ᐋᑕᒥ ᑎᓖᓪ ᐊᓚᑯ

  • ᐋᑕᒥ ᑎᓖᓪ ᐊᓚᑯ

    ᐊᕙᑎᓕᕆᓂᕐᒥᒃ, ᐆᒪᔪᓕᕆᓂᕐᒥᒃ, ᖃᐅᔨᓴᕐᓂᒥᓪᓗ ᐱᒍᑦᔨᕕᒃ (DEWR)

    1-819-964-2925

    Head Office: Kuujjuaq P.O. Box 179 Kuujjuaq, Quebec J0M 1C0

ᒥᔅᑐ ᐋᑕᒥ ᑎᓕᓪ-ᐊᓚᑯ ᓂᕈᐊᕐᑕᐅᓯᒪᔪᖅ ᐊᖓᔪᕐᖄᑉ ᑐᖓᓕᖓᓄᑦ 2024ᒥ. ᑌᑲᖕᖓᓂᑦ ᓂᕈᐊᕐᓂᖃᕐᑎᓗᒋᑦ ᐊᓯᑦᓴᖃᖕᖏᓇᒥ ᐱᖓᓱᕕᑦᓱᓂ ᐃᓂᒋᔭᕐᒥᓃᖃᑦᑕᓯᒪᓕᕐᑐᖅ – 2017ᒥ, 2020, 2023ᒥᓗ – ᒫᓐᓇ ᓯᑕᒪᒋᓕᕐᑕᖓᓂᒃ ᓂᕈᐊᕐᑕᐅᒪᕕᒻᒥ ᐱᒍᑦᔨᓕᕐᑐᖅ. ᐃᓕᓐᓂᐊᕕᒻᒥ ᐳᑐᕐᓂᕐᓴᒥ ᐱᔭᕇᕈᑎᑖᕐᑐᕕᓂᖅ 1999ᖑᑎᓪᓗᒍ ᐃᑯᓯᒃ ᐃᓕᓐᓂᐊᕕᖓᓂ ᓄᓇᓕᒻᒥᑕ ᓴᓪᓗᓂ. ᐋᑕᒥ ᐱᓇᓱᑦᑎᐅᓯᒪᔪᖅ ᕋᒃᓚᓐ ᐅᔭᕋᕐᓂᐊᕕᖓᓂ ᕙᓪᑲᓐᐳᕆᑦᓴᔅ (Falconbridge) ᐊᒻᒪᓗ ᑭᒋᑦ-ᓄᕗᒻᒥᐅᑦ (Kiewit-Nuvummiut), ᐱᒋᐊᕐᑐᕕᓂᖅ ᐃᓕᓐᓂᐊᑏᑦ ᐱᓇᓱᒐᖃᕐᑎᑕᐅᓂᖏᓐᓂᑦ, ᑭᖑᓂᐊᒍᑦ ᐱᓇᓱᑦᑎᓕᕆᕕᒻᒥ ᐊᑕᐅᑦᓯᑯᓕᕐᑎᓯᔨᐅᑦᓱᓂ, ᑭᖑᓂᐊᒍᓗ ᓄᓇᐅᑉ ᖁᓛᓃᑦᑐᓂᑦ ᑲᒪᒋᔭᐅᒋᐊᓕᓐᓂᑦ ᐊᖓᔪᕐᖄᖑᑦᓱᓂ, ᐅᐃᒪᓇᕐᑐᓕᕆᔨᐅᓯᒪᔪᖅ ᓄᓇᓕᒻᒥᓂ. ᑯᐊᐸᐅᑉ ᓯᓂᑦᑕᕕᖓᓂ ᑲᒪᔨᒻᒪᕆᐅᓯᒪᒻᒧᔪᖅ.

