ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆᐅᑉ
ᐊᑦᔨᖑᐊᑦ ᐃᓘᓐᓇᑎᒃ ᐱᓯᒪᔪᑦ ᔫᓕ ᑯᕆᓃᒥᑦ
ᕕᑭ ᐅᒃᐱᐅᑉ Facebook-ᒥᒍᑦ ᐊᓪᓚᖃᑦᑕᐅᑎᒍᑎᖓ ᓱᕐᕙᓚᓚᐅᔪᕗᖅ ᔪᓓ 5-ᒥ. ᓱᓇᐅᕝᕙ ᒥᐊᔨ ᓭᒪᓐ ᐊᐱᕆᓯᔪᖅ ᕕᑭᒥᒃ ᐅᓖᑦ ᐊᑦᔨᖑᐊᖏᓐᓂᒃ ᕕᑭᐅᑉ ᐅᓕᓕᐊᕆᖃᑦᑕᓯᒪᔭᖏᓐᓂᒃ ᐱᒍᒪᑦᓱᓂ. ᕕᑭ ᒪᑭᕝᕕᒥ ᐱᓇᓱᕝᕕᒥᓃᓚᐅᔪᔪᖅ ᐃᕐᖃᑐᐃᕕᓕᕆᓂᕐᓄᑦ ᐱᑦᔪᔨᕕᒻᒥ ᐊᓪᓚᕕᒻᒥᓃᑦᓱᓂ, ᐃᓛᓂᐅᖕᖏᑐᕐᓗ ᐳᐃᒍᕐᑐᕕᓂᐅᓚᐅᔪᕗᖅ ᐊᓪᓚᕕᐅᒍᑎᕕᓂᕐᒥᓂᒃ. ᖃᐅᖓᓂ ᒪᑭᕝᕕᐅᑉ ᐱᓇᓱᑦᑎᓕ-ᒫᖏᑦ ᑲᑎᖕᖓᕕᒻᒥ ᑕᑯᓐᓇᕆᐊᖁᔭᐅᓕᓚᐅᔪᕗᑦ ᐅᓪᓛᑯᑦ 10-ᖑᒥ ᑕᓚᕖᓴᒃᑯᑦ ᐅᖄᔪᖃᓯᑎᓪᓗᒍ. ᒥᐊᔨ ᓭᒪᓐ ᐅᖃᒻᒪᕆᒍᑎᐅᓯᑎᓪᓗᒍ ᐊᑕᓂᐊᓘᑉ ᑭᒡᒐᖓᑕ ᐱᓇᓱᒐᖓᓄᑦ ᐃᓕᔪᑦᓴᒫᖕᖑᑕᐅᑦᓱᓂ. ᕕᑭ ᐃᒻᒥᓄᑦ ᓂᓪᓕᓚᐅᔪᔪᖅ ᐃᒫᒃ “ᐄᐄᐄᒃ! ᐊᑦᔨᖑᐊᓂᒃ ᑐᑦᓯᕋᓚᐅᕐᑎᓗᒍ ᐳᐃᒍᑦᓯᐊᑐᕕᓂᐅᔪᖓ!”
ᑭᓯᐊᓂ ᒥᐊᔨ ᐊᓪᓚᕕᖃᕆᐊᓪᓚᓚᐅᔪᔪᖅ Facebook-ᑯᑦ, ᐊᐱᕐᓱᓚᕆᓕᕐᓱᓂ ᕕᑭᒥᒃ ᐅᓕᓕᐅᖁᑦᓱᒍ ᐊᑐᓛᕐᑕᒥᓂᒃ ᑭᒡᒐᐅᓚᖓᓕᕐᓗᓂ ᓇᓪᓕᐅᓂᕐᓯᐅᕈᑎᐅᓕᕈᓂ. ᕕᑭᐅᑉ ᑭᐅᓚᐅᔪᔭᖓ ᐅᐱᒍᓱᒻᒪᕆᒐᔭᕐᓂᕋᕐᓱᓂ, ᐊᐅᓪᓚᑎᑦᓯᕕᒋᓕᕐᓱᓂᐅᓪᓗ ᐱᖓᓱᓂᒃ ᐊᓪᓚᐅᑎᒧᑦ ᐊᓪᓚᖑᐊᕐᓯᒪᔭᒥᓂᒃ ᐅᓕᓕᐊᕆᒐᔭᕐᑕᒥᓂᒃ. ᐅᓕᓕᐅᕐᓂᒥᒃ ᐱᓇᓱᑦᑕᖃᓯᓂᖓ ᑲᔪᓯᑦᓯᐊᓯᑐᐃᓐᓇᓚᐅᔪᕗᖅ ᑕᒪᑐᒪ ᑭᖑᓂᖓᒍᑦ.
