| ᑐᕌᕐᑐᖅ: | ᒪᑭᕝᕕᒥ ᐃᓚᐅᔪᓄᑦ |
| ᐅᕙᖕᖓᑦ: | ᓘᓯ ᑯᔩ, ᓂᕈᐊᕐᑐᓕᕆᔨᒻᒪᕆ |
| ᐅᓪᓗᖓ: | ᑏᓯᒻᐱᕆ 11, 2020 |
ᑭᓇ ᓂᕈᐊᕐᑕᐅᑎᒋᐊᕈᓐᓇᐸ ᐃᓘᓐᓇᖏᓐᓂᑦ ᓂᕈᐊᕐᓂᒥ?
ᒪᓕᑦᓱᒋᑦ ᒪᑭᕝᕕᐅᑉ ᐱᖁᔮᐱᖏᑦ, ᓂᕈᐊᕋᑦᓴᖑᕐᑐᓕᒫᑦ ᐃᓘᓐᓇᑎᒃ ᒪᓕᒋᐊᓖᑦ ᒪᓕᑦᑕᐅᒋᐊᖃᕐᓂᕋᕐᑕᓂᒃ ᐱᖁᔮᐱᒻᒥ 4(f)ᒥ ᐃᓚᐅᒍᓐᓇᓂᐊᑐᐊᕈᓂ ᐃᓘᓐᓇᖏᓐᓂᑦ ᓂᕈᐊᕐᓂᓂᑦ.
ᐃᒣᓕᖓᒋᐊᓕᒃ:
(i) ᓄᓇᕕᒻᒥ ᐃᓄᑐᐃᓐᓇᐅᓗᑎᑦ ᐃᓚᐅᔫᓗᑎᑦ ᔦᒻᔅ ᐯ ᐊᒻᒪᓗ ᑯᐯᒃ ᐊᖏᖃᑎᒌᓐᓂᖓᓄᑦ;
(ii) 18ᓂᒃ ᐅᖓᑖᓂᓘᓐᓃᑦ ᐅᑭᐅᖃᕐᓗᑎᑦ;
(iii) ᐃᓄᒃᑎᑐᑦ ᐅᖄᒍᓐᓇᓯᐊᕐᓗᑎᑦ.
ᐃᒣᓕᖓᒍᓐᓇᖏᑦᑐᖅ:
(i) ᑮᓇᐅᔭᑎᒍᑦ ᐊᑭᓕᑦᓴᖃᕐᓂᒥᒃ ᓴᒃᑯᓯᑎᑕᐅᓯᒪᖕᖏᑐᖅ ᐃᕐᖃᑐᐃᕕᒃᑯᑦ;
(iii) ᐃᕐᖃᑐᕐᑕᐅᓯᒪᔪᖅ ᐸᓯᔭᑦᓴᐅᓂᕋᕐᑕᐅᓱᓂ ᐱᓂᕐᓗᒍᑎᖃᕐᓂᒧᑦ ᐱᒻᒪᕆᒻᒥᒃ ᓱᒋᐊᕐᑕᐅᒍᑎᒋᒍᓐᓇᑕᒥᓂᒃ ᑎᒍᔭᐅᒪᓗᓂ/ᐸᕐᓇᓀᕐᑕᐅᓯᒪᓗᓂ 2-ᓂᒃ ᐊᕐᕌᒎᓐᓂᒃ. ᑕᒪᓐᓇ ᐃᓕᓐᓄᑦ ᐃᓕᖓᑦᓴᓂᕐᐸᑦ, ᐃᓚᐅᒍᓐᓇᖏᓪᓚᑎᑦ ᓂᕈᐊᕋᑦᓴᖑᕐᓂᒧᑦ 5 ᐊᕐᕌᒍᑦ ᐊᓂᒍᕐᓯᒪᕋᑕᖕᖏᑐᐊᕐᐸᑕ ᑎᒍᔭᐅᒪᓯᒪᓂᕕᓂᕐᐱᑦ/ᐸᕐᓇᓀᕐᑕᐅᓯᒪᓂᕕᓂᕐᐱᑦ ᑭᖑᓂᖓᓂ; ᐅᕝᕙᓘᓐᓃᑦ ᐊᕐᕌᒍᑦ 5 ᐅᓪᓗᖓᓂᑦ ᐃᕐᖃᑐᕐᑕᐅᕕᒻᒥ ᑐᑭᑖᕐᑕᐅᓂᕕᓂᕐᐱᑦ ᐊᑭᓕᕋᑦᓴᑖᕐᑎᑕᕕᓂᐅᒍᕕᑦ ᐅᕝᕙᓘᓐᓃᑦ ᖃᓄᐃᓕᒋᐊᕐᑕᐅᒍᑎᑎᑦ ᐊᑐᕚᓪᓗᑕᕕᓂᕆᒍᕕᒃᑭᑦ (ᐃᓱᒪᒋᔪᓐᓀᑕᐅᒍᑎᒥᒃ ᐱᑖᕐᓯᒪᒍᑎᒋᖕᖏᑐᐊᕈᕕᐅᒃ ᑖᓐᓇ ᐱᖁᔭᒥᒃ ᓯᖁᒥᑦᓯᓂᕕᓂᖅ);
(iii) ᐊᑭᓕᑦᓴᖃᖏᓐᓇᑐᕕᓂᖅ ᖃᓄᐃᑦᑐᑐᐃᓐᓇᓂᒃ ᒪᑭᕝᕕᑯᓐᓄ ᐊᒻᒪᓗ/ᐅᕝᕙᓘᓐᓃᑦ ᓇᓪᓕᑐᐃᓐᓇᖏᓐᓄᑦ ᑎᒥᖁᑎᖏᓐᓄᑦ ᓱᓕ ᐊᑭᓕᒻᒣᑕᕆᑦᓱᒋᑦ 90 ᐅᓪᓗᐃᑦ ᐅᖓᑖᓄᑦ. ᑭᖑᓂᕐᒥ ᐊᑭᓖᒌᖕᖏᑑᓚᐅᕐᓯᒪᒋᐊᖃᖕᖏᓚᑎᑦ ᐊᑭᓕᑦᓴᒥᒃ ᐊᑭᓕᕇᒻᒣᑑᖏᓐᓇᑐᕕᓂᕐᒥᒃ.
(vi) ᐱᓇᓱᑎᒃ ᒪᑭᕝᕕᒥ ᐅᕝᕙᓘᓐᓃᑦ ᓇᓪᓕᑐᐃᓐᓇᖓᓂᒃ ᑎᒥᖁᑎᖓᓂ (ᑭᓯᐊᓂ ᐃᓚᐅᒍᓐᓇᒍᑎᒋᒐᔭᕐᑕᑐᐊᑦ ᐳᕐᑐᓂᕐᓴᓂ ᑲᑎᖕᖓᔨᐅᓗᑎᑦ ᓂᕈᐊᕐᑕᐅᑎᒋᐊᓪᓚᒐᓱᓪᓗᑐᑦ ᑕᒡᒍᖓᑦᓭᓇᖅ ᓂᕈᐊᕐᑕᐅᓯᒪᕕᒻᒧᑦ).
(vii) ᐱᐅᓯᖃᕐᑐᖅ, ᐱᓇᓱᐊᕐᑐᖅ ᐅᕝᕙᓘᓐᓃᑦ ᐃᓅᖃᑎᒌᓐᓂᑎᒍᑦ ᑐᕃᓐᓇᑐᒃᑯᑦ ᑐᕃᓐᓇᖏᑦᑐᑯᓪᓘᓃᑦ ᓱᕐᕃᓯᒪᓂᖃᕋᔭᕐᑐᖅ ᒪᑭᕝᕕᒥᒃ ᐊᒻᒪᓗ/ᐅᕝᕙᓘᓐᓃᑦ ᐱᓇᓱᐊᖃᑎᖏᓐᓂᒃ ᐱᒐᓱᐊᕐᓂᖏᓐᓂ ᐱᓇᓱᒍᑦᔨᒍᑎᓂᒃ ᓇᐅᑐᐃᓐᓇᓕᒫᓄᖓᓕᖓᔪᓂᒃ ᑎᒥᐅᔪᓂᒃ. (ᑕᑯᓗᒋᑦ ᐊᓪᓕᓃᑦᑐᑦ ᐃᓚᐅᒍᒪᓂᕐᒥᒃ ᓇᓗᓀᕐᓯᓂᐅᑉ ᐊᒡᓚᕕᑦᓴᖓᓂᒃ).
