ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆ
ᖁᕕᐊᓱᐊᓂᖃᓱᖑᕗᑦ ᐃᔪᕿᑕᕐᓱᑎᒃᓗ ᑲᑕᑦᔭᑐᓂᒃ ᓈᓚᐅᒐᕐᑐᖃᓕᕋᒥ. ᑭᓯᐊᓂᓕ ᑌᒣᓚᐅᔪᖕᖏᓚᑦ ᓇᑲᓱᒃ ᐃᓕᓐᓂᐊᕕᐅᑉ ᓯᓚᑖᓂ ᓂᕿᑦᓯᕕᒻᒥ, ᔪᓓ 29-ᖑᑎᓪᓗᒍ ᐃᖃᓗᓐᓂ, ᖁᕝᕕᓘᒃᑲᓚᐅᔪᒻᒪᑕ ᐃᓄᑐᙯᑦ ᐃᓚᖏᑦ. ᖁᕝᕕᐅᕈᑎᖃᓚᐅᔪᔪᑦ ᑕᒪᓐᓇ ᑲᑕᑦᔭᓂᖅ ᑕᑯᑦᓴᐅᑎᑦᓯᓯᐊᓚᐅᔪᒻᒪᑦ ᐃᓄᑐᐃᓐᓀᑦ ᐃᓗᕐᖁᓯᖓᑦ ᐊᓯᐅᓯᒪᖕᖏᒋᐊᖓ. ᐃᓄᑐᐃᓐᓀᑦ ᐅᖃᐅᓯᖏᑦ, ᐊᓐᓄᕌᓕᐊᕆᓱᑦᓴᔭᖏᑦ ᐊᒻᒪᓗ ᑐᓐᓃᑦ ᐊᓐᓇᓯᒪᒻᒪᑕ ᐊᓯᐅᑎᑕᐅᓪᓚᕆᒐᓱᑦᓯᒪᒐᓗᐊᕐᓱᑎᒃ ᐊᓂᕐᕋᖃᕐᑎᓯᕕᒋᑦᓱᒋᑦ ᐃᓕᓐᓂᐊᑎᑦᓯᕕᐅᓯᒪᔪᓄᑦ ᐊᐅᓚᑕᐅᓂᖃᕐᓯᒪᔪᓄᑦ ᑲᑐᓕᒃᑯᑦ ᑐᑦᓯᐊᕕᖓᓐᓄᑦ ᓴᐳᒻᒥᔭᐅᑦᓱᑎᒃ ᑲᓇᑕᐅᑉ ᑲᕙᒪᖓᓄᑦ.
ᑌᒣᓘᓕᕐᑎᓗᒋᑦ, ᓇᑲᓱᒃ ᐃᓕᓐᓂᐊᕕᐅᑉ ᐃᓗᐊᓂ, ᐃᑦᓯᕋᕐᔪᐊᕌᐱᒃ ᕗᕋᓐᓰᔅ ᓈᓚᓚᐅᔪᕗᖅ ᖃᓯᓪᓛᓇᕐᑐᓂᒃ ᐅᖄᒍᑎᖏᓐᓂᒃ ᐃᓄᑐᐃᓐᓀᑦ ᐃᓕᓐᓂᐊᑎᑕᐅᕕᕕᓂᕐᓂᑦ ᐊᓐᓇᓯᒪᔪᑦ ᐅᖄᑎᓪᓗᒋᑦ ᑲᑐᓕᒃᑯᑦ ᐊᐅᓚᑕᖏᓐᓂ ᐃᓕᓐᓂᐊᑐᕕᓂᐅᑦᓱᑎᒃ ᐊᒥᓱᓂ ᐅᑭᐅᕐᑕᑐᒥ ᐃᓕᓐᓂᐊᑎᑦᓯᕕᐅᖃᑦᑕᓯᒪᔪᓂ, ᑲᓇᑕᐅᓪᓗ ᓄᓇᖏᓐᓂ ᐊᒥᓱᓂ. ᐃᑦᓯᕋᕐᔪᐊᐱᐅᑉ ᐃᖃᓗᓕᐊᕐᓯᒪᓂᖓ ᐃᓱᓕᓚᐅᔪᔪᖅ ᐱᓇᓱᐊᕈᓯᓕᒫᒥ ᑲᓇᑕᒦᓚᐅᕐᓱᓂ ᐃᕐᓯᕋᕐᔪᐊᕋᐱᐅᒐᒥ ᐃᑦᓯᕋᕐᔪᐊᕌᐱᐅᓂᕐᒥᓂᒃ ᑎᑭᒍᑎᖃᕐᓱᓂ ᐃᓛᓂᐅᖕᖏᑑᕐᕕᖃᕆᐊᕐᑐᓱᓂ ᓄᓇᓕᑐᖃᕐᓂᒃ ᐃᓛᓂᐅᖕᖏᑑᕈᑦᔨᓱᓂ ᑲᑐᓕᒃᑯᑦ ᑐᑦᓯᐊᕕᖓᓐᓂᒃ ᐊᖏᔪᒥᒃ ᐱᓂᕐᓗᐃᓯᒪᓂᖓᓄᑦ ᐊᓂᕐᕋᖃᕐᑎᓯᕕᒋᑦᓱᒋᑦ ᐃᓕᓐᓂᐊᑎᑦᓯᕕᒋᓯᒪᔭᒥᓐᓂ.
ᓄᓇᕕᒻᒥᐅᑦ ᓯᑕᒪᐅᔪᕐᑐᑦ ᐃᓄᑐᐃᓐᓀᑦ ᑕᒪᒃᑯᓇᖕᖓᑦ ᐃᓕᓐᓂᐊᕕᓐᓂᑦ ᐊᓐᓇᓯᒪᔪᑦ ᑎᒃᑯᐊᑕᐅᓚᐅᔪᕗᑦ ᐃᖃᓗᓐᓂᖃᑕᐅᓛᕐᓱᑎᒃ ᐃᑦᓯᕋᕐᔪᐊᕌᐱᒃ ᐃᓛᓂᐅᖕᖏᑑᕐᓂᖃᓕᕐᐸᑦ ᓇᒻᒥᓂᓪᓗᑐᖅ ᐃᓄᑐᐃᓐᓇᓂᒃ ᓂᑦᔮᕕᖃᕐᓗᓂ, ᑭᓇᓕᒫᒃᑯᓄᑦ ᑐᓵᒋᐊᕐᑕᐅᒍᓐᓇᖏᑦᑑᓗᓂ. ᑖᒃᑯᐊ ᐅᑯᐊᖑᓚᐅᔪᕗᑦ ᔩᓂ ᐸᓚᒥᖕ ᐊᒻᒪᓗ ᓵᓕ ᖃᐅᑦᓵᓕᒃ ᑰᒃᔪᐊᕌᐱᖕᒥᐅᒃ; ᐋᓇ ᐅᙯᑦᑐᓗ ᐊᒻᒪᓗ ᐋᓕ ᓈᓚᑦᑑᔭᖅ ᐃᓄᑦᔪᐊᒥᐅᒃ; ᒥᐊᔨᓗ ᒍᐃᓕ ᑑᒪᓯᓗ ᑲᖏᕐᓱᒥᐅᒃ; ᐊᒻᒪᓗ ᒫᑭ ᕉᑕ ᐃᑦᑐᓗ ᒥᐊᔨ ᓲᓯ ᐋᓇᓈᕐᓗ ᑲᖏᕐᓱᐊᓗᒃᔪᐊᒥᐅᒃ. ᑖᒃᑯᓇᓂ ᓯᑕᒪᓂ ᓄᓇᓕᓐᓂ ᐊᓂᕐᕋᖃᕐᑎᑕᐅᒍᑎᒋᑦᓱᒋᓪᓗ ᐃᓕᓐᓂᐊᕕᖃᕐᑎᑕᐅᖃᑦᑕᓯᒪᒻᒪᑕ. ᓄᓇᓕᐅᑉ ᖃᓄᐃᓕᖓᓂᖓ ᑐᖕᖓᕕᐅᑎᓪᓗᒍ, ᐅᓪᓗᑯᑦ ᐃᓕᓐᓂᐊᑎᑕᐅᕖᑦ ᐃᖏᕐᕋᑎᑕᐅᓂᖃᖃᑦᑕᓯᒪᕗᑦ ᐊᕐᕌᒍᕐᓂ 1950-ᓂᑦ 1978 ᑎᑭᑦᓱᒍ, ᐊᓂᕐᕋᕆᔭᐅᑎᑕᐅᔪᑦ ᐃᖏᕐᕋᑎᑕᐅᓯᒪᑎᓪᓗᒋᑦ 1960-ᒥᑦ ᑎᑭᑦᓱᒍ 1971. ᐃᓚᐅᓯᓚᐅᔪᒻᒥᔪᑦ ᐊᓯᒥᓄᑦ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᐊᓐᓇᖃᑎᒋᓯᒪᒻᒥᔭᒥᓄᑦ.
ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᓯᕗᓕᕐᑎᒋᔭᐅᓚᐅᔪᕗᖅ ᓄᓇᕕᒻᒥᐅᓄᑦ ᑲᑎᓯᒋᐊᕐᑐᑐᓄᑦ. ᒪᓕᑦᑎᖃᓚᐅᔪᔪᖅ ᒍᐃᓕᐋᒻ ᑕᒍᕐᓈᒥᓪᓗ ᔮᓐ ᑐᐳᐃᒥᓪᓗ. “ᑕᐸᓇᖕᖏᑐᓪᓚᕆᐅᓚᐅᔪᕗᖅ ᑕᑯᒋᐊᒥᒃ ᐃᓘᓐᓇᖏᓐᓂᒃ ᐊᓂᕐᕋᖃᕐᑎᑕᐅᕕᓐᓂ ᐃᓕᓐᓂᐊᕕᓕᕕᓂᕐᓂᒃ ᐊᓐᓇᓯᒪᔪᓂ ᑕᒃᑲᓂᑦᓭᓇᖅ ᖃᕆᐊᕐᒦᖃᑎᖃᕐᑎᓗᒋᑦ ᐃᑦᓯᕋᕐᔪᐊᐱᖕᒥᒃ,” ᐅᖃᕐᑐᖅ ᐱᑕ. “ᐃᑉᐱᓂᐊᕐᓂᐊᓗᖏᑦ ᐋᓐᓂᐊᒍᑎᒥᓐᓂᒃ ᐃᑉᐱᓇᖕᖏᑐᖃᔭᓚᐅᔪᖕᖏᑐᑦ, ᕿᐊᖃᑕᐅᓐᓇᓱᓂᓗ. ᐃᓛᓂᐅᖕᖏᑑᕐᕕᐅᓂᖅ ᐃᖏᕐᕋᓂᓕᐅᒐᓗᐊᖅ, ᑭᓯᐊᓂ ᒪᒥᒍᑎᐅᓚᐅᕐᓯᒪᓚᖓᖕᖏᑐᖅ ᐋᓐᓂᓯᒪᒍᑎᖏᓐᓄᑦ. ᓄᖑᑎᑦᓯᓚᐅᕐᓯᒪᓂᐊᕋᓂᓗ ᐱᔮᕆᔭᐅᒍᑎᕕᓂᖏᓐᓂᒃ ᓱᒃᑯᔨᐊᖑᕕᓂᖏᓐᓂᓗ ᐃᓕᓐᓂᐊᕕᖃᕐᑎᑕᐅᕕᒻᒥᓂ.”
ᒍᐃᓕ ᑑᒪᓯ, ᐃᓕᓐᓂᐊᑎᐅᓚᕐᑐᕕᓂ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᖓᓂ ᑲᖏᕐᓱᒥ ᐊᒻᒪᓗ ᐊᓂᕐᕋᖃᕐᑎᑕᐅᕕᒻᒦᑐᕕᓂᐅᑦᓱᓂ 1960 ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᖏᑦ ᑎᒃᑯᐊᑕᐅᖃᑕᐅᓚᐅᔪᕗᖅ ᓯᑕᒪᐅᔪᕐᑐᓄᑦ ᓄᓇᕕᒻᒥᐅᖑᑦᓱᑎᒃ ᐊᓐᓇᓯᒪᔪᓄᑦ ᐅᖄᕕᖃᓪᓗᑐᕆᐊᕐᑐᑎᑕᐅᑦᓱᓂ ᐃᑦᓯᕋᕐᔪᐊᕌᐱᖕᒥᒃ. ᐱᑕ ᐅᖃᕐᑐᖅ ᑖᑦᓱᒪ ᒍᐃᓕᐅᑉ ᐅᖄᒍᑎᖏᑦ ᐅᖃᒍᑎᒋᓚᐅᔪᒋᐊᖏᓐᓂ ᐱᕙᓪᓕᐊᓯᒪᓂᖏᓐᓂᒃ ᐋᓐᓂᑕᐅᒍᑎᒋᓯᒪᔭᒥᑕ. “ᐊᓂᕐᕋᒥᑦ ᐊᐅᓪᓚᑎᑕᐅᓂᖅ, ᓯᓚᕐᖃᑎᖃᕋᓗᐊᕐᓱᓂᓗ ᑕᒃᑲᓂᑦᓭᓇᖅ ᓄᓇᓕᒻᒥ, ᐊᖓᔪᕐᖄᒥᓂᒃ ᑕᑯᑎᑕᐅᔪᓐᓇᓂᕋᓂ.” ᐱᑕ ᐅᖃᕐᒥᔪᖅ ᐊᓯᖏᑦ ᓄᓇᕕᒻᒥᐅᑦ ᐊᓐᓇᓯᒪᖃᑎᒌᖑᔪᑦ ᕿᐊᖃᑕᐅᓚᐅᔪᒋᐊᖏᑦ ᒍᐃᓕᒧᑦ ᐊᑑᑎᔭᕕᓂᕐᒥᓂᒃ ᐅᓂᒃᑲᐅᓯᖃᕐᑎᓗᒍ ᐅᓂᒃᑲᕕᖃᕐᓱᓂ ᐃᑦᓯᕋᕐᔪᐊᕌᐱᖕᒥᒃ, ᓈᓚᑦᑎᒋᓚᐅᔪᔭᒥᓂᒃ ᓂᐯᑦᑐᓱᓂ, ᐃᓛᓂᐅᖕᖏᑐᕐᑎᒋᓚᐅᔪᔭᒥᓂᒃ, ᓭᒨᕐᑎᒋᑦᓱᒍᓗ.
