ᑐᓴᕋᑦᓭᑦ
ᐅᒃᑑᐸ 29, 2024-ᒥ – ᐃᖃᓗᓐᓂᑦ, ᓄᓇᕘᒥᑦ Baffin Regional Chamber of Commerce-ᑯᑦ ᐅᐱᒋᑦᓱᒍ ᑐᓴᕐᑕᐅᑎᑦᓯᓯᒪᕗᑦ ᒪᑭᕝᕕᒥᒃ ᑲᑐᑦᔨᖃᑎᖃᕐᓱᑎᒃ, ᓯᕗᓪᓕᐹᑦᓯᐊᒍᓛᕐᑐᒥᒃ ᑕᑯᑦᓴᐅᑎᑦᓯᓂᐅᓛᕐᑐᒥᒃ ᑲᑎᒪᓂᕐᔪᐊᒍᓛᕐᑐᒥᓪᓗ. ᑖᓐᓇ ᐅᑭᐅᕐᑕᑐᕐᒥᐅᓄᑦ ᓯᕗᓕᕐᑕᐅᓗᓂ ᓱᑎᑦᓯᓂᐅᓛᕐᑐᖅ ᐊᑑᑎᔭᐅᓛᕐᖁᖅ ᕕᐳᐊᕆ 17-ᒥᑦ 20-ᒧᑦ, 2025-ᒥ ᐅᕙᓂ Rogers Centre ᐊᑐᒑᒦᑦᑐᒥ (Shaw Centre-ᒍᖃᑦᑕᓯᒪᔪᒥ).
ᐊᕐᓴᓃᑦ ᑕᑯᑦᓴᐅᑎᑦᓯᓂᐅᓛᕐᑐᖅ ᑲᑎᒪᓂᕐᔪᐊᒍᓗᓂᓗ ᓄᐃᑕᑎᑦᓯᕕᐅᓛᕐᖁᖅ ᐱᕕᑦᓴᐅᒍᓐᓇᑐᓂᒃ ᐱᒐᓱᐊᒻᒪᕆᓐᓇᑐᒃᑰᕈᑕᐅᓲᓂᓪᓗ ᐱᓇᓱᒐᖃᕐᕕᓂᒃ ᐱᕙᓪᓕᐊᒐᓱᐊᕐᑐᓄᑦ ᐅᑭᐅᕐᑕᑐᒥ ᐋᕐᕿᓱᐃᒍᑎᑦᓴᓯᐅᕋᓱᐊᕐᓂᐅᓗᓂᓗ ᓄᑖᓂᒃ ᐱᒋᐊᕐᑎᓯᒍᑕᐅᒍᓐᓇᑐᓂᒃ ᐅᓪᓗᒥ ᓯᕗᓂᑦᑎᓂᓪᓗ. ᖃᐅᔨᕙᓪᓚᓯᐊᖃᑦᑕᓗᑕ ᐊᑦᔨᒋᔭᐅᓲᒍᖕᖏᓂᖏᓐᓂᒃ ᐱᒐᓱᐊᒻᒪᕆᓐᓇᑐᒃᑰᕈᑕᐅᓲᑦ ᐊᐅᓚᑦᓯᒍᓐᓇᕈᒪᔪᓄᑦ ᐅᑭᐅᕐᑕᑐᕐᒥ, ᑲᑎᑎᑦᓯᓛᕐᖁᒍᑦ ᐃᓄᓐᓂᒃ ᓯᕗᓕᕈᓐᓇᓲᓂᒃ, ᐱᓇᓱᕝᕕᓂᓪᓗ ᓯᕗᓕᕈᓐᓇᓲᓂᒃ ᐊᒻᒪᓗ ᓇᒻᒥᓂᖅ ᐱᓇᓱᒐᖃᓲᓂᒃ, ᑲᑐᑦᔨᖃᑎᒌᒍᑎᖃᓛᕐᒪᑕ ᐋᕐᕿᓱᐃᒍᑎᑦᓴᓯᐅᕐᓂᒥᒃ ᐱᕈᕐᐸᓕᐊᓂᖃᑦᓯᐊᖁᔨᒧᑦ ᑲᔪᓯᑦᓯᐊᑐᓂᒃ ᓄᓇᕕᒻᒥ.
