ᑖᒃᑯᐊ ᐃᓕᑕᕐᓯᒍᑏᑦ ᓇᓗᓀᕆᒍᑎᐅᓱᖑᕗᑦ ᓄᓇᕕᒻᒥᐅᓂᒃ ᐃᓅᖃᑎᒥᓂᒃ ᐱᐅᓕᑦᓯᒋᐊᕐᓂᑯᓪᓗ ᓴᐳᑦᔨᓯᒪᓂᒃᑯᓗ ᐃᓅᓯᕐᒥᒍᑦ ᑲᑉᐱᐊᓇᕐᑐᑯᕐᓯᒪᔪᓂᒃ. ᒪᕈᐃᓗᐊᖕᖑᐊᒃ ᑐᖕᖓᕕᐅᓱᖑᕘᒃ ᐃᓕᑕᕆᔭᐅᔪᑦᓴᒥᒃ ᑎᒃᑯᐊᓯᔪᓄᑦ: ᖃᓄᑎᖏᒃ ᑲᑉᐱᐊᓇᕐᑐᓯᐅᕐᓯᒪᓂᖓᓂᒃ ᑎᒃᑯᐊᑕᒥ ᑲᑉᐱᐊᓇᕐᑐᑯᓚᖓᒐᓗᐊᕋᒥ ᓴᐱᕐᓂᖃᕐᓂᖏᓐᓂᖓᓂᒃ, ᐊᒻᒪᓗ ᑲᑉᐱᐊᓇᕐᑐᑯᕐᓯᒪᓂᖓᑕ ᑕᐅᑐᑦᑕᐅᓂᖓᓂ, ᐱᓗᐊᕐᑐᒥᒃ ᐃᓄᓐᓂᒃ ᐃᑲᔪᕋᓱᑦᓯᒪᔪᓂᒃ, ᖃᐅᔨᒪᒐᓗᐊᕋᒥᒃ ᐊᕐᖁᓇᑐ-ᐃᓐᓇᕆᐊᖃᕆᐊᒥᒃ ᐅᕝᕙᓗᓐᓃᓗ ᐊᔪᓕᑐᐃᓐᓇᕆᐊᖃᕆᐊᒥᒃ.
ᑲᒃᑯᐊ ᑭᖑᓪᓖᑦ ᐅᓂᒃᑲᐅᓯᐅᕗᑦ ᑕᒃᒐᓂ ᐊᕐᕌᒍᕐᒥ ᐃᓕᑕᕆᔭᐅᒍᑎᓂᒃ ᐱᔪᕕᓂᕐᓂᒃ ᐊᒻᒪᓗ ᐅᓂᒃᑲᑕᐅᒍᑎᖏᑦ ᓀᓈᕐᓯᒪᔫᑎᓪᓗᒋᑦ ᐅᓂᒃᑲᐅᓯᐅᕗᑦ ᓴᐱᕐᓯᒪᖕᖏᓂᖏᓐᓂᒃ.
