ᐊᒃᓚᑕᖏᑦ ᓯᑏᕙᓐ ᕿᐊᓐᑐᕆᐅᑉ
ᑲᓇᑕᓕᒫᒥ ᓄᓇᖃᕐᖃᓯᒪᔪᑦ ᐅᒃᓗᖓᓐᓂᒃ ᑕᒃᒐᓂ ᐊᕐᕌᒍᒥ, ᐳᑐᓕᒃ ᐃᓕᓰᑦᑐᒥᒃ ᑫᕙᓪᓚᒍᓯᓕᒫᑉ ᐅᖓᑖᓄᑦ ᐅᖄᓚᐅᑎᒃᑯᑦ ᐅᖃᖃᑎᖃᓚᐅᔪᕗᖓ. ᓴᓪᓗᓂ ᐊᓂᕐᕋᓯᒪᓚᐅᔪᔪᖅ. ᐳᑐᓕᒃ ᐊᑯᓂᒍᓗᒃ ᖃᐅᔨᒻᒫᕆᓕᕐᑕᕋ ᑌᒪᖕᖓᑦ ᐊᕐᕌᒍᐃᑦ 1990-ᓂᑦᑐᑦ ᐱᒋᐊᕐᖃᒥᐅᓕᓚᐅᕐᓯᒪᒻᒪᑕᓂᑦ ᑌᑦᓱᒪᓂ ᓱᓕ ᒪᑭᕝᕕᒧᑦ ᐱᓇᓱᑦᑎᐅᓱᖓ ᑐᓴᖃᑦᑕᐅᑎᒍᑎᓕᕆᓂᕐᒥ. ᐱᓇᓱᑦᑎᐅᓱᓂ ᑕᕐᕋᒥᐅᑦ ᓂᐱᖓᑕ ᓈᓚᐅᑎᒃᑯᑎᑦᓯᕕᖓᓄᑦ, ᐅᖄᓚᕙᓚᐅᕐᑐᖅ ᐊᐱᕐᓱᓂᑦᓴᒥᓂᒃ ᐸᕐᓇᑕᐅᖁᔨᑦᓱᓂ ᐊᐱᕐᓱᕈᒪᑦᓱᓂ ᓵᓕ ᒍᐊᕐᒥᒃ, ᐅᕝᕙᓘᓐᓃᑦ ᔦᐱᑎ ᓄᖕᖓᒥ, ᐅᕝᕙᓘᓐᓃᑦ ᐱᑕ ᐋᑕᒥᒥᒃ. ᑭᖑᓂᖓᓂ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓄᑦ ᐱᓇᓱᓕᕐᒥᑎᓪᓗᖓ, ᐊᐱᕐᓱᕈᒪᖃᑦᑕᓯᓚᐅᕐᓯᒪᒻᒥᔪᖅ ᔫᓯ ᑯᓱᒐᕐᒥᒃ, ᐅᕝᕙᓘᓐᓃᑦ ᒥᐊᔨ ᓭᒪᓐᒥᒃ.
ᐳᑐᓕᖕᒥᒃ ᐃᓱᒪᓱᑐᖃᐅᔪᖓ ᓲᕐᓗ ᐊᒥᓱᓂᒃ ᐱᒐᓱᒍᓐᓇᑕᖃᑦᓯᐊᕆᐊᖓ – ᐃᓅᑦᓱᓂ ᐊᒥᓱᓂᒃ ᐱᒐᓱᒍᓐᓇᓱᓂ ᐊᒥᓱᓂᓪᓗ ᐱᒍᓐᓇᑕᖃᑦᓯᐊᓱᓂ, ᑐᓂᕐᕈᓯᐊᕐᓯᒪᑦᓱᓂ ᐱᒋᐅᕐᓯᒪᑦᓱᓂᓗ ᐊᒥᓱᓂᒃ ᐱᒐᓱᑦᑕᐅᓲᓂᒃ. ᑌᒣᑦᑐᒋᐊᖓ ᑕᑯᓪᓚᕆᑦᓯᒪᔭᕋ ᐊᐱᕐᓱᓂᖃᕐᓱᖓ. ᐊᐱᕆᒋᐊᖕᖓᓚᐅᔪᒐᒃᑯᑦ ᖃᓄᖅ ᐃᓱᒪᒋᔭᖃᕐᒪᖔᑦ ᑲᓇᑕᓕᒫᒥ ᓄᓇᖃᕐᖃᓯᒪᔪᑦ ᐅᒃᓗᖃᕐᑎᑕᐅᒍᑎᖓᓐᓂᒃ.
ᐅᖃᓚᐅᔪᔪᖅ ᐃᒣᓕᑦᓱᓂ “ᑐᑭᖃᑦᓯᐊᑐᒻᒪᕆᐅᕗᖅ ᐃᓚᒋᔭᐅᒋᐊᒥᒃ ᓇᓗᓀᕐᑕᐅᓂᖃᓕᕐᑐᓄᑦ ᐃᓅᖃᑎᒌᓄᑦ,”. ᐃᓕᑕᕆᔭᐅᓂᕐᑕᓂᕐᓴᐅᓱᓂ ᑭᓇᐅᓂᒃᑯᑦ, ᓇᑭᓪᓗ ᐱᓯᒪᓂᒃᑯᑦ. ᐃᑲᔪᕐᓯᓂᖃᕐᑐᕆᔭᕋᓕᒃ ᓄᓇᓕᑐᖃᓕᒫᓂᒃ ᐃᓕᑕᕆᐅᔭᓕᐅᒥᑎᑦᓯᓂᕐᒥᒍᑦ.”
