ᒍᐃᓕᐋᒻ ᑕᒍᕐᓈᖅ ᐊᒥᓱᐊᓗᓐᓂᒃ ᐱᓇᓱᐊᕐᓯᒪᕗᖅ. ᓄᑖᒥᒃ ᑐᓴᕐᓂᔮᕐᑎᓯᒍᑎᒥᒃ ᓄᐃᑦᓯᓚᐅᕐᐳᖅ ᐱᒋᐊᕐᕕᓕᐅᑎᓯᒪᔪᓂᒃ ᓂᐱᓕᐅᖃᑦᑕᕆᐊᖕᖓᓯᓂᕕᓂᖓᓂᑦ, ᐅᖄᒍᑎᖃᕐᐳᖅ ᐱᔭᖃᕆᐊᑦᓯᐊᕈᓐᓇᐅᑎᒋᓚᐅᕐᑕᒥᓂᒃ ᐋᕐᕿᒋᐊᕆᓂᖃᕐᓂᒥᒍᑦ.
ᐊᓪᓚᑕᖏᑦ Miriam Dewar/ᒥᐊᔨᐋᒻ ᑑᐅ
ᒍᐃᓕᐋᒻ ᑕᒍᕐᓈᖅ ᖃᓄᐃᑦᑐᑐᐃᓐᓇᐅᓯᒪᕗᖅ, ᐃᓚᐅᔪᑦ ᐅᑯᐊ: ᑐᓴᕋᑦᓴᓂᐊᕐᑎ, ᐱᓂᐊᕐᓂᓕᕆᔪᓄᑦ ᐃᓚᐅᕙᓐᓂᖅ, ᐊᒻᒪᓗ ᑐᓴᕐᓂᔮᕐᑎᓯᔨᐅᑦᓱᓂ. ᐊᐅᒡᒍᓯ-ᐅᓚᐅᔪᔪᒥ, ᓄᐃᑦᓯᒍᑎᖃᓕᓚᐅᔪᒋᕗᖅ ᖃᕆᑕᐅᔭᑎᒍᑦ ᑐᓴᕐᓴᐅᔪᒥᒃ ᓲᕐᓗ ᐃᖕᖏᓗᑦᑖᕈᑎᒥᓂᒃ ᑐᓴᕐᓂᒋᔭᐅᔪᓂᒃ ᐊᒥᓱᓄᒃᑦ ᐊᒻᒪᓗ ᓂᐱᓕᐅᕆᒋ-ᐊᑦᓯᐊᓱᓂ ᓂᑦᔭᓗᑦᑖᕈᑎᒋᓯᒪᔭᒥᓂᒃ ᓄᐃᓚᐅᔪᔭᒥᓂᒃ ᐊᑦᓯᕋᐅᑎᓕᒃᑯᑦ ᑕᑯᒐᑉᑭᑦ: ᐃᑲᔪᓚᐅᖕᖓ, ᓂᐱᓕᐅᕆᐊᖕᖓᓚᐅᕐᓯᒪᔭᒥᓂᒃ ᑌᑦᓱᒪᓂ 1979-ᒥ. ᑖᑦᓱᒥᖓ ᐱᓇᓱᑦᓱᓂ ᐱᔪᓐᓇᕈᑎᖃᓚᐅᕐᐳᑦ ᐃᕐᖃᐅᒪᓂᕐᒥᒃ ᐱᕙᓪᓕᐊᓂᕆᓯᒪᔭᑐᐃᓐᓇᕆᖕᖏᑕᒥᓂᒃ ᓂᑦᔭᓗᑦᑕᑎᐅᓂᕐᒥᒍᑦ ᑭᓯᐊᓂᓕᑦᑕᐅᖅ ᐃᓚᖃᓚᐅᕐᒪᑕ ᖃᓄᑎᒋᒃ ᐱᒻᒪᕆᐅᓂᖃᕐᑎᓗᒋᑦ ᒍᐃᓕᐋᒻᒧᑦ ᐱᕕᖃᓕᕐᕿᒍᑎᒋᑦᓱᒋᑦ ᑐᓴᕐᓂᑑᓂᕐᓴᕈᕐᑎᓯᒋᐊᕆᓂᕐᒥᒃ.