ᐅᑭᐅᖑᓚᐅᕐᑐᖅ ᐊᓂᕐᕋᒥᓄᑦ ᑲᖏᕐᓱᐊᓗᒃᔪᐊᒧᑦ ᐅᑎᓕᕐᓱᑎᒃ ᒨᓱᓯᓗ ᒫᐅᑯ ᒧᐊᑲᐅᓪᓗ ᓯᑭᑑᖓ ᓯᑯᒃᑯᑦ ᐃᖏᕐᕋᓱᑎᒃ ᓵᑦᑐᓕᒐᒥᒃ ᑭᕕᓯᓚᐅᔪᕗᖅ ᐊᒻᒨᒪᔪᓕᒻᒧᑦ ᖃᓂᑦᑑᓕᕐᓱᑎᒃ. ᑖᓂᐊᓪᓕ ᐹᕋᓐᓗ, ᙯᓐᓇᔨ ᐃᑦᑐᓛᕐᓗ ᐊᒻᒪᓗ ᑭᑎ ᐃᑦᑐᓛᖅ ᑕᑯᓐᓇᓚᐅᔪᔪᑦ ᐅᐃᒻᒪᓱᑎᒃᓗ ᐃᑲᔪᕆᐊᓵᓯᓚᐅᔪᕗᑦ. ᑖᓂᐊᓪᓕ ᐱᒐᓱᐊᕈᑎᑦᓴᒋᐊᕆᓯᒪᔭᒥᓂᒃ ᐊᑐᕐᓱᓂ ᐊᒧᓯᒍᓐᓇᓯᓚᐅᔪᔪᖅ ᑕᒪᖏᓐᓂᒃ ᓇᒃᑲᑑᓐᓂᒃ ᐊᑦᓱᓈᒧᑦ ᐊᒥᑦᑐᐊᐱᒻᒧᑦ ᐱᐅᓕᑦᓱᓂᒋᒃ. ᐊᑦᓱᓈᖓᑦ ᑭᑦᑐᕋᓚᐅᔪᔪᖅ, ᑭᓯᐊᓂ ᑐᕓᑦᑐᒥ ᐃᒫᓂᑦᓱᑎᒃ, ᐊᑦᓱᓈᒥᒃ ᐃᒋᑦᓯᕕᐅᒋᐊᓪᓚᓚᐅᔪᔫᒃ ᐃᑲᔪᕐᑎᓗᒋᒃ ᙯᓐᓇᔨᒃᑯᒃ ᑭᑎᒃᑯᒃ ᖃᑭᑎᑕᐅᒍᓐᓇᓯᓚᐅᔪᕘᒃ ᒨᓱᓯᓗ ᒫᐅᑯᓗ ᐃᒫᓂᑦ ᖁᐊᕐᓇᑐᒥᑦ ᐱᐅᓕᔭᐅᑦᓱᑎᒃ.
2021-ᒥ ᐅᑭᐊᖑᑎᓪᓗᒍ, ᑖᕕᑎ ᐋᓇᓈᕐᓗ ᐊᑖᑕᖓᓗ ᔮᓂ ᓵᒻ ᐋᓇᓈᖅ ᐊᒻᒪᓗ ᓱᕈᓰᒃ ᒪᕐᕉᒃ ᑐᑦᑐᓯᐅᕐᑐᕕᓂᐅᑦᓱᑎᒃ ᐊᓂᕐᕋᒧᑦ ᐅᑎᕐᔭᑐᓯᓚᐅᔪᕗᑦ. ᑖᕕᑎᐅᑉ ᐊᑖᑕᖓ ᐆᒻᒪᑖᒐᓚᑦᓱᓂ ᐱᓱᒍᓐᓇᕈᓐᓀᓯᒪᓕᕋᓗᐊᕐᑎᓗᒍ, ᖃᖓᑐᐃᓐᓇᐅᒐᓗᐊᕐᒪᑦ ᑖᕕᑎᐅᑉ ᐊᖁᐃᒪᕕᓕᐊᖃᑎᒋᖏᓐᓇᓱᕆᕙᖓ ᒪᙯᓐᓂᒥᒃ ᐃᓕᓐᓂᐊᑎᑦᓯᔨᒋᓯᒪᒐᒥᐅᒃ. ᐅᓐᓄᑯᑦ ᐊᓄᕆᒥ ᐊᓂᕐᕋᒧᑦ ᐅᑎᓕᕐᓱᑎᒃ, ᓯᕿᓂᖅ ᓂᐱᓯᒪᓕᕐᑎᓗᒍ ᑖᕐᓯᐅᓱᑎᒃ ᐅᒥᐊᖓᑦ ᐅᔭᕌᑲᓪᓚᓚᐅᔪᕗᖅ, ᐊᐅᓚᐅᑦᔮᓱᑎᓪᓗ. ᐅᒥᐊᕐᑐᖃᑎᒌᑦᑐᑦ ᐃᒫᓄᓚᐅᔪᔪᑦ ᑌᒃᑯᐊᓕ ᓱᕈᓰᒃ ᐃᒻᒥᓂᒃ ᓄᓈᕋᒥ ᐱᐅᓕᒐᓗᐊᕐᑎᓗᒋᒃ, ᑖᕕᑎ ᖃᐅᔨᒪᓕᓚᐅᔪᕗᖅ ᐊᑖᑕᖓ ᐱᕐᖃᔭᖕᖏᑐᕈᕐᓯᒪᓂᑯᒥᓄᑦ ᐳᐃᑦᔪᖃᔭᓚᖓᖕᖏᒋᐊᖓ. ᑖᕕᑎ ᐊᑖᑕᒥᓂᒃ ᐳᐃᑦᔪᓱᓂ ᐃᖏᐅᓕᑦᑐᑯᑦ ᐁᑦᓯᓚᐅᔪᔪᖅ ᐱᐅᓕᑦᓯᓱᓂᓗ ᐊᑖᑕᒥᓂᒃ.
