ᑲᖏᕐᓱᔪᐊᕐᒥ ᓄᕕᒻᐸ 23, 2024-ᒍᑎᓪᓗᒍ, ᐊᑯᓂ ᐅᑕᕐᕿᐊᕆᔭᐅᓕᕐᑐᒥᒃ ᑲᕙᒪᑐᖃᒃᑯᑦ ᐃᓛᓂᐅᖕᖏᑑᕐᕕᖃᓚᐅᔪᕗᑦ ᓄᓇᕕᒻᒥᐅᓂᒃ ᕿᒻᒦᔭᕐᑕᐅᓯᒪᔪᓂᒃ, ᐃᑉᐱᓂᐊᕐᓇᑑᓚᐅᔪᑦᓱᓂᓗ ᖃᐅᔨᕙᓪᓚᑕᐅᓂᖃᓕᕋᑕᕐᒪᑦ ᐊᕐᕌᒍᓂ ᐊᒥᓱᓂ ᖁᐊᕐᓴᖓᓇᕐᑐᑰᕈᑕᐅᓯᒪᔪᖅ.
ᐃᑉᐱᓂᐊᕐᓂᖏᑦ ᐃᑎᕐᓯᒪᔪᑦ ᑕᑯᑦᓴᐅᓚᐅᔪᕗᖅ ᐃᓄᒻᒪᕇᑦ ᑲᖏᕐᓱᔪᐊᕐᒥᐅᑦ, ᐊᓯᖏᓐᓂᓗ ᓄᓇᓕᓐᓂᑦ ᐱᓯᒪᔪᑦ ᓄᓇᕕᒻᒥ ᐱᖓᓱᓂᑦ ᓄᓇᓕᓐᓂᑦ ᑎᑭᑦᑐᖃᓚᐅᔪᖕᖏᑑᒐᓗᐊᖅ, ᐅᖄᑎᓪᓗᒋᑦ Gary Anandasangaree-ᒧᑦ, ᑐᕐᖃᑕᕐᕕᒧᑦ ᓄᓇᓕᑐᖃᓕᕆᓂᕐᒧᑦ ᑕᕐᕋᒦᑦᑐᓕᕆᓂᕐᒧᓗ ᑲᓇᑕᒥ. ᖁᕝᕕᐅᖃᑦᑕᓚᐅᔪᕗᑦ ᐅᖄᔪᑦ ᑌᑲᓃᑦᑐᐃᓗ ᓈᓚᑦᓱᑎᒃ ᐃᓚᒥᑕ ᕿᒻᒦᔭᕐᑕ-ᐅᓂᕕᓂᖏᓐᓂᒃ. ᐃᑎᕐᓯᒪᖃᑕᐅᒻᒥᑎᓪᓗᒋᒃ ᒪᕐᕉᒃ RCMP-ᑯᑦ ᐳᓖᓯᒃᑯᖏᓐᓂᑦ ᐱᓯᒪᔫᒃ ᐃᑦᓯᕙᖃᑎᓖᒃ ᒪᑭᕝᕕᐅᑉ ᐊᖓᔪᕐᖄᖓᓂᒃ ᐱᑕ ᐋᑕᒥᒥᒃ ᐃᓄᐃᓪᓗ ᑕᐱᕇᑦ ᑲᓇᑕᒥ ᐊᖓᔪᕐᖄᖓᓂᒃ ᓇᑖᓐ ᐅᐱᐊᑦᒥᒃ, ᑕᑯᓐᓇᑐᑦ ᖃᐅᔨᕙᓪᓚᓱᑎᓪᓗ ᐋᓐᓂᓇᕐᑑᓂᕕᓂᖓᓂᒃ ᖁᐊᕐᓵᖓᓇᕐᑐᑰᕈᑕᐅᓯᒪᓂᖓᓂᓪᓗ ᐅᖄᔪᓄᑦ.
ᓄᓇᕕᒻᒥᐅᓕᒫᓅᓕᖓᔪᖅ ᐃᓛᓂᐅᖕᖏᑑᕐᓂᖅ ᐊᑑᑎᔭᐅᓪᓚᕆᒋᐅᓚᐅᔪᕗᖅ ᑐᕐᖃᑕᕐᕕᒧᑦ Minister Anandasangaree ᑭᒡᒐᑐᕐᓱᓂ ᑲᓇᑕᒥᐅᑦ ᑲᕙᒪᖓᓂᒃ ᑐᓴᕐᓴᐅᑎᑕᐅᑦᓱᓂᓗ ᓈᓚᐅᑎᑎᒍᑦ ᖃᕆᑕᐅᔭᑎᒍᓪᓗ ᑐᓴᖃᑦᑕᐅᑎᒍᑎᑎᒍᑦ. ᐃᓛᓂᐅᖕᖏᑑᕐᕕᐅᓂᖅ, ᐊᑑᑎᔭᐅᓐᓂᖁᖅ ᑕᑕᑦᓯᐊᑐᒥ ᐱᖕᖑᐊᕕᒻᒥ ᐊᑭᐊᐱᐊᓃᑦᑐᒥ ᐅᖄᕕᐅᕋᑖᕐᑑᑉ, ᐃᓄᒻᒪᕇᑦ, ᐊᓯᖏᓪᓗ ᐃᓄᓐᓂᒃ ᓯᕗᓕᕐᑏᑦ ᐃᓚᐅᑎᓪᓗᒋᑦ, ᑲᖏᕐᓱᔪᐊᕐᒥᐅᓗ.
