ᑌᒪᖕᖓᑦ ᑎᒍᔭᐅᓚᐅᕐᓯᒪᑎᓪᓗᒋᓂᑦ ᐊᕐᕋᒍᐃᑦ ᐅᓄᕐᑐᑦ ᐊᓂᒍᕐᑎᓗᒋᑦ ᐃᓄᑐᐃᓐᓀᑦ ᑐᖁᖓᔪᑦ ᐅᑎᕐᑎᑕᐅᕗᑦ
ᐊᒃᓚᑕᖏᑦ ᒥᐊᕆᐋᒻ ᑐᐆᑉ
ᔪᓓ ᑕᕐᕿᖓ ᐊᓂᒍᕐᑎᓗᒍ, ᐃᓄᑐᐃᓐᓇᕕᓃᒃ ᑎᒍᔭᐅᓚᐅᕐᓯᒪᔪᕕᓃᒃ ᐃᓗᕕᕐᑕᐅᒪᕕᒻᒥᓂᑦ 1935 ᒥᑦᓯᑎᓐᓂ ᑎᒍᔭᐅᓚᐅᕐᑐᕕᓂᐅᑦᓱᑎᒃ
ᐃᓗᕕᕐᑕᐅᓴᕋᑕᓚᐅᔪᕘᒃ ᓄᓀᖕᖒᑉ ᓯᓈᓂ ᑭᖑᕚᒥᓄᑦ ᐃᓕᔭᐅᑦᓱᑎᒃ.
ᐃᓄᕕᓂᕐᓂᒃ ᐅᑎᕐᑎᓯᓂᖅ ᐊᕐᕌᒍᓚᐅᔪᔪᒥ ᐱᓇᓱᑦᑕᐅᒋᐊᖕᖓᓯᓚᐅᔪᔪᖅ, ᐊᕙᑕᐅᑉ ᐃᑦᓴᓂᑕᕐᓂᐊᑎᖏᑦ ᖃᐅᔨᑎᑕᐅᑎᓪᓗᒋᑦ ᐃᓄᑐᐃᓐᓇᕕᓃᒃ ᑕᑯᕚᒃᑯᕕᒻᒥᒋᐊᖏᒃ ᐱᕙᓪᓕᐊᓯᒪᔪᓂᒃ ᑕᑯᕚᒃᑯᕕᐅᒍᑎᓕᒻᒥ, ᑎᒍᔭᐅ-ᐅᕐᑐᕕᓂᐅᑦᓱᑎᒃ, ᐱᐅᓕᓂᐊᒐᕕᓂᕐᒥᓂᒃ ᐃᓚᖃᕐᑎᓗᒋᑦ ᐃᑦᓴᓂᑕᕐᓂ ᐊᑎᒧᑦ ᑕᒃᓚᔅ ᓖᑦᓯᒪᓐᒧᑦ ᐊᕐᕌᒍᐃᑦ 1930-ᓃᑎᓪᓗᒋᑦ, ᓄᓀᖕᖑᒥᑦ ᑌᔭᐅᔪᒥᑦ ᑎᒍᑦᓱᓂᒋᒃ ᑭᓪᓕᓂᐅᑉ ᓯᕿᓂᐊᓂᑦ ᐅᖓᓯᓐᓂᓕᒻᒥ 9-ᓂ ᑭᓚᒦᑕᓂ. ᑕᑯᕚᒃᑯᕕᒃ ᐅᑎᕐᑎᑕᐅᖁᔨᓯᓚᐅᔪᒻᒪᑦ ᓄᓇᒧᑦ ᑎᒍᔭᐅᕕᕕᓂᖏᓐᓄᑦ. ᐊᕙᑕᐅᑉ ᐳᕐᑐᓂᕐᓴᒥᒃ ᑐᑭᒧᐊᑦᑎᓯᔨᖓ ᕉᑕ ᑯᑭᐊᐱᒃ ᖃᐅᔨᒋᐊᕐᕕᐅᓚᐅᔪᖅ ᑌᑲᖕᖓᓂᓪᓗ ᐱᕙᓪᓕᐊᓂᖃᓯᑦᓱᑎᒃ. ᐊᒃᓚᖃᑦᑕᐅᑎᒍᑎᒋᓯᓚᐅᔪᔭᖏᒃ ᐊᕙᑕᒃᑯᓗ ᑕᑯᕚᒃᑯᕕᐅᓪᓗ, ᒪᑭᕝᕕᓗ ᓄᓇᒥᒃ ᑎᒍᒥᐊᕐᑎᖏᓪᓗ ᑭᓪᓕᓂᐅᑉ ᓴᐳᒻᒥᒍᑎᒥᓂᒃ ᐊᒃᓚᓯᒪᔪᖕᖑᐃᒍᑎᖃᕐᒥᑎᓪᓗᒋᑦ.