ᐋᑕᒥ ᒪᑭᕝᕕᑯᓅᕆᐊᖕᖓᓯᒪᔪᖅ ᐅᐱᕐᖓᓴᖓᓂ 2011ᒥ ᐳᕐᑐᓂᕐᓴᓂ ᐃᑲᔪᕐᑎᐅᓱᓂ ᐊᖓᔪᕐᖄᑉ ᑐᖓᓕᐊᓄᑦ, ᒥᔅᑐ ᔮᓂ ᐱᑕᒧᑦ. ᑕᒡᒐᓂ ᐱᓇᓱᒐᕐᒥᓂ, ᑐᑭᓯᒪᒍᓐᓇᓯᔪᕕᓂᖅ ᐊᒥᓱᑲᓪᓚᓂᑦ ᐆᒪᔪᓕᕆᓂᕐᒥᒃ ᐊᕙᑎᓕᕆᓂᕐᒥᓗ ᐱᓀᓗᑕᐅᔪᓂᑦ ᓄᓇᕕᒻᒥ ᐃᓄᖏᑦᑕ ᐊᑑᑎᔭᖏᓐᓂᑦ ᐊᑦᔨᒋᖕᖏᑐᓂᑦ ᐅᖁᒣᑦᑐᑲᓪᓚᓂᑦ ᑖᕗᖓᐅᓕᒍᓐᓇᑐᓂᑦ ᐱᑦᓴᖑᒍᓐᓇᑐᓕᕆᓂᕐᓂᓄᓕᖓᔪᓂᑦ. ᑐᓂᒪᑦᓯᐊᓂᕐᒥᓂᒃ ᓄᐃᑕᑎᑦᓯᓱᓂ ᓄᓇᕕᒻᒥᐅᑦ ᑐᓴᕐᑕᐅᑎᓗᒋᑦ ᑭᒡᒐᑐᕐᑕᐅᑎᑦᓯᐊᓱᒋᓗ ᓄᓇᓕᓕᒫᓄᓕᖓᔪᓂᑦ, ᑲᓇᑕᒥ ᓯᓚᕐᔪᐊᒥᓗ, ᐃᓚᐅᑎᓪᓗᒍ ᓯᓚᕐᔪᐊᒥ ᑲᑐᑦᔨᖃᑎᒌᓐᓂᖓᑕ ᑲᑎᖕᖓᓂᕐᔪᐊᖓᓂ ᓯᓚᐅᑉ ᐊᓯᑦᔨᓂᖓᓂ, ᐅᑭᐅᕐᑕᑐᒥ ᑲᑎᖕᖓᓂᖏᓐᓂᑦ, ᓇᓄᓕᕆᓂᕐᒥᒃ ᑲᑎᖕᖓᓂᕐᓂᑦ, CITES-ᑯᓂᑦ, ᐊᑦᔨᒋᖕᖏᑐᓂᓗ ᑲᑎᖕᖓᓂᒻᒪᕆᓂᑦ ᐊᒻᒪᓗ ᑐᑭᓯᒪᔭᐅᑎᑦᓯᓂᕐᓂᑦ ᐊᔪᐃᓐᓇᕈᑎᖃᕐᓱᓂ ᑲᓇᑕᐅᑉ ᓯᓚᑖᓂ. ᑎᒡᒍᐊᑕᐅᔪᕕᓂᖅ ᕋᒃᓚᓐ ᑲᑎᖕᖓᔨᐅᕕᖓᓄᑦ ᓄᓇᕕᒃ ᓂᑯᓪ ᑲᑎᖕᖓᔨᖏᓐᓄᑦ ᐱᓇᓱᑦᑎᐅᖃᑦᑕᓯᒪᓂᕐᒥᓄᑦ ᐅᔭᕋᕐᓂᐊᕕᓐᓂ.

ᐋᑕᒥ ᐊᖓᔪᕐᖄᖑᖃᑎᐅᓐᓂᒥ6 ᐅᖓᕙᐅᑉ ᓄᕗᖓᓂ ᑐᑦᑐᖁᑎᖏᑦ ᓄᓇᖃᕐᖄᓯᒪᔪᐃᑦ ᑲᑎᖕᖓᓂᖃᕐᑎᓗᒋᑦ 2013ᒥᑦ 2019ᒧᑦ. ᐃᑲᔪᕐᓯᓚᕆᓐᓂᒥᔪᖅ ᑲᑎᖕᖓᔨᖏᓐᓂᑦ ᐱᓇᓱᖃᑎᒌᑦᑐᑯᓂ ᒪᑭᕝᕕᑯᓄᑦ ᓕᔭᐅᒪᑦᓱᓂ ᑲᒪᒋᔭᖃᕐᓱᓂ ᐃᓱᐊᕐᓯᕕᒃ ᓄᓇᕕᒻᒥ ᒪᒥᕐᓴᕕᖓᓂᒃ, ᐃᓄᓐᓂᑦ ᐃᑲᔪᕐᓯᕕᒃ ᐅᐃᕆᓯᒪᒍᑎᓕᓂᑦ ᐃᓗᕐᕈᓯᒥᒃ ᐊᑐᕐᓱᑎᑦ ᒪᒥᓴᕐᕕᒥᒃ.