ᐳᑐᓕᒃ, ᓴᓪᓗᓂ ᐃᓅᓕᕐᓯᒪᔪᖅ ᒣ 1957-ᖑᑎᓪᓗᒍ, ᓄᓇᒦᑦᓱᑎᒃ ᐃᓅᓕᕐᑐᕕᓂᖅ “ᕿᑎᕐᖃᖓ ᐃᒃᓗᕕᒐᕐᒥᒃ, ᕿᑎᕐᖃᖓ ᑐᐱᕐᒥ.” ᐊᓈᓇᖃᓚᐅᔪᔪᖅ ᓲᓯ ᐃᓕᓯᑦᑐᒥᒃ ᐊᑖᑕᖃᕐᓱᓂ ᑏᕕ ᐃᓕᓰᑦᑐᒥᒃ. ᐅᖃᕐᑐᖅ ᐃᒫᒃ “ᐅᒃᐱᕈᓱᒍᑎᖃᕐᐳᖓᓕ ᐱᔪᓐᓇᓂᖃᕆᐊᕐᒪᑦ ᐱᓯᒪᔭᒃᑲᓂᒃ ᐊᑖᑕᒐᓂᑦ, ᐊᑖᑕᒐ ᖁᓪᓕᓴᔭᓂᒃ ᓴᓇᖕᖑᐊᑎᐅᓚᐅᔪᒻᒪᑦ ᑕᑯᒥᓇᕐᑐᓕᐅᕐᓯᑎᐅᑦᓱᓂ. ᓴᓇᖕᖑᐊᖃᑦᑕᓚᐅᔪᔪᖅ ᑕᑯᑦᓴᐅᑎᑦᓯᔪᓂᒃ ᐃᓄᑐᐃᓐᓀᑦ ᐃᓅᓯᕆᓯᒪᔭᖏᓐᓂᒃ. ᑖᒃᑯᐊ ᐱᔪᓐᓇᓂᖃᕈᑎᒋᓚᐅᔪᔭᖏᑕ ᐃᓚᖏᓐᓂᒃ ᐱᔪᓐᓇᓂᖃᕋᓱᒋᕗᖓ, ᐅᕙᖓᓕ ᑭᓯᐊᓂ ᐊᒃᓚᐅᑎᓄᑦ ᐊᒃᓚᖑᐊᕐᐸᑐᖓ ᒥᖑᐊᕐᓯᒪᔪᓕᐅᕐᓱᖓᓗ.”
ᐳᑐᓕᒃ ᐃᓅᓕᕐᑎᓗᒍ, ᓴᓪᓗᐃᑦ ᖃᓪᓗᓈᓄᑦ ᐊᑦᓯᕋᐅᑎᖃᕐᑎᑕᐅᓯᒪᔪᖅ “ᓴᒃᓚᒃ-ᒥᒃ” ᑌᒣᓕᔭᐅᖃᑦᑕᓯᒪᕗᕐᓗ ᑌᑦᓱᒪᓂ ᖃᓪᓗᓈᑦ ᐅᖃᑦᓯᐊᕈᓐᓇᓚ-ᐅᕐᓯᒪᖕᖏᒪᑕ ᐃᒫᒃ “ᓴᓪᓗᐃᑦ.”
“ᐱᕈᕐᓴᓱᖓ ᓱᕈᓯᖕᖑᓯᒪᓕᕐᑎᓗᖓ, ᓄᓇᓕᕗᑦ ᒥᑭᔪᐊᐱᐅᓯᒪᔪᖅ. ᐃᓄᖏᑦ ᐅᓄᕐᓂᖃᓚᐅᕐᓯᒪᔪᑦ ᒥᑦᓯᑎᓐᓂ 300 1960-ᓃᑦᑐᑦ ᐊᕐᕌᒍᐃᑦ ᐱᒋᐊᕐᑎᓗᒋᑦ. ᓄᑕᕌᐱᐅᑎᓪᓗᖓ ᐃᒃᓗᕕᒐᕐᒥᐅᖑᕙᓐᓂᖅ ᐊᓯᐅᕙᓪᓕᐊᓕᓚᐅᕐᓯᒪᔪᖅ. ᕿᔪᓐᓂᒃ ᐃᒃᓗᔪᐊᓕᐅᖃᑦᑕᕙᓪᓕᐊᓕᓚᐅᕐᓯᒪᒻᒪᑕ, ᓯᕗᓪᓕᐹᕐᓗ ᑲᕙᒪᑐᖃᑯᑦ ᐃᓕᓐᓂᐊᑎᑦᓯᕕᖁᑎᖓᑦ ᓇᑉᐸᑕᐅᒋᐊᖕᖓᓚᐅᕐᓯᒪᑦᓱᓂ.”
ᐅᓂᒃᑲᑐᖅ ᐃᓕᓐᓂᐊᕕᒃ ᐊᑕᐅᓯᕐᒥ ᖃᕆᐊᕌᓗᖃᕐᓯᒪᒋᐊᖓ. ᐊᓂᕐᕋᖓᑦᑕᐅᖅ ᑌᒣᑦᑐᓯᒪᒻᒥᔪᖅ, ᐊᑖᑕᖓᑕ ᐃᒃᓗᓕᐊᕕᓂᖓ. “ᐃᒃᓗᐊᐱᐅᓯᒪᔪ ᖃᕆᐊ-ᖃᖕᖏᑑᑦᓱᓂ. ᑭᐊᒃᓴᐅᑎᐅᑉ ᓴᓂᐊᓂ ᐃᑦᓯᕙᖃᑦᑕᓯᒪᔪᖓ ᐅᕐᖂᔪᒦᒐᓱᐊᒧᑦ. ᑲᕙᒪᑐᖃᒃᑯᑦ ᐃᒃᓗᓕᐊᕆᒋᐊᖕᖓᓯᒪᔭᖏᑦ ᑌᔭᐅᒍᑎᖃᖃᑦᑕᓯᒪᔪᖅ ‘ᒫᑦᓯᑎᖃ-ᐅᑎᑦᓴᔭᐅᓂᕋᕐᑕᐅᓱᑎᒃ‘ ᑮᑕ ᓴᓇᒪᓚᐅᔪᒐᒥᒃ ᓯᒃᑭᑕᑯᑖᖑᑦᓱᑎᒃ. ᐊᑖᑕᒐ ᑌᒣᑦᑐᒥᒃ ᐃᒃᓗᓕᐅᓚᐅᕐᓯᒪᔪᖅ ᒪᕐᕉᓂᒃ ᐊᖑᑎᐅᖃᑎᒥᓂᒃ ᐃᑲᔪᕐᑎᖃᕐᓱᓂ, ᐊᓂᕐᕋᓴᑦᑎᓂᒃ ᓴᓇᑦᓱᑎᒃ.”