ᑕᒪᓐᓇ ᐃᓄᑐᐃᓐᓇᕕᓂᕐᓂᒃ ᐅᑎᕐᑎᓯᕕᐅᓂᖅ ᕈᑕᐅᑉ ᐊᑑᑎᒋᐅᓚᐅᔪᖕᖏᑕᖓ. 2018-ᖑᑎᓪᓗᒍ ᐊᕙᑕᐅᑉ ᐱᓇᓱᖃᑎᒌᑦᑐᖁᑎᖏᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᒻᒧᑦ Dartmouth College-ᒧᑦ New Hampshire-ᒦᑦᑐᒧᑦ ᐃᓄᕕᓃᒃ ᓴᐅᓂᖏᓐᓂᒃ ᐁᑦᓯᓚᐅᕐᓯᒪᒻᒥᒐᒥ ᒪᕐᕉᓂᑦ ᐃᓗᕖᓐᓂᑦ ᑎᒍᔭᐅᓚᐅᕐᑐᕕᓂᕐᓂᒃ 1969-ᖑᑎᓪᓗᒍ.
ᐊᓱᐃᓛᒃ ᔫᓂ 22-ᖑᓕᕐᑎᓗᒍ, ᕉᑕᓗ ᐱᓇᓱᖃᑎᖓᓗ ᓂᑯᓚ ᑑᑉᓕᓰ ᑎᑭᓕᓚᐅᔪᕘᒃ ᑳᑦᑎᓅᒧᑦ ᓂᐅᕝᕕᐅᑕᐅᑦᓱᑎᒃ ᑕᑯᕚᒃᑯᕕᐅᑉ ᐱᓇᓱᑦᑎᖏᓐᓄᑦ. ᑕᑯᑎᑕᐅᒋᐊᕐᑐᓚᐅᔪᕘᓪᓗ ᐃᓄᕕᓂᕕᓃᓐᓂᒃ, ᐴᕐᑐᑕᐅᑦᒪᑦᓯᐊᑐᓂᒃ ᐊᐅᒍᓐᓇᑐᒥᒃ ᐴᕐᑐᑕᐅᒪᑦᓱᑎᒃ, ᕉᑕᒃᑰᓄᑦ ᐁᑦᑐᑎᐅᑦᓱᑎᒃ. 2018-ᒥ ᐱᐅᓯᐅᓯᒪᔪᒥᒃ ᐊᑦᔨᖃᓚᐅᔪᖕᖏᑑᒃ.
“ᐊᑦᔨᒋᖕᖏᓚᕆᓚᐅᔪᔭᖓᑦ ᓯᕗᓪᓕᒥ ᐱᐅᓯᐅᓯᒪᔪᒥᑦ. ᐅᖁᒣᑦᑐᓚᖓ-ᔪᕆᓚᐅᔪᔭᕋ, ᑭᓯᐊᓂ ᐱᐅᓯᖃᓚᐅᔪᔪᖅ ᐊᓯᐊᓂᒃ, ᐅᕿᓐᓂᓴᐅᑦᓱᓂᓘᓕᓚᐅᔪᒐᒥ” ᐅᖃᓚᐅᔪᔪᖅ ᕉᑕ. ᐊᑑᑎᒌᕐᓯᒪᒐᒃᑯ ᑌᒣᑐᐃᓐᓇᖁᓚᐅᔪᔪᖓ.”
