ᓄᓇᕕᒻᒥ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᓂᕐᒨᓕᖓᔪᓂᒃ ᑲᑎᒪᑎᑦᓯᒍᑎᖃᕐᓂᖅ, ᑲᑎᓂᐅᑦᓱᓂ ᓯᕗᓂᖃᕈᑎᐅᓚᐅᔪᕗᖅ ᐱᒋᐊᕐᑎᓯᕙᓪᓕᐊᓂᑦᓴᒥᒃ ᑮᓇᐅᔭᓕᐅᕋᓱᒍᑎᓂᒃ ᓄᐃᑦᓯᒍᑎᑦᓴᓂᒃ ᓄᓇᖁᑕᐅᔪᒥ, ᐊᐅᓚᑕᐅᓂᖃᓚᐅᔪᖅ ᒪᑭᕝᕕᐅᑉ ᒪᑭᑕᒐᓱᒍᑎᓕᕆᓂᕐᓂᒃ ᐱᑦᔪᔨᕕᖓᓄᑦ ᑰᒃᔪᐊᒦᑦᑐᒧᑦ ᒫᑦᔨ 20-ᒥᓗ 21-ᒥᓗ. ᑖᓐᓇ ᑲᑎᒪᓂᖅ ᑐᖕᖓᕕᒋᔭᐅᓚᐅᔪᕗᖅ ᐱᑐᑦᓯᒪᐅᑎᖃᑎᒌᑦᑐᓄᑦ ᐊᒻᒪᓗ ᐅᖃᖃᑎᒌᒍᑎᓕᓐᓄᑦ ᑲᔪᓯᔪᓂᒃ ᐱᔪᖃᕐᓂᐅᑐᐃᓐᓇᕆᐊᓕᓐᓂᓗ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᒍᑎᐅᓗᑎᒃ ᐱᑕᖃᓪᓚᕆᒋᐊᓕᓐᓂᒃ ᓄᓇᖁᑕᐅᔪᒧᑦ ᐊᔪᕐᓴᖏᑦᑐᕈᕈᑎᑦᓴᐅᓗᑎᒃ.
ᒪᑭᕝᕕᐅᑉ ᐊᖓᔪᕐᖄᒪᕆᖓᑕ ᑐᖓᓕᖓ ᐱᔭᑦᓴᖁᑎᓕᒃ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᓂᕐᓂᒃ, ᐋᓐᑎ ᒧᐊᖃᐅᔅ, ᐅᖃᓚᐅᔪᕗᖅ ᑖᒃᑯᐊ ᐱᕙᓪᓕᐊ-ᑎᑦᓯᒍᑎᐅᓕᕐᑐᑦ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᕕᒻᒧᑦ ᓯᕗᓪᓕᐅᔭᐅᓚᖓᓯᒪᒋᐊᖏᑦ, ᓱᕐᖁᐃᑐᒥᒃ ᐃᓄᑐᐃᓐᓀᑦ ᐱᓇᓱᒐᖁᑎᖏᑦ ᐱᕕᖃᕈᓐᓇᖁᓪᓗᒋᑦ ᐱᓇᓱᒍᑎᓂᓪᓗ ᐱᑦᔪᔭᐅᒍᑎᓂᓪᓗ ᑕᒐᑕᒐ ᓄᓇᕕᒻᒥᐅᓄᑦ ᐊᑐᐃᓐᓇᐅᔪᓂᑦ.
“ᑲᔪᓯᑎᑦᓯᓚᖓᔪᒍᑦ ᖁᕝᕙᑎᕆᒍᑎᑦᑎᓂᒃ ᑖᑦᓱᒥᖓ ᐱᓇᓱᒐᕐᒥᒃ ᓱᕐᖁ-ᐃᑐᒥᒃ ᓄᐃᑦᓯᕙᓪᓕᐊᓂᖃᕐᓗᑕ ᒪᑭᑕᒐᓱᒍᑎᑎᒍᑦ ᐊᕙᑎᑦᑎᓂ ᐱᐅᓯᖃᕐᓗᑕ ᓴᐳᑦᔨᓯᒪᒍᓐᓇᑐᒥᒃ ᑭᓇᑐᐃᓐᓇᑯᑦ ᐃᓱᒪᖃᖁᓪᓗᒋᑦ ᐱᓇᓱᒐᖃᕐᓂᖅ ᐊᑦᑕᓀᑦᑐ-ᒍᓐᓇᕆᐊᖓ ᓲᕐᓗ ᑲᕙᒪᐅᔪᑦ ᐱᓇᓱᒐᖁᑎᖏᑦ ᑌᒣᑉᐸᒪᑕ’’ ᐅᖃᕐᑐᖅ ᐋᓐᑎ.