ᖁᓪᓕᒥᒃ ᐃᑭᑦᓯᔪᖃᕇᕐᒪᑦ ᐅᖄᒌᕐᒪᓗ ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᕿᒻᒦᔭᕐᑕᐅᓂᕕᓂᕐᓄᑦ ᓱᕐᕋᑕᐅᓂᐅᓯᒪᔪᑦ ᐱᓪᓗᒋᑦ, ᒪᑭᕝᕕᐅᑉ ᐳᕐᑐᓂᕐᓴᖁᑎᖏᑦ ᐋᑕᒥ ᑎᓖᓪ-ᐊᓚᑯ, ᔮᔨ ᐴᑎ, ᐊᓖᓯᐊ ᐊᔭᒍᑕᖅ ᐋᓐᑎ ᒧᐊᖃᐅᔅᓗ ᐅᖄᓚᐅᔪᒻᒥᔪᑦ ᓄᓇᕕᒻᒥ ᕿᒧᑦᓰᑦ ᐱᓪᓚᕆᐅᒋᐊᖏᓐᓂᒃ ᐱᕐᖁᓯᑐᖃᑦᑎᓄᑦ ᐃᓕᕐᖁᓯᑦᑎᓄᓪᓗ. ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᕐᖄᖓ ᓇᑖᓐ ᐅᐱᐊᑦ ᐅᖄᑎᓪᓗᒍ ᐱᓪᓚᕆᐅᒋᐊᖓᓂᒃ ᓭᒻᒪᐅᑎᓯᒪᒋᐊᖃᕐᓂᐅᑉ ᐃᓄᐃᑦ ᓄᓇᖓᓂ, ᑕᒪᑐᒥᖓᓗ ᐃᓛᓂᐅᖕᖏᑑᕐᑕᐅᓂᕐᒥᒃ ᐊᓪᓗᕆᐊᕈᑎᑦᓯᐊᒍᓂᕃᑦᓱᓂ.
ᑐᕐᖃᑕᕐᕕᒃ Anandasangaree ᐅᖃᐅᓯᖃᕐᓂᖁᖅ ᓭᒻᒪᐅᑎᒋᐊᖃᕐᓂᒥᒃ ᐊᑐᐊᕐᓯᓱᓂ ᐃᓛᓂᐅᖕᖏᑑᕈᑎᓂᒃ. “ᑖᓐᓇ ᐸᕐᓀᕈᑕᐅᓯᒪᑦᓱᓂ ᐃᓛᓂᐅᖕᖏᑑᕐᓂᖅ ᓯᕗᓪᓕᐸᐅᖃᑕᐅᕗᖅ ᐊᓪᓗᕆᐊᕐᓂᕆᔭᖏᓐᓄᑦ ᑲᕙᒪᑐᖃᒃᑯᑦ ᓭᒻᒪᐅᑎᒋᐊᖃᕐᓂᒧᑦ ᑕᑎᒌᑦᓯᐊᕙᓪᓕᐊᕆᐊᖃᕐᓂᑎᓐᓄᑦ.” ᖃᐅᔨᕙᓪᓚᓱᓂᓗ ᑕᑎᒋᔭᐅᒍᓐᓀᓯᒪᓂᖏᓐᓂᒃ ᑲᕙᒪᑐᖃᒃᑯᑦ ᐳᓖᓯᒃᑯᓗ ᐅᐃᕖᕐᕆᓯᓯᒪᓂᕐᒥᓄᑦ, “ᐃᑲᔪᕐᓯᒪᒋᐊᖃᕐᓯᒪᔪᓄᑦ ᐱᓇᓱᖃᑎᒋᔭᐅᒋᐊᖃᕐᓯᒪᔪᓄᓪᓗ ᐃᓄᓐᓂᒃ ᓄᓇᓕᑦᓯᓃᖃᑦᑕᓯᒪᔪᓄᑦ.”
“ᐳᓖᓰᑦ RCMP-ᑯᑦ ᐅᓪᓗᒥ ᓄᓇᓕᑦᑎᓃᖃᑎᒋᕙᕗᑦ, “ᐅᖃᕐᑐᕕᓂᖅ ᑐᕐᖃᑕᕐᕕᒃ, “ᓴᐳᑦᔨᒋᐊᕐᑐᓯᒪᑦᓱᑎᒃ ᐃᓛᓂᐅᖕᖏᑑᕐᑕᐅᓂᕐᒥᒃ ᓇᓗᓀᕐᓯᒐᓱᐊᕐᓱᑎᓪᓗ ᑐᓂᒪᐅᑎᖃᕐᓂᒥᓂᒃ ᑕᑎᒌᑦᓯᐊᕆᐊᓪᓚᕆᐊᖃᕐᓂᒥᒃ, ᓭᒻᒪᐅᑎᒐᓱᐊᕐᓂᑯᑦ, ᐃᓄᓐᓂᓗ ᐱᓇᓱᖃᑎᖃᕐᐸᓕᐊᒍᒪᓂᕐᒧᑦ.”
ᐃᓛᓂᐅᖕᖏᑑᕐᑕᐅᓂᖅ ᐃᑉᐱᓂᐊᕐᓇᑑᓐᓂᖁᖅ ᓄᐃᑕᑎᑦᓯᓂᐅᑦᓱᓂᓗ, ᐊᑯᓂ-ᐅᓕᕐᑐᓗ ᐅᑕᕐᕿᐊᕆᔭᐅᓕᕐᓱᓂ, ᑕᖃᔪᐃᑦᑑᓱᑎᒃ ᓂᐸᖃᕈᑎᖃᕐᐸᑲᓗᐊᕐᑎᓗᒋᑦ ᐃᓄᓐᓂᒃ ᓯᕗᓕᕐᑏᑦ, ᐃᓚᐅᑎᓪᓗᒍ ᒪᑭᕝᕕᐅᑉ ᐊᖓᔪᕐᖄᒪᕆᖓ ᐱᑕ ᐋᑕᒥ.