ᑲᕙᒪᑐᖃᒃᑯᑦ ᐃᓕᓐᓂᐊᕕᖁᑎᖓᓐᓄᑦ ᐃᓕᓐᓂᐊᕆᐊᖃᑦᑕᓯᓚᐅᕐᓯᒪᔪᖅ ᑕᓪᓕᒪᓂᒃ ᐅᑭᐅᖃᕐᓱᓂ. “ᐃᓕᓐᓂᐊᕕᒻᒥ ᖃᓪᓗᓈᕐᑎᑐᑦ ᑭᓯᐊᓂ ᐅᖃᐅᓯᕐᒥᒃ ᐃᓕᓴᕐᑕᐅᓱᓂ. ᑌᓱᒪᓂ ᓱᓕ ᒍᐃᒍᐃᑎᑐᑦ ᐃᓕᓐᓂᐊᑎᑦᓯᔨᖃᕋᑕᓚᐅᕐᓯᒪᖕᖏᒪᑦ. ᒍᐃᒍᐃᑎᑐᑦ ᐃᓕᓐᓂᐊᑎᑦᓯᒍᓰᖅ ᑐᓴᕐᑕᐅᒋᐅᓚᐅᕐᓯᒪᒻᒪᑕ 1966-ᒥᓗᓐᓃᑦ 1967-ᒥᓗᓐᓃ. ᐊᐅᓚᔨᔪᖓ ᐃᓕᓐᓂᐊᑎᑦᓯᔨᒋᒋᐊᖕᖓᓯᒪᔭᕋᓂᒃ ᒥᔅ ᒪᒃᐋᑕᒥᒃ.” ᐅᖃᕐᐳᓗ ᑌᑦᓱᒪᓂᑦᓴᐅᑎᒋᒃ ᑕᑯᒥᓇᕐᑐᓕᐅᕐᓂᒥᒃ ᐃᓕᓴᕐᑕᐅᓯᔪᕕᓂᐅᒋᐊᒥᒃ, ᑌᒪᖕᖓᒥᓪᓗ ᑕᒪᑐᒥᖓ ᐱᒐᓱᒍᓐᓇᓂᖃᑦᓯᐊᐳᖅ.
ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑕᕐᓴᖁᑎᑦᓴᒥᓐᓂᒃ ᐱᓕᐅᑦᔨᒍᑎᖃᕐᑎᓗᒋᑦ 2001-ᖑᑎᓪᓗᒍ ᓴᕐᕿᑎᑦᓯᑎᑦᓯᒐᓱᑦᓱᑎᒃ ᐅᒃᓗᒥᓯᐅᑎᐅᓂᕐᓴᒥᒃ ᑕᕐᕋᖁᑎᑦᓴᖓᓂᒃ ᑲᓇᑕᓕᒫᒥ ᐃᓄᑐᐃᓐᓀᑦ ᐱᓇᓱᒐᖃᕐᕕᖁᑎᖓᑕ, ᐳᑐᓕᒃ ᐊᒃᓚᖑᐊᕐᑕᕕᓂᕐᒥᓂᒃ ᑐᓂᔨᓚᐅᕐᓯᒪᔪᖅ ᓄᐃᑕᑎᑦᓯᔪᒥᒃ ᓯᑕᒪᓂᒃ ᐃᓄᑐᐃᓐᓇᓂᒃ ᑕᓯᐅᖃᑎᒌᑦᑐᖑᐊᓂ, ᑕᑯᑦᓴᐅᑎᑦᓯᒍᑎᐅᑦᓱᓂ ᐊᑕᐅᓯᐅᖃᑎᒌᓐᓂᖏᓐᓂᒃ, ᐃᓄᑐᐃᓐᓀᑦ ᓄᓇᖓᓐᓂᒃ ᐊᕙᓗᐃᒪᑦᓱᑎᒃ, ᐱᓕᐅᑦᔭᐅᒍᑎᒥᒃ ᓵᓚᖃᓚᐅᕐᓯᒪᔪᖅ.
ᐱᐅᓯᑐᐃᓐᓇᒥᒍᑦ ᐱᔭᖃᕋᓱᒍᒪᓯᒪᔪᖅ ᓈᓚᐅᑎᒃᑯᑐᓕᕆᓂᕐᒥᒃ. ᓴᓪᓗᐃᑦ ᑎᒃᑯᐊᑕᐅᓚᐅᕐᓯᒪᒻᒪᑦ ᓯᕗᓪᓕᐸᖑᓗᓂ ᑕᓚᕖᓴᑎᒍᑦ ᑕᑯᓐᓇᕋᑦᓴᓕᐅᕐᕕᒥᒃ ᐱᑦᔪᔨᕕᖃᕕᐅᓚᖓᓕᕐᓱᓂ, ᓯᕗᓪᓕᐹᖑᑦᓱᓂ ᓄᓇᕕᒻᒥ ᑌᒣᓘᕐᕕᓕᐊᖑᓚᖓᔪᒥᒃ. ᐳᑐᓕᒃ ᐃᓚᒋᔭᐅᓯᒪᔪᖅ 15-ᓄᑦ ᐃᓄᑐᐃᓐᓇᓄᑦ ᐱᒋᐅᕐᓴᔭᐅᒍᑎᖃᓯᔪᓄᑦ ᑕᓚᕖᓴᒃᑯᑦ ᓄᐃᑕᔪᑦᓴᓕᐅᕐᓂᒥᒃ ᐱᒋᐅᕐᓴᔭᐅᒍᑎᖃᓯᑦᓱᑎᒃ 1979-ᖑᑎᓪᓗᒍ.
