ᐳᑐᓕᒃ ᐸᐱᑲᑦᑐᖅ ᑕᖃᔪᐃᑦᑑᓱᓂ ᓂᐸᖃᕐᑎᓯᔨᐅᓯᒪᔪᖅ ᓄᓇᕕᒻᒥᐅᑦ ᐃᓄᐃᑦ ᐱᒍᓐᓇᐅᑎᖏᓐᓂᒃ, ᐃᓅᒍᓐᓀᓚᐅᔪᕗᖅ ᐊᓇᕐᕋᒥᓂ ᓴᓪᓗᓂ ᐊᐅᒡᒍᓯᐅᑉ ᐱᒋᐊᕐᓂᖓᓂ.

ᓴᓪᓗᓂ ᓯᕗᓕᖃᑦᑕᓯᒪᔪᖅ, ᐃᓪᓗᑐᐃᓐᓇᒥ ᐃᓅᓕᕐᓯᒪᑦᓱᓂ, ᐃᓅᓯᓕᒫᕐᒥᓂᓪᓗ ᓴᓪᓗᒥᐅᒍᓯᒪᑦᓱᓂ, ᓴᒡᓚᒃ ᓚᔭᐅᓲᒍᓯᒪᔪᒥ. ᐊᕙᑎᑦ ᐱᖓᓱᑦ ᖁᓕᐅᖕᖏᒐᕐᑐᓂᓪᓗ (69) ᐅᑭᐅᖃᕐᓱᓂ. ᐳᑐᓕᒃ ᐃᓕᓴᖃᑦᑕᓯᒪᔪᖅ ᑲᕙᒪᑐᖃᒃᑯᑦ ᐃᓕᓴᕐᕕᖁᑎᖓᓂ ᓴᓪᓗᓂ ᐳᕐᑐᓂᕐᒧᑦ 5-ᒧᑦ ᑎᑭᐅᑎᑦᓱᓂ, ᐃᓕᓴᕆᐊᕐᑎᑕᐅᓯᒪᒻᒥᓱᓂ ᑰᑦᔪᐊᕌᓗᒻᒧᑦ ᒫᓂᑑᐸᒦᑦᑐᒧᑦ 1965-66. 1969-ᒥᑦ 1973-ᒧᑦ ᐅᔭᕋᕐᓂᐊᕕᓐᓂ ᐱᓇᓱᑦᑎᐅᓯᒪᔪᖅ Falconbridge Nickel Mine and Asbestos Corporation. ᑭᓯᐊᓂᓕ ᖃᐅᔨᒻᒫᕆᔭᐅᓪᓚᕆᑦᓯᒪᔪᖅ ᑯᐯᒃ ᑕᖅᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᑕ ᑲᑎᒪᔨᖏᓐᓄᑦ ᐃᓚᐅᑦᓱᓂ 1975-ᒥ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎ ᐊᖏᖃᑎᒌᒍᑕᐅᒐᓱᐊᕐᑎᓗᒍ ᓄᓇᕕᒻᒥ ᐃᕐᖃᓇᕐᑑᖃᑕᐅᔪᒥᒃ.

“ᐳᑐᓕᒃ ᐱᓪᓚᕆᐊᓘᓯᒪᔪᖅ ᓄᓇᕕᐅᑉ ᐱᕙᓪᓕᐊᓂᖓᓄᑦ ᐅᓪᓗᒥᒧᑦ,” ᐅᖃᕐᑐᕕᓂᖅ ᐱᑕ ᐋᑕᒥ, ᐊᖓᔪᕐᖄᖅ ᒪᑭᕝᕕᒧᑦ. “ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎ ᓯᕗᓪᓕᐸᐅᑦᓱᓂ ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᐅᓯᒪᔪᖅ ᐊᑎᓕᐅᕐᕕᐅᓯᒪᑦᓱᓂ ᐊᑯᓂᐅᓗᐊᖕᖏᑐᖅ ᓱᓕ ᐊᑑᑎᔭᐅᒍᓐᓇᓯᒐᔭᕐᑐᕕᓂᐅᒐᓂᓗ ᓯᕗᓕᕐᓂᖏᑉᐸᑦ ᑯᐯᒃ ᑕᖅᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓ, ᐳᑐᓕᐅᑉ ᐃᓚᐅᕕᒋᓯᒪᔭᖓ. ᐊᖏᖃᑎᒌᒍᑎ ᓄᐃᑦᓯᒍᑕᐅᓯᒪᔪᖅ ᒪᑭᕝᕕᒥᒃ 1978-ᒥ ᐊᐅᓚᑦᓯᔪᑦᓴᐅᒐᔭᕐᑐᒥᒃ ᑮᓇᐅᔭᓂᒃ ᐱᓯᒪᔪᓂᒃ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᒥᑦ. ᐳᑐᓕᐅᑉ ᐱᔭᑦᓴᕆᓯᒪᔭᖓ ᐃᑲᔪᕐᓯᒍᑎᒋᓯᒪᔭᖓᓗ ᐱᓪᓚᕆᐊᓘᓯᒪᔪᖅ. ᐲᕐᕙᓓᓯᒪᓚᖓᔭᕗᑦ ᐃᓚᑦᓱᒍᓱᑦᓱᑕᓗ ᐃᓚᖏᓐᓂᒃ ᐆᒻᒪᑎᑦᑎᓂᑦ ᐱᔪᒥᒃ.”

ᐃᓕᑕᕆᔭᐅᒍᑎᑖᓚᐅᔪᕗᑦ ᐱᕙᓪᓕᐊᑎᑦᓯᖃᑕᐅᓯᒪᓂᕐᒥᓄᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᒥᒃ, ᐳᑐᓕᒃᑯᑦ ᐊᑎᓕᐅᖃᑎᒋᓯᒪᔭᖏᓪᓗ ᐃᓕᑕᕐᓯᔭᐅᒍᑎᑖᕐᓱᑎᒃ Order of Nunavik 2015-ᒥ. ᐳᑐᓕᒃ ᐸᐱᑲᑦᑐᖅ ᐊᖏᖃᑎᒌᒐᓱᐊᕐᑎᐅᖃᑕᐅᓯᒪᒻᒥᔪᖅ ᓄᓇᕕᒻᒥ ᐃᓄᐃᑦ ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᖓᓂᒃ.