ᔫᓂᒥ ᔪᓓᒥᓪᓗ 2024-ᒥ, ᒪᑭᕝᕕᐅ ᐃᒻᒥᓂᒃ-ᐊᐅᓚᑦᓯᒍᒪᓂᕐᒥᒃ ᐱᓇᓱᑦᑎᖏᑦ ᐊᕐᕕᑕᕐᓂᖃᓚᐅᔪᕗᑦ ᓄᓇᕕᒻᒥ ᓄᓇᓕᓕᒫᓄᑦ, ᓄᓇᕕᒻᒥᐅᓂᒃ ᐃᓄᓐᓂᒃ ᐱᑐᑦᓯᒪᖃᑎᖃᕈᒪᑦᓱᑎᒃ ᐱᓇᓱᖃᑎᖃᕈᒪᑦᓱᑎᓪᓗ. ᑕᒪᑐᒥᖓ ᐱᒋᐊᕐᑎᓯᑦᓱᑎᒃ, ᓯᕗᓕᕐᑎᓗᒍ ᐊᖏᖃᑎᒌᒐᓱᐊᖃᑎᒌᑦᑐᓂᒃ ᐋᓐᑕᓂ ᐃᑦᑐᓵᑦ, ᑐᖓᓕᖃᕐᓱᓂ ᑐᓄ ᓇᐹᕐᑐᒥᒃ, ᐊᑕᐅᑦᓯᑰᕐᑎᓯᔨᒋᔭᐅᑎᓪᓗᒍ ᕕᑦᑑᕆᐊ ᑯᐊᑕ, ᐱᓇᓱᖃᑎᒌᒍᑎᖃᓚᐅᔪᕗᑦ ᑐᓴᕐᑕᐅᑎᑦᓯᓂᕐᒥᒃ ᐱᕙᓪᓕᐊᔭᒥᓂᒃ, ᐱᓗᐊᕐᑐᖅ, ᓂᐸᖃᕈᑕᐅᖁᔨᑦᓱᑎᒃ ᓯᕗᓂᕐᒥ ᐃᓄᐃᑦ ᓇᒻᒥᓂᖅ-ᐊᐅᓚᑦᓯᒍᒪᓂᖓᓂᒃ.
ᐱᒋᐊᕐᓂᓚᕆᖓᓂᑦ, ᐃᒻᒥᓂᒃ-ᐊᐅᓚᑦᓯᒍᒪᓂᕐᒥᒃ ᐱᓇᓱᐊᕐᑐᑦ ᓄᓇᓕᓐᓄᑦ ᓴᐳᑦᔭᐅᓚᕆᒋᐊᒥᓂᒃ ᐃᑉᐱᒋᔭᖃᕐᓯᒪᕗᑦ, ᑐᖕᖓᓱᑦᑎᑕᐅᓪᓚᕆᖃᑦᑕᓱᑎᒃ, ᐅᖄᕕᐅᒍᓐᓇᓯᐊᕐᐸᓱᑎᓪᓗ. ᐃᓄᐃᑦ ᐃᒻᒥᓂᒃ-ᐊᐅᓚᑦᓯᒍᒪᓂᖃᕐᓯᒪᓂᖓ ᐊᑯᓂ ᐱᓇᓱᐊᕐᑕᐅᓯᒪᓕᕐᖁᖅ ᓴᖑᑎᒐᓱᐊᕆᐊᒥᓪᓗ ᐱᔭᕆᐊᑐᔫᑦᓱᓂ ᓱᓇᑎᒎᕈᑕᐅᒐᓗᐊᕋᒥᓗ ᒪᑭᒋᐊᑦᓯᐊᕈᑕᐅᕙᑦᓱᓂ ᐊᕐᕌᒍᓂ ᐊᕙᑎᓪᓗ ᖁᓕᓪᓗ ᐅᖓᑖᓅᓕᕐᑐᓂ ᓄᓇᕕᒥᓪᓗ ᓂᐯᕈᑕᐅᓯᒪᒐᓂ. ᐅᖄᖃᑎᒌᖃᑦᑕᓂᒃᑯᑦ, ᓄᓇᕕᒻᒥᐅᑦ ᓯᕗᓕᕐᑎᒋᖃᑦᑕᓯᒪᔭᖏᑦᑕ ᕿᒻᒪᑯᐃᒍᑎᒋᓯᒪᔭᖏᑦ, ᑌᑦᓱᒪᓂ ᑕᒐᑕᒐᓗ ᓯᕗᓕᕐᑐᑦ, ᑐᑭᒧᐊᒋᐊᕐᑎᓯᔨᒋᔭᐅᓯᒪᒻᒪᑕ ᖃᐅᔨᒪᓇᕐᓱᓂᓗ ᑐᓂᒪᓂᕆᓯᒪᔭᖏᓐᓄᑦ ᑐᖕᖓᕕᑦᓴᓕᐅᕐᓯᒪᒋᐊᖏᑦᑕ ᑕᒪᑐᒥᖓ ᓄᑖᒥᒃ ᐱᓇᓱᐊᕐᑕᐅᓕᕐᑐᒥᒃ.