ᐱᑦᔪᑎᐅᔪᖅ ᐅᖃᕐᑕᐅᓯᐊᕖᖕᖓᓚᐅᔪᕗᖅ ᐊᑕᓂᐊᓘᑉ ᑲᓇᑕᒥ ᑭᒡᒐᖓᓄᑦ, ᒥᐊᔨ ᓭᒪᓐᒧᑦ, ᐅᖄᓂᖃᕐᓱᓂ ᐅᓐᓄᓂ ᐊᒥᓲᖕᖏᑐᓂ ᐊᓂᒍᕐᑐᓂ ᐅᖄᓂᖃᕐᓱᓂ ᑯᐯᒃ ᓯᑎᒦᑦᑐᒥ ᐅᓇᑕᕐᑐᓴᖃᐅᑎᒥ ᐊᑕᓂᐊᓘᓪᓗ ᑭᒡᒐᖓᑕ ᐊᓂᕐᕋᖓᓂ. ᐃᑦᓯᕙᑦᓱᓂ ᐃᑦᓯᕋᕐᔪᐊᕌᐱᐅᑉ ᓴᓂᐊᓂ, ᐅᖄᓚᐅᔪᒻᒪᑦ ᑎᑭᒐᔭᕐᓯᒪᖕᖏᓂᕋᕐᓱᓂᐅᒃ ᑕᒪᐅᖓ ᑲᓇᑕᒧᑦ ᐊᔪᐃᓐᓈᖑᓯᒪᖕᖏᑐᐊᕈᓂ ᓄᓇᓕᑐᖃᕐᓂᒃ ᐊᓐᓇᒍᑎᖃᕐᓯᒪᔪᓂᒃ ᐊᓂᕐᕋᕆᔭᐅᑎᑕᐅᔪᓂᒃ ᐃᓕᓐᓂᐊᕕᓐᓂ ᑭᒡᒐᑐᕐᑐᓄᑦ. ᒥᐊᔨ ᐅᖃᓚᐅᔪᒻᒥᔪᖅ ᐃᒫᒃ, ᓄᓇᓕᑐᙯᑦ ᐱᓇᓱᐊᕐᓯᒪᕗᑦ, ᐅᑕᕐᕿᓱᑎᒃᓗ, ᐊᒻᒪᓗ ᑐᑦᓯᐊᓱᑎᒃ ᐃᓛᓂᐅᖕᖏᑑᕕᐅᓂᑦᓴᒥᓐᓂᒃ ᑕᒪᓐᓇᓗ ᐊᑑᑎᔭᐅᓗᓂ ᓄᓇᖃᕐᖃᓯᒪᔪᑎᒍᑦ ᓄᓇᒥᓐᓃᓗᑎᒃ ᑕᒫᓂ ᑲᓇᑕᒥ, ᓴᐱᓕᓚᐅᕐᓯᒪᓚᐅᔪᖕᖏᑐᑦ. ᐃᕐᖃᐅᒪᒋᐊᖃᕐᐳᓗ ᑕᒪᓐᓇ ᐱᒃᑲᑕᐅᓂᖃᕆᐊᖓ ᓴᐱᓕᕐᓯᕇᑦᑑᓂᑯᖏᓐᓄᑦ ᓴᐱᓕᕐᓯᕇᑦᑐᒪᑕᓗ ᐅᓪᓗᒥ ᑕᒫᓂᓚᕿᑦᓱᑕ.“
ᐃᓕᓐᓂᐊᑎᐅᖃᑦᑕᓯᒪᔪᑦ ᑕᒪᑐᒥᖓ ᐊᔪᐃᓐᓈᖃᓚᐅᔪᕗᑦ, ᐃᓱᐃᓪᓕᔭᐅ ᖃᑦᑕᓱᑎᒃ ᐊᖏᔪᖑᐊᓄᑦ ᐊᕐᖁᑌᓪᓕᒍᑎᑦᓴᓄᑦ ᓲᕐᓗ ᐃᓛᓂᐅᖕᖏᑐᕐᕕᖃᕐᓂᕆᓚᐅᕐᓯᒪᔭᖓᓄᑦ ᑲᓇᑕᐅᑉ ᑲᕙᒪᖓᑕ 2008-ᖑᑎᓪᓗᒍ. ᑌᑦᓱᒪᓂ, ᐊᖓᔪᕐᖃᖑᑦᓱᓂ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓄᑦ ᒥᐊᔨ ᓭᒪᓐ ᑎᒍᓯᓚᐅᕐᓯᒪᒻᒪᑦ ᐃᓛᓂᐅᖕᖏᑐᕐᑕᐅᒍᑎᓂᒃ ᑭᒡᒐᑐᕐᓱᓂ ᐃᓄᑐᐃᓐᓇᓂᒃ ᑲᓇᑕᒥᐅᓂᒃ ᐱᖁᔭᕐᔪᐊᓕᐅᕐᕕᖓᓂ ᑲᓇᑕᐅᑉ, ᐃᓄᒃᑎᑐᑦ ᓂᑦᔮᖃᕐᓱᓂ, ᖃᓪᓗᓈᕐᑎᑐᕐᓱᓂᓗ, ᑕᑯᑦᓴᐅᑎᑦᓯᒍᑎᒋᑦᓱᒍ ᐃᓄᑐᐃᓐᓀᑦ ᐅᖃᐅᓯᖓᑦ ᐊᓐᓇᓯᒪᒋᐊᖓ.
ᐱᓇᓱᑦᑕᐅᓯᓚᐅᕐᓯᒪᒻᒥᓱᑎᓪᓗ ᓱᓕᑎᑦᓯᓂᕐᓄᓗ ᓭᒻᒪᖃᑎᒌᓐᓂᓂᓪᓗ ᐱᓇᓱᒍᑎᐅᓯᒪᔪᓄᑦ 94-ᓂᒃ ᑎᓕᐅᕆᒍᑎᑕᖃᕐᓱᑎᒃ ᐊᕐᕌᒍᖏᓐᓂ 2008-2015. ᑖᒃᑯᐊ ᐃᓚᖃᓚᐅᔪᔪᑦ ᐃᒣᓗᖁᔨᒍᑎᒥᒃ ᑭᓯᑦᔪᑎᓕᒻᒥᒃ 58-ᒥᒃ ᐊᑕᕐᖑᓯᕈᑎᐅᑦᓱᑎᒃ ᐃᕐᓯᒐᕐᔪᐊᕌᐱᒻᒥᒃ ᐃᓛᓂᐅᖕᖏᑐᖁᔨᑦᓱᑎᒃ ᐃᓛᓂᐅᖕᖏ ᑐᕐᕕᖃᕐᓗᓂ ᓄᓇᓕᑐᖃᕐᓂᒃ ᐃᓛᓂᐅᖕᖏᑐᕐᑎᓯᓗᓂ ᑲᑐᓕᒃᑯᑦ ᑐᑦᓯᐊᕕᖓᓐᓂᒃ. ᐅᖃᕐᑕᐅᓯᒪᒐᒥᒃ ᓯᕗᓪᓕᐅᓚᐅᔪᔪᓂ ᑕᕐᕋᓕᒃ ᕿᒥᕐᕈᐊᓂ, ᐃᑦᓯᕋᕐᔪᐊᕌᐱᒃ ᓯᕗᓪᓕᒥ ᐃᓛᓂᐅᖕᖏᑐᕐᓂᖃᓚᐅᔪᕗᖅ ᓄᓇᒥᓃᑦᓱᓂ ᕚᑎᑲᓐᒥ ᓂᕿᑦᓯᕕᐅᑎᓪᓗᒍ, ᐁᕆᓕ 1-ᒥ ᐅᖃᕐᓱᓂᓗ ᑲᓇᑕᐅᑉ ᓄᓇᖓᓂ ᐅᐱᕐᖓᐸᑦ 2022-ᒥ ᐃᓛᓂᐅᖕᖏᑐᕐᓂᖃᕆᐊᕐᑐᓛᕆᐊᒥᒃ.
