ᐱᒍᑦᔨᓯᐊᕐᓂᓴᐅᒍᒪᒐᑦᑕ ᓄᓇᕕᒻᒦᑐᓂᒃ ᓄᓇᓕᓐᓂᒃ ᐊᓯᖏᓐᓂᓗ ᓄᓇᕕᒻᒦᖏᑦᑐᓂᒃ, ᑎᒻᒥᔫᕐᑖᖃᒻᒥᐅᓕᕐᖁᒍᑦ C-FTUZ-ᒥᒃ, ᐃᓄᐃᑦ ᖃᖓᑦᑕᔫᓕᕆᓂᖓᒍᑦ ᓯᕗᓪᓕᐹᑦᓯᐊᒥᒃ ᓄᑖᒥᒃ ᐳᔪᓕᒻᒥᒃ New Generation Boeing 737-800. ᑖᓐᓇ ᐃᓚᒋᔭᐅᓯᒻᒥᔪᖅ ᑎᒻᒥᔫᖁᑎᑦᑎᓄᑦ ᐅᓯᑦᑕᑎᑦᓴᓕ-ᐊᒍᓯᒪᑦᓱᓂ ᓄᐃᑕᑎᑕᐅᓯᒪᑦᓱᓂᓗ ᒪᓐᑐᕆᐊᓪᒥ ᑎᒻᒥᔫᒃᑯᕕᑦᑎᓂ ᑕᕐᓴᖁᑎᑦᑎᓂᒃ ᑕᕐᓴᖃᕐᓱᓂ. ᔪᓓᒥ ᐊᑐᕐᑕᐅᓯᒋᐊᕐᑐᕕᓂᖅ.
“ᐃᓄᐃᑦ ᖃᖓᑦᑕᔫᓕᕆᓂᖓᓄᑦ ᐃᓱᕐᕉᑎᑦᓯᐊᒍᕗᖅ ᓄᓇᕕᒻᒥᐅᓄᑦ, ᓄᐃᑦᓯᒍᑎᒋᓪᓚᕆᑦᓱᒍᓗ ᑌᒪᖕᖓᓕᒫᖅ ᐱᐅᓯᒋᐊᕐᑎᓯᒐᓱᐊᕐᓂᕆᓲᑦᑎᓂᒃ ᓄᑕᐅᓯᓕᕐᑎᕆᓂᕆᓲᑦᑎᓂᓪᓗ ᐊᐅᓪᓚᑲᑦᑕᓲᑦ ᑭᖕᖒᒪᒋᔭᖏᓐᓂᒃ ᐱᒍᑦᔨᒐᓱᐊᕐᓱᑕ ᐱᑦᔪᑎᑦᑎᓂᓪᓗ ᐱᓇᓱᐊᕐᓱᑕ ᑭᖕᖒᒪᒋᔭᐅᔪᓂᒃ ᐱᒍᑦᔨᔨᐅᒐᑦᑕ,” ᐅᖃᕐᑐᖅ ᑯᕆᔅᑎᐊᓐ ᐴᔅ, ᐃᓄᐃᑦ ᖃᖓᑦᑕᔫᓕᕆᓂᖓᑕ ᐊᖓᔪᕐᖄᖓ ᐊᐅᓚᑦᓯᔨᐅᑦᓱᓂᓗ ᐊᑦᑕᓇᕐᓯᑌᓕᑎᑦᓯᔨᐅᑦᓱᓂᓗ. “ C-FTUZ ᐱᖓᔪᒋᔭᐅᕗᖅ ᑌᒣᑦᑐᓄᑦ ᑎᒻᒥᔫᑦᑎᓄᑦ ᐱᑦᔪᑎᖃᕋᑦᑕ ᓯᓚᕐᔪᐊᒥ-ᐱᐅᓂᕐᐹᓂᒃ ᐃᓄᑦᑕᑎᖃᕈᒪᒐᑦᑕ ᐅᓯᑦᑕᑎᑲᕈᒪᑦᓱᑕᓗ ᓄᓇᓕᓐᓂ ᐱᒍᑦᔭᑎᓐᓂ, ᓴᐳᑦᔨᒍᒪᑦᓱᑕᓗ ᖃᖓᑦᑕᔫᓕᕆᓂᑦᑕ ᑐᕌᒐᖓᓂᒃ ᐳᔪᕐᓗᓕᐅᓪᓗᐊᑌᓕᒋᐊᖃᕐᓂᒧᑦ ᐃᑉᐱᒋᔭᖃᖃᑕᐅᓗᑕᓗ ᓯᓚᕐᔪᐊᒥ ᓯᓚᐅᑉ ᐊᓯᑦᔨᕙᓪᓕᐊᓂᖓᓂᒃ, 30%-ᒧᑦ ᐳᔪᕐᓗᓕᐅᖕᖏᓂᕐᓴᐅᒍᓐᓇᒪᑕ,” ᐅᖃᕆᐊᓪᓚᑐᖅ.