ᑎᓕᔨᒍᑎᐅᑉ ᐊᒡᓚᕕᑦᓴᖓ:
ᑎᓕᔨᒍᑎᐅᑉ ᐊᒡᓚᕕᑦᓴᖓ ᑖᑦᓱᒥᖓ ᓂᕈᐊᕐᑕᐅᑎᒐᓱᒍᒪᔪᒥᒃ ᓄᐃᑦᓯᒋᐊᖃᕐᑎᓯᔪᖅ ᓇᖕᒥᓂᖓᓅᓕᖓᔪᓂᒃ ᑐᑭᓯᒪᓪᓗᑯᐊᐱᒍᑎᑦᓴᓂᒃ ᐊᒻᒪᓗ ᓇᓪᓕᐊᓂᒃ ᓂᕈᐊᕐᑕᐅᓯᒪᕕᒻᒥᒃ ᓂᕈᐊᕐᑕᐅᕕᖃᕋᓱᒻᒪᖔᑦ.
ᑖᓐᓇ ᐊᒡᓚᕕᒋᒋᐊᓕᖓ ᐊᑎᓕᐅᕐᑎᓯᕕᐅᓯᒪᒋᐊᖃᕐᒥᔪᖅ 10ᓂᒃ ᑎᓕᔨᔪᑦ ᐊᑎᖏᓐᓂᒃ, 5-ᓂᒃ ᐃᑭᓐᓂᓴᐅᒋᐊᖃᖕᖏᑐᑦ ᑖᒃᑯᐊ ᓄᓇᕐᖃᑎᒋᖕᖏᑕᕆᒋᐊᓕᖏᑦ ᐃᓄᐃᑦ ᓄᓇᓕᖏᓐᓂ ᐊᓯᖏᓐᓂᒥᐅᔭᐅᓗᑎᒃ. ᑎᓕᔨᒍᑎᓕᐅᕐᑐᑦ ᐊᑎᕐᒥᓂᒃ ᓄᐃᑕᑎᑦᓯᒋᐊᓖᑦ, ᐃᓚᐅᔫᒍᑎᒥᑕ ᑭᓯᑦᓯᒍᑎᖓᓂᒃ ᐊᒻᒪᓗ ᓂᕈᐊᕐᑕᐅᑎᒐᓱᓚᖓᔪᒥᒃ ᐃᓄᒃᑎᑐᑦ ᐅᖄᒍᓐᓇᓯᐊᕆᐊᖓ ᓱᓕᓂᕃᓗᑎᒃ.
ᓱᓕᒋᐊᓪᓚᒃ, ᓂᕈᐊᕐᑕᐅᑎᒐᓱᐊᓚᖓᔪᖅ ᐊᑎᓕᐅᕐᑎᓯᓯᒪᒋᐊᓕᒃ 3-ᓂᒃ ᐃᑭᓐᓂᓴᐅᖕᖏᑐᓂᒃ ᒪᑭᕝᕕᒥ ᐅᓪᓗᒥ ᓄᓇᓕᒻᒥᓂᒃ ᑭᒡᒐᑐᕐᑎᐅᓱᑎᒃ ᑲᑎᖕᖓᔨᓂᒃ ᐅᕝᕙᓘᓐᓃᑦ ᐳᕐᑐᓂᕐᓴᓂ ᑲᑎᖕᖓᔨᓂᒃ – ᑭᓯᐊᓂ, ᐳᕐᑐᓂᕐᓴᓂ ᑲᑎᖕᖓᔨ ᓂᕈᐊᕐᑕᐅᑎᒋᐊᓪᓚᒐᓱᑦᑐᖅ ᑖᒃᑯᓂᖓ 3-ᓂᒃ ᐊᑎᓕᐅᕐᑎᓯᓯᒪᒋᐊᖃᕐᑎᑕᐅᖕᖏᑐᖅ.
