(ᐁᕆᓕ 22, 2022 – ᑳᑦᓯᓅ, ᑯᐯᒃ) ᑲᔪᓯᑎᑦᓯᒍᑎᒋᓇᓱᑦᓱᒋᑦ ᓯᕗᓪᓕᑕ ᓯᕗᓕᕐᑎᐅᖃᑦᑕᓯᒪᔪᑦ ᐊᕐᖁᓯᓂᓕᐊᕆᓯᒪᔭᖏᓐᓂᒃ ᐊᒻᒪᓗ ᑲᔪᓯᑎᑦᓯᒍᑎᒋᓗᒋᑦ ᐃᓅᖃᑎᒌᓐᓂᑯᑦ ᐃᓂᓪᓚᓯᒪᓂᕐᒥᒃ, ᑯᔩᑦ ᐃᔫ ᐃᔅᓯᒥᐅᑦ, ᓄᓇᕕᐅᑉ ᐃᓄᑐᐃᓐᓇᖏᑦ ᐊᒻᒪᓗ ᓈᔅᑲᐲᑦ ᓅᑦᓯᒻᒥᔫᔅᓯᒥᐅᑦ ᐊᑎᓕᐅᖃᑎᒌᒍᑎᖃᓚᐅᕐᐳᑦ ᑐᑭᓯᒪᖃᑎᒌᓐᓂᑎᒍᑦ ᐊᓪᓚᓯᒪᔪᓂᒃ ᐊᖏᖃᑎᒌᒍᑎᒥᓐᓂᒃ ᐃᓂᓪᓓᓯᒪᒍᑎᐅᓂᐊᓕᕐᑐᒥᒃ ᑯᔩᓪᓗ, ᐃᓄᑐᐃᓐᓀᓗ ᐊᒻᒪᓗ ᓈᔅᑲᐲᑦ ᐅᖃᕐᕕᒪᕆᖓᓂᒃ ᑯᐯᒃ ᑕᕐᕋᖓᓂ.
ᑌᒪᓕ ᐃᓚᐅᓯᒪᒐᒥᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓄᑦ ᐊᑎᓕᐅᖃᑎᒌᒍᑎᐅᓯᒪᔪᒧᑦ 1975-ᖑᑎᓪᓗᒍ ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᐅᑉ ᓄᐃᕕᐊᓂᐅᓂᕐᓴᖅ ᐊᖏᖃᑎᒌᒍᑎᓄᑦ ᐊᑎᓕᐅᖃᑎᒌᒍᑎᐅᓯᒪᔪᓄᑦ 1978-ᒥ, ᑲᑐᑦᔮᕆᑦᓱᒋᑦ ᓵᖕᖓᓯᒍᑎᒋᒋᐊᖃᓱᕗᑦ, ᐃᓕᒃᑯᓂᖃᕋᓗᐊᕐᑎᓗᒋᑦ ᑐᖕᖓᕕᖃᕐᓱᑎᒃ ᐊᑐᓂᑦ ᓄᓇᖁᑎᑦᑎᓂᒃ, ᐱᓂᐊᕐᓂᓕᕆᐊᑦᑎᓂᒃ, ᐅᖃᐅᓯᑦᑎᓂᒃ ᐊᒻᒪᓗ ᐱᐅᓯᑦᑎᓂᒃ, ᐊᓯᖏᑎᒍᑦ ᐊᑦᔨᒌᐸᓲᓂᖃᕆᕗᒍᑦ, ᐱᓗᐊᕐᑐᒥ ᓇᓂᓯᒐᓱᓕᕋᑦᑕ ᐋᕐᕿᒍᑎᑦᓴᓂᒃ ᐃᓅᓯᕐᒧᑦ ᑐᑭᓯᒪᔭᐅᑦᓯᐊᓂᓕᑐᐊᒧᑦ ᓄᓇᓯᒪᔪᓄᑦ ᐃᔫ ᐃᑦᓯᒥ, ᓄᓇᕕᒻᒥ ᐊᒻᒪᓗ ᓅᑦᓯᒥᔫᔅᓯᔨᒥ. ᐊᑑᑎᓯᒪᔭᑦᑎᓂᓪᓗ ᓵᓚᖃᖁᑎᒋᖃᑦᑕᓯᒪᔭᑦᑎᓂᓪᓗ ᐊᒥᕐᖃᖃᑎᒌᒍᑎᖃᕐᓂᑯᑦ ᐃᑲᔪᑎᒌᓐᓂᖃᕐᓗᑕ ᐱᔭᖃᖃᑎᒌᖃᑦᑕᕈᓐᓇᕋᑦᑕ.