ᐅᖄᔭᐅᓗᐊᖕᖑᐊᑐᑦ ᑕᒃᑲᓂ ᑲᑎᖕᖓᓂᕐᒥ ᐃᓚᖃᕐᑎᓯᓂᐅᓚᐅᔪᕗᑦ, ᐊᑕᐅᑦᓯᑯᑦ ᐅᖃᐅᓯᐅᑉ ᐁᑉᐹᓄᔦᔨᖃᕐᓱᑎᒃ ᑲᑎᖕᖓᕕᒻᒥ ᐊᑕᐅᑦᓯᑯᓪᓗ ᖃᕆᑕᐅᔭᑎᒍᑦ ᓄᐃᑕᑦᓱᑎᒃ ᒪᑭᕝᕕᐅᑉ Facebook-ᒥ ᑕᑯᑦᓴᐅᕕᖓᓂ, ᐅᓇᒻᒥᓲᑎᓕᓐᓄᑦ ᓈᓚᓐᓂᒥᒃ ᐱᔪᓐᓇᕈᑎᐅᑦᓱᑎᒃ. ᐅᖃᒍᑎᐅᔪᑦ ᐃᓕᖓᓂᖃᕐᑎᓗᒋᑦ “ᓄᓇᕕᒻᒥᒃ ᐱᕈᕐᐸᓕᐊᑎᑦᓯᒍᑎᑦᓴᓂᒃ,“ ᑲᑎᖕᖓᓂᖅ ᐱᑕᖃᕐᑎᓯᒍᑎᐅᓚᐅᔪᕗᖅ ᐆᖄᕕᑦᓴ-ᐅᓂᕐᒥᒃ ᐅᓇᒻᒥᓱᐊᒍᑎᓕᓐᓄᑦ ᖃᐅᔨᓴᕐᓂᖃᕐᓗᑎᒃ ᐱᑕᖃᓪᓚᕆᒋᐊᓕᓐᓂᒃ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᓂᕐᓂ ᓴᐳᑦᔨᓯᒪᔪᓂᒃ ᐱᓇᓱᒍᑎᓂᒃ ᐊᒻᒪᓗ ᐱᒐᓱᒍᑎᑦᓴᑕᕐᕕᓴᐅᓗᑎᒃ ᐊᑐᐃᓐᓇᐅᔪᓂᒃ ᐃᖏᕐᕋᑎᑕᐅᓕᕐᑐᓂᑦ ᓄᓇᖁᑕᐅᔪᒥ. ᐱᓇᓱᒐᖃᕐᕖᑦ ᑭᒡᒐᑐᕐᑎᖏᑦ ᐱᓯᒪᔪᑦ ᑲᓀᑎᐋᓐ ᓄᐊᑦᑯᓐᓂᑦ, ᓄᓇᓕᓐᓂ ᓄᓇᒥᒃ ᑎᒍᒥᐊᕐᑎᓂᒃ, ᑭᒡᒐᑐᕐᑏᓗ ᓄᓇᕕᒻᒥ ᐅᔭᕋᓐᓂᐊᓂᕐᓂᒃ ᐱᓇᓱᒐᖃᕐᕕᓂᑦ, ᑲᕙᒪᒃᑯᑦ ᐱᓇᓱᒐᖃᕐᕕᖁᑎᖏᓐᓂᑦ, ᐊᒻᒪᓗ ᑯᐯᒃᒥ ᑮᓇᐅᔭᓕᐅᕋᓱᓐᓂᓄᑦ ᑲᑐᑦᔨᖃᑎᒌᕝᕕᒥᑦ ᑲᑎᖕᖓᔪᓂᖃᑎᐅᓚᐅᔪᕗᑦ, ᓄᐃᑕᑎᑦᓯᓂᖃᑦᓯᐊᓱᑎᒃ ᐱᓪᓚᕆᐅᒋᐊᖓ ᑲᑐᑦᔨᖃᑎᒌᓐᓂᖃᕐᓱᑎᒃ ᐱᔭᖃᕋᓱᓐᓃᑦ ᓄᓇᕕᒻᒥ ᑮᓇᐅᔭᑎᒍᑦ ᒪᑭᑕᒐᓱᒍᑎᐅᒍᓐᓇᑐᐃᓐᓇᕆᐊᓕᓐᓂᒃ.