ᑕᒪᓐᓇ ᑕᒪᑐᒪ ᐊᐅᓚᓂᐅᑉ ᐱᔭᕆᐊᑭᓐᓂᐹᕆᓚᐅᔪᔭᖓ. ᑕᒃᑲᖓᓂᑦ, ᐃᓄᕕᓃᒃ ᐅᑎᓚᐅᔪᒻᒪᑎᒃ ᒪᓐᑐᔨᐊᒧᑦ, ᑭᖑᓂᐊᒍᑦ ᑰᒃᔪᐊᓕᐊᕐᓱᑎᒃ. ᑕᒪᖕᖓᓂᓂᑦ, ᐊᑦᑕᓀᑦᑐᒥᒃ ᕿᑐᑦᑐᔭᒥᒃ ᐴᕐᓯᒪᑦᓱᑎᒃ, ᐊᖏᔪᐊᓘᖕᖏᑐᒥᒃ ᐃᑦᓯᕕᖃᓚᐅᔪᔫᒃ, ᑲᖏᕐᓱᐊᓗᒃᔪᐊᓕᐊᓕᓚᐅᔪᔫᒃ ᑲᖏᕐᓱᐊᓗᒃᔪᐊᒥ ᑕᕐᕋᒥ ᖃᐅᔨᓴᕐᓂᓂᒃ ᐱᑦᔪᔨᕕᒻᒥ ᐃᒡᓗᔪᐊᒥᓕᓚᐅᔫᒃ ᐃᓗᕕᕐᑕᐅᒋᐊᓪᓚᓂᑦᓴᖏᒃ ᐸᕐᓇᑕᐅᑎᓪᓗᒋᒃ.
ᓵᒥ ᐊᕐᓇᑐᐃᓐᓇᖅ, ᐃᑉᐱᒋᑦᑐᖅ ᓄᓇᒥᒃ ᑎᒍᒥᐊᕐᑎᑯᑦ ᐊᖓᔪᕐᖄᖓᑦ ᐅᖃᓚᐅᔪᖅ ᐅᖃᖃᑎᒌᒍᑎᒋᓚᐅᕐᓱᒋᒃ ᐸᕐᓇᓚᐅᕐᓱᒋᓪᓗ ᐸᕐᓇᖃᑎᐅᑎᓪᓗᒋᑦ ᓄᓇᓕᐅᑉ ᐱᓇᓱᒐᖃᕐᕕᖏᓪᓗ ᐃᓄᑐᖃᖏᓪᓗ ᑐᑭᑕᕈᑎᐅᓕᓚᐅᔪᕘᒃ ᐃᓄᐃᑦ ᐅᒥᐊᒃᑯᑦ ᐊᐅᓚᖃᑎᒌᓚᓕᕐᑎᓗᒋᑦ ᐃᓗᕕᕐᓯᐅᓯᕆᐊᕐᑐᓗᑎᒃ.
ᕉᑕ ᑐᑭᓯᑎᑦᓯᓚᐅᔪᖅ ᐸᓂᒻᒥᓂᒃ ᒪᓕᑦᑎᐊᖃᕐᓱᓂ ᑲᖏᕐᓱᐊᓗᒃᔪ-ᐊᓕᐊᕐᑐᕕᓂᐅᒋᐊᒥᒃ ᐃᓄᑦᔪᐊᒥᑦ ᐱᑦᓱᑎᒃ ᖃᐅᖓᓂᓗ, ᓄᓇᕐᖃᑎᒌᓂᒃ ᐃᓚᖃᕐᓱᑎᒃ, ᑲᖏᕐᓱᐊᓗᒃᔪᐊᒥᑦ ᐅᒥᐊᒃᑯᑦ ᐊᐅᓪᓚᓱᑎᒃ. ᐱᖓᓱᓂᒃ ᖃᔭᕆᐊᖃᓚᐅᔪᔪᑦ ᐊᒻᒪᓗ ᑕᓪᓕᒪᓂᒃ ᐅᒥᐊᖃᕐᓱᑎᒃ, ᐅᓯᑦᓱᑎᒃ ᐃᓄᕕᓂᕐᓂᒃ ᐊᒻᒪᓗ ᐃᓄᑐᐃᓐᓀᑦ ᒥᑦᓯᑎᓐᓃᑐᑦ 25 – 30 ᖃᑦᓯᑐᐃᓐᓇᓂᒃ ᐅᑭᐅᓖᑦ, ᐃᓄᑐᖃᕐᓂᑦ ᐱᐊᕋᓛᒧᑦ ᑎᑭᑦᑐᑦ ᐊᐅᓪᓚᖃᑎᒌᓚᐅᔪᕗᑦ. ᐃᒪᖅ ᐱᐅᔪᒻᒪᕆᐊᓘᓚᐅᔪᖅ ᐊᓄᕆᒐᓂᓗ, ᑭᓯᐊᓂ ᑕᑦᓯᑐᒻᒪᕆᐅᓚᐅᔪᖅ ᑕᑯᓐᓇᓯᐊᕐᖃᔭᕐᓇᕋᓂ. ᐅᒥᐊᑦ ᑎᑭᐅᑎᓚᐅᔪᑦ ᐃᑭᕋᓴᑭᑦᑐᒧᑦ, ᑐᑦᑐᓂᐊᕐᕕᐅᓲᒧᑦ ᐊᑯᓐᓂᓗᐊᖓᓃᑦᓱᓂ ᑲᖏᕐᓱᐊᓗᒃᔪᐊᓗ ᑭᓪᓕᓂᐅᓪᓗ. ᑲᖏᕐᓱᐊᓗᒃᔪᐊᒥᐅᑦ ᑕᒃᑲᓂ ᓄᓇᒥ ᐃᒡᓗᔪᐊᖁᑎᖃᕐᑐᑦ ᑌᒣᒻᒪᑦ ᐃᓄᐃᑦ ᕿᑐᕐᖓᓖᑦ ᒥᑭᔪᐊᖑᐊᓂᒃ ᐊᒻᒪᓗ ᖃᔭᕆᐊᑎᒎᕐᑐᕕᓃᑦ ᑕᒃᑲᓂ ᐃᒡᓗᔪᐊᒥ ᓯᓂᑦᑕᓚᐅᔪᔪᑦ. ᕉᑕᒃᑯᑦ ᐅᒥᐊᒃᑯᑐᕕᓃᑦ ᐅᒥᐊᒥ ᓯᓂᑦᑕᑎᓪᓗᒋᑦ ᐊᓱᐃᓛᓗ ᓇᓄᖃᕐᓯᑎᒥ ᑕᒻᒫᑎᕐᓯᒪᒐᓗᐊᕐᓱᑎᒃ ᓯᓂᑦᓯᐊᕈᓐᓇᓚᐅᔪᕗᑦ.
ᖃᐅᑐᐊᕐᒪᑦ ᑭᓪᓕᓂᕐᒧᑦ ᐃᖏᕐᕋᓯᓚᐅᔪᒻᒥᔪᑦ, ᑭᓯᐊᓂ ᐊᓄᕆᓂᕐᓴ ᐅᓕᓚᐅᔪᖅ ᐊᓄᕆᓗ ᓴᕿᓯᒪᓕᕐᓱᓂ, ᐃᒪᕐᓗ ᐃᖏᐅᓕᓐᓂᓴᐅᓕᕐᓱᓂ. ᓯᓚᑦᓯᐊᕈᕐᓰᒋᐊᖃᓕᓚᐅᔪᑦ ᑎᑭᐅᑎᓕᓚᐅᔪᕗᓪᓗ ᑭᓪᓕᓂᕐᒧᑦ ᐱᖓᔪ ᐊᓐᓂᐅᓕᕐᑎᓗᒍ ᐅᓪᓗᑯᑦ ᕿᑎᕋᓕᕇᒥ. ᕉᑕ ᐅᖃᓚᐅᔪᔪᖅ ᑌᑲᓂ ᑕᒪᑐᒥᖓ ᐃᒻᒥᓄᑦ ᑐᑭᖃᑦᓯᐊᑐᖁᑎᓕᕕᓂᐅᒋᐊᒥᒃ.