ᐃᓚᐅᒍᒪᓂᕐᒥᒃ ᓇᓗᓀᕐᓯᓂᐅᑉ ᐊᒡᓚᕕᑦᓴᖓ:
ᒪᓕᑦᓱᑎᒃ Charbonneau ᖃᐅᔨᓴᕐᑎᑯᑦ ᑯᐯᒻᒥ ᓄᐃᑕᖏᓐᓄᑦ, ᑯᐊᐳᕇᓭᑦ ᓲᕐᓗ ᒪᑭᕝᕕᑎᑐᑦ ᑲᒪᑦᓯᐊᓯᒪᒋᐊᖃᕐᑎᑕᐅᕗᑦ ᐃᒫᒃ ᓂᕈᐊᕐᑕᐅᓯᒪᑦᓱᑎᒃ ᑲᑎᖕᖓᔩᑦ ᐱᐅᓯᖃᕈᓯᖏ, ᐱᓂᐊᕐᓂᖏᑦ, ᓱᓇᓱᐊᕐᑎᓯᓂᖏᑦ ᐊᒻᒪᓗ ᐱᓇᓱᐊᕐᓂᖏᑦ ᓱᕐᕃᒐᔭᕐᑌᓕᑎᓗᒋᑦ ᒪᑭᕝᕕᒥᒃ ᐊᒻᒪᓗ/ᐅᕝᕙᓘᓐᓃᑦ ᑎᒥᖁᑎᖏᓐᓂᒃ ᐱᒐᓱᐊᕐᓂᖏᓐᓂ ᐱᓇᓱᒍᑦᔨᒍᑎᓂᒃ ᓇᐅᑐᐃᓐᓇᓕᒫᓄᖓᓕᖓᔪᓂᒃ ᑎᒥᐅᔪᓂᒃ.
ᑌᒣᒻᒪᑦ, ᑕᒪᒃᑯᐊ ᑐᑭᓯᒪᐅᑎᑦᓭᑦ ᓱᓪᓕᑕᐅᒍᑎᑦᓴᖏᓐᓄᑦ, ᓂᕈᐊᕋᑦᓴᖑᒐᓱᐊᕐᑐᖅ ᑭᐅᒋᐊᓕᒃ 3-ᓂᒃ ᐊᐱᕐᓲᑎᓂᒃ ᑕᒪᓐᓇ ᐱᓪᓗᒍ ᐊᑎᓕᐅᕐᓯᒪᓗᓂᓗ ᐃᓚᐅᒍᒪᓂᕐᒥᒃ ᓇᓗᓀᕐᓯᓂᐅᑉ ᐊᒡᓚᕕᑦᓴᖓᓂᒃ:
(1) ᓂᕈᐊᕋᑦᓴᖑᒐᓱᐊᕐᑐᖅ ᖄᖏᕐᓂᑯᓕᐅᕐᕕᒥᒃ ᓇᖕᒥᓂᖃᕐᓂᕈᓂ ᐊᕐᕌᒍᓂᑦ 5-ᓂᑦ ᖄᖏᕋᑖᕐᑐᓂᑦ, ᖄᖏᕐᓂᑯᓕᐅᕐᕕᖓ ᖃᓄᐃᑦᑐᔭᐅᒐᓗᐊᕐᐸᑦ (ᑯᐊᐳᕇᓴᓐ, ᐱᓇᓱᖃᑎᒌᓐᓂᖅ, ᐃᓄᑐᐊᒧᑦ ᓇᖕᒥᓂᕆᔭᖅ, ᖄᖏᕐᓂᑯᓕᐅᕐᓂᒨᕐᐸᑦ ᖄᖏᕐᓂᑯᓕᐅᕐᓂᒨᖕᖏᑲᓗᐊᕐᐸᓘᓐᓃᑦ) ᐊᒻᒪᓗ ᖄᖏᕐᓂᑯᓕᐅᕐᕕᐅᑉ ᐊᑎᖓᓂᒃ ᓄᐃᑦᓯᒋᐊᖃᕐᒥᓱᓂ.
(2) ᓂᕈᐊᕋᑦᓴᖑᒐᓱᐊᕐᑐᖅ ᐱᓇᓱᐊᕐᑐᕕᓂᐅᑉᐸᑦ ᑲᒪᔨᐅᓂᕐᒥᒃ ᑲᑎᖕᖓᔨᐅᓂᕐᒥᓘᓐᓃᑦ ᐊᕐᕌᒍᓂ 5-ᓂᑦ ᖄᖏᕋᑖᕐᑐᓂᑦ, ᐃᓚᒋᔭᐅᑎᓪᓗᒋᑦ ᓄᓇᒥ ᑎᒍᒥᐊᕐᑏᑦ, ᑯᐊᐸᖃᑎᒌᕝᕖᑦ, ᖄᖏᕐᓂᑯᓕᐅᕐᑎᐅᖏᑦᑐᑦ ᑯᐊᐳᕇᓭᑦ, ᐅᕝᕙᓘᓐᓃᑦ ᐊᓯᖓ ᓇᖕᒥᓂᕆᔭᐅᑦᓱᓂ ᑯᐊᐳᕇᓴ.