“ᐃᓕᑦᓯᑎᑕᐅᒍᑎᖃᕐᓯᒪᔪᒍᑦ ᐱᓇᓱᒐᕐᒥᒃ ᐊᑦᔨᓕᐅᕆᔨᐅᓂᕐᒥᒃ ᖃᓄᕐᓗ ᑕᓚᕖᓴᒃᑯᑐᑦᓭᑦ ᓄᐃᑕᔪᑦᓴᓕ ᐊᖑᓱᖑᒻᒪᖔᑕ. ᐱᒍᓐᓇᓯᑦᓯ ᐊᑐᒻᒪᕆᐅᓯᒪᔪᒍᑦ, ᐊᐱᕐᓱᐸᓕᓚᐅᕐᐳᒍᓪᓗ ᒪᙯᖃᑕᐅᖃᑦᑕᕈᒪᑦᓱᑕ, ᐃᖃᓪᓕ ᐊᖃᑕᐅᓗᑕ ᓗ, ᓇᑦᓴᓯᓗᑕ ᑕᓚᕖᓴᒃᑯᑐᑦᓴᓕᐅᕈᑎᒥᒃ ᐊᑦᔨᓕᐅᕆᒍᑎᒥᒃ. ᑐᑭᓯᑎᑕᐅᒍᑎᖃᓚᐅᕐᓯᒪᒋᕗᒍᓪᓗ ᐊᓯᖏᓐᓂᒃ ᓄᓇᕕᐅᑉ ᓄᓇᓕᖏᓐᓂᒃ, ᑕᑯᖃᑦᑕᓕᕐᓱᑕᓗ ᐊᓯᖏᓐᓂᒃ ᑕᕐᕋᓕᔮᒐᓕ-ᐊᖑᓯᒪᔪᓂᒃ ᐊᒻᒪᓗ ᑕᑯᓐᓇᕋᑦᓴᔭᓕ ᐊᖑᓯᒪᔪᓂᒃ ᓄᐃᑕᐅᖃᑦᑕᓯᒪᔪᓂᒃ ᐊᓯᓂ ᓄᓇᓕᓐᓂ, ᑕᒪᒃᑯ ᐊ ᐅᓇᒻᒥᓇᕐᓯᕙᓪᓕ ᐊᑐᐃᓐᓇᓕᕐᓯᒪᔪᑦ.”
ᐊᐱᕆᓕᓚᐅᔪᒋᕙᕋ ᓇᓪᓕᖏᓐᓂᒃ ᐱᔪᕆᒪᒍᑎᖃᕐᓂᐹᖑᒻᒪᖔᑦ ᑕᓚᕖ-ᓴᒃᑯᓗᓐᓃᑦ ᓈᓚᐅᑎ ᑎᒍᓪᓗᓃᑦ ᐅᓂᒃᑲᐅᓯᕐᓂᒃ ᐱᓇᓱ ᖃᑦᑕᓯᒪᔭᖏᓐᓂᒃ ᐊᕐᕌᒍᕐᓂ 31-ᓂ ᑕᕐᕋᒥᐅᑦ ᓂᐱᖓᓐᓄᑦ ᐱᓇᓱᑦᑎᐅᓱᓂ. “ᑭᐅᓚᐅᔪᔮᖓ ᐁᕝᕙᓂ ᐊᕆ ᐊᕐᓱᑎᒃ ᒪᙯᓚᐅᕐᓂᕕᓂᕐᒥᓂᒃ ᐊᑦᔨᓕ ᐅᕆᔨᐅᖃᑎᖓ ᐋᑕᒥ ᓴᕕ ᐊᑦᔪᒃ ᒪᓕᑦᑎᓗᒍ. ᐊᑐᓂᑦ ᐊᑦᔨᓕ ᐅᕈᑎᑦᓯ ᐊᒪᕆ ᐊᓗᓐᓂᒃ ᐊᑦᔨᓕᐅᕈᑎᒃᑭᓯᒪᔪᒍᒃ. Beaulieu-ᒥᑦ ᑌᔭᐅ ᒍᓯᓖᓐᓂᒃ, ᑖᒃᑯ ᐊᓗ ᑕᒪᕐᒥᒃ ᓂᐱᓂᒃ ᓂᐱᓕᐅᕆᒍᓐᓇᑐᐃᓐᓇᐅᓱᑎᒃ, ᓚᑦᓱᓂ ᐅᖃᕐᑐᖅ ᐳᑐᓕᒃ. “ᒪᕐᕈᐃᖑᓯᒪᒻᒪᑎᒃ ᐅᒥ ᐊᒻᒪᕇᒃ ᐁᑉᐹᓂ ᐅᒥ ᐊᓕᒃᑕᓕᖕᒥ ᔩᒥ ᖃᕐᖄᔪᖕᒥᒃ ᐃᑭᒪᓚᐅᕐᓯᒪᔪᖓ, ᐊᒻᒪᓗ ᐋᑕᒥ ᓵᒥ ᑫᑦᑕᒥᒃ ᐅᒥ ᐊᓕᒃᑕᓕᖕᒥᒃ ᐃᑭᒪᑎᓪᓗᒍ, ᐃᓄᑐᖃᐅᓯᒪᔪᒥᒃ. ᐊᓐᓂᑐᑦᓯ ᐊᓚᐅᕐᓯᒪᔪᒍᑦ, ᐅᑭᐅᖑᑎᓪᓗᒍ 1981-ᒥ ᑐᑦᔮᔪ ᐊᑦ ᕿᑭᕐᑕᖏᓐᓂ ᑕᐅᓇᓂ ᓄᕗ ᐊᓘᑉ ᐃᒪᖓᓂ.”
ᑕᒪᒃᑯᐊ ᐱᓇᓱᑦᑕᐅᒍᑎᖏᓐᓄᑦ ᐳᑐᓕᒃ ᐋᑐᒑᓕᐊᓚᕿᓚᐅᕐᓯᒪᒻᒥᔪᖅ, ᑕᑯᓐᓇᕋᑦᓴᓕᐊᕕᓂᕐᒥᓂᒃ ᓇᑲᑎᕆᒋᐊᕐᑐᓱᓂ CJOH-ᑯᑦ ᑕᓚᕖᓴᒃᑯᑐᑦᓴᓕᐅᕐᕕᖓᓂ, ᐱᓇᓱᐊᕈᓯᓕᒫᒥ ᐱᓇᓱᑦᓯᒪᔭᖏᑦ.