“ᑌᒪᓕ ᐱᐅᓯᓕᑐᖃᐅᒐᓗᐊᕐᓱᑕ ᑕᕐᕋᒥᐅᖑᓂᕐᓴᓂᒃ ᓯᕿᓂᐅᓪᓗ ᓄᐃᕕᐊᓂᒥᐅᖑᓂᕐᓴᓂᒃ ᓯᓚᕐᖃᑎᑦᑎᓂᒃ ᐱᑐᑦᓯᒪᖃᑎᖃᓱᑐᖃᐅᓂᕐᒥᒃ ᐱᑕᖃᕆᐊᒥᒃ ᐅᖃᕐᕕᒪᕆᒻᒥᒃ ᐅᖄᕕᐅᖃᑦᑕᓂᐊᕐᑐᒥᒃ ᐱᐅᔪᓗᓂ ᑭᓯᐊᓂᐅᒐᔭᕐᐳᖅ ᓄᓇᓕᓕᒫᑦᑎᓄᑦ ᓄᓇᓕᓕᒫᑦ ᖃᓄᐃᖕᖏᓯᐊᕐᑐᓴᐅᓂᖏᓐᓄᑦ. ᑲᑐᑦᔨᓗᑕ, ᓱᕐᖁᐃᑐᒥᒃ ᐱᓇᓱᒍᑎᑦᓯᐊᖑᓂᕐᐹᓂᒃ ᐱᑕᖃᕈᓐᓇᕋᑦᑕ ᓯᕗᓂᑦᓴᑎᓐᓂ ᑕᒪᒃᑯᐊᓗ ᐃᓅᖃᑎᒌᖑᓈᕐᑎᑐᑦ ᑭᒡᒐᑐᕐᑕᐅᒍᑎᖏᑦ ᓄᓇᑦᑎᓂᒃ, ᓄᓇᓕᕐᓚᑎᓐᓂᒃ ᐊᒻᒪᓗ ᓄᓇᓕᕐᔪᐊᑎᓐᓂ ᓈᒻᒪᓈᕐᓂᖃᖁᓪᓗᒋᑦ ᐃᓚᐅᑎᑦᓯᓂᖃᑦᓯᐊᓗᑎᒃᓗ.” – ᐊᓪᓓᑦ ᓯᕗᓕᕐᑎᒪᕆᖓᑦ ᒫᓐᑎ ᑰᓪ-ᒫᔅᑎ, ᑯᔩᑦ ᓄᓇᒥᓐᓂ ᑲᕙᒪᖓᑦ
ᑖᓐᓇ ᐃᓂᓪᓚᑕᐅᕐᖃᒥᐅᔪᖅ ᐊᑕᖏᓐᓇᓂᐊᓕᕐᓗᓂ ᐅᖃᕐᕕᒪᕆᐅᓚᖓᓕᕐᑐᖅ ᖁᕝᕙᑎᕆᒍᑎᐅᖃᑦᑕᓚᖓᕗᖅ ᐱᓇᓱᖃᑎᒌᓐᓂᓴᓂᓪᓗ ᐊᒻᒪᓗ ᐊᑕᐅᑦᓯᑯᕐᑎᑕᐅᓂᑦᓴᖏᓐᓂᒃ ᐃᓕᖓᓗᑎᒃ ᐱᓇᓱᑦᑕᐅᔪᓄᑦ ᐱᒍᓐᓇᓯᔭᖃᕐᐸᓕᐊᓂᕐᒥᒃ ᓄᓇᓕᑐᖃᕐᑎᒍᑦ ᓇᒻᒥᓂᖅ-ᑐᑭᑖᕆᖃᑦᑕᓂᕐᒥᒃ ᐃᓚᐅᑎᓪᓗᒋᑦ ᓄᓇᖃᕐᖃᓯᒪᔪᑦ ᐊᒻᒪᓗ ᐊᖏᖃᑎᒌᒍᑎᑎᒍᑦ ᐱᔪᓐᓇᐅᑎᑖᖑᓯᒪᔪᑦ. ᐱᒻᒪᕆᐅᓂᖃᕐᒪᑦ ᑐᑭᓯᒪᔭᐅᑦᓯᐊᕆᐊᖃᕐᓂᖏᑦ ᑖᓐᓇ ᐅᖃᕐᕕᒪᕆᒃ ᐃᓇᖐᓚᖓᖕᖏᒋᐊᖓ ᓴᕐᕿᔮᕐᓂᖃᕇᕐᑐᓂᒃ ᑲᑎᖕᖓᔨᓂᒃ ᐅᕝᕙᓘᓐᓃᑦ ᐅᖃᕐᕕᒪᕆᓐᓂᒃ ᐱᑕᖃᕐᑎᑕᐅᒌᕐᑐᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓄᑦ ᑯᐯᓪᓗ ᑕᕐᕋᖓᓂ ᓯᕿᓂᐅᑉ ᓄᐃᕕᐊᓂᐅᓂᕐᓴ ᐊᖏᖃᑎᒌᒍᑎᓄᑦ ᐅᕝᕙᓗᓐᓃᑦ ᐃᓂᓪᓚᑕᐅᒪᔪᓄᑦ ᐊᑯᕐᖓᓂ ᑲᕙᒪᑎᒎᕐᑐᓂᒃ ᐱᓇᓱᒐᖁᑎᓕᓐᓄᑦ.