(3) ᖄᖏᕐᓂᑯᓕᐅᕐᕖᑦ ᑖᑦᓱᒧᖓ ᓂᕈᐊᕋᑦᓴᖑᒐᓱᑦᑐᒧᑦ ᓇᖕᒥᓂᕆᐅᔪᕕᓃᑦ ᑲᑎᖕᖓᔨᐅᕕᒋᓯᒪᔭᖏᓪᓘᓃᑦ ᐸᓯᔭᑦᓴᐅᓂᕋᕐᑕᓯᒪᓐᓂᐸᑦ ᐊᕐᕌᒍᓂᑦ 5-ᓂᑦ ᖄᖏᕋᑖᕐᑐᓂᑦ ᐱᖁᔭᕐᒥᒃ ᐅᕝᕙᓘᓐᓃᑦ ᐸᕐᓇᓀᕐᑕᐅᓯᒪᓚᕿᒍᑎᐅᒍᓐᓇᑐᒥᒃ ᓯᖁᒥᑦᓯᓂᕕᓂᕐᒧᑦ ᐱᒐᓱᐊᕇᒃᑯᑎᒋᓚᕿᓚᖓᔭᕕᓂᕐᒥᓂᒃ ᐱᓇᓱᑦᑎᑕᐅᒍᑎᓄᑦ ᓇᐅᓕᒫᓅᓕᖓᔪᓂᑦ ᐱᓇᓱᐊᕐᕕᒥᑦ.
ᑖᒃᑯᐊ ᖁᓛᓃᕐᓯᓂᑦ ᐅᖃᕐᑕᐅᔪᑦ ᐱᓇᓱᐊᖏᓐᓇᕋᓗᐊᕐᐸᑕ ᐱᓇᓱᐊᒍᓐᓀᓯᒪᒐᓗᐊᕐᐸᑕᓗ ᓱᖁᑎᐅᖕᖏᑐᖅ, ᐅᖃᐅᓯᕆᒋᐊᓕᑎᑦ ᑕᒡᒐᓂ ᐊᒡᓚᕕᑦᓴᖓᓂ.
ᑕᒐᑕᒐᐅᑎᓪᓗᒍ ᓄᓇᓕᓐᓂᑦ ᑲᑎᖕᖓᔨᒋᔭᐅᒍᕕᑦ ᒪᑭᕝᕕᒥ:
ᓄᕐᖃᓂᕋᒋᐊᖃᕐᖁᖔ ᐱᓇᓱᒐᕋᓂᑦ ᓄᓇᓕᒻᒥ ᑭᒡᒐᑐᕐᓂᒥᒃ ᑲᑎᖕᖓᔨᐅᓂᕋᓂ ᓂᕈᐊᕐᑕᐅᑎᒐᓱᐊᕈᒪᑐᐊᕈᒪ ᐳᕐᑐᓂᕐᓴᓄᑦ ᓂᕈᐊᕐᓂᒥ?
ᑕᒪᓐᓇ ᑐᑭᑖᕐᑕᐅᒐᔭᕐᑐᖅ ᓂᕈᐊᕐᑕᐅᑎᒐᓱᓕᑌᓐᓇᕈᕕᑦ ᐅᕝᕙᓘᓐᓃᑦ ᑕᒡᒍᖓ ᓂᕈᐊᕐᑕᐅᓯᒪᕕᒋᓚᐅᕐᑕᓄᑦ ᓂᕈᐊᕐᑕᐅᑎᒐᓱᒋᐊᓪᓚᒪᖔᕐᐱᓘᓐᓃᑦ. ᑕᒡᒍᖓ ᓂᕈᐊᕐᑕᐅᓯᒪᕕᒋᒌᕐᓱᒍ ᓂᕈᐊᕐᑕᐅᑎᒋᐊᓪᓚᒐᓱᐊᕈᕕᑦ, ᓄᕐᖃᓂᕋᒋᐊᑐᖕᖏᑐᑎᑦ ᓂᕈᐊᕐᑕᐅᑎᒐᓱᐊᕐᓂᑯᓄᑦ. ᓂᕈᐊᕐᑕᐅᑎᒐᓱᓕᑌᓐᓇᑐᐊᕈᕕᑦ ᓂᕈᐊᕐᑕᐅᓯᒪᕕᒻᒧᑦ, ᑌᒣᓕᖓᔪᒦᒍᕕᑦ ᓄᕐᖃᓂᕋᕐᓯᒪᔪᖁᑎᒋᔭᐅᒐᔭᕐᑐᑎᑦ ᑌᑲᓂ ᐅᓪᓗᖓᓂ ᓂᕈᐊᕐᑕᐅᓂᕐᒧᑦ ᑎᓕᔭᐅᒍᑎᓂᒃ ᐊᒡᓚᓯᒪᑎᓪᓗᒋᑦ ᓄᐃᑦᓯᕕᒋᔭᕐᓂ.