ᓄᓇᕕᖕᒥ ᑐᓴᕋᑦᓴᓕᕆᒍᑎᓂᒃ ᐱᓇᓱᒐᖃᕐᑎᐅᖃᑎᒋᒃ ᐋᓕᒃ ᑯᐊᑕᓗ, ᓵᓕ ᓯᕐᐸᓗᒃᓗ, ᓯᐱᓯᒃᑯᑦ ᓈᓚᐅᑎᒃᑯᑐᓕᕆᕕᖓᓐᓂ ᑰᒃᔪᐊᒦᑦᑐᒥ ᐅᓂᒃᑲᐅᓯᑦᓴᖃᓚᐅᔪᒻᒥᔫᒃ ᐳᑐᓕᖕᒥᒃ. “ᐱᓇᓱᒍᑦᔭᐅᒍᑎᑦᓴᑎᓐᓂᒃ ᐁᑦᑐᓚ-ᐅᕐᓯᒪᒻᒥᔭᕗᑦ ᐃᓄᑐᖃᕐᓂᒃ ᓂᐱᓕᐅᕆᖃᑦᑕᖁᑦᓱᒍ,” ᐅᖃᕐᑐᖅ ᐋᓕᒃ ᑯᐊᑕ, ᑐᑦᑕᕕᐅᑉ ᑐᓴᕋᑦᓴᓂᐊᕐᑎᖁᑎᖓ. ” 1995 ᐊᕐᕌᒍᖓᑕ ᒥᑦᓯᑎᓐᓂ. ᐊᒥᓱᑲᓪᓚᒍᓗᓐᓂᒃ ᐃᓄᑐᖃᕐᓂᒃ ᓂᐱᓕᐅᕆᓯᒪᔪᖅ, ᐅᒃᓗᒥᐅᓕᕐᑐᖅ ᐃᓅᒍᓐᓀᓯᒪᓕᕐᑐᓂᒃ.”
ᓵᓕ ᓯᕐᐸᓗᒃ ᑕᕐᕋᒥᐅᑦ ᓂᐱᖓᓐᓂ ᐱᓇᓱᖃᑎᖃᖃᑦᑕᓯᒪᔪᖅ ᐳᑐᓕᖕᒥᒃ. ᐃᓇᖐᒪᑦᓱᓂ ᑐᓴᕐᓴᐅᑎᑦᓯᖃᑦᑕᓯᒪᔪᖅ ᑰᒃᔪᐊᒥ ᓰᐱᓰᒃᑯᓃᑦᓱᓂ. ᐊᐅᓚᔨᑦᓯᐊᑐᖅ ᐁᕝᕙᓂᐊᕆᐊᕐᑐᑦ ᐅᓂᒃᑲᐅᓯᖏᓐᓂᒃ ᑕᑯᓐᓇᕋᑦᓴᓕᐊᖑᒪᔪᓂᒃ “Super-8” ᑕᕐᕋᓕᔮᒐᓕᐅᕈᑎᒃᑯᑦ. “ᑖᒃᑯᐊ ᐳᑐᓕᐅᑉ ᐊᑦᔨᓕᐊᕕᓂᖏᑕ ᐱᐅᓂᕐᐹᖑᖃᑎᖏᑦ. ᐊᑦᔨᓕᐅᕆᓯᒪᑦᓯᐊᑐᒻᒪᕆᐅᓯᒪᒻᒥᓱᓂᓗ ᐃᕗᔨᕕᒻᒥᐅᓂᒃ ᐊᖑᓇᓱᑦᑎᓂᒃ, ᓇᑦᓯᓂᐊᕐᑎᓗᒋᑦ ᓇᐅᒃᑯᑎᓄᑦ. ᐳᑐᓕᒃ ᐊᔪᖕᖏᓯᐊᕐᑐᒥᒃ ᐱᔪᓐᓇᓂᖃᕐᑐᖅ,” ᐅᖃᕐᑐᖅ ᓵᓕ. “ᓄᐃᑦᓯᖃᒻᒥᐅᒥᔪᖅ ᓄᑖᓂᒃ ᓂᑦᔭᓗᑦᑖ-ᕈᓯᕐᓂᒃ, ᐊᑐᐊᒐᓕᐅᕐᓯᒪᒻᒥᓱᓂᓗ ᓴᓪᓗᐃᑦ ᐃᓄᖏᑕ ᐅᓂᒃᑲᐅᓯᖏᓐᓂᒃ ᐊᑦᓯᕋᐅᑎᓕᐅᕐᓯᒪᔭᒥᓂᒃ ᐃᓄᑐᐃᓐᓇᐅᕗᒍᑦ.”