“ᕿᒥᕐᕈᐊᒐᕐᓂ ᐊᑦᔨᖑᐊᑦ ᑕᑯᕙᑦᑕᑲ ᐊᒻᒪᓗ ᐅᓂᒃᑲᐅᓰᑦ ᑐᓴᕐᓯᒪᔭᒃᑲ ᑭᓪᓕᓂᐅᑉ ᐅᓂᒃᑲᑕᐅᒍᑎᒋᓲᖏᑦ, ᐃᓱᒪᒋᑦᓱᒋᑦ ᐅᐱᒍᓱᒻᒪᕆᓚᐅᔪᕗᖓ, ᑕᑯᓐᓇᐅᒐᑐᐃᓐᓇᓚᐅᕐᑐᓚᐅᔪᕗᖓᓗ ᖃᐅᔨᒪᑦᓱᖓ ᑕᒫᓂ ᓄᓇᒥ ᐱᕙᓪᓕᐊᓯ-ᒪᓂᖃᒻᒪᕆᑦᑐᒥ, ᑌᒃᑯᓂᖓᓗᐊᖕᖑᐊᖅ ᒧᕌᕕᐊᓐ ᑐᑦᓯᐊ ᕕᓕᕆᔨᕕᓂᕐᓂᒃ ᐊᓯᖏᓐᓂᓗ,” ᐅᖃᐅᓯᖃᓚᐅᔪᔪᖅ ᕉᑕ. “ᐃᓄᑐᐃᓐᓀᑦ ᑐᑉᐱᑎᓚᐅᔪᑦ ᐃᖃᓗᓕᕆᕕᕕᓂᑐᖃᕐᒥ. ᑌᒣᓪᓗᑎᒃ ᑭᓯᐊᓂᐅᓚᐅᔪᒐᒥᒃ ᓇᓄᖃᕐᓂᑯᖓᓄᑦ ᖃᓂᑦᑐᓂᒃ. ᑕᒪᓐᓇ ᐅᕙᓐᓄᑦ ᐊᔪᒉᑦᑐᓚᐅᔪᖅ, ᐃᓄᐃᑦ ᐃᒡᓗᔪᐊᑉ ᐃᓗᐊᓂ ᑐᑉᐱᑎᕐᑐᑦ” ᑌᒣᓪᓗᐊᓕᕐᑎᓗᒍ ᑎᑭᑕᐅᓕᓚᐅᔪᒻᒥᔪᒍᑦ ᖁᐊᕐᑕᒥᐅᓄᑦ ᑐᓴᐅᒪᔪᓄᑦ ᐃᓗᕕᕐᓯᒋᐊᓪᓚᓂᐅᓛᕐᑐᒥᒃ, ᑖᒃᑯᐊ ᐅᒃᓘᓂ ᒪᕐᕉᓂ ᐊᐅᓚᓂᖃᓚᐅᕐᓱᑎᒃ ᑎᑭᓚᐅᔪᑦ ᐅᐱᓐᓇᖁᑎᒋᐊᓪᓚᓱᑎᒃ.
ᑌᒫᑦᓭᓇᖅ, ᓯᓚᑦᓯᐊᖑᖕᖏᑑᒍᑦᔭᐅᓚᐅᔪᑦ, ᑌᒣᒻᒪᑦ ᐅᑕᕐᕿᒋᐊᖃᓚᐅᔪᕗᒍᑦ ᓯᑕᒪᖓᓐᓂᐅᓕᕐᑎᓗᒍᓗ ᐃᓗᕕᕐᓯᒋᐊᓪᓚᓯᑦᓱᑕ ᓄᓀᖕᖑᒥ, ᑭᓪᓕᓂᕐᒥᑦ ᐅᖓᓯᑦᑐᑲᓪᓚᒍᓗᒻᒥ ᓛᐸᑐᐊᒧᑦ ᖃᓂᑦᑑᓱᓂ. ᓄᓇᐅᑉ ᓯᓈᓂ, ᐅᔭᕃᓪᓗ ᓄᓇᔦᓪᓗ ᐊᑯᕐᖓᓂ, ᐃᓗᕕᕐᑕᐅᓕᕐᕿᓂᖃᓕᓚᐅᔪᕗᑦ ᐃᓄᑐᐃᓐᓇᕕᓃᓪᓗ ᐱᐅᓕᓂᐊᒐᕕᓂᖏᓪᓗ.
ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖓ ᓲᓴᓐ ᓛᕝᖃᐅᔅ ᐅᖃᓚᐅᔪᖅ ᐃᑦᓴᓂ-ᑕᕐᓂᐊᑎᒃᒎᖅ ᓄᓀᖕᖑᓕᐊᕐᓯᒪᔪᕕᓃᑦ ᓇᓂᓯᔪᕕᓂᐅᕗᑦ ᐃᓗᕕᕐᓂᒃ ᑖᒃᑯᐊ ᐃᓄᑐᐃᓐᓇᕕᓃᒃ ᑎᒍᔭᐅᕕᕕᓂᕆᕐᖂᑕᖏᓐᓂᒃ ᑭᓯᐊᓂ ᓱᕐᖁᐃᑐᒥᒃ ᐅᖃᕈᓐᓇᓚᐅᔪᖕᖏᑐᖅ ᐊᒃᓚᑕᐅᒪᓐᓂᖏᒻᒪᓂᒃ ᓇᒃᓕᐊᓂᑦ ᐱᔭᐅᓐᓂᕋᓗᐊᕐᒪᖔᕐᒥᒃ ᑌᑦᓱᒪᓂ ᐊᕐᕌᒍᐃᑦ 1930-ᓃᑎᓪᓗᒋᑦ. ᐃᓗᕕᕐᓯᒋᐊᕐᑐᑐᑦ ᑐᑭᑕᖃᑎᒌᓕᓚᐅᔪᕗᑦ ᑕᒃᑯᖓᐅᖕᖏᑐᕆᑲᓪᓚᒍᒪᓇᑎᒃ ᐊᓯᖏᓐᓂᒃ ᐃᓗᕕᕐᓯᕕᓕᐅᕐᓱᑎᒃ ᐊᑐᕐᑕ-ᐅᒌᕐᑐᒧᑲᓪᓚᓂᐊᖕᖏᓇᒥᒃ.
ᐃᓄᑐᐃᓐᓀᑦ ᑐᑭᓕᕇᑦᓱᑎᒃ ᐅᔭᕋᓐᓂᒃ ᑕᐅᓇᖕᖓᑦ ᑕᑉᐸᐅᖓ ᖃᕐᖃᐅᑉ ᖄᖓᓄᑦ ᐁᑦᑐᑐᑎᓕᓚᐅᔪᕗᑦ ᐊᓱᐃᓛᒃ ᑌᒃᑯᐊ ᐃᓄᕕᓃᒃ ᕿᓐᓂᑕᐅᓕᓚᐅᔫᒃ. ᐃᓄᑐᖃᕆᔭᐅᔪᖅ ᓅᒪ ᓯᓄᐹ ᑐᑦᓯᐊᕈᑎᓂᒃ ᓀᑦᑐᓂᒃ ᐊᑑᑎᓚᐅᔪᖅ ᐊᒻᒪᓗ ᑐᑦᓯᐅᑎᓂᒃ ᐃᖕᖏᓱᑎᒃ.
ᑭᓪᓕᓂᓕᐊᕐᓯᒪᖃᑎᒌᑦᑐᑦ ᐃᓗᕕᕐᓯᒋᐊᓪᓚᒌᕋᒥᒃ, ᐃᓱᒪᒥᒍᓐᓇᓯᓚᐅᔪᑦ ᓱᒍᒪᔭᒥᓂᒃ ᐊᑑᑎᒍᓐᓇᓯᑦᓱᑎᒃ, ᐃᓚᖏᑦ ᑐᑦᑐᓯᐅᓯᓚᐅᔪᑦ, ᐅᒥᐊᖅ ᕉᑕᐅᑉ ᐃᑭᒪᕕᖓ ᓛᐸᑐᐊᓕᐊᕋᓱᓕᓚᐅᔪᖅ ᑭᓯᐊᓂ ᐊᕐᖁᑎᒋᓚᖓᔭᖓ ᐊᓄᕆᓗᐊᕐᒪᑦ, ᐅᑎᑐᐃᓐᓇᓚᐅᔪᑦ.
ᐊᑯᓂᑲᓪᓚᒃ ᐊᐅᓚᒋᐊᖃᓚᐅᔪᑦ ᑌᒃᑯᐊ ᐃᓄᕕᓃᒃ ᑌᒃᑯᐊᓗ ᐃᓗᕕᕐᓯᓕᕐᕿᒋᐊᕐᑐᑐᑦ, ᑭᓯᐊᓂ ᕉᑕ ᐅᖃᓚᐅᔪᖅ ᐃᓄᑐᐃᓐᓀᑦ ᓯᕗᓪᓕᕕᓂᕐᒥᓂᒃ ᐃᓗᕕᕐᓯᓕᕐᕿᒍᓐᓇᓯᑦᓯᐊᓚᐅᔪᒋᐊᖏᑦ, ᑕᒪᓐᓇ ᐱᐅᓯᕆᔭᐅᓪᓗᐊᓱᖑᖕᖏᒪᑦ, ᑌᒣᒃᑲᒥᓗ ᐱᓪᓗᑯᒋᐊᓕᑎᒍᑦ ᐃᓱᐊᕐᑑᓚᐅᔪᕗᖅ.
