ᑐᓴᕋᑦᓭᑦ
ᐁᕆᓕ 15, 2021-ᒥ – ᑰᑦᔪᐊᒥᑦ, ᓄᓇᕕᒃ – ᑕᕐᖀᒃ ᒪᕐᕉᒃ ᓈᓕᕐᑎᓗᒋᒃ ᓂᕈᐊᕐᑕᕕᓂᐅᑎᓪᓗᒍ ᒪᑭᕝᕕᐅᑉ ᐊᖓᔪᕐᑳᖓ ᐱᑕ ᐋᑕᒥ ᓄᓇᕕᒻᒥ ᐃᒻᒥᓂᒃ-ᐊᐅᓚᑦᓯᒍᓐᓇᓯᒍᒪᓂᖅ ᓄᑕᐅᓯᓕᕐᑕᐅᕙᓪᓕᐊᓯᒪᓕᕐᖁᖅ ᑲᑦᓱᙰᑦᑐᓯᐊᒍᒍᑕᐅᑦᓱᓂᓗ. ᐱᓇᓱᐊᕐᑕᐅᕙᓪᓕᐊᓂᖃᕐᓯᒪᑦᓱᓂ ᒣ 2018-ᒥᓂᑦ ᓄᓇᕕᒻᒥ ᐱᓇᓱᕝᕕᓕᒫᑦ ᑲᑎᒪᓂᖓᓂ ᐊᖏᕈᑕᐅᓚᐅᕐᓯᒪᑎᓪᓗᒍ 2018-ᒥ ᓄᓇᕕᒻᒥ ᐃᓄᐃᑦ ᐅᖃᒻᒪᕆᐅᑎᖓ ᑎᓕᔨᒍᑎᐅᑦᓱᓂ ᒪᑭᕝᕕᒃ ᐊᖏᖃᑎᒌᒐᓱᐊᖃᑎᖃᕐᓂᐊᑎᓪᓗᒍ ᑲᓇᑕᒥᐅᑦ ᑲᕙᒪᖓᓂᒃ ᑯᐯᒃᑯᓗ ᑲᕙᒪᖓᓂᒃ ᓄᐃᑦᓯᒍᒪᓂᕐᒧᑦ ᓄᓇᓕᑐᙯᑦ ᑲᕙᒪᖓᓂᒃ ᑐᖕᖓᕕᓕᒻᒥᒃ ᐃᓄᐃᑦ ᐱᓪᓚᕆᖁᑎᖏᓐᓂᒃ, ᐃᓕᑕᕐᓇᐅᑎᖏᓐᓂᒃ, ᐃᓕᕐᖁᓯᖏᓐᓂᒃ ᐅᖃᐅᓯᖏᓐᓂᓗ.
“ᓄᑖᒥᒃ ᐱᓇᓱᒍᓯᖃᓕᕐᓱᑕ ᑐᕌᒐᖃᕐᖁᒍᑦ ᐃᔨᕐᑐᐊᖃᖕᖏᑑᖃᑦᑕᓂᐊᕐᓂᒥᒃ ᐃᓚᐅᑦᓯᐊᓚᖓᑎᓪᓗᒋᓪᓗ ᓄᓇᕕᒻᒥ ᐱᓇᓱᕝᕕᓕᒫᑦ. ᐊᖏᖃᑎᒌᒐᓱᐊᖃᑎᖃᖃᑦᑕᓚᖓᖏᓐᓈᑐᒍᑦ ᑲᓇᑕᒥᐅᑦ ᑲᕙᒪᖓᓂᒃ, ᑯᐯᒃᑯᓗ ᑲᕙᒪᖓᓂᒃ ᐅᖄᖃᑎᖃᕐᐸᓕᐊᖃᑦᑕᓚᖓᓕᕐᓱᑕ,” ᐅᖃᕐᑐᕕᓂᖅ ᒪᑭᕝᕕᐅᑉ ᐊᖓᔪᕐᕐᑳᖓ ᐱᑕ ᐋᑕᒥ. “ᐅᐱᒋᑦᓱᒍ ᖃᐅᔨᒪᔭᐅᖁᔨᕗᖓ ᒥᐊᔨ ᓭᒪᓐ ᐊᖏᖃᑎᒌᒐᓱᐊᖃᑕᐅᓂᕐᒥᒃ ᓯᕗᓕᕐᑎᐅᓂᕐᒧᑦ ᐅᑎᓛᕐᒪᑦ, ᓖᓴ ᖁᐱᕐᕈᐊᓗᒃ ᑐᖓᓕᐅᑦᓭᓇᓚᖓᑎᓪᓗᒍ.”