ᔩᓴᓐ ᐋᓇᖃᑕᒃ, ᑐᑭᒧᐊᑦᑎᓯᔨᐅᖃᑕᐅᔪᖅ ᒪᑭᕝᕕᐅᑉ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᕕᖓᑕ ᐱᑦᔪᔨᕕᖓᓂ, ᓯᕗᓕᕐᓯᓯᓚᐅᔪᕗᖅ ᑕᒪᖏᓐᓂᒃ ᐊᑐᐃᓐᓇᕈᕐᑎᓂᕐᒥᓗ ᐸᕐᓇᓂᕐᒥᓗ ᑲᑎᒪᓂᒻᒪᕆᒻᒥᒃ, ᐊᑕᐅᑦᓯᑯᑦ ᐅᖄᔨᒋᔭᐅᑦᓱᓂᓗ, ᒪᑭᕝᕕᐅᓗ ᐊᖓᔪᕐᖄᒪᕆᖓ ᐱᑕ ᐋᑕᒥ ᐃᓚᐅᓚᐅᔪᒻᒥᓱᓂ ᑐᖕᖓᓱᑦᑎᓯᒋ-ᐊᕐᑐᓱᓂ ᑲᑎᖕᖓᔭᕐᑐᑐᓂᒃ, ᐅᖃᐅᓯᖃᕐᓱᓂᓗ ᓄᓇᖁᑕᐅᔪᖅ ᐱᓇᓱᒐᕐᓄᑦ ᐅᒃᑯᐃᖓᑦᓯᐊᕆᐊᖓ, ᓲᓱᒋᐅᑎᕐᑕᖃᑦᓯᐊᓚᐅᕈᓂ.
“ᐱᒐᓱᒍᑎᑦᓴᓕᒻᒪᕆᐊᓘᕗᒍᑦ, ᑭᓯᐊᓂ ᐅᖃᐅᓯᖃᕐᓯᒪᓪᓚᕆᑦᑐᖓ ᐱᖕᖑᐊᕕᑐ-ᐃᓐᓇᐅᖏᒋᐊᑦᑕ ᐅᔭᕋᓐᓂᐊᓂᕐᓂᒃ ᐱᓇᓱᒐᖁᑎᓕᓐᓄᑦ“ ᐅᖃᓚᐅᔪᖅ ᐱᑕ. ᑕᒪᓐᓇ ᐊᓂᕐᕋᕆᒐᑦᑎᒍ, ᓄᓇᓯᒪᕕᑐᖃᕆᑦᓱᒍᓗ ᐊᕐᕌᒍᑦ ᑕᐅᓴᓐᑏᑦ ᐅᖓᑖᓄᑦ, ᓯᕗᓪᓕᐅᔭᑦᓴᖃᕐᓱᑕᓗ ᓄᓇᒥᑦ ᓂᕿᑦᓴᑖᖃᑦᑕᓂᑦᓴᑎᓐᓂᒃ. ᐊᑭᕋᕐᑐᖏᑦᑐᖓ ᐱᕙᓪᓕᐊᑎᑦᓯᒍᑎᐅᒍᒪᔪᓂᒃ, ᐃᓄᓐᓂᒃ ᑐᑭᓯᒪᑦᓯᐊᖁᔨᑐᐃᓐᓇᑐᖓ ᑕᒫᓂ ᓄᓇᑦᑎᓂ ᐱᓇᓱᒍᒪᒍᕕᑦ, ᐃᓄᓐᓂᒃ ᐱᓇᓱᖃᑎᖃᕐᓗᑎᑦ, ᓲᓱᒋᑦᓯᐊᕆᐊᖃᕋᕕᒋᑦ. ᐃᓕᑦᓯᓂᒃ ᐱᓇᓱᖃᑎᖃᕐᓂᐊᑐᒍᑦ ᓲᓱᑦᓴᓯᐊᕐᓗᑕᓗ ᓲᓱᒋᑦᓯᐊᕈᑦᑎᒍᑦ.”
