ᑕᑯᓐᓇᕋᑦᓴᔭᓕᐊᖑᔪᖅ ᐅᓂᒃᑲᐅᓯᖃᕐᐳᖅ ᐃᓅᓯᐅᔪᓂᒃ ᓄᓇᕕᐅᑉ ᓄᓇᓕᐊᕈᒋᓂᕐᐹᖓᓂ ᑭᓯᐊᓂᓗᑦᑕᐅᖅ ᓄᐃᑦᓯᒍᑎᐅᕗᖅ ᐱᒻᒪᕆᐅᓈᕐᑎᓱᑎᒃ ᐱᓂᐊᕐᓂᓕᕆᓂᑎᒍᑦ ᐱᔭᑦᓴᖁᑕᐅᔪᓂᒃ
ᐊᓪᓚᑕᖏᑦ ᒥᐊᕆᐊᒻ ᑑᐅ
ᒪᑭᕝᕕᐅᑉ ᐊᖓᔪᕐᖄᒪᕆᖓ ᐱᑕ ᐋᑕᒥ ᐃᑦᓯᕙᕗᖅ ᐃᑦᓯᕙᐅᑕᒥ ᑭᖏᑦᑐᒥ ᑐᖑᔪᐊᖓᔪᒥᒃ ᐊᑦᔨᓕᐅᕆᔩᑦ ᐊᑭᓐᓇᖃᕐᑎᓯᒍᑎᒋᓱᖓᓂᒃ ᑐᓄᒥᐅᑕᖃᕐᓱᓂ, ᑕᒪᓐᓇ ᐊᑑᑎᔭᖓᑦ ᒪᓐᑐᔨᐊᒦᑦᓱᑎᒃ ᑐᔪᕐᒥᐅᕕᒻᒥ ᖃᓂᑦᑐᒥ ᒪᑭᕝᕕᐅᑉ ᐊᓪᓚᕕᖏᓐᓄᑦ. ᐱᑕ ᐊᓐᓄᕌᕐᓯᒪᔪᖅ ᕿᕐᓂᑕᓂᒃ ᓯᑕᒪᓂ ᑕᕐᕋᓕᔮᒐᑦᓴᓕᐅᕐᑎᓂᒃ ᐊᕙᑎᒥᓂ ᐱᓇᓱᑦᑎᐊᖃᕐᓱᓂ. ᐃᓄᒃ ᓂᐱᓕᐅᕆᔨ ᐊᑐᕐᑐᖅ ᓯᐅᑎᒻᒥᒑᕈᑏᓐᓂᒃ ᑎᒍᒥᐊᕐᓱᓂᓗ ᖃᓂᖕᒍᑎᒥ ᐱᓇᓱᑉᐳᖅ, ᐆᓪ ᔮᔅᑕ ᐊᑦᔨᓕᐅᕈᑎᐅᑉ ᑐᓄᐊᓂ ᓂᑯᕐᕋᑎᓪᓗᒍ, ᑌᒣᓕᖓᑦᓱᓂ ᑭᓯᑦᓯᓕᕐᐳᖅ ᐱᒋᐊᕐᐸᓕᐊᓯᒐᒥᒃ ᐱᒋᐊᖕᖓᕕᖃᕐᓱᓂ ᐱᖓᓱᑦ,ᒪᕐᕉᒃ, ᐊᑕᐅᓯᖅ…“ ᐃᕝᕕᐅᒋᐊᖃᓕᕐᖁᖅ ᐱᑖ.”