ᓄᓇᓕᓐᓂᒃ ᖃᐅᔨᒋᐊᕐᕕᖃᖃᑦᑕᓱᑎᒃ, ᓄᓇᓕᓐᓃᑐᓄᑦ ᓴᐳᑦᔭᐅᒋᐊᒥᓂᒃ ᑐᑭᓯᑦᓯᐊᓂᕐᖁᑦ: ᓄᓇᕕᒻᒥᐅᑦ ᐃᓄᐃᑦ ᑲᕙᒪᑖᕈᒪᔪᑦ ᓄᓇᒥᓂᒃ ᓇᒻᒥᓂ ᕆᔭᒥᓂᒃ ᓯᕗᓂᑦᓴᓕᐅᕐᕕᖃᕈᒪᒐᒥᒃ, ᓯᕗᓕᕐᑕᐅᓗᑎᒃ ᐃᓄᐃᑦ ᐱᓪᓚᕆᖁᑎᖏᑎᒍᑦ ᐃᓄᐃᓪᓗ ᐱᒍᒪᔭᖏᑎᒍᑦ. ᐊᑕᐅᓯᐅᑦᑎᑐᑦ ᓂᕆᐅᒋᔭᒥᓂᒃ ᓂᓪᓕᕈᑎᖃᖃᑦᑕᓂᕐᖁᑦ ᐃᓱᒫᓘᑎᒋᔭᒥᓂᓪᓗ, ᐅᖃᐅᓯᖃᕐᓱᑎᒃ ᑖᒃᓯᓂᒃ, ᑮᓇᐅᔭᖃᕐᑎᑕᐅᒍᑎᑦᓴᓂᒃ, ᐃᓂᓪᓚᖓᐅᓯᕆᒐᔭᕐᑕᖓᓂᓪᓗ ᐃᓄᐃᑦ ᓄᓇᕕᒻᒥᐅᑦ ᑲᕙᒪᖓᑕ, ᓱᓇᑦᑎ-ᐅᒋᐊᖃᕐᓂᖏᓐᓂᒃ ᒪᑭᕝᕕᐅᑉ ᐊᒻᒪᓗ ᓄᓇᒥᒃ ᑎᒍᒥᐊᕐᑎᑯᑦ, ᕿᑐᕐᖓᕆᔭᐅᔪᓂᒃ ᐃᓚᒌᓂᓪᓗ ᐱᒍᑦᔨᐅᑏᑦ, ᓴᐳᒻᒥᔭᐅᒋᐊᖃᕐᓂᖓᓂᓪᓗ ᐃᓄᐃᑦ ᐃᓕᕐᖁᓯᖓᑕ ᐃᓄᒃᑎᑑᕈᓯᖏᑦᑕᓗ, ᓄᓇᒥᓪᓗ ᐊᐅᓚᑦᓯᒍᓯᖓ. ᑕᒪᒃᑯᐊ ᐅᖄᖃᑎᒌᓐᓃᑦ ᑐᑭᓯᓇᕐᓯᒪᔪᑦ ᓄᓇᓕᓐᓃᑐᑦ ᑐᓂᒪᒍᑎᖃᕐᓂᖏᓐᓂᒃ ᓇᒻᒥᓂᖅ-ᐊᐅᓚᑕᒥᓂᒃ ᑲᕙᒪᖃᕈᒪᓂᖏᓐᓂᒃ ᑕᒪᑐᒥᖓ ᓂᕆᐅᓐᓂᖃᕋᒥᒃ.
