ᐃᖃᓗᐃᑦ ᓇᓗᓀᒃᑯᓯᕐᑐᑕᐅᓂᖓ
ᐊᐅᔭᖅ ᐅᐱᕐᖔᖅ ᐃᓱᓕᑎᓪᓗᒍ, ᐃᖃᓗᑉᐱᖃᑦᓯᐊᑐᒻᒪᕆᐅᓚᐅᔪᕗᖅ ᑕᓯᕐᔪᐊᕈᓯᕐᒥ (Virgin Lake), ᑲᖏᕐᓲᑉ ᓴᓂᐊᓃᑦᑐᒥ. ᑭᓯᐊᓂᓕ, ᐅᑭᐅᖅ ᐃᓄᐃᑦ ᐃᖃᓗᓐᓂᐊᕆᐊᕐᑐᑦ ᐃᖃᓗᑦᓯᓯᐊᖃᑦᑕᓚᐅᔪᖕᒋᓚᑦ ᑕᓯᓕᐊᑐᐊᕋᒥᒃ. ᐃᖃᓗᑉᐱᖃᕆᐊᓪᓚᓯᒻᒥᓱᓂᓗ ᐅᐱᕐᖓᓴᐅᑉ ᐃᓱᓕᕙᓪᓕᐊᓂᖓᓂ. ᑐᑭᓯᒪᒍᑎᑦᓴᑎᓐᓂᒃ ᐃᖃᓗᑉᐲᑦ ᐅᑭᐅᕐᓯᐅᓂᕆᓲᖏᓐᓂᒃ, ᓯᑕᒪᐅᔪᕐᑐᑦ ᐃᖃᓗᑉᐲᑦ ᑕᓯᕐᔪᐊᕈᓯᕐᒨᑐᕕᓃᑦ ᓇᓗᓀᒃᑯᓯᕐᑐᑕᐅᓚᐅᔪᕗᑦ ᐊᐅᒡᒍᓯ 2021-ᒥ.
ᐃᖃᓗᑉᐲᑦ ᖃᓗᔭᐅᖃᑦᑕᓱᑎᒃ ᓄᓗᐊᕐᓄᑦ, ᐃᑎᓂᖓᓃᑦᑐᑦ, ᖁᕐᓗᑑᑉ ᑰᒐᔮᖓᓃᑦᓱᑎᒃ. ᐅᓕᑐᐊᕐᒪᑕᒫᑦ, ᐃᑲᓗᖃᓯᖃᖃᑦᑕᓚᐅᔫᖅ. ᐃᖃᓗᐃᕈᑦᑑᔮᑐᐊᕐᒪᑦ ᐃᑎᓂᖓᓂ, ᐃᑎᓂᖓᓄᑦ ᐅᖑᔭᐅᖃᑦᑕᓱᑎᒃ, ᐊᑦᓱᓈᖅ ᑰᒻᒧᑦ ᐃᑳᕐᑐᖅ ᐅᔭᕋᕐᑕᓕᒃ ᓂᒪᕐᑎᖃᑦᑕᓱᒍ.
ᐃᖃᓗᑦᑕᐅᔪᓕᒫᑦ ᐃᓗᓕᒻᒨᑕᐅᖃᑦᑕᓱᑎᒃ ᐃᒪᕐᑕᓕᒻᒧᑦ ᐅᐊᕈᑦᓯᓯᒪᔪᒥᒃ ᓂᒪᔭᓪᓗᐊᕇᒃᑯᑎᑦᓴᒥᒃ (clove oil ᐅᐊᕈᑦᓯᓱᒍ ᐃᒪᕐᒥᒃ) ᐊᒥᓲᖕᖏᑐᓂ ᒥᓂᑦᓂ, ᓯᓂᓯᖕᖏᓂᓕᒫᖏᓐᓂ ᐃᖃᓗᐃᑦ. ᐱᓚᑦᑕᐅᕌᐱᒋᐊᖃᓲᒍᒻᒪᑕ ᓇᓗᓀᒃᑯᓯᕐᑕᐅᓚᖓᑐᐊᕋᒥᒃ ᑐᓵᒍᑎᑕᓕᒻᒥᒃ. ᐱᓚᑦᑕᐅᖃᑦᑕᓱᑎᒃ 2-ᒥᓂᑦᓂᑦ 4-ᒥᓂᑦᓄᑦ, ᓇᓗᓀᒃᑯᓯᕐᑕᐅᓱᑎᒃ ᑐᓵᒍᑎᑕᓕᒻᒥᒃ ᒪᕐᕈᕕᑦᓱᒍᓗ ᑭᓪᓕᔨᑦᓱᒍ. ᐱᓚᑦᑕᐅᓂᓕᒫᒥᓂ ᐃᖃᓗᐃᑦ ᒪᓯᖏᑦ ᖃᐅᓯᐅᑎᑕᐅᖏᓐᓇᓕᒫᕋᓱᐊᕐᓱᑎᒃ (ᓯᓂᓐᓇᑐᕐᒧᑦ ᐃᒪᕐᒧᓘᓐᓃᑦ). ᐱᓚᑦᑕᐅᒌᕋᒥᒃ, ᓇᓗᓀᕐᑯᓯᕐᑕᐅᓯᒪᔪᖅ ᐃᖃᓗᒃ ᐱᐅᓯᕐᒥᓄᑦ ᐅᑎᕐᐸᓕᐊᕕᒋᓚᖓᔭᒥᓅᕐᑕᐅᓂᐊᓕᕐᒪᑦ, ᖁᕐᓗᑐᕐᒧᑦ ᑰᑦᑐᒦᑦᑐᒧᑦ. ᑕᑯᒋᐊᕐᑕᐅᓴᐅᑎᒋᖃᑦᑕᓱᑎᒃ ᐃᑲᕐᐅᓂᓕᒫᒥ ᐳᐃᑦᔪᕈᓐᓇᓯᖕᖏᓂᓕᒫᖏᓐᓂ ᑰᒻᒧᑦ ᐅᑎᕐᓗᑎᒃ.
