ᐅᕕᒐᕐᑐᐃᑦ ᓴᐳᒻᒥᔨᖏᑦ ᓄᓇᕕᒻᒥᐅᓄᑦ ᐱᓐᓀᓗᑕᒻᒪᕆᐅᕗᖅ. ᑐᓚᑦᑕᕕᒃ ᐋᓐᓂᐊᕕᒃ ᒪᓂᔨᓯᒪᕗᖅ ᐊᓪᓚᖁᑎᓂᒃ ᑐᑭᓯᓇᕐᑎᓯᔪᓂᒃ ᐅᖓᕙᒥ ᐅᕕᒐᕐᑐᐃᑦ ᓴᐳᒻᒥᔨᖏᑦ ᓱᓇᒥᒃ ᐱᓇᓱᐊᓲᒍᒻᒪᖔᑕ ᖃᓄᕐᓗ ᐊᑦᑕᓇᕐᓯᑐᐃᓐᓇᕆᐊᓕᓐᓂᒃ ᐃᑲᔪᕐᓯᓲᒍᒻᒪᖔᑕ, ᐊᓪᓚᑕᐅᓯᒪᔪᓂᒃ ᑕᕝᕙᓂ. ᑐᑭᓯᑎᑦᓯᒋᐊᓪᓚᕈᒪᒧᑦ ᓄᓇᕕᒻᒥᐅᓂᒃ ᓱᓀᑦ ᐱᓇᓱᐊᕐᑕᐅᒪᖔᑕ ᓱᓀᓪᓗ ᐊᑐᐃᓐᓇᐅᒪᖔᑕ, ᒪᑭᕝᕕᐅᑉ ᐱᖁᔭᓕᕆᔨᖏᑦ ᐊᓪᓚᓯᒪᕗᑦ ᖃᐅᔨᒪᔭᐅᑎᑦᓯᒍᑎᒥᓂᒃ
ᓱᑫᑦ ᐱᓇᓱᐊᕐᑕᖏᓐᓂᒃ, ᐊᑐᐃᓐᓇᕈᕐᑎᑕᐅᓯᒪᔪᓂᒃ ᑲᑐᑦᔨᖃᑎᒋᑦᓱᒋᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ, ᐅᖄᒍᑕᐅᒋᐊᕐᑐᓯᒪᔪᖅ ᐱᓇᓱᕝᕕᓕᒫᑦ ᑭᒡᒐᑐᕐᑎᖏᑦ ᑲᑎᒪᓂᖃᕐᑎᓗᒋᑦ ᐅᑭᐅᖅ, ᑐᑭᓯᑎᑦᓯᒍᑎᓂᒃ ᐃᓚᖃᕐᒥᑎᓪᓗᒋᑦ ᐱᖁᔮᐱᐅᑉ ᑕ-92 ᐊᓯᐊᒎᖔᕐᕕᐅᒍᒪᐅᑎᖏᓐᓂᒃ.
ᖃᓄᐃᑦᑑᓂᖓ: ᐅᖓᕙᒥ ᐃᓅᓱᑦᑐᐃᑦ ᓴᐳᒻᒥᔭᐅᓂᖓᓄᑦ ᐱᒍᑦᔨᓃᑦ
ᑯᐸᐃᒃᒥ ᐃᓅᓱᑦᑐᐃᑦ ᓴᐳᒻᒥᔭᐅᓂᖓᓄᑦ ᐱᖁᔭᐃᑦ ᒪᓕᑦᑕᐅᓲᖑᕗᑦ ᐃᓅᓱᑦᑐᓂᒃ ᓴᐳᒻᒥᓂᕐᒧᑦ. ᑕᐃᒪᐃᒻᒪᑦ ᑯᐸᐃᒃᒥ ᐱᖁᔭᐅᑦᓱᓂ ᓴᐳᒻᒥᒍᑕᐅᓲᖅ
ᑐᑭᒧᐊᑦᑎᓯᕕᐅᔪᓄᑦ 18-ᓄᑦ ᐃᓅᓱᑦᑐᓂᒃ ᓴᐳᒻᒥᕕᐅᔪᓄᑦ ᑯᐸᐃᒃᒥ.
ᐅᖓᕙᒥ ᐃᓅᓱᑦᑐᓂᒃ ᓴᐳᒻᒥᕕᒃ ᐊᕕᑦᑐᓯᒪᕗᖅ ᑕᓪᓕᒪᓂᒃ (5) ᐱᒍᑦᔨᒍᑎᖃᕐᓱᓂ:
1) ᑐᓴᕐᑎᓯᒍᑕᐅᓯᒪᔪᓂᒃ ᑲᒪᓃᑦ ᐊᒻᒪᓗ ᖃᓄᖅ ᐃᑲᔪᕐᑕᐅᔪᑦᓴᐅᒪᖔᑕ ᓇᐅᑦᓯᑐᐃᓃᑦ
2) ᐱᒍᑦᔨᒍᑎᑦᓴᓕᐊᖑᒪᔪᓂᒃ ᐊᑐᓕᕐᑎᓯᓃᑦ
3) ᖃᓄᐃᓕᖓᓕᕐᒪᖔᑕ ᕿᒥᕐᕈᓃᑦ
4) ᐃᑲᔪᕈᑕᐅᔪᓂᒃ ᑲᒪᓃᑦ (ᐊᓂᕐᕋᖃᕐᑎᓯᓂᒃᑯᑦ)
5) ᐃᓅᓱᑦᑐᓅᓕᖓᑦᓱᑎᒃ ᐱᓂᕐᓗᓂᕐᓄᑦ ᐱᖁᔭᕐᓅᓕᖓᔪᓂᒃ ᐱᓇᓱᐊᕐᕕᒃ
1) ᑐᓴᕐᑎᓯᒍᑕᐅᓯᒪᔪᓂᒃ ᑲᒪᓃᑦ ᐊᒻᒪᓗ ᖃᓄᖅ ᐃᑲᔪᕐᑕᐅᔪᑦᓴᐅᒪᖔᑕ ᓇᐅᑦᓯᑐᐃᓃᑦ
ᐊ) ᑖᓐᓇ ᑐᓴᕐᑎᓯᒍᑕᐅᓯᒪᔪᓂᒃ ᑲᒪᕕᒃ ᐃᓄᓐᓄᑦ ᐋᓐᓂᐊᓯᐅᕐᑎᓄᑦ, ᐃᓕᓐᓂᐊ ᕕᓐᓄᑦ, ᐳᓖᓯᓄᓪᓗ ᑐᓴᕐᑎᓯᒍᑎᓕᐊᖑᒪᔪᓂᒃ ᑎᒍᓚᕕᐅᓲᖅ ᐅᕝᕙᓘᓐᓃᑦ ᑐᓴᕐᑎᓯᒍᑕᐅᓯᒪᔪᓂᒃ ᓇᐅᑐᐃᓐᓇᓄᑦ ᐃᓱᒫᓘᑎᓕᓐᓄᑦ ᐱᐊᕋᐃᑦ ᖃᓄᐃᓕᖓᓂᖏᓐᓂᒃ.
ᐊᑐᓂ ᑐᓴᕐᑎᓯᒍᑕᐅᔪᖅ ᕿᒥᕐᕈᑕᐅᓲᑦ ᓇᓗᓇᐃᕐᑕᐅᓱᑎᓪᓗ ᒪᓕᑦᓱᒋᑦ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐱᖁᔭᓂ ᐊᓪᓚᓯᒪᔪᑦ 38-ᒥ. ᑐᓴᕐᑎᓯᒍᑎᓕᐊᖑᒪᔪᑦ ᕿᒥᕐᕈᕆᐊᓚᐅᕐᓇᒋᑦ ᑐᑭᒧᐊᑦᑎᓯᔨ ᓱᓕᒻᒪᖔᑕ ᖃᐅᔨᓴᕐᑕᐅᑎᑦᓯᒍᓐᓇᑐᖅ ᐃᓅᓱᑦᑑᑉ ᓇᔪᕐᑕᖓᓂᒃ. ᖃᓄᐃᖏᓯ ᐊᕐᓂᕆᒋᐊᓕᖓᓄᑦ ᐱᐊᕋᐅᑉ ᓇᔪᕐᑕᖓ ᐊᓂᕐᕋᖓ ᑲᑉᐱᐊᓇᕐᑐ ᒦᕝᕕᐅᒍᓇᐅᖏᑐᐊᕐᐸᑦ, ᑲᒪᒋᔭᐅᖔᖁᔨᒍᓐᓇᑐᖅ ᐃᓄᓕᕆᔨᓄᑦ ᓄᓇᓕᒻᒥᓗ ᑎᒥᐅᔪᓄᑦ.
ᐱᒍᑦᔨᕕᐅᔪᒥ ᐱᓪᓗᑯᒋᐊᓕᓕᕆᔩᑦ ᐊᖓᔪᖓ ᐊᑐᓂ ᑐᓴᕐᑎᓯᒍᑕᐅᔪᓂᒃ ᖃᓄᐃᓕᒋᐊᕈᑕᐅᔪᑦᓴᐅᒪᖔᑕ ᐅᖄᒍᑎᖃᓲᖅ. ᑕᐃᒪ ᑐᑭᑖᕐᓂᐊᓕᕋᒥ ᖃᔪᓯᐅᑦᔭᐅᔪᑦᓴᐅᒪᖔᑦ ᖏᒻᒪᖔᓘᓐᓃᑦ.
ᐸ) ᖃᓄᖅ ᐃᑲᔪᕐᑕᐅᔪᑦᓴᐅᒪᖔᑕ ᓇᐅᑦᓯᑐᐃᓂᕐᑎᒍᑦ ᐱᒍᑦᔨᒍᑏᑦ ᕿᒥᕐᕈᕕᐅᓲᖑᕗᑦ ᑐᓴᕐᑎᓯᒍᑎᓕᐊᖑᒪᔪᓂᒃ ᒪᓕᑦᓱᑎᒃ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐱᖁᔭᕐᓂᒃ. ᑖᒃᑯᐊ ᐱᓇᓱᑦᑏᑦ ᑎᓕᔭᐅᒪᐅᑎᖃᕐᑐᑦ ᑲᑎᓯᒋᐊᖃᕐᓱᑎᒃ ᐱᐊᕋᕐᒥᒃ, ᐊᖓᔪᖄᖏᓐᓂᒃ, ᐃᓚᖏᓐᓂᓗ ᕆᐊᖃᕈᑎᒃ ᐊᒻᒪᓗ/ᐅᕝᕙᓘᓐᓃᑦ ᐊᓯᖏᓐᓂ ᑲᑎᔭᐅᒋᐊᓕᓐᓂᒃ ᐃᑲᔪᕐᓯᒍᓐᓇᕋᔭᕐᑐᓂᒃ ᑐᑭᓯᓂᐊᕐᑕᐅᓂᖓᓂᒃ ᖃᓄᐃᑦᑐᒦᓕᕐᒪᖔᑦ ᐃᓅᓯᕐᒥᒍᑦ ᐱᐊᕋᖅ ᐃᓚᖏᓪᓗ. ᑐᓴᕐᑎᓯᒍᑕᐅᓯᒪᔪᖅ ᖃᐅᔨᓴᕐᑕᐅᓚᐅᕐᑎᓗᒍ ᑭᓪᓕᖃᖏᐸᑦ ᑲᒪᒋᔭᐅᒋᐊᑐᖏᑐᖅ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᑕ ᑐᑭᒧᐊᑦᑎᓯᔨᖓᓄᑦ. ᑕᐃᒪ ᐊᓪᓚᑕᐅᒪᐅᑎᖏᑦ ᐅᒃᑯᐊᑕᐅᕗᑦ.
