ᐲᑐᕆᔅ ᑎᐊᑉ ᓄᑖᖑᑎᓪᓗᒍ ᑐᓴᕐᓂᔮᒐᑦᓴᓕᐊᕕᓂᖓ ᑐᕌᖓᓂᕐᓴᐅᕗᖅ ᐃᓅᓱᓐᓂᓴᓄᑦ. ᖃᐅᔨᒪᔭᐅᑦᓯᐊᑐᖅ ᓂᑦᔭᓗᑦᑖᓱᖑᓂᕐᒥᓄᑦ ᑐᓴᕐᓈᕈᑎᓂᒃ ᓂᐱᕐᖁ-ᑐᔪᐊᓘᒐᑎᒃ/ᐅᓪᓗᒥᓯᐅᑎᐅᓂᕐᓴᓂᓪᓗ ᑭᐳᑦᑕᕕᒋᑦᓯᐊᕈᓐᓇᓱᒥᓂᒃ ᐅᐊᕈ ᑎᖃᕐᑎᓗᒋᑦ ᐱᐅᓯᑐᖃᕐᑎᒍᑦ ᐃᓄᑐᐃᓐᓀᑦ ᐅᓂᒃᑲᐅᓯᖏᓐᓂᒃ ᐊᒻᒪᓗ ᑲᑕᑦᔭᕈᓯᓂᒃ, ᑕᒃᒐᓂ ᐅᑭᐊᒥ ᑎᐊ ᒪᓂᔨᓚᐅᕐᐳᖅ ᑐᓴᕐᓂᔮᒐᑦᓴᔭᓂᒃ 15-ᓂᒃ ᓂᑦᔭᓗᑦᑖᕈᓯᑕᓕᒻᒥᒃ ᐱᐊᕃᑦ/ᑲᒃᑲᓛᑦ ᐃᖕᖏᖑᐊᕈᓯᖏᓐᓂᒃ, ᐊᑦᓯᕋᐅᑎᖃᕐᑎᑕᒥᓂᒃ “ᒥᑭᔪᖑᐊᑦ ᐃᖕᖏᕈᓯᖏᑦ.” ᑖᓐᓇ ᓄᓇᕕᒻᒥᐅᔭᖅ ᓂᑦᔭᓗᑦᑖᑎ ᐱᓇᓱᖃᑎᖃᓯᓚᐅᔪᕗᖅ ᐃᓱᒪᒃᑯᓂᒃ ᓄᐃᑦᓯᖃᑎᒋᓯᑦᓱᒋᑦ ᐱᓇᓱᒍᑎᓂᒃ ᑐᖕᖓᕕᓕᓐᓂᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᑎᑦᓯᒍᑎᑦᓴᔭᐅᑦᓱᑎᒃ ᐊᑐᐊᒐᖏᓐᓂᒃ ᓴᕐᕿᑎᑕᐅᓯᒪᔪᓂᒃ ᐄᕕ ᒫᒃᒧᑦ.
“(ᐃᕕ) ᐊᕐᕕᑕᕐᓂᖃᓚᐅᔪᕗᖅ ᓄᓇᕕᐅᑉ ᓄᓇᓕᓕᒫᖏᓐᓄᑦ, ᓂᐱᓕᐅᕆ-ᖃᑦᑕᓚᐅᔪᕗᕐᓗ ᐃᓄᑐᖃᕐᓂᒃ ᖃᐅᔨᒪᔭᖏᓐᓂᒃ ᐱᓯᕐᓱᑎᑦᓯᖃᑦᑕᓱᓂ ᐃᓄᑐᐃᓐᓀᑦ ᐃᖕᖏᐅᓯᑐᖃᖏᓐᓂᒃ,“ ᑐᑭᓯᑎᑦᓯᒍᑎᓕᒃ ᐲᑐᕆᔅ. ”ᑌᒣᒻᒪᑦ ᑖᒃᑯᑎᒎᓇ, ᓂᐱᓕᐊᕆᓯᒪᔭᖏᑎᒍᓪᓗ, ᐃᓕᑦᓯᓚᐅᔪᕙᒃᑲ ᓂᑦᔭᓗᑦᑖᕈᓰᑦ.” ᑎᐊ ᐅᐱᒍᓱᒻᒪᕆᑦᑐᖅ ᐃᓄᑐᖃᕐᓂᒃ ᓂᑦᔭᓗᑦᑖᕈᓯᕐᒥᓂᒃ ᐊᒥᕐᖃᕈᑎᖃᖃᑦᑕᓚᐅᔪᓂᒃ, ᑐᓴᕐᓂᒋᓂᕐᐹᖃᕐᓱᓂᓗ ᐆᒥᖓ ᑭᖕᖓᒥᐅᕐᔪᐃᒎᖅ, ᐊᐅᓚᔨᔭᒥᓂᒃ ᓂᕕᐊᕐᓯ-ᐊᕌᐱᐅᑦᓱᓂ ᐃᓕᓐᓂᐊᑎᑕᐅᒍᑎᒋᓯᒪᒋᐊᖓ ᐊᔭᑯᓗᒻᒥᓄᑦ, ᐊᔭᑯᓗᒻᒥᓂᒃ ᐃᓕᓭᔨᖃᕐᓯᒪᒐᒥ ᐳᒃᑭᓂᕐᓴᒥ 1-ᒥ ᐃᓕᓐᓂᐊᑎᐅᑦᓱᓂ. “ᐃᓕᓐᓂᐊᑎᓯᒪᒻᒫᑎᒍᑦ ᐃᓄᑐᐃᓐᓀᑦ ᓂᑦᔭᓗᑦᑖᕈᓯᑐᖃᖏᓐᓂᒃ ᑖᓐᓇ ᐃᓚᒋᔭᐅᑎᓪᓗᒍ ᐊᐅᓚᔨᕙᕋ ᑐᓴᕐᓂᒋᒻᒪᕆᓚᐅᕐᓯᒪᒋᐊᒃᑯ.”
