ᑕᕐᕋᓕᒃ ᕿᒥᕐᕈᐊᑦ ᖁᕕᐊᓱᑉᐳᖅ ᐅᓂᒃᑲᐅᑎᖃᕆᐊᒥᒃ ᓖᓇ ᔩᑦᓯᒥᒃ, ᐱᓇᓱᑦᑐᒥᒃ ᕃᒃᓚᑦ/ᓄᓇᒥᐅᑦ ᐅᔭᕋᓐᓂᐊᕕᒻᒥ, ᑖᓐᓇᐅᑦᑐᕋᐅᑎᑦᓯᐊᖑᑎᓪᓗᒍ ᐅᓂᒃᑲᓚᖓᔭᕗᑦ ᐅᓂᒃᑲᐅᓯᕆᕙᑦᑕᑎᓐᓄᑦ ᐊᕐᓇᓂᒃ ᐃᓄᑐᐃᓐᓇᓂᒃ ᐱᓇᓱᑦᑐᓂᒃ ᐱᐅᓯᕐᓲᑎᑐᖃᐅᖕᖏᑐᓂᒃ ᐊᕐᓀᑦ
ᐱᓇᓱᒐᖏᓐᓂᒃ.
ᓖᓇ ᖃᒻᒥᑯᑦ ᐱᔭᕇᕐᖃᒥᓚᐅᕐᑐᖅ ᑕᒪᑐᒪᓃᒃᑯᑦ ᐃᓕᓐᓂᐊᑎᑦᓯᒍᑎᖏᓐᓂᒃ Stope School-ᒥᒃ ᓄᓇᒥᐅᓂᒃ ᐅᔭᕋᓐᓂᐊᕕᒻᒥ ᒫᓐᓇᓗ ᐱᓇᓱᒐᖃᓕᕐᖁᖅ ᓱᓇᑦᓴᐅᖏᑦᑐᓂᒃ ᐃᑦᑕᑯᑦᓴᓕᐅᕐᕕᒥ ᓄᓇᐅᑉ ᐃᑭᐊᓂ ᐅᔭᕋᓐᓂᐊᓂᕐᒥᒃ ᐃᖏᕐᕋᑎᑦᓯᕕᒻᒥ. ᑕᒪᓐᓇ ᑐᑭᓕᒃ ᐃᒫᒃ ᓖᓇ ᓄᓇᒃᑯᔫᕐᑎᐅᖃᑦᑕᑎᓪᓗᒍv ᓄᓇᒃᑯᔫᒻᒪᕆᒻᒥᒃ ᐅᔭᕋᓐᓂᐊᕕᐅᑉ ᐃᑎᕐᓴᖓᓄᑦ ᐃᑎᑲᑕᑦᓱᓂᓗ ᐊᓂᐊᕋᕐᓱᓂᓗ ᐱᓇᓱᑉᐸᒋᐊᖓ ᐅᔭᕋᓐᓂᒃ ᐊᓂᐅᕐᙯᔨᐅᑦᓱᓂ.
ᓖᓇᒧᑦ ᐱᕕᑦᓴᖃᕐᕕᐅᓚᐅᕐᖁᒍᑦ ᐊᐱᕐᓲᑎᑦᑎᓂᒃ ᑭᐅᒪᔭᐅᓂᕐᒥᒃ ᖃᒻᒥᑯᑦ ᐱᒋᐅᕐᓴᔭᐅᒍᑎᒋᖃᑦᑕᓚᐅᕐᑕᖏᓐᓅᓕᖓᔪᓂᒃᓗ ᐊᒻᒪᓗ ᑕᒐᑕᒐ ᐱᓇᓱᒐᕆᓕᕐᑕᖓᓅᓕᖓᔪᓂᒃ
ᖃᓅᖅ ᓇᐅᒃᑯᓗ ᑐᓴᕐᑎᑕᐅᓯᒪᕕᑦ ᐃᓕᓐᓂᐊᑕᐅᔪᑦᓴᒥᒃ ᖃᓄᕐᓗ ᑐᑭᑖᕈᑎᒋᓐᓂᕿᐅᒃ ᐃᓕᓐᓂᐊᖃᑕᐅᔪᒪᓃᑦ?