ᐋᑕᒥ ᑲᑎᖕᖓᔨᐅᖃᑦᑕᓯᒪᔪᖅ ᐊᑦᔨᒋᖕᖏᑐᓄᑦ ᑎᒥᖁᑎᖏᓐᓄᑦ ᒪᑭᕝᕕᑯᓂ: ᐃᓄᐃᑦ ᖃᖓᑦᑕᔫᖏᒃ, ᕗᔅᑎ ᐃᐊ, ᓄᓇᕕᒻᒥ ᒥᕐᓱᒉᑦ ᖃᓪᓗᑎᒃ ᐃᓐᑐᐳᕃᔅ, ᓄᓇᕕᒃ ᔨᐅᒪᑎᒃ, ᓄᓇᓯᐊᓪ ᐊᒻᒪᓗ ᑲᐅᑕᖅ ᐃᓪᓗᓕᐅᕐᑏᑦ. ᐅᑯᓇᓂᓗ, ᑲᑎᖕᖓᔨᐅᓐᓂᒥᔪᖅ ᐊᕐᑎᒃᓂᐊᑦ ᑖᒃᑯᐊ ᖃᐅᔨᓴᓲᑦ ᓱᕐᕋᑕᐅᒍᑎᖏᓐᓂᑦ ᓱᑲᑦᑐᒥᒃ ᓯᓚᒃ ᐊᓯᑦᔨᓂᖃᕐᑎᓗᒍ, ᐊᕙᑎᒥᒃ, ᐃᓅᖃᑎᒌᓂᑦ-ᑮᓇᐅᔭᓕᕆᓂᕐᒧᑦ ᐊᓯᑦᔨᓂᕐᒥᒃ. ᐅᓇᒋᐊᓪᓚᓗ, ᑲᑎᖕᖓᔨᐅᖃᑎᐅᓯᒪᔪᖅ ᐅᑭᐅᕐᑕᑐᒥ ᐸᕐᓀᓂᕐᒧᑦ ᑲᑐᑦᔨᖃᑎᒋᓐᓂᖓᓄᑦ ᑎᒡᒍᐊᑕᐅᔪᕕᓂᖅ 2017ᖑᑎᓪᓗᒍ ᐊᕐᕌᒍᓄᑦ ᓯᑕᒪᓄᓕᖓᔪᒥᒃ ᐅᑭᐅᕐᑕᑐᖓᓂ ᑲᓇᑕᒥ ᖃᐅᔨᒪᓂᕐᒥᓄᑦ, ᐊᑑᑎᓯᒪᔭᖏᑦ ᑕᕐᕋᖓᓂ ᐅᑭᐅᕐᑕᑐᒥᓗ ᖃᐅᔨᓴᕐᓂᓂᑦ ᐱᓀᓗᑕᐅᔪᓂᑦ ᐊᑐᕐᓂᖃᑦᓯᐊᓯᒪᕗᑦ.

ᒫᓐᓇᐅᑎᓪᓗᒍ ᑲᑎᖕᖓᔨᐅᖃᑎᐅᔪᖅ ᐆᒪᔪᕐᓂᐊᑎᓂᑦ ᐃᖃᓪᓕᐊᑎᓂᑦ ᒥᑭᒋᐊᕐᓂᐊᑎᓂᑦ ᐊᑕᐅᑦᓯᑯᓕᕐᑎᓯᓂᕐᒥᒃ ᑲᑎᖕᖓᔨᖏᓐᓄᑦ ᑕᒡᒐᓂ ᐃᓚᐅᔪᖅ 2011ᒥᓂᑦ ᐊᖓᔪᕐᖄᕆᔭᐅᔪᕕᓂᖅ 2013, 2017 ᐊᒻᒪᓗ 2020ᒥ.