ᖃᐅᔨᕙᓪᓚᑕᐅᓯᒪᑦᓯᐊᕆᐊᖃᕆᕗᖅ ᐃᓘᓐᓇᓕᒫᖏᓐᓄᑦ ᐅᒃᑯᐃᖔᑐ ᐃᓐᓇᕈᑕ-ᐅᓐᓂᖏᒻᒥᒪᑦ ᓇᒻᒥᓂᖅ-ᑲᕙᒪᖃᕈᒪᓂᖅ. ᐃᓚᖏᑦ ᓂᓪᓕᕈ ᑎᖃᖃᑦᑕᓂᕐᒪᑕ ᐱᓇᓱᑦᑎᓭᑦ ᐊᑐᐃᓐᓇᐅᒋᐊᖃᕋᔭᕐᓂᖏᓐᓂᒃ, ᐱᓇᓱᐊᓕᓂ ᐅᖕᖏᑐᖃᕐᑎᓗᒍᓗ ᐃᓕᓴᕇᕐᓯᒪᖕᖏᑑᔪᖃᕐᒥᑎᓪᓗᒍᓗ, ᐊᓯᖏᓪᓗ ᓄᓇᓕᑐᙯᑦ ᑲᕙᒪᖃᕐᓂᒥᒃ ᐱᒐᓱᐊᒻᒪᕆᐅᑎᖃᓲᒍᓂᖏᓐᓂᒃ. ᐃᓱᒫᓘᑕᐅᒻᒥᑎᓪᓗᒋᑦ ᑖᒃᓰᔭᕐᓃᑦ ᐅᓄᕐᓯᐅᒥᑐ-ᐃᓐᓇᕋᔭᕐᑐᕆᔭᐅᓂᖏᑦ ᐊᒻᒪᓗ ᑮᓇᐅᔭᖃᕐᑎᑕᐅᖏᓐᓇᕆᐊᖃᓛᕐᓂᖓ ᐃᓄᐃᑦ ᑲᕙᒪᖓᑕ. ᐱᓇᓱᐊᕐᑐᑦ ᑕᒪᒃᑯᓂᖓ ᐃᓱᒪᒋᔭᐅᔪᓂᒃ ᐊᓪᓚᓯᐊᖃᑦᑕᓂᕐᖁᑦ ᐃᓕᑕᕐᓯᓱᑎᓪᓗ ᑕᒪᒃᑯᐊ ᐅᖄᒍᑕᐅᖃᑦᑕᕆᐊᖃᕐᓂᖏᓐᓂᒃ ᑲᕙᒪᓕᐅᕐᑐᖃᓚᖓᒍᓂ ᓱᕐᕃᓂᖃᑦᓯᐊᕈᓐᓇᑐᒥᒃ ᓴᐳᑦᔭᐅᓯᒪᑦᓯᐊᑐᒥᓪᓗ ᓇᑭᓕᒫᖅ.