ᐋᑕᒥ, ᐊᔪᐃᓐᓇᕈᑎᖃᓪᓚᕆᑦᓯᒪᑦᓱᓂ ᐃᓛᓂᐅᖕᖏᑑᕐᑕᐅᒋᐊᖃᕐᓂᒥᒃ, ᐊᐅᓚᔨᔪᖅ ᑐᓴᕆᐊᖕᖓᓱᓂ ᓯᕗᓪᓕᐹᒥ ᕿᒻᒥᔭᕐᑕᐅᓂᕕᓂᕐᓂᒃ 1999-ᒍᑎᓪᓗᒍ, ᑲᖏᕐᓱᔪᐊᕐᒥᐅᒧᑦ ᐊᕐᓇᒧᑦ ᐅᖄᕕᐅᑦᓱᓂ ᐊᖑᑎᖓᑕ ᕿᒻᒦᔭᕐᑕᐅᓂᕕᓂᖓᓂᒃ. “ᐊᑦᑐᑕᐅᓐᓇᓯᒪᔪᖅ ᐊᕐᓇᐅᑉ ᐅᖄᔭᖏᓐᓄᑦ,” ᐅᖃᕐᓯᒪᔪᖅ ᐱᑕ. “ᑌᒪᖕᖓᓂᑦ, ᖃᐅᔨᒪᓯᒪᔪᖓ ᑕᒪᑐᒪ ᓯᕗᓪᓕᐅᔭᐅᒋᐊᖃᕐᓂᖓᓂᒃ.”
2011-ᒍᑎᓪᓗᒍ, ᑯᐯᒃᑯᑦ ᑲᕙᒪᖓ ᐃᓛᓂᐅᖕᖏᑑᕈᑎᖃᕐᓯᒪᔪᑦ ᑯᐯᒃᑯᑦ ᐃᓚᐅᓯᒪᓂᖏᓐᓄᑦ ᕿᒻᒦᔦᓂᕐᓄᑦ ᐅᑎᕐᑎᓯᕕᖃᕐᓱᑎᓪᓗ $3-ᒥᓕᐊᓐᓂᒃ ᑫᓪᓚᑐᐃᒋᐊᕈᑎᑦᓴᓂᒃ ᐱᐅᓕᐊᕆᐊᕈᑎᑦᓴᓂᓪᓗ ᐃᓄᐃᑦ ᐅᖃᐅᓯᖓᓂᒃ ᐃᓕᕐᖁᓯᖓᓂᓪᓗ. ᑭᓯᐊᓂᓕ, ᑲᕙᒪᑐᖃᒃᑯᑦ ᐃᓚᐅᓐᓂᖏᓪᓚᑦ ᑌᑰᓇ, ᑕᒪᓐᓇᓗ ᐋᓐᓂᓇᕆᐊᓪᓚᓯᒪᑦᓱᓂ ᓄᓇᕕᒻᒥᐅᓄᑦ.
ᐊᕐᕌᒍᕐᓂ ᐊᒥᓱᓂ ᐊᔪᐃᓐᓇᕈᑎᐅᑦᓱᓂ, ᐃᓄᓐᓂᒃ ᓯᕗᓕᕐᑏᑦ ᐊᓯᑦᔨᐸᑦᑎᓗᒋᑦ, ᓯᓚᕐᔪᐊᒥᓪᓗ ᖃᓂᒪᓂᖃᕐᓯᒪᑎᓪᓗᒍ, ᑲᕙᒪᑐᖃᒃᑯᑦ ᐃᓛᓂᐅᖕᖏᑑᕐᓯᒪᓕᕋᑕᕐᖁᑦ ᐊᖏᕈᑕᐅᑦᓯᐊᑎᓪᓗᒍ ᓂᑯᕕᒍᑎᐅᑦᓱᓂᓗ ᓇᔪᕐᑕᐅᔪᒦᑦᑐᓄᑦ. ᓄᕕᒻᐸᒥ ᑌᑲᓂ ᐅᓪᓗᒥ, ᐋᑕᒥ ᐊᖏᕈᑎᖃᕐᓯᒪᔪᖅ ᐃᓛᓂᐅᖕᖏᑑᕐᑕᐅᓂᕐᒥᒃ ᑭᒡᒐᑐᕐᓱᓂ ᓄᓇᕕᒻᒥᐅᓂᒃ. ᑐᕐᖃᑕᕐᕕᒃ ᐅᖄᒌᕋᒥ, ᓵᑦᑐᕕᓂᖅ ᐃᓄᒻᒪᕆᓐᓄᑦ ᓇᔪᕐᑕᐅᔪᒦᑦᑐᓄᑦ ᐊᐱᕐᓱᓱᒋᓪᓗ “ᐃᓛᓂᐅᖕᖏᑑᕐᑕᐅᓂᕐᒦᒃ ᐊᖏᕐᐱᓯ ?” ᑭᐅᒍᑎᖓᑦ ᓇᓗᓇᓚᐅᔪᖕᖏᑐᖅ – ᐊᖏᕐᒪᑕ.
“ᑕᒪᓐᓇᑕᒐ ᑲᕙᐅᒻᒥᓇᕐᑐᑰᕐᓯᒪᓂᑦᑕ ᐃᓓᓐᓇᖓ,” ᐅᖃᕐᑐᕕᓂᖅ. “ᐃᓕᓴᕆᐊᕐᑎᑕᐅᓯᒪᓂᕕᓃᑦ, ᓄᓇᒥᑕ ᐊᓯᐊᓄᑦ ᓄᑦᑎᑕᐅᕙᑦᑐᕕᓃᑦ, ᑕᒪᓐᓇᓗ ᕿᒦᔭᕐᑕᐅᓯᒪᓂᖅ. ᑕᒪᓐᓇ ᐃᓅᓯᒃᑯᑦ ᐱᔭᕆᐊᑐᔪᐊᓘᓯᒪᕗᖅ, ᑭᓯᐊᓂᓕ, ᐊᑕᐅᑦᓯᑯᑦ ᓯᕗᒧᐊᒋᐊᓯᕗᒍᑦ.”