ᐃᓅᓱᑦᑐᐃᑦ ᓴᐳᒻᒥᔭᐅᕕᖓᑕ ᑐᑭᒧᐊᑦᑎᓯᔨᖓᓄᑦ ᖃᓄᐃᓕᒋᐊᕈᑕᐅᒋᐊᖃᕐᐸᑦ ᐱᐊᕋᐃᓪᓗ ᖃᓄᐃᖏᓯᐊᕐᓂᕆᒋᐊᓕᖓ ᐃᓱᐃᑦᑐᒦᑦᑎᑕᐅᒍᒍᓇᐅᑐᐊᕐᐸᑦ, ᒪᕐᕉᒃ ᐅᑯᐊ ᐊᑑᑎᔭᐅᒍᓐᓇᑑᒃ:
i) ᑐᑭᓯᓇᑦᓯᐊᑐᐊᕐᐸᑦ ᐃᓱᐃᑦᑐᒦᖁᔨᖏᓂᖓ ᐊᖓᔪᖄᖏᑦ ᐊᑎᓕᐅᕐᑎᑕᐅᒋᐊᓖᑦ ᐊᖏᖃᑎᒌᒍᑎᒥᒃ ᐃᒻᒥᓂᒃ ᑐᑭᑖᕐᓗᑎᒃ ᓄᐃᑕᑎᓪᓗᒋᑦ ᓱᓇᐃᑦ ᑕᐃᒪᐃᑦᔪᑕᐅᒻᒪᖔᑕ ᐃᓱᐃᑦᑐᒦᓚᕿᒍᑕᐅᔪᑦ. ᐊᒻᒪᓗᑦᑕᐅᖅ ᐃᓅᓱᑦᑐᖅ 14 ᐅᖓᑖᓂ ᐅᑭᐅᖃᕈᓂ ᐊᑎᓕᐅᖃᑕᐅᒋᐊᖃᕐᒥᔪᖅ ᐊᖏᖃᑎᒌᒍᑎᒥᒃ; ᐅᕝᕙᓘᓐᓃᑦ,
ii) ᓱᓪᓕᑎᐅᔪᓂᒃ ᓄᐃᑦᓯᒍᓐᓇᖏᖕᐸᑕ ᐋᕿᒋᐊᕆᒍᒪᓂᖃᕐᑑᔭᖏᑐᐊᑉᐸᑦ, ᐃᓅᓱᑦᑐᐃᑦ ᐃᖃᑐᐃᕕᖓᓅᕐᑕᐅᒍᓐᓇᒥᔪᖅ. ᑲᒪᒋᔭᐅᓂᓕᒫᖓᓂ ᖃᖓᑐᐃᓐᓇᖅ, ᐃᓅᓱᑦᑐᖅ ᐊᖓᔪᖄᖏᓪᓘᓃᑦ ᖃᓄᐃᓕᒋᐊᓪᓚᕕᓖᑦ ᐃᖃᑐ ᐃᕕᒻᒥ ᐃᑲᔪᕐᑎᖃᕐᓗᑎᒃ ᓴᐳᒻᒥᔨᒥᒃ.
ᑕᐃᒪᐃᑦᑐᒦᓕᕐᒪᑕ ᐱᓇᓱᐊᕐᕕᒥ ᐊᖓᔪᖄᖅ ᐊᒻᒪᓗ ᐱᓪᓗᑯᒋᐊᓕᓕᕆᔩᑦ ᑕᒪᑐᒥᖓ ᖃᓄᕐᑑᕈᑎᖃᓯᓲᑦ ᓇᓪᓕᐊᒎᕐᑐᓴᐅᒻᒪᖔᓪᓗ ᐅᖄᒍᑎᖃᕐᓱᑎᒃ. ᑕᐃᒪᐃᒻᒪᑦ ᑕᒪᓐᓇ ᐊᖁᑕᐅᓲᖑᕗᖅ ᖃᓄᕐᑑᕈᑕᐅᓂᐊᓕᕐᑎᓗᒍ ᐃᓘᓐᓈᒍᑦ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᑎᒍᑦ. ᑐᓴᕐᑎᓯᒍᑎᓕᐅᕈᑕᐅᓯᒪᒋᑕᖏᑐᐊᕐᐸᑦ ᖃᓄᐃᓘᕈᑕᐅᒍᓐᓇᖏᑦᑐᖅ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᑎᒍᑦ.
2) ᐱᒍᑦᔨᒍᑎᑦᓴᓕᐊᖑᒪᔪᓂᒃ ᐊᑐᓕᕐᑎᓯᓃᑦ
ᐱᐊᕋᐅᑉ ᖃᓄᐃᓕᖓᑎᑕᐅᓂᑦᓴᖓ ᑐᑭᑖᕈᑕᐅᓯᒪᑉᐸᑦ ᐃᖃᑐᐃᕕᑎᒍᑦ, ᑖᒃᑯᐊ ᐱᒍᑦᔨᒍᑕᐅᒋᐊᓕᓐᓂᒃ ᐊᑐᓕᕐᑎᓯᔩᑦ ᐱᓇᓱᐊᖃᑎᖃᓯᓲᑦ ᐱᐊᕋᕐᒥᒃ ᐃᓚᖏᓐᓂᓗ ᐱᐊᕋᖅ ᐃᓱᐃᑦᑐᒦᒍᓐᓀᑎᒐᓱᐊᓯᑦᓱᒍ.
ᑖᒃᑯᐊ ᐱᒍᑦᔨᒍᑎᑦᓴᓕᐊᖑᒪᔪᓂᒃ ᐊᑐᓕᕐᑎᓯᔩᑦ ᐊᑐᐃᓐᓇᐅᔪᑦ ᓄᓇᓕᓐᓂ 7-ᓂ ᐅᖓᕙᒥ ᐃᓚᖃᐃᓐᓇᓲᖑᑦᓱᑎᒃ ᐃᓄᓕᕆᔨᓂᒃ ᐃᑲᔪᕐᑎᖏᓐᓂᓗ ᐊᑐᓂ ᓄᓇᓕᓐᓂ.
ᑕᕐᖀᑦ ᐱᖓᓲᔪᕐᑐᑦ (6) ᓈᒻᒪᑕ ᐱᓇᓱᐊᖃᑎᒋᓕᕐᓱᒋᑦ ᐃᓚᒌᑦᑐᑦ ᐅᕝᕙᓘᓐᓃᑦ ᑕᕐᖀᑦ ᐱᖓᓱᑦ (3) ᓈᓚᐅᕐᑎᓗᒋᑦ ᐃᓱᓕᕝᕕᓴᖓᓄᑦ, ᑐᑭᒧᐊᑦᑎᓯᔨ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᓂᒃ ᕿᒥᕐᕈᕆᐊᖃᓲᖅ ᖃᓄᐃᓕᖓᒍᑕᐅᓕᕐᒪᖔᑕ ᐊᑐᓂ ᐱᐊᕋᐃᑦ ᑲᒪᒋᔭᐅᔪᑦ ᐊᖓᔪᖄᖏᓪᓗ ᓱᖁᐃᓯᒐᓱᐊᕐᓂᐊᓱᓂ ᑐᕌᒐᓕᐊᖑᒪᔪᓕᒫᑦ ᑎᑭᐅᑎᔭᐅᓯᒪᓕᕐᒪᖔᑕ ᖏᒻᒪᖔᑕᓘᓐᓃᑦ ᐃᓱᐃᑦᑐᒦᖏᓐᓇᒪᖔᑕᓘᓐᓃᑦ ᐱᐊᕋᐃᑦ.
3) ᖃᓄᐃᓕᖓᓕᕐᒪᖔᑕ ᕿᒥᕐᕈᓃᑦ
ᖃᓄᐃᓕᖓᓕᕐᒪᖔᑕ ᕿᒥᕐᕈᑎ ᑎᓕᔭᐅᒪᔪᖅ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᓄᑦ, ᐊᑐᓂ ᐱᐊᕋᐃᑦ ᖃᓄᐃᓕᖓᓕᕐᒪᖔᑕ ᐃᓚᖏᓪᓗ ᕿᒥᕐᕈᕆᐊᖃᓯᓲᖅ. ᑕᒪᓐᓇ ᐊᑑᑎᔭᐅᓪᓗᕆᒋᐊᓕᒃ, ᑕᐃᒫᒃ ᕿᒥᕐᕈᓂᒃᑯᑦ ᑐᑭᑖᕆᐊᖃᓲᖑᒻᒪᑕ ᐅᒃᑯᐊᑕ ᐅᔪᑦᓴᐅᒪᖔᑦ ᑲᔪᓯᖏᓐᓇᕆᐊᖃᕐᒪᖔᓪᓘᓃᑦ ᐱᐊᕋᐅᑉ ᑲᒪᒋᔭᐅᓂᖓ ᖃᐅᔨᓴᕐᕕᒋᓚᐅᑲᑦᓱᒍ ᐱᐊᕋᖅ ᐃᓚᖏᓪᓗ ᑲᒪᖃᑕᐅᔪᐃᓪᓗ ᐊᑐᓂ ᑲᒪᒋᔭᐅᔪᓂᒃ. ᐊᓯᖏᑎᒍᑦ ᐃᑲᔪᕐᑕᐅᓂᑦᓴᖓ ᖃᓄᕐᑑᕈᑕᐅᒍᓐᓇᒥᔪᖅ ᖃᓄᕐᑑᖃᑎᒋᓗᒋᑦ ᐃᓚᖏᑦ. ᐱᐊᕋᖅ ᐃᓚᖏᓪᓗ ᓈᒻᒪᓴᖏᑯᑎᒃ ᐃᖃᑐᐃᕕᑎᒍᑦ ᑐᑭᑖᕈᑕᐅᔪᒥᒃ ᓇᒻᒪᓴᖏᕙᓪᓛᕈᑎᓕᐅᕈᓐᓇᒥᔪᑦ.
4) ᐃᑲᔪᕈᑕᐅᔪᓂᒃ ᑲᒪᓃᑦ (ᐊᓂᕐᕋᖃᕐᑎᓯᓂᒃᑯᑦ)
ᑖᓐᓇ ᐱᒍᑦᔨᕕᒃ ᕿᓂᕐᑎᐅᓲᖑᕗᖅ, ᓈᒻᒪᒐᔭᕐᒪᖔᑕᓗ ᓇᐅᑦᓯᑐᕐᑎᐅᓱᓂ ᐊᓂᕐᕋᓴᐅᔪᓂᒃ ᐅᖓᕙᒥ.
ᐊᓂᕐᕋᑖᕐᑎᑕᐅᒋᐊᖃᑐᐊᕐᒪᑕ ᐃᓚᖏᓐᓅᖃᔭᖏᐸᓪᓗ ᐱᐊᕋᖅ, ᐃᓕᑕᕆᔭᐅᒍ-ᑎᑖᕐᓯᒪᔪᓂᒃ ᐃᓚᒌᑦᑐᓂᒃ ᐊᓂᕐᕋᑖᕐᑎᑕᐅᓲᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑎᓕᔭᐅᒪᐅᑎᖃᕐᒪᑕ ᐃᓚᒌᑦᑐᓂᒃ ᐃᓕᑕᕆᔭᐅᒍ ᑎᑖᕐᑎᓯᒍᓐᓇᓂᕐᒥᒃ ᐊᓂᕐᕋᐅᒍᓐᓇᓂᐊᕐᓗᑎᒃ ᐱᐊᕋᕐᓄᑦ ᐊᓂᕐᕋᑖᕐᑎᑕ ᐅᖁᔭᐅᔪᓂᒃ ᑌᒣᑦᑐᒥᒃ ᑲᒪᔨᐅᔪᓄᑦ ᐊᓂᕐᕋᓴᕐᓯᐅᕆᔨᐅᑦᓱᑎᒃ, ᐊᖏᕐᑕᐅᓯᒪᒻᒥᔪᓄᑦ ᑐᑭᒧᐊᑦᑎᓯᔨᒧᑦ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᓂᒃ.
ᐊᑕᐅᓯᐊᕐᓱᑎᒃ ᐊᕐᕌᒍᑕᒫᑦ, ᐊᓂᕐᕋᓴᕐᓯᐅᕆᔩᑦ ᕿᒥᕐᕈᕆᐊᖃᓲᖑᒻᒥᔪᑦ ᖃᓄᐃᓕᕐᒪᖔᑕ ᐊᓂᕐᕋᓴᓕᐊᖑᒪᔪᑦ ᖃᐅᔨᓴᐅᑎᕕᓂᕐᒥᓂᒃ ᐋᑦᓯᓂᐊᕐᓱᑎᒃ ᑐᑭᒧᐊᑦᑎᓯᔨᒧᑦ ᐃᓅᓱᑦᑐᐃᑦ ᓴᐳᒻᒥᔭᐅᕕᖓᓂᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ, ᐊᖏᕐᑎᑕᐅᔪᓄᑦ ᐊᓂᕐᕋᐅᓂᐊᕐᓗᑎᒃ ᐊᕐᕌᒍᑕᒫᑦ ᐊᖏᕐᑕᐅᖃᑦᑕᕆᐊᓕᓐᓂᒃ.
5) ᐃᓅᓱᑦᑐᓅᓕᖓᑦᓱᑎᒃ ᐱᓂᕐᓗᓂᕐᓄᑦ ᐱᖁᔭᕐᓅᓕᖓᔪᓂᒃ ᐱᓇᓱᐊᕐᕕᒃ
ᑖᓐᓇ ᐱᒍᑦᔨᓂᐅᓲᖅ ᐊᑖᒎᕐᑐᓂᒃ ᐱᓂᕐᓗᓂᕐᓄᑦ ᐱᖁᔭᐃᑦ ᐃᓅᓱᑦᑐᓂᒃ 12- 18-ᓗ ᐊᑯᓐᓂᖏᓐᓂ ᐅᑭᐅᓕᓐᓂᒃ 7-ᓂ ᓄᓇᓕᓐᓂ ᐅᖓᕙᒥ. ᐱᖁᔭᓂᒃ ᓯᖁᒥᑦᓯᓯᒪᔪᓂᒃ ᐱᒍᑦᔨᔩᑦ ᕿᒥᕐᕈᕆᐊᖃᓲᑦ ᐃᓅᓱᑦᑐᓂᒃ ᐱᖁᔭᓂᒃ ᓯᖁᒥᑦᓯᓯᒪᔪᓂᒃ. ᐃᑉᐱᒋᑦᓱᒋᑦ ᓱᓇᓂᒃ ᐱᖁᔭᓂᒃ ᐱᓂᕐᓘᑎᖃᕐᓯᒪᓂᖏᑦ, ᐱᓇᓱᑦᑏᑦ ᖃᐅᔨᓴᕆᐊᖃᓲᑦ ᐃᓅᓱᑦᑐᐃᑦ ᐊᓯᐊᒍᑦ ᐃᖃᑐᐃᕕᒃᑰᖏᑦᑐᖅ ᐃᑲᔪᕐᑕᐅᒍᓐᓇᕋᔭᕐᒪᖔᑕ ᐱᓂᕐᓗᒪᕆᑦᓯᒪᖏᑐᐊᕐᒪᑕ.
ᐱᓂᕐᓗᒪᕆᑦᓯᒪᑐᐊᕐᒪᑕ, ᐱᓇᓱᑦᑏᑦ ᓄᐃᑦᓯᒋᐊᖃᓲᑦ ᑐᓴᕐᑎᓯᒍᑎᑦᓴᓂᒃ ᐋᓂᐊᕐᑕᒥᓂᒃ ᐃᖃᑐᐃᕕᒻᒥ ᑐᑭᑖᕆᔨᒧᑦ ᒪᓕᓪᓗᒋᑦ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐱᖁᔭᐃᑦ. ᐃᖃᑐᐃᕕᒻᒥ ᑐᑭᑖᕆᔨᐅᑉ ᑭᓯᐊᓂ ᑐᑭᑖᕈᑎᒋᒍᓐᓇᑕᖏᑦ ᖃᓄᐃᓕᒋᐊᕈᑕᐅᒍᓐᓇᒪᑕ ᐱᖁᔭᓂᒃ ᓯᖁᒥᑦᓯᓯᒪᓂᖓᓄᑦ ᐃᓅᓱᑦᑑᑉ ᑎᒍᔭᐅᒪᔪᕐᑎᑐᑦ ᑲᒪᒋᔭᐅᖏᓐᓇᕆᐊᖃᕐᐸᑦ ᖃᓄᐃᓘᕈᑕᐅᒋᐊᖃᕐᐸᓘᓐᓃᑦ (ᑲᐃᕙᓪᓚᒍᓯᓕᐅᕐᑕᐅᒪᓗᓂ ᐃᑎᕐᓯᒪᐃᓐᓇᕆᐊᖃᕐᓂᒥᓄᑦ, ᐱᓇᓱᐊᕐᑎᑕᐅᒋᐊᖃᕐᓂᖓᓄᑦ) ᑕᒪᒃᑯᐊ ᑐᑭᑖᕈᑕ-ᐅᓯᒪᑎᓪᓗᒋᑦ ᐃᖃᑐᐃᕕᒻᒥ ᑐᑭᑖᕆᔨᒻᒧᑦ.
ᐃᖃᑐᐃᕕᒻᒥ ᑐᑭᑖᕆᔨ, ᖃᓄᑎᒋ ᐱᓂᕐᓗᓯᒪᓂᖓ ᑐᑭᑖᕈᑎᒋᓗᒍ, ᑐᑭᑖᕈᑎᖃᕈᓐᓇᑐᖅ ᖃᓄᐃᑦᑐᒥᒃ ᑲᒪᒋᔭᐅᓂᖃᕆᐊᖃᕐᒪᖔᑦ ᐃᓅᓱᑦᑐᖅ, ᐊᓂᑕᐃᓕᕕᒻᒦᓗᓂ ᐊᓂᖃᑦᑕᕈᓐᓇᓗᓂᓘᓐᓃᑦ.
ᐱᒻᒪᕆᐅᒻᒥᔪᖅ ᐱᓇᓱᐊᖃᑎᒌᑦᓯᐊᕆᐊᖃᕐᓂᖓ ᓄᓇᓖᑦ 7-ᐊᐃᑦ, ᐃᓅᓱᑦᑐᐃᑦ ᐃᑲᔪᕐᓯᔭᐅᖁᓪᓗᒋᑦ ᐱᓇᓱᐊᕐᑎᑕᐅᓂᕐᒥᒍᑦ ᓄᓇᓕᒻᒥ ᐃᓱᒪᒍᓐᓇᓯᖁᓪᓗᒋᑦ ᐊᓯᒥᓂᒃ ᐱᑦᓯᐊᓂᒋᐊᖃᕐᓂᒥᓂᒃ.
ᐃᓅᓱᑦᑐᐃᑦ ᐱᓂᕐᓗᓂᖃᓲᑦ ᐱᑦᓯᐊᕈᓐᓇᓯᑎᑕᐅᒐᓱᐊᕐᐸᐳᑦ ᐃᑲᔪᕐᑎᐅᔪᓕᒫᓄᑦ ᐃᓅᓱᑦᑐᓂᒃ.
ᐳᕐᑐᓂᕐᓴᐃᑦ ᐊᐅᓚᑦᓯᔩᑦ
ᐅᖓᕙᒥ ᑐᓚᑦᑕᕕᒻᒥ ᖃᓄᐃᖕᖏᓯᐊᕐᓂᒧᑦ
ᑐᓴᕐᑎᓯᓂᖅ ᑎᒥᐅᔪᓕᒫᑦ ᑲᑎᒪᓂᖓᓂᑦ
ᐱᕙᓪᓕᐊᓯᒪᓃᑦ:
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᕙᓪᓕᐊ ᑎᑦᓯᓯᓚᐅᕐᓯᒪᕗᖅ 2013-ᖑᑎᓪᓗᒍ ᕿᒥᕐᕈᓂᕐᒥᒃ ᓴᐳᑦᔨᓯᒪᓂᕐᓄᑦ ᐱᑦᔪᔨᒍᑎᓂᒃ ᐱᑕᖃᕐᑎᑕᐅᔪᓂᒃ ᐃᓕᖓᑦᓱᑎᒃ ᓄᓇᕕᐅᑉ ᐅᕕᒃᑲᖏᓐᓄᑦ, ᖃᓄᕐᓗ ᑖᒃᑯᐊ ᐃᑲᔪᕐᑕᐅᔭᕆᐊᖃᓲᑦ ᐱᕙᓪᓕᑕᐅᓂᖃᕋᔭᕐᒪᖔᑕ ᐱᐅᓯᕐᓱ ᑎᑐᖃᐅᖕᖏᑐᑎᒍᑦ ᐃᓗᕐᖁᓯᒃᑰᑐᓄᑦ ᐊᒻᒪᓗ ᓄᓇᖁᑕᐅᔪᒧᑦ ᐊᑐᕐᑕᐅᓂᒃᑯᑦ ᓈᒻᒪᓯᓕᑎᕐᓯᒪᔪᓂᒃ. ᓴᕐᕿᑎᑦᓯᓂᖃᓚᐅᔪᕗᓪᓗ ᑲᑎᖕᖓᔨᒋᔭ ᐅᓚᖓᔪᓂᒃ ᑲᒪᒋᔭᖃᕐᓂᐊᑐᓂᒃ ᐊᓯᑦᔨᑎᕆᒍᑎᐅᓯᑦᓱᑎᒃ ᒪᓂᔭᐅᔪᓂᒃ, ᐅᑯᓂᖓ “ᓄᓇᓕᓕᒫᑦ ᐊᔪᖀᒋᐊᕐᑎᓴᓄᑦ ᑲᑎᖕᖓᔨᖏᑦ ᐃᓕᖓᔪᑦ ᐅᕕᒃᑫᑦ ᐱᑦᔪᔭᐅᒍᑎᖏᓐᓄᑦ”. 2017- ᖑᑎᓪᓗᒍ ᐱᓇᓱᑦᑎᑖᓚᐅᕐᓯᒪᔪᑦ ᐱᔪᓐᓇᐅ ᑎᓕᒻᒥᒃ ᐃᑲᔪᕐᓯᒪᓂᐊᕐᑐᒥᒃ ᑕᒪᒃᑯᐊ ᐱᓇᓱᑦᑕᐅᒍᑎᒋᓯᔭᖏᓐᓂᒃ ᐃᓄᒻᒧᑦ ᒣᓇ ᐳᐆᓐᒥᒃ ᐱᓇᓱᓚᖓᓕᕐᑎᓗᒍ ᐃᒣᓕᖓᖔᕐᓗᓃᓚᔨᐅᓗᓂ ᐅᕕᒃᑲᓂᓪᓗ ᐃᓚᒌᑦᑐᓂᓪᓗ. 2017 ᐅᑭᐊᖓ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐊᑕᓐᓂᐅᕕᖃᓚᐅᔪᕗᖅ ᓄᓇᓕᓐᓂᓗ ᓄᓇᓕᓕᒫᓂᓗ ᐱᓇᓱᒐᖃᕐᕕᖁᑕ-ᐅᔪᓂᒃ ᓴᐳᑦᔭᐅᒪᒍᒪᑦᓱᓂ ᑖᒃᑯᓂᖓ ᐱᓇᓱᒍᑎᖃᓯᓂᕐᒥᓄᑦ. ᐊᐅᓚᑦᔦᓚᐅᔪᔪᖅ ᑕᕐᕋᒥᐅᑦ ᓄᓇᓕᖏᑕ ᑲᕙᒫᐱᖏᓐᓂᒃ, ᓄᓇᒥᒃ ᑎᒍᒥᐊᕐᑎᓂᒃ, ᖃᕐᔪᐃᑦ, ᑲᑎᕕᒃ ᐃᓕᓴᕐᓂᓕᕆᓂᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᒪᑭᕝᕕᒃ ᐊᒻᒪᓗ ᐊᓯᖏᓐᓂᒃ, ᐊᕐᖁᑎᖃᕐᓱᑎᒃ ᑐᑭᑖᕈᑎᓂᒃ. ᑭᖑᓂᐊᒍᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓴᕐᕿᑎᑦᓯᓕᓚᐅᔪᕗᖅ ᓱᑫᑦ ᐱᓇᓱᖃᑎᒌᑦᑐᑦ-ᑯᓐᓂᒃ, ᑲᑎᖕᖓᔨᖕᖑᑐᑦ ᑭᒡᒐᑐᕐᑎᐅᑎᓪᓗᒋᑦ ᑲᒃᑯᓇᖕᖓᑦ ᐱᓇᓱᒐᖃᕐᕕᐅᔪᓂᑦ:
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᐃᓚᒌᓄᑦ ᐃᒡᓗᖁᑏᑦ, ᒪᑭᕝᕕᒃ, ᖃᕐᔪᐃᑦ, ᖃᓄᐃᖕᖏᓯᐊᕐᑐᓴᐅᓂᕐᓄᑦ ᐱᓇᓱᑦᑏᑦ, ᐅᕕᒃᑫᑦ ᓴᐳᒻᒥᔨᖏᑦ, ᐃᓄᑐᙯᑦ ᑲᑎᖕᖓᔨᖏᑦ, ᐃᓄᓕᕆᔩᑦ, ᖃᔭᖅ ᐊᖑᑏᑦ ᑲᑐᑦᔨᖃᑎᒌᕝᕕᖓᑦ, ᓴᑐᕐᕖᑦ ᐊᕐᓀᑦ ᑲᑐᑦᔨᖃᑎᒌᕝᕕᖓᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ, ᑲᑎᕕᒃ ᐃᓕᓴᕐᓂᓕᕆᓂᖅ
ᓱᑫᒃᑯᑦ ᐃᒣᑦᑑᕗᑦ:
ᓱᑫᑦ ᐱᓇᓱᖃᑎᒌᑦᑐᖁᑎᖏᑦ ᑎᓕᔭᐅᒍᑎᖃᓯᒪᕗᑦ ᑲᒃᑯᓂᖓ:
ᑐᑭᓯᓂᐊᖃᑦᑕᓂᐊᕐᓗᑎᒃ ᑕᒐᑕᒐᐅᔪᖅ ᖃᓄᐃᓕᖓᓂᕆᓕᕐᑕᖏᓐᓂᒃ ᐅᕕᒃᑫᓗ ᐃᓚᒌᖑᔪᓪᓗ ᐱᑦᔪᔭᐅᒍᑎᖏᑦ ᓄᓇᕕᒻᒥ, ᕿᒥᕐᕈᔪᑦᓴᐅᓗᑎᒃ ᐊᑦᔨᒌᖕᖏᑐᓂᒃ ᐱᐅᓯᖃᕈᑎᓂᒃ ᐊᑐᕐᑕᐅᔪᓂᒃ ᐊᓯᖏᓐᓂ ᑯᐯᒃᒦᓱᑎᒃ ᓄᓇᓕᑐᙯᑦ
ᓄᓇᖏᓐᓂ ᐃᒣᓕᖓᒋᐊᕆᐊᖃᓕᕐᖁᓰᕈᑎᓂᒃ ᓄᐃᑦᓯᒍᑎᐅᒐᔭᕐᓗᑎᒃ ᐱᕙᓪᓕᐊᑎᑦᓯᒍᑎᐅᓂᐊᓕᕐᑐᓂᒃ ᐅᕕᒃᑫᓗ ᐃᓚᒌᖑᔪᓪᓗ ᐱᑦᔪᔭᐅᒍᑎᖏᓐᓂᒃ ᐊᒻᒪᓗ ᐅᕕᒃᑫᑦ ᓴᐳᑦᔭᐅᒪᒍᑎᖏᑕ ᐱᑦᔪᔭᐅᒍᑎᖏᓐᓂᒃ ᐃᓄᑐᐃᓐᓀᑦ ᐃᓗᕐᖁᓯᖓᓐᓅᓕᖓᓂᕐᓴᕈᖁᓪᓗᒋᑦ” ᐱᓗᐊᕐᑐᒥᒃ ᑲᒃᑯᓄᖓᓕᖓᓂᕐᓴᐅᓗᑎᒃ;
ᑐᑭᓯᓂᐊᑦᓯᐊᓗᒋᑦ ᑕᒐᑕᒐᐅᔪᖅ ᖃᓄᐃᓕᖓᓂᕆᓕᕐᑕᑦ ᐱᑦᔪᔨᒍᑏᑦ ᒪᓂᒪᔪᑦ ᐅᕕᒃᑲᓄᓪᓗ ᐃᓚᖏᓐᓄᓗ ᓄᓇᕕᒻᒥ;
ᕿᒥᕐᕈᔭᖃᑦᓯᐊᓗᑎᒃ ᑕᒐᑕᒐ ᐱᐅᓯᕆᓕᕐᑕᖏᓐᓂᒃ ᐅᕕᒃᑫᑦ ᓴᐳᑦᔭᐅᓂᑦᓴᖏᓐᓂᒃ ᐱᑦᔪᔨᒍᑎᐅᔪᑦ ᓄᓇᕕᒻᒥ;
ᑐᑭᓕᐅᑦᓯᐊᓗᒋᑦ ᑐᖕᖓᕕᐅᔪᑦ, ᐃᓱᒪᒋᔭᐅᔪᓪᓗ ᐃᓕᖓᔪᑦᓴᖁᑕᐅᑦᓱᑎᒃ ᓄᓇᕕᒻᒥᐅᑦ ᐅᕕᒃᑲᖏᑕ ᓴᐳᑦᔭᐅᒪᒍᑎᖏᑦ;
ᓇᐅᑦᓯᑐᑦᓯᐊᓗᒋᑦ ᐊᒥᓱᐃᑦ ᐊᓯᖏᑎᒎᕐᓱᑎᒃ ᐱᓇᓱᒍᑎᑦᓴᓕᐊᖑᒪᔪᑦ ᐊᒻᒪᓗ ᐊᑐᕋᑦᓴᑖᖑᖃᑦᑕᓯᒪᔪᑦ ᐊᓯᖏᓐᓄᑦ ᓄᓇᓕᑐᙯᑦ ᓄᓇᓕᖏᓐᓄᑦ;
ᐃᒣᓕᖓᒋᐊᖓᕐᑐᓴᐅᕗᑦ ᓚᒍᑎᖃᕐᓗᑎᒃ ᐱᐅᓂᕐᐹᓂᒃ ᐃᓗᕐᖁᓯᑎᒍᑦ ᐋᕐᕿᓱᕆᐊᕐᓯᒪᔪᓂᒃ ᐱᓇᓱᒍᑎᓂᒃ ᑌᒣᓘᕐᓗᑎᒃ ᕿᑐᕐᖓᓖᓪᓗ ᓄᓇᓕᓪᓗ ᐃᓚᐅᓯᒐᔭᕐᒪᑕ ᐅᕕᒃᑫᑦ ᓴᐳᑦᔭᐅᓂᑦᓴᖏᑕ ᐱᑦᔪᔭᐅᒍᑎᖏᓐᓄᑦ;
ᐃᒣᓕᖓᒋᐊᖓᕐᑐᓴᐅᕗᑦ ᓚᒍᑎᖃᕐᓗᑎᒃ ᓈᒻᒪᑐᕆᔭᒥᓐᓂᒃ, ᐃᓗᕐᖁᓯᑎᒍᓪᓗ ᓈᒻᒪᓈᕐᑐᕆᔭᒥᓐᓂᒃ ᐱᓇᓱᒍᑎᑦᓴᓕᐊᖑᒪᔪᓂᒃ ᐊᒻᒪᓗ/ᐅᕝᕙᓘᓐᓂᑦ ᐋᕐᕿᒋᐊᕆᒍᑎᖃᕐᓗᑎᒃ ᐃᓕᖓᓂᖏᓐᓂᒃ ᐅᕕᒃᑫᑦ ᓴᐳᑦᔭᐅᓂᑦᓴᖏᓐᓄᑦ ᐱᖁᔭᓂᒃ ᐊᓪᓚᓯᒪᓂᒃ ᐊᕕᑦᑐᓯᒪᓂᖅ 37.5-ᒦᑦᓱᑎᒃ;
ᒪᓂᔨᒍᑎᖃᕐᓗᑎᒃ ᐱᓪᓗᑯᒋᐊᓕᑎᒍᑦ ᖃᓄᐃᓘᕈᑎᑦᓴᓕᐊᖑᒪᔪᓂᒃ ᐃᓕᖓᑦᓱᑎᒃ ᐃᓚᐅᒍᑎᓕᓐᓄᑦ ᓄᓇᓯᒪᔪᓄᑦ ᓄᓇᕕᐅᑉ ᓯᓚᑖᓂ;
ᐃᒣᓕᖓᒋᐊᖓᕐᑐᓴᐅᕗᑦ ᓚᒍᑎᖃᕐᓗᑎᒃ, ᓈᒻᒪᑐᕆᑦᓯᒍᑎᒃ, ᐃᓂᓪᓚᓯᒪᒍᑎᖏᓐᓂᒃ ᐱᑦᔪᔨᒍᑎᐅᔪᑦ ᐃᓕᖓᑦᓱᑎᒃ ᐅᕕᒃᑲᓄᓪᓗ ᐃᓚᖏᓐᓄᓗ;
ᐃᒣᓕᖓᒋᐊᖓᕐᑐᓴᐅᕗᑦ ᓚᒍᑎᖃᕐᓗᑎᒃ ᑲᔪᓯᑎᑕᐅᒍᑎᑦᓴᖏᓐᓂᒃ, ᐱᕕᑦᓴᖃᕐᑎᑕᐅᕕᑦᓴᖏᓐᓂᒃ ᐊᒻᒪᓗ ᐱᒋᐅᕐᓴᑎᑦᓯᒍᑎᐅᔪᑦ ᐃᖏᕐᕋᑎᑕᐅᒍᑎᑦᓴᖏᓐᓂᒃ ᑖᒃᑯᓄᖓ ᐱᓇᓱᒍᑎᑦᓴᓕᐊᖑᒪᔪᓄᑦ ᐃᓕᖓᑦᓱᑎᒃ;
ᑲᔪᓯᑎᑕᐅᓯᒪᓕᑐᐊᕐᐸᑕᓗ ᐱᓇᓱᒍᑎᑖᖑᔪᑦ ᓇᐅᑦᓯᑐᕐᓗᒋᑦ.
ᑌᒪᓕ ᐃᒣᓕᖓᖔᕐᓗᑏᕈᑎᑦᓴᓕᐅᕐᓂᐊᕈᑎᒃ, ᐱᔭᕆᐊᖃᓚᐅᔪᕗᑦ ᑐᑭᓯᓂ-ᐊᕐᕕᖃᕐᓂᒥᒃ ᐱᓇᓱᒍᑎᓂᒃ ᐅᖄᔭᐅᒻᒪᕆᓕᓚᐅᔪᕗᑦ ᐃᓚᐅᑎᑕᐅᑎᓪᓗᒋᑦ ᐊᒥᓱᑦ ᐊᒻᒪᓗ ᐊᑕᖏᕐᓯᓯᐊᕐᑐᑦ ᑭᖑᓕᕇᑦᑎᑐᓂᒃ ᓄᓇᓕᓐᓄᑦ ᐊᕐᕕᑕᕐᓂᖃᕐᓂᖅ, ᐊᒥᓱᓪᓗ ᐅᖃᖃᑎᒌᓐᓂᖃᕐᓂᖏᑦ ᐊᑕᐅᓯᐅᓈᕐᑎᔪᓂᓪᓗ ᐊᐱᕐᓱᓂᖃᑦᑕᓃᑦ. ᓴᐳᑦᔭᐅᒪᑦᓱᑎᒃ ᒪᓐᑐᔨᐊᑉ ᐃᓕᓐᓂᐊᕕᕐᔪᐊᖓᓄᑦ ᐱᑐᑦᓯᒪᔪᑦ ᖃᐅᔨᓴᕐᓂᒧᑦ ᐱᓇᓱᖃᑎᒌᑦᑐᖁᑎᖏᑦ, ᐃᓱᓕᒋᐊᕈᑎᑦᓴᓂᒃ ᓄᐃᑦᓯᓚᐅᔪᕗᖅ ᑐᖕᖓᕕᖃᕐᓱᑎᒃ ᓄᓇᓕᒻᒥᑦ-ᑐᖕᖓᕕᓕᓐᓂᒃ ᐱᓇᓱᒍᑎᖃᕐᓱᑎᒃ, ᑖᒃᑯᐊ ᑐᓴᕐᑎᓯᒍᑎᓕᐊᓄᑦ ᐃᓚᒋᔭᐅᒻᒥᔪᑦ: “ᐃᓚᒌᓂᒃ ᒪᑭᑎᑦᓯᒋᐊᕐᓃᑦ ᓄᓇᕕᒻᒥ: ᖃᐅᔨᓴᕐᑕᖃᕐᓃᑦ ᑕᒐᑕᒐ ᐅᕕᒃᑫᓗ ᐃᓚᒌᖑᔪᓪᓗ ᐱᑦᔪᔭᐅᒍᑎᖏᓐᓂᒃ ᐊᑕᐅᓯᖕᖑᑎᑦᓯᓂᕐᒥᒃ ᐱᑦᔪᔭᐅᒍᑎᖏᓐᓂᒃ ᐅᕕᒃᑫᑦ, ᐃᓚᒌᑦ ᐊᒻᒪᓗ ᓄᓇᓖᑦ” (2017-2019, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ).
ᑖᒃᑯᐊ ᑐᓴᕐᑎᓯᒍᑏᑦ ᑐᖕᖓᕕᓕᐅᕈᑎᐅᓚᐅᔪᕗᑦ ᐱᓇᓱᑦᑕᐅᔪᓂᒃ ᐊᒻᒪᓗ ᐱᕙᓪᓕᐊᑎᑦᓯᒍᑎᐅᓯᔪᓂᒃ ᓄᐃᑕᐅᒪᑦᓱᑎᒃ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ-ᓄᑦ ᒪᓕᑦᑐᓄᑦ ᐱᖓᓲᔪᕐᑐᓂᒃ (6) ᑐᖕᖓᕕᓐᓂᒃ ᑐᑭᑖᕐᑕ-ᐅᖃᑦᑕᓚᐅᔪᔪᓂᑦ ᑐᑭᓯᓂᐊᕐᓂᖃᕐᓂᓂᑦ. ᓯᕗᓂᖃᕈᑎᐅᓪᓚᕆᓚᐅᔪᔪᑦ, ᐱᓇᓱᑦᑕᐅᓂᖃᓚᖓᑎᓪᓗᒋᑦ ᓄᓇᓖᑦ ᐱᕕᖃᕐᓂᖏᑦ ᒪᓕᓪᓗᒋᑦ. ᐃᓄᑐᐃᓐᓀᑦ ᓴᓇᒋᐊᑦᓯᐊᑐᑦ ᑲᔪᓯᑎᑦᓯᒍᑎᑦᓴᓂᒃ ᐱᑦᔪᔨᒍᑎᓂᒃ ᑐᖕᖓᕕᖃᕐᓱᑎᒃ ᐃᓄᑐᐃᓐᓀᑦ ᖃᐅᔨᒪᔭᖏᓐᓂᒃ ᖃᓄᐃᓘᕆᒍᓯᖏᓐᓂᓗ, ᑌᒣᓕᖓᓗᑎᒃ ᐅᕕᒃᑲᓂᒃ ᓴᐳᒻᒥᓂᕐᒧᑦ ᐱᖁᔦᑦ ᐊᑐᕐᑕᐅᖁᓪᓗᒋᑦ ᐱᖁᔭᖁᑕᐅᓗᑎᒃ ᑌᒣᒋᐊᖃᕐᓯᒪᓂᕐᒥᒎᕐᑎᓗᒋᑦ.
ᑐᖕᖓᕖᑦ 1
ᕿᑐᕐᙰᓗ ᐃᓚᒌᑦᑐᓗ ᐱᑦᔪᔭᐅᕕᒻᒥᓲᑦ. ᓴᐳᑦᔭᐅᒪᑦᓱᑎᒃ ᐃᓚᒥᓄᑦ, ᓄᓇᕐᖃᑎᒥᓐᓄᑦ, ᐱᓇᓱᑦᑎᓄᑦ ᑕᕝᕙᓂ ᐱᑦᔪᔨᕕᒻᒥ. ᐃᓘᓐᓇᑎᒃ ᐱᓇᓱᑦᑐᑦ ᑲᑐᑦᔨᖃᑎᒌᑦᓱᑎᒃ ᓴᐳᒻᒥᐅᑎᑦᓱᑎᒃ ᓱᔭᐅᑎᑦᓯᑌᓕᑦᓱᑎᒃᓗ ᐃᓚᒌᑎᒍᑦ. ᐃᓚᒌᑦᑐᑦ ᓴᐳᒻᒥᔭᐅᓲᑦ ᑭᓇᐅᒐᓗᐊᕋᒥᒃ ᕿᑐᕐᖓᒥᓐᓂᒃ ᑎᒍᒥᐊᕋᓗᐊᕋᒥᒃ ᑎᒍᒥᐊᖕᖏᑲᓗᐊᕋᒥᓪᓗᓃᑦ.
ᑐᖕᖓᕖᑦ 2
ᐃᓄᑐᐃᓐᓀᑦ ᑕᓯᐅᕐᑎᐅᕗᑦ ᑐᑭᑖᕈᑎᓂᓪᓗ ᐋᕐᕿᓱᐃᔨᐅᑦᓱᑎᒃ ᓱᕐᖁᐃᑐᒥᒃ ᐱᑦᔪᔨᒍᑎᐅᔪᑦ ᑐᖕᖓᕕᖃᑦᓯᐊᖁᓪᓗᒋᑦ ᐃᓄᑐᐃᓐᓀᑦ ᖃᐅᔨᒪᔭᖏᓐᓂᓗ ᐱᓇᓱᒍᑎᒋᓲᖏᓐᓂᓗ.
ᑐᖕᖓᕖᑦ 3
ᐱᑦᔪᔨᒍᑎᓕᐊᖑᒪᔪᑦ ᐃᓚᐅᑎᑦᓯᓂᖃᑦᓯᐊᑐᑦ ᑐᑭᓕᕇᑦᓯᐊᒥᓪᓗ ᑲᔪᓯᓂᖃᑦᓯᐊᓱᑎᒃ.
ᑐᖕᖓᕖᑦ 4
ᐱᑦᔪᔨᒍᑏᑦ ᐊᑐᕐᑕᐅᑎᑕᐅᓲᑦ ᑐᖕᖓᕕᖃᕐᓱᑎᒃ ᐃᓄᑐᐃᓐᓀᑦ ᐱᐅᓯᖏᓐᓂᒃ, ᑭᖕᖒᒪᑦᓯᒍᑎᖏᓐᓂᒃ ᖃᐅᔨᒪᔭᖏᓐᓂᓗ.
ᑐᖕᖓᕖᑦ 5
ᓱᑫᑦ ᐃᓚᐅᔪᖁᑎᖏᑦ ᓲᕐᓗ ᓇᐸᒍᑎᐅᕗᑦ ᐊᐅᓚᑕᖃᕐᓱᑎᒃ ᓴᕐᕿᑎᑦᓯᓂᕐᓂᓗ ᑲᒪᒋᔭᖃᕐᑎᐅᓂᕐᒥᓗ ᑲᔪᓯᑎᑕᐅᓂᖏᓐᓂᒃ ᐱᓇᓱᒍᑎᑦᓴᓕᐊᖑᒪᔪᑦ ᐃᓕᖓᑦᓱᑎᒃ ᐅᕕᒃᑲᓄᓪᓗ ᐃᓚᒌᖑᔪᓪᓗ ᐱᑦᔪᔭᐅᓂᖏᓐᓄᑦ ᓄᓇᕕᒻᒥ.
ᑐᖕᖓᕖᑦ 6
ᓲᓱᒋᔭᖃᑦᓯᐊᓂᖅ ᐊᐅᓚᒍᓯᖏᓐᓂᓗ ᖃᓄᐃᑦᑐᒥᓪᓗᑐᕐᓂᖏᓐᓂᓗ ᓄᓇᕕᐅᑉ, ᐊᑕᐅᑦᓯᑯᓪᓗ ᓴᐳᒻᒥᔭᖃᑦᓯᐊᓱᑎᒃ ᐱᕙᓪᓕᐊᑎᑦᓯᒍᑎᓂᒃ ᐊᓯᑦᔨᒍᑎᐅᒋᐊᓕᓐᓂᓗ ᓇᒻᒥᓂᕐᓗ- ᑐᑭᑖᕐᑐᐃᔨᐅᒍᑎᐅᒋᓕᓐᓂᒃ.
ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᐃᒣᑦᑑᕗᑦ (NIP):
ᓄᓇᕕᒻᒥ ᐃᓄᐃᑦ ᐸᐸᑕᐅᕕᖓᑦ ᓴᕐᕿᑎᑕᐅᓂᖃᓕᓚᐅᔪᕗᖅ ᐃᖏᕐᕋ-ᑎᑕᖃᓚᖓᓕᕐᑎᓗᒍ ᐱᓇᓱᒍᑎᖃᕐᓗᓂ ᑭᖕᖒᒪᑦᓯᒍᑎᓂᓪᓗ ᓯᕗᓂᑦᓴᓕ-ᐊᖑᒪᔪᓂᓪᓗ ᐊᓪᓚᑕᐅᓯᒪᑦᓱᑎᒃ ᓱᑫᑦ ᑐᓴᕐᑎᓯᒍᑎᖏᓐᓂ, ᑖᒃᑯᐊ ᑐᓴᕐᑎᓯᒍᑏᑦ ᐊᕙᓗᐃᒪᒻᒪᑕ ᐱᑕᖃᓪᓚᕆᒋᐊᓕᓐᓂᒃ ᐃᓚᐅᑎᑦᓯᒍᑎᐅᒋᐊᓖᑦ ᐊᒻᒪᓗ ᓈᒻᒪᓯᑎᕐᓯᒪᔪᑦ ᑲᔪᓯᑦᓯᐊᖁᓪᓗᒋᑦ ᐱᑦᔪᔨᒍᑎᐅᔪᑦ ᐅᕕᒃᑲᓂᓪᓗ ᐃᓚᒌᓂᓪᓗ ᓄᓇᕕᒻᒥ. ᑕᓯᐅᕐᓯᓗᓂᓗ ᓯᕗᓕᕐᓗᓂᓗ ᐱᑎᓪᓗᒍ ᒣᓇ ᐳᐆᓐ ᐊᒻᒪᓗ ᐱᓇᓱᖃᑎᖓ ᕙᓂᐋᓴ ᓗᑯ, ᑖᓐᓇ ᓄᓇᕕᒻᒥ ᐃᓄᐃᑦ ᐸᐸᑕᐅᕕᖓᑦ ᒪᓂᔨᒍᑎᖃᕐᓯᒪᕗᖅ ᒪᕐᕈᐃᓂᒃ ᐱᓇᓱᒍᑎᐅᒐᔭᕐᑑᓂᒃ ᑐᖕᖓᕕᖃᕐᓱᑎᒃ ᐅᖃᖃᑎᒌᓯᒪᓂᖏᓐᓂᒃ ᑲᑎᖕᖓᔩᑦ ᐊᓪᓕᒋᑦᓱᒋᑦ ᑲᑎᖕᖓᔨᖏᑕ ᐱᑦᔪᑎᖃᕐᓱᑎᒃ ᐊᐅᓚᑦᓯᓂᕐᒥᒃ ᐊᐅᓚᑕᐅᓗᑎᒃ ᓱᑫᑦ ᐱᓇᓱᖃᑎᒌᑦᑐᖁᑎᖏᑕ ᐃᓚᐅᔪᖁᑎᖏᓐᓄᑦ.