ᓱᓕᓗ ᐱᓇᓱᒐᖃᕐᓂᒥᒃ ᐅᓂᒃᑳᖃᑦᑕᒥᓗᑎᒃ, ᑲᑎᒪᓂᕐᔪᐊᒥ ᓄᐃᑕᑎᑦᓯᖃᑦᑕᓛᕐᒥᓱᑎᒃ ᐊᑦᔨᒋᔭᐅᖕᖏᑐᓗᑳᓂᒃ ᐱᓕᐊᕕᓂᕐᓂᒃ ᐃᓕᕐᖁᓯᕐᒨᓕᖓᔪᓂᓪᓗ ᐃᓄᐃᑦ ᓄᓇᖓᓂᓕᒫᖅ ᐱᓯᒪᔪᓂᒃ. ᑖᕙᓃᓛᕐᒥᔪᑦ ᐱᓕᐅᓲᑦ ᓄᓇᕘᕐᒥᐅᑦ, ᓄᓇᕕᒻᒥᐅᑦ, ᓄᓇᑦᓯᐊᕘᕐᒥᐅᑦ ᐃᓄᕕᐊᓗᒻᒥᐅᓗ, ᑕᑯᓂᐊᕐᑕᐅᖃᑦᑕᓗᑎᒃ ᓯᕿᓂᕐᒥᐅᓄᑦ ᓯᓚᕐᔪᐊᒥᐅᒍᖃᑎᑦᑎᓄᓪᓗ ᐅᖄᕕᐅᒋᐊᕐᑐᖃᑦᑕᓗᑎᒃ ᐱᓕᐊᕕᓂᖏᓐᓂᒃ ᑐᑭᓯᒍᒪᔪᓄᑦ ᖃᓄᕐᓗ ᐱᕐᖁᓯᕐᒥᑎᒍᑦ ᐱᓇᓱᐊᓲᒍᒻᒪᖔᑕ.
ᑕᒪᓐᓇ ᓱᑎᑦᓯᓂᐅᓛᕐᑐᖅ, ᓯᕗᓕᕐᑕᐅᓛᕐᑐᖅ ᐅᑭᐅᕐᑕᑐᕐᒥᐅᑦ ᐱᓇᓱᕝᕕᖏᓐᓄᑦ, ᓄᐃᑦᓯᒍᑕᐅᓛᕐᑐᖅ ᐱᓪᓚᕆᐅᒋᐊᖓᓂᒃ ᑲᑐᑦᔨᒍᑎᒋᓗᒍ ᐱᓇᓱᖃᑎᒌᒍᓐᓇᓂᕐᒥᒃ ᓲᖑᔪᑦᓯᐊᒥᒃ ᖃᓄᐃᖕᖏᓯᐊᕐᑐᒥᓪᓗ ᒪᑭᑕᒐᓱᐊᕈᑎᑦᓴᖃᑦᓯᐊᐸᖁᔨᒧᑦ ᑮᓇᐅᔭᑎᒍᑦ ᐃᓄᓕᒫᓂᒃ ᐃᓄᐃᑦ ᓄᓇᓕᒫᖓᓂ.
“ᒪᑭᕝᕕᑯᑦ ᕿᓚᓈᕐᐳᑦ ᐃᓚᐅᓛᕐᓂᒥᓂᒃ ᑕᒪᑐᒧᖓ ᓯᕗᓕᕐᑕᐅᓛᕐᑐᒧᑦ ᐅᑭᐅᕐᑕᑐᕐᒥᐅᓄᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᐱᓇᓱᖃᑎᒌᓐᓂᕆᓛᕐᑕᖓᓄᑦ ᓯᕗᓂᑦᑎᓂ ᒪᑭᑕᒐᓱᐊᕈᑎᑦᓴᓂᒃ ᑮᓇᐅᔭᑎᒍᑦ ᐱᕙᓪᓕᐊᓂᖃᑦᓯᐊᖁᔨᒧᑦ. ᑐᕌᒐᖃᕐᑐᒍᑦ ᓲᖑᓯᑎᑦᓯᒋᐊᕈᒪᓂᕐᒥᒃ ᐅᑭᐅᕐᑕᑐᒥ ᒪᑭᑕᒐᓱᐊᕈᑎᑦᓴᐅᓲᓂᒃ ᑮᓇᐅᔭᑎᒍᑦ ᖁᑉᐹᒍᑦᑕᐅᖅ ᓄᓇᕕᒻᒥᐅᑦ ᐃᓚᐅᒍᑎᓖᑦ ᐃᓄᐃᓪᓗ ᐃᓄᐃᑦ ᓄᓇᓕᒫᖓᓃᑦᑐᑦ ᐊᑐᐃᓐᓇᖃᕐᑎᑕᐅᖁᒐᑦᑎᒋᑦ ᐱᕕᑦᓴᖃᕐᑎᓯᒍᑕᐅᓲᓂᒃ. ᐊᕐᓴᓃᑦ ᑕᑯᑦᓴᐅᑎᑦᓯᓂᐅᓛᕐᑐᖅ ᑲᑎᒪᓂᕐᔪᐊᒍᓗᓂᓗ ᐆᑦᑐᕋᐅᑎᑦᓯᐊᒍᕗᖅ ᐱᔭᕆᔭᐅᒍᓐᓇᓲᓂᒃ ᑲᑐᑦᔮᖃᓕᑐᐊᕋᑦᑕ ᓄᓇᓕᑦᑕ ᒪᑭᑕᑦᓯᐊᕈᑎᑦᓴᖏᓐᓂᒃ,” ᐅᖃᕐᑐᖅ ᐋᓐᑎ ᒧᐊᖃᐅᔅ, ᐊᖓᔪᕐᖄᑉ ᑐᖓᓕᖓ ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ ᑮᓇᐅᔭᑎᒍᑦ ᒪᑭᕝᕕᒥ.
“ᐃᓄᓐᓂᒃ ᑲᑎᑎᑦᓯᖃᑦᑕᕆᐊᖃᕐᓂᕗᑦ ᐱᓪᓚᕆᐅᒻᒪᑦ ᑕᒪᒃᑯᑎᒎᓇ ᐅᑭᐅᕐᑕᑐᕗᑦ ᑐᑭᓯᒪᔭᐅᖁᓗᒍ ᓯᕿᓂᕐᒦᑐᓄᑦ ᓄᓇᕘᕐᒥ ᓄᓇᕕᒻᒥᓗ ᐱᕕᑦᓴᐅᒍᓐᓇᑐᑦ ᖃᐅᔨᒪᔭᐅᒋᐊᖃᕐᓂᖏᓐᓄᑦ. ᐅᑭᐅᕐᑕᑐᖅ ᓱᑲᑦᑐᒥᒃ ᐱᕙᓪᓕᐊᓂᖃᓕᕐᒪᑦ, ᓴᐳᑦᔭᐅᓯᒪᒋᐊᖃᕐᓱᑕᓗ ᐱᓇᓱᖃᑎᖃᖃᑦᑕᓗᑕᓗ ᐱᕙᓪᓕᐊᓂᖃᕐᑎᓯᓂᐊᕈᑦᑕ,” ᐅᖃᕐᑐᖅ Steve Sullivan ᐊᖓᔪᕐᖄᖓ BRCC-ᑯᑦ. “
ᕿᓚᓈᕐᐳᒍᑦ ᑐᑭᓯᔭᐅᒋᐊᓕᓐᓂᒃ ᑐᓴᐅᒪᑎᑦᓯᓂᕆᖃᑦᑕᓂᐊᕐᑕᑎᓐᓂᒃ ᐅᓪᓗᓂ ᓯᕗᓂᑦᑎᓂ.
