ᒪᑭᕝᕕᒃ ᐅᒃᑯᐃᓯᓂᖃᓚᐅᔪᕗᖅ ᓄᓇᓕᓐᓂ ᐊᒃᓚᕕᖃᕐᕕᒋᕙᓐᓂᐊᓕᕐᑕᒥᑕ ᓯᕗᓪᓕᐹᖓᓂᒃ ᐅᒃᑯᐃᓚᐅᔪᔭᒥᓂᒃ ᖁᐊᕐᑕᒥ ᐁᕆᓕ 16-ᖑᑎᓪᓗᒍ, ᐅᒃᑯᐃᓯᓂᖃᕐᓂᒥ ᐃᑲᖓᔪᑯᑖᒥᒃ ᑭᐱᓯᓂᖃᓚᐅᔪᑦ. ᑖᓐᓇ ᐅᒃᑯᐃᓯᓂᖅ, ᐅᐸᑦᑕᐅᓯᒪᓚᐅᔪᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᓄᑦ ᐱᑕ ᐋᑕᒥᒧᑦ, ᒪᑭᕝᕕᐅᑉ ᐊᒃᓚᑎᒻᒪᕆᖓᓄᑦ ᐊᓖᓯᐊ ᐊᔭᒍᑕᕐᒧᑦ, ᐊᒻᒪᓗ ᖁᐊᕐᑕᒥᐅᑦ ᒪᑭᕝᕕᒥ ᑭᒡᒐᑐᕐᑎᖓᓄᑦ ᓄᐊ ᓂᖏᐅᕈᕕᒻᒧᑦ, ᑖᓐᓇ ᐅᒃᑯᐃᓯᓂᖅ ᐱᒋᐊᖕᖓᐅᑎᐅᓯᓚᐅᔪᕗᖅ ᒪᑭᕝᕕᐅᑉ ᓄᓇᓕᒻᒥ ᓴᕐᕿᔮᕐᓂᓴᐅᓂᕆᕙᓐᓂᐊᓕᕐᑕᖓᓂᒃ. ᓯᕗᓪᓕᐅᑐᐃᓐᓇᓱᓂ ᓄᓇᓕᓕᒫᓂ ᓄᐃᑕᓂᕐᓴᕈᕐᐸᓕᐊᓂᑦᓴᖏᑕ ᐸᕐᓇᑕ ᐅᒍᑎᖏᓐᓄᑦ, ᒪᑭᕝᕕᒃ ᓯᕗᓂᖃᕐᒪᑦ ᐃᓂᓪᓓᓂᖃᖃᑦᑕᓚᖓᓂᕐᒥᒃ ᐊᒃᓚᕕᖁᑎᒥᓂᒃ, ᖁᐊᕐᑕᒥ ᓯᕗᓪᓕᐹᑐᐃᓐᓇᐅᔪᖅ ᐊᒃᓚᕕᖁᑎᑖᖓᑦ ᐅᒃᑯᐃᑕᐅᓂᖃᕐᓱᓂ ᐃᓄᓕᒫᓄᑦ ᑕᑯᓐᓇᑕᐅᑦᓱᓂ. ᐱᖓᓲᔪᕐᑐᑦ ᐊᕐᕌᒍᕆᓚᐅᕐᑕᑎᓐᓂ ᓴᓇᔭᐅᓚᐅᕐᐳᑦ, ᐊᓯᒋᐊᓪᓚᖏᑦ ᐊᐅᔭᐅᓚᖓᔪᒥ ᓴᓇᔭᐅᓛᕐᒥᑎᓪᓗᒋᑦ.
ᖁᐊᕐᑕᒥᐅᑦ ᙯᕐᖂᑕᐅᓚᐅᔪᕗᑦ ᐃᓚᐅᔭᕐᑐᖁᔭᐅᑦᓱᑎᒃ ᓇᓪᓕᐅᓂᕐᓯᐅᕈᑎᓕᓐᓄᑦ ᐊᒻᒪᓗ ᑕᑯᓐᓇᖃᑕᐅᖁᑦᓱᒋᑦ ᐃᓕᑕᕆᔭᐅᓂᓕᒻᒥᒃ ᐱᒋᐊᕐᑎᓯᒍᑎᐅᓕᕐᑐᒥᒃ. ᓇᓪᓕᐅᓂᕐᓯᐅᑐᑦ ᐸᕐᓚᓚᐅᔪᑦ, ᖁᕕᐊᓱᒍᑎᐅᑦᓱᑎᒃ ᑕᑯᓐᓇᕆᐊᕐᓯᒪᔪᓄᑦ, ᓵᓚᖃᐅᑎᑕᖃᑦᑕᓚᐅᔪᒻᒥᓱᑎᒃᓗ ᒪᒪᕐᑐᑐᒪᑦᓱᑎᒃᓗ. ᐱᕕᖃᕐᑎᑕᐅᓚᐅᔪᒻᒥᔪᑦ ᕿᒥᕐᕈᓂᕐᒥᒃ ᐅᒃᑯᐃᑕᐅᕋᑖᕐᑐᒥᒃ ᐃᒡᓗᔪᐊᒥ ᐊᒻᒪᓗ ᖁᕝᕙᑎᕆᒍᑎᓕᐊᖑᒪᔪᓂᒃ ᐴᕐᑐᓯᒪᔪᓂᒃ ᐅᐱᒍᓲᓯᕐᑕᐅᓱᑎᒃ ᐃᓚᐅᔭᕐᑐᓯᒪᓂᕆᑫᓐᓇᑕᒥᓄᑦ ᓱᔪᖃᕐᓂᐅᔪᒧᑦ.
ᐃᓂᓪᓚᑕᐅᓂᖃᕐᓂᖓ ᒪᑭᕝᕕᐅᑉ ᐊᒃᓚᕕᖓᑕ ᖁᐊᕐᑕᒥ ᑕᑯᑦᓴᐅᑎᑦᓯᕗᖅ ᐊᖏᔪᑲᓪᓚᒥᒃ ᐱᔭᖃᕐᓯᒪᓕᕐᓂᖓᓂᒃ ᐱᓇᓱᒐᖃᕐᕕᐅᑉ ᑐᓂᒪᓂᕐᒥᒍᑦ ᓄᓇᓕᓐᓂᒃ ᓄᓇᓕᓕᒫᓂ ᐱᑦᔪᔨᒍᑎᒥᒍᑦ, ᓱᕐᖁᐃᑐᒥᒃ ᓂᑦᑕᓂᕐᓴᐅᓂᖃᓚᖓᓕᕐᓱᓂ ᐊᒻᒪᓗ ᓴᐳᑦᔨᓯᒪᓂᕐᓴᐅᓗᓂ ᓄᓇᓕᐅᑉ ᐱᕙᓪᓕᐊᑎᓯᔭᖏᓐᓂᒃ.