ᑌᑲᓂ ᐅᖄᔭᐅᕋᑖᒥ, ᑎᕕ ᓯᓄᐹᓗ, ᐃᑐᐊ ᓯᓄᐹᓗ ᐊᒻᒪᓗ ᐃᓓᑦᔭ ᐹᕋᓐ ᐱᓂᕐᓗᑐᓂᒃ ᖃᐅᔨᒪᓚᐅᔪᔪᑦ ᑖᕕᑎᒃᑯᑦ ᐱᓂᕐᓗᐊᕿᓂᕐᒥᒃ ᐊᑑᑎᑎᓪᓗᒋᑦ. ᐃᒪᐅᑉ ᐃᖏᐅᓕᓐᓂᖓᓄᑦ ᑖᕐᓯᐅᒧᓪᓗ ᑲᑉᐱᐊᓇᕐᑐᑯᓚᐅᔪᔪᑦ ᐅᒥᐊᒧᑦ ᐁᑉᐯᖑᑦᓱᑎᒃ ᓄᓈᕋᓱᒋᐊᒥᒃ ᓇᖏᐊᕐᓇᓗᐊᓕᕐᑎᓗᒍ ᓯᕗᓪᓕᒥ ᐅᔭᕌᕐᕕᒋᑫᓐᓇᑕᖓᒍᑦ. ᖃᐅᔨᒪᒐᒥᒃ ᐅᒥᐊᕐᑐᖃᑎᒌᑦ ᓇᒃᑲᓯᒪᑦᓱᑎᒃ ᖃᐅᓯᕐᓂᒃ ᐊᓐᓄᕌᕐᓯᒪᓕᕆᐊᖏᑦ, ᑏᕕᓗ, ᐃᑐᐊᓗ ᐊᒻᒪᓗ ᐃᓓᑦᔭ ᐱᐅᓕᑦᓯᓕᓚᐅᔪᕗᑦ ᐃᒪᕐᒥᑦ ᕿᐅᓐᓇᑐᒥᑦ ᐱᐅᓕᑦᓱᒋᑦ. ᓇᒻᒥᓂᖅ ᖃᔭᕆᐊᖓᑦ ᐃᒃᑲᕿᑖᑐᐃᓐᓇᕆᐊᖃᕐᑎᓗᒍ ᑭᕕᓗᓂᓗᓐᓃᑦ ᖃᐅᔨᒪᒐᓗᐊᕐᓱᑎᒃ ᑲᔪᓯᑐᐃᓐᓇᕋᒥᒃ ᓱᕐᖃᔦᕐᓯᒪᓕᕐᑐᓂᒃ ᐁᑦᓯᒍᓐᓇᓯᓪᓗᑯᓚᐅᔪᔪᑦ.