ᐱᓇᓱᒍᑏᑦ 1 ᐱᓇᓱᑦᑕᖃᕐᓂᐅᓚᖓᕗᖅ ᐅᖁᒣᓪᓕᐅᕈᑎᐅᓂᕐᐹᖑᓲᓂᒃ ᐃᓚᐅᑎᑦᓯᓂᐅᑦᓱᑎᒃ ᐅᕕᒃᑫᑦ ᓴᐳᑦᔭᐅᒍᑎᖏᓐᓂᒃ, ᐊᑕᐅᑦᓯᑯᓪᓗ ᐱᒍᓐᓇᕈ-ᑎ ᐅᑦᓱᑎᒃ ᐊᑐᐃᓐᓇᕈᕐᑎᕆᓂᕐᒥᒃ ᓄᓇᕕᒻᒥ ᐃᓄᐃᑦ ᐸᐸᑕᐅᕕᖓᑕ ᐃᓂᓪᓚᓯᒪᓂᑦᓴᖓᓂᒃ, ᑐᖕᖓᕕᑦᓴᖓᓂᓪᓗ ᑮᓇᐅᔭᕐᑐᓂᕐᓅᓕᖓᔪᖁᑎᑦᓴᖏᓐᓂᓗ. ᐃᓚᐅᑎᑦᓯᓂᖃᓛᕐᑐᑦ ᓄᐃᑦᓯᓂᕐᓂᒃ ᐊᒻᒪᓗ ᑲᔪᓯᑎᑦᓯᓂᕐᓂᒃ ᐱᒋᐅᕐᓴᑎᑦᓯᒍᑎᓂᒃ ᐱᓇᓱᑦᑎᓕᒫᓄᑦ ᐊᑑᑎᔭᐅᒐᔭᕐᑐᓂᒃ ᐃᓚᖃᕐᒥᓗᑎᒃ ᐱᓇᓱᒐᖃᕐᕕᐅᔪᑦ ᒪᓕᒐᖁᑎᖏᓐᓂᒃ ᐃᓕᖓᓛᕐᑐᓂᒃ ᓄᑖᖑᓕᕐᑐᓕᒫᓄᑦ ᐱᑦᔪᔨᒍᑎᐅᓛᕐᑎᓗᒋᑦ ᓄᐃᒍᓇᖁᑎᐅᔪᓄᑦ. ᑖᒃᑯᐊ ᐃᓕᖓᔪᑦ ᐃᓚᒌᑦᑐᑦ ᑲᑎᖕᖓᔨᖏᓐᓄᑦ ᐊᒻᒪᓗ ᓯᓚᑐᓂᕐᒧᑦ ᑲᑎᖕᖓᔨᓄᑦ, ᓴᐳᑦᔨᓯᒪᓂᕐᒥᒃ ᐱᒐᓱᐊᕐᑎᓄᑦ ᐃᓚᐅᖃᑕᐅᑦᓱᑎᒃ ᑲᔪᓯᓂᖃᓚᖓᔪᓄᑦ ᐱᑦᔪᔨᒍᑎᓄᑦ ᐱᑕᖃᕐᑎᓯᔨᑦᓴᐅᓱᑎᒃ ᐅᕕᒃᑲᓂᓪᓗ ᐃᓚᖏᓐᓂᓗ ᓴᐳᒻᒥᓂᕐᒥᒃ ᐱᕕᓕᒫᖏᑎᒍᑦ ᐃᓅᓯᖏᓐᓂ ᑲᒪᒋᔭᐅᓕᖁᓇᒋᑦ ᐅᕕᒃᑫᑦ ᓴᐳᑦᔨᔨᖏᓐᓄᑦ. ᑐᕇᓴ ᐃᑦᑐᒃ ᐱᓇᓱᑦᑎᑖᖑᓯᒪᕗᖅ ᐊᑕᐅᑦᓯᑯᕐᑎᓯᓂᐊᕐᓱᓂ ᓇᑉᐸᑕᐅᒍᑎᖏᓐᓂᒃ ᐃᓚᒌᑦᑐᑦ ᑲᑎᖕᖓᔨᖏᑕ ᓄᓇᕕᒻᒥ, ᐊᒻᒪᓗ ᐆᑦᑐᕋᐅᑎᐅᑦᓱᑎᒃ ᐱᓇᓱᑦᑕᐅᔪᑦ ᐱᕙᓪᓕᐊᑎᑕᐅᒍᑎᖏᓐᓂᒃ. ᑐᕇᓴ ᓴᐳᑦᔭᐅᒪᖃᑦᑕᓚᖓᔪᖅ ᒪᕐᕉᓄᑦ ᐱᓇᓱᑦᑏᓄᑦ ᐅᖓᕙᒥᐅᓂ: ᐋᓇ ᑯᕆᔅᑎᓐᓴᓐᒧᓪᓗ ᐊᒻᒪᓗ ᐃᐋᓚᓯ ᐋᓇᓈᕐᒧᑦ.
ᐱᓇᓱᒍᑏᑦ 2 ᐱᓇᓱᑦᑕᖃᕐᓂᐅᓚᖓᕗᖅ ᑲᔪᓯᑎᑦᓯᓂᕐᒥᒃ ᐃᓂᓪᓚᑕᐅᒪᔪᓂᓪᓗ ᐱᑦᔪᔨᒍᑎᓂᓪᓗ, ᐱᐅᓯᒋᐊᕐᓯᒪᔪᓪᓗ ᓄᑖᑦ, ᐱᔪᖃᑎᓯᑦᑌᓕᒍᑎᐅᑦᓱᑎᒃ ᐊᒻᒪᓗ ᓄᓇᓕᓐᓂᒃ ᐊᐅᓚᑦᔦᒋᐊᕈᑎᐅᑦᓱᑎᒃ. ᐱᓇᓱᑦᑕᐅᔪᓄᑦ ᑲᑎᖕᖓᔩᑦ ᑌᒣᓪᓗᐊᓕᕐᑎᓗᒋᑦ ᐱᓇᓱᑦᑕᐅᔪᑦ ᓴᕐᕿᓂᖃᕐᑐᓴᐅᓕᕐᖁᑦ ᓄᐃᑦᓯᔨᐅᓛᕐᓗᑎᒃ ᑕᓯᐅᕐᑎᓂᒃ ᐊᒻᒪᓗ ᐃᒣᓕᖓᒋᐊᖔᖁᔨᒍᑎᑦᓴᑎᓂᒃ. ᐱᓇᓱᖃᑎᒌᖃᑦᑕᓛᕐᑐᑦ ᐊᕐᖁᑎᑦᓴᖏᑦ ᖃᐅᔨᓴᕐᑕᐅᒋᐊᓪᓚᒋᐊᖃᕐᒥᔪᑦ, ᐱᓗᐊᕐᑐᒥᒃ ᐃᓚᒌᑦᑐᑦ ᐃᓪᓗᖁ-ᑎᖏᑦᑕ ᐱᑐᑦᓯᒪᖃᑎᒌᒍᑎᖏᑎᒍᑦ. ᑕᒪᓐᓇ ᐃᓱᒪᑖᖑᓯᒪᔪᖅ ᐱᕙᓪᓕ ᐊᑎᑕ-ᐅᓂᖃᕐᐳᖅ ᑐᖓᓕᕇᓂᒃ ᐱᑦᔪᔨᒍᑎᐅᖃᑦᑕᓂᐊᕐᑐᓄᑦ ᐱᒍᓐᓇᐅᑎᐅᓚᖓᓗᑎᒃ ᒪᑭᑕᓂᖃᑦᓯ ᐊᓂᕐᓴᓂᒃ ᓯᕗᓪᓕᐹᖑᓗᑎᒃ ᑲᒪᒋᐊᖃᑦᑕᓂᐊᕐᑐᑦ ᐱᑦᔪᔨᒍᑎᖏᓐᓂᒃ ᐃᓱᒫᓗᓐᓇᓂᖃᕋᑎᒃ ᐃᓗᕐᖁᓯᑎᒎᕐᑐᑦ, ᐱᑕᖃᕐᑎᓯᒍᑎᐅᔪᑦ ᐃᓄᑐᐃᓐᓇᓄᑦ ᐱᓇᓱᑦᑎᓄᑦ, ᐊᒻᒪᓗ ᐱᓇᓱᒍᑦᔨᒍᑎ ᐅᖃᑦᑕᓗᑎᒃ ᐃᓗᐊᓂᓗ ᓯᓚᑖᓂᓗ ᐃᓗᓯᓕᕆᓂᐅᔪᓪᓗ ᐃᓄᓕᕆᓂᐅᔪᓪᓗ ᐱᑐᑦᓯᒪᐅᑎᖃᑎᒌᑦᑐᖁᑎᖏᑕ. ᓴᕐᕿᓂ-ᖃᓪᓚᕆᓐᓂᕆᓛᕐᑕᖏᑦ ᐱᐅᓂᕐᓴᐅᓕᕐᑐᑦ ᐱᓇᓱᒐᖃᕐᓂᑯᑦ ᒪᓕᒐᖃᕐᑎᓯᒍᑎᐅᔪᑦ ᐃᓕᖓᔪᑦ ᐃᓄᑐᐃᓐᓇᓄᑦ ᐱᓇᓱᑦᑎᓄᑦ ᒫᓐᓇᒥ ᓴᐳᑦᔭᐅᒪᕗᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓄᑦ.
ᐃᓱᓕᒋᐊᕈᑏᑦ:
ᑐᖕᖓᕕᒋᑦᓱᒋᑦ ᐊᒻᒪᓗᑭᑕᐅᓕᖓᑦᓱᑎᒃ ᑐᖕᖓᕕᓕᐊᖑᒪᔪᑦ ᐱᑦᔪᑎᓖᑦ ᑲᒪᒋᔭᖃᖃᑎᒌᓐᓂᓂᓪᓗ ᐊᒻᒪᓗᓗ ᓴᐳᑦᔨᓯᒪᖃᑎᒌᓐᓂᓂᒃ, ᕿᑐᕐᖓᐅᔪᓪᓗ ᐃᓚᒌᖑᔪᓪᓗ ᕿᑎᖓᓃᑦᑐᑐᑦ ᐊᕙᓗᔭᐅᒪᑎᓪᓗᒋᑦ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑦ ᓯᕗᓕᕐᐳᖅ ᐊᓯᑦᔨᕙᓪᓕᐊᓂᖏᓐᓂᒃ ᐱᑦᔪᔭᐅᒍᑎᖏᑕ ᐅᕕᒃᑫᓗ ᐃᓚᒌᓪᓗ, ᑌᒣᒐᔭᖁᔭᐅᓯᒪᓂᕐᒥᓂᒃ ᐊᓱᐃᓚᐅᑦᓱᓂ, ᐃᓱᒪᒋᔭᐅᒍᑎᒋᓯᒪᔭᒥᓂᓪᓗ ᐊᒻᒪᓗ ᐊᑑᑎᔭᐅᖃᑦᑕᓯᒪᔪᓂᒃ. ᑌᒪᓕ ᓱᓕᑦᓯᐊᑐᓂᒃ ᐃᓱᒪᖃᕐᑐᑦ ᐃᓕᖓᔪᓂᒃ ᓵᖕᖓᔭᑦᓴᖁᑕᐅᔪᓄᑦ ᑖᑯᓂᖓ ᓄᐃᑦᓯᒐᓱᓐᓂᑯᑦ, ᐊᑕᓐᓂᐅᕈᑎᖃᓕᕐᐳᑦ ᐊᖏᖃᑎᒌᖃᑎᖃᖁᔨᑦᓱᑎᒃ ᑯᐯᒃ ᑲᕙᒪᖓᓂᒃ ᑐᖕᖓᕕᖃᕐᓗᑎᒃ ᐱᖁᔭᓂᒃ 37.5-ᒥ ᐊᓪᓚᑕᐅᒪᔪᓂᒃ ᐅᕕᒃᑫᑦ ᓴᐳᑦᔭᐅᒪᓂᑦᓴᖏᓐᓄᑦ ᐱᖁᔭᓂ ᐃᓱᒪᒋᔭ-ᐅᒋᐊᓪᓚᖁᑦᓱᒍ, ᐃᓚᒋᔭᐅᓚᖓᑎᓪᓗᒍ ᑕᑯᓐᓇᖑᐊᕐᑕᐅᔪᓄᑦ ᐃᓄᑐᐃᓐᓀᑦ ᓇᒻᒥᓂᖁᑎᖃᓕᕋᔭᕐᓂᖏᓐᓂᒃ ᐃᓗᕐᖁᓯᕐᒥᒍᓪᓗ ᐊᓪᓚᑕᐅᒪᔪᓪᓗ ᐃᓗᓕᖏ-ᑎᒎᑦᓯᐊᑐᓂᒃ ᐱᑦᔪᔨᒍᑎᑦᓴᖃᕐᓂᓴᓂᒃ. ᓱᑫᑦ ᑐᑭᓯᓂᐊᕐᓯᒪᓂᕐᒥᓂᒃ ᑐᓴᕐᑕᐅ-ᑎᑦᓯᒍᑎᖏᑦ ᐃᓱᓕᒋᐊᕈᑎᖃᐳᖅ ᐃᕐᐸᓯᐊᕐᓗᑎᒃ ᖃᐅᔨᒪᔭᐅᖁᑦᓱᒋᑦ ᑭᖑᓪᓖᑦ ᖃᓄᐃᓘᕈᑎᒋᒍᒪᓛᓕᕐᒥᔭᖏᑦ:
“ᓴᕐᕿᑎᑦᓯᓂᖅ ᐃᓄᑐᐃᓐᓇᑎᒍᑦ ᐱᓇᓱᒍᑎᑦᓴᓕᐊᖑᒪᔪᓂᒃ ᐱᑕᖃᕈᑎ-ᐅᒋᐊᖃᕐᖁᖅ ᐱᔪᓐᓇᓂᖃᑦᓯᐊᓗᑎᒃ ᓴᐱᓕᑐᐃᓐᓇᓂᐅᔭᖕᖏᑐᓂᒃ ᐃᓄᑐ-ᐃᓐᓇᐅᓱᑎᒃ ᓯᕗᓕᕐᑎᓂᒃ ᓄᓇᓕᓕᒫᓂ ᓇᒻᒥᓂᒃ ᐳᕿᐊᓱᐊᓂᖃᖕᖏᓗᑎᒃ ᐱᓇᓱᒋᐊᒥᒃ ᐃᓄᓕᕆᓂᕐᒥᒃ ᐅᕕᒃᑲᓂᒃ ᐊᒻᒪᓗ ᐃᓚᒌᑦᑐᑦ ᐱᑦᔪᔭᐅᒍᑎᖏᓐᓂᒃ ᐃᓚᐅᑎᓪᓗᒋᑦ ᐅᕕᒃᑫᑦ ᓴᐳᑦᔭᐅᒪᓂᖏᑦ. ᓯᕗᓕᕐᑎᑖᖑᔪᑦ ᐱᕕᑦᓴᖃᑦᓯᐊᕆᐊᖃᕐᐳᑦ, ᓴᐳᑎᔭᐅᒪᑦᓯᐊᓗᑎᓪᓗ, ᐃᓅᓯᖃᑦᓯᐊᓗᑎᓪᓗ ᑕᒪᒃᑯᓂᖓ ᐱᓇᓱᒐᖃᕆᐊᒥᒃ ᐃᓱᐊᕐᑐᓂᒃ.