ᑖᓐᓇ ᑕᑯᓐᓇᕋᑦᓴᓕᐅᕆᓂᖅ ᑭᖑᓪᓕᐹᕐᑕᕆᑐᐃᓐᓇᕆᐊᖃᓕᕐᑕᖓ ᑖᒃᑯᓇᓂ ᐱᓇᓱᑦᑕᐅᔪᓂ ᑌᒪᖕᖓᑦ ᒪᑭᕝᕕᐅᑉ ᓄᓇᓕᓐᓂ ᑭᒡᒐᑐᕐᑎᖏᑦ ᑲᑎᖕᖓᓚᐅᔪᑎᓪᓗᒋᓂᑦ 2021ᒥ. ᐊᐅᐸᓗᒃ: ᓄᓇ ᐊᐅᐸᕐᑐᖅ, ᐱᓇᓱᑦᑕᐅᔫᑉ ᐊᑦᓯᕋᐅᑎᑕᕐᑕᐅᒪᒍᑎᖓ, ᐃᓱᒪᑕᖑᓚᐅᔪᕗᖅ ᑲᑎᖕᖓᔪᓂ ᓄᓇᓕᐅᑉ ᑭᒡᒐᑐᕐᑎᖓ ᒫᑭ ᐊᕐᐹᖃᑦᑕ ᐊᑕᓐᓂᐅᕈᑎᖃᓚᐅᕐᑎᓗᒍ ᑕᑯᓐᓇᕋᑦᓴᔭᓕᐊᖑᖁᔨᑦᓱᓂ ᐊᐅᐸᓗᒻᒥᐅᓂᒃ ᓴᐳᑦᔨᒍᑎᐅᒐᔭᕐᑐᓂᒃ, ᐅᓂᒃᑲᐅᓯᖃᕐᓗᑎᒃ ᒫᑭᒃᑯᑦ ᓄᓇᓕᒻᒥᓂ ᐃᓅᓯᖏᓐᓂᒃ ᑲᕙᒪᓄᓪᓗ ᐅᔭᕋᓐᓂᐊᑎᓄᓪᓗ ᐅᖁᒣᑦᑐᑯᕐᑎᑕᐅᑦᓱᑎᒃ. ᒫᑭᐅᑉ ᐊᑕᓐᓂᐅᕈᑎᖏᑦ ᐊᖏᕐᑕᐅᓚᐅᔪᑦ ᐊᒻᒪᓗ ᒍᐃᓕᐋᒻ ᑕᒍᕐᓈᖅ, ᐃᓚᖃᕐᓱᓂ ᐆᓪᒥᓪᓗ ᐱᓇᓱᑎᖏᓐᓂᓗ, ᒍᐃᓕᐋᒻ ᓇᒻᒥᓂᖅ ᐱᓇᓱᖃᑎᒋᓚᐅᓯᒪᒻᒥᔭᖏᓐᓂᒃ 2015ᒥ ᑕᑯᓐᓇᕋᑦᓴᔭᓕᐅᕐᓱᑎᒃ ᑕᕐᕋᓕᔮᒐᕐᓂᒃ ᐊᑦᓯᕋᐅᑎᓕᓐᓂᒃ So That you Can Stand, Napagunaqullusi, ᓇᐸᒍᓐᓇᖁᓪᓗᓯ ᐊᒻᒪᓗ ᐅᑯᓂᖓ ᑭᖑᓕᕇᑦᑐᓴᓕᐊᖑᓯᒪᑦᓱᑎᒃ ᓄᐃᑕᖃᑦᑕᓚᐅᔪᔪᓂᒃ , ᐊᐅᐸᓗᓕᐊᓯᓚᐅᔪᕗᑦ.
“ᐱᓇᓱᖃᑎᒋᒋᐊᖏᑦ ᐊᓕᐊᓇᕐᐸᑐᑦ ᑖᒃᑯᐊ ᐱᓇᓱᖃᑎᒌᑦᑐᑦ. ᐱᓇᓱᖃᑎᒌᑉᐸᓕᕋᑦᑕ 2014 ᐊᕐᕌᒍᖓᓂᓂᒐᓛᒃ,” ᐅᖃᕐᑐᖅ ᒍᐃᓕᐋᒻ. “ᓄᐃᑦᓯᓯᒪᓕᕋᑕ ᐊᑯᕐᖓᑎᓐᓂ ᐱᓇᓱᖃᑎᒌᑦᓯᐊᕈᓐᓇᓂᕐᓂᒃ.” ᒪᑭᕝᕕᒃ ᐱᓇᓱᑉᐸᑐᑐᖃᐅᒻᒪᑦ ᐊᕐᕌᒍᓂ ᐅᓄᕐᑐᓂ ᐅᓂᒃᑲᐅᓯᓕᐅᕐᓂᖃᕐᓱᓂ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᐊᓯᒪᓂᖏᓐᓂᒃ ᑕᑯᑦᓴᕈᕐᓱᒋᑦ ᐊᒥᓱᐃᑎᒍᑦ, ᓴᕐᕿᑎᑦᓯᓂᖃᕐᓱᓂ ᓄᐊᑕᐸᑦᓴᓂᒃ ᓯᕗᓂᑦᓴᑎᓐᓂ ᑭᖑᕚᓄᑦ ᐱᔭᐅᔪᑦᓴᓂᒃ.
