒍᑎᓂᒃ ᐊᒻᒪᓗ ᐊᒃᓚᓯ-ᒪᔪᓕᐅᕈᑎᖃᓱᖑᑦᓱᑎᒃ ᑲᒪᒋᔭᖃᕐᓂᓄᑦ ᐱᓇᓱᒍᑎᓂᒃ ᐃᓚᐅᒻᒥᑎᓪᓗᒋᑦ ᐅᐃᒫ-ᕆᓇᒋᑦ ᐃᑦᓯᕕᐅᑉ ᐃᓗᓕᖏᓐᓂᒃ ᕿᒥᕐᕈᓱᑎᒃ ᒪᓐᑐᔨᐊᒥᓗ ᐊᒻᒪᓗ ᑰᒃᔪᐊᒥ ᐱᓇᓱᑦᑕᐅᒋᐊᓚᐅᕐᓯᒪᖕᖏᑐᓂᒃ. ᐃᑦᓯᕕᓐᓂᒃ ᐃᓗᓖᔦᑦᓱᑎᒃ ᓱᓇᓂᒃ ᑕᑯᓚᖓᒻᒪᖔᕐᒥᒃ ᖃᐅᔨᒪᓱᖑᖕᖏᑐᑦ; ᓲᕐᓗ, ᑕᑯᑲᓪᓚᐸᑦᑐᑦ ᑳᐱᑑᑎᓂᒃ, ᓱᐃᓯᑎᕕᓂᑐᖃᕐᓂᒃ, ᖁᒻᒧᔪᒻᒦᑐᓂᒃ ᐃᖃᓗᓐᓂᒃ, ᐊᓪᓚᐅᑎᒧᑦ ᐊᓪᓚᖑᐊᕐᑕᐅᓯᒪᔪᓂᒃ, ᐊᒻᒪᓗᐊᓪᓛᑦ ᕿᕐᖁᐊᕕᓂᕐᓂᒃ ᑐᑭᓯᓂᐊᕈᑎᕕᓂᕐᓂᒃ.

ᐊᑕᓐᓂᐅᕕᐅᓚᐅᔪᒻᒥᔪᒍᑦ ᐱᑦᔪᔨᕕᒻᒧᑦ ᓇᓂᓯᖁᔭᐅᑦᓱᑕ ᐊᒃᓚᓯᒪᔪᖕᖑᑕ-ᐅᒪᑦᓱᑎᒃ ᐱᒻᒪᕆᓐᓂᒃ. ”ᐃᑦᓯᕖᑦ ᐊᒥᓱᐹᓗᐃᑦ ᓇᑎᕐᒦᓕᓚᐅᔪᑦ ᕿᑎᕋᓄᑦ ᑎᑭᐅᑎᓯᒪᓕᕐᓱᑎᒃ ᐊᓪᓛᑦ, ᑌᒣᓪᓗᐊᑐᒧᑦ ᑎᑭᐅᑎᑦᓱᑕ ᓱᓕ ᕿᒥᕐᕈᓯᒪᕋᑕᓚ-ᐅᔪᖕᖏᓇᑦᑎᒋᑦ ᐱᖁᑎᖃᐅᑎᒦᖏᓐᓈᓚᐅᔪᑦᓱᑎᒃᓗ, ᐃᑦᓯᕙᑦᓱᖓ ᐃᑦᓯᕖᑦ ᐃᓗᓕᖏᓐᓂᒃ ᕿᒥᕐᕈᓱᖓ, ᑕᑯᓕᓚᐅᔪᕙᕋ ᓯᑯᑦᓴᔭ ᕿᓂᕐᑕᐅᖁᔭᐅᓯᒪᔪᖅ! ᐱᖁᔭᑎᒍᑦ ᐃᓕᖓᓂᖃᕐᑎᓗᒍ ᑎᒍᒥᐊᖁᔭᐅᒍᑎᐅᓯᒪᖕᖏᑲᓗᐊᕐᑎᓗᒍ, ᑭᓯᐊᓂ ᐃᒋᓚᐅᕐᓂᖏᓐᓇᑎᒍ ᐃᓴᒍᑎᒋᓕᓚᐅᔪᔭᕋ,” ᐅᖃᕐᑐᖅ ᓯᐊᔭ. “ᑌᒣᑉᐳᖅ – ᐊᒃᓚᖁᑎᓂᒃ ᐱᐅᓕᐊᕐᓯᓃᑦ.” ᐱᑕᖃᕐᑎᓯᒍᑎᖃᕐᒥᔪᑦ ᑕᑯᒋᐊᕋᑦᓴᓂᒃ ᐊᑐᕐᑕᐅᔪᓐᓇᑐᓂᒃ ᑕᑯᓐᓇᕋᑦᓴᔭᑎᒍ ᐅᓂᒃᑲᑐᐊᓕᐊᓄᑦ, ᓲᕐᓗ ᑕᒐᑕᒐ ᐃᓱᒪᑕᖑᓯᒪᔪᓂᒃ ᐃᓕᖓᑦᓱᑎᒃ ᑭᓪᓕᓂᕐᒥᐅᑦ ᓄᑦᑎᑎᑕᐅᓯᒪᓂᖏᓐᓄᑦ.