2021-ᒥ ᐅᑭᐅᕐᖃᒥᐅᑎᓪᓗᒍ, ᔮᓂ ᐃᑦᑐᑯᒃ ᐋᑕᒥ ᐃᑦᑐᑯᒃ ᐃᖃᓪᓕᐊᓚᐅᔪᕘᒃ, ᔮᓂ ᑕᓯᒃᑯᑦ ᓵᑦᑐᐊᐱᒻᒥᒃ ᓯᑯᒪᔪᒃᑯᑦ ᓯᕗᓕᕐᓱᓂ ᐃᖏᕐᕋᑎᓪᓗᒍ ᐃᖏᕐᕋᓱᓂ ᓵᑦᑐᓕᒐᒥ ᓯᑭᑑᕇᒃ ᐃᒫᕐᑐᐃᓇᐅᓚᐅᔪᔪᒃ. ᐋᑕᒥ ᓇᒃᑲᑐᒥᒃ ᐱᐅᓕᑦᓯᒐᓱᒃᑲᓗᐊᕐᓱᓂ ᐱᔭᕐᓃᓕᐅᓚᐅᔪᔪᖅ ᐃᒫᑐᐃᓐᓇᕆᐊᖃᕐᒥᒐᒥ. ᔩᒥ ᓰᕝᕆᔩ ᐊᓈᓇᒥᓂᒃ ᐃᖃᓪᓕᐊᖃᑎᖃᕐᓯᒪᓚᐅᔪᔪᖅ ᓇᒃᑲᕕᐅᔪᒥᑦ ᐅᖓᓯᑦᑑᒐᑎᒃ ᑌᒣᑦᓱᓂ ᑕᑯᓚᐅᔪᔪᖅ ᔮᓂ ᐃᒫᓂᓕᕐᑎᓗᒍ ᐋᑕᒥᓗ ᐱᐅᓕᑦᓯᒐᓱᑦᑎᓗᒍ. ᔩᒥ ᐅᐃᒻᒪᓱᓂ ᓯᓚᑉᐱᐊᒥᓂᒃ ᐱᔦᓚᐅᔪᔪᖅ ᒪᑦᑕᑎᕐᓱᓂᓗ ᖃᓪᓕᑲᔮᖏᑦᔮᑎᕐᓱᓂᓗ. ᑑᕐᒥᓂᒃ ᑎᒍᓯᑦᓱᓂ, ᐊᑦᓱᓈᒥᒃ ᕿᓓᕕᒋᑦᓱᒍ ᑎᒍᒥᐊᕐᓱᓂᐅᒃ ᐁᓯᓚᐅᔪᔪᖅ ᔮᓂᒃᑰᓄᑦ ᐋᑕᒥᒃᑰᓄᑦ. ᑎᑭᐅᑎᑲᓴᒃᑲᒥᒋᒃ ᖃᓂᓪᓕᕕᒋᑦᓱᒋᒃ, ᑑᕐᒥᓂᒃ ᔮᓂᒧᑦ ᐃᒋᑦᓯᓚᐅᔪᔪᖅ, ᐋᑕᒥᒧᓪᓗ ᐃᑲᔪᕐᑕᐅᓱᓂ ᔮᓂᒥᒃ ᐃᒫᓂᑦ ᕿᐅᓐᓇᑐᒥᑦ ᑲᑐᑦᔮᕆᑦᓱᒍ ᐱᐅᓕᑦᓱᒍ ᐊᒧᓯᓚᐅᔪᕘᒃ.