ᕿᒻᒦᑦ ᐊᑑᑎᖏᑦ
ᕿᒧᑦᓯᕋᕐᓱᑎᒃ ᓄᓇᕕᒻᒥᐅᑦ ᐊᓐᓇᐅᒪᒐᓱᐊᓲᒍᓯᒪᕗᑦ, ᓲᖑᔪᑦᓯᐊᒍᑦᓱᑎᒃ, ᐃᓕᕐᖁᓯᕆᑦᓱᒍ ᐃᓄᐃᑦ ᕿᒻᒥᖏᓪᓗ ᖃᓂᑕᕇᓪᓚᕆᐅᑎᓪᓗᒋᑦ. ᓄᓇᕕᒻᒥᐅᓄᑦ ᐃᓅᓯᐅᓯᒪᑦᓱᓂ, ᑭᓯᐊᓂ, ᐊᒥᓱᓄᑦ ᐃᓄᒻᒪᕆᓐᓄᑦ ᓄᓇᕕᒻᒥᐅᓄᑦ ᑕᒪᓐᓇ ᐃᓄᐃᓪᓗ ᕿᒻᒦᓗ ᖃᓂᑕᕇᑦᓯᐊᓯᒪᓂᖓ ᐅᓚᐱᑕᐅᓯᒪᕗᖅ ᖁᐊᕐᓵᖓᓇᕐᑐᑰᕐᓯᒪᓂᕐᒧᑦ ᑌᑦᓱᒪᓂ ᐊᐅᓚᒍᓐᓇᖏᑦᑕᒥᑎᒍᑦ 1950-ᓃᑦᓱᑕ 1960-ᓃᑦᓱᑕᓗ.
ᑌᒣᑦᑐᒦᓕᕐᓱᑕ, ᑲᕙᒣᑦ ᐅᓇᑕᕐᑏᓗ ᐊᖓᔪᕐᖃᐅᑎᖏᑦ, ᐃᓚᐅᑎᓪᓗᒋᑦ ᐳᓖᓰᑦ RCMP, ᐊᑕᐅᑦᓯᑯᑦ ᕿᒦᔦᓯᒪᕗᑦ ᓴᐅᓴᓃᑦᑐᓂᒃ ᕿᒧᑦᓯᕈᑎᖏᓐᓂᒃ ᐃᓄᐃᑦ, ᑕᕐᕋᒥᓪᓗ ᕿᒧᑦᓯᕈᑏᑦ ᐃᓄᑑᒌᒃᑯᑎᑐᐃᓐᓇᐅᓯᒪᖕᖏᓚᑦ ᑭᓯᐊᓂᓕ ᐊᓐᓇᐅᒪᒐᓱᐊᕈᑎᒋᔭᐅᓪᓚᕆᑦᓯᒪᕗᑦ, ᑕᒪᓐᓇ ᓱᒃᑯᑎᕆᒍᑕᐅᓪᓚᕆᑦᓯᒪᔪᖅ. ᐃᓄᐃᑦ ᐃᖏᕐᕋᐅᑎᑦᓭᕈᑦᔭᐅᓱᑎᒃ ᐊᓯᓃᒋᐊᕐᑐᕈᑎᑦᓴᒥᓂᒃ, ᒪᙯᒍᑎᑦᓴᒥᓂᒃ ᓄᓇᒥᑦ ᐊᓐᓇᐅᒪᒍᑎᑦᓴᓯᐅᕆᐊᕐᑐᕈᑎᑦᓭᕈᑦᔭᐅᓱᑎᒃ.
ᕿᒻᒦᔭᕐᑕᐅᖃᑦᑕᓂᕐᖁᑦ ᐊᑦᔨᒌᖕᖏᑐᑎᒍᑦ, ᐊᒥᓱᐃᓪᓗ ᐃᓄᒻᒪᕇᑦ ᐳᐃᒍᑦᓵᓯᒪᒐᑎᒃ ᑐᖁᕋᕐᑕᐅᓂᕕᓂᖏᓐᓂᒃ ᕿᒻᒦᑦ. ᐃᓄᓐᓄᑦ, ᑕᒪᓐᓇ ᐃᖏᕐᕋᐅᑎᑦᓭᕈᑦᔭᐅᓂᕕᓂᑐᐃᓐᓇᐅᖏᓪᓚᖅ; ᐃᓕᑕᕐᓇᐅᑏᕈᑦᔭᐅᒐᓱᐊᕐᓂᐅᓂᕐᖁᖅ, ᐃᓕᕐᖁᓰᕐᑕᐅᒐᓱᐊᕐᓂᐅᓂᕐᖁᖅ, ᐃᒻᒥᓂᓪᓗ-ᐊᐅᓚᒍᓐᓇᓃᕈᑦᔭᐅᒐᓱᐊᕈᑎᐅᑦᓱᓂ.