ᒍᐃᓕᐋᒻ ᑕᒍᕐᓈᖅ ᑐᓵᑦᑐᐊᒐᐅᒐᓚᐅᔪᔪᖅ ᐊᒥᓱᓄᑦ ᑐᓵᔭᐅᓇᓂ ᓇᓪᓕᐅᓂᕐᓯᐅᑐᓂᒃ ᐃᓚᖃᕐᓱᑎᒃ ᐃᑦᓯᕋᕐᔪ-ᐊᕌᐱᖕᒥᒃ ᑐᓄᐊᓂ ᓇᔪᕐᑕᖓᑕ ᓈᓚᐅᒐᕐᓱᓂ ᓇᑲᓱᒃ ᐃᓕᓐᓂᐊᕕᒻᒥ. ᒍᐃᓕᐋᒻ ᖃᐅᔨᒻᒫᖃᕐᓯᒪᔪᖅ ᒫᕆᐋᔅ ᑐᖓᓕᕐᒥᒃ. ᒫᕆᐋᔅ ᓯᕗᓪᓕᐹᖑᑦᓱᓂ ᐃᓄᑐᐃᓐᓇᐅᓱᓂ ᓂᑦᔮᒍᑎᖃᕆᐊᖕᖓᓯᓯᒪᒻᒪᑦ ᖃᓄᐃᓘᕐᑕ ᐅᒍᑎᒋᖃᑦᑕᑕ-ᕕᓂᕐᒥᓂᒃ ᐅᓪᓗᑯᑦ ᐃᓕᓐᓂᐊᕕᖃᕐᑎᑕᐅᕕᒻᒥᓂ ᐃᒡᓗᓕᒑᕐᔪᒥ. “ᐊᐅᓚᔨᕗᖓ ᑐᓴᕋᑦᓴᓂᐊᕐᑎᐅᓱᖓ ᐃᖃᓗᓐᓂ ᑕᒪᓐᓇ ᓴᕐᕿᕙᓪᓕ ᐊᓯᑎᓪᓗᒍ ᐊᓂᓯᑦᓱᓂ ᐃᒡᓗᓕᒑᕐᔪᒥᑦ, ᐃᓄᓕᒫᓄᑦ ᑐᓴᕐᑕᐅᑎᑦᓯᓕᕐᑎᓗᒋᑦ ᑌᑦᓱᒪᓂ, ᐃᓄᓐᓄᑦ ᑐᖁᑕᐅᒍᒪᓕᓚ ᐅᕐᓯᒪᔪᑦ.” ᐅᖃᕐᑐᖅ ᒍᐃᓕᐋᒻ ᐃᓄᑐᐃᓐᓀᑦ ᑕᒪᑐᒥᖓ ᐅᑉᐱᕈᒪᓯᒪᖕᖏᑐᑦ. “ᐃᓄᑐᐃᓐᓀᑦ ᑕᒪᑐᒥᖓ ᑲᒪᒋᔭᖃᕆ ᐊᖕᖓᓯᓚᐅᕐᓯᒪᕗᑦ ᑎᑭᒍᓐᓇᓯᑎᑦᓯᓇᓱᑦᓱᑎᒃ ᐃᑦᓯᕋᕐᔪᐊᕌᐱᖕᒥᒃ.”
ᐊᔪᕐᓇᒪᒻᒪᕆᐊᓘᒐᓗᐊᖅ, ᒫᕆᐋᔅ ᑐᖓᓕᒃ, ᐃᓅᓯᕐᒥᓂᒃ ᐃᓱᓕᑎᑦᓯᓯᒪᒻᒪᑦ, ᑕᑯᔪᓐᓇᓯᓚᐅᖕᖏᓚᕐᓗ ᑐᓵᒍᓐᓇᓯᓇᓂᓗ ᐃᓛᓂᐅᖕᖏᑑᕐᓂᖃᓕᕐᑎᓗᒍ ᐃᑦᓯᒐᕐᔪᐊᕌᐱᒃ. ᑭᓯᐊᓂᓕ ᐅᓂᒃᑲᐅᓯᕆᓯᒪᔭᖏᑦ, ᑐᓴᕐᑕᐅᓚᐅᔪᕗᑦ ᐃᑦᓯᒐᕐᔪᐊᕌᐱᖕᒧᑦ ᒫᕆᐋᔅ ᐸᓂᖓ ᑖᓐᔭ ᐅᓂᒃᑲᐅᑎᔭᖓᓂ. ᐅᖃᐅᓯᕐᒥᓂᒃ ᐋᕐᕿᓱᐃᓯᒪᓚᐅᔪᖕᖏᑐᑦ ᐅᖄᔭᖏᓪᓗ ᐃᓚᖃᓚᐅᔪᕗᑦ ᓲᕐᓗ ᑕᑯᓐᓇᓗᑐᕐᓇᑑᔭᕐᑐᓂᒃ ᐃᑦᓯᒎᕐᓂᓗᑦᑕᐅᓂᕆᓯᒪᔭᖏᓐᓂᒃ ᐊᑖᑕᒥ, ᓯᐅᕐᓂᐅᑎᑕᐅᒍᑎᒋᓯᒪᔭᖏᑦ ᐃᒃᓯᕋᕐᔪᐊᓄᓪᓗ ᓇᔭᓄᓪᓗ Joseph Bernier/ᔫᓯᕝ ᐱᐊᕐᓃ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᒋᓯᒪᔭᖓᓐᓂ ᐃᒡᓗᓕᒑᕐᔪᒥ, ᑕᓪᓕᒪᓂᒃ ᐅᑭᐅᖃᕐᓱᓂ ᑌᑯᖕᖓᑕᐅᓂᑯᑦᓱᓂ. ᐃᓕᓐᓂᐊᑏᑦ ᐊᓂᕐᕋᖃᕐᑎᑕᐅᕕᖓᓂ ᑑᑭᑎᐋᓪ ᖄᓪᒥ, ᓄᓕᐊᕐᑕᐅᓂᒃᑯᑦ ᐃᑦᓯᒎᕐᓂᓗᑦᑕᐅᓯᒪᕕᖓᓂ.
ᑕᕝᕙᓂ ᐊᓯᓄᑦ ᑐᓴᔭᐅᓚᖓᓯᒪᖕᖏᑲᓗᐊᕐᑎᓗᒋᑦ ᓇᓪᓕᐅᓂᕐᓯᐅᓂᖅ, ᑖᓐᔭ ᑐᖓᓕᒃ ᑐᔫᑎᖃᓚᐅᔪᕗᖅ ᐅᓂᒃᑲᐅᔨᒍᑎᕕᓂᕐᒥᓂᒃ ᐊᓪᓚᓯᒪᔪᑎᒍᑦ ᑐᔫᑎᒋᑦᓱᒋᑦ ᓯᐱᓯᒃᑯᓄᑦ ᑕᑯᓐᓇᑕᐅᔪᓐᓇᖁᒐᒥᒋᑦ ᓯᓚᕐᔪᐊᒥᐅᓄᑦ. ᐅᖃᓚᐅᔪᕗᕐᓗ, “ᐊᑖᑕᒐ ᐃᓄᑐᐃᓐᓇᓂ ᓯᕗᓪᓕᐸᐅᑦᓱᓂ ᐃᓄᓕᒫᓄᑦ ᑐᓵᔭᐅᒍᑎᖃᓚᐅᔪᕗᖅ ᖃᓄᐃᓘᕐᑕᐅᓂᕐᓗᒍᑎᒋᓯᒪᔭᒥᓂᒃ ᑑᑭᑎᐋᓪ ᖄᓪᒥ ᐃᒡᓗᓕᒑᕐᔪᒦᑦᑐᒥ. ᐊᑖᑕᒐᓗ ᐊᓐᓇᓯᒪᖃᑎᖏᓪᓗ, ᐲᑕ ᐃᕐᓂᓗ ᔮᒃ ᐊᓇᕈᐊᕐᓗ, ᐊᑐᐃᓐᓇᕈᐃᓚᐅᕐᓯᒪᕗᑦ ᑲᑎᖃᑎᒌᓕᕐᕿᓂᑦᓴᒥᓐᓂᒃ ᐃᒡᓗᓕᒑᕐᔪᒥ 1993 ᐊᕐᕌᒍᖓᓂ.” ᑕᒪᕐᒥᒃ ᐃᕐᓂᓗ ᐊᓄᒑᕐᓗ ᐃᖃᓗᓐᓂᖃᑕᐅᓚᐅᔪᕘᒃ ᐃᓄᓕᒫᓄᑦ ᐃᑎᕐᑕᐅᔪᓐᓇᖏᑦᑐᒥ ᓇᓪᓕᐅᓂᕐᓯᐅᖃᑎᖃᕐᓱᑎᒃ ᐃᑦᓯᕋᕐᔪᐊᕌᐱᒃ ᕗᕌᓐᓯᔅᒥᒃ.