ᐅᖄᔭᖏ ᑦ ᐅᖃᐅᓯᖃᒋᐊᓪᒍᑎᒋᓚᐅᔪᕙᖏᑦ ᓄᓇᖁᑎᒥ ᐱᒐᓱᕝᕕᓴᐅᓂᖏᓐᓂᒃ ᐅᔭᕋᓐᓂᐊᓂᐅᑉ ᐅᖓᑖᓄᑦ ᐊᑦᓱᐃᓕᓴᐅᑎᑦᓴᓂᒃ, ᐃᑲᔪᕐᓯᓱᓂᓗ ᓱᓱᒋᔭᖃᑦᓯᐊᓗᑎᒃ ᐱᓇᓱᖃᑎᖃᕐᑐᓴᐅᓃᑦ ᐱᒻᒪᕆᐅᓂᖃᕐᒥᒋᐊᖏᑦ ᑲᔪᓯᐅᒐᕈᓐᓇᑐᓂᒃ ᐱᕙᓪᓕᐊ-ᑎᑦᓯᒍᑎᖃᕐᓂᓄᑦ
ᑲᑎᒪᓂᕐᒥ ᑐᑭᒧᐊᒍᑏᑦ ᐊᒥᓱᐃᓕᖓᓚᐅᔪᑦ, ᐅᖄᒐᑦᓴᖁᑎᑕᖏᑦ ᐊᒥᓱ-ᐃᓕᖓᑦᓱᑎᒃ ᐱᒋᐊᕐᕕᓕᐅᑎᓂᖃᕐᓱᑎᒃ ᐅᕕᒃᑫᑦ ᐱᓇᓱᒐᕆᒍᓐᓇᑕᖏᓐᓅᓕᖓᔪᓂᒃ ᑎᑭᑦᓱᒋᑦ ᓂᐅᕕᐊᖑᒍᓐᓇᑐᑦ ᒪᓕᒐᖃᕐᑎᑕᐅᓂᖏᓐᓄᑦ. ᐅᖃᐅᓯᐅᓚᐅᔪᒻᒥᔪᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓂᐅᕕᕈᑎᒋᒍᓐᓇᑕᒥᓄᑦ ᒪᓕᒐᖁ ᑎᒋᒍᓐᓇᑕᖏᑦ, ᐅᖃᒐᑦᓴᓕᐊᖑᓯᒪᑦᓱᑎᒃ ᐋᓐᑎ ᒧᐊᖃᐅᔅᒧᑦ, ᒪᑭᕝᕕᐅᑉ ᐊᖓᔪᕐᖄᒪᕆᖓᑕ ᑐᖓᓕᖓᓄᑦ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᓂᕐᓄᑦ ᐱᑦᔪᔨᕕᒻᒥ. ᑖᒃᑯᐊ ᒪᓕᒐᖁᑕᐅᔪᑦ ᓄᑭᓕᐅᕆᒐᓱᒍᑎᐅᒻᒪᑕ ᐃᓄᑐᐃᓐᓀᑦ ᐱᓇᓱᒐᖁᑎᖏᓐᓂᒃ ᐱᑎᑦᓯᓂᖃᕐᓗᑎᒃ ᐱᓇᓱᒍᑦᔨᒍᑎᓂᒃ ᐱᔭᖃᕐᖃᕈᓐᓇᓂᕐᓂᒃ, ᐊᕐᖁᓯᐅᕐᓗᑎᒃ ᐊᑯᓂᕆᓂᐊᕐᑐᓄᑦ ᒪᑭᑕᒐᓱᒍᑎᑎᒍᑦ ᐃᒻᒥᓂᕿᒍᑎᐅᒍᓐᓇᑐᓂᒃ. ᑖᒃᑯᐊ ᒪᓕᒐᖃᕐᑎᓯᒍᑏᑦ ᐱᔭᖃᕋᓱᑉᐳᑦ ᓄᑭᑖᕐᑎᓯᓂᕐᒥᒃ ᐃᓄᑐᐃᓐᓀᑦ ᐱᓇᓱᒐᖁᑎᖏᓐᓂᒃ ᐱᕕᖃᕐᑎᓱᒋᑦ ᓯᕗᓪᓕᐸᖑᓗᑎᒃ ᐱᓇᓱᒍᑦᔨᒍᑎᑦᓴᑕᖃᕐᑕᓂᕐᓂᒃ, ᐊᕐᖁᓯ-ᐅᕐᓱᒋᑦ ᐊᑯᓂᕆᔪᒥᒃ ᒪᑭᑕᒐᓱᒍᑎᑎᒍᑦ ᐃᒻᒥᓂᕿᒍᓐᓇᓂᑦᓴᖓᓐᓄᑦ. ᑕᒪᓐᓇ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓂᐅᕕᕋᓐᓇᓂᕐᓄᑦ ᒪᓕᒐᖃᕐᑎᑕᐅᓂᖓᑕ ᐱᕙᓪᓕᐊ ᑎᑦᓯᒍᑎᐅᓯᓚᐅᔪᕗᖅ ᑲᔪᓯᔪᓂᒃ ᑐᑭᓯᓂᐊᖃᑎᒋᓐᓂᐅᖃᑦᑕᓂᐊᕐᑐᓂᒃ, ᓯᕗᓂᖃᕈᑎᐅᑦᓱᓂ ᑭᖑᓪᓕᐹᖑᓛᕐᑐᓂᒃ ᐊᒃᓚᓯᒪᔪᖁᑎᑦᓴᓂᒃ ᓄᓇᕕᒻᒥᐅᓄᑦ ᐊᖏᕐᑕᐅᑎᑦᓯᒍᑎᐅᓛᕐᑐᓂᒃ.