ᑏᕕ ᑐᐳᐃ, ᓈᓚᑦᓱᓂ ᑲᕙᒪᑐᖃᒃᑯᑦ ᐃᓛᓂᐅᖕᖏᑑᕐᕕᖃᕐᓂᖏᓐᓂᒃ ᓲᖑᔪᓪᓚᕆᒻᒥᒃ ᐃᑉᐱᓂᕐᓇᑑᓂᕃᓐᓂᖁᖅ. “ ᖃᐅᔨᒪᓯᒪᖕᖏᑐᒍᑦ ᐊᒃᑲᒪ ᐊᒃᑲᖓ ᕿᒻᒥᖃᕐᓂᕋᓗᐊᕐᒪᖔ ᓯᕗᓪᓕᒥ ᐅᑎᕐᑎᓯᕕᐅᓂᖅ ᐊᑑᑎᓚᐅᕐᑎᓇᒍ,” ᐅᖃᕐᑐᖅ ᑏᕕ. “ ᐃᓱᒪᓇᓲᑦ, ᑕᒪᓐᓇ ᐱᓪᓗᒍ ᓂᐯᑦᑐᑐᐃᓐᓇᐅᓲᖕᖑᓯᒪᒍᓇᑦᓴᑐᖅ ?” ᑐᐳᐃ, ᐊᕐᕌᒍᓂ ᐱᖓᓱᓂ ᕿᒻᒥᖃᓕᕐᓱᓂ, ᐅᖄᓐᓂᖁᖅ ᓂᐱᖓ ᐃᑉᐱᓇᕐᓱᓂ ᐃᑎᔪᒻᒪᕆᒻᒥᒃ ᐊᓯᐅᔨᓯᒪᓂᖓ. ᕿᒻᒥᑲ ᑐᖁᖃᑦᑕᓯᒪᔪᑦ 13-ᒍᕐᖂᑐᑦ 15-ᒍᓐᓂᕈᑎᓪᓘᓃᑦ ᐊᕐᕌᒍᕐᓂ ᐊᓂᒍᕐᖃᒥᕐᓂ – ᐃᓘᓐᓇᖏᓐᓄᑦ ᐊᑕᐅᑦᓯᑯᐊᓗᒃ ᕿᒪᑦᑕᐅᒐᔭᕈᒪ ᐃᓱᒪᓇᖕᖏᑐᕐᓘᓃᑦ ᑕᒪᓐᓇ.”
ᒪᒥᓴᕆᐊᖃᕐᓂᖅ ᐊᐅᓚᑦᔭᕆᐊᕈᑎᖃᕆᐊᖃᕐᓂᓗ
ᐃᓛᓂᐅᖕᖏᑑᕐᕕᐅᓂᖅ ᑕᑯᑦᓴᑐᐃᓐᓇᑯᑦ ᓇᓗᓀᕐᓯᓂᑐᐃᓐᓇᐅᓂᖕᖏᓚᖅ, ᑭᓯᐊᓂᓕ ᓴᐳᑦᔨᓂᐊᕐᓂᕋᕈᑕᐅᓐᓂᕆᕗᖅ. ᑲᓇᑕᒥᐅᑦ ᑲᕙᒪᖓ $45-ᒥᓕᐊᓐᓂᒃ ᒪᑭᕝᕕᒨᕐᓯᓂᐊᕐᓂᕋᕐᓯᒪᕗᑦ, ᒪᑭᕝᕕᓗ ᓯᕗᓪᓕᐅᔨᒐᑦᓴᓕᐅᕐᓯᒪᓂᕋᕐᓱᓂ ᐃᔨᕐᑐᐊᖃᕆᐊᖃᖕᖏᓂᕐᒥᒃ ᓄᓇᓕᒻᒦᑐᓂᓪᓗ ᐃᓚᐅᑎᑦᓯᓂᐊᕐᓂᕋᕐᓯᒪᑦᓱᓂ ᖃᓄᖅ ᑮᓇᐅᔦᑦ ᐊᒡᒍᑕᐅᒐᔭᕐᒪᖔᑕ. ᑐᓴᐅᒪᖃᑎᒌᒍᑎᑦᓭᑦ ᐸᕐᓀᕈᑕᐅᔪᑦ ᓄᓇᕕᒻᒥᐅᑦ ᖃᐅᔨᒪᑦᓯᐊᖁᒧᑦ ᑮᓇᐅᔦᑦ ᓇᒧᖕᖓᑕᐅᒻᒪᖔᑕ.
ᑖᒃᑯᐊ ᐊᓪᓚᑕᐅᓕᕐᑎᓗᒋᑦ, ᒪᑭᕝᕕᒃ ᐊᖏᖃᑎᒌᒍᑎᐅᓯᒪᔫᑉ ᐊᑎᓕᐅᕐᕕ-ᐅᒋᐊᖃᕐᓂᖓᓂᒃ ᐅᑕᕐᕿᔪᖅ. ᐊᒥᓱᓂᒃ ᑕᕐᕿᑐᕈᓇᖅ ᓱᓇᒥᑦᑐᓂᒃ ᑮᓇᐅᔭᕐᑖᑎᑕᐅᒐᓱᐊᕐᓂᖅ, ᒪᑭᕝᕕᓗ ᓄᓇᕕᒻᒥᐅᓂᒃ ᑮᓇᐅᔭᕐᑖᑎᑕᐅᒍᓇᐅᔪᕆᑦᓯᓱᓂ ᐅᑭᐊᑦᓴᒥ 2025-ᒥ ᐱᒋᐊᕐᑐᒥᒃ.
ᑮᓇᐅᔦᑦ ᑐᕌᖓᒐᔭᕐᑎᓗᒋᑦ ᐱᖓᓱᐃᓕᕿᖓᔪᓄᑦ ᓇᓗᓀᕐᑕᐅᓯᒪᔪᓄᑦ ᕿᓄᒍᑎᓕᐅᕐᐸᓕᐊᓂᖃᓯᑎᓪᓗᒍ:
·• ᐃᓕᕐᖁᓯᓕᕆᓂᕐᒧᑦ ᐃᓅᓯᒃᑯᓗ-ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ: ᐱᐅᓕᐊᕆᐊᑦᓯᐊᓂᖅ ᐃᓕᕐᖁᓯᓕᕆᒍᓯᕐᓂᒃ, ᐃᓚᖃᕐᑎᓗᒍ ᕿᒧᑦᓯᑏᑦ ᐃᑲᔪᕐᓯᔭᐅᒍᑎᑦᓴᖏᓐᓂᒃ.