ᐊᕐᕕᑕᕐᓂᒥᓂ, ᑐᑭᓯᒪᑦᓯᐊᓚᐅᔪᕗᑦ ᐅᕕᒐᕐᑐᓂᒃ ᐃᓚᐅᑎᑦᓯᒐᓱᐊᕆᐊᒥᒃ ᐱᔭᕆᐊᑐᔫᓂᖓᓂᒃ, ᐅᓄᕐᓂᓴᐅᖁᓇᖃᑦᑕᓚᐅᔪᒻᒪᑕ ᓄᓇᓖᑦ ᑲᑎᑦᑕᕕᖏᓐᓃᑎᓪᓗᑕ, ᑐᓴᐅᑎᒃᑰᖃᑦᑕᑎᓪᓗᑕ ᐅᖄᓚᑎᑦᓯᖃᑦᑕᓱᑕ, ᐊᑕᐅᓯᐅᑦᑎᑐᓂᓪᓗ ᐅᖄᕕᖃᖃᑦᑕᓱᑕ. ᐃᓕᑕᕐᓯᒪᒐᒥᒃ ᓄᓇᕕᒻᒥᐅᑦ ᐅᕕᒐᕐᑐᐃᑦ ᓂᐸᖃᕈᑎᖃᕆᐊᖃᕐᓂᖏᓐᓂᒃ ᓯᕗᓂᑦᓴᒥᓂᒃ, ᐊᕐᕕᑕᕐᑐᑦ ᑐᓂᒪᐅᑎᖃᓕᕐᑐᑦ ᐅᕕᒐᕐᑐᓂᒃ ᐃᓚᐅᑎᑦᓯᓂᕐᓴᐅᖃᑦᑕᕈᒪᓂᕐᒥᒃ. ᖃᐅᔨᒋᐊᕐᕕᐅᒌᕐᓯᒪᓕᕐᑐᑦ ᐅᕕᒐᕐᑐᐃᑦ ᐱᓇᓱᕝᕕᖏᑦ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᐊᒻᒪᓗ ᓄᓇᕕᒻᒥ ᐅᕕᒐᕐᑐᐃᑦ ᐃᓪᓗᖁᑎᖏᑦᑕ ᑲᑐᑦᔨᖃᑎᒌᓐᓂᖓ ᕿᒥᕐᕈᖃᑎᒋᓂᐊᕐᓗᒋᑦ ᖃᓄᖅ ᐱᑐᑦᓯᒪᖃᑎᒌᒍᓐᓇᒪᖔᑦᑕ. ᐊᕐᕕᑕᕐᑐᑦ ᐊᕐᖁᑎᖃᕐᓂᓴᐅᖃᑦᑕᕈᒪᓕᕐᒥᔪᑦ ᖃᕆᑕᐅᔭᒃᑯᑦ ᑐᓴᐅᒪᖃᑎᒌᕝᕕᓂᒃ ᐊᓯᖏᓐᓂᓗ ᐅᕕᒐᕐᑐᐃᑦ ᐊᕐᖁᑎᒋᓲᕆᓂᕐᐹᖏᓐᓂᒃ ᑐᓴᕆᐊᕐᑐᕕᒋᕙᑦᓱᒋᑦ ᑭᖑᕚᑦᓴᕗᑦ ᐱᓇᓱᖃᑎᒋᒍᒪᒐᑦᑎᒋᑦ ᐅᕕᒐᕐᑐᐃᑦ ᐃᓱᒪᒋᔭᖏᑦ ᑭᒡᒐᑐᕈᑕᐅᑦᓯᐊᕆᐊᖃᕐᒪᑕ ᓇᒻᒥᓂᖅ-ᐊᐅᓚᑦᓯᒍᓐᓇᓯᕙᓪᓕᐊᒐᓱᐊᕐᑎᓗᑕ.