ᐳᑐᓕᒃ ᐅᖃᓚᐅᔪᔪᖅ ᐊᑐᐊᒐᓕᒥᓂᒃ ᐱᔭᕇᕐᑐᕕᓂᐅᓂᕋᕐᓱᓂ ᑕᓚᕖᓴᒃᑯᑐᓴᓂᒃ ᐊᕐᕌᒍᕐᓂ 18-ᓂ ᐱᓇᓱᖃᑦᑕᓚᐅᕐᓱᓂ ᑕᕐᕋᒥᐅᑦ ᓂᐱᖓᓐᓂ. “ᐊᑐᐊᒐᓕᐅᕐᐸᓕᐊᓯᓚᐅᕐᓯᒪᕗᖓ ᓴᓪᓗᒥᐅᓂᒃ ᐃᓄᑐᖃᕐᓂᒃ ᐊᐱᕐᓱ ᖃᑦᑕᓚ ᐅᕐᓱᖓ, ᓱᓇᓂᒃ ᐊᐅᓚᔨᔭᖃᕐᒪᖔᑕ ᓴᓪᓗᓂ ᐱᕈᕐᓴᓱᑎᒃ ᐅᓂᒃᑲᑎᑦᓱᒋᑦ ᑌᑦᓱᒪᓂ ᓴᓪᓗᐃᑦ ᓴᒃᓚᒃᒥᒃ ᑌᔭᐅᕙᑦᑎᓗᒍ,” ᑌᒣᓕᑦᓱᓂᐅᖃᕐᑐᖅ. “ᐅᓂᒃᑳᖃᑦᑕᓯᒪᔪᑦ ᖃᓄᐃᓘᕈᓯᒋᕙᑦᑕᕕᓂᕐᒥᓂᒃ, ᓇᒧᓪᓗ ᒪᙯᑉᐸᓚᐅᕐᒪᖔᕐᒥᒃ ᐃᖃᓗᓐᓂᐊᕆᐊᕐᓱᑎᒃᓗᓃᑦ, ᓱᔪᖃᕐᓯᒪᒻᒪᖔᓪᓗ ᑌᒃᑯᓇᓂ ᐅᒃᓗᒋᒋᐊᖕᖓᓯᒪᔭᑦᑎᓂ. ᐊᑦᔨᖑᐊᑐᖃᕐᓂᒃ ᐊᕙᑕᒃᑯᓂᑦ ᒪᓐᑐᔨᐊᒦᑦᑐᒥᑦ ᐱᒍᓐᓇᑎᑕᐅᓯᒪᔪᖓ. ᐃᑲᔪᕐᓯᔨᒋᓪᓚᕆᐊᓗᓚᐅᔪᔭᒃᑲ ᐊᑐᐊᒐᓕᐅᕐᓱᖓ. ᑖᒃᑯᐊ ᐊᑐᐊᒉᑦ ᐅᓂᒃᑳᑐᑦ ᑌᑦᓱᒪᓂᑕᓂᒃ ᐅᒃᓗᒥᒧᑦ ᑎᑭᑦᓱᒍ. ᐊᑐᐊᒐᖕᖑᑎᑕᐅᒪᔪᑦ ᐊᒥᓲᓕᕐᑎᑕᐅᑦᓱᑎᒃᓗ 2014-ᖑᑎᓪᓗᒍ.”
ᑕᕐᕋᒥᐅᑦ ᓂᐱᖓᑦᑕ ᑐᑭᒧᐊᑦᑎᓯᔨᖓ ᔫᓕ ᑯᕆᓃ ᐅᖃᕐᑐᖅ ᐳᑐᓕᖕᒥᒃ ᐊᖏᔪᒻᒪᕆᒻᒥᒃ ᓄᓇᕕᒻᒥᒃ ᑐᓴᖃᑦᑕᐅᑎᒍᑎᓕᕆᒍᓯᑎᒍᑦ ᐃᑲᔪᕐᓯᓯᒪᒻᒪᕆᓐᓂᕃᑦᓱᓂ. “ ᐊᖏᔪᒻᒪᕆᒻᒥᒃ ᐱᓇᓱᐊᕐᓯᒪᔪᖅ, ᐃᓗᓐᓇᖏᑎᒍᑦ ᐊᐱᕐᓱᓂᒍᑎᕕᓂᖏᑎᒍᑦ ᐅᓂᒃᑲᐅᓯᓂᓪᓗ ᓄᐊᑦᓯᓯᒪᒍᑎᖏᑎᒍᑦ. ᐃᑲᔪᕐᓯ-ᓯᒪᒻᒪᕆᒻᒥᓱᓂ ᐅᖄᑐᐃᓐᓇᓱᑎᒃ ᐅᓂᒃᑲᑐᐊᕐᑐᓂᒃ, ᐃᓄᑐᐃᓐᓀᓗ ᐅᖃᐅᓯᖓᓐᓂᒃ. ᓂᐱᖓ ᑐᓴᕐᓴᐅᓱᖑᖏᓐᓇᑐᖅ. ᓂᑦᔭᑎᑦᓯᒋᐊᓪᓛᓱᐹᓗᒐᑦᑕ ᓂᐱᓕᐊᕆᓯᒪᔭᖏᓐᓂᒃ ᐊᐱᕐᓱᓂᑦᓱᓂᓗ ᐊᒻᒪᓗ ᐱᓇᓱᒍᑎᑦᓴᓕᐊᕆᓯᒪᔭᖏᑎᒍᑦ.”
