2020

Ole Gjerstad -ᒧᑦ ᐊᓪᓚᑕᕕᓃᑦ

ᐊᐅᔭᖅ / ᐅᐱᕐᖔᖅ ᖃᓂᒪᓇᖅ ᑰᕕᑦ­19 ᓯᓚᕐᔪᐊᓕᒫᒥ ᖃᓂᒻᒪᕈᑕᐅᖃᑦᑕᓂᖓᓄᑦ ᓄᓇᕕᒻᒥ ᐊᕐᕕᑕᖁᔭᐅᒍᓐᓀᓕᕐᑎᓗᒋᑦ ᐱᓇᓱᕝᕖᓗ ᐅᒃᑯᐊᑐᕐᑕᐅᑎᓪᓗᒋᑦ, ᐱᓪᓚᕆᐊᓗᒻᒥᒃ ᐅᓪᓗᒥᒃ ᖄᖏᓐᓈᑕᐅᕐᖃᔭᕐᑐᖃᓚᐅᔪᕗᖅ. ᐊᕐᕌᒍᐃᑦ ᐊᕙᑎᑦ ᒪᕐᕈᑦ ᖁᓕᓪᓗ ᓈᓕᕐᑐᑦ, ᔪᓓ 6, 1970­ᒥ, ᐋᑐᒑᒥᐅᑦ ᑯᐯᒃᒥᐅᓗ ᑎᑭᑕᐅᓚᐅᕐᓯᒪᕗᑦ ᓃᕙᓪ­ᕈᐱᑌ ᑐᓴᕐᑎᓯᒍᑎᖏᑦ ᓚᔭᐅᔪᓂᒃ. 221­ᓂᒃ ᒪᑉᐱᑐᒐᓕᒃ ᐅᓂᒃᑲᐅᓯᕐᑕᓕᒃ ᑲᕙᒪᐅᖃᑎᒌᑦ ᑭᒡᒐᑐᕐᑎᖏᑦᑕ ᐱᓇᓱᐊᕐᑕᕕᓂᖏᓐᓂᒃ ᓄᓇᕕᒻᒥ ᐃᑎᑦᔭᖃᑦᑕᓱᑎᒃ ᐅᑭᐅᒃᑯᑦ ᓯᓚᕐᓂᓗᑦᑐᑰᖃᑦᑕᓱᑎᒃ, ᐅᖃᐅᑦᔪᐃᒋᐊᕐᑐᖃᑦᑕᓱᑎᒃ ᐃᓄᓐᓂᒃ ᑯᐯᒃᑯᑦ ᓄᓇᕕᒻᒥᒃ ᐊᐅᓚᑦᓯᒍᒪᕙᓪᓕᐊᓂᖓᓂᒃ ᐊᑐᒑᒦᑦᑐᓄᑦ ᐊᐅᓚᑕᐅᓂᖃᖔᖁᒍᓐᓀᓱᒍ. ᑌᑰᓇ, ᐃᓄᐃᑦ ᐱᓇᓱᖃᑎᖃᓕᓂᐅᓪᓗᐊᓯᒪᖕᖏᑐᑦ ᓯᕿᓂᕐᒦᑐᓂᒃ ᑲᕙᒪᓂᒃ; ᓱᖏᐅᓐᓂᖃᕋᑎᒃ “ᓯᕿᓂᕐᒥᐅᑦ” ᒪᓕᒐᖏᓐᓂᒃ ᒪᓕᒐᑦᓴᓕᐅᕐᑕᐅᓯᒪᒍᑎᖏᓐᓂᓗ, ᑮᓇᐅᔭᓄᓪᓗ ᑐᕌᒐᓕᐅᕈᓯᖏᓐᓂᒃ ᐱᓂᐊᕐᓂᓕᕆᐅᑎᖏᓐᓂᓗ ᐊᕝᕕᐊᓗᑦᓯᔭᐅᒍᑎᒋᓚᖓᑦᓱᒋᑦ ᕿᓚᓈᕆᑦᓱᒍ ᐱᒐᓱᐊᕈᒪᔭᒥᓂᒃ ᐱᒐᓱᐊᓕᕈᑎᒃ. ᓃᕙᓪᒧᑦ ᕈᐱᑌᒧᓪᓗ ᐅᖃᐅᓯᖏᑦ ᓇᓗᓇᖕᖏᓗᑐᕐᓯᒪᔪᑦ: “ᓄᓇᕗᒪᓐᓇ, ᐊᐅᓚᒋᐊᓕᕗᑦ ᐊᐅᓚᑦᓯᒍᒪᐅᓯᑦᑎᒍᑦ”. ᑕᒪᓐᓇ ᐅᖃᐅᓯᕆᓯᒪᔭᖓᑦ ᐅᓪᓗᒥᒧᑦ ᐃᓱᒪᒋᒋᐊᓕᕗᑦ, ᓄᓇᕕᒻᒥᐅᑦ ᐱᒋᐊᑦᓯᐊᓯᒪᓕᕐᑎᓗᒋᑦ ᓇᒻᒥᓂᖅ­ᑲᕙᒪᒍᓐᓇᓯᒍᒪᓂᕐᒥᒃ ᐱᒡᒐᑕᕋᓱᐊᒻᒪᕆᓪᓗᒍ.

ᑲᕙᒪᑐᖃᒃᑯᓄᑦ ᑭᒡᒐᑐᕐᑎᐅᖃᑕᐅᓐᓂᖁᖅ F.J. “Bud” Neville; ᑯᐯᒃᑯᓄᑦ ᑭᒡᒐᑐᕐᑎᐅᑎᓪᓗᒍ Bernard Robitaille. ᑰᑦᔪᐊᕌᐱᓕᐊᕐᖄᓯᒪᔪᑦ. ᐊᓪᓚᓂᒃ ᑯᔩᒃᑯᓂᒃ ᑲᑎᒪᑦᓯᒌᕋᒥᒃ, ᐃᓄᓐᓂᒃ ᑲᑎᒪᔨᓂᒃ ᑲᑎᒪᑦᓯᓕᕐᓂᒥᔪᑦ, ᐅᓪᓘᓂᒃ ᒪᕐᕉᓂᒃ ᑲᑎᒪᓂᖃᕐᓂᐊᓂᕐᒥᓂᒃ ᐃᓄᓕᒫᕐᑎᓯᓗᑎᒃ ᐊᑐᐃᓐᓇᕈᕐᑎᕆᓕᕐᓂᖁᑦ ᑲᑎᒪᔩᑦ. ᑰᑦᔪᐊᕌᐱᒻᒥ ᐊᓪᓚᖁᑎᑖᕆᓯᒪᔭᑦᑎᓃᑦᑐᑦ 26­ᓂᒃ ᒪᑉᐱᑐᒐᓖᑦ ᑲᑎᒪᐅᑎᕕᓃᑦ. ᐅᖃᐅᓯᕐᑕᖏᓐᓂᑦ ᑲᑎᒪᐅᑎᕕᓃᑦ ᐱᓯᒪᔭᕗᑦ ᑕᒐ:

Poste-de-la Baleine (ᑰᑦᔪᐊᕌᐱᒃ), ᕕᕈᐊᕆ 19-21, 1970

ᓃᕙᓪ: ᑕᒫᓃᒍᑎᑦᑎᓂᒃ ᐅᖃᐅᑎᒍᒪᕙᑦᓯ, 1. ᑭᐅᒋᐊᕐᑐᓯᒪᔪᒍᑦ ᐊᐱᕐᓲᑎᑦᓴᖃᕐᑐᖃᕐᐸᑦ ᐱᒍᑦᔭᐅᒍᑎᐅᒍᒪᓯᒪᔪᑦ ᐱᓪᓗᒋᑦ ᐃᓄᐃᓪᓗ ᐱᒍᓐᓇᐅ ᑎᖏᓐᓅᓕᖓᔪᓂᒃ 2. ᑭᐅᒋᐊᕐᑐᓯᒪᑦᓱᑕᓗ ᐃᓄᐃᑦ ᐊᐱᕐᓲᑎᖏᓐᓂᒃ, ᐊᒻᒪᓗ 3. ᖃᐅᔨᒋᐊᕐᑐᓯᒪᑦᓱᑕ ᖃᓄᖅ ᑲᕙᒪᑐᖃᒃᑯᑦ­ᑯᐯᒃᑯᓗ ᑲᕙᒪᖓ ᑲᑐᑦᔨᖃᑎᒌᑦᓯᐊᕈᓐᓇᒪᖔᑕ.

ᕉᐱᑌ: ᑲᕙᒪᒃᑯᑦ ᐊᖏᖃᑎᒌᒍᑎᖓᓂᒃ ᑐᓴᐅᒪᕕᓯ ?
ᔫᐅ ᖁᒫᓗᒃ: ᐋᐊ, ᑭᓯᐊᓂ ᐅᖃᐅᓯᑦᓴᕆᓂᐊᕐᓗᒍ ᐱᕕᑦᓴᖃᕐᓯᒪᖕᖏᑐᒍᑦ. ᐅᐃᒪᓗᐊᕐᐸᑲᑦᓯ.

ᓭᓚᓯ ᑯᑭ: ᐃᓂᓪᓚᕈᒪᓕᕐᑕᕗᑦ ᑕᒪᓐᓇ. ᑖᒃᑯᐊ ᐊᖏᖃᑎᒌᒍᑎᓕᐊᕕᓃᑦ (ᐊᑐᒑᒦᑦᑐᓄᑦ ᑯᐯᒃᒦᑐᓄᓪᓗ) ᐃᓄᐃᑦ ᐊᖏᑐᐃᓐᓇᓂᐊᕐᑐᕆᔭᐅᑎᓪᓗᒋᑦ. ᑕᒐ ᐃᓄᐃᑦ ᓂᑦᔮᕈᑎᖃᕈᓐᓇᑐᕆᓕᕐᖁᑦ.

ᐸᐅᓚᓯ ᓇᐹᕐᑐᖅ: 1967­ᒥ ᑐᓴᓚᐅᕐᓯᒪᕗᒍᑦ ᑲᓇᑕᒎᖅ ᐅᑭᐅᕐᑖᑎᓪᓗᒍ 100­ᓂᒃ. ᑭᓯᐊᓂᓕ ᑲᕙᒪᓂᒃ ᖃᐅᔨᓕᑌᓐᓇᓯᒪᕗᒍᑦ 1964­ᒥ. ᑕᒐ ᑲᕙᒣᑦ ᐊᕐᕌᒍᓂ ᐱᖓᓱᓂ 100­ᓂᒃ ᐅᑭᐅᕐᑖᓯᒪᕙᑦ. ᑕᒐ ᑲᕙᒣᑦ ᐃᓄᑦᑕᖃᕐᑐᒥᒃ ᖃᐅᔨᒪᓕᕐᒪᑕ; ᑲᕙᒪᖃᕐᑐᒥᒃ ᖃᐅᔨᒪᓕᕆᕗᒍᑦ. ᓵᖕᖓᓯᐅᑎᓂᖃᓕᕐᑐᖅ.

ᔫᐅ ᖁᒫᓗᒃ: ᖃᓪᓗᓈᑦ ᑎᑭᒋᐊᖕᖓᓯᒪᔪᑦ ᐊᖓᔪᕐᖃᐅᓵᓕᕇᕐᓱᑎᒃ. ᑯᐯᒃᒥᐅᑦ ᑕᒪᐅᖓ ᑎᑭᖃᑦᑕᕆᐊᖃᖕᖏᑐᑦ ᐅᕙᑦᑎᓂᒃ ᐊᖓᔪᕐᖃᐅᓵᕐᕕᖃᕆᐊᕐᑐᓗᑎᒃ.

ᕈᐱᑌ: ᑭᒡᒐᑐᕐᑎᖃᖃᑦᑕᓯᒪᕗᓯ ᑲᑎᒪᓂᐅᖃᑦᑕᓯᒪᔪᓂ ᑕᒪᓐᓇ ᐱᓪᓗᒍ.

ᔫᐅ ᖁᒫᓗᒃ: ᓈᒻᒪᓴᕋᑕᖕᖏᓇᒪ. ᐊᐱᕐᓲᑎᑦᓴᖃᕐᒪ ᑕᒪᑐᒥᖓ ᓄᓇᒥᒃ ᑭᓇᒃᑯᑦ ᐊᐅᓚᑦᓯᒋᐊᖃᕐᒪᖔᑕ. ᐊᓪᓓᑦ ᐃᓄᐃᓪᓗ ᐊᐅᓚᑦᓯᔨᐅᒋᖃᕐᒪᑕ ᓄᓇᒥᓂᒃ. ᓄᓇᑦᑎᓂᒃ ᐊᐅᓚᑦᓯᒍᓐᓇᓕᕈᑦᑕ, ᑐᑭᑖᕈᑎᖃᕈᓐᓇᐸᓐᓂᐊᕋᑦᑕ ᓱᒋᐊᖃᕐᒪᖔᑦᑎᒍ ᓄᓇᕗᑦ.

ᕈᐱᑌ: ᓄᓇ ᓱᔭᐅᒋᐊᖃᕐᒪᖔᑦ ᐊᐱᕐᓲᑎᐅᑎᓪᓗᒍ ᖃᓪᓗᓈᒍᑦᓱᑕ ᑭᐅᒍᓐᓇᖏᑦᑕᕗᑦ. … ᖃᓪᓗᓈᑦ ᓄᓇᖓᓐᓃᑐᑦ ᓄᓇᖕᖑᐊᒥᒃ ᑕᑯᓐᓇᓱᑎᒃ ᓄᓇᕐᓚᒥᒃ ᑕᑯᔪᑦ; ᑌᔭᐅᔪᒥᒃ ᑯᐯᓕᒫᒥᒃ.

ᓭᓚᓯ ᑯᑭ: ᓄᓇᖁᑎᑦᑎᓂᒃ ᐊᐅᓚᑦᓯᒍᒪᕗᒍᑦ. ᖃᓪᓗᓈᑦ ᑎᑭᒃᑲᒥᒃ ᐃᓄᐃᑦ ᓄᓇᖓᓄᑦ, ᕿᐅᓐᓇᑑᓂᖓᓂᒃ ᑭᓯᐊᓂ ᐃᑉᐱᒍᓱᓲᒍᕗᑦ.

ᐋᓕᒃ ᓂᕕᐊᕐᓯ: ᑕᒫᓃᓐᓂᑎᓐᓂ, ᐅᖃᐅᓯᑦᓴᖃᕐᐳᖓ. ᐊᓪᓓᑦ ᐃᓄᐃᓪᓗ ᓄᓇᒥᓃᓪᓗᑎᒃ ᓇᒻᒥᓂᖅ ᑲᕙᒪᖃᕐᑐᓴᐅᕗᑦ. …ᑕᒪᓐᓇ ᓄᓇ ᐊᐱᕐᓲᑕᐅᔪᖅ ᑐᖕᖓᕕᒋᓚᖓᔭᕗᑦ ᐅᖃᐅᓯᕆᖃᑦᑕᕆᐊᓕᑦᑎᓄᑦ.