ᓯᕗᓂᕐᒧᑦ ᑕᑯᒋᐊᕈᑦᑕ, ᐃᒻᒥᓂᖅ-ᐊᐅᓚᑦᓯᒍᒪᓂᕐᒥᒃ ᐱᓇᓱᐊᕐᑐᑦ ᑐᓴᐅᒪᖃᑦᑕᐅᑎᒍᑎᑦᓴᓂᒃ ᓲᖑᓯᑎᑦᓯᒋᐊᕈᒪᕗᑦ ᓄᓇᕕᒻᒥᐅᓂᒃ ᐃᓄᓐᓂᒃ ᑐᓴᐅᒪᑎᑦᓯᒍᑎᑦᓴᒥᓂᒃ ᓄᓇᓕᓕᒫᓂᓪᓗ ᐱᓇᓱᕝᕕᓂᒃ ᑕᒪᓐᓇ ᐳᐃᒍᕐᑕᐅᑐ-ᐃᓐᓇᕆᐊᖃᖕᖏᒪᑦ. ᖃᐅᔨᒋᐊᕐᕕᖃᖃᑦᑕᓂᖅ ᑲᔪᓯᔭᐅᒻᒪᑦ, ᑕᒪᑐᒥᖓ ᐱᓇᓱᐊᕐᓱᑕ ᐃᓚᐅᑎᑦᓯᓂᖃᕐᑎᓯᑦᓯᐊᖃᑦᑕᖁᒍᑦ ᓯᕗᒻᒧᓗ ᑕᑯᓐᓇᓂᖃᕐᓱᑕ, ᐱᕕᓕᒫᑎᒍᑦ ᓄᓇᕕᒻᒥ ᑲᕙᒪᑦᓴᒥᒃ ᐱᓇᓱᐊᕈᒪᒐᑦᑕ ᐃᔨᕐᑐᐊᖃᕐᑐᖃᕐᑎᓇᒍ ᓲᓱᒋᐅᑎᑦᓯᐊᑎᓪᓗᒋᓪᓗ ᐱᓇᓱᐊᖃᑕᐅᔪᓕᒫᑦ.
ᓄᐃᑕᐅᑉᐸᑦ ᓄᓇᕕᒻᒥ ᐃᓄᐃᑦ ᑲᕙᒪᖓᑦ, ᓂᕈᐊᕐᑕᐅᓯᒪᔪᕐᑕᖃᕐᓗᓂ ᐃᓚᐅᒍ-ᑎᓕᖁᑎᒥᓄᑦ ᐃᓄᐃᓪᓗ ᐃᓕᕐᖁᓯᖓᑎᒎᕐᓗᓂ ᐱᓪᓚᕆᖁᑎᖏᑎᒎᕐᓗᓂᓗ, ᐊᑑᑎᔭᐅᓚᐅᕐᓯᒪᖕᖏᑑᓗᓂ ᐱᔭᕆᔭᐅᓯᒪᒐᔭᕐᖁᖅ ᓱᕐᕃᓂᖃᕋᔭᕐᓗᓂ ᐅᓪᓗᑕᒫᑦ ᐃᓅᓯᕐᒥᒃ ᓄᓇᕕᒻᒥᐅᓄᓪᓗ ᐃᓄᓐᓄᑦ ᓂᕆᐅᒋᔭᐅᓯᒪᔪᓂᒃ ᓄᐃᑦᓯᒍᑕᐅᓗᓂ. ᓂᐸᖃᖃᑦᑕᓂᖏᑦ ᐊᑦᑐᐊᔭᐅᓂᖃᕐᑐᓕᒫᑦ ᑕᒪᑐᒧᖓ ᐃᓄᐃᓪᓗ ᐊᑕᐅᓯᐅᑦᑎᑐᑦ ᑭᖕᖒᒪᓇᕐᑐᓚᕆᐅᕗᑦ ᑲᕙᒪᓕᐅᕆᐊᖃᕐᓂᒧᑦ ᓄᓇᕕᒻᒥᐅᑦ ᐱᒍᒪᓯᒪᔭᖓᑎᒍᑦ ᓯᓚᑐᔫᓂᖏᑎᒍᓪᓗ.
