ᐊᓖᔅᓯᐊ ᐃᖃᓗᒃ ᐊᖓᔪᕐᖃᕆᔭᐅᓚᐅᔪᕗᒃ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᓐᓄ 2019-ᖑᑎᓪᓗ ᑌᒪᖕᖓᓂᓪᓗ ᐱᓇᓱᖃᑕᐅᕙᑉᐳᖅ ᐱᑦᔪᔨᑦᓱᓂᓗ ᐅᕕᒃᑲᓂᒃ ᓄᓇᖁᑎᐅᔪᒥ. ᐊᖓᔪᕐᖄᒧᑦ ᓂᕈᐊᕐᑕᐅᒪᓂᖓ ᐃᓱᓕᓕᕐᑎᓗᒍ ᐊᐅᒡᒍᓯ 31-ᒥ, ᑕᕐᕋᓕᒃ ᕿᒥᕐᕈᐊᑦ ᐊᐱᕐᓱᓚᐅᔪᕙᖓ ᓯᕗᓕᕐᓯᒪᓂᖓᓄᑦ ᑲᑎᖕᖓᕕᐅᔪᒥ.
ᖃᓄᕐᓖ ᐃᓱᒪᓚᐅᔪᕕᑦ ᖃᕐᔪᐃᑦ ᐅᕕᒃᑫᑦ ᑲᑎᖕᖓᕕᖓᓐᓄᑦ ᐊᖓᔪᕐᖄᖑᓚᖓᓕᕐᓱᑎᒃ ᓂᕈᐊᕐᑕᐅᒋᐅᕋᕕᑦ?
ᖃᕐᔪᐃᑦ ᐅᕕᒃᑫᑦ ᑲᑎᖕᖓᕕᖓᓐᓄᑦ ᐊᖓᔪᕐᖃᖑᓚᖓᓕᕐᓱᖓ ᓂᕈᐊᕐᑕᐅᓚᐅᕐᓯᒪᕗᖓ ᕕᕈᐊᕆ 12, 2019-ᖑᑎᓪᓗᒍ, ᐊᓕᐊᓱᐊᒻᒪᕆᓯᒪᔪᖓ ᐁᑉᐹᒍᓪᓗ ᓇᓗᒫᑦᓱᖓ ᑭᓯᐊᓂ ᐃᓅᓯᕋᓂ ᓄᑖᓂᒃ ᐱᒐᓱᒍᒪᓂᖃᓕᓚᐅᕐᓯᒪᔪᖓ.
ᓱᓇᓂᓪᓓ ᐅᕕᒃᑫᑦ ᑲᑎᖕᖓᔨᖏᑦ ᐱᔭᖃᕐᓯᒪᕙᑦ ᐱᔪᕆᐅᑎᒋᓯᒪᓂᕐᐹᑎᓐᓂᒃ?
ᐱᔪᕆᐅᑎᒋᓂᕐᐹᕆᓯᒪᔭᕋᓕ ᑰᒃᔪᐊᒥ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᐊᓪᓚᕕᑦᓴᒥᒃ ᓇᓂᓯᒍᑦᔨᓱᒋᑦ ᖃᓄᕐᓗᓃᑦ ᓂᕆᐅᒋᔭᑦᓭᕈᓕᕐᑎᓗᒋᑦ ᐊᓚᕕᑦᑖᓴᓛᕋᓗᐊᕐᒪᖔᕐᒥᒃ. ᓇᑯᕐᓴᒪᕆᖏᓐᓇᖁᖓ ᐴᑎᒃᑯᓂᒃ ᐃᓚᒌᓂᒃ ᐊᒻᒪᓗ ᐊᑎᐋᓪ ᔮᓴᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐱᓇᓱᑦᑐᒥᒃ ᐅᕙᓐᓂᒃ ᓴᐳᑦᔨᓯᒪᑦᓯᐊᒪᕆᓚᐅᔪᒻᒪᑕ ᐊᓪᓚᕕᐅᓛᓕᕐᑐᒥᒃ ᓄᑕᐅᓯᓕᑎᕆᓂᖃᕈᓐᓇᓯᑎᓚᐅᔪᒻᒫᑎᒍᑦ.