ᓂᐱᓕᐅᕐᑎᐅᒋᐊᖕᖓᑐᕕᓂᖅ ᑲᑎᒪᔪᓂ ᔮᓐ­ᔮᒃ ᓯᒫᕐ, ᐅᕕᒐᕐᑑᓱᓂ ᑯᐯᒃᑯᑦ ᑲᕙᒪᖓᑕ ᐱᓇᓱᑦᑎᖓ. ᐊᓪᓚᐅᑎᑐᐃᓐᓇᒧᑦ ᐊᓪᓚᓱᓂ ᐅᖃᕐᑕ­ᐅᔪᓕᒫᓂᒃ. ᓯᒫᕐ ᐱᓇᓱᖃᑎᖃᓕᓂᐅᑦᓱᓂ ᔦᒥᓯ ᐯᒥᐅᓂᒃ ᐊᓪᓚᓂᒃ ᑯᔩᒃᑯᓂᒃ, ᑰᑦᔪᐊᕌᐱᓕᐊᕐᓯᒪᑦᓱᓂ ᐳᕕᕐᓂᑐᓕᐊᕐᓯᒪᒻᒥᓱᓂᓗ. “ᕈᐱᑌᓗ ᓃᕙᓪᓗ ᐊᑐᐃᓐᓇᐅᒍᑎᖃᒐᓛᓐᓂᖏᑦᑑᒃ ᑎᑭᕝᕕᒋᒋᐊᖕᖓᑕᒥᓂ ᐁᕙᐅ­ᑎᔪᓪᓚᕆᐊᓗᓐᓃᓱᑎᒃ,” ᐅᖃᕐᑐᖅ ᓯᒫᕐ. “ᖁᐊᕐᓵᖓᑐᐃᓐᓇᓕᕐᑐᕕᓃᒃ. ᐅᕙᖓᑦᑕᐅᖅ, ᐅᖃᕐᑕᐅᔪᓕᒫᓂᒃ ᐊᓪᓚᑐᐃᓐᓇᑎᓪᓗᖓ, ᖁᖓᑦᓱᖓᓗ.”

ᑯᐯᒃᑯᑦ ᐸᕐᓀᕈᑎᖏᑦ ᐊᐅᓚᑦᓯᕙᓪᓕᐊᒍᒪᓂᕐᒧᑦ ᓄᓇᕕᒻᒥᒃ ᐅᖃᐅᓯ­ᐅᖃᑦᑕᓯᒪᔪᑦ ᑲᑎᒪᒍᑕᐅᖃᑦᑕᓱᑎᒃ ᐊᑕᐅᓯᐊᕋᑎᒃ ᓯᕿᓂᕐᒥ, ᐃᓄᐃᑦ ᑲᑎᒪᖃᑕᐅᑎᓪᓗᒋᑦ. ᑭᓯᐊᓂᓕ ᐃᓄᐃᑦ ᑲᑎᒪᖃᑕᐅᔪᑦ ᐅᓐᓂᓗᒍᑎᖃᕐᓯᒪᔪᑦ ᐅᖃᕐᓯᒪᔭᒥᓂᒃ ᐊᓪᓚᑕᐅᓯᒪᖃᑕᐅᓂᕃᒐᑎᒃ ᑲᑎᒪᐅᑎᕕᓂᕐᓂ. ᐊᑐᒑᕐᒥᐅᑦ ᐃᓱᒫᓗᒋᔭᖃᕐᓂᐹᕕᓃᑦ ᑯᐯᒃᑯᓂᒃ ᐱᓇᓱᖃᑎᖃᑦᓯᐊᕈᒣᓐᓇᓂᕐᒥᒃ, ᑲᓇᑕᒥᑦ ᐊᕕᒍᒪᓂᖓ ᓲᖑᓯᕙᓪᓕᐊᑐᐃᓐᓇᓕᕐᑎᓗᒍ. ᑯᐯᒃᑯᑦ ᐊᑐᒑᕐᒥᐅᓗ ᐸᕐᓀᕈᑎᒋᓯᒪᔭᒥᓂᒃ ᐱᔭᕇᓕᕐᑐᕕᓃᑦ, ᕈᐱᑌᓗ ᓃᕙᓪᓗ ᐃᓄᓐᓄᑦ ᒪᓂᓕᕐᑕᕕᓂᖏᓐᓂᒃ.

ᐃᓄᒃᔪᐊᖅ (Port Harrison), ᕕᐳᐊᕆ 22-24, 1970

ᓃᕙᓪ: ᑐᕐᖃᑕᕐᕕᑎᓐᓄᑦ ᐊᐱᕐᓱᑕᐅᓯᒪᕗᓯ, ᐊᐱᕐᓱᒥᑦᓱᑕᓗ, ᓱᖁᔨᒻᒪᖔᑦᓯ ᐅᕙᑦᑎᓂᒃ.

ᕈᐱᑌ: ᑕᒫᓃᑉᐳᒍᑦ ᓈᓚᒋᐊᕐᑐᓱᑕ ᐃᓄᐃᑦ ᐅᖃᐅᓯᑦᓴᖏᓐᓂᒃ.
ᔨᐊᑲ ᐅᐃᑖᓗᑦᑐᖅ: ᐅᖃᕈᒪᕗᖓᓕ ᑕᒪᒃᑯᐊ ᐊᖏᕈᑕᐅᓯᒪᒻᒪᑕ ᒪᕐᕈᐃᓄᑦ ᑲᕙᒪᓄᑦ ᖃᐅᔨᒪᑎᑕᐅᑎᓐᓇᑕ. ᑎᕐᓕᐊᑕᕕᓂᐅᔪᕆᓕᕐᖁᒍᓪᓕ.

ᓛᓴᔫᓯ ᐃᐳ: ᑲᕙᒣᓂᒃᑯᐊ ᑕᒪᕐᒥᒃ ᐅᖄᕙᑦᑐᑦ ᓄᓇᒥᒃ ᓇᒻᒥᓂᓕᕐᔫᔮᕐᓱᑎᒃ. ᓄᓇᒥᒃ ᐃᓄᓐᓄᑦ ᓇᒻᒥᓂᕆᔭᐅᓂᕃᖔᖃᑦᑕᕆᐊᖃᕐᓱᑎᒃ.

ᕈᐱᑌ: ᑲᕙᒣᑦ ᑕᒪᕐᒥᒃ ᑕᒪᑐᒥᖓ ᓄᓇᒥᒃ ᑯᐯᒃᒧᑦ ᐃᓚᒋᔭᐅᓂᕃᕗᑦ. ᑕᒪᓐᓇ ᓄᓇ ᑯᐯᒃᒧᑦ ᐃᓚᒋᓕᐅᑎᔭᐅᓯᒪᒻᒪᑦ 1912-ᒥ.

