ᒪᑭᕝᕕᐅᑉ ᑲᑎᒪᓂᒻᒪᕆᖓ ᐃᓱᓕᓚᐅᔪᕗᖅ ᓯᑕᒪᓂ ᐅᓪᓗᓂ ᑲᑎᒪᒌᕐᒪᑕ ᐃᓚᐅᔪᐃᑦ ᓈᒻᒪᓴᕐᑎᓗᒋᑦ ᒪᑭᕝᕕᐅᑉ ᐱᓇᓱᐊᕐᓂᒥᒍᑦ ᐱᕙᓪᓕᐊᓂᕆᔭᖓᓂ, ᖄᖏᕐᓂᑯᓕᐅᕐᑎᒥᒍᑦ ᐱᓂᐊᓐᓂᓕᕆᓂᒃᑯᓗ.
ᒪᑭᕝᕕᐅᑉ ᑎᒥᖁᑎᒋᔭᖏᑦ ᖄᖏᕐᓂᑯᓕᐅᕐᑎᖁᑎᖏᑦ ᖃᖓᑦᑕᔫᕐᑏᑦ ᕗᔅᑦ ᐃᐊ, ᐃᓄᐃ ᖃᖓᑦᑕᔫᖏᓪᓗᓗ, ᖃᓪᓗᑎᒃ ᐅᕐᓱᐊᓗᓐᓂᐊᑏᑦ, ᓄᓇᕕᒻᒥ ᓴᓇᒉᒃᑯᑦ; ᐊᒻᒪᓗ ᑲᑐᔾᔨᖃᑎᖃᕐᓱᑎᒃ ᖄᖏᕐᓂᑯᓕᐅᕐᕕᖃᕈᑎᒋᒻᒥᔭᖏᑦ ᒪᑭᕝᕕᐅᑉ ᑕᕐᕋᒥ ᐅᒥᐊᕐᔪᐊᑯᑦ ᓂᐅᕐᕈᑎᑦᓯᔩᑦ ᐊᒻᒪᓗ ᐅᑭᐅᕐᑕᑐᒥᐅᑦ ᐃᓄᐃᑦ ᑎᒥᐅᔪᖁᑎᖓᑦ, ᐅᓈᒃᑯᑦ ᐃᖃᓗᓐᓂᐊᑏᑦ ᓄᓇᕗᑦ ᐅᒥᐊᕐᕈᐊᓕᕆᔩᓪᓗ; ᑐᓴᕐᑎᓯᑦᓯᐊᓚᐅᔪᕗᑦ ᓈᒻᒪᒋᔭᐅᔪᓂᒃ ᑲᑎᒪᔪᓄᑦ.
ᐃᓅᔾᔪᓯᓕᕆᓂᕐᒥ ᐅᖃᒍᑕᐅᓚᐅᔪᐃᑦ ᐃᖅᑲᑐᐃᔨᓕᕆᓂᖅ, ᐊᒻᒪᓗ ᕿᒻᒦᔭᕐᑕᐅᓂᕕᓂᖅ ᐅᖄᒍᑕᐅᑦᓱᓂ ᑐᓴᕐᓇᓚᐅᔪᕗᖅ ᐃᒫᒎᖅ ᑯᐯᑉ ᑲᕙᒪᖓ ᐱᕕᖃᕐᑎᓯᓛᕐᓂᐊᒍᓇᐅᒻᒪᒎᖅ ᐃᓕᒃᑰᓯᐊᕐᑐᒥᒃ ᖃᐅᔨᓴᕐᑎᓯᓂᕐᒥᒃ ᐃᓄᐃᑦ ᕿᒻᒥᔭᕐᑕᐅᓂᕕᓂᖓ ᐱᔾᔪᑎᒋᓗᒍ. ᐊᒻᒪᓗ ᓄᓇᕕᒻᒥ ᐃᓅᒐᓱᐊᕆᐊᒥᒃ ᑖᒃᓰᔭᕐᓂᓗ ᓇᓕᑐᓗᐊᕐᒪᓃᒃ ᖃᓄᕐᑑᒍᑕᐅᒋᐊᖃᓪᓚᕆᓐᓂᒋᒃ ᓂᓪᓕᒍᑕᐅᖏᓐᓇᖃᑦᑕᓚᐅᔪᒻᒥᔫᒃ ᓇᓕᑭᓪᓕᒋᐊᓕᐅᒥᒋᐊᖃᕐᓂᒋᒃ.ᐊᒻᒪᓗ ᐅᖄᒍᑕᐅᔪᒻᒪᕆᐅᓚᐅᔪᒻᒥᔪᖅ ᓄᓇᕕᒻᒥ ᕿᓚᓗᒉᑦ, ᒫᓐᓇᐅᔪᖅ ᓄᓇᕕᒻᒥᐅᑦ ᕿᓚᓗᒐᕐᓂᐊᑎᑕᐅᑦᑌᓕᕙᓕᕐᒪᑕ ᐱᖁᔭᓄᑦ. ᐃᑉᐱᒋᔭᐅᓚᐅᔪᕗᖅ ᑲᕙᒪᒃ ᐱᖁᔭᓕᐅᓕᕋᒥ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑲᒪᒋᔭᖃᙱᓗᐊᕐᒪᑦ. ᐃᓄᐃᑦ ᓴᐅᓴᓐᑎᓂ ᐅᑭᐅᓂ ᓄᓇᕕᒻᒥᐅᒍᓕᕐᒪᑕ ᐋᐳᙰᕐᓴᓂᒃᑯᑦ ᖃᐅᔨᓴᕐᑏᑦ ᐊᑐᕐᑐᓴᐅᕗᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᑭᑖᕆᒐᓱᐊᙱᓂᕐᒥᓂ ᖃᓄᖅ ᕿᓚᓗᒉᑦ ᕿᓚᓗᒐᕐᓂᐊᑕᐅᒐᔭᕐᓂᖏᓐᓂᒃ ᖏᓐᓂᖏᓐᓂᓘᓐᓃᑦ ᓄᓇᕕᒻᒥ.