ᐃᓱᓕᒋᐊᕈᑎᒋᑦᓱᒋᑦ ᐅᖄᔭᒥᓄᑦ ᑖᓐᔭ ᑐᖓᓕᒃ ᐅᖃᓚᐅᔪᕗᖅ ᐃᒫᒃ “ᐊᑖᑕᒐ ᐅᓪᓗᒥ ᐃᓅᖏᓐᓇᕈᓂ, ᐃᓕᓐᓂᒃ ᓇᒻᒥᓂᖅ ᐅᖃᐅᑦᔪᐃᒐᔭᕐᑐᖅ, ᑕᒪᑐᒥᖓ 1992-ᒥᓂᑦ ᐱᒐᓱᑦᓯᒪᒐᒥ. ᐃᑦᓯᕋᕐᔪᐊᕌᐱᒃ ᕗᕌᓐᓯᔅ, ᐱᔭᖃᕐᓂᐊᕈᑦᑕ ᓭᒻᒪᖃᑎᖃᕐᓂᓂᒃ ᐃᓄᖁᑎᑦᑎᓂᒃ ᐃᓕᓐᓂᑦ ᐱᔭᕆᐊᖃᕐᐳᒍᑦ ᑌᒣᓘᕐᑕᐅᓂᕐᒥᒃ ᐃᓕᓐᓄᓗ ᐊᒻᒪᓗ ᑲᑐᓕᒃᑯᑦ ᓄᓇᓕᕐᔪᐊᖓᓂᑦ ᕚᑎᑲᓐᒥᑦ. ᑕᒃᒐ ᓯᑕᒪᓂᒃ ᐅᖃᓯᑦᓱᓂ ᐅᑯᓂᖓ ᕚᑎᑲᓐ ᐱᔭᕆᐊᓕᖏᓐᓂᒃ. ᐃᓚᖃᕐᑐᑦ ᑎᓕᔨᓂᕐᒥᒃ ᑐᑦᓯᐊᑎᐅᓯᒪᔪᒥᒃ ᔪᖄᓇᔅ ᕆᕗᐊᕐᒥᒃ ᒍᐃᒍᐃᕐᔪᐊᑦ ᓄᓇᖓᓂᑦ ᐱᓗᓂ ᐅᑎᖁᓗᒍ ᑲᓇᑕᒧᑦ, ᓵᑕᑦᓴᐅᒍᑎᒥᓂᒃ ᐃᑦᓯᒎᕐᓂᓗᓐᓂᑯᑦ ᓱᒃᑯᔨᐊᖃᕈᑎᒋᓯᒪᔭᒥᓂᒃ ᐱᓇᓱᒋᐊᕐᑐᓗᓂ, ᑖᓐᔭ ᐊᑖᑕᖓᓂᒃ ᓄᓕᐊᕐᓂᑯᑦ ᐊᑐᕐᓂᓗᑦᓯᒪᒐᒥ, ᐊᓯᖏᓐᓂᓗ ᐃᓄᑐᐃᓐᓇᓂᒃ. ᑖᓐᔭ ᐊᑕᕐᖑᓯᕈᑎᖃᓚᐅᕐᑐᖅ ᐃᓛᓂᐅᖕᖏᑐᕐᑕᐅᒍᒪᑦᓱᓂ ᑐᑦᓯᐊᕕᒻᒧᑦ ᓇᓗᓀᕆᓗᑎᒃ ᐃᓗᕐᖁᓯᕐᒥᒃ ᐊᓯᕈᐃᒐᓱᓚᐅᔪᓂᕐᒥᓂᒃ ᓄᓇᓕᑐᙯᑦ ᐃᓗᕐᖁᓯᖓᓐᓂᒃ; ᓱᓕᖕᖏᓂᕃᓗᑎᒃᓗ ᓄᓇᒥᒃ ᓇᕝᕚᑖᖃᕐᓯᒪᓂᕐᒥᓂᒃ; ᑭᖑᓪᓕᐹᖓᓂᓗ, ᒪᑐᐃᕆᓗᓂ ᕚᑎᑲᓐᒦᑦᑐᓂᒃ ᐊᓪᓚᖁᑎᓂᒃ ᐱᐅᓕᐊᕐᓯᕕᒻᒥᒃ, ᐃᓄᓕᒫᓄᑦ ᑕᑯᔭᐅᒍᓐᓇᓯᑎᓗᒋᑦ ᐊᓪᓚᖁᑎᓕᐊᖑᒪᔪᑦ ᐱᑦᔪᑎᖃᕐᓱᑎᒃ ᓄᓇᓕᑐᖃᕐᓂᒃ.
ᑕᒪᒃᑯᐊ ᐊᑕᓐᓂᐅᕈᑏᑦ ᓲᕐᓗ ᐃᒥᐊᒍᑎᐅᓚᐅᕐᐳᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐱᓇᓱᑦᑕᖏᓐᓄᑦ ᐱᓇᓱᖃᑎᖃᕐᓱᑎᒃ ᑲᓇᑕᒥ ᑲᑎᖕᖓᔨᕐᔪᐊᖏᓐᓂᒃ ᑲᑐᓖᑦ ᐊᔪᕿᕐᑐᐃᔨᕐᔪᐊᖏᑕ, ᓯᕗᓪᓕᒥ ᕚᑎᑲᓐᒧᑦ ᐊᐅᓪᓚᓱᑎᒃ, ᐊᒻᒪᓗ ᒫᓐᓇ ᑲᓇᑕᒧᑦ ᑎᑭᑕᐅᒪᑦᓱᑎᒃ ᐃᑦᓯᕋᕐᔪᐊᕌᐱᖕᒧᑦ. ᐃᓕᖓᔪᓂᓪᓗ ᑲᓇᑕᒧᑦ ᐅᑎᕐᑎᓯᓇᓱᓐᓂᒧᑦ ᔫᖃᓇᔅ ᕆᕗᐋᕐᒥᒃ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᖓᔪᕐᖄᖓᑦ ᓈᑕᓐ ᐅᐱᐊᑦ ᐅᖃᓚᔪᕗᖅ ᐃᒫᒃ “ᐊᑕᓐᓂᐅᕕᖃᓚᐅᔪᕗᒍᑦ ᐃᑦᓯᕋᕐᔪᐊᕌᐱᒻᒥᒃ ᐊᐅᓚᑦᓯᖃᑕᐅᖁᑦᓱᒍ ᐅᖄᕕᖃᕐᓗᓂᓗ ᔫᖃᓇᔅ ᕆᕗᐋᕐᒥᒃ ᑲᓇᑕᒧᑦ ᐅᑎᕈᓐᓇᓯᖁᓪᓗᒍ. ᑕᒪᓐᓇ ᐊᓂᒍᕐᓯᒪᕋᑕᖕᖏᑐᖅ. ᓂᕆᐅᓐᓂᖃᖏᓐᓇᖁᒍᓪᓗ ᐃᑦᓯᕋᕐᔪᐊᕌᐱᒃ ᑲᒪᖃᑕᐅᓯᓛᕐᓂᖓᓂᒃ, ᐱᓗᐊᕐᑐᒥᒃ ᑐᓵᓚᐅᕐᓱᓂ ᑖᓐᔭᐅᑉ ᐅᓂᒃᑳᑕᖏᓐᓂᒃ.”