ᔮᓂ ᐃᓄᒃᐸᖅ: ᑌᒣᑦᑐᓭᓐᓇᖅ, ᐊᑐᒑᕐᒥᐅᑦ ᑌᒫᒃ ᐱᐅᓯᖃᕐᓯᒪᔪᑦ ᐃᓄᓐᓂᒃ ᐃᓱᒪᑦᓴᓯᐅᕐᕕᖃᕋᑎᒃ. ᑭᓯᐊᓂᓕ ᖃᐅᔨᒪᔪᖓ ᑕᒪᑐᒥᖓ ᐋᕐᖀᒍᓐᓇᕋᑦᑕ ᑕᒫᓂ.

ᓛᓴᔫᓯ ᐃᐳ: (ᓄᓇᖕᖑᐊᑉ ᐊᑭᓐᓇᒦᑦᑑᑉ ᑯᐯᒃᖑᐊᑉ ᓴᓂᐊᓅᕐᓱᓂ) ᐃᓄᐃᑦ ᒪᑐᒥᖓ ᓄᓇᖃᕆᐊᒥᓂᒃ ᐃᑉᐱᒋᔭᖃᑦᓯᐊᕈᒪᔪᑦ. ᑖᓐᓇ ᓄᓇᖕᖑᐊᖅ ᑕᕐᕋᒥᐅᓂᓪᓗ ᓯᕿᓂᕐᒥᐅᓂᓪᓗ ᑕᐱᑦᓯᑐᐃᓐᓇᑐᖅ. ᑕᒐᑕᒐ ᓱᓕᖕᖏᓗᑐᕐᐳᖅ ᐃᓄᐃᑦ ᓄᓇᖓᓂᑦ ᐅᖄᔪᖃᖃᑦᑕᓚᖓᑉᐸ ᓄᓇᖑᐊᖅ ᑌᒣᓕᖓᑎᓪᓗᒍ.

“ᑖᓐᓇ ᓄᓇᖕᖑᐊᖅ ᐊᑭᓐᓇᒨᕐᑕᐅᓯᒪᔪᖅ ᑲᑎᒪᔪᓂ ᓄᓇᓕᓐᓂ ᐊᑐᓂ ᐅᖃᐅᓯᐅᖃᑦᑕᓱᓂ” ᐅᖃᕐᑐᖅ ᓯᒫᕐ. “ᐃᓄᐃᑦ ᑎᑎᕐᑕᐅᖁᔨᓯᒪᔪᑦ ᓱᕐᖁ­ᐃᓇᕐᑎᓯᑦᓯᐊᑐᓂᒃ ᓇᓕᐊᒎᕐᑐᒥᒃ ᓄᓇᖃᕐᓂᕋᕐᒪᖔᕐᒥᒃ.”

ᐳᕕᕐᓂᑐᒥ, ᑲᕙᒣᑦ ᑎᓕᓯᒪᔭᖏᑦ ᑐᓵᔪᕕᓃᑦ ᑕᕐᕿᐅᓚᖓᔪᓂ ᐊᕐᕌᒍᓂᓪᓗ ᓯᕗᓂᑦᑎᓂ ᑐᓵᑐᐃᓐᓇᐸᓐᓂᐊᓕᕐᑕᒥᓂᒃ:

ᐃᓄᒃᐸᖅ ᖁᒫᓗᒃ: ᑕᒪᒃᑯᐊ ᐊᓪᓚᖁᑏᑦ ᐅᑉᐱᕆᖕᖏᑕᕗᑦ ᖃᐅᔨᒪᓪᓗᐊᖏᓐᓇᑕ ᐊᑎᓕᐅᕐᕕᖃᕐᑐᕕᓂᕐᓂᒃ ᐃᓄᐃᑦ ᐃᒫᙰᓚᒍᑎᒋᓐᓂᖏᑦᑕᖏᓐᓂᒃ. ᐱᓪᓚᕆᐅᑎᓪᓗᐊᔭᖏᑦᑕᕗᑦ. ᐅᖃᐅᓯᑦᓴᖃᕆᐊᓪᓚᓂᐊᕐᑐᖓ.

ᐲᑕ ᓇᐅᔭ: ᑭᓇᒥᓪᓘᓃᑦ ᓄᓇᒦᖃᑎᑦᑎᓂᒃ ᒥᑭᓪᓕᑎᕆᒐᓱᐊᖕᖏᓚᒍᑦ. ᑭᓯᐊᓂ ᐆᒪᔫᔮᕐᑎᓗᑕ ᐱᓂᐊᕐᓂᖃᕐᕕᐅᒋᐊᒥᒃ ᐃᑉᐱᒋᔭᖃᕐᐳᒍᑦ, ᐃᓕᑦᓯᓂᓪᓗ ᓈᒻᒪᓴᖕᖏᒍᑎᑦᑎᓄᑦ ᐃᓚᐅᑦᓱᓂ.

ᐲᑕ ᓇᐅᔭ: ᑭᓇᒥᓪᓘᓃᑦ ᓄᓇᒦᖃᑎᑦᑎᓂᒃ ᒥᑭᓪᓕᑎᕆᒐᓱᐊᖕᖏᓚᒍᑦ. ᑭᓯᐊᓂ ᐆᒪᔫᔮᕐᑎᓗᑕ ᐱᓂᐊᕐᓂᖃᕐᕕᐅᒋᐊᒥᒃ ᐃᑉᐱᒋᔭᖃᕐᐳᒍᑦ, ᐃᓕᑦᓯᓂᓪᓗ ᓈᒻᒪᓴᖕᖏᒍᑎᑦᑎᓄᑦ ᐃᓚᐅᑦᓱᓂ.

ᐊᖏᖃᑎᒌᒍᑎᓕᐅᕐᑐᕕᓃᑦ ᐊᑐᒐᕐᒥᐅᑦ ᑯᐯᒃᑯᓗ 1964­ᒥ, ᑭᓯᐊᓂ ᓱᔪᖃᓪᓗᐊᓯᒪᖕᖏᑐᖅ 1969 ᑎᑭᕋᑕᕐᓱᒍ. ᓃᕙᓪᓗ ᕈᐱᑌᓗ ᑐᓴᕐᓴᕈᕐᒪᓃᒃ ᑭᓯᐊᓂ, ᐃᓄᐃᑦ ᓯᕘᕋᕆᔭᖃᓯᓕᕐᓂᖁᑦ ᓯᕗᓂᑦᓴᒥᓂᒃ.

ᐃᕗᔨᕕᒃ, ᒫᑦᓯ 1, 1970

ᒫᑎᐅᓯ ᐃᔦᑦᑐᖅ: ᑐᓴᖃᑦᑕᓯᒪᕗᖓ ᑯᐯᒃᑯᑦ ᐊᐅᓚᑦᓯᔨᑑᓕᕐᐸᑕ, ᐃᓄᐃᑦ ᑲᒪᒋᔭᐅᑦᓯᐊᕈᓐᓀᓛᕐᓂᖏᓐᓂᒃ. ᓯᕗᓪᓕᒥ, ᑲᔪᓯᓂᖃᑦᓯᐊᓛᕐᑐᑦ, ᐊᑯᓂᒋᐊᒍᓕᕐᐸᑦ, ᓱᒃᑯᐸᓪᓕᐊᓯᓗᑎᒃ ᓱᓇᑐᐃᓐᓀᑦ…ᑯᐯᒃᑯᓂᒃ ᐊᐅᓚᑦᓯᔨᖃᓚᐅᕐᓯᒪᖕᖏᓇᑦᑕ ᑖᒃᑯᑑᑎᓪᓗᒋᑦ, ᖃᐅᔨᒪᓇᖕᖏᓚᖅ ᓱᔪᖃᓛᕐᒪᖔᑦ. ᑕᒪᓐᓇᑕᒐ ᓯᕗᓂᑦᑎᓂᒃ ᓯᕘᕆᔭᖃᕐᓂᑕ ᐃᓚᖓ.