ᑭᐅᕈᓪ ᓭᒪᓐ, ᒥᐊᔨᐅᑉ ᐸᓂᖓ, ᐱᓇᓱᑉᐳᖅ ᐋᑐᒑᒥ ᐃᓄᑐᐃᓐᓀᑦ ᓄᓇᓕᕐᔪᐊᖑᖃᑎᒌᑦᑐᑦ ᑲᑎᖕᖓᕕᕐᔪᐊᖓᓐᓂ. ᑭᐅᕈᓪ ᐃᑲᔪᕐᓯᒪᑦᓴᖑᐊᓚᐅᔪᔪᖅ ᐱᑐᑦᑎᓯᓂᖃᕐᓱᓂ ᕕᑭᒥᒃ ᐅᓕᓕᐊᕆᒐᔭᕐᑕᖓᓂᒃ ᓴᕐᕿᑎᑦᓯᒍᓐᓇᓯᖁᑦᓱᒍ ᒥᐊᔨᐅᑉ ᑭᒡᒐᖑᕐᑎᑕᐅᓂᕆᓂᐊᑕᖓᑕ ᐅᓪᓗᓴᖓᓄᑦ ᓈᒻᒪᓈᕐᓗᓂ ᔪᓓ 26-ᒥ ᓇᓪᓕᐅᓂᖃᓛᕐᒪᑦ, ᐱᓇᓱᐊᕈᓯᕐᓂ ᐱᖓᓱᓂ ᐃᑭᓐᓂᓴᕐᓂᒃ ᐅᓕᓕᐅᕐᕕᓴᖃᓚᐅᔪᔪᖅ!
“ᐅᕙᓐᓄᓕ ᐱᓪᓚᕆᐅᓂᖃᓗᐊᖕᖑᐊᓚᐅᔪᔪᖅ ᐊᓈᓇᒻᒪ ᐅᓕᑦᓴᖓᓅᓕᖓᑎᓪᓗᒍ ᕕᑭᐅᑉ ᖃᐅᔨᒪᑦᓯᐊᓂᖓ ᓴᓇᒍᓐᓇᓯᐊᓂᖓᓗ ᐃᒣᑦᑑᖁᔨᒍᑎᑦᑎᓂᒃ, ᐱᓇᓱᖃ-ᑎᒌᑦᓱᓄ ᕕᑭᓗ. ᐊᓈᓇᒐᓗ ᐅᓕᑦᓴᖓᓂᒃ ᐅᖃᖃᑎᒌᒍᑎᖃᖃᑦᑕᓚᐅᔪᕗᒍᑦ ᐊᒥᓱᕕᑦᓱᓄᑦ, ᐅᖃᕐᑐᖅ ᑭᐅᕈᓪ. ᖃᐅᔨᓴᕐᓂᖃᒻᒪᕆᑦᓱᓄ, ᐊᑕᓂᐊᓗᒃᑯᑦ ᐃᓚᒌᑦ ᐊᓐᓄᕌᖏᓐᓂᒃ ᐊᑦᔨᖑᐊᑎᒍᑦ ᕿᒥᕐᕈᒪᕆᑦᓱᓄ ᖃᓄᐃᑦᑐᓂᒃ ᓇᓪᓕᐅᓂᕐᓯᐅᓂᖃᓕᕋᒥᒃ ᐊᓐᓄᕌᕐᓯᒪᓱᖑᒻᒪᖔᑕ ᑕᑯᓐᓇᓯᐊᕋᓱᑦᓱᓄᒃ, ᖃᓄᐃᑦᑐᓂᓪᓗ ᑕᐅᑦᑐᖃᓱᖑᒻᒪᒐᑕ ᖃᓄᕐᓗ ᓴᓇᒻᒪᓕᓐᓂᒃ ᐊᓐᓄᕌᖃᓲᖑᒻᒪᖔᑕ.
“ᐅᓕᐅᑉ ᑕᐅᑦᑐᕆᓛᕐᑕᖓᓂᒃ ᓇᓗᒋᓂᕐᐹᖃᓚᐅᔪᔪᒍᒃ,” ᐅᖃᕐᑐᖅ ᑭᐅᕈᓪ. “ᐱᓂᐊᕐᓂᓕᕆᓂᕐᓅᓕᖓᔪᑦ ᐃᓚᐅᒻᒪᑕ ᑐᖑᔪᕐᑌᓗ ᐊᐅᐸᕐᑐᐃᓗ ᐃᓚᖏᓐᓂᒃ ᐊᑐᕐᑌᓕᑦᓯᐊᕆᐊᖃᓚᐅᔪᔪᒍᒃ.” ᐱᐅᒋᔭᖃᒻᒪᕆᒃᑲᓗᐊᕐᓱᓂ ᐊᐅᐸᓪᓗᕆᑦᓱᓂ ᑯᑦᓲᔭᒥᒃ ᑕᐅᑦᑐᒥᒃ, ᖃᑯᓪᓗᕆᖕᖏᑐᒥᒃ ᐃᓱᒪᖃᓚᐅᔪᔪᖅ – ᕕᑭ ᐅᖃᕋᓗᐊᕐᑎᓗᒍ ᑖᓐᓇ ᑕᐅᑦᑐᖅ ᑕᓚᕖᓴᒃᑯᓕᕈᓂ ᓄᐃᑕᑦᓯᐊᕋᔭᖕᖏᒋᐊᖓ. ᑌᒣᓘᕋᑦᑕ ᑐᑭᑖᓕᓚᐅᔪᔪᒍᑦ ᕿᕐᓂᑕᑲᓴᐅᓗᓂ ᑐᖑᔪᕐᑕᐅᒐᔭᕐᑎᓗᒍ, ᒥᐊᔨᐅᑉ ᐅᓕᓕᐅᕐᑕᐅᓛᓕᑐᐊᕋᒥ ᑕᐅᑦᑐᕆᒍᒪᕐᖄᓚᐅᔪᔭᖓᓂᒃ.