ᐃᓄᐃᑦ ᓄᐃᑦᓯᖃᑦᑕᓯᒪᒻᒪᑕ, ᐊᒥᓱᕕᑦᓱᑎᒃ, ᐱᒍᓐᓇᓯᐊᕐᓂᑎᓐᓂᒃ ᑐᓂᒪᒍᓐᓇᓂᑦᑎᓂᓪᓗ ᐊᐅᓚᑦᓯᒍᒪᓂᕐᒧᑦ ᐱᐅᓯᑦᑎᓂᒃ ᓲᓱᑦᓴᓯᐊᕐᓂᑯᑦ ᐃᓕᕐᖁᓯᑦᑎᓂᒃ ᐃᓅᓯᒃᑯᓗ ᐱᑦᓯᐊᕆᐊᕈᑎᑦᓴᑎᓐᓂᒃ. ᐊᑑᑎᔭᐅᓯᒪᔪᑦ ᓲᖑᓂᕐᑖᕆᔭᐅᓯᒪᔪᐃᓪᓗ ᐊᕐᕌᒍᓂ ᐊᕙᑎᑦ ᒪᕐᕈᑦ ᖁᓕᓪᓗ ᐅᖓᑖᓅᕐᑐᓂ ᐊᕐᕌᒍᓂ ᐊᐅᓚᑦᓯᒍᓐᓇᓯᒍᑎᑦᓴᑖᕆᓯᒪᕙᕗᑦ ᓯᕗᓂᕐᓴᓕᐅᕐᑎᓗᑕ ᓇᒻᒥᓂᖅ-ᐊᐅᓚᑦᓯᒍᓐᓇᓂᕐᒥᒃ ᓄᐃᑦᓯᕋᑕᕐᓗᑕ, ᓄᓇᕕᒻᒥᓗ ᓄᓇᓖᑦ ᐱᕈᕐᐸᓕᓂᕆᓚᖓᔭᖏᑦ ᐃᓄᓐᓄᑦ ᓯᕗᓕᕐᑕᐅᓚᖓᑎᓪᓗᒋᑦ.
ᖃᐅᔨᒋᐊᑦᓯᐊᕕᑦᓭᑦ:
ᐋᓐᑕᓂ ᐃᑦᑐᓵᑦ
ᐊᖏᖃᑎᒌᒐᓱᐊᕐᑎᓂᒃ ᓯᕗᓕᕐᑐᖅ
ᐃᒻᒥᓂᒃ-ᐊᐅᓚᑦᓯᒍᒪᓂᓕᕆᓂᕐᒥᒃ
ᐊᖓᔪᕐᖄᑉ ᐊᓪᓚᕕᖓᓂ
ᐅᖄᓚᐅᑎᖓ: 819-929-3353
ᖃᕆᑕᐅᔭᒃᑯᑦ ᑐᕌᕈᑎᖓ: aittoshat@makivvik.ca
ᑐᓄ ᓇᐹᕐᑐᖅ
ᐊᖏᖃᑎᒌᒐᓱᐊᕐᑎᓂᒃ ᓯᕗᓕᕐᑑᑉ ᑐᖓᓕᖓ ᐃᒻᒥᓂᒃ-ᐊᐅᓚᑦᓯᒍᒪᓂᓕᕆᓂᕐᒥᒃ
ᐊᖓᔪᕐᖄᑉ ᐊᓪᓚᕕᖓᓂ
ᐅᖄᓚᐅᑎᖓ: 819-964-2925 ext.224 ᖃᕆᑕᐅᔭᒃᑯᑦ ᑐᕌᕈᑎᖓ: tnapartuk@makivvik.ca
ᕕᑦᑑᕆᐊ ᑯᐊᑕ
ᐊᑕᐅᑦᓯᑰᕐᑎᓯᔨ
ᐃᒻᒥᓂᒃ-ᐊᐅᓚᑦᓯᒍᒪᓂᓕᕆᓂᕐᒥᒃ
ᐊᖓᔪᕐᖄᑉ ᐊᓪᓚᕕᖓᓂ
ᐅᖄᓚᐅᑎᖓ: 819-964-2925 ext. 264 ᖃᕆᑕᐅᔭᒃᑯᑦ ᑐᕌᕈᑎᖓ: vgordon@makivvik.ca