ᐲᑐᕆᔅ ᐊᑯᓂᐅᓕᕐᑐᖅ ᐊᕐᕌᒍᕐᓂ ᐊᒥᓱᓂ ᓂᐱᓕᐅᕆᒍᒪᔪᑐᖃᐅᖃᑦᑕᓯᒪᓕᕐᑐᖅ ᐱᐊᕋᕐᓯᐅᑎᓂᒃ/ᑲᒃᑲᓛᕐᓯᐅᑎᓂᒃ ᐱᒐᓱᒍᓐᓇᓯᓚᐅᔪᕗᕐᓗ ᐃᓱᒪ ᕿᓂᓯᑐᐊᕐᒪᑦ ᐱᓇᓱᑦᑕᐅᔪᓂᒃ ᑮᓇᐅᔭᖃᕐᑎᒐᔭᕐᑕᒥᓂᒃ. ᐃᓱᒪ ᐱᕙᓪᓕᐊᑎᑦᓯᒍᑎᐅᓯᓚᐅᔪᕗᖅ ᓴᕐᕿᑎᑕᐅᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᓄᓇᕕᒻᒥᐅᓂᒃ ᐃᓕᓐᓂᐊᑎᓂᒃ ᓴᐳᑦᔨᓯᒪᓂᐊᕐᑎᓗᒍ ᐱᕙᓪᓕᐊ ᑎᑦᓯᒍᑎᒋᒍᓐᓇᑕᖏᑎᒍᑦ, ᑌᒣᑎᓪᓗᒋᑦ ᐱᐊᕃᑦ/ᑲᒃᑲᓛᑦ ᓂᑦᔭᓗᑦᑕᖑᐊᕈᑎᑦᓴᖏᓐᓂᒃ ᐱᓇᓱᒍᑎ ᐅᒍᒪᔪᑦ ᓈᒻᒪᓈᕐᓂᖃᑦᓯᐊᓚᐅᔪᕗᑦ.
“ᑖᓐᓇ ᐱᓪᓚᕆᐅᔪᖅ ᐱᑦᔪᑎᖃᕐᓱᓂ ᐱᐊᕃᑦ/ᑲᒃᑲᓛᑦ ᐱᓪᓚᕆᐅᓂᖏᓐᓂᒃ, ᑐᓴᕐᓂᔮᖃᑦᑕᖁᓇᕐᒥᒪᑕᓗ ᖁᕕᐊᓇᕐᑐᓂᒃ ᓈᓚᓪᓗᑎᒃ,” ᐅᖃᕐᑐᖅ ᐲᑐᕆᔅ “ᐃᓄᑐᐃᓐᓇᐅᓱᑕ ᐱᓇᓱᒍᒪᔭᑦᑎᓂᒃ ᑭᓯᐊᓂ ᑭᓯᐊᓱᖑᒐᑦᑕ ᑕᒪᓐᓇᓗ ᖃᓄᐃᒻᒥᒐᓂ. ᑐᓴᕐᓂᔮᕈᑎᑦᓴᓕᐅᓱᖑᒐᑦᑕ ᐃᓄᒻᒪᕆᓐᓅᓕᖓᔪᕙᓪᓗᓂᒃ ᐃᓄᒻᒪᕆᑦᓯᐅᑎᓂᓪᓗ ᓂᑦᔭᓗᑦᑖᓱᑕ, ᑭᓯᐊᓂ ᐱᐊᕋᕐᓂᒃ/ᑲᒃᑲᓛᓂᒃ ᑐᓴᕐᓂᔮᕈᑎᑦᓴᓕᐅᕆᒍᒪᓚᐅᕐᑐᖓ. ᐃᓪᓕᓇᕐᑐᖁᑎᒻᒪᓗ ᑕᒪᒃᑯᐊ ᐃᓚᒋᕙᖏᑦ ᐊᓯᐅᔨᑦᑌᓕᒍᒪᓂᒃᑯᑦ ᐅᖃᐅᓯᑦᑎᓂᒃ ᐊᒻᒪᓗ ᐃᓕᓐᓂᐊᑎᑦᓯᒍᑎᒋᓗᒋᑦ ᐱᐅᓯᑐᖃᑦᑎᒍᑦ ᐃᖕᖏᖑᐊᕈᓯᑦᑎᓂᒃ ᑕᒪᒃᑯᐊ ᐅᖃᐅᓯᑦᑎᒍᑦ ᐱᕙᓪᓕᐊᓯᒪᓂᑦᑎᓂᒃ ᐅᓂᒃᑲᐅᓯᕆᒐᑦᑎᒋᑦ.”