“ᓂᑦᔭᓗᑦᑖᕈᓯᒃᑲᓂᒃ ᓂᐱᓕᐅᕆᐊᖕᖓᓯᓚᐅᕐᓯᒪᕗᖓ ᓯᐱᓯᒃᑯᓂ, ᓭᒻᒪᑎ-ᑕᐅᒻᒪᕆᓪᓕᑦ ᓂᐱᓕᐅᓚᐅᕐᓯᒪᒻᒪᑕ ᐃᓄᑐᐃᓐᓇᓂᒃ ᑌᑦᓱᒪᓂᐅᓯᒪᔪᖅ.” ᒍᐃᓕᐊᒻ ᐅᓂᒃᑳᑐᖅ. “ᑭᓯᐊᓂᓕ ᑮᓇᐅᔭᕐᑐᕈᑎᑦᓴᖏᑦ ᐃᑭᑦᑐᕕᖕᖓᐅᓯᒪᒻᒪᑕ ᐅᓪᓗᓕᒫᑐᐃᓐᓇᒥ ᓂᐱᓕᐅᕆᒍᓐᓇᖃᑦᑕᓯᒪᕗᑦ.” ᑌᑲᓂᓕ ᐅᒡᓗᒥ ᓂᐱᓕᐅᕐᑕᐅᕕᒋᓚᖓᔭᒥᓂ ᒍᐃᓕᐋᒻ ᓂᐱᓗᑦᓯᒪᕗᖅ. “ᑌᑲᓂ ᐅᓪᓗᒥ ᓂᐱᓕᐅᕐᑕᐅᕕᒻᒥ ᓂᐱᖃᑦᓯᐊᖏᒃᑯᕕᑦ, ᐊᔪᕐᓇᒪᑦ ᓂᐱᖃᑦᓯᐊᓇᒃᓂᐱᓕᐅᕐᑕᐅᒐᕕᑦ” ᓂᐱᓕᐅᖃᑦᑕᓕᕋᓗᐊᕋᒥ ᐊᓯᖏᓐᓂᒃ ᑐᓴᕐᓈᒐᑦᓴᓕᖁᑎᒥᓂᒃ, ᑌᒃᑯᓂᖓᓪᓗᑯᐊᐱᒃ ᓂᐱᓕᐊᕆᓯᒪᔭᒥᓂᒃ ᓈᓚᐅᑎᒃᑯᑦ ᓂᑦᔭᑎᑕᐅᑎᓪᓗᒋᑦ ᑐᓵᓕᕋᒥ ᐃᓱᒪᓪᓚᕆᖃᑦᑕᓯᒪᔪᖅ ᓂᐱᖃᑦᓯᐊᓂᕐᓴᐅᒍᓐᓇᑐᕕᓂᐅᒋᐊᒥ, ᑕᒪᑐᒥᖓᓗ ᐃᓱᐃᒋᔭᖃᖏᓐᓇᖃᑦᑕᓯᒪᕗᖅ.
ᐊᑯᓂ ᑐᓴᕐᓂᔮᕐᑎᓯᔨᐅᓂᕐᒥᒃ ᐱᓇᓱᖃᑎᒋᓲᑐᖃᕐᒥᓂᒃ ᐅᖃᖃᑎᖃᓚᐅᕐᓱᓂ ᒫᒃ ᑭᐊᓂᑎᒥᒃ, ᐅᓄᕐᑐᑲᓪᓚᓂᒃᓗ ᑮᓇᐅᔭᕐᑐᕈᑎᑦᓴᑖᕐᑎᑕᐅᓚᐅᔪᑦᓱᓂᓂᑦ ᑯᐯᒃ ᑲᕙᒪᖓᓂᑦ, ᓂᐱᓕᐅᕐᕕᒋᓛᕐᑕᒥᓂᒃ ᐸᕐᓇᓯᓚᐅᔪᔪᖅ Studio Mixart-ᒥ ᓂᐱᓕᐅᕐᕕᖃᓛᓕᕐᓱᑎᒃ ᒪᓐᑐᔨᐊᒥ. ᑌᒪᓕ ᒍᐃᓕᐋᒻ ᓂᐱᖓ 70-ᓂᒃ ᐅᑭᐅᖃᓕᕐᓱᓂ ᐃᓄᑐᖃᕐᕙᓛᓂᕐᓴᐅᓕᕐᒪᑦ ᓂᑦᔭᓗᑦᑖᕈᑎᖏᑕ ᐃᓚᖏᑦ ᓂᐱᓕᐅᕆᐊᓕᕐᕿᑖᒋᐊᖃᓚᐅᔪᕗᑦ, ᓂᐱᓕᐊᖏᑦ ᐊᑕᖏᕐᓱᑎᒃ ᑕᕐᕿᓂ ᓯᑕᒪᐅᔪᕐᑐᓂ ᐱᓇᓱᑦᑕᐅᒋᐊᖃᓚᐅᔪᕗᑦ, ᑌᑦᓱᒪᓂ 1979-ᖑᑎᓪᓗᒍ ᐅᓪᓗᐃᓈᕐᑕᐅᑎᑕᐅᓚᐅᕐᓯᒪᑦᓱᑎᒃ. ᑭᓯᐊᓂᓕ ᑌᒣᒐᓗᐊᕐᓱᓂ ᐱᔭᖃᑦᓯᐊᓚᐅᔪᕗᑦ ᐊᓱᐃᓛᓗ ᑭᖑᓂᐊᒍᑦ Takugapkit: When I See You/ᑕᑯᒐᑉᑭᑦ ᓂᐱᐅᓕᕐᓱᓂ ᓄᐃᑕᐅᓕᓚᐅᔪᕗᖅ ᖃᕆᑕᐅᔭᑎᒍᑦ iTunes-ᑯᓪᓗ Apple Music-ᑯᓪᓗ.
ᒍᐃᓕᐋᒻ ᐅᖃᕐᑐᖅ ᐊᓯᑦᔩᒍᒪᓂᖃᓚᐅᔪᒋᐊᒥᒃ ᓂᑦᔭᓗᑦᑖᕈᑎᒥ ᐃᓚᖏᓐᓂᒃ ᑭᓯᐊᓂ ᐊᓯᑦᔩᒍᒣᓚᐅᔪᕗᖅ. “ᓂᐱᓕᐅᕆᕕᒻᒦᖃᑎᒃᑲᓂᒃ ᐊᐱᕐᓱᓚᐅᔪᔪᖓ,” ᐅᖃᕐᑐᖅ ᒍᐃᓕᐋᒻ, ᐃᕐᓂᒥᓂᒃ ᑎᐊᕆᒃᒥ ᐅᖄᒍᑎᖃᕐᓱᓂ, ᑎᐊᕆᒃ, ᑐᓴᕐᓂᔮᕐᑎᓯᔨᐅᒻᒥᔪᖅ ᐱᕈᕐᓴᓯᒪᔪᖅ ᐊᑖᑕᒥ ᓂᑦᔭᓗᑦᑖᕈᓯᖏᓐᓂᒃ ᑐᓵᕙᑦᓱᓂ , ᓂᐱᓕᐊᕆᕐᖃᒥᒋᓕᕐᑕᖓᓂᒃ ᑐᓵᓕᕋᒥ ᐃᒣᓕᑦᓱᓂ ᐊᑖᑕᒥᓄᑦ ᐅᖃᓚᐅᔪᔪᖅ, “ ᐊᑕᑖᒃ ᐅᖃᐅᓯᖏᓐᓂᒃ ᐊᓯᑦᔩᓂᕐᕿᑦ. ᑌᒫᒃ ᓂᒃᓕᓚᖓᒋᐊᕐᐱᑦ ᐃᓱᒪᓚᐅᕐᖁᖓ ᐊᓯᐊᓄᖓ ᓱᓇᐅᕝᕙ ᐁᑎᓪᓗᑎᑦ.”