ᑭᖑᓪᓕᖅ ᑐᑭᑖᕈᑎᒋᒐᓱᒋᐊᖓ ᐱᑕᖃᓪᓚᕆᒋᐊᖃᕐᓱᓂᓘᕐᑐᖅ ᐃᓕᖓᓚᐅᔪᕗᖅ ᓴᐸᖓᕐᓂᒃ ᓴᓇᒍᑎᐅᓯᒪᒋᐊᓕᒻᒧᑦ. ᐅᖃᖃᑎᒌᒍᑎᐅᓚᐅᔪᔪᖅ ᐃᓕᖓᔪᑦ ᐊᑕᓪᓗᑐᕈᓐᓀᓗᓂ ᓴᐸᖓᕐᓄᑦ ᐊᓪᓚᖑᐊᕐᓯᒪᓗᓂ ᐅᔭᒥᐅᓗᓂ ᓴᓇᒐᖅ ᐅᓕᐅᑉ ᐃᓚᒋᓛᕐᑕᖓᓂ ᑕᑯᒥᓇᕈᑎᒋᐊᓪᓚᒋᓗᒍ, ᐅᕝᕙᓘᓐᓃᑦ ᐅᓕᒃ ᓴᐸᖓᕐᑕᓯᕐᑐᓗᒍ. ᑐᑭᑖᓚᐅᔪᕗᓪᓕ ᓴᐸᖓᕐᓄᑦ ᐊᓪᓚᖑᐊᕐᓯᒪᔪᓕᐅᓗᑎᒃ ᐅᓕᑦᑕᖓᓅᔭᕇᕐᓯᒪᓚᖓᔪᒥᒃ.
ᑕᕝᕙᓂ ᐃᓚᐅᓯᓚᐅᔪᔪᖅ ᔫᓕ ᑯᕆᓃ, ᑰᒃᔪᐊᒥᐅᔭᖅ, ᕕᑭᐅᑉ ᐅᖃᐅᓯᕆᓚᐅᔪᔭᖓ ᓴᐸᖓᓕᕆᓂᕐᒥᒃ ᐱᔪᓐᓇᓂᖃᑦᓯᐊᑐᒻᒪᕆᐅᒋᐊᖓ. “ᓴᐸᖓᓕᓕᐅᓱᖑᕗᖓ ᖃᓄᐃᑦᑐᑐᐃᓐᓇᓂᒃ ᖃᓄᑐᐃᓐᓇᓗ ᓴᓇᒻᒪᓕᓐᓂᒃ,” ᐅᖃᕐᑐᖅ ᔫᓕ, ᓴᐸᖓ-ᓕᕆᓲᑐᖃᖅ ᐅᑭᐅᖃᓕᕐᓂᕋᒥᓂᑦ ᓯᑕᒪᐅᔪᖕᖏᒐᕐᑐᓂᒃ, ᐊᓂᕐᕋᒥᐅᑕᖃᕐᓱᓂᓗ ᖃᓄᐃᑦᑐᑐᐃᓐᓇᓕᒫᑦᓯᐊᓂᒃ ᓴᐸᖓᕐᓂᒃ ᓯᓚᕐᔪᐊᓕᒫᒥᑦ ᐱᑖᕆᖃᑦᑕᓯᒪᔭᒥᓂᒃ . “ᐃᓱᒪᒥᑦᑎᑕᐅᑦᓯᐊᓚᐅᔪᔪᖓ, ᐱᕈᕐᓯᐊᖑᐊᑦᓴᖏᓐᓂᓗ ᐅᖃᐅᔭᖕᖑᐊᓂᓪᓗ ᓴᓇᒻᒪᓴᓕᐅᕐᓱᖓ ᐃᓱᐊᕆᔭᕋᓄᑦ ᐋᕐᕿᓱᕐᓱᒋᑦ. ᐅᕙᓐᓂᒃ ᐳᕿᐊᓱᐊᒐᑎᒃ ᐱᓇᓱᑦᑎᓯᓂᕆᓚᐅᔪᔭᖓ ᐊᓕᐊᓇᕐᑐᒪᕆᐊᓘᑦᓱᓂ ᐊᔪᒉᑦᑐᒪᕆᐅᓚᐅᔪᔪᖅ.”