ᖃᓄᕐᓖ, ᖃᓄᑐᐃᓐᓇᖅ ᐃᓕᑦᓯᒍᑎᖃᑦᓴᓂᕈᕕ, ᓱᓇᒥᒃ ᐃᓕᑕᖃᕐᓂᕿᑦ ᐊᖓᔪᕐᖄᖑᑦᓱᑎᒃ ᑲᑎᖕᖓᔨᓄᑦ?
ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᒃᑯᓄᑦ ᐊᖓᔪᕐᖄᖑᑦᓱᖓ ᐊᒥᓱᓂ ᐃᓕᑦᓯᓚᐅᔪᕗᖓ. ᐃᓕᑦᓯᓚᐅᕋᒪ ᐱᓇᓱᒐᖃᕐᕕᐅᔪᒥᒃ ᓯᕗᓕᕆᐊᒥᒃ, ᐃᓕᓚᐅᔪᒻᒥᓱᖓᓗ ᐊᒥᓱᐃᓂᒃ ᐱᓇᓱᒐᖃᕕᓂᒃ ᑕᒫᓂ ᓄᓇᕕᒻᒥ. ᐃᓕᑦᓯᓚᐅᔪᒻᒥᓱᖓᓗ ᖃᓄᑐᐃᓐᓇᖅ ᐱᒍᒪᔭᖃᕐᓂᒥᒃ ᐃᓱᒪᖃᑐᐊᕈᕕᒃ ᐱᒐᓱᓕᕈᕕᐅᒃ ᐱᔭᖃᕈᓐᓇᕆᐊᕐᐱᑦ. ᐊᖓᔪᕐᖄᖑᑦᓱᖓ ᓲᕐᓗ ᐊᑭᓕᕐᑕᐅᔪᑎᑐᑦ ᐱᓚᐅᔪᕗᖓ ᓯᕗᓕᕐᓱᖓ ᓄᑖᕌᐱᒻᒥᒃ ᐱᓇᓱᒐᖃᕐᕕᒥᒃ.
ᓱᓇᓃ ᓵᖕᖓᓯᓗᐊᖕᖑᐊᕆᐊᖃᓚᐅᔪᕕᑦ ᖃᕐᔪᐃᑦ ᐅᕕᒃᑫᑦ ᑲᑎᖕᖓᕕᖓᓐᓄᑦ ᐊᖓᔪᕐᖄᖑᑦᓱᑎᑦ?
ᓵᖕᖓᒋᐊᓕᓕᒫᒃᑲᓂ ᐊᖏᓂᕐᐹᖑᓚᐅᔪᔪᖅ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᑦ ᐊᓪᓚᕕᖃᕐᕕᓴᖃᖕᖏᓂᕆᓚᐅᔪᔭᖓᑦ ᑰᒃᔪᐊᒥ ᓇᓂᓗᓐᓃᑦ ᐃᓂᑦᓴᖃᓚᐅᔪᒍᓐᓀᒪᑕ ᓯᖁᑦᑎᑕᐅᓯᒪᓕᕐᑎᓗᒍ ᒪᑭᕝᕕᐅᑉ ᐊᓪᓚᕕᕐᖄᕕᓂᖓ ᐊᑦᑕᑐᐊᕆᖃᑦᑕᓯᒪᔭᖓᑦ ᐅᕕᒃᑫᑦ ᑲᑎᖕᖓᔨᖏᑦᑕ.
ᖃᓄᐃᓘᕐᓗᑏᒃ ᐅᕕᒃᑫᑦ ᓄᓇᕕᒻᒥ ᓱᕐᕃᓂᖃᕈᓐᓇᐸᑦ?
