ᐋᑐᒑ, ᔪᓓ 6, 2018 – ᒪᑭᕝᕕᒃ ᐊᒻᒪᓗ ᐃᓄᕕᐊᓗᐃᑦ ᐱᓇᓱᐊᖃᑎᒌᑦᑐᑦ ᐅᓪᓗᒥ ᑐᓴᕐᑎᓯᔫᒃ ᐊᑎᓕᐅᕈᑎᖃᕐᓯᒪᓕᕐᓂᒥᓂᒃ ᐊᖏᖃᑎᒌᒍᑎᒥᒃ ᕘᔅ ᐃᐊᒃᑯᑦ ᑲᓀᑎᐊᓐ ᓄᐊᑦᑯᓪᓗ ᐱᓇᓱᐊᖃᑎᒌᓛᓕᕐᑎᓗᒋᒃ ᖃᖓᑦᑕᔫᑎᒍᑦ ᐱᒍᑦᔨᓯᐊᕐᓂᓴᐅᒐᓱᐊᕐᓂᒧᑦ ᐅᑭᐅᕐᑕᑐᒥᐅᓂᒃ ᓄᓇᓕᓐᓂᒃ.
ᒪᓕᒐᕐᑎᒍᑦ ᐊᖏᕐᑕᐅᒍᑎᑖᕇᑐᐊᕐᒪᑦ ᐱᖁᔭᓕᕆᓂᕐᑎᒍᓪᓗ ᐱᓇᓱᐊᕐᑕᐅᒋᐊᓖᑦ ᐱᔭᕇᑐᐊᕐᒪᑕ ᓄᑖᒥᒃ ᓲᖑᔪᒥᒃ ᑎᒥᖁᑎᑖᕐᓱᑎᒃ, ᒪᓂᔨᒍᑎᐅᓯᒪᔪᑦ ᐅᑭᐅᕐᑕᑐᒥ ᖃᖓᑦᑕᔫᓕᕆᓂᕐᒥᒃ ᐊᐅᓚᑦᓯᔩᑦ ᑌᔭᐅᓲᑦ “Canadian North” ᑕᕐᓴᖃᓛᓕᕐᑐᑦ ᕘᔅ ᐃᐊᑉ ᑕᕐᓴᖏᓐᓂᒃ ᐃᓄᒃᓱᖑᐊᖃᕐᓗᑎᒃ. ᑖᒃᑯᐊ ᖃᖓᑦᑕᔫᓕᕆᓂᕐᒥᒃ ᐊᐅᓚᑦᓯᔨᐅᔪᑦ ᐊᓪᓚᕕᖃᕋᔭᕐᑐᑦ ᐋᑐᒑᒥ ᐃᓂᖃᕐᒥᓗᑎᓪᓗ ᐊᓪᐴᑕᒥ. ᑖᒃᑯᐊ ᐱᓇᓱᐊᖃᑎᒌᑦᓯᒪᔪᑦ 2018 ᐊᕐᕌᒍᖓᑕ ᐃᓱᓕᓂᖓᓂ ᐱᔭᕇᕐᓯᒪᓛᕐᑐᑦ ᐊᑕᐅᓯᖕᖑᕈᑎᒥᓂᒃ.