ᑖᓐᓇ ᐱᑦᔪᔨᕕᒃ ᐊᐅᓚᑕᐅᔪᖅ ᐊᓪᓚᑎᒻᒪᕆᐅᑉ ᐱᔪᔨᕕᖓᓄᑦ, ᓯᕗᓕᕐᑕ-ᐅᓱᓂ ᐳᕐᑐᓂᕐᓴᐅᖃᑕᐅᔪᒧᑦ ᐊᓖᓯᐊ ᐊᔭᒍᑕᕐᒧᑦ. ᒪᓕᒐᖃᕐᑎᓯᒍᑎᑦᓴᓂᒃ ᐊᒃᓚᓯᒪᔪᖕᖑᐃᒋᐊᖕᖓᕈᑎᐅᓯᒪᔪᑦ ᐱᔭᕇᕐᑕᐅᓚᐅᔪᕗᑦ ᐃᓕᖓᑦᓱᑎᒃ ᐱᐅᓕᐊᕐᓯᕕᒻᒧᑦ ᑕᒐᑕᒐᓗ ᐅᑕᕐᕿᕗᖅ ᕿᒥᕐᕈᔭᐅᓂᑦᓴᒥᓐᓂᒃ ᐱᓇᓱᒐᖃᕐᕕᐅᑉ ᑲᒪᔨᒻᒪᕆᖏᓐᓄᑦ.

“ᐱᓪᓚᕆᐊᓘᒻᒪᑦ ᐃᓂᓪᓚᖓᑦᓯᐊᑐᓂᒃ ᐱᓇᓱᒐᖃᕐᕕᖁᑎᕗᑦ ᐊᐅᓚᔨᒍ-ᑎᑦᓴᖃᑦᓯᐊᕆᐊᖃᕐᓂᖓ ᐱᒻᒪᕆᐅᑦᓱᓂᓘᕋᒥ ᐱᓇᓱᒐᖃᕐᕕᒃ ᓲᕐᓗ ᒪᑭᕝᕕᒃ,” ᐅᖃᕐᑐᖅ ᐊᓖᓯᐊ. “ᐃᓕᖓᓂᑐᐊᖃᖕᖏᑐᖅ ᐱᓇᓱᑦᑕᐅᓯᒪᔪᓕᒫᓄᑦ ᐱᕙᓪᓕᐊ-ᑎᑦᓯᒍᑎᐅᒋᐊᖕᖓᓱᑎᒃ ᐱᓇᓱᒐᖃᕐᕕᒧᑦ, ᐃᓚᒋᔭᐅᒻᒥᒪᑕ ᐃᓱᒪᑖᕆᔭᐅᖃᑦᑕᓯᒪᔪᑦ ᐃᓚᐅᕕᒋᖃᑦᑕᓯᒪᔭᖏᑦ, ᐱᐅᓕᐊᕐᓯᒍᒪᑦᓱᓂ ᑐᑭᓯᒪᔭᐅᑦᔪᑎᑦᓴᓂᒃ ᐊᒻᒪᓗ ᓱᕐᖁᐃᑐᒥᒃ ᐅᖄᔭᐅᔪᑦ ᑐᑭᓯᒪᒍᑎᑦᓴᑕᖑᓯᒪᑦᓱᑎᒃ ᐊᓯᕐᕿᔭᐅᖁᓇᒋᑦ.”

ᑌᒪᓕ ᐱᓇᓱᒐᖃᕐᕕᐅᑉ ᐊᒃᓚᖁᑎᒥᓂᒃ ᐱᐅᓕᐊᕐᓯᕕᒋᓪᓚᕆᒋᒐᓗᐊᕐᑕᖓᓂ, ᐱᑕᖃᕆᕗᑦ ᑐᑭᓯᒪᒍᑎᑦᓴᓯᐊᑦ ᐃᓪᓕᓇᕐᑑᓂᖃᑐᐃᓐᓇᕆᐊᓖᑦ ᐃᓚᐅᔪᖃᑎᒌᓄᑦ, ᒪᑭᕝᕕᓗ ᑐᓂᓯᒪᓂᖃᑦᓯᐊᐳᖅ ᐃᑲᔪᕐᓯᒐᔭᕐᓂᒧᑦ ᕿᓂᕐᑐᖃᓕᕐᐸᑦ ᐊᒃᓚᓯ-ᒪᔪᖕᖑᐃᒍᑎᐅᓯᒪᔪᓂᒃ, ᐊᓰᑦ ᑭᓇᐅᓂᖏᑕ ᐊᒃᓚᑕᐅᓯᒪᒍᑎᖏᑦ ᐊᓯᐅᔨᔭ-ᐅᖕᖏᓚᐅᕐᐸᑕ. ᐊᓖᓯᐊ ᐅᖃᓚᐅᔪᒻᒥᔪᖅ ᒪᑭᕝᕕᐅᑉ ᖃᐅᔨᒪᑦᓯᐊᓂᖓ ᓄᓇᕕᒻᒥᐅᑦ ᐃᓚᐅᔪᖃᑎᒌᑦᑐᖁᑎᖏᓐᓂᒃ ᑲᒪᒋᔭᐅᑦᓯᐊᓂᖃᕆᐊᖓ.