ᓖᓇ: ᐃᓕᓐᓂᐊᒐᑦᓴᓂᒃ ᑐᓴᓚᐅᔪᕗᖓ ᐃᓄᒻᒧᑦ ᓄᓇᒥᐅᑦ ᐅᔭᕋᓐᓂᐊᕕᒻᒥ ᐱᓇᓱᑦᑎᒧᑦ ᑎᑭᑕᐅᑦᓱᑕ ᐳᕐᑐᓂᕐᓴᒥ ᐃᓕᓐᓂᐊᕕᑦᑎᓂ, ᑎᑭᒍᑎᖃᕐᓱᓂ ᑐᓴᕐᑕᐅᑎᑦᓯᒋᐊᕐᑐᓂᕐᒥᒃ ᒫᓐᓇᐅᔪᖅ ᐱᒋᐅᕐᓴᑎᑕᐅᒍᑎᒋᒍᓐᓇᑕᖏᓐᓂᒃ ᐃᓄᑐᐃᓐᓀᑦ. ᑐᓴᕐᑎᑕᐅᓂᖃᕆᑐᐊᕋᑦᑕ, ᖃᐅᔨᒪᓯᑦᓴᐅᑎᒋᓚᐅᔪᔪᖓ ᐅᓇᒻᒥᒋᔭᖃᓚᖓᒋᐊᒥᒃ ᐃᓕᓐᓂᐊᑎᑕᐅᒍᑎᒋᒍᓐᓇᑕᒃᑲᓂᒃ ᐃᓕᖓᔪᓂᒃ ᐅᔭᕋᓐᓂᐊᓂᕐᒥᒃ ᐱᓇᓱᒐᕐᓄᑦ.
ᓱᓇᓃᒃ ᐃᓕᑦᓯᔭᖃᕐᓂᕿᑦ?
ᓖᓇ: ᐊᒥᓱᐊᓗᓐᓂᒃ ᐃᓕᓐᓂᐊᑎᑕᐅᒍᑎᓂᒃ ᐃᓕᑦᓯᓚᐅᔪᕗᖓ ᐆᑦᑐᑎᒋᓗᒍ ᓄᓇᒃᑯᔫᒥᒃ ᐊᐅᓚᒋᐊᓕᒻᒥᒃ ᐊᖁᒍᓐᓇᓂᕐᒥᒃ, ᐊᖁᒍᓐᓇᕆᐊᒥᓪᓗ ᐳᐊᕐᕆᑎᓕᑲᓪᓚᒥᒃ (ᓄᓇᐅᑉ ᐃᑭᐊᓂ ᓄᓇᒃᑯᔫᒥᒃ) ᖃᓄᕐᓗ ᖃᕋᕐᑎᕆᐅᑎᓂᒃ ᓄᓇᒃᑯᔫᒧᑦ ᐅᓯᓕᕐᑐᐃᒍᑎᓂᒃ. ᐃᓕᑦᓯᔭᖃᕈᓐᓇᓚᐅᔪᕗᖓᓗ ᐊᒥᓱᓂᒃ ᓴᓇᓂᕐᓅᓕᖓᔪᓂᒃ ᓲᕐᓗ ᐊᓂᕐᓂᓴᓕᐅᕈᑎᒥᒃ ᐋᕐᕿᓱᐃᒍᑎᓂᒃ ᐊᒻᒪᓗ ᐃᒪᕐᑑᑎᓂᒃ ᓱᓪᓗᓕᓕᕆᒍᓯᕐᓂᒃ. ᐃᓕᓐᓂᐊᑎᑕᐅᒍᑎᒋᓚᐅᔪᔭᓕᒫᑦᑎᓂᑦ ᐊᓕᐊᒋᓂᕐᐹᕆᓚᐅᔪᕙᕋ ᙯᕐᑐᒥᒃ ᑭᑭᐊᓕᕐᑐᐃᓂᖅ!
ᐊᕐᓇᐅᖃᑎᑏᑦ ᐃᓕᓐᓂᐊᖃᑕᐅᔪᑦ ᐊᒥᓲᓚᐅᔪᕙᑦ?
ᓖᓇ: ᐱᒋᐅᕐᓴᔭᐅᓂᖃᕐᑎᓗᖓ, ᐊᕐᓇᑕᖃᓚᐅᔪᒻᒥᔪᖅ ᐃᓚᓐᓈᑕᑦᓯᐊᕆᓚᐅᔪᔭᕋᓂᒃ!
ᐃᓕᓐᓂᐊᕆᕈᑎᑕᕋᕖᑦ ᖃᓄᖅ ᐃᑉᐱᓂᐊᕐᓂᖃᓚᐅᔪᕕᑦ?
ᓖᓇ: ᐱᔭᕇᕐᓂᒥᒃ ᐃᑉᐱᓂᐊᑦᓯᐊᓚᐅᔪᕗᖓ ᐱᔪᕆᒪᒍᑎᖃᕐᓱᖓᓗ ᐃᓕᑕᕆᔭᐅᓂᕐᑕᕋᒪ ᐱᔪᓐᓇᓂᖃᓚᖓᓕᕆᐊᕐᒪᑦ ᐅᔭᕋᓐᓂᐊᑎᐅᓂᕐᒥᒃ, ᐱᓗᐊᕐᑐᒥᒃ ᐃᓄᑐᐃᓐᓇᐅᓱᖓ ᐊᕐᓇᐅᓱᖓ!