ᑖᒃᑯᐊ ᐊᑕᐅᓯᖕᖑᓂᖓᓄᑦ ᒪᑯᓂᖓ ᓂᕆᐅᑦᑐᒍᑦ:
- ᐅᑭᐅᕐᑕᑐᒥ ᖃᖓᑦᑕᔫᓕᕆᓂᖅ ᐱᕙᓪᓕᒋᐊᕐᓂᐊᑎᓪᓗᒍ ᐱᑦᔪᔭᐅᔪᑦ ᐱᒍᑦᔭᐅᓯᐊᓕᐅᒥᓗᑎᒃ, ᓈᒻᒪᓈᕐᑕᓂᕐᓴᐅᓗᑎᒃ ᐅᓚᐱᑕᐅᖕᖏᓂᕐᓴᐅᓗᑎᓪᓗ;
- ᐊᑦᑕᓇᕐᑐᒦᑎᑦᓯᑌᓕᓂᖅ ᐱᕙᓪᓕᒋᐊᑦᓯᐊᓗᒍ ᓄᑖᖑᓂᕐᓴᓂᒃ ᖃᖓᑦᑕᔫᖁᑎᑖᕐᓗᑎᒃ, ᓴᓇᔭᐅᒍᑎᒋᓲᖏᓪᓗ ᖃᖓᑦᑕᔫᑦ B737 ᐊᒻᒪᓗ ATR ᖃᐅᔨᒪᑦᓯᐊᑐᓄᑦ ᐱᓇᓱᐊᕐᑕᐅᒐᔭᕐᓱᑎᒃ
- ᐅᑭᐅᕐᑕᑐᒥ ᖃᖓᑦᑕᔫᓕᕆᓂᖅ ᐆᒪᒍᓐᓇᓯᐊᕐᓂᐊᑎᓪᓗᒍ ᐊᖏᔪᒥ ᓄᓇᒥ ᐱᒍᑦᔨᓂᐅᓲᖅ ᐱᓇᓱᐊᕐᑕᐅᓯᐊᕐᓂᓴᐅᓗᓂ ᑕᒪᓐᓇᓗ ᖃᖓᑦᑕᔫᕐᑏᓂᐊᕐᓂᐅᓲᖅ ᓵᖕᖓᔭᐅᒍᓐᓇᓯᓗᓂ; ᐊᒻᒪᓗ
- ᐅᑭᐅᕐᑕᑐᒧᑦ ᐃᓄᐃᓪᓗ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᖓᓄᑦ ᐃᑲᔪᕐᓯᒍᑎᐅᓗᓂ ᐃᓄᓐᓄᑦ ᓱᓇᒥᑦᓯᐊᑐᒥᒃ ᓇᒻᒥᓂᕆᔭᐅᔫᓗᓂ, ᓄᑖᖅ ᖃᖓᑦᑕᔫᓕᕆᓂᖅ ᑲᓇᑕᐅᑉ ᐅᑭᐅᕐᑕᑐᖓᓂᒃ ᑲᒪᒋᔭᖃᕐᓂᐊᑐᖅ.
“ᖃᖓᑦᑕᔫᑎᒍᑦ ᐱᒍᑦᔭᐅᓂᖅ ᐅᑭᐅᕐᑕᑐᒥᐅᓄᑦ ᐱᖕᖑᐊᓂᑐᐃᓐᓇᐅᖏᑦᑐᖅ; ᐃᓅᓯᖏᓐᓄᑦ ᐊᑦᑐᐊᓚᕆᑦᑐᖅ ᑭᖕᖑᒪᓇᓪᓚᕆᑦᓱᓂᓗ ᐱᓇᓱᐊᕐᑕᐅᓯᐊᖏᓐᓇᓕᒫᕆᐊᓕᒃ.” ᐅᖃᓚᐅᕐᑐᖅ ᐹᑐᕆᒃ ᑯᕉᐸᓐ, ᐊᖓᔪᕐᖃᕆᔭᐅᔪᖅ ᐃᓄᕕᐊᓗᐃᑦ ᑎᒥᖁᑎᖓᓐᓄᑦ (IDC). “ᐅᐱᒍᓱᑉᐳᒍᑦ Canadian North ᐱᕙᓪᓖᒋᐊᕐᓯᒪᓂᖓᓂᒃ ᖃᖓᑦᑕᔫᓕᕆᓂᕐᒥ ᐱᓇᓱᐊᕐᓂᐅᓲᓂᒃ ᐱᒍᑦᔨᓯᐊᕐᓱᓂ ᐊᑦᑕᓇᕐᑐᒦᑎᑦᓯᑌᓕᑦᓱᓂ, ᑲᓇᑕᐅᑉ ᐅᑭᐅᕐᑕᑐᖓᓂᒥᐅᓂᒃ ᐱᑦᔪᔨᑦᓯᐊᐸᑦᓱᓂ ᑕᒪᒃᑯᐊ ᐱᑦᓯᐊᓂᐅᓲᑦ ᑲᔪᓯᑎᑦᓯᐊᕆᐊᓪᓚᓚᖓᕙᕗᑦ ᐱᓇᓱᐊᖃᑎᖃᕐᓗᑕ ᒪᑭᕝᕕᒥᒃ.”