“ᐅᐱᒍᓱᒻᒪᕆᑉᐳᖓ ᐃᓄᑐᐃᓐᓀᑦ ᐱᔭᖃᖃᑦᑕᕈᑎᒋᓯᒪᔭᖏᓐᓂᒃ ᓄᓇᕕᒻᒥ. ᐱᑕᖃᓕᕐᓗᑕ ᓄᓇᓕᑐᖃᕐᑎᒍᑦ ᐅᖃᕐᕕᒪᕆᒻᒥᒃ ᑯᐯᒃ ᑕᕐᕋᖓᓂ ᑲᑐᔮᖃᖃᑎᒌᑦᓱᑕᓗ ᐱᔭᖃᕋᓱᒍᑎᒋᕙᑦᑕᕗᑦ ᐊᓪᓓᓗ ᑯᔩᑦ ᐊᒻᒪᓗ ᓈᔅᑳᐲᑦ, ᓂᐱᖃᕆᐊᒃᑲᓂᓚᖓᓕᕐᐳᒍᑦ ᓄᑭᖃᕆᐊᒃᑲᓂᕐᓗᑕᓗ.” – ᐱᑕ ᐋᑕᒥ ᒪᑭᕝᕕᐅᑉ ᐊᖓᔪᕐᖄᖓ
“ᐅᓪᓗᒥᓕ ᓇᓪᓕᐅᑎᕗᒍᑦ ᐱᒻᒪᕆᒻᒥ ᐱᔭᖃᕐᓯᒪᓂᑦᑎᓄᑦ ᐃᑎᔪᒥᒃ ᐃᓅᖃᑎᒌᖑᓈᕐᑎᑐᑎᒍᑦ ᐱᓇᓱᖃᑎᒌᒍᑎᖃᕐᓯᒪᓂᑦᑎᓄᑦ, ᑲᑐᑦᔮᖃᖃᑎᒌᑦᓱᑕ, ᐃᓚᓐᓈᕆᖑᑦᓱᑕᓗ. ᐊᑯᓂ ᐊᕙᖕᖔᓗᒃ ᑭᖑᓂᑦᑎᓂᑦ ᐅᓪᓗᒥᒧᑦ ᓇᒻᒥᓂᖅ-ᑐᑭᑖᕐᑐᐃᒍᓐᓇᓂᕐᒧᑦ ᑎᑭᑦᓱᑕ, ᓈᔅᑳᐲᑦ ᓅᑦᓯᒥᔫᔅᓯᒥᐅᑦ ᐱᔪᕆᒪᒍᑎᖃᕐᐳᑦ ᐊᕐᕌᒍᒐᓵᓗᓐᓂ ᓱᖏᕐᑑᑎᖃᖃᑦᑕᓯᒪᓂᕐᒥᓂᒃ ᓯᓚᕐᖃᑎᑐᖃᕐᒥᓂᒃ, ᓄᓇᕕᐅᑉ ᐃᓄᑐᐃᓐᓇᖏᓐᓂᒃ ᐊᒻᒪᓗ ᐊᓪᓚᓂᒃ ᑯᔩᓂ ᐄᔫ ᐄᔅᓯᒥᐅᓂᒃ. ᐱᓇᓱᖃᑎᒌᓐᓂᖃᕐᓗᑕ ᑭᓯᐊᓂ ᐱᔭᖃᕈᓐᓇᓚᖓᒐᑦᑕ ᐊᑦᔨᒌᓂᒃ ᐱᔭᖃᕈᑎᒋᒍᒪᔭᑦᑎᓂᒃ ᐱᔪᓐᓇᓯᒍᑎᒋᕐᑕᑎᓐᓂᒃ ᐊᑕᖏᕐᑐᒥᒃ ᐃᒻᒥᓂᕿᒍᓐᓇᓯᓂᕐᒥᒃ ᓄᓇᖁᑎᑐᖃᑦᑎᓂ ᐊᒻᒪᓗ ᐱᐅᓯᒋᐊᕆᓂᖃᕐᓗᑎᒃ ᓄᓇᓕᖁᑎᑦᑕ ᖃᓄᐃᖕᖏᓯᐊᕐᑐᓴᐅᓂᖏᑎᒍᑦ.” – ᐊᖓᔪᕐᖄᖅ ᑎᕇᓴ ᓯᒫᒃᑲᓃᔅ, ᐊᓪᓓᑦ ᓈᔅᑳᐲᑦ ᐃᓅᖃᑎᒌᑦᑐᖁᑎᖏᑦ ᑳᒍᐊᒍᐊᑦᓯᑲᓛᒥ
ᐅᖃᕐᕕᒪᕆᐅᓛᕐᑐᒥᒃ ᐅᖃᖃᑎᒌᒍᑎᖃᕐᓃᑦ ᑕᓯᐅᕐᓯᒪᔭᐅᓂᖃᕐᓗᑎᒃ ᓯᕗᓪᓕᐅᔭᐅᓂᖃᖃᑦᑕᓛᖓᕗᑦ ᐊᑐᓂᑦ ᐃᓅᖃᑎᒌᑦᔪᐊᖑᓈᕐᑎᔪᓄᑦ ᓯᕗᓪᓕᐅᔭᑦᓴᐅᔪᕆᔭᐅᓈᕐᑎᓗᑎᒃ ᐃᓘᓐᓇᖏᓐᓄᑦ ᐃᓅᖃᑎᒌᖑᓈᕐᑎᑐᓄᑦ ᐱᓪᓚᕆᖁᑕᐅᓗᑎᒃ ᐊᑑᑎᑦᓴᖃᑦᓯᐊᑐᖁᑕᐅᓗᑎᒃᓗ ᖃᓄᐃᖕᖏᓯᐊᕐᓂᓴᖏᓐᓄᑦ ᓄᓇᓕᖏᑕᓗ ᐃᓄᖁᑎᖏᑕᓗ ᐊᒻᒪᓗ ᑲᔪᓯᓂᖃᑦᓯᐊᕈᓐᓇᖁᓪᓗᒋᑦ ᓄᓇᖁᑎᑐᖃᖏᑦ. ᐊᑐᓂᑦ ᓯᓚᕐᔪᐊᕗᑦ ᓱᑲᑦᑐᒥᒃ ᐊᓯᑦᔨᕙᓪᓕᐊᓂᖃᕐᒪᑕ ᐅᕙᑦᑎᓂᒃ ᓱᑲᑦᑐᒥᒃ ᐊᓯᑦᔨᓂᕐᒥᒃ ᐊᑑᑎᔭᖃᕐᑎᓯᒐᓱᐊᓕᕐᓱᑎᒃ. ᐅᕙᒍᓪᓕ ᐃᓅᖃᑎᒌᖑᓈᕐᑎᔪᒍᑦ ᓱᕐᕋᑕᐅᓪᓗᐊᓂᖃᓱᖑᖕᖏᓚᒍᑦ ᐊᑑᑎᔭᖃᑦᓯᐊᓯᑐᐃᓐᓇᓱᑦᓴᔭᐅᒐᑦᑕ ᑭᖑᕙᕇᑎᒍᑦ ᓵᖕᖓᓯᒋᐊᖃᓕᕐᑕᑎᓐᓂᒃ ᓴᖕᖓᓯᕙᑦᓱᑕ ᑐᑭᓯᒪᑦᑕᓗ ᑲᑐᑦᔮᖃᓕᕋᑦᑕ ᓯᕗᒧᑦ ᐃᖏᕐᕋᓂᖃᑲᓪᓚᒪᕆᒍᓐᓇᕆᐊᒥᒃ ᑭᖑᕚᕆᓚᖓᔭᑦᑎᓄᑦ ᕿᒻᒪᖁᓯᒍᑎᒋᓛᕐᓗᒋᑦ.
– 30 –