ᓴᓪᓗᓂ, ᐅᓪᓗᓕᒫᑦᓯᐊᖅ ᐅᖃᐅᓯᐅᓐᓂᖁᖅ ᑯᐯᒃᒥ ᐃᓕᓴᕐᓂᓕᕆᓂᖅ ᖃᓄᐃᑦᑑᒪᖔᑦ.

ᓴᓪᓗᓂ, ᕕᐳᐊᕆ 27-ᒥᑦ ᒫᑦᓯ 1-ᒧᑦ

ᓃᕙᓪ: ᓱᒧᓂᒃᑯᐊ ᑯᐯᒃᒥᒃ ᓈᒪᓴᖕᖏᑐᑦ ?

ᓄᐊ ᖁᒪᖅ: ᐅᕙᑦᑎᓂᒃ ᓇᕝᕚᖄᕐᓯᒪᖕᖏᒪᑕ. ᓇᒻᒥᓂᖅ-ᑲᕙᒪᑖᕈᒪᕗᒍᑦ. ᐃᓕᓴᕐᓂᖅ ᓄᕐᖃᓛᓕᕐᑐᖅ ᑕᒣᓐᓂ ᐃᓕᓴᕐᕖᓂ (ᑲᕙᒪᑐᖃᒃᑯᑦ ᑯᐯᒃᑯᓗ ᐃᓕᓴᕐᕕᖁᑎᖏᓐᓂ) ᑯᐯᒃᑯᑦ ᐊᐅᓚᑦᓯᖔᓯᑐᐊᕐᐸᑕ.

ᐸᐅᓗᓯ ᐊᓚᑯ: ᐃᓄᓐᓂᒃ ᐊᐱᕐᓱᐳᖓ ᖃᓄᖅ ᐃᓱᒪᒋᔭᖃᕐᒪᖔᑕ ᐅᖃᐅᓯᕆᔭᑦᑎᓂᒃ. ᐊᖏᕐᑐᐃᓇᐅᕕᓰ ᐃᓕᓴᕐᓂᒥᒃ ᓄᕐᖃᑎᑦᓯᓚᖓᑎᓪᓗᑕ ᑯᐯᒃᑯᑦ ᐊᐅᓚᑦᓯᖔᓯᑐᐊᕐᐸᑕ ? ᑕᓕᑦᓯᓂᒃ ᖁᒻᒧᑎᑦᓯᒋᑦᓯ. (ᓱᕐᖁᐃᓯᐊᕐᑐᖅ ᐅᓄᕐᓂᓭᑦ ᐊᖏᕆᐊᖏᑦᑕ.) ᑕᖃᑦᓯᐊᐳᒍᑦ ᑭᐸᓗᒍᓗᑐᐃᓐᓇᐅᒋᐊᒥᒃ ᖃᓪᓗᓈᓄᑦ.

ᐃᓄᐃᑦ ᐅᓐᓂᓗᒍᑎᖃᖃᑦᑕᑐᕕᓃᑦ ᑯᐯᒃᑯᑦ ᐱᓇᓱᒋᐊᕐᑐᑎᑦᓯᖃᑦᑕᓕᕐᒪᑕ ᖃᓄᐃᖕᖏᓯᐊᕐᓂᓕᕆᕕᓐᓄᑦ ᐊᐅᓚᑦᓯᔨᐅᓂᕐᒥᓗ ᐱᓇᓱᒋᐊᕐᑐᑎᑕᖏᓐᓂᒃ, ᑯᐯᒃᑯᓗ ᐳᓖᓯᒃᑯᖏᑦᑕ ᕿᒻᒥᓂᖅ ᑐᖁᕃᒋᐊᕐᑐᑐᕕᓂᐅᓂᖏᓐᓂᒃ. ᐃᓄᒻᒪᕇᑦ ᐊᐅᓚᔨᖃᑦᑕᑐᕕᓃᑦ ᑭᖑᓂᖓᒍᑦ ᐱᕐᓕᕋᕐᓂᐅᕙᑦᑐᕕᓂᕐᓂᒃ ᐅᐃᒍᐃᒃᑯᑦ ᒥᕐᖁᓕᓐᓂᒃ ᓂᐅᕕᕋᕐᕕᒥᓂᒃ ᐅᒃᑯᐊᓯᑐᐊᕐᒪᑕ 1936­ᒥ. ᐃᓄᐃᑦ ᐊᒥᓲᓂᕐᓭᑦ ᐱᓪᓚᕆᐅᖕᖏᓂᕐᓴᐅᑎᑕᐅᔪᕆᓯᒪᔪᑦ ᓯᕿᓂᕐᒥᐅᑦ ᐱᓂᐊᕐᓂᓕᕆᐅᑎᖏᓐᓂᒃ ᐱᓪᓚᕆᐅᑎᑦᓯᖔᕐᑐᓄᑦ.

ᔮᓐ­ᔮᒃ ᓯᒫᕐ, ᓂᐱᓕᐅᕆᔨ, ᐅᖃᕐᑐᖅ, ᑲᕙᒪᑐᖃᒃᑯᑦ “ᐊᐅᓚᑦᓯᓕᓂᐅᓕᕇᕐᓂᖓ ᑕᕐᕋᒥᐅᓂᒃ” ᓱᕐᕃᓂᖃᕐᓯᒪᒻᒥᔪᖅ. “ᑲᕙᒪᑐᖃᒃᑯᑦ, ᐃᓘᓐᓈᒍᑦ, ᐃᓄᓐᓄᑦ ᑕᑯᓐᓇᑕᐅᑦᓯᐊᓂᖃᕐᓯᒪᔪᑦ, ᐊᑐᒑᕐᒥᐅᓗ ᑯᐯᒃᒥᐅᓂᒃ ᓈᒻᒪᓴᖕᖏᕙᓪᓛᓂᕆᓲᖓ ᐃᓄᓐᓄᑦ ᓯᑦᓯᑐᕐᓯᒪᑦᓱᓂ,” ᐅᖃᕐᑐᖅ ᓯᒫᕐ. “ᓱᒧᑦ ‘ᖃᐅᔨᒪᓕᕇᕐᑕᑎᓐᓂᒃ ᑲᕙᒪᖃᕐᓱᑕ’ ‘ᖃᐅᔨᒪᖕᖏᑕᑦᑎᓂᒃ ᑲᕙᒪᑖᖔᕐᑐᓴᐅᕕᑕ?’”