“ᑕᒪᓐᓇ ᐊᑕᐅᓯᖕᖑᑎᑦᓯᓂᖅ ᓄᑖᓂᒃ ᐊᓕᐊᓇᕐᑐᓂᒃ ᐃᓄᓐᓄᑦ ᐅᒃᑯᐃᓯᓚᖓᔪᖅ ᒪᑭᑉᐸᓕᐊᒐᓱᐊᕐᓂᑯᑦ ᐊᑕᐅᓯᐅᓗᓂ ᐊᖏᔫᓗᓂ ᐃᓄᓐᓄᑦ ᓇᒻᒥᓂᕆᔭᐅᔪᒥᒃ ᐱᓇᓱᐊᕐᕕᒥᒃ ᓯᓚᕐᔪᐊᒥ,” ᓵᓕ ᒍᐊᑦ ᐅᖃᓚᐅᔪᖅ ᒪᑭᕝᕕᐅᕐ ᐊᖓᔪᕐᖄᖓ. “100%-ᒥᒃ ᐃᓄᓐᓄᑦ ᓇᒻᒥᓂᕆᔭᐅᓗᓂ ᑖᓐᓇ ᓄᑖᖅ ᖃᖓᑦᑕᔫᓕᕆᓂᖅ ᑮᓇᐅᔭᑎᒍᑦ ᐱᕙᓪᓕᖁᑎᐅᓂᐊᕐᑐᖅ ᑲᓇᑕᐅᑉ ᐅᑭᐅᕐᑕᑐᖓᓂ, ᐅᑭᐅᕐᑕᑐᒥ ᓄᓇᓕᓐᓂ ᑮᓇᐅᔭᓕᐅᕋᓱᐊᕈᑏᑦ ᐅᓄᕐᓯᐅᒥᓗᑎᒃ, ᐱᒍᑦᔨᒍᑎᒋᕙᑦᑕᕗᓪᓗ ᐃᓄᓐᓂᒃ ᐅᓯᑲᑦᑕᑐᕐᑎᒍᑦ ᖃᐅᑕᒫᑦ ᐊᑦᑕᑐᐊᖑᓲᑎᒍᓪᓗ ᐱᐅᓯᐅᒥᒋᐊᓪᓚᓂᐊᕐᒥᔪᑦ.”
ᑐᓴᕐᑎᓯᒍᑎ ᓄᐃᑕᐅᔪᖃᓚᐅᕐᑐᖅ ᓄᓇᕗᑦ ᑲᕙᒪᖓᑕ ᓴᐳᒻᒥᓂᕐᒥᓂᒃ ᓄᐃᑦᓯᒍᑎᖓᓂᒃ ᓄᓇᕗᒻᒥ ᖃᖓᑦᑕᔫᓕᕆᓂᖅ ᐱᓇᓱᐊᕐᑕᐅᓯᐊᕆᐊᖃᕐᓂᖓᓄᑦ; ᐊᑕᐅᓯᖕᖑᑎᑕᐅᓂᖓ ᕘᔅ ᐃᐊ ᑲᓀᑎᐊᓐ ᓄᐊᑦᓗ ᐊᑑᑎᒍᓐᓇᓂᐊᕐᑐᖅ ᑖᒃᑯᐊ ᐱᓇᓱᐊᖃᑎᒌᓐᓂᐊᒪᓂᒃ ᐱᒍᑦᔨᓗᑎᒃ ᐅᖓᑖᓄᓗᐊᓪᓛᑦ ᐱᓇᓱᐊᕐᓗᑎᒃ ᓄᓇᕗᒻᒥᐅᓄᑦ ᐅᑭᐅᕐᑕᑐᒥᐅᓕᒫᓄᓪᓗ.