ᑐᓴᕐᓂᔮᕐᑎᓯᒍᑎᓕᐊᖑᓯᒪᔪᖅ ᒪᓂᔭᐅᓚᐅᔪᕗᖅ ᓅᕕᒻᐱᕆᐅᑉ ᑕᕐᕿᖓ ᐊᑐᕐᑐᑐᖃᐅᓕᕐᑎᓗᒍ ᖃᓄᐃᓘᕈᑎᐅᓂᖃᕐᓱᓂ ᓴᓪᓗᓂ ᐳᒃᑭᓂᕐᓴᒥᒃ ᐃᓕᓐᓂᐊᕕᖕᒥ, ᑕᒃᑲᓂ ᐲᑐᕆᔅᓗ ᑐᓴᕐᓂᔮᕐᑎᓯᔨᐅᖃᑎᖏᓪᓗ ᑐᓴᕐᓂᔮᕐᑎᓯᓂᖃᓚᐅᔪᔪᑦ ᓂᑦᔮᑎᑕᐅᓚᐅᔪᒻᒥᓱᑎᒃ ᑕᒪᖏᓐᓂᒃ ᑕᕐᕋᒥᐅᑦ ᓂᐱᖓᑦᑕ ᓈᓚᐅᑎᖓᒍᓪᓗ, ᐊᒻᒪᓗ ᓄᓇᕕᓕᒫᒥ ᐳᒃᑭᓂᕐᓴᓂᒃ ᐃᓕᓐᓂᐊᕕᓕᒫᓂ, ᐲᑐᕆᔅ ᐅᖃᓚᐅᔪᔪᖅ ᐱᐅᓯᕆᔭᐅᖏᓐᓇᓱᖑᖕᖏᓇᒥ ᐊᓕᐊᓇᓚᐅᔪᑎᓪᓗᒍ. “ᓯᕗᓪᓕᐹᖑᒍᑎᐅᒻᒪᑦ ᑕᒪᓐᓇ ᖁᕕᐊᓇᕐᑐᒪᕆᐅᓚᐅᔪᖅ ᐃᓚᐅᕕᒋᒋᐊᖓ”
ᐊᕐᕌᓂ ᓂᐱᓕᐅᕐᑕᐅᓚᐅᔪᔪᖅ, ᖄᖏᕐᓂᑯᓕᐅᕈᑎᑦᓴᐅᓇᓂ ᑐᓴᕐᓂᔮᕐᑎᓯᒍᑎᓕᐊᖅ ᐃᓚᐅᕕᐅᓯᒪᒻᒥᔪᖅ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᑎᖏᓐᓄᑦ ᐱᖓᓱᓂ ᓂᑦᔭᓗᑦᑖᕈᓯᕐᓂᒃ ᑐᓴᑦᓴᐅᔪᑦ, ᐃᓚᖏᓪᓗ ᐊᑕᐅᓯᐅᓈᕐᑎᑐᓂᒃ ᐃᓕᓐᓂᐊᑎᓂᒃ ᓂᐱᓕᐅᕐᓯᒪᔪᕐᑕᖃᕐᒥᓱᑎᒃ, ᓲᕐᓗ ᑳᑎ ᓯᓄᐹ ᓂᑦᔭᐅᓯᔭᕐᓱᓂ ᓂᑦᔭᓗᑦᑖᕈᓰᑦ ᐃᓚᖓᓐᓂ ᐊᒻᒪᓗ ᐋᓐᔨᓖᓇ ᑯᐊᑕ ᑲᑕᑦᔭᑎᓪᓗᒍ ᐊᓯᐊᓂ ᓂᑦᔭᓗᑦᑖᕈᓯᐅᒻᒥᔪᒥ.
ᑌᒪᓕ ᐱᔭᐅᒍᓐᓇᕋᓗᐊᕐᓱᓂ ᓇᓪᓕᑐᐃᓐᓇᖏᑎᒍᑦ ᖃᕆᑕᐅᔭᒃᑯᑦ ᒪᓂᔨᓯᒪᒍᑎᐅᓲᑎᒍ, ᓂᑦᔭᕈᑎᐅᔭᖓ ᐁᑦᑐᑎᐅᓛᕆᕗᖅ ᓄᓇᕕᒻᒥ ᐃᓕᓐᓂᐊᕕᓐᓄᓗ ᐯᕆᑦᓯᕕᓐᓄᓗ ᐃᓄᑐᐃᓐᓇᓄᓪᓗ ᕿᑐᕐᖓᒥᓂᒃ ᖃᓪᓗᓈᑦ ᓄᓇᖓᓐᓂ ᐊᓂᕐᕋᖃᕐᑎᑕᐅᔨᐊᓕᓐᓄᑦ.