ᐃᓚᖓᒍᑦ ᑲᑎᒪᔪᑦ ᐱᒐᓱᐊᒻᒪᕆᑦᑐᓚᕆᐅᖃᑦᑕᓚᐅᔪᕗᑦ, ᐊᐱᕐᓲᑎᑦᓴᖃ­ᖃᑦᑕᑎᓪᓗᒍ ᐃᐱᑦᑐᒪᕆᓐᓂᒃ ᐁᕙᐅᑎᔪᒻᒪᕆᐅᑦᓱᑎᓪᓗ, ᑯᐯᒃᑯᓗ ᐊᕕᑦᓯᒍᒪᓂᖓ ᐅᖃᐅᓯᐅᓯᖃᑦᑕᒥᑦᓱᓂ. ᕈᐱᑌᓗ ᓃᕙᓪᓗ ᑕᑭᓈᕐᓯᖁᔭᐅᖃᑦᑕᑐᕆᓯᒪᔫᒃ ᑭᐅᒍᑎᑦᓴᒥᓂᒃ, ᑌᒪ ᐅᖃᐅᓯᐅᑉ ᐁᑉᐱᐅᓂᖓᓅᔭᕐᑕᐅᒋᐊᖃᕐᓂ ᐊᓕᕐᒪᑕ ᐱᖓᑦᓯᐅ­ᑎᖓᓅᔭᕐᑕᐅᓗᑎᓪᓗ. ᐃᓄᐃᑦ ᕿᓄᐃᓵᕈᓐᓇᖏᕐᑐᕕᓃᑦ ᐱᔭᑦᓴᐅᒋᐊᓕᓐᓂᓗ ᑐᕃᓐᓇᓯᐊᓯᑐᐃᓐᓇᓱᑎᒃ.

ᑲᖏᕐᓱᒥ, ᒫᑦᓯ 5-7, 1970-ᒥ

ᐊᕐᓇᑐᖅ ᓇᓴᖅ: ᐃᓄᐃᑦ ᑕᒫᓂᒥᐅᒍᒋᐊᖕᖓᓯᒪᕗᑦ. ᓱᒧᑦ ᖃᐅᔨᑎᑕ­ᐅᓐᓂᖏᓪᓚᒍᑦ 1964­ᒍᓚᐅᕐᑎᓇᒍ ᑲᕙᒪᒃᑯᑦ ᐃᒻᒥᓂᕿᐅᑎᖃᕐᓱᑎᒃ ᐊᓯᑦᔨᑐᐃᒐᓱᐊᕐᓂᖏᓐᓂᒃ ?

ᕈᐱᑌ: 1962­ᒥ, ᑯᐯᒃᑯᑦ ᐊᐅᓚᑦᓯᒍᒪᓯᒋᐊᕐᓯᒪᔪᑦ ᑕᕐᕋᒥᐅᓂᒃ. 1964­ᒥ, ᑯᐯᒃᑯᑦ ᑲᓇᑕᒥᐅᑦ ᑲᕙᒪᖓᓂᒃ ᐅᖃᐅᑏᒋᐊᖃᕐᓯᒪᔪᑦ ᐊᑐᐃᓐᓇᐅᒋᐊᕐᒥᓂᒃ (ᐱᒍᑦᔨᐅᑎᑦᓴᖃᕐᑎᓯᓂᕐᒥᒃ ᐱᒍᑦᔨᐅᑎᑦᓴᓕᒫᓂᒃ). ᑲᑎᒋᐊᖃᕐᓯᒪᔭᖏᑦ ᑕᒪᑐᒥᖓ ᐅᖃᐅᑎᓂᐊᕐᓗᒋᑦ.

ᐊᕐᓇᑐᖅ: ᐃᓄᓐᓂᒃ ᖃᐅᔨᑎᑦᓯᒋᐊᓕᕕᓃᑦ. ᕈᐱᑌ: ᐃᒻᒪᖄ. ᑲᕙᒣᑦ ᐊᓯᐊᒍᑦ ᐃᓱᒪᔪᕕᓃᑦ. ᐊᕐᓇᑐᖅ: ᐃᓄᓐᓂᒃ ᓯᓓᑦᑑᔪᕆᑦᓯᖂᕐᓂᕋᑦᓯ.

ᕈᐱᑌ: ᓂᑦᔭᖏᓪᓚᒍᑦ, ᑌᒃᑯᐊ ᑕᒪᐅᖕᖓᖄᕐᓯᒪᔪᑦ ᐃᓄᓐᓂᒃ ᐅᖃᐅᑏᓯᒪᔪᑦ ᐃᓇᖐᒍᒪᑦᓱᑎᒃ ᑲᕙᒪᑐᖃᒃᑯᓂᒃ.

ᐊᕐᓇᑐᖅ: ᑲᓇᑕᒥᑦ ᐊᕕᑦᑎᑕᐅᒍᑦᑕ, ᓱᓇᐅᑎᑕᐅᖕᖏᑑᓯᑐᐃᓐᓇᔭᖒᕐᐳᒍᑦ.

ᑰᑦᔪᐊᑐᖃᕐᒥ, ᒫᑦᓯ 7-9-ᒥ 13-16-ᒥᓪᓗ 1970-ᒥ

ᔮᓂ ᐱᑕ: ᑲᑎᒪᓂᖃᕐᑎᓗᒍ, ᓇᐅᑐᐃᓐᓀᑦ ᓂᓪᓕᕕᖃᕐᑎᑕᐅᓚᖓᕙᑦ, ᑲᕙᕐᓇᑐᓂᒃ ᐅᖄᔪᖃᖃᑦᑕᕋᓗᐊᕐᐸᑦ ?

ᕈᐱᑌ: ᐋᐊ, ᐃᓄᐃᑦ ᐅᖃᕈᒪᔭᓕᒫᒥᓂᒃ ᐅᖃᐅᓯᖃᕈᓐᓇᑐᑦ. ᑐᑭᓯᑎᑦᓯᒋ­ᐊᕐᑐᓯᒪᑐᐃᓐᓇᖁᒍᑦ ᐃᓱᒪᒋᔭᐅᔪᓂᒃ ᓴᖑᑎᑦᓯᒐᓱᐊᕋᑕ.

ᓃᕙᓪ: ᐅᓐᓄᐸᑦ ᐱᒋᐊᑦᓯᐊᕈᓐᓇᓚᖓᕕᑕ ?

ᔮᓂ ᐱᑕ: ᐊᐅᑲ, ᐱᕕᑦᓴᖃᑦᓯᐊᖃᑦᑕᓚᖓᕗᖅ; ᐱᓇᓱᐊᕈᓰᓐᓂ ᒪᕐᕉᓂ ᑕᒫᓃᑐᐃᓐᓇᕆᐊᖃᓚᖓᑦᓯ.

ᑰᑦᔪᐊᕌᐱᒻᒥᐅᑦ ᑰᑦᔪᐊᒥᐅᓪᓗ ᑯᐯᒃᑯᑦ ᑲᕙᒪᖓᓂᒃ ᐱᓇᓱᖃᑎᖃᓕᓂ­ᐅᓂᕐᐸᐅᓯᒪᔪᑦ. ᐃᓄᓕᒫᕐᑎᓯᔪᓂ ᓈᒻᒪᓴᖕᖏᕙᓪᓚᒍᑎᐅᔪᑦ ᐅᖃᐅᓯᐅᒋ­ᐊᖕᖓᖃᑦᑕᑐᕕᓃᑦ, ᑕᑭᔪᓂᒃ ᐅᖄᒍᑕᐅᑦᓱᑎᒃ, ᑯᐯᒃᑯᑦ ᐃᓕᓐᓂᐊᓂᓕᕆ­ᓂᖓᓅᓕᖓᔪᑦ ᐅᖄᒍᑕᐅᓪᓚᕆᖃᑦᑕᑎᓪᓗᒋᑦ, ᐊᐅᓚᑦᓯᒍᓰᑦ, ᐅᖃᐅᓯᖅ ᐃᑲᔫᑎᑖᕐᑕᕈᑕᐅᓲᓪᓗ. ᐃᓄᐃᑦ ᕿᓄᐃᓵᕈᓐᓇᖏᕐᑐᕕᓃᑦ.