-30-
ᖃᐅᔨᒋᐊᕐᑐᕕᑦᓭᑦ
ᑲᒪᔨᒻᒪᕆᖓ
Baffin Regional Chamber of Commerce
execdir@baffinchamber.ca
www.baffinchamber.ca/
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑎᒌᒍᑎᓂᒃ
ᒪᑭᕝᕕᒃ
ctagoona@makivvik.ca
www.makivvik.ca
Baffin Regional Chamber of Commerce (BRCC)
Baffin Regional Chamber of Commerce -ᑯᑦ ᐱᓇᓱᕝᕕᐅᕗᑦ ᓄᐃᑕᐅᓯᒪᑦᓱᑎᒃ ᖃᐅᔨᒪᔭᐅᑎᑦᓯᒋᐊᖃᕐᓱᑎᒃ ᐱᐅᓯᑎᑦᓯᐊᖃᑦᑕᕆᐊᖃᕐᓱᑎᓪᓗ ᐱᓇᓱᒐᖃᕐᕕᑖᐸᓪᓕᐊᒋᐊᖃᕐᓂᒥᒃ ᑲᒪᒋᑦᓯᐊᓗᒍ ᖁᑉᐹᒍᑦᑕᐅᖅ ᐱᓪᓚᕆᐅᑎᑦᓯᓗᑎᒃ ᐃᓚᐅᔪᓂᒃ ᐱᕙᓪᓕᖁᑎᑖᕐᑎᓯᖃᑦᑕᓂᒃᑯᑦ, ᐱᓇᓱᖃᑎᒌᓐᓂᑎᒍᑦ, ᑐᓴᐅᒪᖃᑦᑕᐅᑎᓂᑎᒍᑦ, ᓂᐸᖃᕐᑎᓂᒃᑯᑦ ᐱᒋᐊᕐᑎᓯᖃᑦᑕᓂᒃᑯᓗ. ᓂᐸᖃᕐᑎᓯᔨᐅᕗᒍᑦ ᐱᓇᓱᒐᖃᕐᕕᓂᒃ ᕿᑭᕐᑖᓂ ᓄᓇᕘᕐᒥ.
ᒪᑭᕝᕕᒃ
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᑎᒃ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔭᓂᒃ ᐃᓅᓯᒃᑯᑦ ᐱᕙᓪᓕᖁᑎᑦᓴᕆᒐᔭᕐᑕᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᐱᔭᐅᒍᓐᓇᑐᓂᒃ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒃᑯᑦ. ᒪᑭᕝᕕᐅᑉ ᐱᔭᑦᓴᖏᓐᓄᑦ ᐃᓚᒋᔭᐅᑎᓪᓗᒍ ᐊᐅᓚᑕᐅᓂᕆᒋᐊᓕᖏᑦ ᑮᓇᐅᔭᓕᐅᕋᓱᐊᕈᑎᑦᓴᐅᒋᐊᖃᕐᓂᖏᓪᓗ ᑖᒃᑯᐊ ᑮᓇᐅᔦᑦ ᖃᐅᔨᒪᔭᐅᑎᑦᓯᔨᐅᓗᑎᓪᓗ ᒪᑭᑕᒐᓱᐊᕈᑎᑦᓴᓕᐅᕈᑎᑦᓴᓂᒃ ᑮᓇᐅᔭᑎᒍᑦ ᐃᑲᔪᕐᓯᒪᖃᑦᑕᓂᒃᑯᑦ ᓄᐃᑕᐅᕙᓪᓕᐊᒋᐊᖃᕐᓂᖏᓐᓂᒃ ᐃᓄᓐᓄᑦ-ᐊᐅᓚᑕᐅᑦᓱᑎᒃ ᐱᓇᓱᒐᖃᕐᕖᑦ ᓄᓇᕕᒻᒥ. ᒪᑭᕝᕕᒃ ᖃᐅᔨᒪᔭᐅᑎᑦᓯᓲᒍᒻᒪᑦ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐃᓄᐃᑦ ᐃᓗᕐᖁᓯᖓᑕ ᐅᖃᐅᓯᖓᑕᓗ ᐊᒻᒪᓗ ᖃᓄᐃᖕᖏᓯᐊᕈᑎᑦᓴᖏᓐᓂᒃ, ᒪᑭᑕᑦᓯᐊᕆᐊᖃᕐᓂᖏᓐᓂᒃ, ᐊᔪᕐᓴᖏᑦᑑᒋᐊᖃᕐᓂᖏᓐᓂᒃ, ᐃᓕᓴᕐᓂᖃᕆᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.