ᓯᑉᑎᒻᐱᕆᐅᑉ ᑕᕐᕿᖓᑕ ᕿᑎᖓᓂ ᓄᓇᕗᑦ ᑐᖕᖓᕕᒃ ᐊᖓᔪᕐᖄᖓ ᐊᓗᒃ ᑰᑎᐅᒃ ᓯᕗᓕᓚᐅᕐᓯᒪᕗᖅ ᐃᓄᑐᐃᓐᓇᓂᒃ ᑭᒃᒐᑐᕐᑎᓂᒃ ᒍᐃᒍᐃᒻᒪᕆᒃᑯᑦ ᓄᓇᖓᓄᑦ ᐁᔪᓂᒃ ᐱᔭᖃᕋᓱᒋᐊᕐᑐᓱᑎᒃ ᕆᕗᐋᑉ ᑲᓇᑕᓕᐊᕐᑎᑕᐅᒍᑎᑦᓴᖏᓐᓂᒃ. ᑕᒃᑲᓂ ᐊᐅᓪᓚᓯᒪᓂᕐᒥᓂ ᓯᑏᕝ ᒪᑉᓴᓚᒃ, ᐃᓚᖃᕐᓱᓂ ᑖᓐᔭ ᐊᒻᒪᓗ ᔨᐊᓯ ᑐᖓᓕᒃᑰᓂᒃ, ᕿᑐᕐᖓᖏᓐᓂ ᐃᓅᒍᓐᓀᓯᒪᓕᕐᑑᑉ ᒫᕆᐋᔅ ᑐᖓᓕᐅᑉ. ᑖᒃᑯᐊ ᑖᕗᖕᖓᖃᑎᒌᓯᒪᔪᑦ ᐱᔭᖃᕈᓐᓇᓯᓚᐅᕐᓯᒪᕗᑦ ᐃᑲᐅᕐᓃᓂ/ᑫᕙᓪᓚᒍᓰᓐᓂ ᒪᕐᕉᓂ ᑲᑎᖕᖓᓯᑦᓱᑎᒃ ᕆᕗᐋᕐᒥᒃ ᓓᐊᓐ, ᕗᕌᓐᓯᒥ ᒍᐃᒍᐃᕐᔪᐊᑦ ᓄᓇᓕᕐᔪᐊᖓᓐᓂ, ᓯᑉᑎᒻᐱᕆ 14-ᖑᑎᓪᓗᒍ. ᑌᓐᓇ ᑲᑐᓕᒃᑯᑦ ᑐᑦᓯᐊᑎᖓᑦ ᐸᓯᔭᐅᒍᑎᓕᒫᒥᓂᒃ ᓱᓕᖕᖏᓂᕃᓯᒪᔪᖅ. ᓄᓇᕗᑦ ᑐᖕᖓᕕᒃ ᓱᓕ ᑲᔪᓯᕗᖅ ᐊᑕᕐᖑᓯᕐᕕᖃᕐᓱᓂ ᒍᐃᒍᐃᕐᔪᐊᑯᑦ ᑲᕙᒪᖓᓐᓂᒃ ᐊᐅᓪᓚᑎᑦᓯᖁᑦᓱᒍ ᕆᕗᐊᕐᒥᒃ ᑲᓇᑕᓕᐊᕐᑎᓗᒍ ᓱᕐᖁᐃᑐᒥᒃ ᓵᖕᖓᔭᐅᓪᓗᑐᕐᓗᓂ ᐸᓯᔭᑦᓴᐅᓂᕐᒥᓂᒃ ᐃᑦᓯᒎᕐᓂᓗᑦᓱᓂ ᓄᓕᐊᕐᓂᖃᑦᑕᓯᒪᓂᖓᓄᑦ ᐃᓄᑐᐃᓐᓇᓂᒃ ᐃᓕᓐᓂᐊᑎᑦᓯᕕᒋᑦᓱᒋᑦ ᐊᓂᕐᕋᖃᕐᑎᓯᕕᒋᖃᑦᑕᓯᒪᔭᒥᓐᓂ.
ᐆᐱᐊᑦ ᐅᖃᐅᓯᖃᕆᐊᓪᓚᓚᐅᔪᒻᒥᔪᖅ ᐊᓯᐊᓂᒃ ᐃᓕᖓᔪᒥᒃ ᑮᓇᐅᔭᖃᕐᑎ-ᓯᒍ ᑎᓄᑦ. “ᐊᑕᓐᓂᐅᕕᖃᕐᓯᒪᒻᒥᔪᒍᑦ ᑲᑐᓕᒃᑯᑦ ᑐᑦᓯᐊᕕᖓᓐᓂᒃ ᒫᓐᓇᓴᐅᑎᒋᒃ ᐊᑭᓖᖁᑦᓱᒋᑦ ᑮᓇᐅᔭᓂᒃ ᐅᓄᕐᓂᓕᓐᓂᒃ $30-ᒥᓕᐋᓐᓂᒃ ᐊᑭᓕᕋᑦᓴᑕᕐᑎᑕ-ᐅᒍ ᑎᒋᓚᐅᕐᓯᒪᔭᖏᓐᓂᒃ ᑐᖕᖓᕕᖃᕐᓱᑎᒃ ᐊᓂᕐᕋᖃᕐᑎᓯᕕᒋᑦᓱᒋᑦ ᐃᓕᓐᓂᐊ-ᑎᑦᓯᕕᕕᓂᕐᓄᑦ ᐊᑭᓕᕋᑦᓴᑖᕐᑎᑕᐅᒍᑎᖏᑕ ᐊᖏᖃᑎᒌᒍᑎᒋᓯᒪᔭᖏᓐᓂᒃ. ᑲᑐᓕᒃᑯᑦ ᐊᑭᓖᓯᒪᔪᑦ $3-ᒥᓕᐋᓐᑐᐃᓐᓇᓂᒃ ᑖᒃᑯᓇᖕᖓ $30-ᒥᓕᐋᓐᓂᑦ ᐊᑭᓕᕋᑦᓴᑖᕐᑎᑕᐅᒍ ᑎᒋᓯᒪᔭᒥᓐᓂᑦ, ᑖᒃᑯᓄᖕᖓᓕᖓᑦᓱᑎᒃ ᐊᖏᖃᑎᒌᒍᑏᑦ ᐊᑎᓕᐅᖃᑎᒌᒍᑎᐅᓚ ᐅᕐᓯᒪᑎᓪᓗᒋᑦ 2008-ᖑᑎᓪᓗᒍ.”
ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᑕᓐᓂᐅᕈᑎᖃᓚᐅᔪᒋᕗᑦ ᓄᖑᑎᕐᑕᐅᖁᔨᑦᓱᑎᒃ ᓈᕝᕚᑕᖃᕐᓯᒪᓂᕋᐅᑎᓂᒃ – ᑖᒃᑯᐊ ᐊᕐᖁᑎᒋᔭᐅᓯᒪᒻᒪᑕ ᓴᕐᕿᑎᑕᐅᓂᒃᑯᑦ ᑐᑦᓯᐊᕕᓐᓄᑦ ᐱᔪᓐᓇᕈᑎᐅᑦᓱᑎᒃ “ᐃᓐᓄᐃᓂᕐᒥᒃ ᓄᓇᓂᒃ ᓄᑖᓂᒃ,” ᓄᓀᑦ ᓇᓂᓂᕋᕐᑕᖏᑦ ᐃᓄᖃᕇᕐᓯᒪᒐᓗᐊᕐᑎᓗᒋᑦ ᓄᓇᓕᑐᖃᕐᓂᒃ. “ᓄᓇᓕᑐᖃᐅᓂᕐᒥᒍᑦ, ᐊᒻᒪᓗ ᓇᒻᒥᓂᖅ ᐃᓅᑦᔪᓯᑦᑎᓂᒃ ᐋᕐᕿᓱᐃᓯᒪᒍᑎᑦᑎᒍᑦ, ᐃᓅᓯᑦᑎᒍᓪᓗ ᖃᓄᑭᐋᖅ ᓄᓇᑦᑎᓂᒃ ᓇᒻᒥᓂᖃᖕᖏᓂᕋᕐᑕᐅᓯᒪᒐᑦᑕ ᓲᕐᓗ ᑕᕆᐅᑉ ᐊᑭᐊᓂᒥᐅᑦ ᓇᒻᒥᓂᖃᕐᓱᑎᒃ ᓄᓇᖃᕐᑎᓗᒋᑦ ᑕᒪᒃᑯᐊᑕᒃᒐ ᐊᑕᕐᖑᓯᕈᑎᕗᑦ,” ᐅᖃᕐᑐᖅ ᐆᐱᐊᑦ.
ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᐅᖃᖃᑕᐅᒻᒥᔪᖅ. “ᑕᒪᑐᒧᖕᖓᓕᖓᔪᓂᒃ ᐅᖃᓱᑐᖃᐅᕗᖓ ᓄᓇᕗᑦ ᑎᒃᓕᒑᖑᓯᒪᒋᐊᖏᑦ ᑲᕙᒪᒃᑯᓄᑦ, ᐊᓯᕗᑦ ᓄᓇᒐᓄᑦ ᑎᑭᑦᓱᓂ, ᓄᓀᕐᓂᓱᓂᓗ ᓄᓇᓕᑐᖃᕐᓂᒃ ᓄᓇᖃᕐᖄᓯᒪᔪᓂᒃ. ᐊᖕᖔᖏᑦᑐᓂᒃ ᐊᖏᖃᑎᒌᒍᑎᓂᒃᒎᖅ ᐊᑎᓕᕐᑎᓯᖃᑦᑕᓱᑎᒃ, ᐊᑎᓕᐅᖃᑎᒌᒍᑎᒋᓚᐅᕐᓯᒪᖕᖏᑕᖏᓐᓂᒃ. ᑕᒪᒃᑯᐊᓗ ᐊᖏᖃᑎᒌᒍᑎᓕᐊᖏᑦ ᑐᖕᖓᕕᖃᕐᓱᑎᒃ ᐱᖁᔭᓂᒃ ᐊᑎᓕᐅᕐᑎᓯᔪᑦ ᐱᖁᔭᖏᓐᓂᒃ ᑐᖕᖓᕕᖃᕐᓱᑎᒃ. ᐃᖕᓚᓐᒦᒃᑯᕕᑦ, ᑌᒣᓘᕈᓐᓇᓯᒪᒐᔭᖕᖏᑐᑎᑦ, ᐃᓄᓐᓂᒃ ᓄᓀᕐᓂᒍᓗᑐᐃᓐᓇᓂᐅᔭᕋᔭᖕᖏᑐᑎᑦ ᑖᕙᓂ!”
ᐃᑦᓯᕋᕐᔪᐊᕌᐱᐅᑉ ᑎᑭᓐᓂᕆᓚᐅᕐᑕᖓ ᑲᓇᑕᒧᑦ ᓲᕐᓗ ᖃᐅᒻᒣᓂᖃᕐᐳᖅ ᑕᑯᑦᓴᕈᕐᑎᓯᑦᓱᓂ ᐱᔭᑦᓴᖁᑕᐅᔪᑦ ᓱᑌᔪᕐᓂᓴᒥᒃ ᐃᖏᕐᕋᓂᖃᕐᓂᐊᓕᕐᑎᓗᒋᑦ ᐱᓂᐊᕐᓂᓕᕆᓂᑎᒍᑦ ᓯᕗᓂᑦᑎᓂ ᐊᑑᑎᖃᑦᑕᓛᕐᑐᑎᒍᑦ. ᑭᓯᐊᓂᓕ ᑕᒪᒃᑯᐊᖑᒐᓗᐊᕐᑎᓗᒋᑦ ᐱᒻᒪᕆᐅᓂᕐᐹᖑᕗᖅ ᑕᒪᐅᖓ ᑎᑭᐅᑎᓂᕆᓚᐅᕐᑕᖓ, ᑲᑎᖕᖓᓯᓪᓗᑐᕆᐊᕐᑐᓱᓂ ᑕᒃᑯᒧᓪᓗᑐ ᓄᓇᓕᑐᖃᕐᓂᒃ ᐊᓐᓇᕕᖃᕐᓯᒪᔪᓂᒃ ᐊᓂᕐᕋᖃᕐᑎᑕᐅᕕᒋᑦᓱᒋᑦ ᐃᓕᓐᓂᐊᑎᑕᐅᕕᕕᓂᕐᒥᓂᒃ ᑕᒪᓐᓇ ᒍᐃᓕᐋᒻ ᑕᒍᕐᓈᑉ ᐅᖃᐅᓯᕆᓚᐅᔪᔭᖓ ᐃᑦᓯᕋᕐᔪᐊᕌᐱᒻᒥᒃ ᑕᑯᓚᖓᓂᕐᒥᓂᒃ ᐅᑕᕐᕿᓱᑎᒃ ᐃᓄᑐᐃᓐᓀᑦ ᐊᓐᓇᓯᒪᔪᑦ ᓂᕆᓇᓱᖃᑎᒌᑦᓱᑎᒃ ᐃᖃᓗᓐᓂ ᑲᑎᖕᖓᓯᓚᐅᖕᖏᓂᕐᒥᓂ ᐃᑦᓯᕋᕐᔪᐊᕌᐱᒃ ᕗᕌᓐᓯᔅᒥᒃ.