2022-ᒥ, ᐃᒻᒥᓂᕿᑦᓱᓂ ᐳᑐᓕᒃ ᓄᐃᑦᓯᓯᒪᒻᒥᔪᖅ ᐅᑉᐱᓂᒃᑯᑦ ᓂᕐᑐᐃᒍᑎᓂᒃ ᐊᒻᒪᓗ ᐊᑯᓂᓂᑕᐅᓕᕐᑐᓂᒃ ᐃᓄᑐᐃᓐᓀᑦ ᓂᑦᔭᓗᑦᑖᖑᐊᕈᓯᖏᓐᓂᒃ. “ᐅᑦᑐᕋᖃᑦᑕᓯᓚᐅᔪᒐᒪ ᐊᖏᔫᖕᖏᑐᒥᒃ ᓂᐱᓕᐅᕈᑎᒥᒃ ᐊᑐᑦᓱᖓ ᐊᒥᓱᓂᒃ ᓂᑦᔭᐅᑎᓂᒃ ᐃᓗᓕᓕᒻᒥᒃ. ᓂᕐᑐᐃᒍᑎᓂᒃ ᓂᐱᓕᐅᖃᑦᑕᓯᑦᓱᖓ, ᐊᓱᐃᓛᒃ ᑐᓴᕐᓂᑐᕈᕐᐸᓕᐊᑐᐃᓐᓇᓕᕐᓯᒪᔪᑦ, ᑌᒣᓕᕐᒪᑕ ᐃᓛᕐᑐᒋᐊᓪᓚᓯᓚᐅᔪᒻᒥᔭᒃᑲ ᐊᒥᓱᐃᓂᒃ ᑐᓴᕐᓂᔮᕐᑎᓯᒍᑎᑦᓴᔭᓂᒃ ᓲᕐᓗ ᒪᕐᕉᓂᒃ ᑯᑭᑕᐸᐅᑏᓐᓂᒃ ᐊᑕᐅᓯᕐᒥᓗ ᑯᑭᑕᐸᐅᑎᒥᒃ ᓯᑕᒪᓂᒃ ᐊᑦᓱᓈᓕᖕᒥᒃ ᓃᓂᒐᕐᓂᓗ. ᐃᓄᑐᑦᔨᓱᒋᑦ ᑖᒃᑯᐊ ᓂᐱᓕᐊᕆᓚᐅᔪᔭᒃᑲ ᐃᓚᖓᓂᒃ ᐃᓄᓐᓂᒃ ᓴᓪᓗᒥᐅᓂᒃ ᐃᑲᔪᕐᑎᑕᖃᑦᑕᒥᑦᓱᖓ ᐃᓕᔨᒍᒪᓕᑐᐊᕋᒪ ᑐᓴᕐᓂᔮᕐᑎᓯᒍᑎᑦᓴᔭᒥᒃ, ᓲᕐᓗ ᑯᑭᑕᐸᐅᑎᒥᒃ ᐅᕝᕙᓘᓐᓃᑦ ᓂᑦᔭᐅᑎᒥᒃ. ᓂᐱᓕᐊᕕᓂᕐᒪ ᐃᓚᖓᓐᓂᒃ ᑰᒃᔪᐊᒧᑦ ᓰᐱᓰᒃᑯᓄᑦ ᐊᐅᓪᓚᑎᑦᓯᓚᐅᔪᒻᒥᔪᖓ, ᑌᔭᐅᒍᑎᖃᕐᑎᑕᕋᓂᒃ ‘ᓇᒃᓕᑕᕋ’, ᓈᓚᐅᑎᒃᑯᑦ ᓂᑦᔮᑎᓚᐅᔪᔭᖓᑦ.”
ᐋᙯᓪᓛᓕ ᓴᓪᓗᐃᑦ ᖃᐅᔨᒪᔭᐅᑦᓯᐊᑐᒻᒪᕆᓐᓂᒃ ᓂᑦᔭᓗᑦᑖᑎᖁᑎᖃᕆᕗᖅ ᓴᓪᓗᒥᐅᑦ ᐱᖕᖑᐊᑎᖏᓐᓂᒃ, ᐊᑦᓯᕋᐅᑎᖃᕐᐸᓚᐅᕐᑐᓂᒃ ᓴᒃᓚᒃ ᐱᖕᖑᐊ-ᑎᖏᓐᓂᒃ. “ᐁᓯᒪᔭᕋᖕᖑᐊᕕᒋᕙᓚᐅᕐᒥᔭᒃᑲ,” ᐅᖃᕐᑐᖅ ᐳᑐᓕᒃ. “ᐊᐱᕐᓱᖃᑦᑕᐸᓪᓕᐊᓯᓚᐅᕐᓯᒪᕗᓪᓗ ᐃᑲᔪᕈᓐᓇᒪᖔᑦᑕ, ᑐᓴᕐᓂᔮᕐᑎᓯᖃᑎᐅᓗᑕ, ᑌᒣᒻᒪᑦ ᐃᓚᖏᑎᒍᑦ ᑐᓴᕐᓂᔮᕐᑎᓯᒍᑎᓂᒃ ᐱᒍᓐᓇᓂᕐᑕᓯᒪᔪᒍᑦ, ᓲᕐᓗ ᑯᑭᑕᐸᐅᑎᓂᒃ ᓂᑦᔭᐅᑎᓂᒃᓗ, ᑭᖑᓂᐊᒍᓪᓗ ᐃᓚᑕᖑᑦᓱᑕ ᑐᓴᕐᓈᑎᑦᓯᔨᓄᑦ”
ᐊᐅᓚᔨᔪᖅ ᐃᓚᖏᓐᓂᒃ ᑐᓴᕐᓂᔮᕐᑎᓯᓂᕆᓯᒪᔭᖏᓐᓂᒃ ᓴᓪᓗᒥᐅᑦ ᓂᑦᔭᓗᑦᑖᑎᖏᑕ. “1974-ᖑᑎᓪᓗᒍ ᙯᕐᖁᔭᐅᓚᐅᕐᓯᒪᔪᑦ ᐱᖕᖑᐊᖁᔭᐅᑦᓱᑎᒃ ᑭᖕᖓᓂ. ᑌᑲᓂ ᐊᕐᕌᒍᕐᒥ ᐃᓄᑐᐃᓐᓀᑦ ᓂᑦᔭᓗᑦᑕᑏᑦ ᐊᒥᓱᓄᑦ ᑕᑯᓐᓇ-ᐅᔮᕐᑕ ᐅᒋᐊᕐᑐᓯᒪᑦᓱᑎᒃ ᑐᓴᕐᓂᔮᕐᑎᓯᓂᖃᓚᐅᕐᓯᒪᒻᒪᑕ. ᐊᓯᖏᓐᓂᒃ ᑐᓴᕐᓈᑎᑦᓯᓂᖃᖃᑦᑕᓯᒪᒻᒥᔪᑦ. ᐃᓄᑦᔪᐊᒦᓚᐅᕐᓯᒪᒻᒥᔪᑦ 1981-ᒥ ᐊᒻᒪᓗ ᐅᓪᓗᒥ ᐃᖃᓗᐃᑦᓚᔭᐅᕙᓕᕐᑐᒥ ᑐᓴᕐᓂᔮᕐᑎᓯᓂᖃᓚᐅᕐᓯᒪᒻᒥᓱᑎᒃ.”
ᑕᑯᓐᓇᓚᐅᕐᓯᒪᒻᒥᔭᒃᑲ ᓴᓪᓗᒥᐅᑦ ᓂᑦᔭᓗᑦᑖᑎᖏᑦ ᐱᖕᖑᐊᑎᓪᓗᒋᑦ, ᐳᑐᓕᒻᒧᓗ ᐅᖃᓚᐅᔪᕗᖓ ᓲᕐᓗ ᑐᓴᕐᓂᔮᕐᑎᓯᔨᑎᑐᑦ ᑕᐅᑦᑐᖃᓕᕆᐊᖏᑦ!