• ᐃᓱᒪᒃᑯᑦ ᐃᑲᔪᕐᓯᔭᐅᒍᑎᑦᓴᓄᑦ ᒪᒥᑉᐸᓕᐊᒍᑎᑦᓴᓄᓪᓗ: ᐱᒍᑦᔨᓂᒃᑯᑦ ᐃᓄᓐᓅᓕᖓᔪᓂᒃ-ᑐᖕᖓᕕᓕᓐᓂᒃ ᐱᓇᓱᒍᑎᑦᓴᖃᕐᓂᒧᑦ ᐅᖄᔭᐅᖃᑦᑕᕆᐊᖃᕐᓂᖏᓐᓄ ᑭᖑᕚᕇᑦ ᖁᐊᕐᓵᖓᓇᕐᑐᑰᕈᑎᒋᓯᒪᔭᖏᑦᑕ.
• ᓄᓇᖃᑦᓯᐊᕆᐊᖃᕐᓂᒧᑦ ᓂᕿᑦᓴᖃᑦᓯᐊᕆᐊᖃᕐᓂᒧᓪᓗ: ᐊᑐᐃᓐᓇᐅᑎᑦᓯᒋᐊᓪᓚᓂᕐᒧᑦ ᒪᙯᓐᓂᓂᒃ, ᐃᖃᓪᓕᐊᓂᕐᓂᒃ ᐃᑉᐱᒋᔭᖃᕐᓂᒧᓪᓗ ᐃᓄᓐᓄᑦ-ᓯᕗᓕᕐᑕᐅᔪᓂᒃ ᓂᕿᑦᓴᖃᑦᓯᐊᑎᑦᓯᒍᑎᑦᓴᓂᒃ.
ᑮᓇᐅᔦᑦ ᐊᒡᒍᑕᐅᓕᕐᐸᑕ ᐸᕐᓀᕈᑕᐅᑦᓯᐊᓛᕐᑐᑦ, ᖃᐅᔨᒋᐊᕈᑕᐅᑦᓯᐊᓗᑎᓪᓗ ᑲᑐᑦᔮᕆᔭᐅᑦᓯᐊᓗᑎᓪᓗ ᐊᑦᔨᒌᑦᑎᓯᒍᑕᐅᑦᓯᐊᒪᖔᑕ ᐃᑉᐱᒋᔭᐅᓗᑎᒃ. ᓱᓕᓗ, ᒪᑭᕝᕕᒃ ᐊᓯᖏᓐᓂᑦ ᑮᓇᐅᔭᕐᑖᕕᑦᓴᓯᐅᖃᑦᑕᒥᔪᖅ ᐃᓛᓂᐅᖕᖏᑑᕐᑕᐅᒍᑎᓂᒃ ᐅᓄᕐᓰᒋᐊᕈᑎᑦᓴᓂᒃ, ᓱᕐᕋᑕᐅᓂᖃᑦᓯᐊᖁᓗᒋᑦ ᐱᓇᓱᒍᑏᑦ ᓄᓇᕕᒻᒥᐅᓅᓕᖓᔪᑦ.
ᒪᑭᕝᕕᒃ ᕿᒥᕐᕈᓛᕐᒥᔪᖅ ᐊᑕᐅᓯᐅᑦᑎᑐᑦ ᐅᑎᕐᑎᓯᕕᐅᒍᓐᓇᕋᔭᕐᒪᖔᑕ ᑐᕃᓐᓇᑐᒃᑯᑦ ᓱᕐᕋᑕᐅᓯᒪᔪᑦ ᕿᒻᒦᔭᕐᑕᐅᓂᕕᓂᕐᓄᑦ. ᓄᑕᐅᓯᓕᕐᑕᐅᒋᐊᖃᕋᔭᕐᑐᑦ ᐅᑎᕐᑎᓯᕕᐅᒋᐊᓖᑦ ᐊᑎᖏᑦ ᑭᓪᓕᓂᕐᒥᐅᓗ ᐅᑎᕐᑎᓯᕕᐅᒋᐊᓖᑦ ᐊᑎᖏᑦ ᐊᓪᓚᑕᐅᒋᐊᖃᕋᔭᕐᓱᑎᒃ, ᓇᓗᓀᕐᑕᐅᓯᐊᕈᑎᑦᓴᖏᓪᓗ ᐋᕐᕿᑕᐅᒐᔭᕐᓱᑎᒃ ᓄᓇᓕᓐᓃᑐᑦ ᐃᓚᒋᓗᒋᑦ ᐃᓄᒻᒪᕇᓪᓗ.
ᓘᓯ ᑯᔦ, ᒪᑭᕝᕕᒥ ᐱᓇᓱᑦᑎᐅᓯᒪᔪᖅ ᐊᕐᕌᒍᕐᓂ ᐊᒥᓱᓂ ᑕᒪᑐᒥᖓ ᐱᓇᓱᐊᕐᓱᓂ, ᑮᓇᐅᔭᓂᒃ ᐅᑎᕐᑕᐅᒍᑎᑐᐃᓐᓇᒨᓕᖓᒐᔭᖕᖏᓂᕃᓐᓂᖁᖅ ᑭᓯᐊᓂᓕ ᓄᓇᓕᒻᒥᐅᑦ-ᐱᒍᒪᔭᖏᓐᓂᑦ ᐱᒋᐊᕐᑐᒥᒃ ᐱᒋᐊᕐᑎᓯᒍᑎᑦᓴᐅᒐᔭᕐᖁᑦ ᐃᓄᐃᑦ ᐃᓅᓯᕐᒥᓂᒃ ᐱᒋᐊᑦᓯᐊᕈᑎᑦᓴᖏᓐᓂᒃ. “ᓯᕗᒻᒧᕆᐊᕈᑎᑦᓴᓂᒃ ᐱᕕᑦᓴᑖᕐᑎᑕᐅᓯᒪᕗᒍᑦ,” ᐅᖃᕐᑐᕕᓂᖅ ᓘᓯ, ᐃᓛᓂᐅᖕᖏᑑᕐᕕᐅᓯᒪᓂᐅᑉ ᐱᓪᓚᕆᐅᓂᖓ ᑕᑯᑦᓱᒍ. “ᐊᕐᓱᕉᓴᕐᓃᕈᑦᑐᖅ. ᑕᒐ ᐱᒋᐊᑦᓯᐊᕈᑎᑦᓴᓂᒃ ᐱᒋᐊᕐᑐᓴᐅᓕᕐᖁᒍᑦ, ᐋᕐᕿᒋᐊᕈᑎᑦᓴᓂᒃ ᓄᓇᓕᑦᑕ ᑭᖕᖒᒪᒋᔭᖏᓐᓂᒃ.”