ᐊᑦᑕᓀᓕᑎᕐᑕᐅᓗᑎᒃ ᓄᒃᑭᕆᐊᕐᑕᐅᖏᑐᐊᕐᐸᑕ ᑕᒪᒃᑯᓂᖓ ᐱᓇᓱᑦᑕᖃᓪᓚᕆᓲᑦ ᐊᒻᒪᓗ ᐊᓯᑦᔨᒋᐊᕐᑕᐅᖏᑐᐊᕐᐸᑕ ᑲᒪᒋᔭᖃᕆᐊᓯᓂᐅᓲᑦ ᐱᓇᓱᕝᕕᐅᓗ ᐊᕙᑎᖓ ᐊᑦᓯᔨᒋᐊᖃᑕᐅᖕᖏᐸᑦ, ᐃᓄᑐᐃᓐᓀᓗ ᐃᓄᑐᐃᓐᓇᐅᖏᑦᑐᓗ ᐱᓇᓱᑦᑏᑦ ᓄᕐᖃᑲᑕᓐᓂᖏᑦ ᐱᖏᓐᓇᓚᖓᔪᑦ, ᐊᒻᒪᓗ ᐃᓚᒌᑦ ᐱᑦᔪᔨᒍᑎᓂᒃ ᓱᖏᕐᑑ-ᑎᖃᕈᓐᓇᓂᕐᒥᒃ ᐳᕿᐊᒋᔭᖃᕐᓂᖏᑦ ᑲᔪᓯᑐᐃᓐᓇᓂᐊᕐᓱᑎᒃ. ᐊᓯᑦᔨᓃᑦ ᐱᔭᐅᔪᒪᔪᑦ ᐱᑕᖃᕐᕕᐅᒋᐊᖃᕐᐳᑦ ᐊᒥᓲᓂᕐᓴᓂᒃ ᐱᒋᐅᕐᓴᔭᐅᒪᑦᓯᐊᑐᓂᒃ ᐱᓇᓱᑦᑎᓂᒃ ᐱᓇᓱᑦᑐᓂᒃ ᐊᑕᐅᓯᕐᒥᒃ ᐊᑦᔨᒌᒥᒃ ᑐᕌᒐᖃᕐᓱᑎᒃ ᐱᓇᓱᑦᓱᑎᓪᓗ ᓯᕗᓕᕐᑕᐅᓱᑎᒃ ᐃᓄᑐᐃᓐᓇᓄᑦ.
ᓱᑫᑦ ᑐᓂᓯᒪᓪᓚᕆᑉᐳᑦ ᐱᓇᓱᓐᓂᐊᓂᒧᑦ ᐅᖁᒣᑦᑐᑎᒍᑦ ᓇᓂᓯᓇᓱᓪᓗᓂ ᐱᐅᓂᕐᐹᓂᒃ ᐋᕐᕿᒍᑎᑦᓴᓂᒃ ᑐᖕᖓᕕᒋᓗᒋᑦ ᑕᒐᑕᒐᐅᔪᖅ ᐱᓇᓱᑦᑎᐅᔪᑦ ᓯᕗᓂᖃᓗᑎᒃ ᓄᐃᑦᓯᒐᔭᕐᓂᒥᒃ ᐊᑦᑕᓇᖕᖏᑐᒥᒃ ᑐᖕᖓᕕᒻᒥᒃ ᐃᓕᖓᓚᖓᔪᒥᒃ ᕿᑐᕐᖓᐅᔪᓄᑦ, ᐃᓚᒌᑦᑐᓄᑦ ᐊᒻᒪᓗ ᓄᓇᕕᐅᑉ ᓄᓇᓕᖏᓐᓄᑦ.”
ᑐᑭᓯᒪᐅᑎᑦᓭᑦ, ᒣ 2021
ᐱᑦᔪᑎᓖᑦ ᒪᑭᕝᕕᐅᑉ ᑲᒪᒋᐊᕐᓯᒪᓂᖓᓂᒃ ᑐᑭᑖᕈᑕᐅᓯᒪᒌᕐᑐᑦ ᐃᕐᖃᑐᐃᕕᑎᒍᑦ ᓴᖑᑎᕐᑕᐅᒐᓱᐊᕐᓂᖓᑕ ᓈᒻᒪᒋᔭᐅᖕᖏᓂᖓᓄᑦ “ᐱᖁᔭᖅ ᐱᑦᔪᑎᓕᒃ ᓄᓇᓕᑐᖃᕐᓂᒃ, ᐃᓄᓐᓂᓗ ᐊᓪᓚᓄᓪᓗ ᑭᖑᕚᕆᔭᐅᔪᓂᒃ, ᐅᕕᒐᕐᑐᓂᓪᓗ
ᐃᓚᒌᓂᓪᓗ” (ᐱᖁᔮᐱᒃ ᑕ-92-ᒍᓂᕋᕐᑕᐅᖃᑦᑕᓯᒪᔪᖅ)
ᐊᓪᓚᓯᒪᔪᑦ ᑖᒃᑯᐊ ᑐᓴᕐᑎᓯᒍᑎᐅᕗᑦ ᓱᓇᓪᓗᑑᓂᖏᓐᓂᒃ ᒪᑭᕝᕕᐅᑉ ᑲᒪᒍᒪᓯᒪᓂᖓᓂᒃ ᐃᕐᖃᑐᐃᕕᑎᒍᑦ ᑐᑭᑖᕈᑕᐅᓯᒪᒌᕐᑐᓂᖅ ᓴᖑᑎᕆᒍᒪᐅᑎᓂᒃ. ᑕᒪᓐᓇ, ᑯᐯᒃᒥ ᐃᕐᖃᑐᐃᕕᓕᕆᔨᒻᒪᕆᐅᑉ ᐃᕐᖃᑐᐃᕕᒃᑰᑎᑦᓯᒍᑎᑦᓴᓕᐅᕐᓯᒪᓂᖓ, ᓈᒻᒪᓴᖕᒋᓂᕐᒥᓄᑦ ᑲᕙᒪᑐᖃᒃᑯᑦ ᐅᖃᕐᕕᒪᕆᖓᓂ 2019-ᒥ ᐱᖁᔭᓕᐊᒍᓯᒪᔪᖅ ᐱᑦᔪᑎᓕᒃ ᓄᓇᓕᑐᖃᕐᓂᒃ, ᐃᓄᓐᓂᒃ, ᐊᓪᓓᓗ ᑭᖑᕚᖏᓐᓂᒃ, ᐅᕕᒐᕐᑐᓂᒃ ᐃᓚᒌᓂᓪᓗ, ᒪᓕᖕᖏᑑᓂᕋᕐᓱᒍ ᐱᖁᔭᕐᔪᐊᓂᒃ ᓯᓚᑖᒎᕐᒪᑦ ᑲᕙᒪᑐᖃᒃᑯᑦ ᓄᑭᖃᕐᕕᖓᑕ.
ᑖᓐᓇ ᐱᖁᔭᖅ (ᑕ-92-ᒍᓂᕋᕐᑕᐅᓯᒪᔪᖅ ᐱᖁᔮᐱᐅᖏᓐᓈᓱᓂ) ᐃᓕᑕᕐᓯᒪᓂᖃᕐᐳᖅ “ᓄᓇᓕᑐᙯᑦ ᐱᒍᓐᓇᐅᑎᖃᕆᐊᖏᓐᓂᒃ ᒪᓕᒐᓕᐅᕈᓐᓇᓂᕐᒧᑦ ᕿᑐᕐᖓᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑏᑦ ᐱᓪᓗᒋᑦ,” ᐃᓚᐅᒻᒥᑎᓪᓗᒋᑦ ᐅᕕᒐᕐᑐᓂᒃ ᓴᐳᒻᒥᔩᑦ. ᓇᓗᓀᕐᓯᒍᑎᑕᓕᒃ ᐱᒍᓐᓇᐅᑎᑕᖏᑦ ᓇᒻᒥᓂᖅ-ᑲᕙᒪᐅᑉ ᐃᓚᖃᕐᒪᑕ ᓄᑭᖃᕐᕕᖃᕐᓂᖏᓐᓂᒃ ᕿᑐᕐᖓᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑎᓂᒃ ᓄᓇᓕᑐᙯᑦ ᑲᕙᒪᖏᓪᓘᓃᑦ. ᐱᖁᔭᖅ ᑐᖕᖓᕕᑦᑕᖃᕐᒥᔪᖅ ᐱᑦᔪᑎᓕᓐᓂᒃ ᐅᕕᒐᕐᑐᐃᑦ ᓴᐳᒻᒥᔨᖏᓐᓂᒃ ᓄᓇᓕᑐᙯᑦ ᕿᑐᕐᖓᖏᓐᓅᓕᖓᔪᓂᒃ ᐊᑑᑎᔭᐅᒍᓐᓇᓱᑎᓪᓗ ᑲᓇᑕᓕᒫᒥ. ᐱᖁᔭᖅ ᑖᒃᑯᓂᖓ ᑐᖕᖓᕕᓐᓂᒃ ᑯᐯᒃᒥ ᐊᑐᕐᑕᐅᖃᑦᑕᓛᕈᓇᐅᔪᕆᑦᓯᒍᑕᐅᔪᖅ ᐊᓯᓕᒫᖏᓐᓂᓗ ᐳᔮᕕᓐᓯᓂ, ᐳᔮᕕᓐᓯ ᓇᓪᓕᐊ ᐊᖏᖃᑕᐅᖕᖏᑲᓗᐊᕐᐸᑦ.