ᓯᕗᓪᓕᐹᒥ ᐊᐅᐸᓕᐊᕐᓱᑎᒃ, ᑕᑯᔭᕐᑐᓚᐅᔪᔪᑦ ᓄᓇᒥᒃ ᑎᒍᒥᐊᕐᑎᑯᑦ ᐊᒡᓚᕕᖓᓐᓂᒃ ᑕᓪᓕᒪᓂᒃ ᓄᓇᖕᖑᐊᓂᒃ ᐊᑭᓐᓇᒥᐅᑕᓕᖕᒥᒃ. ᓯᕗᓪᓕᐹᖓᑦ ᓄᐃᑕᑎᑦᓯᔪᖅ ᐊᐅᐸᓗᖕᒥᐅᑦ ᓄᓇᑕᕆᒍᒪᕐᖃᓯᒪᔭᖏᓐᓂᒃ ᑭᓯᑦᔪᑎᖃᕐᓱᑎᒃ 1ᒥᓪᓗ ᐊᒻᒪᓗ 2ᒥᒃ. ᓄᓇᖕᖑᐊᑦ ᑕᒃᓕᒪᖓᑦ ᓄᐃᑕᑎᑦᓯᔪᖅ ᓄᓇᑖᕐᑎᑕᐅᒍᑎᒋᓯᒪᔭᖏᓐᓂᒃ, 15%ᕋᐱᑐᐃᓐᓇᖏᓐᓂᒃ ᓄᓇᑕᕆᒍᒪᓯᒪᔭᒥᑕ. ᐱᒍᒪᓪᓚᕆᑦᑕᒥᓂᒃ ᕿᐱᓗᕝᕕᐅᓯᒪᔪᑦ, ᐊᒻᒪᓗ ᓄᓇᑖᖏᑦ ᑭᓯᑦᔪᑎᓖᑦ 1ᒥᒃ ᓯᖃᓪᓕᔭᐅᒪᑦᓱᑎᒃ ᓯᑕᒪᐅᓕᔭᐅᑦᓱᑎᒃ. “ᐃᕐᐸᖓᔪᑦ,” ᐆᓪ ᐅᖃᕐᑐᖅ, “ᐊᓯᕐᕿᓯᒪᔫᔮᕐᑐᑦ.” ᑐᑭᑖᓚᐅᔪᕗᑦ ᑕᒪᓐᓇ ᐅᓂᒃᑲᐅᑎᓂ ᐅᓂᒃᑳᑕᐅᓪᓚᕆᓐᓂᐹᐅᔪᑦᓴᐅᒋᐊᖓ.