ᓃᕙᓪ: (ᑕᑭᔪᑲᓪᓚᓂᒃ ᑐᑭᓯᑎᑦᓯᒋᐊᕈᑎᖃᕇᑐᐊᕋᒥ) ᐃᓕᓭᔫᔮᑦᓴᓂᖕᖏᓚᐅᕈᒪ. ᓵᓕ ᒍᐊᑦ: ᐃᓕᓭᔫᔮᒐᓛᖃᑦᑕᑫᓐᓇᖁᑎᑦ, ᐊᑯᓂᐊᓗᒃ ᐅᖄᑫᓐᓇᕋᕕᑦ ᐊᐱᕐᓱᕈᓐᓇᓯᖃᑦᑕᑎᓐᓇᑕ. ᓱᒧᓪᓕᑭᐊᖅ ᐃᓕᓭᔩᑦ ᐃᓚᖏᑦ ᐃᓕᓭᔨᐅᒍᓐᓇ-ᐅᑎᖃᕋᑎᒃ ᐃᓕᓭᓲᒍᑦᓴᒥᔪᑦ ?

ᑭᖑᓂᖓᒍᑦ, ᐊᐱᕐᓲᑎᐅᖃᑦᑕᓯᓕᕐᓂᒥᔪᑦ ᖃᓄᖅ ᒪᕐᕈᐃᑦ ᑲᕙᒣᑦ ᑲᔪᓯᑎᑦᓯᓯᒍᓐᓇᒪᖔᑕ ᐊᓯᑦᔨᒋᐊᕐᓂᒥᒃ.

ᓃᕙᓪ: ᑐᑭᓯᒍᒪᕗᖓ ᑲᕙᒣᑦ ᐊᑐᓂ ᖃᓄᖅ ᐃᓱᒪᒋᔭᖃᕐᒪᖔᓐᓃᒃ. ᐱᓇᓱᑲᑎᒌᑦᓯᐊᓂᕆᒍᓐᓇᑕᑦᑎᓂᒃ ᕿᒥᕐᕈᕋᑦᑕ… ᐃᓄᓐᓂᒃ ᐱᒍᒪᔭᒥᓂᒃ ᐃᓘᓐᓇᖏᓐᓂᒃ ᐱᒍᓐᓇᓯᔫᔮᕆᖕᖏᓇᑭᑦ ᐱᒍᓐᓇᓯᑦᓯᐊᕋᔭᕐᑐᕕᓂᐅᑦᓱᑎᒃ ᑲᕙᒣᑦ ᐱᓇᓱᖃᑎᒌᑦᓯᐊᑐᕕᓂᐅᑉᐸᑕ.

ᓵᓕ ᒍᐊᑦ: ᑕᒪᒋᓐᓂᒃ ᑲᕙᒫᓐᓂᒃ ᐱᓇᓱᖃᑎᒌᓐᓂᐊᓂᕃᑫᓐᓇᕋᕕᑦ. ᖃᓄᖅ ᐊᑯᓃᕐᑐᒥᒃ ᐱᓇᓱᖃᑎᒌᓛᕐᑐᑦ ?

ᕈᐱᑌ: ᐊᓪᓚᑕᐅᓯᒪᓛᕐᑐᖅ ᑐᕐᖃᑕᕐᕕᐅᑉ ᐊᓪᓚᑕᕕᓂᖏᓐᓂ,…ᑯᐯᒃᑯᑦ ᐊᐅᓚᑦᓯᔪᑑᓯᖕᖏᓂᖏᓐᓂ.

ᓵᓕ ᒍᐊᑦ: ᖃᓄᖅ ᐊᑯᓃᕐᑐᒥᒃ ?
ᕈᐱᑌ: ᑐᑭᑖᕈᑕᐅᕋᑕᖕᖏᑐᖅ.
ᓵᓕ ᒍᐊᑦ: …ᐊᕐᕌᒍᓕᒫᒥᐅᒍᓇᖅ.
ᕈᐱᑌ: ᑭᐅᔪᖓ ᑲᕙᒣᑦ ᖃᐅᔨᒪᖕᖏᓂᕋᕐᓱᒋᑦ.
ᓵᓕ ᒍᐊᑦ: ᐃᓄᐃᑦ ᑐᓴᕐᑎᑕᐅᓛᕐᖃᑦ ᖃᐅᔨᒪᓕᕈᑦᓯ ?

ᕈᐱᑌ: ᐋᐊ. ᑕᒪᕐᒥᒃ ᑲᕙᒣᑦ ᐃᓱᒪᑦᓴᓯᐅᖃᑦᑕᑐᑦ ᖃᓄᖅ ᐱᓇᓱᖃᑎᒌᑦᓯᐊᓕᐅᒥᒍᓐᓇᒪᖔᕐᒥᒃ ᖃᖓᐅᓂᑦᓴᖓᓂᒃ ᐃᓱᒪᒋᔭᖃᖕᖏᓂᕐᓴᐅᓱᑎᒃ. ᕈᐱᑌ ᓱᓕᖕᖏᑐᓂᒃ ᐅᖃᕐᑐᕕᓂᖅ. ᐊᑐᒑᕐᒥᐅᑦ ᑯᐯᒃᑯᓗ ᐸᕐᓀᕈᑎᖃᕐᓯᒪᔪᕕᓃᑦ ᑯᐯᒃᑯᑦ ᐊᐅᓚᑦᓯᖔᓚᖓᓯᑎᓪᓗᒋᑦ ᐁᕆᓕ 1, 1970­ᒥ, ᐱᓇᓱᐊᕈᓰᑦ ᐃᑭᑦᑐᐊᐲᑦ ᓈᓕᕐᑎᓗᒋᑦ ᐊᕐᕕᑕᕐᓂᖅ ᑕᒪᓐᓇ ᐊᑑᑎᔪᕕᓂᐅᑎᓪᓗᒍ. ᓱᓇᒥ ᑕᒐ ᐱᓇᓱᐊᕐᑕᕗᑦ ᐱᑦᔪᑎᖃᕐᐸ, ᐃᓄᐃᑦ ᐊᐱᕐᓱᑐᕕᓃᑦ ᕈᐱᑌᒥᒃ ᓃᕙᓪᒥᓪᓗ.

Port-Nouveau-Québec (ᑲᖏᕐᓱᐊᓗᑦᔪᐊᖅ), ᒫᑦᓯ 9-13, 1970

ᓯᑖᓐᓕ ᐋᓇᓈᖅ: ᐃᓄᐃᓂᒃᑯᐊ ᓄᓇᓕᓐᓂ ᐊᓯᖏᓐᓃᑐᑦ ᑐᓴᕐᑎᓯᒍᑎᑦᓯᓂᒃ ᐅᑕᕐᕿᔪᑦ ?

ᓃᕙᓪ: ᑭᐅᑦᓯᐊᕈᓐᓇᖏᑦᑕᕋ ᑕᒪᓐᓇ. …ᐃᓄᐃᓂᒃᑯᐊ ᐅᑕᕐᕿᒍᓇᐅᔪᑦ ᐊᖓᔪᕐᖄᖏᑦ ᖃᓄᖅ ᐅᖃᐅᓯᖃᕐᓂᐊᒪᖔᑕ ᓄᓇ ᐱᓪᓗᒍ.

ᒍᐃᓕ ᐃᒪᕐᓚᖅ: ᑭᐅᔭᐅᒍᒪᓛᕐᖁᒍᑦ ᑲᕙᒪᒃᑯᑦ ᑐᓴᕐᑎᓯᒍᑎᑦᓯᓂᒃ ᐊᑐᐊᕐᓯᓯᒪᓕᕐᐸᑕ.