ᑌᒫᒃ ᑐᑭᑖᕐᓯᒪᓕᕋᒥᒃ, ᕕᑭ ᐱᕕᖃᑦᓯᐊᓯᓚᐅᔪᕗᖅ ᐅᓕᑦᓴᔭᕐᓯᐅᓯᑦᓱᓂ ᕿᕐᓂᐊᖓᑦᓱᓂ ᑐᖑᔪᕐᑕᒥᒃ ᐅᓕᓕᐊᕆᓚᐅᔪᔭᒥᓂᒃ ᐅᓕᑲᑦᑕᓕᐅᕈᑎᒋᑦᓱᒍᓗ. Colonel Sanders ᐸᑲᑯᐊᓂᓕᐅᕈᓯᒥᓂᒃ ᐅᖃᕐᓂᐅᔭᖕᖏᒪᑦ, ᑌᒣᒃᑭᕗᕐᓕ ᕕᑭ ᐅᖄᓂᐅᔭᖕᖏᑐᖅ ᒥᕐᓱᓯᒪᔪᓕᐅᕈᓯᒋᓲᒥᓂᒃ! ᐅᖃᓚᐅᔪᒐᓗᐊᕐᓱᓂ ᐅᓕᓕᐊᖓ “ᓭᑎᑦᓴᔭᐅᑦᓱᓂ ᐃᒧᓪᓗᒐᓚᖕᖑᐊᓕᑦᓴᔭᐅᒋᐊᖓ,” ᒪᓐᑐᔨᐊᒥᐅᔭᐅᑦᓱᓂᓗ. ᐊᐱᕆᔭᐅᑦᓱᓂ ᑕᐅᑦᑐᖅ ᑌᔭᐅᒍᓯᖃᕐᒪᖔ, ᓲᕐᓗ ᐃᒫᒃ “ᑰᒃᓱᐊᑉ ᑰᖓᑕ ᕿᕐᓂᒐᓚᑦᓱᓂ ᑐᖑᔪᕐᑕᐅᓱᓂ ᐃᒪᖓ,” ᕕᑭ ᑭᐅᓚᐅᔪᔪᖅ ᐃᒫᒃ, “ᐊᐅᑲ ᑕᑯᒥᓇᕐᑐᓴᔭᐅᒍᓇᐅᖕᖏᒪᑦ”. ᑌᒣᒻᒪᑦ ᑌᔭᐅᑐᐃᓐᓇᑐᖅ, “ᕿᕐᓂᑕᑲᓴᐅᑦᓱᓂ ᑐᖑᔪᕐᑕᒥᒃ.”
ᔫᓕ ᑎᑭᑕᐅᓕᓚᐅᔪᔪᖅ ᐅᓕᓕᐊᑉ ᓵᑦᓴᖓᓄᑦ ᓴᐸᖓᓕᕐᑐᓚᖓᓕᕐᑕᒥᓄᑦ ᑎᑭᑕᐅᑦᓱᓂ ᔪᓓ 17-ᒥ, ᐊᓂᕐᕋᒥᓂ ᒪᓐᑐᔨᐊᑉ ᕿᑭᕐᑖᓗᖓᑕ ᓯᓚᑎᑦᓯᐊᖓᓃᑦᑐᒥ. ᐱᔭᕆᕐᓯᒪᒋᐊᖃᓚᐅᔪᔪᖅ ᓯᑕᒪᖓᓐᓂᐅᓕᕐᐸᑦ, ᔪᓓ 22-ᒥ. ᐅᖃᓚᐅᔪᕗᕐᓗ ᐅᓕᑦᓴᔭ ᐃᒧᓪᓗᓕᐅᕐᑕᐅᒪᒌᕐᓱᓂ ᓭᑎ ᐱᔭᕐᓃᑐᒻᒪᕆᐊᓘᓚᐅᔪᒋᐊᖓ. “ᑕᓯᑦᑕᓂᖃᕋᒥ ᓲᕐᓗ ᑐᑭᒧᐊᑦᓯᐊᕈᓐᓇᖏᑦᑐᒥᒃ. ᓭᑎᐅᒧᑦ ᐱᐊᑦᑐᓱᓂ ᕿᓪᓕᑑᑦᓱᓂᓗ, ᑐᓄᒥᒍᑦ ᓯᐊᕐᕆᑕᕐᓱᓂ, ᖁᑉᐸᖓ ᓭᑎᐅᖕᖏᓂᕐᓴᐅᑎᓪᓗᒍ. ᓄᔮᕐᑎᒍᐊᕐᑐᒪᕆᐅᑦᓱᓂᓗ. ᑌᒣᑦᑐᒪᑦ ᒥᕐᖁᑎ ᑲᑭᑦᓯᐊᓴᐅᑎᒋᒋᐊᖃᖃᑦᑕᓚᐅᔪᔪᖅ, ᒥᕐᖁᑎᒃᑲᓗ ᑭᓇᖃᑦᓯᐊᒪᕆᒋᐊᖃᓚᐅᔪᕗᑦ. ᐃᓯᑦᑎᕆᒋᐊᖃᓚᐅᔪᔪᖓ ᕿᕋᑦᑕᖁᑎᑦᓴᖓᓂᒃ ᓅᑦᑕᑎᒋᒃᑯᑎᒋᓗᓂᐅᓪᓗ, ᐃᒧᓪᓗᑎᑦᑌᓕᑦᓱᒍ ᐅᓕᑦᓴᔭ.”