ᒥᐊᔨ ᓭᒪᓐ ᖃᐅᔨᒪᔮᕆᔭᐅᑦᓯᐊᑐᖅ ᓄᓇᕕᒻᒥ, ᑲᓇᑕᒦᑦᑐᒥ, ᓯᓚᕐᔪᐊᓕᒫᒥᓪᓗ ᖃᐅᔨᒻᒫᕆᔭᐅᒻᒥᓱᓂ. ᐊᖓᔪᕐᕐᑳᒍᓯᒪᔪᖅ ᒪᑭᕝᕕᒥ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᓐᓄᑦ ᑐᑭᒧᐊᑦᑎᓯᔨᐅᓯᒪᒻᒥᓱᓂ, ᑲᓇᑕᒥᐅᓂᓪᓗ ᐅᑭᐅᕐᑕᑐᕐᒥᐅᓂᒃ ᑭᒡᒐᑐᕐᑎᐅᓯᒪᑦᓱᓂ ᓯᕗᓪᓕᐹᑦᓯᐊᒍᑦᓱᓂ. “ᐊᓕᐊᑉᐳᖓ ᐃᓚᐅᓂᕆᓛᕐᑕᕋᓂᒃ ᐱᒋᐊᑦᓯᐊᕈᑎᖃᓛᕐᑐᓄᑦ ᐃᒻᒥᓂᒃ-ᐊᐅᓚᑦᓯᒍᓐᓇᓯᒍᒪᓂᖏᓐᓂᒃ ᓄᓇᕕᒻᒥᐅᑦ ᐃᓄᐃᑦ. ᓄᐃᑦᓯᓯᒪᓕᕐᑐᒍᑦ ᓄᑖᓂᒃ ᐃᓄᓐᓂᒃ ᐃᒫᙰᓚᔨᐅᓂᕐᒧᑦ ᑲᑎᒪᔨᑦᓴᓂᒃ ᐱᖓᓲᔪᕐᑐᓂᒃ, ᒪᕐᕉᒃ ᑭᒡᒐᑐᕐᑑᒃ ᓯᑦᔭᐅᔫᓐᓂᒃ ᑕᒣᓐᓂᒃ, ᐃᓱᒪᑦᓴᓯᐅᕐᑎᐅᖃᑦᑕᓛᕐᑐᓂᒃ ᑐᑭᒧᐊᑦᑎᓯᔨᒋᖃᑦᑕᓛᕐᓱᒋᑦ, ᐸᕐᓀᑕᐅᒋᐊᓕᓐᓂᒃ ᐃᒫᙰᓚᔨᒋᖃᑦᑕᓛᕐᓱᒋᓪᓗ ᐅᓐᓂᑑᑎᖃᖃᑦᑕᓛᕐᑎᓗᒋᓪᓗ ᐊᖏᖃᑎᒌᒐᓱᐊᕐᓂᑎᒍᑦ ᓯᕗᓪᓕᐅᔨᒐᑦᓴᓕᐅᕐᑎᓗᑕ ᐱᓇᓱᒐᑦᓴᓂᓪᓗ ᓄᐃᑦᓯᖃᑦᑕᓛᕐᑎᓗᑕ.” ᐃᓄᐃᑦ ᐃᒫᙰᓚᔨᐅᓂᕐᒧᑦ ᑲᑎᒪᔨᓄᑦ ᐃᓚᐅᔪᑦ ᐅᑯᐊᒍᕗᑦ ᐋᑕᒥ ᖃᓕᖑ, ᔫᐱ ᐃᐳ, ᓈᓇᓯ ᐃᑦᑐᖅ, ᐅᓕᕕᐊ ᐁᑭ-ᑕᓐᑲᓐ, ᓰᓚ ᓂᖏᐅᕈᕕᒃ, ᐊᒻᒪᓗ ᐲᑕ ᐃᑦᑐᑲᓪᓚᒃ.