ᐅᕕᒃᑫᑦ ᓱᕐᕃᓂᖃᕈᓐᓇᖁᑦ ᐱᓇᓱᖃᑎᒌᒍᓐᓇᓯᐊᓯᓚᐅᕈᑎᒃ. ᐃᓚᐅᖃᑦᑕᓗᑎᒃᓗ ᐅᕕᒃᑫᑦ ᐱᒐᓱᐊᖃᑎᒌᑦᑐᖁᑎᖏᓐᓄᑦ, ᖃᓄᑐᐃᓐᓇᖅ ᐅᑦᑐᖃᑦᑕᓗᑎᒃ, ᐃᓕᓐᓂᐊᑕᒥᓂᒃ ᑲᔪᓯᓗᑎᒃ ᐃᓚᐅᖃᑦᑕᓗᑎᒃᓗ ᓄᓇᓕᒻᒥᓂ.
ᖃᓄᕐᓖ ᐅᖃᐅᑦᔨᒐᔭᕐᕿᑦ ᐊᖓᔪᕐᖄᖑᓚᖓᓯᔪᒥᒃ?
ᐱᓇᓱᒐᖃᕐᕕᒥ ᐊᖓᔪᕐᖃᐅᓂᖅ ᐊᖏᔪᐊᓗᒻᒥᒃ ᐱᔭᑦᓴᑕᖃᕐᐳᖅ. ᖁᕕᐊᓇᕐᑐᒪᕆᐅᑦᓱᓂᓗ ᖃᓄᑐᐃᓐᓇᖅ ᓱᓇᑐᐃᓐᓇᒧᑦ ᐊᑐᐃᓐᓇᐅᒪᕕᖃᑦᓯᐊᕕᑦᓴᐅᓱᓂᓗ.
ᐊᖓᔪᕐᖄᖑᓂᕐᓃ ᐱᔭᖃᕈᑎᒋᒍᒪᓯᒪᔭᓕᒫᑎᓐᓂᒃ ᐱᓚᐅᔪᕕᑦ? ᑌᒣᓯᒪᖕᖏᑯᕖᑦ ᓱᓕ ᓱᓇᓂᒃ ᐱᔭᐅᔪᖃᕆᐊᖃᕐᐸ?
ᐱᔭᖃᕈᓐᓇᓯᓚᐅᔪᕗᖓ ᐱᒍᒪᓯᒪᔭᒃᑲᓂᒃ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᓐᓄᑦ ᐊᖓᔪᕐᖄᖑᓂᕋᓂ ᐅᑯᐊᓗ ᐱᓚᐅᔪᕙᒃᑲ: ᐃᓱᒫᓗᐃᕐᓱᖓ ᐊᓪᓚᕕᑦᑕᑎᑦᓯᓂᕐᒥᒃ ᐊᑕᓚᖓᓕᕐᑐᒥᒃ ᐊᕐᕌᒍᓂ ᓯᑕᒪᐅᔪᕐᑐᓂ, ᓴᕐᕿᑎᑦᓯᓂᕐᒥᒃ ᑲᑎᖕᖓᔨᓂᒃ ᐱᓇᓱᖃᑎᒌᑦᓯᐊᓂᐊᕐᑐᓂᒃ, ᓄᓇᕕᐅᑉ ᐅᕕᒃᑲᖏᓐᓂᒃ ᑐᑭᓯᓂᐊᕐᕕᖃᕐᓂᒥᒃ, ᐊᖏᖃᑎᒌᒍᑎᖃᕋᓱᓐᓂᑯᑦ ᐱᔭᖃᕐᓂᒥᒃ ᓄᑖᓂᒃ ᑮᓇᐅᔭᖃᕐᑎᑕᐅᒍᑎᑦᓴᐅᓱᑎᒃ ᐊᖏᖃᑎᒌᒍᑎᓂᒃ ᑕᒪᖏᓐᓂᑦ ᑲᕙᒫᓐᓂᑦ ᑲᕙᒪᑐᖃᒃᑯᓂᓪᓗ ᑯᐯᒃᑯᓗ ᑲᕙᒪᖓᓐᓂᑦ, ᐊᑎᓕᐅᖃᑎᒌᒍᑎᖃᕐᓂᒥᒃ ᐊᖏᖃᑎᒌᒍᑎᒋᓯᒪᓂᐊᕐᑕᑎᓐᓂᒃ ᒪᑭᕝᕕᓗ, ᒪᑭᕝᕕᐅᓗ ᑲᑎᖕᖓᓂᖏᓐᓂ ᓂᕈᐊᕈᓐᓇᐅᑎᑖᕆᓂᕐᒥᒃ. ᐱᓇᓱᖃᑎᖃᕈᒪᓚᐅᔪᒐᓗᐊᕐᑐᖓ ᐱᓇᓱᖃᑎᒌᒍᑎᑦᓴᓕᐅᕐᓂᒥᒃ ᐊᓯᓂᒃ ᐱᓇᓱᒐᖃᕐᕕᓂᒃ ᓲᕐᓗ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᓂᕐᒃ, ᑭᓯᐊᓂ ᐱᒍᓐᓇᓚᐅᔪᖕᖏᑕᕋ, ᑌᒣᒐᓗᐊᕐᑎᓗᒍ ᓂᕆᐅᓐᓂᖃᕐᐳᖓ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᒃᑯᑦ ᐱᔭᖃᓛᕐᓂᖓᓐᓂᒃ ᓄᑖᒥᒃ ᓯᕗᓕᕐᑎᑖᕐᓯᒪᓕᕐᓗᑎᒃ.
ᐅᕕᒃᑫᓕ ᖃᓄᖅ ᐅᖃᐅᑎᒐᔭᕐᕿᒋᑦ?
ᐅᖃᕐᖃᕈᒪᕗᖓ, ᑕᑯᒍᒪᒋᐊᒥᒃ ᐊᒥᓲᓂᕐᓴᓂᒃ ᐅᕕᒃᑲᓂᒃ ᐃᓚᐅᖃᑕᐅᒍᒪᔪᓂᒃ, ᐱᓇᓱᒐᕐᓄᑦ ᐃᓕᒐᓱᖃᑦᑕᓗᑎᒃ ᓂᑦᔮᒍᑎᖃᖃᑦᑕᓕᕐᓗᑎᒃᓗ ᐱᔭᑦᓴᐅᓕᕐᑐᓂᒃ ᐊᑦᑐᐊᔪᓂᒃ ᐅᕕᒃᑲᓄᑦ ᖃᓄᑐᐃᓐᓇᓗ ᓄᓇᕕᐅᑉ ᐅᕕᒃᑲᖏᑕ ᑭᖕᖒᒪᑦᓯᒍᑎᖏᓐᓂᒃ ᑲᒪᒍᒪᓗᑎᒃ, ᐃᓚᐅᖁᓇᕋᑦᓯ, ᐅᕕᒃᑲᓂᒃ ᓂᑦᔮᔪᖃᖃᑦᑕᖁᔨᓇᕐᒪᑦ ᑐᑭᑖᕐᕆᖃᑕᐅᕙᓪᓗᑎᓪᓗ. ᐅᕙᓐᓂᓕ ᐱᔪᒥᒃ, ᐅᖃᕈᒪᕗᖓ ᓱᓇᓗᓐᓃᑦ ᐱᑕᙯᓐᓇᕈᓐᓇᖏᒻᒪᑦ, ᐃᓱᒫᓗᓪᓗᐊᐸᒍᓐᓀᓗᑎᓪᓗ, ᓱᔪᖃᕋᓗᐊᕐᐸᑦ, ᐊᓯᑦᔨᕙᓐᓂᐊᒪᑕ… ᓂᕆᐅᓐᓂᖃᕆᑦᓯ .