C-FTUZ ᐅᓯᑦᑕᑎᓕᐊᒍᓯᒪᔪᖅ ᐊᖏᔪᒥᒃ ᐅᒃᑯᐊᓕᐅᕐᑕᐅᓯᒪᑦᓱᓂ, ᐅᓯᒍᓐᓇᓱᓂ ᐅᖁᒣᓐᓂᓕᓐᓂᒃ 23,000 kilograms ᐃᖏᕐᕋᖃᑦᑕᓛᓗᓂ ᒪᓐᑐᕆᐊᓪᒥᑦ ᐃᓄᐃᑦ ᖃᖓᑦᑕᔫᓕᕆᓂᖓᑕ ᐅᓯᓕᕆᕕᖃᖓᓄᑦ ᑰᑦᔪᐊᒦᑦᑐᒧᑦ La Grande-ᓕᐊᖃᑦᑕᓗᓂᓗ ᐳᕕᕐᓂᑐᓕᐊᕈᓐᓇᓯᕋᑕᓛᕐᒥᓱᓂᓗ. ᒪᕐᕉᒥᔫᒃ ᑎᒻᒥᔫᒃ ᓯᓚᕐᔪᐊᓕᒫᒥ ᐊᑦᔨᖃᕋᑎᒃ ᑎᒻᒥᔫᒍᓛᕐᑑᒃ B737-800NG combis – ᓄᑕᐅᓯᓕᕐᑎᓯᒪᔭᒋᒃ ᐃᓄᐃᑦ ᖃᖓᑦᑕᔫᓕᕆᓂᖓᑕ ᐊᑦᑕᓀᑦᑐᓯᐊᒍᖁᔨᒐᒥᒃ, ᐃᓱᕐᕆᓯᐊᖁᔨᑦᓱᑎᓪᓗ ᐃᑯᒪᓲᓂᒃ ᐅᓯᒍᑦᔨᓯᐊᖃᑦᑕᕈᒪᑦᓱᑎᓪᓗ ᑕᕝᕘᓇᑦᓭᓇᖅ – ᔫᓂ 2025-ᒥ ᐊᑐᕈᓐᓇᓯᓛᕈᒪᔭᕗᑦ. ᓄᑕᐅᓯᓕᕐᑎᕆᓂᕐᒥᒃ ᑎᒻᒥᔫᖁᑎᑦᑎᓂᒃ ᐱᓇᓱᒍᑎᑦᑎᓄᑦ ᐃᓚᐅᑎᓪᓗᒍ, ᑖᒃᑯᐊ ᐱᖓᓱᑦ ᓄᑖᑦ ᑎᒻᒥᔫᑦ ᐊᓯᑦᔩᒍᑎᐅᕋᑕᓛᕐᑐᑦ ᑎᒻᒥᔫᖁᑎᑐᖃᑦᑎᓂᒃ B737-200s.