ᒪᑭᕝᕕᒃ ᑲᔪᓯᓚᖓᕗᖅ ᐱᓇᓱᐊᖃᑎᖃᕐᓂᒥᓂᒃ ᓄᓇᓕᓕᒫᓂ ᓄᓇᓕᓐᓃᑐᓂᓪᓗ ᐱᓇᓱᕝᕕᓂᒃ ᐃᒻᒥᓂᒃ-ᐊᐅᓚᑦᓯᒍᓐᓇᓯᒍᒪᓂᕐᒧᑦ ᑲᑎᒪᔨᖁᑎᒥᑎᒍᑦ, ᑐᑭᒧᐊᑦᑎᓯᔨᖃᕐᓗᑎᒃ ᓖᓴ ᖁᐱᕐᕈᐊᓗᒻᒥᒃ ᐊᖏᖃᑎᒌᒐᓱᐊᖃᑕᐅᓂᕐᒥᒃ ᓯᕗᓕᕐᑎᐅᑉ ᑐᖓᓕᖓᓂᒃ. ᐃᒻᒥᓂᒃ-ᐊᐅᓚᑦᓯᒍᓐᓇᓯᒍᒪᓂᕐᒧᑦ ᑲᑎᒪᔩᑦ ᐱᓯᒪᑎᓪᓗᒋᑦ ᑭᒡᒐᑐᕐᑐᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓂᒃ, ᑲᑎᕕᒃ ᐃᓕᓴᕐᓂᓕᕆᓂᕐᒥᒃ, ᐃᓚᒌᓴᒃᑯᓂᒃ, ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᓂᒃ, ᓴᑐᕐᕖᑦ ᐃᓄᐃᑦ ᑲᑐᑦᔨᖃᑎᒌᓐᓂᖓᓂᒃ ᓄᓇᕕᒻᒥ, ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓂᒃ, ᐊᒻᒪᓗ ᐊᕙᑕᕐᒥᒃ ᐱᕐᖁᓯᑐᖃᓕᕆᕕᒻᒥᒃ.
-30-
ᖃᐅᔨᒋᐊᕐᑐᕕᑦᓴᖅ:
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑦᑕᐅᑎᓂᕐᓂᒃ
ᒪᑭᕝᕕᒃ
ctagoona@makivik.org
www.makivik.org
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᐱᔭᑦᓴᖃᕐᒥᑎᓪᓗᒍ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕆᐊᓪᓚᕈᑎᑦᓴᐅᓂᖏᓐᓂᓗ ᑖᒃᑯᐊ ᑮᓇᐅᔦᑦ ᑫᓪᓚᑐᐃᒍᑎᖃᕆᐊᖃᕐᓂᒥᓪᓗ ᒪᑭᑉᐸᓕᐊᒍᑎᑦᓴᐅᒋᐊᖃᕐᓂᖏᓐᓂᒃ ᐃᑲᔪᕐᓯᖃᑦᑕᓂᒃᑯᑦ ᓄᐃᑦᓯᒐᓱᐊᕐᑐᓂᒃ ᐃᓄᓐᓄᑦ-ᐊᐅᓚᑕᐅᔪᓂᒃ ᐱᓇᓱᒐᖃᕐᕕᓴᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓚᑐᐃᒍᑎᖃᓲᑦ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐃᓄᐃᑦ ᐃᓕᕐᖁᓯᖓᑕ ᐅᖃᐅᓯᖓᑕᓗ ᖃᓄᐃᖕᖏᓯᐊᕐᑐᓴᐅᓂᖏᓐᓂᓗ, ᒪᑭᑕᑦᓯᐊᕆᐊᖃᕐᓂᖏᓐᓂᓗ, ᐊᔪᕐᓴᕈᓐᓀᕆᐊᖃᕐᓂᖏᓐᓂᓗ, ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.