ᑯᐯᒃᑯᑦ ᑖᑦᓱᒥᖓ ᓈᒻᒪᓴᖕᖏᕙᓪᓛᔪᑦ ᒪᕐᕉᓂᒃ ᐱᑦᔪᑎᖃᕐᓱᑎᒃ: 1) ᐅᑉᐱᕆᔭᖃᕋᒥᒃ ᐳᔮᕕᓐᓰᑦ ᐊᐅᓚᑦᓯᖏᓐᓇᓕᒫᕐᑐᓴᐅᔪᖁᑎᒋᑦᓱᒋᑦ ᕿᑐᕐᖓᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑎᓂᒃ, ᓄᓇᓕᑐᖃᕐᓂᓗ ᐊᐅᓚᑦᓯᔪᑦᓴᖁᑎᖃᕐᓱᑎᒃ ᑕᒪᑐᒥᖓ ᑭᓯᐊᓂ ᐊᖏᖃᑎᖃᕐᓯᒪᕐᖄᕈᑎᒃ (ᐆᑦᑐᕋᐅᑎᒋᑦᓱᒍ ᐊᐅᓚᑦᓯᖁᔭᐅᓯᒪᒍᑎᒃ) ᑯᐯᒃᑯᑦ ᑲᕙᒪᖓᓂᒃ; 2) ᐅᑉᐱᕆᔭᖃᖕᖏᑐᑦ ᑲᕙᒪᑐᖃᒃᑯᑦ ᑖᒃᑯᑑᓗᑎᒃ ᐃᓕᑕᕐᓯᔪᑑᒐᔭᕐᓂᖏᓐᓂᒃ ᐅᖃᐅᓯᕐᓃᑐᓂᒃ 35-ᒥ ᐱᒍᓐᓇᐅᑎᓂᒃ – ᐅᑉᐱᕆᔭᖃᕐᑐᐃᓕ ᑯᐯᒃᑯᑦ ᐊᖏᕐᓯᒪᕐᖄᖏᓐᓇᓕᒫᕆᐊᖃᕐᓂᖏᓐᓂᒃ ᓄᓇᓕᑐᙯᑦ ᐱᒍᓐᓇᐅᑎᖏᑦ ᐃᓕᑕᕆᔭᐅᓂᐊᕐᐸᑕ ᐊᑐᕐᑕᐅᑎᑕᐅᓂᐊᕐᐸᑕᓘᓐᓃᑦ.
ᑯᐯᒃᑯᑦ ᓈᒻᒪᓴᖕᖏᕙᓛᒍᑎᖓᓂᒃ ᒪᓕᒐᓕᐊᒍᓯᒪᔪᒥᒃ ᑭᐅᒍᑎᖃᓪᓚᕆᑦᑐ-ᑑᓯᒪᕗᖅ ᑲᓇᑕᒥ ᐃᕐᖃᑐᐃᕕᓕᕆᔨᒻᒪᕆ, ᓈᒻᒪᓴᖕᖏᓂᕋᕐᓯᒪᒐᒥ ᐱᖁᔭᕐᒥᒃ. ᑭᓯᐊᓂᓕ ᐱᓪᓚᕆᐅᓂᖏᓐᓄᑦ ᐊᐱᕐᓲᑎᖏᑦᑕ ᓄᓇᓕᑐᙯᑦ ᑯᐯᒃᒥ ᑲᓇᑕᓕᒫᒥᓪᓗ, ᐊᒥᓱᑦ ᑭᒡᑐᕐᑐᑦ ᓄᓇᓕᑐᖃᕐᓂᒃ ᑲᒪᖃᑕᐅᒍᒪᓯᒪᕗᑦ ᓈᒻᒪᓴᓐᓂᕋᕐᓱᑎᒃ ᐱᖁᔭᕐᔪᐊᒨᓕᖓᓂᖓᓂᒃ ᐱᖁᔭᐅᑉ. ᐅᑯᐊᒍᑦᓱᑎᒃ ᓈᒻᒪᓴᓐᓂᕋᕐᑐᑦ:
• ᓄᓇᓕᑐᙯᑦ ᑲᑎᑦᑕᑎᖏᑦ
• ᓄᓇᓕᑐᙯᑦ ᑲᑎᑦᑕᑎᖏᑦ ᑯᐯᒃᒥ-ᓛᐸᑐᐊᒥᓪᓗ
• ᓄᓇᓕᑐᙯᑦ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᑯᐯᒃᒥ
• ᒪᑭᕝᕕᒃ ᑯᐊᐳᕇᓴᓐ
• ᓄᓇᓕᑐᖃᕐᓂᒃ ᕿᑐᕐᖓᐅᔪᓂᒃ ᐃᓚᒌᓂᓪᓗ ᑲᒪᔨᐅᓲᑦ ᑲᑐᑦᔨᖃᑎᒌᓐᓂᖓ ᑲᓇᑕᒥ
• ᐊᓪᓓᑦ Aseniwuche Winewak ᑲᑎᑦᑕᑎᖏᑦ ᑲᓇᑕᒥ
ᒪᑭᕝᕕᒃ ᓴᐳᑦᔨᓯᒪᓪᓚᕆᑦᑐᖅ ᐱᖁᔭᕐᒥᒃ, ᐃᓕᑕᕐᓯᒪᒍᑕᐅᒻᒪᑦ ᓄᓇᓕᑐᙯᑦ ᐱᒍᓐᓇᐅᑎᖏᓐᓂᒃ ᒪᓕᒐᓕᐅᕈᓐᓇᓂᕐᒧᑦ ᓄᑭᖃᕐᕕᖃᕐᓂᒧᓪᓗ ᕿᑐᕐᖓᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑎᓂᒃ. ᖃᐅᔨᒍᒪᓪᓚᕆᑦᑐᑦ ᑖᑦᓱᒪ ᐱᖁᔭᐅᑉ ᐱᕕᑦᓴ-ᖃᕐᑎᓯᒍᑎᒋᑐᐃᓐᓇᕆᐊᓕᖏᓐᓂᒃ, ᓯᕗᓂᕐᒥ ᓄᓇᕕᒻᒥ ᐅᖃᕐᕕᒪᕆᑦᓴᖅ ᐊᒻᒪᓗ ᐃᓄᐃᑦ ᑲᕙᒪᑦᓴᖓ ᐃᓱᒪᒋᑦᓱᒋᑦ. ᐱᓪᓚᕆᐅᑎᑕᐅᓯᒪᔪᖅ ᓄᓇᕕᒻᒥᐅᑎᒍᑦ ᑕᑯᓐᓇᓱᒍ ᑖᓐᓇ ᓴᓇᕐᕈᑎᑦᓴᖅ, ᐊᑐᐃᓐᓇᕆᔭᐅᓯᕐᖃᒥᖅ ᓄᓇᓕᑐᖃᕐᓄᑦ ᑲᓇᑕᒥᐅᓄᑦ, ᐊᑐᐃᓐᓇᐅᓭᓐᓇᖁᑦᓱᒍᓗ. ᓄᓇᕕᒻᒥᐅᑦ ᐱᕕᑦᓴᖃᖁᑦᓱᒋᑦ, ᓇᓪᓕᐅᑎᒍᑦᔭᐅᒍᑎᒃ, ᕿᒥᕐᕈᓂᖃᕆᐊᖃᓯᒍᑎᒃ ᓇᓪᓕᐊᒎᕆᐊᕈᑎᑦᓴᓕᒫᓂᒃ ᑐᑭᑖᓚᐅᕋᑎᒃ ᐊᐅᓚᑦᓯᒋᐊᕈᑎᑦᓴᓂᒃ.
ᐃᕐᖃᑐᐃᕕᒃᑰᑎᑦᓯᓂᖅ ᐅᖃᐅᓯᕐᑕᖃᓛᖕᖏᑐᖅ ᐊᕐᖁᑎᑦᓭᑦ ᐊᑐᐃᓐᓇᐅᑎᑕᐅᔪᑦ ᑯᐯᒃᑯᑦ ᐱᓇᓱᒍᓯᖏᑎᒍᑦ, ᐃᓚᖃᕐᒥᓱᑎᒃ ᐅᖃᐅᓯᕐᑕᖏᓐᓃᑐᓂᒃ 37.5-ᒥ ᐅᕕᒐᕐᑐᐃᑦ ᓴᐳᒻᒥᔭᐅᒍᑎᖓᑕ ᐱᖁᔭᐅᑉ, ᐱᐅᔫᒐᓗᐊᕐᒪᖔᑕ ᓈᒻᒪᓈᕋᓗᐊᕐᒪᖓᑖᓘᓐᓃᑦ. ᐃᑉᐱᒋᔭᐅᓂᕐᐸᐅᓛᕐᖁᓕ ᑲᕙᒪᑐᖃᒃᑯᑦ ᓄᑭᖃᕈᑎᖃᕐᑐᕕᓂᐅᒐᓗᐊᕐᒪᖔᑕ ᐃᓕᑕᕐᓯᒍᓐᓇᓂᕐᒥᒃ ᐱᒍᓐᓇᐅᑎᖃᕐᒪᖔᑕ ᓄᓇᓕᑐᙯᑦ ᐊᖏᕈᑎᖃᕈᓐᓇᓂᕐᒥᒃ ᐱᖁᔭᓕᐊᕆᓯᒪᔭᒥᓂᒃ ᕿᑐᕐᖓᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑎᓅᓕᖓᔪᓂᒃ. ᒪᑭᕝᕕᒃ ᑲᒪᒋᔭᖃᕐᑐᖅ ᐅᒃᑯᐃᖔᕐᑎᓯᒐᓱᐊᕐᓂᒥᒃ ᓇᓪᓕᐊᒎᕆᐊᕈᑎᑦᓴᑕᖓᓂᒃ ᑖᑦᓱᒪ ᐱᖁᔭᐅᑉ. ᑲᒪᒍᓐᓇᓯᑎᑕᐅᓚᐅᔪᑦᓱᑎᒃ ᕕᐳᐊᕆ 25, 2020-ᒥ, ᒪᑭᕝᕕᒃ ᒪᓂᔨᓯᒪᕗᖅ ᑎᓯᒻᐸ ᐱᒋᐊᕐᖃᒥᐅᑎᓪᓗᒍ ᓱᕐᖁᐃᓯᑎᑦᓯᒍᑎᓂᒃ ᒪᑭᕝᕕᐅᑉ ᑐᓴᕐᑎᓯᓂᕕᓂᖓᓂᒃ ᐃᕐᖃᑐᐃᕕᒻᒥᒃ ᓄᓇᕕᒻᒥᐅᑦ ᐃᓄᐃᑦ ᓇᒻᒥᓂᖃᕐᓂᖏᓐᓂᒃ ᐊᑑᑎᓪᓚᕆᑦᓯᒪᔭᒥᓂᒃ ᐱᒐᓱᐊᒻᒪᕆᐅᑎᒋᔭᒥᓂᓪᓗ, ᐅᖄᖃᑎᒌᑦᑐᑦ ᐱᖁᔭᒻᒪᕆᓕᕆᕙᓪᓗᑐᐃᓐᓇᕋᔭᕐᑎᓗᒋᑦ ᐅᕝᕙᓘᓐᓃᑦ ᓄᓇᓕᑐᙯᑦ ᑕᑯᓐᓇᕈᓯᖏᓐᓂᒃ ᐅᖄᕙᓪᓗᑐᐃᓐᓇᕋᔭᕐᑎᓗᒋᑦ. ᓯᑦᑎᒻᐸ 2021-ᒥ ᐃᕐᖃᑐᐃᕕᓕᐊᕐᓯᒪᓛᕐᑐᑦ.
ᑐᑭᓯᒋᐊᑦᓯᐊᕕᑦᓴᖅ: ᒪᑭᕝᕕᐅᑉ ᐱᖁᔭᓕᕆᕕᖓ.