“ᐋᙯ, ᑌᑦᓱᒪᓂ ᑌᒫᒃ ᐅᖃᐅᓯᖃᕈᓐᓇᓂᕐᐳᑎᑦ. ᐊᐅᓚᔨᒐᒪ ᓄᔭᒃᑲ ᑕᑭᔫᑎᓪᓗᒋᑦ. ᐊᐅᓚᔨᕗᖓᓗ 1994-ᖑᑎᓪᓗᒍ ᑲᖏᕐᓱᔪᐊᒥ, ᐱᓇᓱᒐᖃᕐᕕᓕᒫᑦ ᑲᑎᖕᖓᓂᖃᕐᑎᓗᒋ, ᓴᓪᓗᒥᐅᑦ ᓂᑦᔭᓗᑦᑖᑎᖏᑦ ᙯᕐᖂᑕᐅᒪᓚᐅᕐᓯᒪᒻᒪᑕ ᐱᖕᖑᐊᖁᔭᐅᑦᓱᑎᒃ. ᐊᐅᓚᔨᒻᒥᔪᖓ ᐸᖕᓂᕐᑑᒥ ᑐᓴᕐᓂᔭᕐᑎᓯᖁᔭᐅᒻᒥᑎᓪᓗᒋᑦ ᐊᒻᒪᓗ ᑰᒃᔪᐊᕌᐱᖕᒥ.”
2022-ᒥ ᐅᑭᐊᖑᓕᕐᑎᓗᒍ ᐳᑐᓕᒃ ᐆᒻᒪᑎᒥᒍᑦ ᖁᑦᓴᓚᓚᐅᔪᕗᖅ. ᒪᓐᑐᔨᐊᒥ ᐋᕐᕿᓯᓚᐅᔪᔪᖅ, ᖃᓄᐃᓪᓗᐊᕈᓐᓀᑐᐊᕋᒥᓗ ᓴᓪᓗᓄᑦ ᐅᑎᓚ-ᐅᔪᕗᖅ. “ᐋᓐᓂᐊᓯᐅᑎᓂᒃ ᐄᔭᒐᕐᑑᒪᖏᓐᓈᑐᖓ, ᐱᐅᓯᕙᓪᓕᐊᒐᐅᒐᕐᓱᖓ. ᓄᑭᖃᕐᓂᓴᐅᓕᕐᑐᖓ, ᐱᓱᒍᓐᓇᓕᕐᓱᖓᓗ, ᓂᐅᒃᑲᓗ ᓄᑭᖃᕐᓂᓴᐅᓕᕐᓱᑎᒃ. ᐱᓇᓱᒐᕐᑕᕋᓱᒍᓐᓇᓕᕐᓱᖓᓗ. ᐱᓇᓱᒐᕐᑖᑎᑕᐅᓕᓚᐅᔪᕗᖓ ᓴᓪᓗᐃᑦ ᐃᓕᓐᓂᐊᕕᖓᓂ ᑕᑯᒥᓇᕐᑐᓕᐅᕐᓂᒥᒃ ᐃᓕᓐᓂᐊᑎᑦᓯᖃᑦᑕᓚᖓᓕᕐᑎᓗᖓ.”
ᐃᓱᓕᒋᐊᕈᑎᖃᕐᓱᓄᒃ ᐊᐱᕐᓱᓂᕋᓂᒃ, ᐅᖃᓚᐅᔪᕗᖓ ᐳᑐᓕᒻᒧᑦ ᐅᖄᓚᓕᑐᐊᕐᒪᑦ ᐊᐱᕐᓱᓂᑦᓴᒥᓂᒃ ᐃᓄᑐᐃᓐᓀᑦ ᓯᕗᓕᕐᑎᖏᓐᓂᒃ ᓂᐱᖓ ᑐᓵᖃᑦᑕᓯᒪᒐᒃᑯ ᖃᑎᑭᒃᑐᑎᓪᓗᒍ. ᑕᒪᕐᒥᒃ ᐊᓕᒃᓗ ᓵᓕᓗ ᑕᒪᑐᒥᖓ ᐅᖃᓚᐅᔪᒻᒥᔫᒃ. ᐳᑐᓕᒃ ᐊᐱᕆᓚᐅᔪᔭᕋ ᑐᓴᕋᑦᓴᓂᐊᕐᑎᐅᓱᓂ ᖃᑎᑭᒃᑐᓂᕐᒥᓄᑦ ᖃᓄᐃᑉᐸᓚᐅᔪᖕᖏᒪᖔᑦ.
“ᑭᐅᓚᐅᔪᔮᖓ ᐊᖏᕐᓱᓂ, ᓈᒻᒪᓯᐊᖃᑦᑕᓂᕋᕐᓯᒪᑦᓱᒍ. ᐊᓯᒃᑲ ᖃᑎᑭᑦᑐᐃᑦ ᐱᒻᒥᔪᑦ ᓚᑦᓱᓂᓗ. ᐊᓯᒋᐊᓪᓚᕗᑦ ᓂᑦᔮᓕᕋᒥᒃ ᖃᑎᑐᔪᐊᓘᑦᓱᑎᒃ ᓂᐱᕆᑦᑐ ᐊᓘᑎᓪᓗᒋᑦ, ᐃᔪᕐᓱᓂ ᐅᖃᕐᑐᖅ. “ᓂᐱᕆᑦᑐᐸᓗᓲᑦ ᑐᓴᕐᓴᐅᓯ-ᐊᑦᔭᖏᒻᒪᕆᖔᓕᕐᓱᑎᒃ.”
ᐱᔭᕆᐅᕐᓯᒪᓂᖃᑦᓯᐊᑐᒻᒪᕆᒃ ᑖᓐᓇ ᐊᖑᑦ.