ᔫᓕ ᓴᓇᒻᒪᓕᐊᕕᓂᕐᒥᓂᒃ ᐅᖄᒍᑎᖃᕐᓱᓂ ᐃᒫᒃ ᐅᖃᓚᐅᔪᔪᖅ, “ᐱᐅᒋᔭᖃᕋᒪ ᓴᓇᖕᖑᐊᕆᐊᒥᒃ ᒥᑭᔪᖑᐊᕌᐱᓐᓂᒃ ᐅᖓᓯᑦᑐᒥ ᓄᐃᑕᓪᓗᕆᓱᖑᖕᖏᑐᓂᒃ, ᖃᓂᑦᑐᓕᕋᒥ ᓄᐃᑦᓯᐊᓱᖑᑦᓱᑎᒃ ᐱᕈᕐᓯᐊᖑᐊᑦ ᑖᒃᑯᐊ ᐱᕈᕐᓯᐊᖑᐊᑦ ᐃᓚᒋᐊᓪᓚᖃᕐᒥᑎᓪᓗᒋᑦ, ᑌᒫᒃ ᓇᑎᕐᓈᔪᐊᒥᒃ ᑕᐅᑐᑉᐸᑲᒪ, ᓄᓇᒥᒃ ᑕᐅᑐᒍᓯᕆᑦᓱᒍᓗ, ᑕᖕᖏᐅᔭᓂᒃ, ᑐᖑᔪᐊᖓᔪᓂᒃ ᐱᕈᕐᑐᓂᒃ, ᐅᔭᕋᓗᑳᓂᓪᓗ. ᐱᑕᖃᖕᖏᓂᐅᔭᖕᖏᒥᔪᑦ ᐸᐅᕐᖓᐅᔭᐅᑦᓱᑎᒃ ᑎᑭᐅᔦᑦ ᐱᕈᕐᓯᐊᑦ ᑰᒃᔪᐊᒥ ᐱᕈᕐᑑᓱᑎᒃ ᑕᑯᑦᓴᐅᒪᕆᓲᑦ. ᑖᒃᑯᐊ ᑕᑯᑦᓴᐅᑎᑦᓯᔪᑦ ᒥᐊᔨ ᓇᑭᕐᖓᓂᑕᐅᒻᒪᖔᑦ, ᐱᑐᑦᓯᒪᒍᑎᒋᑦᓱᓂᒋᓪᓗ ᐊᓯᒥᓄᑦ ᓄᓇᓕᑐᖃᑦᓴᔭᓄᑦ ᑲᓇᑕᒥ – ᖃᐅᔨᒪᒐᕕᑦ ᓄᓇᒥᒃ ᓄᓇᐅᓪᓗ ᓱᕐᕃᑐᓂᖓᓂᒃ ᐃᓘᓐᓇᑎᒍᑦ ᐱᑐᑦᓯᒪᒍᑎᑦᑎᓂᒃ.”
ᔫᓕ ᐅᖃᓚᐅᔪᔪᖅ ᓴᐸᖓᓕᕆᖃᑦᑕᓚᐅᔪᒋᐊᓂᒃ ᐅᓐᓄᑐᖃᖕᖑᕋᑕᕐᓱᒍ, ᐃᓚᖓᓂᐊᓪᓛᑦ ᐅᓪᓛᑯᑦ ᐱᖓᓱᖕᖑᖅ ᑎᑭᑦᓱᒍ, ᓱᓕᓗ ᐱᕕᑦᓴᖃᕆᐊᒃᑲᓂᕆᐊᖃᕐᓱᓂ, ᐱᔭᕇᑕᒥᓂᒃ ᕕᑭᒨᕆᓕᓚᐅᔪᔪᑦ ᐅᓐᓄᑯᑦ ᓂᕿᑦᓯᕕᐅᓕᕐᑎᓗᒍ ᔪᓓ 23-ᒥ.
ᑌᑦᓱᒪᓂᑦᓭᓇᖅ, ᕕᑭ ᐃᓕᑦᑎᓚᐅᔪᔪᖅ ᐅᓕᓕᐊᑦᓴᒥᓂᒃ, ᒥᕐᓱᓱᓂᐅᒃ ᐅᓕᒃ ᐅᓕᑲᑦᑕᑕᖓᓗ, ᑭᐅᕈᓪ ᓭᒪᓐᒥᒃ ᖃᐅᔨᒪᖃᑎᒌᖃᑎᖃᑦᓯᐊᖏᓐᓇᓕᒫᕐᓱᓂ, ᑲᕙᒪᒃᑯᓗ ᐃᒡᓗᔪᐊᖁᑎᖓᓄᑦ ᐁᒋᐊᖃᓚᐅᔪᒻᒥᓱᓂ ᐅᓕᒻᒥᒃ ᐆᑦᑐᑕᐅᑎᑦᓯᒋᐊᕐᑐᒋᐊᖕᖓᓱᓂ, ᑐᑭᑖᕆᐊᖕᖓᓚᐅᔪᑦᓱᑎᒃ ᓂᕿᑦᓯᕕᐅᓕᕐᐸᑦ ᐅᓐᓄᑯᑦ ᐅᑦᑐᑎᑦᓯᒋᐊᕐᑐᓛᕐᓂᒥᒃ, ᑭᓯᐊᓂ ᐊᓪᓕᖏᓱᖓᕐᕕᐅᑉ ᐅᓪᓛᖓᓄᑦ ᓄᑦᑎᕆᐊᖃᓚᐅᔪᔪᑦ, ᔪᓓ 24-ᒥ. ᕕᑭ ᐅᓕᓕᐅᕇᓚᐅᔪᕗᖅ ᓂᕿᑦᓯᕕᒻᒥ ᐅᓐᓄᑯᑦ 10-ᖑᑎᓪᓗᒍ.