ᑕᕝᕙᓂ ᐊᕐᕌᒍ ᐊᖓᔪᖅᑳᑉ ᑐᖓᓕᖓ ᒪᑭᑉᐸᓕᐊᒐᓱᐊᕐᓂᒧᑦ ᓂᕈᐊᕐᑕᓂᖓ ᓇᓪᓕᐅᑎᓚᐅᕐᒥᒪᑦ ᐋᑕᒥ ᐊᓚᑯ ᓴᓪᓗᒥᐅᖅ ᐊᖓᔪᖅᑳᑉ ᑐᖓᓕᖓᓄᑦ ᐃᓕᒋᐊᓪᓛᒐᓱᐊᕐᑐᖅ ᐊᒻᒪᓗ ᒣᑯ ᑯᐊᑕ ᐃᓕᒐᓱᐊᕐᒥᑎᓪᓗᒍ. ᑌᒪᓕ ᒣᑯ ᑯᐊᑕ ᓂᕈᐊᕐᑕᐅᓚᐅᔪᕗᖅ 55&ᖏᓐᓄᑦ ᓂᕈᐊᕐᑐᐃᑦ ᐊᒻᒪᓗ ᓂᕈᐊᕈᓐᓇᑐᓕᒫᓂᑦ ᓂᕈᐊᕐᑐᐃᑦ ᓂᕿᑦᓯᑐᓂ ᓇᑦᓯᐊᓕᐅᑦ 30 39&ᖏᑦ ᓂᕈᐊᓚᐅᔪᕗᑦ.
ᒪᑭᕝᕕᐅᑉ ᑮᓇᐅᔭᕐᑑᑎᖏᑦ ᐊᖏᕈᑕᐅᓲᒍᒻᒥᒪᑕ ᑲᑎᒪᓂᒻᒪᕆᐅᑉ ᐱᒋᐊᕐᓂᖓᓂ ᑲᒪᒋᔭᐅᑦᓴᐅᑎᒋᓂᐊᕐᒥᔪᐃᑦ. ᑕᕝᕙᓂ ᐊᕐᕌᒍ ᐃᓚᐅᔪᐃᑦ ᑮᓇᐅᔭᖁᑎᖏᑦ R216,117,099ᒍᕗᑦ ᕿᑐᕐᖏᐅᓂᒃᑯᑦ ᑮᓇᐅᔭᓕᐅᕐᓯᒪᑦᓱᑎᒃ R91,9907,349ᓂᒃ. ᑖᒃᑯᐊ ᖄᖏᕐᓂᑯᓕᐅᕈᑏᑦ ᐅᓄᕐᓯᐊᐱᓯᒪᓕᕐᒥᔪᐃᑦ ᐊᕐᕌᓂᓂᑦ ᐅᓄᕐᓯᒋᐊᕈᑎᖃᓚᕿᓗᐊᙳᐊᓱᑎᒃ ᒪᑭᕝᕕᐅᑉ ᖄᖏᕐᓂᑯᓕᐅᕐᑎᖏᑦᑕ ᐱᑦᓯᐊᓯᒪᓂᑯᖏᓐᓄᑦ. ᑮᓇᐅᔦᑦ ᐊᖏᖃᑎᒌᒍᑎᒥᑦ ᓴᓇᕐᕈᑎᒥᓂᑌᑦ ᑐᓂᔾᔪᑕᐅᓯᒪᒻᒥᔪᐃᑦ ᓄᓇᕕᒻᒥ ᑎᒥᐅᔪᓄᑦ ᐅᑯᓄᖓ ᐊᕙᑕᖅ ᐱᐅᓯᑐᖃᓕᕆᕕᒃ, ᑕᕐᕋᒥᐅᑦ ᓂᐱᖓᑦ, ᓴᐳᑎᑦ ᐃᓄᐃᑦ ᐅᕕᒐᕐᑐᐃᑦ ᑲᑐᔾᔨᖃᑎᒌᖓ, ᐊᖑᕕᒐᒻᒪᕆᒃᑯᑦ ᐆᒪᔪᓕᕆᔩᑦ, ᐊᒻᒪᓗ ᓄᓇᒥ ᑎᒍᒥᐊᕐᑎᑯᑦ ᓄᓇᓕᓕᒫᓂ ᑲᑐᔾᔨᖃᑎᒌᓐᓂᖓ ᐃᓘᓐᓇᖏᑦ ᑮᓇᐅᔭᓂᒃ ᐁᑦᑐᑕᐅᓚᐅᔪᐃᑦ 3R ᒥᓕᐊᓐᓇᓂᒃ ᑲᑎᓕᕆᒥᒃ.