ᐊᐅᐸᓗᖕᒥ ᖃᐅᔨᔭᖏᑦ ᐁᑉᐸᖃᓚᐅᔪᔪᑦ ᐊᑦᔨᒌᖑᖕᖏᑐᓂᒃ ᐃᓱᒪᓕᐅᕈᑎᖃᕐᓯᒪᓂᖃᕆᐊᖓ ᐃᓕᖓᔪᓂᒃ ᖃᓄᐃᓘᕐᑕᐅᔪᑦᓴᐅᒪᖔᑕ ᓴᕐᕿᔮᕐᓂᖃᕇᕐᑐᑦ ᐅᓗᕆᐊᓇᕐᑐᑦ ᓴᕐᕿᑎᑕᐅᒪᔪᑦ ᐅᔭᕋᓐᓂᐊᓂᒃ ᐱᓇᓱᒐᖁᑎᓕᓐᓄᒃ. ᐆᓪ ᐅᖃᓚᐅᔪᔪᖅ ᓯᕗᓪᓕᐹᑦ ᐃᓱᒪᔮᕈᑎᐅᔪᑦ ᐊᒻᒪᓗ ᑯᑮᖓᒍᑎᐅᔪᑦ ᐃᓄᓐᓄᑦ ᐃᓕᖓᓚᐅᔪᒋᐊᖏᑦ ᐃᓚᐅᒐᔭᕈᑎᒃ ᐊᑦᔨᖑᐊᑎᒍᑦ ᐅᓂᒃᑲᐅᓯᓕᐅᕐᑐᓄᑦ ᑌᒣᓕᖓᓂᖃᕈᓐᓀᓚᐅᔪᕗᓪᓗ. ᐃᓱᐊᓂᓕ ᑖᒃᑯᐊ ᑕᑯᓐᓇᕋᑦᓴᓕᐊᖑᔪᑦ ᐃᓘᓐᓀᓄᑦ ᐊᐅᐸᓗᖕᒥᐅᑦ ᐊᖏᖃᑎᒌᒍᑎᐅᓕᓚᐅᔪᕗᑦ ᓄᓇᒥ ᑎᒃᓕᒉᔭᐅᒪᓂᕋᕈᑎᖏᑦ, ᑕᒪᓐᓇᓗ ᑲᒪᒋᔭᐅᔪᑦᓴᐅᓱᓂ. ᐃᓄᑐᐃᓐᓀᑦ ᐃᓘᓐᓇᑎᒃ ᐊᖏᖃᑎᒌᓐᓂᖃᓚᐅᔪᕗᑦ.
ᐱᓇᓱᑦᑕᐅᔪᑦ ᐅᓂᒃᑲᐅᓯᓕᐅᕐᓂᑐᐃᓐᓇᐅᓚᐅᔪᒍᓐᓀᑐᑦ ᓄᓇᒥᒃ ᓱᒃᑯᑕᐅᒍᓇᕐᒥᒃ ᐅᓂᒃᑲᐅᓯᑐᐃᓐᓇᐅᒍᓐᓀᓱᑎᒃ, ᐅᓂᒃᑲᐅᓯᖏᑦ ᐱᓂᐋᕐᓂᓕᕆᓂᕐᒥᒃ ᐃᓚᑕᓚᐅᔪᒻᒪᑕ. ᑕᕐᕋᓕᔮᑎᒍᑦ ᑕᑯᓐᓇᕋᑦᓴᓕᐊᕕᓃᑦ ᓄᐃᑕᒋᐊᖕᖓᓯᒐᒥ ᑕᑯᑦᓴᐅᑎᑦᓯᔪᖅ ᐊᕐᐹᖃᑦᑕᑯᓐᓂᒃ ᐃᓚᒌᓂᒃ ᐅᐱᕐᖓᓴᒥ ᐱᓇᓱᐊᕈᓯᐅᑉ ᓄᖕᖑᐊᓂ ᐃᖃᓪᓕᐊᓯᒪᔪᓂᒃ ᑕᑯᑦᓴᐅᑎᑦᓯᒥᑦᓱᓂᓗ ᑕᑯᒥᓇᕐᑐᔪᐊᖑᓂᖓᓂᒃ ᓄᓇᕕᐅᑉ ᓄᓇᖓᑕ.
“ᑕᒪᒃᑯᐊᑕᒃᒐ ᐃᓄᐃᑦ ᓯᓚᒥᓐᓂᒃ ᐊᕙᑎᒥᓐᓂᒃ ᓴᕐᕿᔮᖃᑎᖃᑦᓯᐊᑐᑦ, ᑕᒪᓐᓇ ᐃᑦᔪᓀᑦᑐᓂᖃᕇᔭᕐᑐᖅ ᑖᒃᑯᓄᖓ ᐃᓄᑐᐃᓐᓇᓄᑦ.” ᐆᓪ ᑐᑭᓯᑎᑦᓯᒍᑎᖃᕐᑐᖅ, ”ᖃᓄᐃᓘᕐᓗᒍᓗ ᓱᕐᕋᑕᐅᑎᑦᑌᓕᔭᐅᒍᓐᓇᒪᖔᑦ. ᐅᔭᕋᓐᓂᐊᓂᕐᒥᒃ ᐱᒍᒪᔭᖃᕐᓂᐅᖏᑦᑐᖅ, ᐅᔭᕋᓐᓂᐊᓂᕐᒥᒃ ᐊᑭᕋᕐᑐᓂᐅᖕᖏᑐᖅ, ᐃᓕᖓᒐᒥᓕ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓄᑦ ᐃᓱᐊᓂᓗ ᐃᓕᖓᓂᖃᕐᓂᐊᖏᓪᓚᖅ ᐊᐅᐸᓗᒻᒨᓕᖓᓂᕐᒥᒃ. ᐃᓕᖓᒐᒥ ᓄᓇᓕᓕᓄᑦ. ᐊᐅᐸᓘᑉ ᖃᓄᐃᓕᖕᖓᑕᐅᒪᓂᖓ ᐊᖏᓂᕐᐹᒥ ᐱᐅᖕᖏᑐᒻᒪᕆᐅᓂᓕᒃ, ᑭᓯᐊᓂᓕ ᐃᓚᖓᒍᑦ ᐃᓕᖓᕗᖅ ᓄᓇᒥᒃ ᑎᑎᕐᑐᐃᓯᒪᓂᕐᓄᑦ, ᑕᒪᓐᓇ ᓄᓇᓕᓐᓂ ᐃᓘᓐᓇᖏᓐᓂ ᓄᓇᕕᒻᒥ ᐊᑑᑎᔭᐅᓂᖃᕐᓯᒪᒻᒪᑦ. ᐱᓂᐊᕐᓂᐅᓯᒪᑦᓱᓂᓗ ᓄᓇᓕᑐᖃᐅᔪᑦ ᓄᓇᓕᖏᓐᓂ ᑲᓇᑕᓕᒫᒥ.”
ᒍᐃᓕᐋᒻ ᐊᖏᖃᑕᐅᔪᖅ. ᐅᖃᕐᓱᓂᓗ ᐱᒻᒪᕆᐅᓂᖏᑦ ᑖᒃᑯᓂᖓ ᑕᑯᓐᓇᕋᑦᓴᔭᑎᒍᑦ ᐅᓂᒃᑲᐅᓯᓕᐅᕐᓂᖅ ᐱᒋᐊᖕᖓᕕᖃᕐᓯᒪᒋᐊᖓ 1960ᓃᑦᑐᑦ ᐊᕐᕌᒍᖏᓐᓂ ᑌᑦᓱᒪᓂ ᐃᓄᑐᐃᓐᓀᑦ ᐱᔮᕆᔭᐅᓯᒪᒻᒪᑕ, ᑕᒣᓐᓂ ᐃᓕᖕᓂᐊᕕᓐᓂᓗ, ᐅᕝᕙᓘᓐᓃᑦ ᐋᓐᓂᐊᕕᓐᓂ. ᐃᓄᑐᐃᓐᓀᑦ ᐊᓐᓂᓇᖕᖏᑐᖁᑕᐅᓯᒪᒻᒪᑕ, ᐅᖃᕐᑐᖅ ᑌᒣᓕᑦᓱᓂ,
ᐱᓇᓱᑉᐳᒍᑦ ᑕᒪᒃᑯᐊ ᐋᕐᕿᒍᑎᑦᓴᓯᐅᕐᓱᒋᑦ ᐱᔮᕆᔭᐅᒍᑎᐅᓯᒪᔪᑦ ᐊᕐᕌᒍᕐᓂ ᐊᓂᒍᕐᓯᒪᓕᕐᑐᓂ, ᖃᓄᐃᓘᕐᓂᑎᒍᓪᓗ ᐊᐅᐸᓗᖕᒥᐅᓂᒃ ᐅᓂᒃᑲᐅᓯᖃᕐᓂᑯᑦ ᑕᒪᒃᑯᓂᖓ ᓴᕐᕿᑎᑦᓯᕙᓪᓕᐊᓂᖃᕐᖁᔨᕗᖓ. ᑕᒪᒃᑯᐊ ᐃᓚᒋᔭᐅᒻᒪᑕ ᐱᑦᓯᐊᕕᐅᖕᖏᓯᒪᓂᑦᑎᓄᑦ ᐊᕐᕌᒎᖃᑦᑕᓯᒪᔪᓂᒃ ᑕᒪᓐᓇᓗ ᐊᐅᐸᓗᖕᒥᐅᑦ ᐃᓚᐅᒍᑎᒋᕙᖓ ᐃᓕᖓᑎᓪᓗᒍ ᓄᓇᓂᒃ ᑎᑎᕐᑐᐃᓂᓄᑦ.