ᓯᕗᓪᓕᐹᒥᒃ ᐅᓯᑕᕐᑎ ᑎᒻᒥᔫᖅ ᓄᓇᕕᓕᐊᕐᑐᕕᓂᖅ: ᑲᑐᑦᔮᕆᔭᐅᑦᓱᓂ
ᓄᑖᒥᒃ ᑎᒻᒥᔫᕐᑖᕈᓐᓇᓯᓚᐅᔪᕗᒍᑦ ᑲᑐᑦᔮᕆᔭᐅᓪᓚᕆᑦᑎᓗᒍ ᐃᓄᐃᑦ ᖃᖓᑦᑕᔫᓕᕆᓂᖓᑕ ᐱᓇᓱᖃᑎᒌᑦᑐᖁᑎᖏᓐᓄᑦ, ᑲᑐᑦᔨᒍᑎᖃᓚᐅᔪᒻᒪᑕ ᐊᑐᐃᓐᓇᕈᕐᑎᕆᑦᓱᑎᒃ C-FTUZ -ᒥᒃ ᐃᖏᕐᕋᕈᓐᓇᓯᖁᑦᓱᒍ ᓯᕗᓪᓕᐹᒥᒃ ᐅᓯᑕᓛᕐᓗᓂ ᑰᑦᔪᐊᒧᑦ ᔪᓓ 16-ᒥ. ᑎᒻᒥᔫᕐᑏᑦ ᐊᖁᑦᑎᒪᕆᖓ ᐋᓐᑐᔫ ᑯᐊᑕ, ᑖᑦᓱᒥᖓ ᓯᕗᓪᓕᐹᒥᒃ ᐃᖏᕐᕋᓯᔪᒥᒃ ᑎᒻᒥᔫᒥᒃ ᐊᖁᑦᑐᕕᓂᖅ ᑎᒻᒥᔫᕐᑎᐅᖃᑎᖃᕐᓱᓂ ᑲᓀᑎᐊᓐ ᓄᐊᑦᑯᑦ ᑎᒻᒥᔫᕐᑎᐅᒋᐅᕐᓴᑐᓂᒃ ᐃᓕᓭᔨᖓᓂᒃ Trevor Narraway-ᒥᒃ, ᐅᖃᕐᑐᖅ, “ᑲᔪᓯᑎᑕᐅᑦᓯᐊᓂᖃᓚᐅᔪᕗᖅ ᓯᕗᓪᓕᐹᒥᒃ ᐃᖏᕐᕋᓱᓂ ᐱᒐᓱᐊᒻᒪᕆᓚᐅᔪᒻᒪᑕ ᐱᓇᓱᖃᑎᒌᑦᑐᑦ ᐊᕐᕌᒍᓂ ᐊᓂᒍᕐᖃᒥᕐᓂ, ᐃᑲᔪᕐᑎᒋᖃᑦᑕᓱᒋᑦ ᐱᓪᓗᑯᒋᐊᓕᑦᑕᖏᓐᓂᒃ ᐃᓕᑦᓯᕙᓪᓕᐊᑎᓪᓗᖓ ᐊᒻᒪᓗ ᑎᒻᒥᔫᑦ 200-ᒦᑦᑐᓂᒃ ᓇᓗᓀᒃᑯᑕᓖᑦ ᐅᓪᓗᑕᒫᑦ ᐊᐅᓚᑕᐅᒋᐊᖃᕐᓂᖏᓐᓂᒃ 800-ᒥᒃ ᓇᓗᓀᒃᑯᑕᓕᒃ ᐱᓇᓱᐊᕐᑕᐅᓂᖓᓂ – ᐃᑲᔪᕐᑎᒋᖕᖏᑯᒃᑭᑦ ᑕᒪᓐᓇ ᐱᒍᓐᓇᓯᒐᔭᓚᐅᔪᖕᖏᓇᒃᑯ !,” ᐅᖃᕐᑐᖅ ᑎᒻᒥᔫᕐᑎ. “ᓱᓇᓕᒫᑦ ᐊᑐᐃᓐᓇᕈᕐᒪᑕ ᓗᐃ (ᓭᒪᓐᓗ), (Trevor Narraway-ᓗ) ᐅᕙᖓᓗ ᔪᓓ 16-ᒥ ᑎᒻᒥᔫᓯᓚᐅᔪᕗᒍᑦ. ᐃᑉᐱᓇᓕᓚᐅᔫᖅ ‘ᐱᔭᖃᕐᓂᕗᑦ!’ ᕿᓚᓈᕐᑐᒪᕆᐅᓕᕐᓱᑕᓗ ᑲᑎᓯᓛᕐᓂᑎᓐᓂᒃ ᐃᑭᒪᔪᑦᓴᓂᒃ 800-ᒥᒃ ᓇᓗᓀᒃᑯᑕᓕᒻᒥ ᐅᓯᑕᑎᐅᑦᓱᓂᓗ ᐃᓄᑦᑕᐅᑎᐅᑦᓱᓂᓘᕐᑐᒥᒃ ᐊᐅᔭᐅᓛᕐᑐᖅ, ᐅᐱᕐᖔᒍᓛᕐᑐᖅ,” ᐅᖃᕐᑐᕕᓂᖅ.