ᒫᓐᓇ ᑕᒃᒑ ᐱᓇᓱᒐᖃᓕᕐᕿᑦ?
ᓖᓇ: ᒫᓐᓇᓕ ᐱᓇᓱᒐᖃᕐᑐᖓ ᐊᖁᑎᐅᓂᕐᒥᒃ ᓄᓇᒃᑯᔫᒻᒪᕆᒻᒥᒃ ᐅᖁᒣᓐᓂᓕᖕᒥᒃ 60,000-ᓂᒃ ᐅᖁᒣᓐᓂᒪᕆᓐᓂᒃ [ᐃᓚᖓᓂᒃ] ᐱᓇᓱᒍᑎᐅᑦᓱᓂ ᑭᑭᐊᑦᓴᔭᓂᒃ ᐅᔭᕋᓐᓂᐊᑕᐅᒪᔪᓂᒃ ᓄᓇᐅᑉ ᖄᖓᓅᔦᔨᐅᑦᓱᖓ.
ᖃᓄᕐᓖᑦ ᐊᓯᑎᑦ ᐊᕐᓀᑦ ᐅᖃᐅᑎᒐᔭᕐᐱᒋᑦ ᐊᕐᓇᓯᐅᑎᐅᖃᑦᑕᓯᒪᖕᖏᑐᓂᒃ “ᐱᐅᓯᑐᖃᐅᓇᑎᓪᓘᑐᓂᒃ” ᐱᓇᓱᒋᐊᒥᒃ ᐅᓇᒻᒥᒋᔭᖃᕐᐸᑕ ᓲᕐᓗ ᐆᑦᑐᑎᒋᓗᒍ ᐅᔭᕋᓐᓂᐊᑎᐅᓂᕐᒥᒃ?
ᓖᓇ: ᐊᑏ!! ᐱᒐᓱᕝᕕᓴᐅᔪᓕᒫᓂᒃ ᓄᑖᓂᒃ ᐱᔭᖃᕋᓱᒋᑦᓯ, ᓴᕐᕿᑎᓪᓗᒍ ᐱᐅᓯᕐᑖᓂᖅ ᐊᒻᒪᓗ ᐱᓇᓱᒋᐊᕐᑐᓯᐊᖃᑦᑕᓗᓯ ᐊᑑᑎᓚᖓᔭᑦᓯᓂᒃ ᐱᒍᒪᔭᖃᑦᓯᐊᓂᖃᕐᓗᓯ.
ᐅᖃᐅᓯᖅ ᑕᒪᑐᒪᓂ, ᐃᓄᒃᑎᑐᑦ ᑐᑭᖃᕐᑐᖅ ᐱᒋᐊᑦᓯᐊᓂᕐᒥᒃ, ᐱᓇᓱᒍᑎᓕᐊᖑᓯᒪᕗᖅ ᓄᓇᒥᐅᓂ ᐅᔭᕋᓐᓂᐊᕕᒻᒥ ᓄᐃᑕᐅᓯᒪᑦᓱᓂ ᕃᒃᓚᓐᒧᑦ/ᓄᓇᒥᐅᓄᑦ ᐊᖏᖃᑎᒌᒍᑎᓄᑦ. 2008-ᒥ ᓴᕐᕿᓂᖃᓕᓚ-ᐅᕐᓯᒪᒐᒥᓂᑦ, ᓄᐃᑦᓯᒍᑎᐅᓯᒪᓕᕐᑐᖅ 100 ᐅᖓᑖᓂᑦᑐᓂᒃ ᐱᓇᓱᒐᕐᓂᒃ ᐃᓄᑐᐃᓐᓇᓄᑦ ᐱᓇᓱᑦᑎᓄᑦ ᐃᓕᖓᔪᓂᒃ 50 ᒥᑦᓯᑎᓐᓃᑐᓂ ᐱᓇᓱᒐᕐᓂ ᐊᑦᔨᒌᑦᑎᖏᑦᑐᓂ, 14-ᓂ ᐊᑦᔨᒌᒥᒃ ᐱᑦᔪᔨᓂᖃᕋᑎᒃ ᐱᑦᔪᔨᕕᓐᓂ. ᓯᕗᓂᖃᕈᑕᐅᑦᓱᓂ ᐃᑲᔪᕐᓯᓂᕐᒥᒃ ᐃᓄᑐᐃᓐᓀᑦ ᐃᓚᐅᓂᑦᓴᖏᓐᓂᒃ ᐊᒻᒪᓗ ᐱᓇᓱᒐᖃᕈᑎᑦᓴᖏᓐᓂᒃ ᐅᔭᕋᓐᓂᐊᓂᕐᓂ.