“ᑕᒪᓐᓇ ᑮᓇᐅᔭᕐᑖᑎᑦᓯᓂᑐᐃᓐᓇᐅᖏᑦᑐᖅ,” ᑯᔦ ᑐᑭᓯᑎᑦᓯᔪᕕᓂᖅ. “ᓄᓇᓕᑦᑎᓂᒃ ᓴᓇᕐᕈᑎᑦᓴᑖᕐᑎᓯᓂᖅ ᐃᑲᔪᕐᑕᐅᕕᑦᓴᑖᕐᑎᓯᒍᑎᐅᑦᓱᓂᓗ ᐃᓄᐃᑦ ᐃᓅᓯᕐᒥᓂᒃ ᐊᐅᓚᑦᓯᒋᐊᑦᓯᐊᕈᑎᑦᓴᖏᓐᓂᒃ ᐃᓕᕐᖁᓯᕐᒥᓂᓪᓗ ᐊᐅᓚᑦᓯᒋᐊᑦᓯᐊᕈᓐᓇᓂᐊᕐᑎᓗᒋᑦ.”
ᐃᓕᕐᖁᓯᕐᒥᒃ ᐱᒋᐊᑦᓯᐊᕈᑎᖃᕐᓂᖅ
ᓯᕗᒻᒧᕆᐊᕐᓂᑯᑦ ᐃᓄᐃᑦ ᐱᑐᒋᐊᑦᓯᐊᕈᓐᓇᐳᑦ ᓄᓇᒧᑦ ᐆᒪᔪᓄᓪᓗ ᐱᓪᓚᕆᖁᑎᒋᓲᕆᓯᒪᔭᒥᓄᑦ ᐊᓐᓇᐅᒪᒐᓱᐊᕐᓂᑯᑦ ᐊᕌᒍᒐᓵᓗᓐᓂ ᐊᓂᒍᕐᑐᓂ. ᕿᒧᑦᓯᕈᑏᑦ ᓴᓇᕐᕈᑎᑐᐃᓐᓇᐅᓯᒪᖕᖏᓚᑦ; ᐃᓕᕐᖁᓯᕐᒥᒃ ᓄᐃᑕᑎᑦᓯᒍᑎ-ᐅᓐᓂᖁᑦ, ᐱᕐᖁᓯᑐᖃᕐᒥᒃ ᐅᖑᒪᔨᐅᓐᓂᖁᖅ, ᐆᓀᑦᑐᐊᓗᒻᒦᑐᓄᓪᓗ ᐃᓄᐃᓴᒌᒃᑯᑎᑑᓲᕕᓂᐅᑦᓱᑎᒃ.
ᐱᑕ ᐋᑕᒥ ᐅᖃᕐᓯᒪᒻᒪᑦ, “ᕿᒻᒦᓂᒃᑯᐊ ᐊᓐᓇᑐᐃᔨᑐᐊᕕᓂᕗᑦ. ᐱᑕᖃᕐᓂᖏᑉᐸᑕ, ᐊᓐᓇᐅᒪᒐᔭᕐᓂᖏᓪᓚᒍᑦ ᐊᕐᕌᒍᒐᓵᓗᓐᓂ.”
ᐱᑕ ᐋᑕᒥ ᐅᖃᕐᓯᒪᒻᒪᑦ, “ᕿᒻᒦᓂᒃᑯᐊ ᐊᓐᓇᑐᐃᔨᑐᐊᕕᓂᕗᑦ. ᐱᑕᖃᕐᓂᖏᑉᐸᑕ, ᐊᓐᓇᐅᒪᒐᔭᕐᓂᖏᓪᓚᒍᑦ ᐊᕐᕌᒍᒐᓵᓗᓐᓂ.”
ᐅᖃᕐᑐᖅ ᑏᕕ ᑐᐳᐃ, ᑕᕝᕙᓂᓗ ᐊᕐᕌᒎᕐᒥ ᓱᑲᓕᐅᑎᖃᑕᐅᓛᕈᒪᑦᓱᓂ. “ᕿᒻᒦᓗ ᐊᓯᑦᔨᔪᐃᑦᑐᒥᒃ ᓇᓪᓕᓂᕐᑕᖃᕐᓱᑏᕐᒪᑕ.”
ᒪᒥᑉᐸᓕᐊᒋᐊᖃᕐᓂᖅ ᐊᑯᓂᓕᑦᓯᓚᕆᒍᓐᓇᑐᖅ, ᐋᓐᓂᑕᐅᒍᑎᕕᓃᓪᓗ ᑌᑦᓱᒪᓂᑌᑦ ᐊᑯᓂ ᒪᒥᑉᐸᓕᐊᒐᓱᐊᕈᑕᐅᒍᓐᓇᓱᑎᒃ. ᑯᔦᓗ ᐋᑕᒥᓗ ᐃᓛᓂᐅᖕᖏᑑᕐᕕᐅᓂᕐᒥᒃ ᐱᒋᐊᕐᓂᓕᒍᑎᑐᐃᓐᓇᐅᓂᕃᓐᓂᖂᒃ.