ᑕᒐᑕᒐᐅᑎᓪᓗᒍ ᓄᓇᓕᓐᓂᑦ ᑲᑎᖕᖓᔨᒋᔭᐅᒍᕕᑦ ᒪᑭᕝᕕᒥ
ᓄᕐᖃᓂᕋᒋᐊᖃᕐᖁᖔ ᐱᓇᓱᒐᕋᓂᑦ ᓄᓇᓕᒻᒥ ᑭᒡᒐᑐᕐᓂᒥᒃ ᑲᑎᖕᖓᔨᐅᓂᕋᓂ ᓂᕈᐊᕐᑕᐅᑎᒐᓱᐊᕈᒪᑐᐊᕈᒪ ᐳᕐᑐᓂᕐᓴᓄᑦ ᓂᕈᐊᕐᓂᒥ?
ᐊᐅᑲ. ᓂᕈᐊᕐᑕᐅᓴᕐᓂᕈᕕᑦ ᐳᕐᑐᓂᕐᓴᓂ ᑲᑎᖕᖓᔨᐅᓂᕐᒧᑦ, ᓄᕐᖃᓂᕋᕐᓯᒪᓃᑦ ᓄᓇᓕᒻᒥ ᑭᒡᒐᑐᕐᓂᒥᒃ ᑲᑎᖕᖓᔨᐅᓂᕐᒥᑦ ᑐᑭᓯᔭᐅᒐᔭᕐᑐᖅ ᐊᑐᓯᒋᐊᖓ ᑌᑲᓂ ᓂᕈᐊᕐᑕᐅᕕᑉᐱᑦ ᐅᓪᓗᖓᓂ
ᑕᒐᑕᒐᐅᑎᓪᓗᒍ ᓄᓇᓕᓐᓂᑦ ᑲᑎᖕᖓᔨᒋᔭᐅᒍᕕᑦ ᒪᑭᕝᕕᒥ (ᐅᕝᕙᓘᓐᓃᑦ ᑎᒥᖁᑎᖓᓂ)
ᓄᕐᖃᓂᕋᒋᐊᖃᕐᖁᖔ ᐱᓇᓱᒐᕋᓂᑦ ᓄᓇᓕᒻᒥ ᑭᒡᒐᑐᕐᓂᒥᒃ ᑲᑎᖕᖓᔨᐅᓂᕋᓂ ᓂᕈᐊᕐᑕᐅᑎᒐᓱᐊᕈᒪᑐᐊᕈᒪ ᐳᕐᑐᓂᕐᓴᓄᑦ ᓂᕈᐊᕐᓂᒥ?
ᐋ (ᑭᓯᐊᓂ ᕋᔭᖕᖏᓱᑎᑦ ᐳᕐᑐᓂᕐᓴᓂ ᑲᑎᖕᖓᔨᐅᕕᒋᒌᕐᑕᓄᑦ ᓂᕈᐊᕐᑕᐅᑎᒋᐊᓪᓚᒐᓱᑐᐊᕈᕕᑦ). ᓄᕐᖃᓂᕋᒍᑎᑎᓐᓂᒃ ᓄᐃᑦᓯᓯᒪᒋᐊᖃᕐᑐᑎᑦ ᑌᓐᓇ ᐅᓪᓗᖅ ᑭᖑᓪᓕᐸᐅᑎᓪᓗᒍ ᓂᕈᐊᒐᑦᓴᐅᓂᕐᒧᑦ ᑎᓕᔭᐅᒍᑎᓄᑦ ᐊᒡᓚᕕᑦᓴᖏᓐᓂᒃ ᑐᓂᔨᕕᒋᔦᑦ ᓂᕈᐊᕐᑐᓕᕆᔨᒻᒪᕆᒻᒧᑦ. ᐱᓇᓱᑦᑎᐅᓂᕈᕕᓪᓕ ᒪᑭᕝᕕᐅᑉ ᑎᒥᖁᑎᖓᓂ, ᑕᒪᓐᓇ ᐱᓇᓱᒐᕐᒥ ᓄᕐᖃᓂᕋᕐᓯᒪᒋᐊᖃᕐᓂᖅ ᐊᑐᕆᐊᖃᕋᔭᕐᒥᔪᖅ ᐃᓂᖃᑐᐊᕈᕕᑦ ᐳᕐᑐᓂᕐᓴᓂ ᑲᑎᖕᖓᔨᐅᕕᒻᒥ ᐅᕝᕙᓘᓐᓃᑦ ᑲᒪᔨᐅᑉ ᐱᓇᓱᒐᖓᓂᒃ ᑌᑲᓂ ᒪᑭᕝᕕᐅᑉ ᑎᒥᖁᑎᖓᓂ.