ᑯᐯᒃᑯᑦ ᐃᑯᒪᓕᕆᔨᖏᑕ ᓄᓇᓕᑐᖃᕐᓂᑦ ᓂᐅᕕᕐᕕᖃᕐᓂᒥᒃ ᐱᓇᓱᒍ ᑎᓕ-ᐊᕆᓯᒪᔭᖏᑦ, ᑐᓴᕐᑕᐅᑎᑦᓯᒍᑎᒋᓚᐅᔪᔭᖏᑦ ᑲᒦᓪ ᓚᐱᐋᕐᔭ, ᐃᒥᐊᔪᑐᑦ ᐅᖃᕈᑎᒋᒋᐊᓪᓚᓚᐅᔪᕙᖏᑦ ᐱᓪᓚᕆᐅᒋᐊᖓ ᓴᕐᕿᑎᑕᖃᕐᓂᖅ ᐱᓇᓱᖃ-ᑎᒌᒍᑎᑦᓴᓂᒃ ᐱᓇᓱᒐᖃᕐᕕᐅᔪᑦ ᐊᑯᕐᖓᓂᓗ ᐊᒻᒪᓗ ᓄᓇᓕᑐᖃ ᐅᔪᑦ ᓄᓇᓕᖏᓐᓂ, ᓈᒻᒪᓈᑦᓯᐊᑐᓂᒃ ᐅᖄᓚᐅᔪᖅ ᑲᑎᖕᖓᓂᐅᑉ ᐱᓇᓱᖃ ᑎᒌᒍᑎᐅᒐᔭᕐᑐᓂᒃ ᐃᓱᒪᒍᓯᖃᕐᓂᖏᑎᒍᑦ.
ᑲᑎᒪᓂᖃᕐᓂᓕᒫᖓᓂ ᐅᕕᒃᑫᑦ ᓂᐱᖏᑦ ᑐᓴᕐᓴᓯᐊᖑᓚᐅᔪᒻᒥᔪᑦ, ᑐᓴᕐᑕᐅ-ᑎᑦᓯᒍᑎᖃᕐᒥᑎᓪᓗᒍᑦ ᐱᓇᓱᒐᖃᕐᕕᐅᔪᑦ ᓲᕐᓗ YES Montreal-ᑯᑦ ᐊᒻᒪᓗ YES Nunavik-ᑯᑦ ᑐᑭᓯᓇᕐᑎᓯᓂᕐᓴᐅᕗᑦ ᐊᖏᔪᒥᒃ ᐱᔭᑦᓴᖁᑎᑕᖃᕆᐊᖓ ᐃᖏᕐᕋᑎᑦᓯᓂᐅᓗᓂ ᐱᓇᓱᒐᖁᑎᖃᕐᓂᓂᒃ ᒪᑭᑕᒐᓱᒍᑎᑎᒍᑦ ᐃᕐᖁᒪᑦᓯᐊᓂᖅ. ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᑦᑕ ᐊᖓᔪᕐᖄᒪᕆᖓ ᔮᓇᔅ ᐹᓴᓐ ᐅᖃᐅᓯᖃᕆ-ᐊᓪᓚᓚᐅᔪᖅ ᑭᖕᖒᒪᓇᕆᐊᖏᑦ ᐃᓘᓐᓇᖏᓐᓂᒃ ᐃᓚᐅᑎᑦᓯᓂᕐᑕᓖᑦ ᒪᓕᒐᖃᕐᑎᓯᒍᑎᐅᔪᑦ ᓱᕐᖁᐃᑐᒥᒃ ᓇᓪᓕᖁᐊᕆᓐᓂᓴᓂᒃ ᒪᑭᑕᒐᓱᒍᑎᑎᒍᑦ ᐱᒐᓱᕝᕕᐅᒍᓐᓇᑐᓂᒃ ᑭᓇᓕᒫᒃᑯᓅᓕᖓᓗᑎᒃ.