ᕿᒥᖏᓪᓗ ᐅᖃᐅᓯᖏᓪᓗ ᑖᒃᑯᓭᓐᓇᐅᒐᓗᐊᕐᑎᓗᒋᑦ ᓱᓕ, ᓄᑖᓂᒃ ᓂᐱᓂᒃ ᐃᓚᐅᔪᖃᓕᕐᑐᖅ ᑕᒃᑲᓂ ᓂᐱᓕᐊᑦᑎᓂ. Per Berthelsen-ᑯᒃ ᓇᔭᒌᒃ ᓂᐱᖃᖃᑕᐅᓕᕐᑑᒃ ᒍᐃᓕᐋᒻᒧᑦ ᑕᒃᑲᓂ ᐊᑯᑭᑦᑐᒥᐅᑎᑑᕐᓱᑎᒃ ᓂᑦᔭᓗᑦᑖᕈᓯᖓᓂ ᐋᓈᓇᒑ, ᓂᑦᔭᓗᑦᑕᕈᓯᓕᐊᕆᓯᒪᔭᒥᓂᒃ ᐊᓈᓇᒥᓅᓕᖓᑎᓪᓗᒍ. ᑐᓴᕐᓂᑐᒻᒪᕆᐊᓘᓯᒪᒻᒪᑦ ᒍᐃᓕᐋᒻ ᓂᐱᓕᐅᕆᐊᓪᓚᒍᒪᖃᑦᑕᓯᒪᔭᖓ ᐊᑯᑭᑦᑐᒥᐅᓂᒃ ᓂᐱᓕᐅᖃᑎᒋᕐᖄᓯᒪᔭᒥᓂᒃ ᓂᐱᓕᐅᕆᒋᐊᓪᓚᖃᑎᖃᕐᓗᓂ. Per ᑕᒪᑐᒥᖓ ᓂᐱᓕᐅᕆᓂᕐᒥᒃ ᐱᑦᔪᑎᓕᒻᒧᑦ ᖃᐅᔨᒋᐊᕐᕕᐅᓕᕋᒥ ᐸᓂᒻᒥᓂᒃ ᔫᓕᒥᒃ, ᖃᐅᔨᒪᔭᐅᑦᓯᐊᒥᔪᒥᒃ ᓂᑦᔭᓗᑦᑖᑎᐅᒋᐊᖓ ᓂᑦᔭᓗᑦᑖ-ᕈᓯᓕᐅᕐᑎᐅᒋᐊᖓᓗ ᑖᕙᓂ ᑕᕆᐅᑉ ᐊᑭᐊᓂ ᐱᔪᓇᖁᑎᖃᓚᐅᔪᔪᖅ. ᒍᐃᓕᐋᒻ ᖁᕕᐊᓱᒻᒪᕆᓕᓚᐅᔪᔪᖅ ᔫᓕᓗ ᖃᑕᖕᖑᑎᑦᓴᖓᓗ ᐊᖏᕐᒪᓃᒃ ᒍᐃᓕᐋᒻᒥᒃ ᓂᐱᓕᐅᕆᖃᑎᖃᓛᓕᕐᓱᑎᒃ – ᑖᕙᓂ Copenhagen-ᒦᓪᓗᑎᒃ. ᓂᐱᓕᐅᕆᕕᒃ ᓂᐱᓕᐊᖑᓯᒪᑦᓱᑎᒃ ᓱᕐᕋᖃᖕᖏᑐᓂᒃ ᑖᕗᖓ ᖃᕆᑕᐅᔭᑎᒍᑦ ᐊᐅᓪᓚᑎᑦᓯᓕᓚᐅᔪᔪᖅ ᑖᕙᓂᓗ ᓂᐱᒥᓂᒃ ᐃᓚᒋᓕᐅᑦᔨᓕᓚᐅᔪᕗᒃ. ᑖᓐᓇ ᓂᑦᔭᓗᑦᑖᕈᑎᖓ ᑕᒃᑲᓂ ᓄᑖᒥ ᓂᐱᓕᐊᕆᓚᐅᔪᔭᖏᓐᓂ ᐱᔪᕆᒍᑎᒋᓂᕐᐹᕆᔭᖓ ᒍᐃᓕᐋᒻ.
ᑕᓕᕐᐱᐊᓃᑦᑐᖅ, ᓂᐱᓕᐅᕆᕕᒻᒦᓱᑎᒃ Studio Mixart-ᒥ ᒪᓐᑐᔨᐊᒦᑦᑐᒥ. © JEAN-MARIE COMEAU
ᒍᐃᓕᐋᒻ ᑐᓴᕐᓂᔮᕐᑎᓯᒍᑎᖏᑦ ᖃᐅᔨᒪᔭᐅᔪᑦ ᑕᕐᕋᓕᒫᒥ ᓯᓚᕐᔪᐊᒥᓗ, ᑭᓯᐊᓂᓕ ᓂᑦᔭᓗᑦᑕᑎᐅᓂᕐᒥᒃ ᐱᒋᐊᓚᐅᕐᓯᒪᕗᖅ 1965-ᖑᑎᓪᓗᒍ 13-ᓂᒃ ᐅᑭᐅᖃᕐᓱᓂ ᐃᖕᖏᑎᒋᔭᐅᑦᓱᓂ ᑲᓇᑕᒥ ᓯᕗᓪᓕᐹᓄᑦ ᐃᓄᑐᐃᓐᓇᐅᓱᑎᒃ ᑐᓴᕐᓂᔮᕐᑎᓯᔨᐅᒋᐅᕐᓯᒪᔪᓄᑦ, ᐊᑦᓯᕋᐅᑎᖃᕐᓱᑎᒃ The Harpoons-ᑯᓐᓂᒃ. ᑌᑦᓱᒪᓂ ᐃᓄᑐᐃᓐᓀᑦ ᐅᖃᐅᓯᕐᒥᓂᒃ ᐊᑐᕐᑎᑕᐅᑦᑌᓕᓯᒪᔪ, ᑌᒣᒻᒪᑦ ᐃᑦᔪᐊᓯᓯᓚᐅᕐᓯᒪᕗᑦ ᓂᑦᔭᓗᑖᑎᓂᒃ ᓲᕐᓗ ᐅᑯᓂᖓ The Beatles ᐊᒻᒪᓗ The Rolling Stones.