“ᐃᓛᓂᐅᖕᖏᑑᕐᕕᐅᓯᒪᓂᖅ ᐅᑎᕐᑎᓯᓂᐅᔭᖕᖏᑑᒐᓗᐊᖅ ᕿᒻᒥᓂᒃ,” ᐋᑕᒥ ᐅᖃᕐᑐᕕᓂᖅ, ᑕᒪᓐᓇ ᐱᒋᐊᕐᓂᓕᒍᑎᐅᕗᖅ. ᓵᓚᕐᖄᕆᔭᐅᑐᐃᓐᓇᕈᓐᓀᓯᔪᒍᑦ. ᐃᒻᒥᓂᒃ-ᐊᐅᓚᑦᓯᒍᓐᓇᓂᕕᓂᑦᑎᓂᒃ ᐱᒋᐊᑦᓯᐊᕈᑎᖃᓯᕗᒍᑦ ᐃᓅᑦᓱᑕ ᓄᓇᕕᒻᒥ.”
ᐊᑕᐅᑦᓯᑯᑦ ᓯᕗᒻᒧᕆᐊᕐᓂᖅ
ᑕᒪᓐᓇ ᐃᓛᓂᐅᖕᖏᑑᕐᕕᐅᓯᒪᓂᖅ ᐊᓯᑦᔨᒋᐊᕐᓂᓚᕆᐅᓯᕗᖅ ᐱᓇᓱᖃ-ᑎᒌᓐᓂᕆᓲᖓᑎᒍᑦ ᑲᓇᑕᒥᐅᑦ ᑲᕙᒪᖓᑕ ᐃᓄᐃᓪᓗ ᓄᓇᓕᓐᓃᑐᑦ ᓄᓇᕕᒻᒥ.
ᐃᓛᓂᐅᖕᖏᑑᕐᓂᖃᕐᑎᓗᒍ ᑲᖏᕐᓱᔪᐊᕐᒥ ᐃᓱᓕᐅᑎᖃᓚᐅᔪᕗᑦ, ᐃᓄᓕᒫᑦ ᐸᑎᑦᑕᕈᑎᖃᕐᑎᓗᒋᑦ, ᓯᕗᓕᕐᑕᐅᓱᑎᒃ ᐃᓄᒻᒪᕆᒻᒧᑦ.
ᓄᓇᕕᒻᒥᐅᓄᑦ ᐊᒥᓱᐃᑎᒍᑦ, ᐃᓛᓂᐅᖕᖏᑑᕐᕕᐅᓂᖅ ᐅᖃᐅᓯᑐᐃᓐᓇᐅᓂᕋᕐᑕ-ᐅᖏᓪᓚᖅ – ᓄᐃᑦᓯᒍᑎᐅᕗᖅ ᓂᕆᐅᓐᓂᖃᕐᓂᒥᒃ ᐊᔪᐃᓐᓇᕈᒪᓂᕐᒥᓗ. ᓘᓯ ᑯᔦ ᐅᖃᕐᓂᒪᑦ, “ᐊᑕᐅᑦᓯᑯᑦ ᓯᕗᒻᒧᕆᐊᖃᑎᒌᓚᖓᕗᒍᑦ. ᑕᒪᓐᓇ ᐱᒋᐊᕐᓂᓕᒍᑎᑐᐃᓐᓇᖅ.”
ᒪᑭᕝᕕᐅᑉ ᐳᕐᑐᓂᕐᓴᖁᑎᖏᑦ ᐱᓇᓱᑦᑎᖏᓪᓗ ᖃᐅᔨᕙᓪᓚᕈᒪᕗᑦ ᐃᓄᒻᒪᕆᓐᓂᒃ ᓄᓇᕕᒻᒥᐅᓂᒃ ᐃᓛᓂᐅᖕᖏᑑᕕᐅᒋᐊᕐᑐᑐᓃᑦᑐᕕᓂᕐᓂᒃ ᐅᓂᒃᑳᕕᖃᕐᓱᑎᓪᓗ ᑐᕐᖃᑕᕐᕕᒥᒃ. ᒪᑭᕝᕕᒃ ᐅᐱᒍᓱᕝᕙᓛᒍᒪᒋᕗᖅ ᑲᖏᕐᓱᔪᐊᕐᒥᐅᓂᒃ ᑐᖕᖓᓱᑦᑎᓯᓚᐅᔪᒻᒪᑕ ᐃᓛᓂᐅᖕᖏᑑᕐᕕᐅᒋᐊᕐᑐᑐᓂᒃ ᑐᖕᖓᓱᑦᑎᓯᓚᐅᔪᑦᓱᑎᓪᓗ ᐃᓄᒻᒪᕆᓐᓂᒃ ᐁᓯᒪᖃᑕᐅᔪᓂᓪᓗ ᓱᑎᑦᓯᓂᖃᓚᐅᕐᑎᓇᒍ, ᓱᑎᑦᓯᓂᖃᓕᕐᑎᓗᒍ, ᐃᓛᓂᐅᖕᖏᑑᕐᕕᐅᒌᕐᓂᖃᕐᑎᓗᒍᓗ.
ᐃᓛᓂᐅᖕᖏᑑᕐᑐᓕᕆᔪᑦ ᐊᑐᐊᕋᑦᓴᐅᕗᑦ ᐅᕙᓂ:
https://www.rcaanc-cirnac.gc.ca/iku/1732300419996/173230 0456676