ᑲᑎᒪᓂᖅ ᐃᓱᓕᓂᖃᕐᐸᓕᐊᓕᕐᑎᓗᒍ, ᓄᓇᕕᒻᒥ ᑮᓇᐅᔭᓕᐅᕋᓱᒍᑎᓄᑦ ᐱᓇᓱᒐᖃᕐᕕᐅᔫᑉ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᖃᕐᓂᖓ, ᑐᓴᕐᑎᓯᒍᑎᐅᓚᐅᕐᖁᖅ ᒪᑭᕝᕕᐅᑉ ᐱᓇᓱᑦᑎᖓᓄᑦ ᔩᓴᓐ ᐋᓇᖃᑕᒻᒧᑦ. ᐊᕐᕌᒍᑕᒫᕐᓯᐅᑎᒥᒃ ᑲᑎᒪᓂᖃᕐᓂᖅ ᓄᐃᑕᑎᑦᓯᓚᐅᕆᕗᖅ ᖃᓄᐃᓘᕈᑎᖃᕐᓂᐅᔫᑉ ᖃᓕᕇᑦᑐᓂᒃ ᐱᓇᓱᖃᑎᒌᒍᑎᑦᓴᑕᖃᕐᓂᖓᓂᒃ ᐊᒻᒪᓗ ᓯᕗᒧᑦ ᐃᖏᕐᕋᓂᖃᑦᓯᐊᓂᖓᓂᒃ.
ᐅᒃᑯᐊᑕᐅᓂᖃᕐᐸᓕᐊᓕᕐᑎᓗᒍ ᓄᓇᕕᒻᒥ ᒪᑭᑕᒐᓱᒍᑎᓕᕆᓂᕐᓅᓕᖓᑦᓱᓂ ᑲᑎᒪᓂᕐᒪᕆᒃ, ᐱᓇᓱᖃᑎᒌᒍᑎᑦᓴᐅᔪᓪᓗ ᐱᔭᖃᕋᓱᒍᑎᐅᓛᕐᑐᓗ ᑐᓴᕐᓴᐅᑲᑕᓚᐅᔪᕗᑦ, ᐃᓚᖃᕐᓱᑎᒃ ᐱᔪᒪᔭᖃᕐᓂᓂᒃ ᓄᑖᓂ ᐊᑐᕐᑕᐅᓕᕐᑐᓂᒃ ᒪᑭᑕᒐᓱᒍᑎᑎᒍᑦ ᓴᐱᓕᑐᐃᓐᓇᕆᒃᑯᑎᐅᑦᓱᑎᒃ ᓄᓇᓕᓐᓂᓗ ᓄᑭᖃᕐᓂᓴᐅᒍᓐᓇᓂᕐᓂᒃ ᓄᓇᕕᒻᒥ. ᐱᓇᓱᖃᑎᒌᓐᓂᓴᐅᔪᑦ ᓄᐃᑕᐅᕐᖃᑎᓪᓗᒋᑦ ᐊᒻᒪᓗ ᑕᐅᑐᕐᖁᕈᑎᒥᓐᓂᒃ ᐊᒥᕐᖃᖃᑎᒌᒍᑎᖃᕐᑎᓗᒋᑦ, ᐱᔭᖃᕋᓱᓐᓂᐅᓛᕐᑐᑦ ᓯᕗᓂᑦᓴᒥ ᓄᐃᓚᐅᔪᓄᑦ ᒪᑭᑕᒐᓱᒍᑎᑎᒍᑦ ᐊᑦᓱᐃᓕᓂᑦᓴᖅ ᐱᑐᑦᓯᒪᓂᖃᕐᒪᑦ ᐃᓗᕐᖁᓯᕐᒥᒃ ᐊᓯᐅᑎᑦᓯᑌᓕᓂᕐᒧᓗ ᓄᓇᐅᓪᓗ ᐊᕙᑎᖓᓂᒃ ᑲᒪᒋᔭᖃᑦᓯᐊᑎᐅᓂᕐᓄᑦ.