ᒫᑦᔨ 2010-ᖑᑎᓪᓗᒍ, ᓯᕐᖁᐊᓗᒃ ᐊᓂᕐᕋᒥᓄᑦ ᐅᑎᓕᕐᓱᓂ ᐃᓄᒻᒧᑦ ᓄᕐᖃᑎᑕᐅᓚᐅᔪᕗᖅ ᐅᖃᐅᑎᔭᐅᑦᓱᓂᓗ ᓄᕗᒻᒥ ᑐᕓᑦᑐᓕᔪᒥᒃ ᓇᒃᑲᑐᖃᕆᐊᖓ. ᓯᕐᖁᐊᓗᒃ ᐅᐃᒻᒪᓱᓂ ᓄᕗᓕᐊᓯᓚᐅᔪᔪᖅ ᑕᑯᑦᓱᓂᓗ ᓯᑯᐃᑦ ᐃᖏᕐᕋᓂᕐᒥ ᐃᖏᕐᕋᒋᐊᖏᑦ ᑭᓯᐊᓂ ᐃᓄᒻᒥᒃ ᑕᑯᒐᓂ, ᑐᓴᓕᓚᐅᔪᔪᖅ ᙯᒐᓕᔭᕐᐸᓓᔪᒥᒃ, ᑕᑯᑦᓱᓂᓗ ᕿᕐᓂᑕᒍᓗᒻᒥᒃ ᑕᕐᓴᑲᓪᓚᒥᒃ ᕿᓪᓕᑐᔭᕕᓂᐅᔪᕆᓚᐅᔪᔭᖓ. ᖃᓂᓪᓕᒋᐊᕋᒥᐅᒃ, ᑕᑯᓕᓚᐅᔪᕗᖅ ᓵᓕ ᐸᓂᖓᔭᐅᒋᐊᖓ, ᐃᒫᓂ ᓂᐊᖁᑦᓭᓈᕆᐊᕕᓕᕐᑎᓗᒍ. ᐅᓈᒥᓂᒃ ᓵᓕᒧᑦ ᐃᒋᑦᓯᕕᖃᓕᓚᐅᔪᔪᖅ, ᑭᓯᐊᓂ ᓵᓕ ᑕᖃᓗᐊᒧᑦ ᓄᑭᖃᑦᓯᐊᕈᓐᓀᕋᒥ ᑎᒍᒥᐊᕐᖃᔭᓚᐅᔪᒍᓐᓀᑐᖅ. ᓵᓕᒥᒃ ᐃᒫᓂᒍᓐᓀᑎᑦᓯᒐᓱᖏᓐᓇᓱᓂ ᓯᕐᖁᐊᓗᒃ ᓇᒃᑲᖃᑕᐅᓚᐅᔪᔪᖅ, ᑕᑕᓐᓇᑐᓕᑦᓱᓂ ᓯᑯᒧᑦ ᖃᕝᕕᓗᑯᐊᓗᑦᓴᓚᐅᔪᔪᖅ ᓵᓕᒧᓪᓗ ᖃᓂᓪᓕᐅᒥᑦᓱᓂ. ᑌᑲᖕᖓᓂᑦ ᓵᓕᒥᒃ ᓯᑰᑉ ᖃᖓᓅᕆᒍᓐᓇᓯᓪᓗᑯᓕᓚᐅᔪᕗᖅ ᐱᐅᓕᑦᓱᒍᓗ ᑭᕕᓚᐅᕐᑎᓇᒍ.
ᒍᐃᓕ ᐋᑕᒥ ᐊᓃᖃᑎᖃᓚᐅᕐᓂᖁᑦ ᓇᔭᒻᒥᓂᒃ ᓘᔭ ᐋᑕᒥᒥᒃ ᑌᑦᓱᒪᓂ ᒪᕐᕉᓂᒃ ᓘᔭ ᐅᑭᐅᖃᕐᑎᓗᒍ. ᓘᔭ ᑰᖕᒧᑦ ᓇᒃᑲᓚᐅᕐᓯᒪᔪᖅ, ᓴᕐᕙᐅᓕᕐᓱᓂ ᐊᓐᓄᕌᖓ ᓂᒃᓯᓗᑯᑦᓯᒪᔪᖅ ᑭᑭᐊᒻᒧᑦ ᑌᒣᓕᖓᓂᑯᒥᓄᑦ ᓴᕐᕙᐅᓂᖕᖏᑐᖅ. ᒍᐃᓕ ᐅᐃᒻᒪᓱᓂ ᑎᒍᓯᒍᓐᓇᓯᓯᒪᔪᖅ ᓘᔭ ᑕᐅᓄᙰᓐᓇᖅ ᓴᕐᕙᐅᓚᐅᕐᑎᓇᒍ.