ᓃᕙᓪ: ᑕᕐᕿᓂᒃ ᐊᒥᓱᑐᑐᐃᓐᓇᕆᐊᖃᓛᕐᑐᖅ ᑕᒪᓐᓇ.

ᒫᒃ ᐋᓇᓈᖅ: ᑕᒪᓐᓇ ᑕᕝᕙᓂ ᐋᕐᕿᑕᐅᕕᑦᓴᑕᖃᓚᖓᖕᖏᑐᖅ ᑐᓴᕐᑎᓯᒋ­ᐊᕐᑐᓯᒪᑐᐃᓐᓇᑐᕐᑎᑑᕋᑦᓯ.

ᓯᑖᓐᓕ ᐋᓇᓈᖅ: ᐋᐊ, ᑐᕈᓯᕐᑎᑑᕐᐳᓯ ᑐᒃᑐᕕᓂᕐᒥᒃ ᐊᑖᑕᒥᓂᒃ ᐸᔪᖁᔭᐅᓯᒪᔪᕐᑎᑑᕐᓱᓯ.

ᑐᓴᕐᑎᓯᒍᑎᓂᒃ ᑲᕙᒪᒃᑯᒥᓅᕐᓯᓯᒪᓕᕐᓱᑎᒃ, ᕈᐱᑌᓗ ᓃᕙᓪᓗ ᐋᕐᕿᓱᐃᒋᐊᑦᓯᐊᕆᐊᖃᓕᕐᑐᕕᓃᒃ ᐸᕐᓀᕈᑕᐅᓯᒪᔪᓂᒃ. ᔮᓐ­ᔮᒃ ᓯᒫᕐ ᐊᑐᐃᓐᓇᕈᕐᑎᕆᒋᐊᖃᕐᑐᕕᓂᖅ ᑲᑎᒪᓂᕐᓂᒃ ᑲᑎᒪᐅᑎᖃᓛᕐᑐᓄᑦ ᐃᓄᐃᑦ ᑐᑭᑖᖃᑦᑕᕆᐊᖃᕐᓂᒥᒃ ᓄᑭᖃᕐᓂᓴᐅᖁᑦᓱᒋᑦ. ᑭᓯᐊᓂ ᑕᕐᖀᑦ ᖁᓕᐅᖕᖏᒐᕐᑐᑦ ᓈᑎᓪᓗᒋᑦ, ᐁᕆᓕ 1971­ᒥ, ᑯᐯᒃᒥᐅᑦ ᐊᖓᔪᕐᖄᖓ ᐅᔮᐳ ᐳᕌᓴ ᐱᒋᐊᕐᑎᓯᓕᕐᓂᒥᔪᖅ ᔦᒥᓯ ᐯᒥ ᐃᑯᒪᐅᑎᑦᓴᓕᐅᕐᓂᒥᒃ, ᓃᕙᓪᓗ­ᕈᐱᑌᓗ ᑐᓴᕐᑎᓯᒍᑎᖏᑦ ᑲᕙᒪᒃᑯᑦ ᐊᒧᔭᕐᑐᖏᓐᓅᑕᐅᑦᓱᑎᒃ ᐊᓯᐅᔨᔭᐅᑐᐃᓐᓇᑎᓪᓗᒋᑦ.

ᓯᑕᒪᑦ ᐊᕐᕌᒍᐃᑦ ᑭᖑᓂᖓᒍᑦ, 1975­ᒥ, ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎ ᐊᑎᓕ ᐅᕐᕕ ᐅᓕᕐᑐᕕᓂ, ᓯᕿᓂᕐᒥ ᐅᑦ ᑲᕙᒪᖏᑦ ᐊ ᐅ ᓚᑦᓯᔨᐅ ᓯᑎᓪᓗᒋᑦ ᓄᓇᕕᓕᒫᑲᓵᒥᒃ. ᐊᓕ ᐊᒋᔭᐅ ᓪᓗ ᐊᓯᒪᖕᖏᑐᑦ “ᓴᒃᑯᓯᓂᖅ ᒪᓂᑐᐃᓐᓇᕈᑎᖃᕐᓂᓗ” ᐅ ᖃᐅ ᓰᑦ ᓴᕕᕐᕈ ᐊᒧᑦ ᐅ ᕐᓕᑑᑎᑦᓴᑖᕕᓂᐅ ᔮᓕᕐᑐᕕᓃᑦ ᐃᓕᕐᖁᓯᖃᑎᒋᖕᖏᑕᒥᑕ ᐃᓕᕐᖁᓯᖓᓂᒃ ᐊᑎᑎᑦᓯᒐᓱ ᐊᕈᑕ ᐅᓯᑦᓱᑎᒃ ᓄᓇᕕᒻᒥ ᐅᓂᓪᓗ ᐃᑭᓕᕐᑐᐃᒍᑕ ᐅᑦᓱᑎᒃ ᐊᑭᕋᕇᓕᕐᑎᓯᒍᑕ ᐅᑦᓱᑎᓪᓗ. ᐅᓪᓗᒥ, ᐊᖏᖃᑎᒌᒐᓱ ᐊᕈᑎᓖᑦ ᖃᓄᖅ ᑖᒃᑯ ᐊ ᐅᖃ ᐅᓰᑦ ᐊᖏᖃᑎᒌᒍᑎᒥᑦ ᐲᕐᑕ­ᐅᒍᓐᓇᒪᖔᑕ.

ᐃᕐᙯᒐᒥ ᐊᕐᕕᑕᕐᓂᕆᓯᒪᔭᖓᓂᒃ ᓃᕙᓪᓗ­ᕈᐱᑌᓗ, ᓵᓕ ᒍᐊᑦ ᖁᖓᑦᑐᕕᓂᖅ. “ᐃᓄᒻᒪᕆᐅᓯᒪᔪᑦ, ᑭᐅᔭᐅᒍᒪᑐᐃᓐᓇᑐᕕᓃᑦ ᐱᔭᕆᐊᑭᑦᑐᐊᐱᒻᒥᒃ: ‘ᖃᐅᔨᒋᐊᕐᕕᖃᕐᖄᓂᖕᖏᓇᑦᓯ ᐅᕙᑦᑎᓂᒃ, ᑐᑭᑖᕈᑎᒋᕙᑦᑕᓯ ᐱᓪᓗᑕ ᓱᓪᓕᑎᖃᖕᖏᓚᑦ.’ ᐃᓄᒻᒪᕆᓐᓄᑦ, ᐃᓄᐃᑦ ᓇᒻᒥᓂᓖᑦ ᓄᓇᒥᓂᒃ, ᓱᓕᑦᓯᐊᑐᖅ ᐱᔭᕆᐊᑭᑦᑐᐊᐱᒃ, ᓚᓲᕆᑦᓱᒋᓪᓗ ᐅᓪᓗᒥᒧᑦ ᑲᕙᒣᑦ ᑲᑎᒪᓕᕋᑦᑎᒋᑦ. ᑲᓇᑕᒥ ᐃᓕᕐᖁᓯᖃᑎᒋᖕᖏᑕᒥᑕ ᐃᓕᕐᖁᓯᖓᓂᒃ ᐊᑑᑎᑎᑕᐅᒐᓱᐊᕐᓂᐅᓯᒪᔪᖅ ᐊᓂᒍᕐᓯᒪᕗᖅ.