ᐱᓂᐊᕐᓂᓕᕆᓂᑎᒍᑦ ᐱᑦᓯᐊᑕᐅᓯᒪᖕᖏᓃᑦ ᐃᓕᖓᑦᓱᑎᒃ ᓄᓇᓂᒃ ᓇᓗᓀᔦᓂᕐᓄᑦ ᑐᑭᓯᓂᐊᕐᑕᐅᓯᒪᕗᑦ ᑭᖑᓕᕆᑦᑎᑐᓂ ᑕᑯᓐᓇᕋᓴᔭᓕᐊᖑᒪᔪᓂ ᐊᑦᓯᕋᐅᑎᖃᕐᓱᑎᒃ “Building the Inuit Homeland”, ᐊᒻᒪᓗ ᐆᓪ ᐅᖃᕐᑐᖅ ᓄᓇᕕᒃ ᓯᕗᓪᓕᐹᖑᑦᓱᓂ ᐊᖏᖃᑎᒌᒍᑎᖃᕋᓱᑦᓯᒪᒋᐊᖓ ᓄᓇᑖᕐᓂᕋ ᐅᑎᑦᓴᓂᒃ, ᐊᓯᖏᑦ ᐃᓄᑐᐃᓐᓀᑦ ᓄᓇᖁᑎᖏᑦ, ᓲᕐᓗ ᓄᓇᕗᑦ ᐊᒻᒪᓗ ᓄᓇᑦᓯᐊᕗᑦ, ᑕᑯᒍᓐᓇᓯᓯᒪᒋᐊᖏᑦ ᖃᓄᖅ ᑕᒻᒪᑲᑦᑕᓂᖃᕐᓯᒪᒻᒪᖔᑦᑕ ᖃᐅᔨᒍᓐᓇᓯᓚᕿᓯᒪᓚᐅᔪᕗᑦ ᖃᓄᐃᓘᕆᐊᖃᕆᐊᖃᕐᓂᒥᓂᓪᓗ ᐊᖏᖃᑎᒌᒐᓱᓐᓂᖃᕐᓂᒥ ᓯᕗᓂᖓᓂ ᑕᒪᓐᓇᓗ ᐱᓂᐊᕐᓂᕆᓕᓚᐅᔪᑦᓱᒍ ᐊᕐᕌᒍᑦ ᐅᓄᕐᑐᑦ ᐊᓂᒍᕐᑎᓗᒋᑦ.
“(ᓄᓇᕕᒃ) ᐊᑭᑐᔪᒥᒃ ᓯᕗᓪᓕᐸᐅᓂᑯᒥᓄᑦ ᐊᑭᓖᓯᒪᕗᖅ. ᑕᒪᓐᓇ ᑌᒣᓕᖓᔪᖅ,” ᐅᖃᕐᑐᖅ ᐆᓪ. “ᑭᓯᐊᓂ ᑲᒪᒋᔭᐅᔪᑦ. ᓱᔪᖃᕐᓂᐅᓯᒪᔪᑦ ᑭᖑᓂᑦᑎᓃᑦᑐᑦ, ᓄᓇᐅᑉ ᑎᒃᓕᒐᐅᓂᖓ, ᓱᖁᑎᖃᖕᖏᓃᑦ ᓄᓇᓕᑐᙯᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᖏᖃᑎᒌᒍᑎᐅᖃᑦᑕᓯᒪᔪᓂᒃ, ᐃᕐᖃᑐᐃᕕᑎᒍᑦ ᓵᑕᐅᓂᖃᕐᐸᓕᐊᕗᑦ.”