ᒪᑭᕝᕕᒃ ᑎᒥᖁᑕᐅᕗᖅ ᐃᓄᓐᓄᑦ ᓇᒻᒥᓂᕆᔭᐅᑦᓱᓂ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᐊᕐᑎᓗᒍ ᓴᕐᕿᑎᑕᐅᓯᒪᑦᓱᓂ ᐊᑎᓕᐅᖃᑎᒌᒍᑕᐅᑎᓪᓗᒋᑦ ᔦᒥᓯ ᐯᑉ ᑯᐯᒃ ᑕᕐᕋᖓᑕᓗ ᐊᖏᖃᑎᒌᒍᑎᖏᑦ ᐊᕐᕌᒍᖅ 1975ᖑᑎᓪᓗᒍ. ᑎᓕᔭᐅᒪᒍᑎᖃᕐᑐᖅ ᑭᒡᒐᑐᕐᑎᐅᓂᐊᕐᓗᓂ 9,800ᓂᒃ ᐅᓄᕐᓂᓕᓐᓄᑦ ᓄᓇᕕᐅᑉ ᐃᓄᑐᐃᓐᓇᖏᓐᓄᑦ ᑭᒡᒐᑐᕐᓗᓂᒋᑦ ᐱᓂᐊᕐᓂᓕᕆᓂᑎᒍᑦ ᐊᒻᒪᓗ ᐊᐅᓚᑦᓯᒍᔾᔨᓗᒋᑦ ᑮᓇᐅᔭᖃᕐᑎᑕᐅᒍᑎᑖᕆᓯᒪᔭᖏᓐᓂᒃ ᐊᖏᖃᑎᒌᓐᓂᒧᑦ (R90ᒥᓕᐊᓐᓂᒃ ᑮᓇᐅᔭᕐᑖᑎᑕᐅᒪᓕᕐᑐᖅ ᐊᕐᕌᒍᐃᑦ 20 ᐊᓂᒍᕐᐸᓕᐊᓂᖏᓐᓂ). ᒪᑭᕝᕕᒃ ᑎᒥᐊᕈᖁᑎᖃᕐᑐᖅ ᐃᓄᐃᑦ ᖃᖓᑦᑕᔫᖏᓐᓂᒃ, ᕘᔅ ᐃᐊᒃᑯᓂᒃ, ᓄᓇᕕᒻᒥ ᓴᓇᒉᒃᑯᓂᒃ, ᖃᓪᓗᑎᒃ ᐅᕐᓱᐊᓗᓐᓂᐊᑎᒃᑯᓂᒃ, ᐊᒻᒪᓗ ᑲᑐᔾᔨᖃᑕᐅᑦᓱᓂ ᑕᕐᕋᒥ ᐅᒥᐊᕐᔪᐊᑯᑦ ᓂᐅᕐᕈᑎᑦᓯᔨᓂᒃ, ᐊᒻᒪᓗ ᐃᓄᑐᐃᓐᓇᐅᖃᑎᒥᓂᒃ ᑲᑐᔾᔨᖃᑕᐅᑦᓱᓂ ᓄᓇᖁᑎᒥ ᑎᒥᖁᑎᖏᓐᓄᑦ ᓇᒻᒥᓂᖃᖃᑕᐅᑦᓱᓂ ᐅᑭᐅᕐᑕᑐᒥᐅᑦ ᐃᓄᐃᑦ ᑎᒥᐅᔪᖁᑎᖓᓐᓂᒃ ᐊᒻᒪᓗ ᐅᓈᖅ ᐃᖃᓗᓐᓂᐊᑎᒃᑯᓂᒃ.
-30-
ᑐᑭᓯᒋᐊᒃᑲᓂᕈᒪᔪᑦ ᖃᐅᔨᒋᐊᕈᓐᓇᑐᑦ ᐅᕙᙵᑦ:
ᓖᓴ ᖁᐱᕐᕈᐊᓗᒃ ᑐᓴᖃᑦᑕᐅᑎᒍᑎᓕᕆᓂᕐᒥᒃ ᐱᓇᓱᑦᑎ ᖃᕆᑕᐅᔭᒃᑯᑦ:
ᓄᓕᔨᕿᑭᖏᒥᖑᓗᒥᓄ2ᒪᖑᓄᓂᑲᓂᓄ.ᓕᑭᑐ ᐅᖄᓚᐅᑎᖓ 514-386-0669