“ᐊᓂᕐᕋᖃᕐᑎᑕᐅᕕᒻᒥᓂ ᐃᓕᓐᓂᐊᑏᑦ ᐅᖃᓚᐅᔪᕗᑦ ᐃᒫ, ‘ᓂᑦᔭᓗᑦᑕᑎ-ᐅᖃᑎᑎᓗ ᖃᓄᑎᒋᒃ ᐅᕙᑦᑎᓂᒃ ᐃᑲᔪᕐᓯᓯᒪᓂᑦᓯᓂᒃ ᖃᐅᔨᒪᖕᖏᓚᓯ. ᐊᓂᕐᕋᕈᒪᓪᓕᑎᓪᓗᑕ, ᑲᑉᐱᐊᓱᑦᓱᑕᓗ, ᐊᖓᔪᕐᖄᑎᓐᓂᒃ ᐊᑦᓯᒪᑦᓯᓱᑕ ᐃᓕᑦᓯᓗ ᐃᓄᑐᐃᓐᓇᐅᓱᓯ ᓂᑦᔭᓗᑦᑕᑎᐅᔪᓯ ᓄᐃᓚᐅᔪᕗᓯ. ᐃᓘᓐᓇᓯ ᐃᓅᓱᑦᑑᓱᓯ, ᐊᓕᐊᒋᒻᒪᕆᐊᓗᑦᓯᒪᕙᑦᓯ. ᑐᓂᔨᓚᐅᕐᓯᒪᕗᓯ ᐅᕙᑦᑎᓄᑦ ᓂᕆᐅᓐᓂᒥᒃ ᐅᑉᐱᕈᓱᓐᓂᒥᒃ ᐱᓇᓱᑦᑕᑎᓐᓂᒃ,’” ᒍᐃᓕᐋᒻ ᐅᖃᕐᑐᖅ.
ᒍᐃᓕᐋᒻ ᐊᖓᔪᖓ ᐄᕆᒃ ᑕᒍᕐᓈᖅ ᓂᑦᔭᓗᑦᑕᑎᓄᑦ ᐃᓚᒋᔭᐅᓯᒪᒻᒥᔪᖅ, ᐃᓚᐅᓚᐅᕐᓯᒪᒻᒥᔪᖅ ᔫᓯ ᑯᓱᒐᐅᓚᐅᔪᔪᖅ, ᒣᑯᓪ ᑯᓱᒐᕐᓗ ᐊᒻᒪᓗ ᔮᓐ ᑕᐸᑌᖑᓯᒪᔪᖅ. ᑐᓴᕐᓂᔮᕐᑎᓯᖃᑦᑕᓯᒪᔪᑦ ᑰᒃᔪᐊᕋᓘᑉ ᐃᒥᕐᕕᖏᓐᓂ ᑭᓯᐊᓂ ᖁᕐᕕᑯᕕᓐᓂ ᐃᔨᕐᓯᒪᒋᐊᖃᖃᑦᑕᓯᒪᔪᑦ ᐳᓖᓯᓄᑦ ᑕᑯᔭᐅᑦᑌᓕᑦᓱᑎᒃ ᐅᐱᓐᓇᕋᑎᒃ ᐅᑭᐅᑭᑦᑐᐃᓇᐅᓚᐅᕐᓯᒪᒐᒥᒃ. ᓂᑦᔭᓗᑦᑖᕕᒋᒋᐊᖓ ᐊᓕᐊᒋᓂᕐᐸᕆᖃᑦᑕᓯᒪᔭᖓᑦ ᐅᕕᒃᑫᑦ ᑖᓂᓯᖕᖑᐊᑐᑦ. “ᑲᑎᑎᑕᐅᔪᓂ ᓂᑦᔭᓗᑦᑖᑎᑕᐅᓚᐅᕐᓯᒪᒻᒥᔪᒍᑦ ᒪᕐᕈᕕᑦᓱᑕ, ᖁᕕᐊᒋᖃᑦᑕᓯᒪᖕᖏᑕᒃᑲ, ᐱᑦᔪᑎᒋᑦᓱᒋᑦ ᐃᒥᐊᓗᑦᓯᒪᓂᖏᑦ ᐁᑉᐹᒍᓪᓗ ᐊᑭᓕᕐᑕᐅᓚᖓᒐᓗᐊᕐᒪᖔᑦᑕ ᐳᕿᐊᓇᕐᓯᕙᓐᓂᖓᑦ.”