ᑌᒪᓕ ᑖᒃᑯᐊ ᑕᑯᓐᓇᕋᑦᓴᓕᐊᖑᔪᑦ ᐊᐅᐸᓗᒻᒥᐅᓂᓪᓗ ᓄᓇᒥᓄᓪᓗ ᐱᑐᑦᓯᒪᓂᖏᓐᓂᒃ ᐅᓂᒃᑲᐅᓯᐅᒐᓗᐊᕐᑎᓗᒋᑦ, ᐊᑕᐅᑦᓯᑯᑦ ᐊᒻᒣᒍᑎᐅᒋᕗᑦ ᓄᓇᕕᒻᒥᐅᓄᑦ ᖃᓄᐃᓘᕆᐊᕈᑎᑦᓴᐅᓱᑎᒃ ᐱᔪᓐᓇᐅᑎᖏᓐᓂᒃ ᓇᓗᓀᕆᓂᑦᓴᑯᑦ. “ᓴᒃᑯᓴᑦᓯᐊᖑᔪ, ᑲᕙᒪᓂᒃ ᐊᐅᓚᑦᔦᒋᐊᕈᑎᑦᓴᓯᐊᖑᓂᕐᒥᒍᒃ,” ᐅᖃᕐᑐᖅ ᐆᓪ. ᑖᒃᑯᐊ ᑕᕐᕋᓕᔮᑦ ᓂᐱᓕᐅᕐᓯᒪᓛᕐᑐᑦ ᖃᓪᓗᓈᕐᑎᑐᑦ (ᒍᐃᓕᐋᒻ ᓂᐱᖃᕐᑎᓯᑎᓪᓗᒍ), ᐃᓄᒃᑎᑐᓪᓗ ᐊᒻᒪᓗ ᒍᐃᒍᐃᑎᑐᑦ. “ᑖᒃᑯᐊ ᑕᑯᓐᓇᕋᑦᓴᓕᐊᖑᔪᑦ ᓄᐃᑕᑎᑕᐅᓂᖃᕆᐊᖃᕐᐳᑦ ᑯᐯᒃᒥ. ᒪᑭᕝᕕᒃ ᑲᑎᖕᖓᓯᔭᕐᑐᓕᕐᐸᑦ (ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᖓᓐᓂᒃ) ᕙᕋᓐᓱᐊ ᓗᑰᒥᒃ ᐅᖃᕈᓐᓇᐅᑎᐅᓛᓕᕋᒥᒃ ᐃᒫᒃ, ‘ᐅᑯᐊᑕᒃᒐ ᖃᓄᐃᓕᖓᓂᐅᔪᑦ, ᐅᑯᐊᑕᒃᒐ ᓱᔪᖃᕐᓯᒪᓂᐅᔪᑦ, ᐅᖄᒍᑎᒋᓕᕐᓚᕘᑦ?’“
ᑕᕐᕋᓕᔮᒐᑦᓴᓕᐅᕐᓂᐅᑉ ᐅᓪᓗᖏᑕ ᑭᖑᓪᓕᐹᕆᓕᕐᑕᖓᓂ, ᒪᑭᕝᕕᐅᑉ ᐳᕐᑐᓂᕐᓴᖏᑦ ᐊᐅᐸᓗᓕᐊᓚᐅᔪᕗᑦ ᑕᑯᓐᓇᕆᐊᕐᑐᓱᑎᒃ. ᒍᐃᓕᐋᒻ ᐅᖃᓚᐅᔪᖅ ᑖᓐᓇ ᐳᕐᑐᓂᕐᓭᑦ ᐊᐅᐸᓗᓕᐊᕐᓂᖓᑦ ᐱᒻᒪᕆᐅᓂᖃᕆᐊᖓ.