“ᐃᑉᐱᒍᓱᓪᓗᕆᓗᐊᖕᖑᐊᓚᐅᔪᕗᖓ ᐲᑕ ᐃᕐᓂᒥᒃ. ᓂᑯᕕᑦᓱᓂ ᓂᑦᔮᓯᐊᕿᓚᐅᔪᒻᒪᑦ ᑲᑎᖕᖓᓯᔭᕐᑐᓯᒪᔪᓕᒫᑦ ᓵᖓᓐᓂ. ᐃᒫᒃ ᓂᑦᔮᓚᐅᔪᔪᖅ, ‘ᖃᖓᓗᓐᓃᑦ ᐃᓕᓐᓂᐊᑎᑦᓯᔨᒧᑦ ᕿᑐᕐᖓᑎᓐᓂᒃ ᐊᕐᓵᑕᐅᓚᐅᕐᓯᒪᓛᕈᓐᓀᐳᒍᑦ ᓯᐅᑎᖏᑎᒍᑦ ᑎᒍᒥᐊᕐᑕᐅᓗᑎᒃ ᐱᓱᑯᑕᑦᑎᑕᐅᔨᐊᖃᕐᓗᑕ ᓄᑦᓱᑕᐅᔪᒥᒃ. ᖃᖓᓗᓐᓃᑦ ᐃᓕᓐᓂᐊᑎᑦᓯᔨ ᓯᐅᑎᒃᑯᑦ ᐸᑎᑦᑎᒋᓚᐅᕐᓯᒪᓂᐊᕈᓐᓀᑕᕗᑦ ᐅᕐᕈᑎᑕᐅᓚᕿᓗᑕ ᐃᓄᒃᑎᑐᑦ ᐅᖄᓂᑯᑦᑎᓄᑦ. ᒫᓐᓇᓕ ᑐᓐᓂᑖᕆᒍᒪᔭᓕᒫᑎᓐᓂᒃ ᑐᓐᓂᖃᕈᓐᓇᓕᕐᖁᑎ. ᐊᓐᓄᕌᕐᓯᒪᒍᓐᓇᓕᕐᓱᑎᓪᓗ ᐃᓄᑐᐃᓐᓯᐅᑎᓂᒃ, ᕿᓚᐅᑦᔭᓗᑎᓪᓗ ᑖᓂᓯᕐᓗᑎᑦ, ᑭᓇᒧᓪᓗᓃᑦ ᑌᒣᓘᓂᑯᓐᓄᑦ ᐋᓐᓂᑕᐅᓚᖓᓇᒃ.‘ ᑌᒫᒃ ᓂᑦᔮᒍᑎᖃᕐᑎᓗᒍ ᐊᑦᑐᑕᐅᓪᓗᑐᐊᓗᓐᓇᓚᐅᔪᔪᖅ ᑮᑕ ᐃᑉᐱᒍᓲᒻᒥᑎᓚ-ᐅᔪᒻᒪᑎᒍᑦ ᕿᓚᑦᓱᓯᒪᓂᖃᖕᖏᒋᐊᑦᑕ ᐃᓱᒪᒥᒍᓐᓇᕕᖃᕐᓱᑕᓗ! ᐃᓱᒪᒥᒍᓐᓇ-ᕕᖃᑦᓯᐊᓕᕋᑦᑕ ᓱᒍᒪᒍᑦᑕ, ᐋᙯᓪᓛᓗ, ᐱᔪᕆᒪᓂᖃᕐᓗᑕ ᐃᓄᑐᐃᓐᓇᐅᓂᑦᑎᓂᒃ ᐃᓄᑦᑎᑐᓪᓗ ᐅᖃᐅᓯᒃᑎᓂᒃ ᐱᐅᓯᑐᖃᑦᓴᔭᑦᑎᓂᓪᓗ.”
ᑕᒪᒃᑯᐊᖑᒻᒪᑕᓕ ᑕᒐ, ᓱᕐᕃᓂᕆᒍᓐᓇᑕᖓᑦ ᐃᒫᒃ ᐅᖃᕐᓂᐅᑉ “ᐃᓛᓂᐅᖕᖏᑑᕐᐸᓯ” ᐊᓯᑦᔨᕚᓪᓕᒍᑎᐅᒍᓐᓇᖁᖅ. ᑕᑯᓐᓇᓗᑐᕐᓱᓂ ᐊᑦᑐᑕᐅᒪᓇᒻᒪᕆᓚᐅᔪᔪᖅ, ᐃᖃᓗᓐᓃᓱᓂ ᐃᑦᓯᕋᕐᔪᐊᕌᐱᐅᑉ ᐃᓄᓕᒫᓂᒃ ᑲᑎᖕᖓᓯᓂᕐᒥ ᓇᓪᓕᐅᓂᖓᑕ ᐃᓱᓕᕙᓪᓕᐊᓕᕐᓂᖓᓂ, ᐲᑕ ᐃᕐᓂᖅ, ᐊᓐᓄᕌᕐᓯᒪᑦᓱᓂ ᒪᑭᐊᑦᑐᒥᒃ ᖃᑯᕐᑕᐅᓱᓂ ᓯᓚᐹᕐᒥᒃ, ᐱᓗᑲᑦᑕᐅᓂᖃᒻᒪᕆᓐᓂᐅᒐᓗᐊᕐᓱᓂ ᐊᓂᕐᕋᖃᕐᑎᑕᐅᕕᒋᑦᓱᒋᑦ ᐃᓕᓐᓂᐊᑎᑕᐅᕕᕕᓂᕐᒥᓂ, ᑐᓂᔨᓚᐅᔪᕗᖅ ᕿᓚᐅᑦᔭᕈᑎᒥᓂᒃ ᐊᓇᐅᓪᓚᐅ-ᑎᒥᓂᓪᓗ ᐃᑦᓯᕋᕐᔪᐊᕌᐱᒃ ᕗᕌᓐᓰᔅᒧᑦ.
ᖃᕆᑕᐅᔭᑎᒍᑦ ᖃᐅᔨᒋᐊᕐᕕᐅᒍᓐᓇᒥᔪᑦ
ᐃᓄᐃᑦ ᑕᐱᕇᑦ ᑲᓇᑕᒥ, ᑲᑎᖕᖓᖃᑎᖃᕐᓱᑎᒃ ᓄᓇᕗᑦ ᑐᖕᖓᕕᒃ ᐱᓇᓱᒐᖃᕐᕕᖁᑎᐊᓂ, ᒪᑭᕝᕕᒃ ᐱᓇᓱᒐᖃᕐᕕᒥᒃ, ᐊᒻᒪᓗ ᓄᓇᑦᓯᐊᕗᑦ ᑲᕙᒪᖓᓂᒃ, ᐊᑕᐅᑦᓯᑯᕐᑎᓯᒍᑎᖃᕐᓱᑎᒃ ᐃᓄᑐᐃᓐᓀᑦ ᐃᓚᐅᔭᕐᑐᓯᒪᓂᖓᓂᒃ ᐃᑦᓯᕋᕐᔪᐊᕌᐱᐅᑉ ᑲᓇᑕᓕᐊᕐᓯᒪᓂᖓᓄᑦ ᔪᓓ 25 -29, 2022 ᐅᓪᓗᖏᓐᓂ
ᐊᑕᖏᕐᑐᑦ ᐱᐅᓕᐊᕐᑕᐅᒪᔪᑦ ᐱᔭᐅᔪᕕᓃᑦ ᑲᑎᖕᖓᓯᓂᕆᓚᐅᔪᔭᖓᓂᑦ ᐃᑦᓯᕋᕐᔪᐊᕌᐱᐅᑉ ᐃᓚᐅᔪᑦ ᑕᑯᓐᓇᕋᑦᓴᓕᐊᖑᒪᔪᓪᓗ ᐊᓪᓚᖁᑎᐅᔪᓪᓗ ᐃᑦᓯᕋᕐᔪᐊᕌᐱᐅᑉ ᐃᓛᓂᐅᖕᖏᑐᕈᑎᕕᓂᖏᑕ ᖃᕆᑕᐅᔭᒦᑉᐳᑦ ᐅᕙᓂ: papalvisit.ca
ᑖᓐᔭ ᑐᖓᓕᐅᑉ ᐅᖃᐅᓯᕕᓂᖏᑦ ᐃᑦᓯᕋᕐᔪᐊᕌᐱᒃ ᕗᕌᓐᓯᔅᒧᑦ ᑕᑯᔭᐅᒍᓐᓇᐳᑦ ᐅᕙᓂ:
https://www.cbc.ca/news/canada/north/tanya-tungilik-speech-pope-full-text-1.6536409 or https://bit.ly/3qmiCwN
ᐊᑕᓂᐊᓘᑉ ᑭᒡᒐᖓ ᑲᓇᑕᒥ ᒥᐊᔨ ᓭᒪᓐ ᐅᖄᔪᖅ, ᐅᓇᑕᕐᑐᓴᖃᐅᑎᐅᑦᓱᓂᓘᕐᑐᒥ ᐊᓂᕐᕋᒥᓂ ᑯᐯᒃ ᓯᑎᒥ ᔪᓓ 27, 2022-ᒥ:
https://www.gg.ca/en/media/news/2022/speech-papal-visit ᐅᕝᕙᓘᓐᓃᑦ https://bit.ly/3Delcg9