ᑌᑦᓱᒪᓂ ᓱᓕ ᒍᐃᓕᐋᒻ ᐱᐅᓂᕐᓴᓂᒃ ᐱᔭᖃᕋᓱᓕᕆᓚᐅᕐᓯᒪᔪᖅ. “ᓂᑦᔭᓗᑦᑖᖃᑦᑕᓯᓚᐅᕐᓯᒪᕗᒍᑦ ᐊᓪᓚᓯᒪᔪᖕᖑᐃᖃᑦᑕᓱᑕᓗ ᐱᑦᔪᑎᖃᕐᓱᑕ ᑲᕙᒪᒃᑯᓄᑦ ᖃᓄᐃᓘᕐᑕᐅᒍᑎᒋᓯᒪᔭᑦᑎᓂᒃ ᓈᒻᒪᓴᖕᖏᓂᑦᑎᓂᒃ. ᑌᑦᓱᒪᓂ ᑲᕙᒪᒃᑯᑦ ᐃᓄᑐᐃᓐᓇᐅᓂᑦᑎᓂᒃ ᐊᓯᐅᑎᑦᓯᒐᓱᑦᓯᒪᒻᒪᑕ, ᓂᑦᔭᓗᑦᑖᕈ-ᑎᓕᐊᕆᖃᑦᑕᓯᓚᐅᕐᓯᒪᔭᕗᑦ, ᑐᓴᕐᓂᒋᔮᓗᖃᑦᑕᓚᐅᕐᓯᒪᔪᑦ, ᑕᒪᒃᑯᐊᑕᒐ ᐅᕕᒃᑫᑦ ᑐᓴᕐᓂᒋᖃᑦᑕᓯᒪᔭᖏᑦ ᓂᑦᔭᑎᑉᐸᓱᒋᓪᓗ.”
ᐅᖃᐅᓯᑉᑎᓂᒃ ᐊᓯᐅᔨᑌᓕᒋᐊᕐᓂᐊᕈᑦᑕ, ᓂᑦᔭᓗᑦᑖᕈᓯᕐᑎᒍᑦ ᐱᒋᐊᖃᓚ-ᐅᕐᓯᒪᕗᒍᑦ, ᐅᖃᕐᑐᖅ ᒍᐃᓕᐋᒻ, ᐃᓕᓐᓂᐊᕕᑦᑎᒍᑐᐃᓐᓇᐅᖏᑦᑐᖅ, ᐅᖃᐅᓯᕐᒥᒃ ᐱᓇᓱᒍᑎᑎᒍᑐᐃᓐᓇᐅᖏᑦᑐᖅ. ᑲᕙᒪᒃᑯᑦ ᐃᓱᒪᓯᒪᖕᖏᒪᑕ ᐱᒻᒪᕆᐅᓂᕐᐹᒥᒃ ᑕᒪᓐᓇᓗ ᑐᓴᕐᓂᔮᕐᑎᓯᒍᑎᑎᒎᕐᐳᖅ, ᐅᕕᒃᑫᑦ ᑐᓴᕐᓈᕈᑎᓂᒃ ᐱᓇᓱᐊᕐᒪᑕ” ᐅᖃᕐᑐᖅ ᒍᐃᓕᐋᒻ.