“ᑕᑯᑦᓴᐅᕗᑦ ᑖᒃᑯᓇᓂ ᐅᓂᒃᑲᐅᓯᕐᓂ ᖃᓄᖅ ᑲᕙᒪᒃᑯᓗ ᐱᓇᓱᒐᖃᕐᕕᒪᕆᐅᔪᓪᓗ, ᐊᖏᖃᑎᒌᒐᓱᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ, ᐃᓄᑐᐃᓐᓇᓂᒃ ᐃᓱᒪᓯᒪᖕᖏᓚᕆᓐᓂᖏᑦ. ᐊᑐᕈᒪᔭᕐᓱᑐᐃᓐᓇᓯᒪᑦᓯᐊᑐᑦ. ᑌᒣᒻᒪᑦ ᐱᒻᒪᕆᐅᓂᖃᕐᐳᑦ ᒪᑭᕝᕕᐅᑉ ᐳᕐᑐᓂᕐᓴᖏᑕ ᐊᐅᐸᓗᓕᐊᕐᓂᖓᑦ ᑲᑎᖕᖓᓯᖏᐊᕐᑐᓱᑎᒃ ᓄᓇᕕᒻᒥ ᓄᓇᓖᑦ ᓄᓇᓕᐊᕉᓂᕐᐹᖓᓐᓂᒃ ᑕᑯᑦᓴᐅᑎᑦᓯᓱᑎᒃ ᓴᐳᑦᔨᓯᒪᓂᕐᒥᓂᒃ, ᐊᖏᔪᐊᓗᒻᒥᒃ ᐅᓂᒃᑲᐅᓯᓕᐊᓄᑦ ᑕᒪᓐᓇ ᐱᔪᖃᕐᓂᐅᓚᐅᔪᖅ. ᐊᒻᒪᓗ ᐊᐅᐸᓗᒻᒥᐅᑦ ᓈᓚᑦᑕᐅᓱᑎᒃ ᒪᑭᕝᕕᒧᑦ, ᐃᓄᑐᐃᓐᓀᑦ ᐱᓇᓱᒐᖃᕐᕕᖁᑎᑐᐊᓪᓚᕆᖓᓄᑦ ᔦᒥᓯ ᐯ ᐊᖏᖃᑎᒌᒍᑕᐅᒪᓂᖓᓂ.”
ᒪᓐᑐᔨᐊᒥ ᑐᔪᕐᒥᐅᕕᐊᓗᒻᒥ, ᐱᑕ ᐋᑕᒥ 11ᕕᑦᓱᓂ ᐊᑦᔨᓕᐅᕐᑕᐅᒋᐊᕈᑎᒋᖃᑦᑕᑕᒥᓂᒃ ᐱᔭᕇᕐᐳᖅ. ᐆᓪ ᑕᑯᔭᐅᑎᓛᕐᑕᖏᑦ ᒍᐃᓕᐋᒻᒧᑦ ᑐᑭᑕᕈᑎᒋᓛᕐᓗᒋᑦ ᓇᓪᓕᖓᓐᓂᒃ ᓄᐃᑕᔪᑦᓴᓕᐅᓛᕐᓂᒥᒃ, ᐃᓄᒃᑎᑐᕐᓂᑐᐃᓐᓇᖏᓐᓅᖏᑦᑐᖅ, ᑭᓯᐊᓂᓕ ᑐᓴᕐᑕᐅᑎᑦᓯᒍᑎᖏᑦ ᑕᒻᒪᖏᒃᑲᓗᐊᕐᒪᖔᑕ. ᑕᑯᓐᓇᕋᑦᓴᓕᐊᖑᖃᑦᑕᓯᒪᔪᑦ ᐱᓇᓱᖃᑦᑕᓯᒪᔭᒥᑕ ᓴᓂᐊᓐᓂ, ᐆᓪ ᐅᖃᕐᑐᖅ, ᑖᒃᑯᓂᖓ ᓄᐃᑦᓯᒍᑎᐅᓂᕃᑦᓱᓂ ᖃᓄᐃᓕᖓᓂᐅᓕᕐᑐᓂᒃ ᐊᒻᒪᓗ ᐋᕐᕿᒍᑎᑦᓴᑕᖏᓐᓂᒃ ᖃᓂᑦᑐᓂᕃᑦᓱᓂ ᒪᑭᕝᕕᐅᑉ ᐱᒍᒪᔭᖏᓐᓄᑦ ᐱᒐᓱᑦᑕᖏᓐᓄᓗ.
“ᑌᒣᒻᒪᑦ, ᐱᒻᒪᕆᐅᓂᖃᕐᐳᑦ ᐱᑦᓯᐊᓯᒪᒋᐊᖃᕐᓂᖏᑦ. ᒫᓂ, ᒪᑭᕝᕕᓗ ᐱᑕᓗ ᐱᓇᓱᒍᑦᔨᒐᒃᑭᒃ.”