ᑌᒣᓕᖓᓕᕐᑎᓗᒋᑦ, ᓯᐊᔭᒃᑯᑦ ᐱᓇᓱᖃᑎᒌᑦ ᐃᓱᒫᓗᐃᕈᑎᖃᕐᓯᒪᓕᕆᕗᑦ ᑮᓇᐅᔭᖃᕐᑎᑕᐅᒍᑎᑦᓴᓂᒃ ᐱᓯᒪᔭᒥᓂᒃ ᐊᕐᖁᑎᖃᕐᓱᓂ ᑲᓇᑕᒥ ᐊᑐᐊᒐᓕᕆᓂᕐᓄᓗ ᐊᒻᒪᓗ ᐱᐅᓕᐋᕐᓯᕕᓕᕆᓂᐅᑉ ᐱᓇᓱᒍᑎᒋᓲᖏᓐᓂᒃ ᐅᑯᓂᖓ “ᓈᓚᓂᖅ, ᓈᓚᑦᓯᒋᑦ ᓂᐱᕗᑦ” ᐊᑐᓛᕐᓱᑎᒃᓗ ᐊᐅᓚᑦᓯᒍᑎᒋᓗᒋᑦ ᓂᐱᓕᐅᕐᓯᒪᔪᓂᒃ ᐊᓯᕈᓯᖏᓐᓇᓂᒃ. ᓯᐊᔭ ᐅᖃᕐᑐᖅ ᐃᓄᐃᑦ ᑲᑐᑦᔨᖃᑎᒌᓐᓂᖓᑕ ᑯᐯᒃ ᑕᕐᕋᖓᓂ ᑲᑎᖕᖓᓂᕕᓂᖏᓪᓗ ᐊᓯᖏᓪᓗ ᐅᖄᑦᓱᑎᒃ ᓂᐱᓕᐅᕐᑕᐅᖃᑦᑕᓯᒪᔪᑦ ᓄᑦᑎᑕᐅᒋᐊᖃᕐᒪᑕ ᐊᓯᕈᑦᔦᑎᑕᐅᓗᑎᒃᓗ ᑭᖑᕚᖑᓛᕐᑐᑦ ᐃᓱᒪᒋᓗᒋᑦ. ᑌᒃᑯᐊ ᑮᓇᐅᔦᑦ ᐃᓚᖏᑦ ᐊᑐᕐᓗᒋᑦ ᐱᔪᒪᒻᒥᔪᑦ ᐃᓚᐅᔪᖃᑕᐅᔪᒥᒃ ᐱᓇᓱᑦᑎᑕᕐᓂᒥᒃ ᐱᒋᐅᕐᓴᑎᓪᓗᒍᓘᓛᕐᑕᒥᓂᒃ ᑕᒪᑐᒥᖓ ᐱᓇᓱᒐᕐᒥᒃ, ᑌᒣᓪᓗᑎᒃᓗ ᓇᓂᓯᒋ-ᐊᖃᓛᕐᐳᑦ ᐱᓇᓱᒍᑎᒥᒃ ᐱᐅᓕᐊᑦᓴᓕᐅᕈᑎᐅᒐᔭᕐᑐᒥᒃ ᓄᑕᐅᖕᖏᑑᓕᕐᑐᓂᒃ ᓂᐱᓕᐊᖑᓯᒪᔪᓂᒃ ᓄᑦᑎᕆᒍᑎᐅᒐᔭᕐᓗᓂ ᓄᑖᓄᔭᕐᓗᒋᑦ, ᐃᓚᐅᒻᒥᑎᓪᓗᒍ ᖃᕆᑕᐅᔭᑎᒍᑦ ᑐᓴᖃᑦᑕᐅᑎᒍᑎᒃᑯᑦ ᓂᐱᓕᐊᖑᓯᒪᔪᑦ ᐊᒻᒪᓗ ᐊᒃᓚᓯᒪᔪᓂᒃ ᓂᐱᓕᐅᕈᑎᒨᔦᒍᑎᓂᒃ ᐱᓗᑎᒃ ᐊᑐᕐᑕᐅᑎᓪᓗᒋᑦ ᖃᕆᑕᐅᔭᒨᔦᓂᕐᓄᑦ ᐱᐅᓕᐊᕐᑕᐅᔪᑦ ᓱᓇᐅᒻᒪᖔᑕ ᐃᓄᓐᓄᑦ ᕿᓂᕈᑎᐅᖃᑦᑕᓛᕐᑐᓂᒃ.