ᑌᑦᓱᒪᓂ ᐊᕐᕌᒍᐃᑦ 1970-ᓃᑎᓪᓗᒋ, ᒍᐃᓕᐋᒻ ᑲᕙᒪᒃᑯᑦ ᐱᑦᔪᔨᕕᖏᓐᓄᑦ ᖁᑦᓯᓂᓕᕇᓄᑦ ᐊᒡᓚᑲᑕᓚᐅᕐᓯᒪᕗᑦ ᐱᑦᔪᑎᖃᕐᓱᓂ ᑮᓇᐅᔭᖃᕐᑎᑕᐅᔪᑦᓴᐅᒋᐊᖏᑦ ᐃᓄᒃᑎᑐᑦ ᓂᑦᔭᓗᑦᑕᑏᑦ ᐊᒻᒪᓗ ᐃᓚᖓᑎᒍᑦ ᑐᖕᖓᕕᖃᕐᓱᑎᒃ ᑕᒪᑐᒥᖓ ᐊᒡᓚᑲᑕᓐᓂᕆᓯᒪᔭᖓᓂᒃᕐ, ᐅᒃᓗᒥ ᑮᓇᐅᔭᖃᕐᑎᑕᐅᓱᖑᓕᕐᐳᑦ ᓄᓇᓕᑐᖃᐅᑦᓱᑎᒃ ᓂᑦᔭᓗᑦᑖᕈᑎᑎᒍᑦ ᑐᓴᕐᓂᔮᕐᑎᓯᔩᑦ.
ᐅᓪᓗᒥ ᒍᐃᓕᐋᒻ ᐊᑐᐃᓐᓇᕈᕐᑎᓕᕐᑐᖅ ᐱᓇᓱᑦᑎᐅᒍᓐᓀᓂᑦᓴᒥᓄ, ᑭᓯᐊᓂ ᓄᕐᖃᓂᐊᖕᖏᑐᖅ ᑐᓴᕐᓈᑎᑦᓯᒍᑎᓕᕆᓂᕐᒥᒃ. ᐊᒡᓚᓯᒪᔪᓕᐅᖃᑦᑕᐳᕐᓗ ᓄᑖᓂᒃ ᓂᑦᔭᓗᑦᑖᕈᑎᑦᓴᓂᒃ ᙯᕐᖂᑕᐅᖃᑦᑕᒥᑦᓱᓂᓗ ᑕᕐᕋᒥ ᐱᖕᖑᐊᕆᐊᕐᑐᖁᔭᐅᑦᓱᓂ. ᐊᒥᓱᐃᓂᒃ ᓴᕐᕿᑎᑦᓯᒍᑎᑦᓴᒥᓂᒃ ᐱᓇᓱᒃᑐᖅ ᐃᓅᓯᖓᓗ ᐅᐃᒋᔭᐅᑦᓱᓂ ᐊᑖᑕᑦᓯᐊᖑᑦᓱᓂᓗ ᐱᒻᒥᒪᑦ ᕿᑲᑐᐃᓐᓇᓚᐅᕐᓯᒪᓚᖓᖕᖏᑐᖅ ᓱᓕ ᐊᑯᓂ, ᑭᓯᐊᓂ ᐊᑕᐅᓯᕐᒥᒃ ᐃᓱᒫᓗᒋᔭᒥᓂᒃ ᐃᓱᒫᓗᐃᕐᑐᖅ ᐆᒥᖓ: ᓂᐱᓕᐊᕆᓯᒪᔭᒥᓂᒃ ᐱᒋᐊᑦᓯᐊᕈᒪᓂᕆᕙᑦᑕᒥᓂᒃ ᐱᔭᕇᕋᒥ.
“ᐃᒫᓪᓗ ᐅᖃᕐᐳᖅ “ᓯᓚᕐᔪᐊᒦᒍᓐᓀᓯᒍᒪ, ᐃᓅᒍᓐᓀᕈᒪᓚᐅᔪᖕᖏᓚᖓ ᐱᒋᐊᑦᓯᐊᓚᐅᕐᓇᖓ. ᐱᑦᓯᐊᓯᒪᓂᕐᓴᒥᒃ ᕿᒣᖓᕈᒪᒐᒪ,” ᒍᐃᓕᐋᒻ ᐅᖃᕐᑐᖅ. “ᑌᒣᒻᒪᑦ ᐱᔭᕇᓚᐅᕐᐸᕗᑦ.”