ᕕᑭᐅᑉ ᐊᓂᖓ ᔮᔨ ᐋᑐᒑᕐᒥᐅ, ᕕᑭᒥᒃ ᐅᖃᐅᑦᔨᓚᐅᔪᔪ ᐃᒫᒃ ‘ᒥᕐᓱᔫᑦ ᓇᑦᓴᓚᖓᕓᑦ ᐅᓕᓕᐊᑦ ᐋᕐᕿᒋᐊᕆᐊᖃᑦᓴᐸᑦ ᐊᑐᕐᓂᐊᕋᕕᐅᒃ,’ ᒥᕐᓱᔪᒃᒋᖁᔨᓚᐅᔪᔪᖅ ᓇᒥᓂᖅ ᒥᕐᓱᔫᖃᖕᖏᓇᒥ ᕕᑭᓗ ᑐᔪᕐᒥᐅᓚᖓᑦᓱᓃᕐᒪᑦ. ᑲᕙᒪᒃᑯᑦ ᐃᒡᓗᔪᐊᖓᓐᓂ ᒥᐊᔨᒥᒃ ᐆᑦᑐᑎᑦᓯᒋᐊᕐᑐᒋᐊᖕᖓᓱᓂ ᐅᓪᓛᖓᓂ ᐊᓪᓕᖏᓱᖓᐅᑉ, ᕕᑭ ᐅᖃᓚᐅᔪᔪᖅ ᐅᓕᒻᒥᒃ ᓈᒻᒪᓯᐊᕐᓂᕃᑦᓱᓂ. ᑭᓯᐊᓂᓕ ᐅᓕᑲᑦᑕᑕᖓ, ᐋᕐᕿᓱᒋᐊᓪᓛᒋᐊᓕᐹᓗᓚᐅᔪᖅ, ᐊᓂᒃᑯᑲᓄᑦ ᐁᓯᓚᐅᔪᔪᖓ, ᑭᓗᐊᕐᑎᓯᑦᓱᒍᓗ ᒥᕐᓱᒋᐊᑦᓯᐊᓯᑦᓱᒍ ᐅᑦᑐᓱᖓᕐᓂ-ᐊᓕᕐᑕᖓᓂ ᐊᓪᓕᑐᓂ ᐅᓐᓄᑯᑦ 6-ᖑᒥ.” ᑌᑲᓂ ᓈᒻᒪᓯᐊᓕᓚᐅᔪᔪᖅ, ᓈᒻᒪᓯᐊᓕᕋᓗᐊᕐᓱᓂ ᓱᓕ ᕕᑭ ᐅᖃᕐᑐᖅ, “ᑕᒪᕐᒥᒃ ᐅᓕᓪᓗ ᐅᓕᑲᑦᑕᑕᖓᓗ ᐋᕐᕿᓱᒋᐊᓪᓚᒐᓛᐱᒋᐊᖃᖏᓐᓇᓚᐅᔪᔫᒃ. ᑖᕐᑐᓕᕐᑎᓗᒍ ᐃᖏᕐᕋᓯᓯᓚᐅᔪᕗᖓ.
ᐊᓪᓕᕇᕐᑐᓂ ᐅᓪᓛᑯᑦ 10:30-ᖑᑎᓪᓗᒍ, ᓯᓚᕐᔪᐊᒥᐅᑦ ᑕᑯᓕᓚᐅᔪᕗᑦ ᐊᑕᓂᐊᓗᒻᒧᑦ ᑭᒡᒐᑕᖑᓚᖓᓕᕐᓱᓂ ᑎᒃᑯᐊᑕᐅᓕᕐᑎᓗᒍ ᒥᐊᔨ ᓭᒪᓐᒥᒃ, ᐁᑉᐸᖓᓂᓪᓗ ᒍᐃᑦ ᕕᕇᓱᒥᒃ ᑐᓪᓕᕌᓗᒻᒧᑦ ᐊᐅᐸᕐᑐᒧᑦ ᓂᑯᕕᑦᑎᓗᒋᒃ ᑲᓇᑕᐅᑉ ᑲᕙᒪᖓᑕ ᐱᖁᔭᓕᐅᕐᕕᖓᑕ ᓵᖓᓂ. ᑕᒪᓐᓇ ᐊᑭᐊᓃᑦᑐᖅ ᑐᔪᕐᒥᐅᕕᐊᓘᑦ Chateau Laurier Hotel ᐊᕐᖁᑎᒥ Wellington Street-ᒦᑦᓱᓂ, ᒥᐊᔨᒃᑯᒃ ᒍᐃᑦᑯᒃ ᑲᑎᑎᑕᐅᕕᒋᓯᒪᔭᖓᓐᓂ.