ᒫᓐᓇᒻᒥᐅᓂᕐᓴᖅ ᑎᒡᒍᐊᑕᐅᒪᓚᐅᔪᖅ ᑲᑎᖕᖓᔨᖏᓐᓄᑦ ᐱᒍᑦᔨᕕᖓ ᐅᑭᐅᕐᑕᑐᒥ ᑯᐯᒃᒥ (Institut Nordique du Quebec) 2020ᒥ, ᐊᑦᔨᒋᖕᖏᑐᐃᑦ ᐃᓕᓐᓂᐊᕕᕐᔪᐊᑦ ᖃᐅᔨᒪᔪᒻᒪᕆᖏᑦ ᑯᐯᒃᒥ ᑕᕐᕋᒥᒃ ᐅᑭᐅᕐᑕᑐᒥᓗ ᖃᐅᔨᓴᕐᓂᓕᕆᕕᖓᓂ. ᑲᑎᖕᖓᔨᕈᒋᐊᓪᓚᓚᐅᔪᒻᒥᔪᖅ ᑐᕐᙰᑦ ᖃᕐᖃᖏᑦᑕ ᒥᕐᖑᐃᓯᕐᕕᖓᑕᑕ ᑲᑎᖕᖓᔨᖏᓐᓄᑦ.

ᐋᑕᒥ ᓲᓱᒋᔭᐅᑦᓯᐊᑐᖅ ᓄᓇᓕᒻᒥᓂ ᓴᓪᓗᓂ, ᑰᑦᔪᐊᒥᐅᖑᓕᕐᑐᖅ ᐁᑉᐸᖃᕐᓱᓂ ᕕᒃᑐᕆᐊᒥᒃ ᕿᑐᕐᖓᒋᓐᓂᓗ ᓕᓄᔅ ᐊᒻᒪᓗ ᓗᐃᔅ. ᐊᒥᓱᓂ ᐱᒋᐅᕐᑕᕕᓂᖏᓐᓂᑦ, ᐋᑕᒥ ᐱᖓᓱᓂ ᐅᖃᐅᓯᕐᓂᑦ ᐅᖄᒍᓐᓇᓯᐊᕐᑐᖅ (ᐃᓄᒃᑎᑐᑦ, ᒍᐃᒍᐃᑎᑐᑦ ᖃᓪᓗᓈᑎᑐᓗ), ᐊᓕᐊᒋᔭᓕᒃ ᐆᒪᔪᕐᓂᐊᕆᐊᒥᒃ ᐃᖃᓪᓕᐊᕆᐊᒥᒃ ᓂᑦᔭᓗᑦᑖᕆᐊᒥᓗ ᐊᓕᐊᒋᔭᖃᕐᓱᓂ ᐊᒻᒪᓗ ᑐᓴᕐᓂᔮᕐᑎᓯᓕᕐᒪᑕ ᐊᑦᔨᒋᖕᖏᑐᓄᑦ ᐃᓚᐅᓲᖑᑦᓱᓂ.

ᓂᕈᐊᕐᑕᐅᒪᓂᕐᒥᓄᑦ ᒪᑭᕝᕕᑯᓄᑦ, ᐋᑕᒥ ᑐᓂᒪᑦᓯᐊᑐᖅ ᑭᒡᒐᑐᑦᓯᐊᕋᓱᑦᓱᓂ ᐃᓱᐊᓈᕈᑎᑦᓴᖏᓐᓂᑦ ᓄᓇᕕᒻᒥᐅᑦ ᐃᓗᕐᕈᓯᖓ ᐱᑐᑦᓯᒪᓂᖓᓄᑦ ᓄᓇᒧᑦ ᐊᒻᒪᓗ ᓄᓇᕕᒻᒥ ᑖᕗᖓᐅᓕᒍᓐᓇᑐᓂᑦ ᐱᑦᓴᖑᒍᓐᓇᑐᓂᑦ ᐊᕙᑎᒥᓗ.