ᐅᑯᐊ ᖃᐅᔨᒪᒋᐊᓕᑎᑦ ᒪᓕᒉᑦ ᐊᑐᕐᑎᑕᐅᔪᑦ ᓂᕈᐊᕐᑕᐅᒍᒪᐅᑎᓂᒃ ᐅᖃᓕᒪᓂᕐᒧᑦ:
ᓂᕈᐊᕋᑦᓴᖑᕐᓯᒪᔪᑦ ᓂᕈᐊᕐᑕᐅᑎᒐᓱᐊᕐᓱᑎᒃ ᑯᐊᐳᕇᓴᒥ ᐳᕐᑐᓂᕐᓴᓂ ᑲᑎᖕᖓᔨᐅᓂᕐᒧᑦ ᓂᕈᐊᕐᑕᐅᒍᒪᒍᑎᒥᓂᒃ ᐅᖃᓕᒪᓂᐊᖕᖏᓚᑦ ᑌᑲᓂ ᐅᓪᓗᕆᔭᐅᑎᑕᕐᒥ ᑖᑦᓱᒧᖓ ᑲᑎᖕᖓᔨᐅᕕᒻᒧᑦ ᓂᕈᐊᕐᓂᒥᒃ.
ᓂᕈᐊᕐᑕᐅᒍᒪᓂᕐᒥᓂᒃ ᐱᓇᓱᐊᕐᕕᒥᓃᑦᑎᓗᒋᑦ, ᓂᕈᐊᕐᑕᐅᑎᒐᓱᐊᕐᑐᒥᒃ ᐊᑐᕆᐊᓪᓚᕕᖃᕐᑐᖃᖕᖏᓚᖅ ᓇᓪᓕᖏᓐᓂᓘᓐᓃᑦ ᑯᐊᐳᕇᓴᐅᑉ ᑎᒥᐅᕈᑎᖓᑕᓘᓐᓃᑦ ᐊᑐᕋᑦᓴᖁᑎᖏᓐᓂ, ᐱᖁᑎᖏᓐᓂ, ᐱᕙᓪᓕᖁᑎᖏᓐᓂᓘᓐᓃᑦ, ᐃᓅᒐᓗᐊᕐᐸᑦ, ᐱᖁᑎᐅᒐᓗᐊᕐᐸᑦ, ᑮᓇᐅᔭᐅᒐᓗᐊᕐᐸᓘᓐᓃᑦ (ᐃᓚᐅᑎᓪᓗᒋᑦ ᑖᒃᑯᑑᒐᑎᒃ ᐱᓇᓱᑦᑎᐅᑉ ᐊᑭᖃᖕᖏᑐᑦ ᐅᕝᕙᓘᓐᓃᑦ ᐊᑭᑭᓪᓕᒋᐊᕐᓯᒪᔪᑦ ᖃᖓᑦᑕᐅᑎᖏᑦ, ᐃᖏᕐᕋᐅᑎᖏᑦ, ᐱᒍᑦᔨᒍᑎᖏᑦ, ᐊᓯᖏᓪᓗ) ᐱᑦᔪᑎᒋᓗᒍ ᓂᕈᐊᕐᑕᐅᑎᒐᓱᐊᕐᓂᖅ, ᐱᕕᖃᕐᕕᒋᓲᕆᒐᓗᐊᕈᓂᒋᒃ ᐅᕝᕙᓘᓐᓃᑦ ᑕᒪᒃᑯᐊ ᐊᑐᕋᑦᓭᑦ, ᐱᖁᑏᑦ, ᐱᕙᓪᓕᖁᑎᓘᓐᓃᑦ ᖃᖓᑐᐃᓐᓇᑯᑦ ᐊᑐᐃᓐᓇᐅᑎᑕᐅᓲᖑᖕᖏᑐᐊᕐᐸᑕ ᐃᓄᓐᓄᑦ ᐃᓘᓐᓀᓄᑦ. ᑕᒪᓐᓇ ᐃᓚᖃᓚᖓᔪᖅ ᓇᓪᓕᑐᐃᓐᓇᖏᓐᓂ ᐃᓘᓐᓀᓂᓘᓐᓃᑦ ᐱᕙᓪᓕᖁᑎᓂ ᐊᑐᐃᓐᓇᐅᔪᕕᓂᕐᓂ ᑖᑦᓱᒧᖓ ᐃᓄᒻᒧᑦ ᐃᓂᖃᕐᓱᓂ ᑯᐊᐳᕇᓴᐅᑉ ᑎᒥᐅᕈᖁᑎᖓᑕᓘᓐᓃᑦ ᐃᓗᐊᓂ, ᓂᕈᐊᕐᑕᐅᑎᒐᓱᐊᕐᑐᖅ ᓯᖁᒥᑦᓯᒍᓂ ᑖᑦᓱᒥᖓ ᐊᕕᑦᑐᓯᒪᓂᕐᒥᒃ ᐃᓚᐅᒍᓐᓀᑎᑕᐅᑐᐃᓐᓇᕆᐊᓕᒃ ᓂᕈᐊᕐᑎᓯᔨᒧᑦ.
ᓂᕈᐊᕐᑕᐅᑎᒐᓱᐊᕐᑐᑦ ᐱᓇᓱᐊᕐᕕᒥᓃᑦᑎᓗᒋᑦ, ᐳᕐᑐᓂᕐᓴᓂ ᑲᑎᖕᖓᔨᐅᓂᕐᒥ ᓂᕈᐊᕐᑕᐅᓯᒪᕕᒻᒥᓄᑦ ᐃᓂᒥᓄᑦ ᓂᕈᐊᕐᑕᐅᑎᒋᐊᓪᓚᕋᓱᑦᑐᖅ ᐱᔪᓐᓇᐅᑎᓕᒫᒥᓂᒃ ᐊᒻᒪᓗ ᓄᑭᖃᕈᑎᓕᒫᒥᓂᒃ, ᐃᓂᖓᑕ ᑌᔭᐅᒍᑎᖓ ᑮᓇᐅᑦᔭᓵᖓᓗ ᑲᔪᓯᔪᑑᑎᓪᓗᒋᒃ, ᓅᑕᐅᔨᐊᖃᕐᓂᐊᑐᖅ ᐊᓯᐊᓄᑦ ᐳᕐᑐᓂᕐᓴᓂ ᑲᑎᖕᖓᔨᒧᑦ ᒪᓕᑦᓱᒍ ᐱᖁᔮᐱᒃ 5(h) (ᐳᕐᑐᓂᕐᓴᒥ ᑲᑎᖕᖓᔨᐅᑉ ᐱᓇᓱᕝᕕᒦᖕᖏᓂᖓ, ᐱᕐᖃᔭᖕᖏᒍᑎᖃᕐᓂᖓ ᐅᕝᕙᓘᓐᓃᑦ ᓂᕈᐊᕐᑕᐅᑎᒐᓱᓐᓂᒥᒃ ᐱᓇᓱᐊᕐᕕᖏᑦ).
ᒪᑭᕝᕕᒥ ᐱᖁᔮᐱᐅᑉ 4(f) ᐊᑦᔨᖓᓂᒃ ᐱᒍᒪᑐᐊᕈᕕᑦ ᐊᓯᓕᒫᖏᓐᓂᓘᓐᓃᑦ ᐱᖁᔮᐱᓐᓂᒃ ᐊᑐᕐᑎᑕᐅᔪᑦ ᐊᑦᔨᖏᓐᓂᒃ, ᐅᖄᕕᒋᑦᑌᓕᒍᓐᓀᓗᒍ ᓘᓯ ᑯᔩ, ᓂᕈᐊᕐᑐᓕᕆᔨᒻᒪᕆ ᐅᕙᓂ elections@makivik.org