ᕘᔅ ᐃᐊᒃᑯᑦ ᑲᓀᑎᐊᓐ ᓄᐊᑦᑯᓪᓗ ᐱᒍᑦᔨᕙᑦᑕᖏᑦ ᐱᒍᑦᔨᒍᑎᓄᑦ ᐊᓯᑦᔨᒍᑦᔭᐅᓛᖕᖏᑐᑦ, ᐊᑭᖏᓪᓗ ᖃᖓᑦᑕᐅᑏᑦ ᐅᓪᓗᖁᑎᖏᓪᓗ ᓱᕐᕋᑕᐅᓛᕋᑎᒃ, ᒪᓕᒐᓕᐅᕐᑕᐅᒐᓱᐊᕐᓂᖓᓂ ᐊᑕᐅᓯᖕᖑᑎᑕᐅᒐᓱᐊᕐᓂᖓᓂ. ᑕᒪᒋᒃ ᐱᓇᓱᐊᖃᑎᒌᑦᑐᒃ ᐊᖏᖃᑎᒌᑦᓯᒪᔫᒃ ᑐᓴᐅᒪᑎᑦᓯᓯᐊᖏᓐᓇᓛᕐᓗᑎᒃ ᐱᒍᑦᔨᓲᒥᓂᒃ ᖃᓄᐃᓘᕐᓂᐅᔪᓕᒫᓂᒃ ᐅᓪᓗᖁᑎᓂᒃ ᐊᑦᑕᑐᐊᖑᔪᓂᓪᓗ ᑲᔪᓯᑎᓪᓗᒍ ᐱᓇᓱᐊᕐᓂᖓ.
ᒫᓐᓇᐅᓂᖓᓂ, ᕘᔅ ᐃᐊᒃᑯᑦ ᑲᓀᑎᐊᓐ ᓄᐊᑦᑯᓪᓗ ᐱᒍᑦᔨᒍᑎᖃᑦᓯᐊᖏᓐᓇᓂᐊᕐᑑᒃ ᐊᑦᑕᓇᖕᖏᑐᓂᒃ, ᑐᖕᖓᓇᕐᑐᓂᒃ ᖃᖓᑦᑕᔫᓕᕆᓂᕐᒥ ᐅᑭᐅᕐᑕᑐᒥ ᐱᓇᓱᐊᓲᒥᓂᒃ.
-30-
ᑐᓴᕋᑦᓴᓂᐊᕐᑎᓄᑦ ᖃᐅᔨᒋᐊᕐᕖᑦ:
ᒍᐃᓕᐊᒻ ᑕᒍᓐᓈᖅ
ᑐᓴᕈᑎᓕᕆᓂᕐᒥᒃ ᐊᑕᐅᑦᓯᑰᕐᑎᓯᔨ ᑐᓴᕋᑦᓴᓂᐊᕐᓂᒥᓪᓗ
ᒪᑭᕝᕕᒃ
(819) 964-2925
WTagoona@makivik.org
ᒫᒃ ᐸᓚᒥᖕ
ᑮᓇᐅᔭᓕᕆᓂᕐᒥ ᑐᑭᒧᐊᑦᑎᓯᔨ
ᐃᓄᕕᐊᓗᐃᑦ ᑎᒥᖁᑎᖓᑦ
(867) 678-5429
MFleming@inuvialuit.com