ᑌᑦᓱᒪᓂ ᑕᒃᒐ ᓯᓚᕐᔪᐊᒥᐅᑦ ᑕᑯᓪᓚᕆᑦᓯᐊᓕᓚᐅᔪᕗᑦ ᕿᕐᓂᑕᑲᓴᐅᑦᓱᓂ ᑐᖑᔪᕐᑕᒥᒃ ᐅᓕᒻᒥᒃ ᐅᓕᑲᑦᑕᓕᒻᒥ, ᐊᒻᒪᓗ ᐱᐅᔪᒻᒪᕆᐊᓗᒻᒥᒃ ᓴᐸᖓᓕᐅᑦᓱᓂ ᓴᕝᕕᒍᑎᒥᒃ. ᑐᓴᕋᑦᓴᓂᐊᕐᑏᑦ ᐊᐅᓚᑕᐅᓚᐅᔪᕗᑦ ᑲᓇᑕᒥ ᕿᒻᒪᖁᑎᑦᓴᓕᕆᔨᒃᑯᓄᑦ ᐊᒻᒪᓗ ᑲᓇᑕᐅᑉ ᑲᕙᒪᖓᑕ ᐱᖁᔭᕐᔪᐊᓕᐅᕐᕕᖓᓄᑦ. ᑐᓴᕋᑦᓴᓂᐊᕐᑏᑦ ᐊᓪᓚᓯᒪᔪᖁᑎᖏᑕ ᐃᓚᖏᑦ ᓄᐃᑕᐅᔪᑦ ᐊᓪᓚᓯᒪᔪᕐᑕᖃᓚᐅᔪᕗᑦ ᐊᓐᓄᕌᑦᓴᓂᒃ ᓴᓇᒻᒪᓕᐅᕐᑎᒥᒃ, ᕕᒃᑐᔨᐊ ᐅᒃᐱᒥᒃ ᐊᒻᒪᓗ ᓴᐸᖓᕐᓂᒃ ᑕᑯᒥᓇᕐᑐᓕᐅᕐᑎᒥᒃ ᔫᓕ ᑯᕆᓃᒥᒃ.
ᑭᐅᕈᓪᓗ, ᔫᓕᓗ ᐊᒻᒪᓗ ᕕᑭ ᐊᑑᑎᓚᐅᔪᕗᑦ ᑕᑯᓐᓇᐅᔮᖃᑕᐅᓂᕐᒥᒃ ᑲᕙᒪᒃᑯᑦ ᐃᒡᓗᔪᐊᖓᓃᑦᓱᑎᒃ. ᑕᑯᓐᓇᐅᔮᕈᑎ ᐊᖏᔪᖅ ᖃᕆᐊᕌᓗᒻᒧᑦ ᑖᓂᓯᕐᕕ ᐊᓗᒻᒨᑕᐅᒪᓚᐅᔪᔪᖅ. “ᐱᐅᔪᒻᒪᕆᐊᓘᓚᐅᔪᔪ,” ᐅᖃᕐᑐᖅ ᑭᐅᕈᓪ, “ᐃᑉᐱᓂᐊᕐᓂᖃᓪᓚᕆᓐᓇᓚᐅᔪᔪᖅ ᐊᓈᓇᒐ ᑐᓪᓕᕌᓗᒻᒧᑦ ᐊᐅᐸᕐᑐᒧᑦ ᓂᑯᕕᑦᑎᓗᒍ.”
ᔫᓕ ᐅᖃᓚᐅᔪᔪᖅ ᐃᒣᓕᑦᓱᓂ, “ᐃᓚᐅᖃᑕᐅᓂᕗᑦ ᐊᓐᓄᕌᓕᐅᕆᒍᑦᔨᓂᕕᓂᑦᑎᒍᑦ ᑌᓐᓇᑐᐊᖑᓚᐅᔪᖕᖏᓚᖅ ᐃᓚᖃᓚᐅᔪᒐᒥ ᒥᐊᔨᐅᑉ ᓇᔫᑎᓂᖓᓂᒃ ᐊᓱᐃᓛᓗ ᒥᐊᔨ ᓭᒪᓐ ᐊᑕᓂᐊᓗᒻᒧᑦ ᑭᒡᒐᐅᓯᐊᕿᑲᓪᓚᓱᓂ, ᐃᓓ, ᖃᓄᑐᐃᓐᓇᓕᒫᖅ ᐃᑉᐱᓂᐊᕐᓂᖃᕐᓇᓱᓂ, ᐱᔪᕆᒪᓂᒻᒪᕆᐊᓗᖃᕐᓱᓂᓗ. ᓇᒻᒥᓂᖅ ᐱᔪᕆᒪᐅᑎᖃᕐᓱᖓ, ᕕᑭᒥᓪᓗ ᐱᔪᕆᒪᐅᑎᖃᕐᒥᓱᖓ, ᒥᐊᔨᒥᓪᓗ ᐱᔪᕆᒪᐅᑎᖃᑦᓴᖏᔦᒻᒥᓱᖓ.”