ᒪᑭᕝᕕᐅᑉ ᓴᓇᖕᖑᐊᓯᒪᔪᓂᒃ ᓄᐊᓯᒪᔭᖏᑦ ᐊᑦᔨᓕᐅᕐᑕᐅᓯᒪᓕᕇᕐᑐᑦ ᑭᓯᑦᔪᑎᑕᕐᑕᐅᔪᕐᑐᓱᑎᒃᓗ. ᐃᓚᖏᑦ ᖃᕆᑕᐅᔭᓅᔭᕐᓯᒪᓕᕐᑐᑦ ᐊᑦᓯᕋᐅᑎᖃᕐᓱᑎᒃ AtoM-ᒥᒃ, ᒫᓐᓇᐅᑎᓪᓗᒍ ᓱᓕ ᐊᑭᖏᑦ ᖃᓄᐃᓪᓗᐊᕋᔭᕐᒪᖔᑕ ᑐᑭᓯᓂᐊᕐᑕ-ᐅᖏᓐᓇᑐᑦ. ᐊᑦᑕᑐᐊᖃᕈᒪᔪᑦ ᑎᑭᑉᐸᑐᑦ, ᓯᐊᔭ ᐅᖃᕐᑐᖅ, ᓯᕗᓪᓕᐅᔨᒋᐊᒥᒃ ᐃᓂᓪᓓᓂᕐᒥᒃ ᑕᒐᑕᒐ ᐱᑕᖃᕇᕐᑐᓂᒃ.

ᓂᐱᓂᒃ, ᓴᓇᖕᖑᐊᓯᒪᔪᓄᑦ, ᓄᓇᓕᓐᓂ ᐊᑦᔨᓕᐊᖑᖃᑦᑕᓯᒪᔪᓄᑦ, ᐱᓇᓱᒐᖃᕐᕕᐅᑉ ᐊᒃᓚᓯᒪᔪᖕᖑᐃᒍᑎᒋᓯᒪᔭᖏᓐᓄᑦ. ᒪᑭᕝᕕᐅᑉ ᐱᐅᓕᐊᕐᓯᓂᕐᒥᒃ ᐱᓇᓱᕝᕕᖓ ᓱᓕᔪᒥᒃ ᐃᓪᓕᓇᕐᑐᖁᑎᒻᒪᕆᓐᓂᒃ ᐱᐅᓕᐊᕐᓯᕕᐅᑦᓱᓂ ᓴᓇᖕᖑᐊᓯᒪᔪᓂᒃ ᐃᓚᖃᕐᒥᑎᓪᓗᒋᑦ ᐱᓇᓱᒐᖃᕐᕕᐅᑉ ᐱᕙᓪᓕᐊᓯᒪᓂᖏᓐᓂᒃ ᐊᕐᕌᒍᕐᓂᒃ 40-ᓂ ᐊᓂᒍᕐᑐᓂ.

“ᓱᖏᕐᑐᑎᓕᒻᒪᕆᐅᒐᑦᑕ ᐃᓄᑐᐃᓐᓇᐅᖏᑦᑐᓂᒃ ᑲᒪᑎᑦᓯᓱᑕ ᐱᓇᓱᒐ-ᖃᕐᕕᖁᑎᑦᑕ ᐊᐅᓚᔨᔮᖏᓐᓂᒃ,” ᐅᖃᕐᑐᖅ ᐊᓖᓯᐊ. “ᐃᓄᑐᐃᓐᓇᐅᖃᑎᕗᑦ ᐱᒍᓐᓇᕕᖃᑦᓯᐊᕆᐊᖃᕐᐳᑦ ᐱᕙᓪᓕᐊᓯᒪᓂᑦᑕ ᐊᒃᓚᑕᐅᓯᒪᒍᑎᖏᓐᓂᒃ, ᐱᖁᔭᑎ-ᒎᕐᑐᓂᒃ, ᐱᓂᐊᕐᓂᓕᕆᓂᑎᒍᑦ ᖃᓄᐃᓘᕈᑎᐅᓯᒪᔪᓂᒃ ᐅᓪᓗᑕᒫᕐᓯ ᐅᑎᑦᑎᒍᑦ ᐃᓅᓯᑦᑎᓂ ᐃᓅᓯᕐᒥᑕ ᓱᕐᕋᑕᐅᒪᒍᑎᖏᓐᓂᒃ.”