ᑐᓴᐅᒪᑎᑕᐅᓯᒪᔪᑦ ᓄᓇᓕᒻᒥᐅᑦ ᐃᖃᓗᓐᓂᐊᑏᑦ ᐃᖃᓗᑉᐱᓂᐊᖁᔭᐅᒐᑎᒃ ᓇᓗᓀᒃᑯᓯᕐᑕᐅᖃᑦᑕᓂᖏᓐᓂ ᐃᖃᓗᑦᑌᓕᖁᔭᐅᑦᓱᑎᓪᓗ ᓇᓗᓀᒃᑯᓯᕐᑕᐅᓯᒪᔪᓂᒃ ᑎᑭᐅᑎᒍᓐᓇᓯᖁᔭᐅᒻᒪᑕ ᐅᑭᐅᕐᓯᐅᕕᑦᓴᒥᓄᑦ ᑕᓯᕐᒧᑦ.
ᑐᓵᒍᑎᑕᓕᐅᑉ ᐃᓕᔭᐅᓂᖓ
ᖃᐅᔨᒪᔭᐅᒍᑎᑦᓴᖏᓐᓂᒃ ᓇᓃᓐᓂᖏᑦᑕ ᐃᖃᓗᑉᐲᑦ ᑕᓯᕐᔪᐊᕈᓯᕐᒥ, ᖁᓕᓪᓗ ᐊᑕᐅᓯᕐᓗᐃᑦ ᑐᓵᒍᑎᑕᓖᑦ ᐃᓕᔭᐅᓯᒪᓚᐅᔪᕗᑦ ᑕᓯᕐᒥ. ᒪᕐᕉᓗ ᐊᓯᒋᒃ ᑐᓵᒍᑎᑕᓖᒃ ᐃᓕᔭᐅᓛᕐᒥᓱᑎᒃ ᐅᑭᐊᒍᓛᕐᑐᖅ, ᒪᔪᕆᐊᒥᒃ ᑕᓰᑦ ᐃᓱᐊᕐᓂᓴᐅᓛᕐᒪᑕ. ᑐᓵᒍᑎᑕᓖᑦ ᐊᑦᓱᓈᒦᑦᑎᖃᑦᑕᓱᒋᑦ, ᑭᓴᕐᑎᓯᒪᑦᓱᒋᒃ ᐃᕐᖃᖓᓄᑦ ᑕᓯᐅᑉ, ᐳᑦᑕᐅᑎᒧᑦ ᐱᑐᑦᓯᒪᑦᓱᒋᑦ. ᓇᓃᓐᓂᖓ GPS-ᑯᑦ ᓇᓗᓀᕐᑕᐅᓯᐊᕐᓱᑎᒃ ᑕᑯᓂᐊᕐᑕᐅᒋᐊᖃᕋᔭᕐᒥᒐᒥᒃ. ᑐᓵᒍᑎᑕᓖᑦ ᐁᔭᐅᓛᕐᓗᑎᒃ ᐊᐅᔭᐅᑉ ᐅᐱᕐᖔᑉ 2022-ᒥ ᓄᖕᖑᐊᓂ ᖃᕆᑕᐅᔭᕐᒨᖃᓛᕐᓱᒋᑦ ᓇᕝᕚᑕᕕᓂᐅᔪᖃᕐᐸᑦ ᓇᓗᓀᒃᑯᓯᕐᑐᓯᒪᔪᓂᒃ ᐃᖃᓗᓐᓂᒃ.
ᐱᓇᓱᖃᑎᒌᑦᑐᑦ
ᓄᐊ ᐃᑦᑐᖅ, ᓴᐅᒥ ᑑᒪᓯ, ᕕᕈᓂ ᑐᐴ, ᖄᕈ-ᐋᓐ ᔨᓕᔅ, ᐁᓇ ᐃᒋᔪᖅ, ᓭᓚᓯ ᐊᓚᑯ, ᔦᑯ ᐁᕈ. ᐅᐃᓕᐊ ᐃᑦᑐᖅ, ᕕᑦᑑᕆᖓ ᐁᕈ, ᑖᒥ ᑲᓪᓚᒃ, ᐃᑲᔪᕐᒥᑎᓪᓗᒋᑦ ᐃᓚᐅᒻᒥᓱᑎᓪᓗ ᔮᓂ ᓇᓴᖅ, ᓕᐅ ᓇᓴᖅ ᔦᐱᑎ ᐊᓇᖃᑕᕐᓗ. ᑕᒪᓐᓇ ᐱᓇᓱᐊᕐᑕᐅᔪᖅ ᑮᓇᐅᔭᖃᕐᑎᑕᐅᑎᓪᓗᒍ ᐃᓄᐃᖅ ᓄᓇᖓᑦ ᖃᐅᔨᓴᕐᓂᓄᑦ ᐱᓇᓱᐊᕐᑕᐅᔪᓄᑦ, ᓴᐳᑦᔭᐅᓱᑎᒃ ArcticNet/ᐃᓄᐃᑦ ᑕᐱᕇᑦ ᑲᓇᑕᒥ.