ᕕᑭ ᓄᓇᑯᔫᓚᐅᔪᔪᖅ ᑲᕙᒪᒃᑯᑦ ᐃᒡᓗᔪᐊᖓᓄᑦ ᐁᑦᓱᓂ ᒪᓐᑐᔨᐊᒥᑦ ᐃᖏᕐᕋᓱᓂ ᓇᓪᓕᐅᓂᕐᓯᐅᓯᑎᓪᓗᒋᑦ. ᓈᓚᐅᑎᒥᒃ ᓈᓚᓯᓚᐅᔪᔪ. “ᐊᓪᓓᑦ ᐊᓇᐅᓪᓚᑏᑦ ᐊᓇᐅᓪᓚᓯᑎᓪᓗᒋᑦ, ᓇᓪᓕᐅᓂᕐᓯᐅᓂᐅᓯᔪᒥᒃ ᐅᒃᑯᐃᓯᓂᖃᕐᓱᑎ, ᐊᓱᒎᖅ, ᓄᓇᒃᑯᔫᕋᓂ ᐃᓄᑐᐊᖑᑦᓱᖓ ᑕᑕᑕᐅᓚᐅᔪᕗᖓ ᓲᖑᔪᒧᑦ ᐃᑉᐱᓂᐊᕐᓂᒧᑦ. ᑕᒪᑐᒪ ᓱᔪᖃᕐᓂᐅᓕᕐᑑᑉ ᐊᖏᔪᐊᓘᓂᖓᓂᒃ ᐃᑉᐱᒍᓱᓕᕐᓱᖓ,” ᐃᔪᕐᓱᓂ ᐅᖄᔪᖅ ᕕᑭ. “ᑭᓯᐊᓂ ᑎᑭᐅᑎᒐᒪ ᑕᑯᓇᐅᔮᖃᑎᒌᑦᑐᓄᑦ, ᑭᓇᓕᒫᒃᑯᑦ ᐃᑦᓯᕙᐅᑕᓂ ᐃᑦᓯᕙᑎᓪᓗᒋᑦ, ᐃᓚᐅᔪᖓ, ᐃᒫᓪᓗ ᐃᒣᓕᑦᓱᖓᓗ‘ ᐅᓖᒃ ᖃᓄᐃᖕᖏᑐᖅ ᐅᓕᑲᑦᑕᑕᖔ ᖃᓄᐃᖕᖏᑐᖅ?’”
ᖃᓄᐃᒐᓛᓚᐅᔪᖕᖏᑑᒃ. ᕿᕐᓂᑕᑲᓴᐅᑦᓱᓂ ᑐᖑᔪᕐᑕᖅ ᐅᓕᒃ ᐊᑰᔭᖃᕐᓱᓂ ᐃᓱᒪᑖᖑᓯᒪᔪᖅ ᑐᖕᖓᕕᖃᕐᓱᓂ ᐊᒪᐅᑎᒥᒃ, ᐊᒻᒪᓗ ᓴᓇᒍᑦᔨᒍᑎᕕᓂᐅᑦᓱᓂ ᓴᐸᖓᓕᒃ ᓴᕝᕕᒍᑎ ᑕᒪᕐᒥᒃ ᐱᐅᒋᔭᒻᒪᕆᐅᓚᐅᔪᕘᒃ. ᕕᑭᓗ ᔫᓕᓗ ᕿᒥᕐᕈᐊᑦ ᑐᔮᓐᑐᒥ ᕿᒥᕐᕈᐊᖁᑎᐅᓲᑦ ᐊᑦᓯᕋᐅᑎᖃᕐᓱᑎᒃ Fashion Magazine-ᒥᒃ, ᓯᓚᑉᐱᐊᖓᓂ ᐊᑦᔨᖑᐊᖏᒃ ᓄᐃᑎᑕᐅᑦᓴᐅᑎᒋᓚᐅᔪᔫᒃ, ᐊᐱᕐᓱᑕᐅᑦᓱᑎᒃᓗ ᑐᓴᕋᑦᓴᓂᐊᕐᑎᓄᑦ ᑲᓇᑕᒥᐅᓄᑦ ᓯᓚᕐᔪᐊᒥᐅᓄᓪᓗ ᐊᐱᕐᓱᑕᐅᒍᑎᖃᕐᓱᑎᒃ ᓴᓇᔭᕕᓃᒻᒥᓂᒃ.
ᐱᕙᓪᓕᐊᓯᒪᓂᕐᒧᑦ ᐃᓚᐅᓚᖓᓕᕐᓱᓂ ᑖᓐᓇ ᐅᓕᒃ ᐱᓚᐅᔪᔪᖅ ᑲᓇᑕᒥ ᓄᓇᓕᑐᖃᐅᑦᓱᓂ ᓯᕗᓪᓕᐹᑉ ᐊᑕᓂᐊᓘᑉ ᑭᒡᒐᕆᓂᐊᓕᕐᑕᖓ ᓇᓪᓕᐅᓂᕐᓯ-ᐅᕈᑎᐅᑎᓪᓗᒍ. “ᐊᑦᔨᖃᓚᐅᕐᓯᒪᖕᖏᑐᒥᒃ ᐱᓂᐊᕐᓂᐅᓚᐅᔪᔪᖅ,” ᐅᖃᑐᖅ ᕕᑭ. ᐃᔪᕐᓱᓂᓗ ᓂᓪᓕᕆᐊᓪᓚᓱᓂ ᐃᒫᒃ “ᑌᒣᑦᑐᒥᒃ ᐃᓄᓕᒫᓂᒃ ᐅᓕᓕᐅᕈᑦᔨᖃᑦᑕᓚᖓᖕᖏᓚᖓ”.
